Dingdi Sensiar

Story tawi te te emaw luanliamna emaw post na
Cck Lalchhuanawmi
Posts: 323
Joined: August 5th, 2022, 8:54 pm

Dingdi Sensiar

Unread post by Cck Lalchhuanawmi » August 5th, 2022, 9:34 pm

Dingdi Sensiar
Ziaktu: Cck Lalchhuanawmi


Hmangaihna, Hmangaihna, he thu hi ka haw takzet, a kawnga tluang taka ka kal ṭhin loh vang a ni pakhat.

" In ṭhianpa hi engvangin nge hmangaihna hian min tihnât ṭhin?", ngawi renga ka bula ṭhu ka ṭhiante chu ka zawt a, " I sual hre hru em lawm", Nghaka chuan a lo ti, ka sual hre hru vang maw, ka kiai deuh sak a, " A dik, ka sual hre hru vang a ni e", ka ṭhiante hi chuan chhungkua an din vek tawh a, kei erawh hmangaihna vangin ka la kun tlawk tlawk, salaa!.

" Ti kha chuan, in inṭhen fel tawh bawk a, nangmah mitmei deuh tu che chu engkhaw sawi set set lovin, Palai kan tir pawp tawh ang", Bâwla chuan ha chang ṭhial bap bap chungin a lo ti ve leh a, " Engtin nge min kawm duh zawk? Ka ṭhian nih hi in zak lo em ni? ",

" Zak a? Tet te aṭanga inkawm tawh kan nih hi, ṭhian pawh ni lovin chhungkua alawm kan nih tawh. Nang aia fel famkim kan ni bik lo, zial i heh lutuk tih loh chu", ka dara beng thek thek chungin Bâwla chuan a ti leh a, kan lo nuih tliar tliar.

Chutianga heh lutuk ka ni lo, a zeuh zeuha zu ṭhin mai ka ni, a in chi hi chu ka duh lo bur, heti chung pawha nuihzat ka hlawh tawk nak laiin, nuihzatlehna tura min siamtu a ni dawn a, chuvang chuan zial hi ka ti ber, chu pawh zozial ngat, kan kawmthlanga pi-i zial ngat.

Tun aṭang chuan mahriak ten ar ang ka vai leh ṭan dawn ta e, a pawi lo; ngaihzawng neih pawh ka duh tawh lo e a, hmangaihnaah min hruai lut a, a tawpah chuan keimah bawk ka nâ leh ṭhin a, awmzia awm lo em mai.

Ka thawhna 'Slice and Piece' dawr panin ka inkhalh kawi ve zar zar a, ka kal hmain ka pain, " Lalrinzual, i nundan hi sim rawh, i ṭhian kawm te khawtlang leh Kohhrana an fel em em laiin nang lah; i zak lo em ni? Engtin nge maw an kawm duh zawk che le, i nau Peka pawh hi entawn rawh", tiin min kam khat leh nghek a, ka chhungte hian eng nundan mah sim tur ka nei lo tih lah an hre si lo, an hre lo pawh a awm ve tho, kei lah hi heti mai ka ni ve si a.

Mahse, an ngaihdana sual turu buru lutuk ka ni hauh lo, Ṭawngṭai hi thlahthlam ka duh loh ber te zing a mi a ni, ka pa min zirtir a ni a, a fapa hian a zirtirna a vawng reng tih a hre si lo.

Dawr chhungah lutin choka ka pan ding nghal a, mahni in pawha chhang ur peih lo hian chhang ka ur tlauh tlauh mai ni, Pizza an ti tak e, changkannain min luhchilh zel a, TV lam chauha chil thli tla duai duaia kan en ṭhin kha, kan han ur ta chu nia, tunah chuan a rim takngial pawh ka haw tawh.

Min dawr tu an ṭhahnem ve thei hle a, dawrah a ei theihin, kan pe/sem chhuak ṭhin bawk, delivery an ti tak e! Kan indaih loh chang chuan ka han pe chhuak ve ang lawp lawp bawk a, ka hnathawh ngaihtuah hi chuan sual hman ka ni lo hrim hrim, ka pa ṭhin hi chu a, ka nau leh ka ṭhiante ai pawhin ka fel zawk daih ang!

Dawr chhungah hian Dingdi par hmuh tur a awm thleh thluah a, dawr neitu leh kan pi ni bawkina a duh dan a ni, Dingdi par a ngaina hle a ni.

" Vawiin chu Zuala, inkhawm turin han insiam ve tawh", ka nuin ka puan sin lai pawt hawng ṭhuai pah hian a ti a, ka lo tawm chawih chawih, " Ka inkhawm hun a la ni lo", inlukhuh chungin ka ti ve lehnghal a, ka mawngah min rawn beng chawrh, ka tho chhuak chiang teh a sin.

Inkhawm loin nilengin inah ka awm leh a, engtik lai aṭangin nge inkhawm te hi ka thatchhiat tak em em ka hre bik hauh lo.

Ka pa lo haw hian min melh salaa leh ang chu, mahse; ṭha takin in ka lo nghak tal alawm.

" Ka u, College kalna man, veivahna leh lehkhabu senso angrengte hi intuak ve ka duh, in dawrah thawh tur a la awm em? Delivery boy emaw waiter ang pawhin", tiin ka pindanah Pekan a lo ti lut a, ka lo en heu mai, " Engvang ringawtin nge hna i thawh ve ang a, ṭha tak khan lehkha zir zawk rawh", kekawr thawlh lut thaihin ka ti a, " A, ka u, eng emaw tal thawh ve ka duh alawm, tlangvala pumpa tianga awm ringawt",

" Engtin vak nge i awm, a remchan te chuan i inhlawh ve ṭhin tho lawm, ka pain a phal chuang lo ang", Scooty chahbi ban chunga ka ti chu beidawn hmel tak hian a thaw hrawk a, min chhuahsan ta daih. Ka pa fa chuam tak hi chu a, khi deuh var varin keipawhin ka pindan ka chhuahsan ve nghal a.

Ka nu leh pa bulah chuan ṭhianpa Nghaka fanu kum hnih tlin lawmnaah, ka hnathawhna aṭanga ka tlang nghal tur thu hrilhin ka inkhalh chhuak ta a.

Kan pi ber hmuh tuma a room ka pan mek laiin ka phone a lo ri a, " Zuala, nalh tawk khan lo inchei ang che, kan nu ṭhiante pawh an lo kal ṭeuh dawn a, la nula tituai nalh fe fe te pawh an la awm a nia", Siama chuan a lo ti nghal bawrh bawrh a, ka lo nuih hak, " Ka fiam thu lo", a rawn ti leh, " I fanu piancham pawh a ni ve em ni, eng nge in nu ṭhiante chu an lo kal ve ngawt ang a", nui deuh hak hak hian ka ti a.

" Mak thei em mai, i rawn kal hunah i hre mai ang, nalh tak khan lo inchei la ni mai", a rawn ti thla leh rawk, phone pawh a dah zui nghal a, kan pi room-ah ka lut chawpchilh ve nghal bawk.

Ṭha takin min lo dawng sawng a, mahni aia nau han pi mai hi chu, tlawmthlak hi chu ka ti ve deuh hlek ṭhin.

Kan pi bulah chuan ka nau tan part time anga waiter hna thawh tir turin ka dil a, a ngaihtuah ngial hnuah a phal ve ta chauh.

