Chumi tuk chuan Hiro chu mak tak maiin school a rawn kal ve teh mial a.
A fala inbiak a duh thu a sawi a,Library-ah bawk chuan kan inhmu leh a,kei chu nizana engmah thleng lo ang maiin ka ngawi reng a..
Kan ngawih dun vang vang hnu chuan Hiro chuan,"Inthen ka duh"a rawn ti bul hmuk..
"Eng vangin maw?Harsatna a awm a mi?Engvang ngawtin nge kan inthen ang?" ti a ka zawh chuan a ni chuan awlsam êt hian,"Hmeichhe dang chhai kual te pawh ka chak leh deuh tawh a..chubakah nangpawh nizanah Nozomu nen in in kiss a ni lawm ni?"
"Eng maw.....?....nangmah a nih kha midang kiss zawk chu,Saori nen in awmdan kha ka hmu vek asin" tiin ka insum theilo chu ka mittui a parawl thram mai....
Ka rilru na lutuk chu kan couple zungbun lei,engtik lai pawha ka phelh phal loh chu ka kut atang chuan ka phawi a,amah vawm nan ka hmang a,Library atang chuan ka tlan chhuak nghal....
Tinge Hiro hi a danglam tak em em le?
Nasa taka ka ngaihtuah hnu pawhin kan inthen mai a ni tih chu pawm har ka ti a.Ka hrethiamlo takzet a ni.
Hiro hi ka kaltir mai thei lovang,Saori nen an awmdun chungchang kha chu ka theihnghilh sak vek thei mai ang..
A lo lêt leh dawn phawt chuan engmah ka sawi buai ngai lovang a,a duh dan ang chauhin ka awm ang..
Hiro chu inhmuh puiah sawmin ka text a,a hmun ngainat em em,luikamah khan lokal turin ka ngen a..
A lo kal hma chu ka nghah tur thu te ka thawn zawh chuan chu lai hmunah chuan ka va nghak ta a..
Rei tak chhung ka nghak a,a hmel reng hmuh tur a awmlo..a lo kalloh chuan ka theihnghilh ang a,hma lam ka pan tawh ang tiin ka infuih a..
Nî a tlak dawn hnaihah chuan a bicycle nen chuan a rawn in khalh a..
Ral atanga alokal tih ka hmuh chuan ka hlim hle..ka pan hnaih dawn chuan a ni chuan ,“Ding rawh ..pên khat pawh rawn pên hnai tawh suh..min theihnghilh la,midang nei ang che.."tiin amah ka vawmna zungbun vêk chuan min rawn vawm a,ka lo dawng a..a cycle chuan min tlansan ta vang vang a..
Ka rilru chu na hle mahse,min hmangaih lotu tana ka thinlung tihhrehawm reng chu ka duh ta bik lova..amah ka theihnghilh theih nan theihtawp chhuah ka tum ta zawk a..
Mahse,kum3 hnuah pawh ngaihzawng dang neih lam chu ka ngaihtuahnaah a leng lo reng reng ..tu mipa mah hian Hiro ai an awh zo lo a ni..
Ka theihnghilh tawh tiin han sawi ve bawk thin mah ila,ka thinlung tak chuan eng tik lai pawhin a ngaihtuah a,a dam leh dam loh te,midang kiangah chuan hringnun hun hlim takin a hmang em tih te chu ka hre chak thin takzet a ni....
December ni 24 a lo thlen chang pawhin kha hmunah khan hmuh tur a awm ngai lova,mahse a pangpar dah ni awm tak,kan inhmelhriat nî-a a pangpar min pek tum ang chiah kha a lo awm thin a..Ni e....Hiro hi a ngilnei takzet a ni,min kalsan hnuah pawh a fa ngei hi chu thi tawh mah se a hlamchhiah thei biklo a ni ngei ang..
Ka note,nangmah ang tho hian i nu pawh hi a mal takzet a sin...
Tunkum December chu kum dang aiin a vawt zual a,Aya chuan party a buatsaih a,mahse kal ka tum lo..
Diktak chuan Hiro nen kan inthen atang khan tum ve hle mah ila,khaw dang ka hawi thei thlawt lo a ni..
Party-naah pawh vawikhat mah ka kal ngai tawh lo....
Aya chuan hmaichhanah meuh kal turin kan inah min rawn tur a,kan thian pathum chiah kan nih dawn thu a sawi chuan,min tur nasat êm avangin kal ve chu rem ka ti ta a....
Mahse min lo tihder lek chu niin....
Mipa dang pathum an rawn kal belh ve a,"Mi pakhat theihnghilh i duh chuan mi pakhat i neih a ngai alawm"Aya chuan a ti sam ët a....
