Vawikhat chauh tal...

Story tawi te te emaw luanliamna emaw post na
Cck Lalchhuanawmi
Posts: 322
Joined: August 5th, 2022, 8:54 pm

Vawikhat chauh tal...

Unread post by Cck Lalchhuanawmi » August 7th, 2022, 10:21 pm

Vawikhat chauh tal...
Ziaktu: Cck Lalchhuanawmi

Thla hnih, thla hnih chauh maw ni tawh dawn; a va rei lo dawn tak em, " Sawi hrehawm chu a ni viau a, mahse; thla hnih bak hi chu kan beisei ngam tawh lo", beidawng takin Doctor chuan a ti a!

Ka kha a chih tlat a, eng thu nge maw sawi tur ka neih chuan le...

Ka nu ṭah insum hmel chu khawvela ka hmuh duh lo ber zinga mi a ni, ka pa pawh a hui leh pap pap ṭhin a; Doctor kal kian hnu pawhin ka awmna pindan chu a reh ṭhuap mai a, kan lung a inthum chhawk tih loh leh ka nu leh pa thaw halh halh ri tih loh thawm dang reng a awm lo.

Kei erawh muang changa thawk la lutin ka thaw chhuak leh ṭhin a, ka mittui pawh lo chhuak tur an awm tawh lo.

" Bawihte, ka fanu... Engtin nge kan tih tak ang?", ka nu chuan ka chal lo dawm vawng vawng chungin a ti a, a insut ri hlawk hlawk bawk a, ka pa pawh chuan ka kut lo humin, " Bawihte, kum khat em pawh a dam lo ang an tih che pawh khan kum thum lai lawm hei i dam ni, tunah pawh hian a ai rei i dam hrim hrim ang, ka fanu huaisen i nih kha tiraw", a ti a.

HIV zungzamin min fan chhuak vek tawh a, a chang chuan fanu huaisen nih pawh hi a har ṭhin a sin. HIV kai lo ta ila pangngai takin ka nun hi ka hmang ve tur, chhungte phurrit pawh ka ni mai lo tur hi a nia; Pathian hnena vui chang ka ngah angin lawmthu sawi ka bang thei bawk si lo.

Kan ṭhatna turin a rel tih hi pawm harsa ka tih angin ka thlah phal bawk si lo.

" Ka mut a chhuak", tham chhelh chhawlh hian ka ti a, ka mit chhing nghalin suangtuahna ramah bawk chuan ka leng leh ta!


" Ka nu, a mak em mai ka tlai dawn", tia au lung lungin ka nu min vawnna ata tal chhuah tumin ka bei fat fat a, " Bawnghnute hi i in zawh phawt loh chuan ka kal tir dawn lo che", ka nu ṭhin hi chu aw.

" Zan i meng reiin zing i tho hma si a, chaw ei i tlem bawk nen in zo vek rawh", ka pa chuan a lo ti ve leh a, chhungkaw ṭangrual hi chu a. Bawnghnute hi ka ngaina hlawl lo, Peihlo tawkin ka in zawh tak tho kha.

Exam lai hi chuan an hetih tlat zel ṭhin, buaithlak mahse, vawiin hi exam zawh ni ni tawh tho, " Ka nu leh ka pa te ka hmangaih em em che u", bus stand panin ka tlan vang vang a, hawiletin ka kut ka vai leh lauh lauh ṭhin.

Bus a lo ding tawh ka rin ang ngeiin an lo ṭhu ṭhap tawh bawk a, keimah chiah min lo nghak leh ta a ni hrim hrim phawt ang a.

" Hmanhmawh reng reng suh, nangmah chauh kan nghak tawh che", kan uMala hi chu a ngeiawm thiam ve teh e, muangchangin ka han kal lui ngei a, a thinin a tuar leh dawn lo, " Lalngaihawm, hmanhmawh rawh", vin deuhin a lo ti tuar, kha maw!

Bus-ah ka lut fel chiah tihah, " Pa Kim, Chak mangkheng khan tlan nghal rawh", uMala chuan a ti a, ka ṭhut fel hnuah bak a tlan chuang lo, uMala ka va chhiah khum zeuh.

Remremin, " Vawiin hi a tawpna ni ta, kan hlim lai ni leh kan sikul zinkawngte hi keizawng nghilh ka phal lo, thinlaiah ai ang cham tir reng ka nuam e", lungkuai lutukin a lo chham chhuak a, ani hi chu Mizoah letter hmu pha mai tur pawh ni lo, Topper tura kan hual hial kha a nia, kan ngawi ṭhap a, " Lalremruati lo inla ril leh hman, ennawn rawh, Pol.Sc i thiam loh tehlul nen, i fail ang e", a hahthlak thei e.