Hna ban hnuin Nghaka te in ka pan ding nghal a, ka hmaa tlan mek te chuan ka thinrimna an chawk tho thar ta thut. Bike mawng sang taka ṭhu sang luah phei saw chuan ka luak a ti chhuak, kan inṭhenna la rei loh tehreng nen, Scooty-a chuan a hne tawh vang ni ngei ang inṭhen a rawt. Keini ang tan hi chuan khaw hawi hi a zim thlak ṭhin teh e.

Nghaka te in ka thleng a, an lo zi hut hut tawh mai, Siaman min lo chhawn vat.

Min pawt kal dawr dawrin hmeichhe pakhat bulah min din tir bu lawp a, rang lutukin ka melh rum nghek nghal. A lo khi ṭhaw ang zui, Sentei niin a hmaifang pawh a dik a, a chhelo hle bawk, keipawh chu aw.

Min lo nghawk zeuhin, " Ka sawi kha maw", Siaman a ti a, hmui tipawrin lu ka lo thin khum, " Ve khanglanga", ti hlakin Sentei nen min kalsan a. Sentei chu ṭawng duh tak lo niin, sawi tur a pui hi a ngah reuh phian a, kan titi rei deuh hnu chuan kan hnathawhna hmun a lo inang reng zu nia!

" A van mak", kan intih chhawk zak zak reng mai bawk, Sentei kei aiin kum khatin a nau a, kum sawmthum ral ka kan fel awrh chauh a, chuti chuan Sentei kum zat tur chu a chian mai ka ring.

Piancham neitu ber a muhil tawh a, puitling ho kan inkawm a ni tawh ber mai, haw tawk te pawh an awm nawk tawh tho. " In inmil chho phian dawn kha, in thawhna a inang leh zel bawk a", awmze nei deuha min rawn melh pahin Siama chuan a ti a, ṭhian dangten min chhaih zui nghal bawk.

Siama hian hre rengin min intawn tir lui, hahthlak ṭhin ve.

Dar kua a rik chuan haw zai rel kan titlu hlawm a, zan a rei tak tak hmaa mahni khum ngeia han tluk ruah mai chu ka duh tawh ber bawk.

Sentei ka thlah fel hnu rei vak loah amahin min lo call a, dawrah a hnawihsen a theihnghilh thu leh laksak lawk turin min rawn ti a, naktukah ka pek turin, naktukah pawh chuan a lam thei tho sia, a cheng ka man nghal, hmeichhe ho tak hi chu aw!

Kan pi haw tlai tur thu a sawi bawk a, mahse; hetiang hunah chuan a haw tawh ka ring deuh a, lam tur chuan ka kal ta tho. Dawr kawta Scooty ka hung fel chiah tihah kan pi chu a pum dawm tlawk tlawk chung hian a lo chhuak ta mai. Ka pan thuai a, " Ka pi, i ṭha em?",

" Ka pum a na lutuk", ṭap nghal rawih rawihin a ti a, " Damdawi inah ka hruai ang che", tih leh pawm ka rual, a hmui pet tan tanin a insut feih feih a, a mit a chhing tlat bawk. Pum nât hi chu a hrehawm ve em bawk a ni.

Scooty-a ka phurh theih loh avangin a car chu ka khalh ta rawih a, ka vawikhat khalhna a ni na chungin him takin Damdawi in ka thlenpui tho. Car aṭanga ka pawm chhuak leh chu thisen a ke-ah a lo luang ngiai ngiai mai, chu chuan hlauhna min pe a, a tlanin ka tlanpui ta dawr dawr a.

Doctor-in min benna tuai nuah nuah chungin ka tihsual ka zawt a, " 'Eng nge ka tihsual?' te han tih, mahni nupuite hetiangin an ti ngai em ni? A thi lo chauh a nih hi, pasal laktlak lo lutuk mai, FIR thehluh hial ka duh", Doctor chuan inkuangkuah than hian a ti reuh a, a mitmengah chuan a thinrim hle a ni tih a hriat theih.

" Engvangin maw? Tihsual ka nei lo, bakah ka nupui",

" Ka nupui a, i zak lo em ni?",

" A va mak e aw, ṭha takin min hrilh rawh, eng nge tihsual ka neih?", insehruh tak chunga ka tih leh chuan, " I nupui hi zan lama in hun hmanna ṭhinah i dim lo mah mah ṭhin ni ngei ang, hetianga thisen hial a chhuah tak. Chubakah, a taksaah hliam a awm nual bawk a, chu a hliam chu sawisakna ngei a ni bawk. Tin, a rilru a hlim lo tih a hriat, a hmelah a lang vek, nau pawh a chhiat tawh tih a hriat theih a. Tin, tuna a naupai pawh hi a la naupang lutuk, nupa nun hman hun a la ni lo, hei, thisen a chhuak nasa chungin nau erawh a him hram a, insum theihna i nei lo em ni?Sawisakna vanga chhiat leh rilru bulbal lohna avangin a chhiat leh thei bawk. Ti khan, i tihsual min la zawt cheu dawn em?", zawi sap sap, sehchilh tak hian a ti bawrh bawrh a, a thinrim hle tih a hriat ngawih ngawih.

Kan pi chungchang chutianga Doctor-in a sawi chuan keimahah nâ veng veng hi a lo awm nghal a, a pasal sawisak let chakna chuan min tur et et bawk. Doctor bulah chuan FIR thehlut lo turin ka ngen a, a hmeichhiatpui a nihna angin kan pi thlavang a hauh nasa mai. A tawpah kan inthlem lungawi thei hram, " A lehpek a awm tur a ni lo", tiin kan inremsiam ta ngawt a.

Form fill-up-naah pawh a pasal Lalrinzuala tiin ka sign a, a pasal chu hmelhriat ka chak hlur tawh mai.

A la harh loh avangin ka awmpui ta a, a hmel te chu ka han en chiang a, a lo cherin a dâng bem mai. Kan pi hian engtiang taka nun hrehawm nge a hman ang tih te ka ngaihtuah a, chutiang mipa kan awm leh zel te chu a zahthlak zawk, mipa leh hmeichhia hi insawisel thei kan lo ni lo, kan inbuk tawk chiah.

" Ka pi, i ṭha tawh em?", a lo khap fap fapah chuan ka ti a, âw lawi rat hian dar zat min lo zawt nghal, zing lam dar hnih a nih thu ka hrilh a, a hawi vual vual nghal bawk. " Ka lawm e", zawi sapa tiin muangchangin a tho a, Doctor pawh a lo kal chawpchilh ve bawk, " Hey nangkha, a falin ka be duh", Doctor chuan a ti a, min huat dan teh ila chuan a puak keh theiin ka ring.

Rei vak lo hnuah Emergency room aṭangin pai deuh chhat chhat hian a lo chhuak a, a pum a la dawm vang vang.

" Ih, ka lawm e. Mahse, tumah hrilh suh aw, khawngaihtakin tumah hrilh suh aw", chau zet hian a ti a, a mittui a tla zawih zawih nghal. Car awmna thleng pawm lehin fel takin ka ṭhuttir a, Doctor chuan min lo ko lehin, " A lehpek a awm tur a ni lo ka tih kha aw, hre reng ang che, zanin aṭang hahdam thei ang berin awm rawh se. Naupai lai hi chuan taksa hahdamna bakah rilru hahdamna hi a pawimawhin a hlu teh a nia aw. Tin, nupa nun pawh thla li han tlingtla phawt sela, zanin aṭang chawl ang che, insum ve mai rawh. Aw, thla li aṭanga thla sarih inkar vel hi a pawi lo a, mahse; thla sarih hnu lam aṭang chuan dim leh fimkhur thei ang ber tawhin, chuan hei, inentir turin in lo kal zat zat bawk ang, rawn tel ngei ngei ang che, nangmahin rawn hruai ngei ngei ṭhin ang che", ka kuta lehkha dah chawrh pahin a ti a, a kalsawn nghal avangin engthu mah ka sawi ve hman lo.