Ka lawm lo ang reng ..hetiang a ni dawn tih hria ila chuan ka kal tawp lovang mawle ....an bengchhengin an nui nasa bawk si..chumi zan chu ni 24 zan a ni a,chhun lama ka kal hmanloh avangin chumi zanah chuan kal ngei ngei ka ngai a,Aya pawh chuan min hriatpui a,ka kal chhuah dawn chuan min dang lui ta bik lova....
Mipa pakhat lo awm ve Yo-a chuan min zui a tum a,fiamthu duh tak mai a ni a,a nêl awm bawk a..remti lo hle mah ila,thian ten hruai ve tura min nawr tlat avang chuan min zui chu rem ka ti ta..
Kawng pengah chuan min lo nghak turin ka ti a....car chhungah chuan ngawi rengin a thu a,min lo nghak a..
Chulai hmun ka va thlen chuan mipa pakhat 'beanie' khum hi ka va hmu a,pangpar a lo dah mek a..a ding chhuak tur chu ka va hmu a..
Mak ka ti angreng deuh .....
A rawn hawi chuan.........Hiro.........
"A hmel chu a chak loh hmelin a dawldang em em a....mahse hlim hmel taka min nuih chung chuan ka dam that leh that loh te min zawt a..
A lukhum khum chu a style a ni ngai si lova,mak ka ti hle a..a chhan te ka zawh chuan a tihdan thar a nih thuin min chhang a..
Min mangtha a,a hawna tur lam kawng chu a pan a....mit khap miahloin ka thlir reng....
Mi mawl pa,tikhan ka tello chuan i hlim bawk maw??..I tello in hlim takin ka lo awm em tih te min zawt ta che....
Kei chu ka hlim asin,nang chuan i hlimloh zia thup bo tumin i nui lui anih kha ....keichu.....keichu...i tello pawn ka tha ania aw....
Hun a ral chak hle a,college pawh ka graduate ve tawh.....Yo chu ka college lunaah a lo luh ve avangin kan inpawh phah hle a,min ngaina viauin ka hria....ngaina satliah pawh a ni tawh lo,min duh thu min hrilh hnu kha chuan ahma aiin min pawh lehzual a tum a,kei chuan a rilru tihnat ka hlau takzet....chuvangin ka biak danah pawh ka fimkhur a,thian aia thûk ang zawng chuan ka be ngailo....
Amah pawhin a hrethiamin a pawm thiam em em mai a,min nghak deuh tawp a ni ber mai.....
Mahse ka sawi tawh ang khan mipa dang laka rilru han pek mai chu a harsa a ni....
A ngai tê bawkin chumi kum pawh chuan Yo chuan min hruai a tum lui leh tlat a..min lo nghahna ngaiah chuan min nghak a..
Pangpar dahtur chu kengin kum tina ka kal ziahna hmun chu ka thleng leh ta ....
Pangpar dah zawhah chuan ka sirah hian Hiro pangpar dah thin ang chiah kengin Kezora chu a lo kal a..
"Kezora....nang hetah maw ....eng nge i rawn tih ve dawn" tiin ka lo zawt nghal thuai a,Kezora chu Hiro thian tha tak mai a ni a....mahse chulai hmun a rawn thleng ve chu mak ka ti hle,Hiro tello lehnghal in....
Kezora chu a hlauhthawn hmel a,ka mitah pawh min en ngam lo hian ka hria,"Hiro-an min rawn tir a"tiin a pangpar ken chu a dah a..
Kal leh nghal vat tum chuan a tho hluai a,pen thum vel a pen tawh tihah hian a rawn hawi lêt a....
Hrehawm tih hmel takin,"Mika.....tun atang chuan Hiro chu a rawn kal thei tawh lovang, a aiah keimah ka lo kal ziah tawh dawn a ni" a tih chuan mak ka tiin ka hrethiamlo hle.....
"Eng nge i sawi awmzia,eng vangin maw Hiro chu a lokal loh ang?"
"Zep turin min ti a,mahse hei hi a tha lovin ka hria a ni...Hiro hian Cancer a vei a,enkawl dam theih a ni tawh lo..
Hun pawh a ngah tawh lo a ni...va hmu ngei la thain ka hria" tiin damdawiin address te chu min pe a..
Chu thu ka hriat chuan din pawh ka ding tha hlei theilo,ka ni deuh nghulh mai....thin tawtna chuan min tuam ni ber hian ka hria....kan inhmuh hnuhnun ber ni khan lukum te a lo khum tlat a,a chhan chu a chemo-therapy khai vangin a sam a tla a ni ngei ang....
Ka hmui chu ka hup bet a,ka tah chhuak lutuk chu insum ka tum ve trang trang....
