ROTEKAWLA

[Jacob tlumang]

Amah ROTEKAWL'AN "Luck leh luck loh hi chu hmelah anilo a,Zei leh zeiloh ah a in nghat, hmel ah bat a awmlo" zuk ti tlat pek a...

Tumkhat Ranngo zawngin an khaw ṭhenawm ah a zin a, chu khaw tlângau chuan "Rotekawl Ranngo hi i lo zawng ve ziah a,hlawhtlin tih reng awm silo" a lo tih deuh zêk a,Rotekawla lah chuan "inkhaw nula ho hi lawm le ,tu mah lah hian min uk sak duh lo a,Hmeichhe finin Tuikhurral a pêl lo tih a dik zia in hriat ve nan ka lo zin chhen anih hi" a ti sam et a.

A zinna khua apiang ah lah hian sawi hi a hlawh zui zêl leh nghal,zah ahnêkin a hawi sang thei vah vah khawp mai.A kal na a piangah boruak a nei hak zel mai leh nghal.

An khaw pa ho hi chuan Rotekawla mizia an hrechiang tawh khawp a,a hmuhlai hian tumah an zung ngam lo e antia lawm.Pa ho chu sawiloh tlangval ho pawh hawi zuk zuk chungin an zung ngam tawk ani,mi zungtur a hmuh tawh phawt chuan rem leh remlo pawh sawi lovin a bihthla tawk tawk zêl a,mahse hetiang mizia hi nimahse hmeichhia erawh a ṭih hle thung.

Vawikhat a thingpu chu nuthlawi challian'in a lo keuh a ni awm a,ṭap pur chungin lal hnênah a zual ko e an tih tâk kha maw.

Nula hi a rim zantin ve a, a nula rimna ah an khaw tlangval ho tumah zuk ṭhu rei ngam miahlo a,an hlauh vâng zawng ani hauh lo, duh tawka Rotekawl'an ti ti a vawrh tawh chuan an khaw pa ho leh thlangval ho neih tiat a sawi den den zêl a,nula ho lah chu nui khek nasa sa ah ṭangin tlangval dang ho chu an chhuak tharh zêl."Han khing dawn i la pa derben ni si"tih pah chuan an en liam leh nge nge thin.


Vawikhat pawh a nula rimna ah an khaw Val upa Neihbawnga neih têt zia a sawi lung lung mai a,Neihbawnga zan vak chuan lo hria in thinur zet mai hian a hau ta hrep mai a,ani Rotekawla lah lo duai bik lo,"Tuiburdawn tia lek nei si hian i la che lek ve em em chu nia " alo ti deuh zêk a.

An buaina chu lal beng hial thlengin,lal tualah chuan an pahnih chuan ko in lal chuan inrem tîr a tum a, Rotekawla pêk chuan "Lalpa val upa Neihbawnga hi lawm, nang ai pawha nei te zawk si hian neihlen zawk phet a tum a, Neihbawnga pawh a ni lo,a hming hi a pu zo lo emai,Neitêa ni tawh rawh se,hman zânah a zungtur ka hmu fuh a,ti i la ka en thla ani zawk mah. Te tak tê hi lo phawrhin a la thing zui nawk nawk leh nghal " a tih chuan mipui ho chu an nui dar dar a.

Lalpa meuh pawh a in sum thei lo, Neihbawnga veng thawng pah si ,nuihza bawksi chu upa ho phenah chuan A nui dir ngar ngar mai a,lal chuan "chu Rote val upa Neihbawnga ai chuan ka nei lian a maw?ka neih ro hlu hi i hmutawh reng reng ami ? Atih chuan Rotekawla chuan rang fahran hian"Hman ni deuh lawk khan Tlak veng hmeithai fanu nen tuikhur kawngah in in bengberek kha ka hmu che u lawm , chu lo pawh ka la hre ṭeuh mai" a ti chhuak leh phawng.


Lalpa nui vur vur lai chu a tawp nghal chat,lalnu lam a va en chuan lalnu mitmeng chu thip ṭha rem rem tak ani,mipui ho lah chu an lo thum mam mam zui,Lalpa tih ngaihna hre lo chuan rorêl a tawp ti deuh nghut chung chuan A lût zui nghal vut a,han thinrim dawn se Rotekawla a hre chiang ropui si,khing let tum ni se,engkim Rotekawla chuan A sawi a hlau bawk nen,lalnu vuak bak a ni tih in hre bawk,a ngawihsan ta tawp mai ani.

Rotekawla thupui hi ani ka theihghilh theih miah loh chu,"hmelah bât awmlo"......

Rotekawlan an khaw nula hmeltha em em mai Tlangtinchhingi a bem ve ṭum in,Chhingi lah chuan i hmel hi khawsikpui ka vei phah ka hlau tia a lo hnar chuan "hmelah bât awmlo, hmelthatna avânga mihring hi neih chhan tlak chu ni se,Savawm in a ham thlêr hnuah i duh dawn lo tihna ani dâwn asin" a tih chuan Chhingi rilru a hneh thlu ngang a niang, Rotekawla kum khaw chhungpuinu ni tûrin a lawi lût e an tih chu...

Nupui a neih hnu hian a hma zawng aiin a in la pasaltha amaw tih mai tur hi ani lehnghâl, thangchhuah awmzia hre miahlo in thangchhuah a tum leh tlat mai pek a,Tumbu leh chimchawk a veh nitin zêl e an ti.

A hnu ah " Ram lam a thangchhuah tum chu a hahthlâk emai , in lam ah thangchhuah tum zawk teh ang ati leh deuh tlat a,an kawngka chu chhunlai lai ah nam tawlh rawk zel in,a nupui thing phur tur leh feh tur chu tuktin mai hian a birh ziah zêl leh nghal.annu chu vawitam a tlân phah fo reng ani.

Chutiang chu nimahse Tlawmngaih leh huaisen ah chuan tu ma tlukloh ani ve tlat, zankhat chu "sa atla ee" tiin an khaw venghmawr ah chuan au ri alo chhuak lauh lauh mai a,tlangval ho an thlen kim meuh chuan Vawk neitu nu chuan "Rotekawla a liam tawh ania,meichher chauh a keng leh nghal zuk pawh thuai teh un, ani hi alo thi tlaw riau riau palh ange" alo ti sawk sawk a,tlang val ho leh val upa pawh ho chu hman hmawh phi li chuan an tlan liam ve nghal sawk sawk a.

Rei fe an tlanthlak hnu chuan sakei rum hum hum thawm avang chuan an ding rual nghal ṭhawt, tumah rengin Rotekawla chu a dam an ring tawhlo,sakei thawm lo chhuah na chu an thlang lawk ani tawh a,an zuk bih dek dek chuan meichher eng teng teng hnuai a, Rotekawlan sairal lo thut bet pah a,a vawih alo barh ngat ngat mai chu an zu hmu hlawl mai a,val upa leh tlangval ho chu an mengphawk hlawm teh e.

Sakei pawh chuan Rotekawla vawih hip reng zawng A tuarlo ania nge,a chatthla der mai a.Tlangval ho chu lo haw haw thla mup mup in, Rotekawla chu an vawr lawp lawp mai a,Chumi hnu chuan an khua leh a chhehvel khaw tin mai ah chuan Rotekawlan sakei,sakei satliah pawh nilo sairal ngat a vawih hmangin a that tiin a hmingthang ta hle ani awm e.