Tihian, khua a var titih chu a ni nghal deuh mai, dawr lam panin ka tlan leh ta ngawt a, a hnung lama a muhil siai siai lai chu ka va en leh zeuh ṭhin.

" Ka nu, zingkarah dawrah ka kal a nia aw, chuan Peka khan min lo be rawh se, a thawh hunah", ham bai bai chung hian ka ti a, kan pi pawh a rawn che ṭual ṭual, ka ṭawng ring deuh a niang.

Harh em chu a harh lo hlauh, pindan chhuahsanin chokaah ka lut a, thingpuite ka lum. Hnathawha dawr hawn hun la ni chiah lo mah se, ka hawng ve mai mai a, dawrtu phei chu an awm law, ahnuah chuan ka khar leh daih.

Takah, Sentei hnawihsen pawh chu! Tlai khaw hnuah ka zawng ṭha a, ka hmu hauh lo zu nia!

" Rinzual", ka hnung ka hawi vat a, " Ih, Rinzuala tiraw i hming kha?", nui saih hian a ti a, a hmelah erawh chauhna namen lo a lang thung, ka lo bu nghat a.

" Nizan avang khan ka lawm lutuk, mahse; tumah hrilh suh aw khawngaihtakin", ngen ngawl tak hian a ti leh a, " Awle, tumah ka hrilh lo ang, mahse; Doctor khan",

" Ka hria lawm, Doctor khan engmah hre lovin a hau ringawt che a, kha pawh min ngaidam dawn nia", a nui leh saih a, " Karleh khi inentir hun a ni a, ka kal hunah ka lo sawifiah vek dawn a nia, lo hlauthawng miah suh aw", nui sen sen hian a ti ta a, tuna a nui chu a nui tak tak!

" Rinzual", a kut a lo vai a, ka harhchhuak hlawl, a van hmelṭha tak!

" Aw aw, a, awle", ka chil ka lem khawlh a, engthil nge maw ka ngaihtuah ni?

A la tlai chhe lo bawk a, haw rih turin min ti a, dawrah ka awm tlang mai tur thuin ka lo chhang.

A tlan liam thleng chuan ka thlir doh doh a, ka ngaihtuahna vak velah chuan kan pi nen kan lo chêngdun mek a, chutih laiin phone a lo ri ral ral!

" Ka u, eng nge ni ta? Ka nuin be tur chein min ti a", Peka chuan a lo ti nghal a, kan pi-in hnathawh a phal thu ka hrilh chuan, " Tak tak maw? Ka u, ka lawm lutuk aw, mahse; ka nu leh pa hrilh lo ang aw", zawi sap hian a rawn ti leh a, ka lo sawi ṭhaih.

Sentei leh midang ho pawh an rawn thleng ve leh bek bek zel a, Sentei ka lam pana lo kal chu hnawihsen, a bawm dum hi a rawn keng lang va va pah a, mak ti hmel pawh ka pu lo ang, ka nuih a za.

Sentei chuan dawra ka kal tak tak a rin loh thu te chu nui tet tet pah hian a sawi a, min fiamna mai mai a nih thu nen lam a sawi niah niah a. Keipawh chuan 'i hre ngawt ang' tih melhin ka lo melh khui khui, kan pi chungchang ka sawi lo a, " A haw tur ka nang hman hram a, ka zawng ka zawng a ka hmu bawk si lo", titau âw deuh hian ka ti a.

" Engtin nge maw i zawn hmuh ang le,le, a awmdan pawh hrilh lo chein hnawihsen ka ti ringawt a, engmah min zawh chhunzawm lovin, phone i dah daih nih kha", nui hawk hawk chung hian a ti a.

Peka pawh a rawn kal a, ka nu leh pa hrilh lo turin min ti leh a, ka sawi ṭhaih leh ṭalh, mahse; ka hrilh dawn tak tak lo.

Sentei nen an innel nghal em em a, Sentei pawh waitress an tih ang hi a ni a, kei chu a urtu ka ni, kei lo midang urtu pawh an awm ve tho, kan lo inhre lo pawh kha a awm ve tho.

Zanriah ei laiin ka pa chuan, " Nizan i rawn haw lo em ni?", a ti a. Peka rawn inrawlh vatin, " Ka pa, a rawn haw alawm, keimah ngeiin kawng ka hawn", a lo ti, " Tukin zingah dawrah a kal leh nghal alawm, dawr lam an buai deuh a niang. Mama, chaw ei khamah i duh chuan i mu hahdam mai dawn nia, i nau nen kan lo tifel mai ang", ka nu pawh chuan a lo ti ve a, mak ti angreng viau mah ila, ka pain min en chik ropui si a, ka insum hram hram.

Ka chhungril hi a hlim veng veng!

Ka nau nen inchhung chet, ei rawngbawl, insuk leh thleng sil angte kan kutah kan dah ve hmiah a, mipa pawh ni mah ila hmun hi kan phiat tlauh tlauh zel a nia.

Kan chaw eina tihfel ka han tum chu ka nu'n min lo dangin mu hahdam turin min ti a, ka pa tv en a lo khuh kharh kharh, a bulah chuan ka va ṭhu khawmuang ve ta ngawt.

Ka muhil ṭha mang lo leh hna ka thawh zawm vang ni chek ang chu, ka meng ṭha hlei thei ta hauh lo, ka bu leh lawp ṭhin chu, " Va mu rawh", ka pa'n min lo ti vin deuh ṭhai a, " Awle, ka pa", tho ṭual ṭual chungin ka ti a, lukham nen kan intawk chiah chu ka chatthla nghal.

Sentei ka be zeuh zeuh ni ber, chutin ṭhianpa Siaman min beisei anga han biak ṭhat teh huam ka ti vak lo, ngaihzawng neih ka peih tawh lo ang bawkin, vei nei pawh ka duh tawh lo a, Mahnia awm mawp mawp ka duh tawh zawk.

Kan pi pawh ka hmu khatin rawn kal ve fo mah se, va biak lumlam ka ti vak ngai lo a, kei chokaa awm reng tan chuan a mawng phe pawh hmuh theih a ni lo. A dam ṭha zel turah chuan ngai phawt ila!

" Ka u, biak lawk che ka duh a, i hman em?",

" Aw, ka hman reng a lawm, eng nge ni ta?", apron la thla chungin ka ti a, " Sil zawm rawh, lo ngaithla pah mai la", a lo ti nghal chu ka sil zawm ve leh mai bawk.

Chaw ei kham ve leh ka nu leh pa te, kan paliana te in lamah kal nghal turin an lo ti a, kan naua'n nupui a ru ni awm tak a ni, tunlai ṭhangthar ho tak hi chu aw.

" Pekte, eng nge ni ta?",

" Ka u, Master exam zawh hun hian D.I.E.T ka training daih dawn em ni le ka ti deuh", inherin ka en deuh hui a, " Mahse, ka nu leh pa ka la hrilh lo, exam zo phawt ila ka ti a", hnuai lam a melh zuk zuk, a mit dawih lutuk hi chu aw.