"Lalmalsawm, i ninawm", a dik chiahuMala tak hi chu, kan nui ta vek a, tua mah chuan ennawn ta'nge ti kan awm lo, kan inhmuh tawpna ni tur chu âm takin kan hmang a ni ber ang chu.

A khat tawkin uMala chuan, " In bengchheng lutuk", a lo ti kharh kharh leh ṭhin a, kan hlau bawk si lo a, a thu awih kan awm lo.

Tukverh lam ka en char char a, suangtuahna ram chauha ka changtupa ni theia, kan tlan pelh hma loh chu amahah chauh ka mit a fu a, batch awrin leh mask vuahin a lo ding ṭhin a, eng batch nge a awrh ka hre lo eng nge a tih ṭhin tih pawh, mahse; vawikhat chauh tal chu a mask saw phelh se ka ti! Kum thum lai a ni tawh, school kal chauhin ka hmu thei ṭhin si a, chawlh te hi ka van haw thei tak, tun kha ka hmuh tawpna tur a ni ta der mai!

" Lalngaihawm hmanhmawh rawh, tlai ziah mai", uMalan vin tawkin min ti leh a, ka hmanhmawh duh chuang lo reng reng.

" Awmawm", ka hnung ka en vat a, " Awiii, Vanlalremremmirilnu", kan inkuah chung chung nghal a, a va nuam tak.

" A va mak tak, Lalngaihawm hmanhmawh rawh", va mak bawrh bawrh ṭhin tak.

Remremi pawh a lo chuang ve a, kan inhmuh lohna a rei tawh bawk a, sawi dun tur kan ngah teh e, mahse; tukverh aṭanga pawn lam hawi chhuah erawh ka theihnghilh lo nasa, mahse; hmuh tur a awm tawh miah lo!

Ka nu leh pa bulah chuan kan school kalna ṭhina thawh a nawm thu hahipin ka sawi a, History Lecturer-in ka thawk ṭan a, " History-a mark hmu chhe thei deuh siin, engtin nge maw Zirtir hna te i hmuh theih zawk le aw", tiin, ka ṭawng kar lakah ka pa chuan a lo ti a.

Ka nu pawh lo nui tawpin, " Remremi pawhin naupang a ngai thei lo a, Pre School-ah a thawk ve tho lawm", hmui tisawi niah chungin ka ti a, " Chhan khan i hre thei si", ka pain a lo ti, " Chaw ei teh ang u", ka pa bawk chuan tiin, kan pathum chuan kan nui bâwk bâwk a.

Mahse, Zirtirtu nih leh kan school khera thawh ka duh chhan tak tumahin an hre hauh si lo; school panna kawnga lo batch awrha, mask vuaha lo ding kawisawi ṭhina hmuh ka duh avangin a ni si a.

Mahse, ka beiseina chu beidawnna a nih hmel; hmuh tur a awm tawh hauh si lo!

" Awi Pawngi, ngati nge chu chen i lo zep a, min hrilh vat tur che lawm, i va laktlak lo tak", Remremi chuan min beng chawrh chawrh a, " A nâ, min beng vak kher suh", ka ner nawng a.

" Ka beng nâ thlawt lo che aw, i va sual tak, chuan; chupa i hmuh ṭhin duh vangin ni maw tukverh bul i chuh tlat ṭhin, ka lo va â rei tak, tukverh bul lo chuh ve ziah ila ṭha tur",

"Vanlalremruat", ka ti tuar a, min lo tham lo nasa, " Eng nge? Ka lo â rei em mai", inenin kan han nui dun leh hrih a.

Remremi chuan chutia a hmel tak pawh hmu loa kum heti chen ka thinlung a luah chu a hrethiam thei lo a, keipawhin ka hrethiam bik lo; pawnlam mawina chauh thlira pawnlam mawina zuna uai a ṭhat lohzia an sawi ka hriain, ka nu leh pate ngei pawhin min hrilh ṭhin.

Mahse, kum heti chen ka thinlung luahtu chu a pawnlam mawina chauh ka hmuh, a chhungril nun erawh ka hmuh loh leh ka pawh loh lakah ka uai tlat si a ni!

Hmuh leh ka duh ngawih ngawih, ka hmuh hun hunah chuan zah theih lohna dah ṭhain ka be tawh ngei ngei ang. Chutia ka ngaihtuah rauh rauh lai chuan âw ka hria a, a fiah em em mai lehnghal, " Khatia, pawl sawmpahnih exam zawh nia an rawn haw phei kha, vanduaithlak takin accident an tawk hlauh mai a.