Yo chu ka bulah a lo ding reng tawh....
"Mika,tinge?Thil thleng a awm em ni?"
Ka lu chu ka bu nghauh nghauh va....
Ka mittui chu ka dang zo lo,ka hmui chu insum tumin ka pet ve trang trang a..mahse ka tap chhuak hlawl....
Yo chu thil awm dan ka hrilh ta vek a,ani pawh chuan ka la hmangaih hle a ni tih hriain min chelh beh chu duh viau mah se a thei ta biklo....
Tunge hmangaih te bula kal tur dang thei ang ni?....Hmangaihtu pawhin a dang zo lovang...
Hiro hmu tur chuan ka va kal nghal a..
A awmna room ka va thlen chuan a lo mu dang bal mai a..ka thinlung chu a na vawng vawng....
Ka lam chu a rawn hawi a,chutiang dinhmuna ka va hmu ta mai chu hrehawm a tih hmel takzet a ni....
Mittui parawl trun chungin ka insûm theilo chu ka va kuah chawt.
"Hei leh chen hi nangmahin ilo tuar a maw?....min kalsan chhan kha hei hi a ni tiraw?Min kalsan chuan he khawvela i awmloh hunah pawh lungngai lutuk lovin nang theihnghilh chein hlim takin ka awm theih i ring tiraw? ....I ti sual let dêr a ni....Eng tin nge i tellova ka that mai i rin theih zawk?....mi sual pa.."
Ka hnuk ulh lutuk chu ka hau zawm thei tawhlo ....ka sam chu a rawn chûl a..ani pawh mipa inti pa ve tak ni lo se chu insum duh lovin a tap chhuak ve hialin ka ring a ni....
Chuta trang chuan Hiro bulah chuan ka hun tam zawk ka hmang ta a..
Ani pawhin min hnawl phal ta bik lo ..
A hun la neih chu tlêm hle mah se hun a la neih ang zawng zawngte chu ka kianga hman ral vek a duh a..keipawhin a thawk tawp thlenga a kianga awm tlat ka duh a ni ..
Kan pahniha kan len dun thinna te,kan hmun ngainat deuh deuh te chu kan tlawh kual dun a....
A hmun ngainat ber luikam bula phûl hmuna kan mut lai chuan van thiang mawi em em chu kan en dun reng a ..
"Mika,mite hi an thih hnuah vanah an awm thin an ti a..ka awm ve hunah chuan ka hmu chiang thei dawn thei hle che a nih hi.." a han tih chuan ka lung a chhe lek lek....mahse kan boruak nuam tak chu mittui vanga tihchhiat ka duh lova..
"Nî a sat chuan Hiro hi a hlim hle-ah ka ngai ang a,khua a duai chuan a lungngai ni se,ruah a sûr chuan min ngai viau tihna a nimai" ka ti a..
"Trek a tlak chuan ka thinrim tihna a ni leh mai" a han ti leh a....
Kan innuih leh heuh heuh va ....
Hiro check-up a ngaih nî chuan,"Kan pahniha kan thlalak dun zawng zawngte kha lo print vek rawh aw,vawiinah" tiin min chah a..
An check-up lai chuan a bula ka awm theih dawn chuan loh avangin thlalak print tur chuan ka va chhuak a..
Dawr atranga ka chhuak chu kan thlalak print sa te ka en a,thlalak zawng zawngah chuan Hiro chu a nui mawi em em vek a..natna nei miahlo ang mai a ni....a nui hmel ka hmuh chuan keipawh hi ka lo hlim leh veng veng zel....
Ka phone chu a rawn ri a,Minako Hiro-a unaunu a lo ni ..video-a min rawn call avang chuan mak ka ti deuh a..
"Mika,Hiro-a dinhmun a thalo thut a"
Hiro chau taka a meng trek trek chu video atrang chuan ka hmu thei a..
"Hiro ....tuar hram hram rawh aw....ka lo kal nghal dawn a nia ..min lo nghak rawh aw,in tiharh rawh..Hiro,ka lokal mek ania"......
Mittui hnam pûr chung chuan ka theih anga rangin ka tlan nghal a,ka mittui vang chuan khua pawh ka hmu phe ruai mai....
" Mika....ka....hmangaih che....lo lungngai lutuk suh aw....min ngaih chang chuan...... Min ngaih chang chuan van kha.......lo thlir la,ka lo...en reng ang che ....."
"Hiro,eng vangin nge chutiang thil i sawi....chutiang sawi suh...thil tihdun tur kan la ngah lutuk..."
Thei leh theilo hian a rawn nui leh seih a....a mitmeng chaurau tak te atang chuan chakna reng a nei tawh lo a ni...