" A ṭha lawm, kei chuan i hna pawh hi bang daih la ka ti, i lehkha zirah rilru pe la ka ti zawk, keiin ka thawk chhuak thei a, bakah ka nu leh pa te eichawp dawr sawn a thawk chhuak ve reng tho a", tiin, ka nu leh pa te dawr awmna lam chu ka va melh leh zeuh.

A lo bu ve nghauh a, thu te lah hi a awih hnup hnup. " Usentei nen in inkarah eng enaw te awm em?", ka va en vat chu a mit ko a lo san euh euh a, ka nawhfe ken laiin ka va vawm chawrh.

Engmah a awm loh thu ka sawi a, ngaihzawng lam pawh buaipui ka peih tawh loh thu ka hrilh ve luam, min han Councelling ve hrep nghe nghe kha.

Ka nu leh pate pawh lo hawin Palai an tir mai dawn ni awm a ni, " Nangmah zawk te hian han ru mai la aw", ka pa ṭhin hi chu aw, ka nu lo nuiin mu turin min ti a, ham bai bai chungin ka pindan ka pan tak kha.

" Awle, kan venga lo awm thar leh kan Kohhrana lo lawi thar te, Pu. Lalzahawma leh a nupui Pi. Lalnunpari te, kan lo lawm che u a, khawtlang leh Kohhrana inthlahrung hauh lova, intineitu taka awmin leh Rawngbawl turin kan chah che u", tia Kohhran Chairman-in a lawmluh lai chuan ka muthlu lai chu ka khawng awt a, Pi. Lalnunpari, Pi. Lalnunpari te chu kan pi hming ang kha a ni si a!

Ka hmaa ṭhu, lulian tak te pahnih inkar aṭang chuan hawkdak tak leh lu tiche ngam hauh si lovin, ka en dek dek a kan pi ngei kha a ni!

Ka inkhawm tukah ber kher, thla tawpah hian ka inkhawm ve ṭawk ṭhin a ni a, ka inkhawm ni-ah ber kher, ka lawm dawn nge awmdan tur pawh ka hre lo e a, mak e.


Ka ṭhiante ho chuan inkhawm ve ziah tawh turin min hrilh leh hlawm a, a chang chuan an nupuite lam lam ho hian min zilh ve ṭhin mawle. Mahse, a lawmawm, min duhsaknaah ka ngai ve hmiah mai.

Ka nau nen zanriah kan buatsaih laiin, " Kan thawhna dawr neitu kha tiraw, tukina an lawm luh kha, kha kha em ni a pasal? Pasal a nei tawh tih ka hre miah lo, kei ai chuan a upat tam ka ring miah lo, Usentei nen an inrual deuh thaw ka ring", che ṭuang ṭuang pahin a ti sap sap a, " I tihtur kha ti hle hle mai teh", muang ban raih hian ka lo ti a, ka nuih a tiza reuh, hetianga a phusa lai hi ka la hmu ngai miah lo.

Chaw ei laiin ka pa chuan kan Pi-te nupa chu hmelṭha a tih thu leh, an inhmeh thu te a sawi a, an pa chu a fak nasa khawp. Pasal ṭha tak a nih ngei a rin thu te a sawi a, kei erawh a rukin ka lo ner nasa, ka hrechiang ropui si a, hei hi nia pawnlam lan dan aṭang ringawt hian kan inteh ṭhin a.

A hnuah chuan ka thawhna dawr neitu a ni tih ka sawi ta a, " Pi. Pari kha mawle, ka thawhna dawr neitu", ka pa enin ka ti leh a, a lo bu nghauh.

A tuk dawra ka kal lehin Sentei chu car hian an lo thlah a, hui, beiseiawm loh ka lo beisei lo law law a, ka lawm zia hi.

Sentei pawh chuan min hrilh tlang ve mai a, an inzuina a la rei vak bik lo ni awm a ni. Siama nupui nen an inkawm ṭhin a, Siaman min sawirem a tum tehreng nen.

" Ka u, kan pi-in a ko che",

" Ngati nge?", ka ti hu a, Pekan, " Ka hre bik lo, tihsual i nei niang",

" Ka khawng dawn che mile", tiin, chemte la lawk chuan ka ti a, min lo nuih huah huah hlawm. Ngaihna hre lo zet chuan kan pi room lam ka pan a.

Naktuk inentir hun a nih avangin kalpui turin min lo ngen chu niin, engmah sawi lovin mak tiin ka en reng ringawt a, a biang a sen awp awpin a chil a lem khawlh khawlh. Ngawi renga ka din khawng reng avangin, " Ka ring dawn che nia aw", tih leh min nawr kal a rual a, room pawnah pawh ka la ding khawng reng!

Zanah kan pi chuan min lo text-in, hnathawka kal lo turin min lo ti a, mak tihnain ka la khat reng. Peka chuan thil awmdan min lo zawt a, " Kan vengah an lo awm tawh sia, vengkhat kan lo nih takah dawr leh hnathawkte ṭha taka enkawl leh thlithlai turin min ti ve a nih kha", ngaihsam hmel zet hian ka lo ti a, a awih ve niang chu, lehkha zir turin min chhuahsan ta a.

" Naute pawh a ṭha chho tial tial a, a nu pawh a ṭha chho zel turah ngai ang", mei nei deuhin Doctor chuan min lo melh zawk.

Kan pi chuan ka kut nghet takin a chelh a, chuti ni na na na nghet takin ka chelh let a, nau a pai aṭang a inentir vawikhatna ni rengin! Doctor pawh chuan a han hau ve ang lawp lawp a, a tawpah chuan keimahah bawk engkim burbun a ni leh ta tho. Kha Doctor-i ṭhiannu kha a ni a, anni pahnih hi inkawmngeih ve tak an ni'ang.

" Rinzual, ngaihzawng i nei em?", melh zawkin hma lam ka hawi nghal a, " Nei lo la ka ti", ka khi deuh salh a, thawk la hawkin, " Mi pakhat chauh hmangaihna hi chuan rei a daih ngai lo a nih hi maw", ka ti a. Ngaihtuah zui ni awm takin a ngawi vang vang.

Chumi hnu aṭang chuan kan inbe leh meuh tawh lo a, dawrah pawh kan inbe ngai lo, hmuh pawh ka hmu mang ngai lo.

Ka pa chuan kan pi pasal a hmuh ngai loh thu zan riah ei laiin a sawi a, " Kan lawm luh tuk aṭang khan hmuh tik ni ka la nei lo reng reng, Pari saw nau a pai lehnghal, tiang hunah chuan inawm chawt tur a ni sin le", a ti a. Ka nu pawhin biak a nawm thu te a lo sawi a, " Dal hi a lo lei ve deuh reng zel, a ngaina ve hle a niang", a lo ti a.

Ka pa chuan lo duhsak turin ka nu chu a ti a, engtia duhsak vak nge ni ang le aw.

Mut hmunah kan pi chu ka ngaihtuah neuh neuh a, a chanchin hi engvak hriat ka nei si lo, a nu leh pate hian ngati nge an hruai daih loh le, amah hian hrilh hre loin a tuar tlawk tlawk zawk em ni ang?

A pasal hmuh ka chak pawh ka hmu tawh a, mahse; eng ber nge tih tur ka hre hauh lo.