Pathian hnenah fa min pe turin kan nupain kan dil ṭhin a, Ṭawngṭaina chhangtu chuan a Vantirhkoh zinga a duh ber chu min rawn pe ta a, mahse; mahse...", a mittui luang zawih zawih te chu a hru a, " Mahse, tunah hian a tel loin a awm leh thei si lo a, ' Ka lo awmpui leh tawh mai ang', tiin, a rawn hruai haw leh ta a ni", a ti a.

A âw chu ka hriat ṭhan leh ka ngaih nin theih loh ka pa duhtak âw a ni.

Ka nu ṭap hawm hawm thawm chu khawpui leh ṭek ri ai pawhin a ringin ngaihthlak a hrehawm zawk.

Ka pa chuan, " A tette aṭangin ṭhian a kawm ngai lo a, a leng chhuak ngai hek lo, school leh inkhawma ṭhian a kawm tih loh chu a hranpain a kawm ngai lo tluk a ni. Kan pathumte hian kan inkawm ṭhin a, kan pathuma kan awm tawh hi chuan tumah dang hi kan ngai lo reng reng.

Chhung inkhawm neihnaah pawh hla sak tur te hi a thlang hnem thei em em mai ṭhin a, a Ṭawngṭai rei thei em em mai bawk, thu ho deuh deuh te hi a chham kur duai duai zel a, a dam ṭhat hi chuan Biak ina kal te pawh hi a ṭhulh ngai lo tluk a ni.

An accident ta a, Mala khan a lo bawh a; Mala leh Remremi te a hmuna boral zingah an tel hlauh mai a.

Tichuan, Bawihtei hi accident kha a lo nâ viau mai a, a englai ber nge nâ tih hriat si lohin dam tia sawi tur ni si lo, dam ṭha lo tia sawi tur ni chiah si lo khan a awm reng a, pawl sawmpahnih result a chhuak a, a pass ve hlauh mai a Pathian zarah, mahse; zir zawm thei loin a awm ta a", ka pa chu ka thlir reng a, ka ngaihtuahnaah hian eng nge awm tih pawh ka hre lo.

" A hnuah chuan HIV a lo kai reng mai tih hriatchhuah a ni a", a hmai hupin a ṭap a, "Mala kha HIV lo kai rengin, Bawihtei thisen nena inchiahpiah kha a ni si a. A lo fan chhuak deuh vek tawh hi a lo ni a.

Kum khat pawh dam tling lo tura min tih kha kum thum chuang lai a nui hmel kan hmu a, ' Ka pa, kan ṭhatna turin Pathianin ro a rel ṭhin a lawm, vui loin lawmthu sawi zawk ila, Pathianin min zirtir duh a nei a ni ngei ang', tiin, a sawi ṭhin a. Mahse, kei erawh chuan.... eng hi nge min zirtir a duh ni ang aw ka ti ṭhin", tiin, ka pa chuan ka ruang chungah a sawi a.

Eng nge thil awmzia hi ni ta le?

Ka tel loin kan Pathian khi a awm thei lo a, rei lo te hnuah min rawn hruai dawn chu a ni a, ka nu leh pa ka la thlahlelin an tan tihsak tur leh hmachhawp tam tak ka la nei ve si a, ngati nge?

Chuan, chuan..., " Aw Lalpa, min lo la hruai suh",

" Bawihte, i ṭha em? ", meng phutin ka thaw kâwk kâwk a, ka nu chuan oxygen min lo vuahsak nghalin ka thaw ṭha thei ta a.

Ka nu chuan ka biangte lo chul heuh heuhin, " Bawihte, thlamuang deuhin kal rawh aw............. I pa nen chuan min lo ngaihtuah reng reng suh", a ti pah a.

" Vawikhat...vawikhat......",

" Bawihte, eng maw?", ṭawng tur pawhin chakna ka nei tawh lo, ka chau ngawih ngawih tawh, " Vawikhat chauh tal...", ka ti ṭawk a.

Ka nu chuan, " Bawihte, i haw duh em ni, kan haw dawn nia aw, Doctor ka va hrilh ang", a ti a, a lo kir leh vat tur thu sawiin a chhuak a.

Ka suangtuahna ram chauha ka changtupa ni thei, kum heti chen ka thinlung luahtu chu a pawnlam mawina chauh ka hmuh, a chhungril nun erawh ka hmuh loh leh ka pawh loh lakah ka uai tlat si a ni!

A chhungril nun eng ang tak nge a nih tih leh damchhung reilo te chauh chenpui ka thlahlelin chhin ka chak takzet!

Vawikhat chauh tal...

*** A VANTIRHKOH DUH BERTE KAN NIH MIAU AVANGIN TUMAH HLU LO LEH MAWI LO BIK RENG KAN LO AWM LO***

A TAWP TA



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)