Chak takin ka tlan a,Hiro chu tihharh hram hram tumin ka be pah reng...
Ka tlan lai chuan ka tlu thlawrh a,
Ka thlalak print sa zawng zawgte chu leiah chuan a tla darh chuai....
Hiro mitmeng chaurau lutuk chu a chhing riai riai a....ka ko eih zo ta lo..
Ka tlu chu ka tho va,leiah chuan ka thu hnawk a,ka theih anga ringin Hiro chu ko mah ila,koh eih zawh a ni ta lo..A tawp thlenga a bula awm kha ka intiam a,mahse..ka van nêp tak êm!
(Thla khat hnuah chuan....)
Hiro thihna vang chuan mu leh mal ka nei thei tawh lo....ka ruak vek a,khawvel hi a reh ruih maiin ka hria..
A nui hmel ka ngaihtuah chang erawh chuan ka han nui ve leh zawk thin..mahse mittui bawkin a tawp a khar leh fo ....
Minako chu kan inah lo kalin lehkhabu pakhat hi min rawn pe a,Diary ni awm tak a ni.."Hiro thihna khan min thrawng hle a,eng dang mah kan ngaihtuah thei lova..Nimin khan hei hi a room-ah ka hmu a,nagman nei la thain ka hria a,pe tur chein ka lo kal a nih hi..A diary ni awm tak a ni" a han ti a,ngawi reng chuan ka la a..Ani pawh chuan min kalsan leh nghal mai....
Lehkhabu chu ka keu va....
Ka chungchang hlir a inziak....kan intawn tan dan te..engkim.....ka kalsan theih nana a tum reng vang pawh ni lova ka rilru a hliam dan te,hrehawm a tih thu te..khang kum chhung zawng khan min theihnghilh ngai bik lo a ni tih te....
December ni24 zana a style thar,lukhum khuma alo kal zana a ziah ni awm tak pawh a awm a,mittui farna ni awm takin a val bial kulh kulh a..
'24th December-Zaninah khan Mika nen kan inhmu fuh palh a,a hmelthat ngaiin a la hmeltha reng..kuah vawng vawng kha ka chak a,mahse chutiang tur chuan ka tina hnem tawk tawh a..amah pawhin hmalam a pan mekin ka hria,lukhum ka khum chhan min zawh lai khan chhan har ka ti ber mai..
Ka kalsan hnu khan mittui tling chunga a rawn hawi reng lai kha a rukin ka lo en reng a,ka hmel ka hmuh leh vang vek a ni........Mika ka hmangaih,ka tihpalh lutuk aw..'.............
Ka chhiar zawm thei tawh lo..ka mittui a luang zawih zawih....lehkhabu chu ka kuah vawng vawng a....
A phêk tawp bera a ziak chu ka han keu leh hram a.....
14th January-Mika hi a muhil tui lutuk a,zanin chu a mang a chhe lehpek hle mai,min enkawl naah a chau viau a ni ang..Doctor sawi dan chuan tun thla bak ka daih tawh a ringlo a,tun thla pawh hi ka daih kher angem tih a sawi thei lo....a pawi lo e,Mika hi van atangin ka thlir reng thei tawh dawn a,mahse a tap lai hmel hmuh tur a tam phah dawn a nih hi....a tah hi chuan a thatna a bo vek,a tap hmelchhe thei lutuk a,a nuih hian angel ang mai a ni leh sia.....
Zanin chauh hi lo daih tawh ta ila....
Zanin chu ka chau zual a ni..Mahse ka mut a chhuak lo..zanin chauh hi Mika kianga ka awm theih hnuhnung ber tur a ni ang em le?..Pitar leh putar kan nih thlenga awm dun ve ka van chak tak..
Mika,kalsan che ka van hreh tak êm!
Ka telloin hlim takin i nui ngai dawn lo tih ka hre si....hrehawm ka ti takzet a ni,i kianga rei tak ka awm theih loh avang hian min ngaidam rawh aw..'
Ka mittui chu ruah sur buan buan ang mai hi a ni..chuti chung pawn ka la tawt up up tho....ka lo ngaihsak tawk lo a ni..min kalsan a tum lai te khan ka lo vuan tlat lo a....tunah chuan vawn beh phak lohvin min kalsan ta si....
Fûr pawh a la ni si lova,vawiin chu khua a duai riau mai,"Hiro....van thiang nalh tak ka hmu chak asin,ka nuih loh avangin i lungngai em ni?".....
Hun han liam leh deuh se la,a tawrh dan tawk ka thiam ve mai ang,Hiro tan nuih ka zir ve mek ania....
~The End~