Dawr lam pana ka tlan laiin ka mi hmuh te avang chuan ka ding chawt, ka thlek vang vang a, hnung lam aṭang an rawn ri tuar mai a ka phu nasa teh a sin.

Chocolate cheng zasawmnga man pakhat leh ice-cream bucket an tih ang chi, vanilla an ti nge mawni pakhat lei lehin, fimkhur taka tuamin leh ruk thei ang berin kan pi dawhkanah ka dah a, a lo la thleng lo a, a tihzia hlauh.

Chuta ṭang nitin a dawhkanah ka dah ziah a, mak deuh chu amah ka hmuh duh avangin inkhawm pawh ka ṭhulh tawh ngai lo, thla tawp chawlhniah chauh inkhawm kha, chawlhni tin inkhawmin Sunday School pawh ka kai zat zat tawh!

Ka chhungte pawhin mak an ti a, kei ngei pawhin mak ka inti, mahse; hetianga ka hun hman mek hi chawlhsan ka tum teuh lo, a nuam mah mah tawh zawk a ni.

Vawiin hi inentir leh hun a ni a, mahse; kan pi hian min rawn hrilh miah lo. Keimahin ka insiam ve mial mial a, va ṭhawn thut ka tum ni ber, mahse; a pasalin a hruai ve tawh dawn pawh ni mai thei ni. " A hruai lul lo ang", ti rilru nuah nuahin ka inkhalh chhuak ta a.

Damdawi in kawtah biru thei ang berin ka lo ṭhu a, ka enthla pawh ni ang chu, ka awmdan chu ka inhrethiam mai bik hauh lo.

Kan pi chu a lo thleng ta ngei a, amah chauhin a ni lo, driver a ruai thar em mawni? Mahse, chupa chu taxi pharin a kal leh ta daih!

Damdawi in a lut a, a hnu rei vak loah ṭap chung hian a rawn chhuak leh ta mai, pan vatin ka kuah a, damdawi in chhungah luhpuiin ṭhutthlengah chuan ka ṭhuttir a, a kut nghet takin ka chelh bawk. Naupai dangte chu an pasalte nen hlim tih hriat takin an ṭhu ho a, an titi siam siam pah hlawm a, an pasalten an dul an chulsak heuh heuh reng bawk.

" Min lo nghak tawh ang che, keimah nen kan kal ziah tawh ang", a biang va piai zeuh hian ka ti a, a lo ṭap nui hak mai.

" Bawng sa ka ei chak", ner nawng hian a lo ti a, piai leh zeuhin, " Chak kha tawk", ka ti a, tum bur nghalin a car chhungah a lut ta daih a, a tlan nghal. Scooty-in a hnungah ka zui ve zel a, tiang renga ka hlim hi ka la hre ngai lo. Dawr kawtah fel taka car hungin, lo lehhawiin min lo nuih zeuh a, ka tuiral nghal zawih zawihin ka hria!

A zunah min pawt lut ka ti mai, ka awmdan a danglam tial tial a, nitin mai chu ka tan Vanramah a chang ṭhin a ni ringawt.

Zan khat chu an inah chuankai ve hrim hrim ka duh a, " Ka leng chhuak mai mai dawn a nia aw", ka nu leh pa bulah chuan ka ti a, " I chhuah dawn rauh rauh chuan, Pari te kha dal kg-1 han pe nghal mai che", ka nuin min lo ti, phur zetin dal kg-1 chu lain ka chhuak nghal nal nal.

An in kawt ka thlen chuan an pa chu hmanhmawh zetin a lo chhuak a, car-ah lutin a tlanliam nghal. Kawngkhar a inhawn avangin ka dak de de a, a lo reh ṭhuap mai.

Chutah thil tla ri ṭhuai thawm ka hria a, khawi berah nge tih hre chuang loin ka tlan lut ve tawp a, " Ka pi, Parte?", ka ti ta ngawt. Ka hmaa pindan pakhat zim taka lo inhawng aṭang chuan a nih ringin, " Ka pi?", tih leh luh ka rual a, ka thil hmuh chuan min ṭhawng kher mai!

Chhuatah lo ṭhu sawpin, khum rinchhan chunga lo thawh a tum a, a pum a puar ve deuh tawh nen. A biang lehlam a lo sen duk churh a, a kam sir a thi ser ser bawk, a ban velah te chuan vuakna hnuhma ang tak a awm a. Min hmu chu a lungchhe zual sawt ni ngei ang chu, a ṭap hawm hawm nghal a.

" Rina, tunlai i awmdan hi a mak e, kan hriat lohin ngaihzawng i nei em ni? Siama remruat a tlawlh ta sia le", nui var varin Nghaka chuan a ti a, ka ṭhian dangte pawh chuan ka danglam thu an sawi a, " Ka hre lo, engtin chiah nge ka awm?", tiin ka zawt let hlawm zawk a, keipawhin ka awmdan chiah hi ka hre lo.

Inkhawm ṭhulh ngai lo tura min thlemtu an awm an rin thu an sawi niah niah a, ka lo khi ve deuh suk suk. E, kei hi hmangaihnaah ka luangliam leh ta tihna em ni? Ka nui lai ka tawp chat a, ka lung a phu rang kher mai bawk, kan pi hnenah ka thinlung a awm chiang, ka van zak!

" A ni thei lo ang", ka ti zawi sap a, ka ṭhianten an lo hria niang, engmaw an lo ti sup sup a, nui saka engmah ka ti chu an awih loh hmel hlawm lutuk.

Zep buai ngai lovin hmangaihnaah bawk ka tlu lut leh a, tun ṭum erawh mi pawmlai zunah a ni ta tlat. Mahni inthiam chawpna ka zawng a, engkawng zawng pawhin thiam ka chang thei lo, mi pawmlai lo hmangaih ringawt. Ni lo e, thiam ka chang a lawm, rem lo tur bawk ka hmangaih leh ta. Mahse, hun reilote, a inentir hun chauh chu, hei chauh hi.

" Mama, i ṭhiannu chu engtik emaw rawn hruai ve la a ṭha ang, kan lo hmu ve hrim hrim ang e, chaw eiah rawn sawm rawh", ka pain a tih chuan ka en nghal ngawih ngawih a, " Mak tih vak a ngai lo, ngaihzawng i nei tih kan hre vek", ka nuin a lo tih ve leh chuan chaw ṭhialna chang pawh hre lovin ka en leh hâw a, ka nau a lo nui kur kur bawk.

Ngaihzawng ka nei lo ka tih chuan an awih lo nasa mai a, min inpuan chhuah tir tum ni awm fahranin min chhimbu dawi kual ta tlauh tlauh a, ka inpuang chuang lo, ka fing ve em.

Kan pi, aw, Partei chuan ka thinlung a hneh tawlh tawlh a, sawichhuah rem si loin a zun chuan min phuar nghet tawlh tawlh mai bawk. Hmuh reng ka chak a, chumi avang chuan ka inbilh palh ang tih erawh ka hlau khawp, ka invengin ka insum hram hram a, ka Ṭawngṭai nasa thei hle bawk.

Hetiang anga ka buai hi ka la hre ngai lo, ka hmangaih ka lo tih ho kha ka thinlung zawng zawngin ka lo hmangaih ngai lo nge ni ang a, ka lo hmangaih ngai reng reng lo hlawm zawk ni ang?

Message emawa han biak turin atan harsatna a thlen zawk ka ring bawk si, biak erawh ka chak, zan hi a rei ka ti mah mah, khuavar vat sela, ka hmuh theihna dawr kal ka chak, ka biak theihna inentir hun pawh thleng thuai thuai se ka ti!

Chocolate leh ice-cream dawhkanah ka dah leh a, nui sen sena room ka chhuahsan laiin a pasal nen an rawn kal ta mai, ka thiltih min zawh chuan inringtawk takin room ka tihfai thuin ka lo chhang a. A pasal pawh chuan engti lem lovin a kal ve leh mai bawk a, kan pi erawh tlemin a hlauthawng tih ka hria.

" Tunah chuan, hei chauh hi ka damchhan a ni tawh", a pum puar ve ak tawh chu a chul heuh heuh a, a inhru leh zeuh ṭhin.

Tihsak nei thei ila ka van ti tak em!

Dawrah a awm rei ngai lo a, chawhma thleng a awm a, chawhnu lamah erawh a haw zel ṭhin thung. Driver a ruai a, a rukin fimkhur taka khalh tur leh, him taka in thlenpui ṭhin turin driver ka chah mawlh mawlh ṭhin bawk.

" I nun thlak danglam saktu che hi hmuh ka chak ngawt mai, a hma zawnga i ngaihzawng kawp ho ai kha chuan, tuna mi nen in inkawp hian i danglam zawk, nula ṭha tak a ni ngei ang", ka nu chuan a ti siam siam a, ka lo rum nghul nghul, nula chu a ni tawh lo sin le.

" Ka u, tunge Dingdi sensiar hi?",

" Khawi, tumah a ni lo",

" Tumah chu a ni deuh ang a, ka hawsan mai ang che", nui tet tet hian a ti a.

" Rinzual, khawngaihtakin min lo hruai thei ang em?", ṭah âw ṭuau chungin kan pi chuan a lo ti a, a awmna ka zawt nghal vat.

Dawr pakhat kawtah hian lo ṭhu tluang zuarin lassi a lo fawp mawlh mawlh a, mi kawng kal lo chhiar niawm fahranin a melh chho zuk zuk bawk.

" Min lo biak lai khan i ṭap emaw tia?", kawng dawm chungin ka ti a, min lo nuih chho sen sen, " Ka tihder che nih kha", ka khi deuh suk a, tihvak ngaihna awm lo, engtinmah ka ti phal teuh lo.

Ka kaitho a, ka kawngah min rawn kuah, ka ṭek chhawksss! Lassi lei leh a la ngen zui. A car awmna ka zawh chuan taxi a hman thu min hrilh a, mahni chauha chhuak mai mai lo turin ka hrilh hrep, " Thinrim kher suh", ka biang lehlam lehlama mi rawn piai nawk nawkin a ti a, " I van cute", a la ti zui.

Inkai rialin kawngdung kan zawh zel a, a khat tawkin ei tur kan lei deuh reng bawk.

" Aw, nangni nupa chu", kha Doctor-i bawk chu, " Ka ṭhiannu chuan a enkawl ṭha che u maw?",

" Ṭha lutuk", ka lo ti hlak a, " I pasal thinchhiat dan hi chu", zawi sap hian kan pi bulah a ti a, ka hre thei tho sia. A ṭhiannu nen ṭangkawpin min la man tir duh tak tak ang mawle.

A kal liam hnu chuan kan theihnghilh zui ve mai bawk. " Ngati nge dawr hming hi 'Slice and Piece' tih chauh a nih a?", mak tih hmel deuhin ding meuhin min en nghal, " Naktukah i chhiar chiang dawn nia", ka chal rawn pen chawrh hian a ti a, " A nââ", tiin ka tuai vut vut, a nui leh sen sen. A hlim chuan keipawh ka hlim.

A chungchangah hian zawhna tam tak ka nei a, zawt tur erawh chuan huaisenna ka nei meuh lo thung.

A tukah chuan chiang leh kuang zualin ka chhiar a, 'Dingdi's Slice and Piece Pizza House', huii, hei leh chen ka thawk tawh a, engtin nge maw ka lo hriat loh theih zawk le.

Tukkhum hiat nuah nuah chungin dawr ka lut a, thil hi a lo hriat loh theih ngei mai.

" Ṭhiante u, kan pi ber hi nizanah a chesual a, nau a chhiat niawm e", Sentein a rawn tih chuan ka tiril a khur zawih zawih nghal a, dawr aṭang chuan tlanchhuak nghalin Damdawi in kan kal ṭhinnaah chuan ka tlan lut ta thawr mai.

Doctor-i ṭhiannuin min lo hmuin, " Khawiah nge kan pi, ka nupui, ka nupui?", thaw hlawp hlawpin ka ti a, boruak tam tawk ka mamawh. A awm loh thu min hrilh chuan, " Thil dik lo a awm em ni?", Doctor-i chuan ka hnung lam aṭang a rawn ti, " Engmah a ni lo", ti sapin ka kalsawn a, min rawn auh zui pawh ka hre reng ka hawilet tawh lo.

Sentei be nghalin a awmna Damdawi in ka zawt a, rang lutukin chu Damdawi in chu ka pan nghal.

A bulah chuan a pasal a lo ding ngawi reng a, kawngka phen aṭang ka thlir doh doh. Va pan lawka va kuah hnap a nia ka duh ni!

Damdawi in aṭanga an chhuah thlengin an hnungah ka kal ve zel a, a chauh hmelin mitthi hi a ang zawk mah.

An tlanliam hnu chuan ka kut ka hum ruh nghek a, sawtna awm si lovin. Ka phone riin min tiharh a, " Kan inah lo peng teh aw", Nghaka chuan a lo ti nghal a. Tunah hi chuan ka ṭhiante bula awm ka thlahlel ber, kan pi bula awm kha ka thlahlel ber zawk, ka duat dawn ngawt a sin.

" Hmankar khan, kan venga lo awm thar nen Damdawi inah ka hmu che u, a pasal angin i insawi a, eng nge thil awmzia hi ni chiah?", Siama chuan a ti a, " Ka, ka, ka hmangaih", muangchangin ka ti a.

" Hmangaih maw? Nula pangngai emaw pawh a nih loh saw, pasal nei lai leh naupai mek a nih saw aw. Rina, han ngaihtuah chiang teh mah", Siama chuan a ti leh a, ka ngawi reng, ka hriat ang leh ka hmuh ang hi an hriain an hmu ve si lo.

" Lawkin, nizanah chesualin nau a chhiat an tiin ka hria", Nghaka nupui chuan a lo ti ve a, " Engpawh nise, Rina, inngaihtuah chiang leh rawh, i ṭhiante hi i lamah kan ṭang reng a, mahse; tuna i awmdan hi chu a ṭha miah lo nia aw", Nghakan a tih chuan, " A reng reng thuah hmangaih i ngah lutuk, mi i hmangaih hma thei lutuk", tiin Siaman a rawn tuihnih a, ka lo nuih hak hak.

Muangchangin kan in lam ka pan a, Nghaka te inah ka scooty pawh ka riah, min rawn zui lo turin ka ti a, hetia mahni chauha awm hi ka duh.

An in luahna zawn ka thlen chuan ka ding a, an in bik chu a thim khup. Tunah tak hian khawiah nge a awm ang? Chaw a ei thei awm si lo, a ṭap ngam ang em? A ngam hauh lo ang.

Chesual chu a ni thei hauh lo bawk ngei ang.

Ka nu pawh chuan kan pi chungchang chu a hriat ang angin a sawi ve a, a lainat thute a sawi luam a, keitak hian a sin lainata khawngaih chu!

Thla tam a liam a, a chanchin hriat tur awm loin a reh zui vawng vawng. Ka ngai a, ka be chak a, a damṭha nge ṭha lo tih zawh ka duh. Ka huaisenna erawh hi chuan min ṭanpui duh thlawt si lo.

Dawr erawh Manager enkawlna hnuaiah kan awm a, Dingdi par pawh hmuh tur a awm tawh lo. Ka van ngai tak em!!!

" Kolasib lam daih an ni tih chu ka hria, an pa kha Office-a thawk a nia, chuan kan pi hian Pizza dawr hi a hawng a, chubak hriat vak ka nei lo. Tunah pawh hian Kolasib lamah an awm, Manager nen saw chuan an inbiak fo chu ka ring. Ka kal dawn, man hlanna chu lo tel ngei ngei la aw", tiin, Sentei nen kan inthlah a, an inzui rei hmain inneih an rawt a, kawng lehlamah chuan a ṭha ve tho mai.

Ka nun a inthlak hlawk lo a, tlem tlem chuan a inthlak tih chu hai rual a ni lo thung. Inkhawm ka thatchhe leh ṭan a, " In inṭhen em ni? Keimahin ka lo sawipui dawn em ni ang?", ka pa chuan min ti fo a, ka zah zozai, thudik hrilh erawh ka huaisenna bawk hian min ṭanpui duh lo leh ṭhin.

Ka nun nguai lutuk tihharh tumin ka pa chuan eng eng emaw hi min sawipui fo a, ani ṭawnghmang thiam lo tih ve takah min tinguai zual, mahse; ka pa bulah ka tal tam thung a, chu aia hlu a awm chuang lo. Inkhawmnaah pawh a bulah ngat min ṭhuttir! Ka upat hmel ṭiah ṭiah sin.

" Aw ka nu, eng nge ni ta?",

" Frooti a zo tlat, min rawn pe lawk teh",

" Awle", tia phone ka dah chu Sentei ka hmaah a lo ding reng, " I nu em ni?", ka lo bu nghauh a, " Kan pi a rawn kal sin",

" Tu, tu, tunah hian maw?", ka lung a thlawk chhuak dawnin ka hria, " Aw, a pindanah a awm mek. A chetsual thu ka sawi laia i tlanchhuah daihte kha ka hrilh a, nuṭaah a zawng che tih pawh min hrilh duh lo vel a, eng emaw turah ka lo ngai hman a khatia i tlanchhuak vut kha", Sentei chuan a ti leh a.

Nuṭaah min zawng maw? Nuṭaah min ngai a nih ngei dawn chu, a pawi lo; nuṭa nih pawh chu ka tan chuan malsawmna liau liau a ni.

A hmelṭha sawt ang em le?

Frooti case thum leiin kan in lam ka pan a, chutih laiin kan pi Partei kha, ka hmaah ngei chuan a rawn tlan ta.

Mahse, a hnu rei vak loah kawng kawiah a tlan ta daih a, eng nge maw ka hriat ni zui ka chak ta tlat.

Orphanage Home-ah a kal chu niin, hmeichhe naupang pakhat, kum khata upa, a hma pawha a lo lawm fo tawh ṭhin chu fa atana lak a duh thu a sawi a, mahse; a duh chu an lak khalh tawh thu an hrilh ta mai!

Min hmuh hlau takin ka kalsawn a, a damchhan tur a bo leh taah ka ngai. Keimah hi a damchhan turah inpe ta ila, min lo pawm duh ang em le?

Phone hmet engin dar zat ka en a, zing lam dar hnih chauh a la ni. Mut leh ka tum a ka thei tawh ṭhak lo. Candy Crush ka khel leh ta ngawt a, he game ka ngainat dan hi chu aw.

Dar li a rik chuan khua la eng lo mah se, ka tho a, zi mar turin pawnah ka chhuak a, boruak thiang leng chem chem chu ka hip vang vang. Thui ka kal hmain ka phone a lo ri a, 'Dingdi sensiar'.

" Aw, hello?",

" Niminah khan hmuh che ka chak lutuk a", a ngawi vang vang a, " Rinzual, kei, kei hian eng nge tihsual ka neih?", a insut ri hlawp nghal, ngawi rengin ka ding a, " Ka, ka, ka theihtawp ka chhuah ve sin, ka duh loh dana ka awm chang a tam a... ka thawmhnaw hak duh ngai lohte pawh ka inbel a, mahse.... ngatinge?",

" Ka hria e, sawi tawh suh",

" Zing khawvar, ka nghahhlelh ṭhin zia kha. Zing a lo ni a, khua erawh a var ngai lo, engtikah nge, engtikah nge ka tan hian khua a var ve ang?", a ṭap hawm hawm nghal a. Vanlallainatawm le!

Ka tuar thei tawh thlawt lo, phone ka dah daih a, ka dinnaah chuan ṭhu tungin ka indawm kun ngawih ngawih a, ka mittui a tla nghal zawih zawih bawk.

A tawk ta e, tun aṭang chuan a tan khua a var ve tawh ang, tun darkarah ngei hian ka hmangaih tih hi ka hrilh ngei tur a ni ang.

A awmna nia a sawiah chuan ka kal a, min hmuh rualin min rawn kuah nghal thlawp. Eirawng ka bawl sak a, ei tawh tho mah ila ka eipui leh rih, a ei tam lem lo khawp.

" Rinzual, vawiin nilengin ka bâwih ni ta che?",

" Eng a?",

" A, ka thu thuin awm la ka tihna nih kha", sehchilh deuh tak hian a ti leh a, " Maw, aw, khawngaihtakin", inthiam lo tih hriat tak hian a ti leh.

Tho thutin, " Yess", tiin a au ta ruai, ka yes tawp si lo a. " Nuthlawi nun hi engtiang chiah nge a nih, i han tem chhin teh ang", za em emin a nui nghal uar uar a, a chhungrilah erawh a rum nasa hle tih a hriat.

" Hrilh tur che ka nei",

" Nakinah, ka insiam lawk ang".

A car min khalhtirin ani erawh a titi mawlh mawlh a, ṭawngna hun ka nei meuh lo, a naupan lai hun te, school a kal laia a harh ṭhin zia te, lehkha thiam thei tak ni lo chunga zir peih miah lo ang chi a nih thu te a sawi a, ka lo khi suk suk.

Orphanage Home-ah kalin ei tur leh ṭanpuina sumte a pe a, reilote naupang ho kan infiampui leh rih.

Khawpui daifemah kal lehin, chutah chuan huan angreng deuh, zau ve tawk tak hi a lo awm a, chutah chuan ei tur leh zampherte nen kan lut a, thing leh pangpar chi hrang hrang awmin boruak pawh a dai nuam khawp.

Hmun biru deuh Dingdi lo parna hmun bik kan thleng ta hlawl a, " A nalh i ti em?", nui var vara a tih chuan ka lo bu zeuh.

" Rinzual, thil pakhat ka dil ang che aw?", ngen ngawl taka tiin a ṭhingṭhi nghal a, " Engthil nge maw i tih le?", keipawh chu a kut chelhin a hmaah chuan ka ṭhingthi ve nghal a, " Engpawh min dil la ka pe ngei ngei ang che, mahse; hetiang zawng hi chuan an indil ngai lo", tiin ka kaitho a.

Mittui tling pama min lo enin, " A nih, thil min tihsak turin ti ta che ila?",

" Ka tih theih zawng a nih chuan ka ti ngei ang",

" Ih, ka ṭhiante chuan an pasalte nen hun nuam tak an hman ṭhin thu an sawi a, mahse; kei chu", a hmui zu dek thutin duhthawh takin ka fawp nghal bawrh bawrh.

A muhil thaw sat sat chu ka thlir doh doh a, ka thiltihah khan inchhirna ka nei hauh lo, inchhir ahnekin ka lawm zawk em em thung, a duh apiangin min demin min sel thei ang.

A rawn harh hnu chuan kan han inkuah leh chial a, ka kham thei dawn lo a nih hmel.

" Dingdi par hi a mak ngawt mai, par hnih a chhuang a nia",

" Pangpar zingah chuan hringnun tarlang ber a niin ka hria, i ngaihtuah ngai em? Mihringte hian hringnun pahnih kan nei a sin, pakhat chu mi zawng zawng hmuh theih tura kan tar chhuah a ni a, pakhat leh chu kan tar chhuah lem loh, kan vawn reng leh kan nuna bet reng tho si hi a ni. Mi hlim thei tak anga i ngaih kha, a chhungrilah erawh a rum nasa thei a sin. Nui ngai lo leh thinchhe tak anga i ngaih pawh, a chhungrilah erawh chuan nunnem leh nuih duh tak a ni ngei thung ang", nui saihin a ti a, a mittui a luang ngiai ngiai bawk.

Ka hrethiam ve ta chiah e, hei vang a nih chiah hi Dingdi par a ngainat em em.

" A ni em?", ka tih chuan a lo bu zeuh a, " Takah, zingah khan min hrilh tur i nei ang khan i sawi a, eng nge ni ta?",

" Engmah a ni lo",

" Engmah chu a ni ang, sawi teh", ka huaisennain min ṭanpui duh lo leh ta, ka sa awp awpin ka hria.

A in lam panin kan inkhalh chhuak ta a, ka chhungte chuan min ngaihtuah tawh ngawt ang, phone ka off daih sia.

Ka haw dawn chuan ka hnung lam aṭang min rawn kuah a, " Rinzual, vawiin avangin ka lawm lutuk aw, ka theihnghilh tawh ngai lo ang", a sawi dan chu le, kan inhmuh tawpna ber tur niawm ziazangin.

Inherin a mittui ka hru a, a mitah chiang taka enin, natna thuk tak ka hmu thei, hmangaihtu leh dawmkangtu tur a mamawh tih hairual a ni lo.

" Ka rawn kal leh ang", ka ti zawi sap a, a lo bu nghauh nghauh, a nui sen sen bawk.

Inah pawh haw tawh loin pangpar dawrah ka kal a, Rose sen a bawrin ka lei a, a rimtui em em mai lehnghal. Tihian, tunah ngei hian ka hrilh ang, tun aṭang chuan a natna zawng zawng ka theih ang angin thawi dam ka tum tawh ang.

Phur tak leh zam ru tak chungin a in lam ka pan leh a, mahse; a lo inkalh ṭhiap. A car pawh hmuh tur a awm lo, khawiah tak chuan kal ang maw?

Biak ka tum a, a ri ral ṭhak.

A in kawtah chuan ka nghak char char a, " Helaia awm kha em ni i nghah? Nichin deuh lawk khan a awm tawh dawm loh thu min hrilh tak a sin, a kal ta a nih kha", mak ti takin ka en a, chutiang a ni thei dawn em ni?

" Aw, hello?",

" I rawn call-na kan hmu a, i hmelhriat em ni?",

" Aw, ni e, amah khawiah nge?",

" Zotlang Y.M.A President ka nia, petrol pump chhakah he phone neitu hi a tlanliam hlauh a, hei kan la chhuak thei tawh a", ka thu hriat zet chu, " Eng, eng, engtin nge a awm?", ka tiril a khur zawih zawih nghal a, ka dinna hmunah ka ṭhu thla hnawk nghal, engtin nge a nih theih?

" A pawi khawp mai, a landan chuan a tlanliam lui a ang, a hmutu te sawi dan a ni a, a car-ah pawh eng harsatna mah a awm lo a nih hmel, a pawi khawp mai", a ni thei lo ang!

" Ka u, ka u, harh teh, i harh em?", min sawi nawk nawktu chu ka en a, " Ka u, kan pi accident kha i hre ve em? Damdawi inah a ruang a la awm a, a tawp nan i va hmu dawn lo em ni?", a ruang maw?

" Doctor-te leh Police-te pawhin mahni...ka u, tirawh i kal teh ang", min pawt tho a, engtianga rei nge hetah ka awm?

Ka kut pahnihin nghet takin Rose sen bawr chu ka keng a, " I phone chu ka keng aw", a lo tih chuan ka mittui a parawl nghal a, ka hawi ruai a, a lo êng kuar tawh, zan a la ni reng turah ka ngai a nia, ka mumang a ni lo a niang.

Damdawi in kan thleng a, ka chhungrilah hlauhna chuan min rawn man ṭanin, a ṭham hian a inṭham er er a, ka lungphu pawh a rang zawt zawt hle.

" Ka nupui hlui mah nise, a hun hnuhnungah chuan ka awm ve tur a lawm", titupa chu engkhaw sawi set set lovin ka va hnek nghal buan buan a, " Nangmah vang a nih hi i hria em? Eng ang mipa nge i nih, i nawm i mâk tur mihring a ni em ni? Lainatna tel hauh loa nghaisa ṭhintu i nih kha", a kawr nghawngah ṭham sawk sawkin ka keuh thlu chawrh chawrh a.

Min rawn pawt hrangin, " Ka that dawn che, dam ve reng hi i phu lo, min thlah rawh u", tiin, talchhuah tumin ka au ruai a.

A taksa lumna nei tawh lo chu kuahin, a kut vawt tak te chuan ka biang ka chul kual tir ruai a, kan hun hman dan te, a nui ri leh nui hmel te ka mitthlaah an lang nghal uar uar a, kohkir theih a ni tawh si lo.

Ka hmangaih thu hrilh tuma Rose sen bawr ka lei chu a kutah dahin, a tawp nan a hmui dâng lip lep tak chu duhthawhtakin ka fawp ta ngawih ngawih a.

A duhdan a ni hauh lo ang, dam chhan leh beisei tur nei lo anga a inngaihna khan a hneh em zawk a ni. Ka huaisenna khan min ṭanpui duh lo mah se, keimah leh keimah kha inṭanpuiin lo hrilh tawp tur kha ka ni a sin.

Kham lo tak chungin ka thlah a ngai ta!

" Ka tlai a, ka tihpalh a ni e; ka hmangaih che, lo tho leh hram rawh", Lalpa, lo kaitho leh hram rawh, ka hmangaih tih pawh a la hre lo, chu ka hmangaihna dawn thlahlel vang pawh chuan dam a thlang mai thei sin, tihsak duh ka ngah, hetianga hringnun tawpna hi a phu lo, a phu hlawllo a sin le.

" Ka hmangaih che, Dingdi sensiar".


*** LEHKHA ZIR TLAI LUAT A AWM LO A NIH CHUAN HMANGAIHTU NIH LEH HMANGAIHNA DAWNGTU NIH PAWH TLAI LUAT A AWM LO NGEI ANG ***

A TAWP TA



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)