Short story
By Euricka
"Puih che ka duh, chhan awm lovin tual i that dâwn lo tih ka hria." Min puih duh tu ka vawikhat hriatna a ni. A hmelah chuan eng emaw hmu tlata inhriat na ka nei bawk a. Min pui duh tak tak angem? Midang ang bawkin, bum hmang, ka taksa mawina hmang ṭangkai duh tu a ni ve mai angem? A hmei a pa in tumah ka ring zo tawh lo anih tawh ber hi maw.
"Abigail, ngawih reng khan eng kawng ro mah a su dâwn lo. I nau ngaihtuah rawh, damchhunga jail bang zût san chu i ngam tak tak ang maw." Ka nau, thudik sawi chhuah nân ka nau hmangin min vo nawn leh ta. He lawyer pawh hi kha mi tenawm pa nên khân danglamna an nei lo anih dawn hi.
"Ka nau chuan, nun kawng ṭha a zawh mêk lo em ni? Thudik sawi chhuak vek pawh ni ila, jail ka tâng dawn tho alâwm." Ka chunga thil thleng ang kha tawng ve se chuan keimah ang tho in rapthlâk takin a che ve tho ang mawle.
"Khatiang khan min chhâng dâwn tih ka hriat vang alâwm, pui tu tur che midang ka rawn hruai tel. Doctor Zara kha lo luh tîr lawk ta che u." Kawngka lam melh pah chuan a ti zui lâng lâng a.
Chu veleh kan awmna room kawngka chu rawn in hawng in, doctor form pawh ha lem lo, mipa pakhat a rawn lût a. Khaw dang hawi sawn miah lovin, ka hmaa a rawn ṭhut thleng chuan ka mitah chîk takin min en reng mai. He pa hi ka hmu tawh tlatin ka hria, vawkpu intiin a ṭhianpa psychiatrist legend a tih kha ani tlata hriatna ka nei lehnghâl.
"Chibai le, Psychiatrist Zarzoliana ka nia. Inthlahrung miah lovin i harsatna min hrilh la, pui tur che in ka theihtawp ka chhuah ang." Ka hmaa a kut rawn dawh pah chuan a ti a. Ka lawyer nena min en reng takah chuan hreh ru takin ka chibai ve ta ringawt.
"Abigail Lallawmawmi maw i nih, i case ah hian thudik in phûm ru a awm tlatin ka hria. Min hlau lo la, engvanga ti nge i nih, chiang taka min hrilh turin ka duh che." Hei pawh chu ka lawyer ang tho, thudik zawng reng rengin a hmanhlel ve tho anih dawn hi. Sawi chhuak vek pawh ni ila, engnge ka tan sâwt na awm tawh chuang ang. Ka tawpna tur chu jail tho ani dâwn lâwm ni.
"Abigail, misual i nilo tih ka hria. Tûn bak hi thudik sawi chhuahna hun i nei tawh lo maithei ania. Tual that tura huaisenna i neih chuan, engahnge thudik sawi chhuak turin chakna i neih loh bîk ang. Thihna in i chungah ro a rêl meuh chuan, i nau pawhin misual tak angin a damchhungin a hre reng tawh dâwn che asin." A ti dam leh thluam a, chu thu chu ka ngaihtuahnaah a awm ngai lo. Ka nau, ka hmangaih em em kha, a damchhunga ser nung siam sak ka duh hlei nem.
"Aw le, ka hrilh vek ang che. Mahse, thil pakhat min tiam phawt a ngai ang." Ka kut hum ruh pah chuan ka ti a, ka thiltih zawng zawng te, mitthlaah a rawn lang nghal chuai chuai mai.
"Pakhat chauh te chu a harsa hlei nem, han sawi ta che." In hawng takin a ti a, a mitmenga tumruhna lo lang chhuak chu hmu in, midang ang anih loh zia ka hrechiang hlê in ka hria.
"Thi turin ka chung thu an rêl anih chuan, ka nunna an lâk hma ngeiin, vawikhat tal ka nau hmuh ka duh." Ka tih chuan, a lu bu nghutin, "thudik hian nunna a chhanhim thei ania. I nau nen in duhthusam ramah a awmdun tîr thei bawk che u." In ring tawk taka ti in, a bula lawyer ṭhu pawh chuan dik a ti ve aniang, a lu a lo bu ve nghat nghat mai.
Ka nau nena kan awmdun hun tur ngaihtuahin, thudik chu sawi chhuah ngei ṭha in ka hre ta.
Chanchinthar leh chanchinbu a lang chuai chuai khawpa tualthahna rapthlâk, lo thlen chhan dik tak chu ti hian ka hrilh ta a.
Abigail Lallawmawmi ka ni a, tûnah hian kum 29 na ka hmang mêk a ni. Pa hrawn ka neih tâk chhan hi sawi chhuah a huphurh awm viau mai. Mahse, ka chanchin in hriat atana thil pawimawh te zing ami anih avangin ka'n sawi lang hram ange.
Kum hnih mi lek ka nih laiin, ka pa chuan a tlangvâlna thlah hlei thei lovin, veng mawng nula a kawp tlat a. Ka nu'n a hriat meuh chuan a tlai zo tawh, a nupui leh fa nau te ai in chu nula chu a thlang ta zawk a ni. Helai chinah hian ka duhtawk rih mai ang.
Kum 5 ka nih in, ka pi, ka nu nu chu a boral a. A boral hnu kum khat na ah ka pu chuan ka pi tellova a khawharna tuar chhuak zo lovin min liam san ve leh ta a ni.
Ka putea'n nupui a neih hma kha chuan chhungkaw hlim tak kan ni ṭhin. Mahse, nupui a nei chiah a, fa an neih meuh chuan keini nufa chu kan chuang leh ta reng mai.
Ka nu nên mi inhnuai luahin, ka school kal na tur tuak nan chawhmeh te a zuar ve lawp lawp a. Mahse, a hri a ṭhat loh êm avângin school kal na man tur pawh nei hlei thei lovin a damdawi lei nân kan hman ral a ngai leh ṭhin.
Sorkar school ah pawl hnih thleng chu ka kal lui ve hrâm hrâm. Ka nu duhthusam ang nilo mahse, a thlâwn veka engkim kan dawn theih avangin a damdawi leina tur pawh kan neih theih phah a ni.
Kan hma lawka in thlan pui lo awm turah kan khua, Khawzawlah pawh Minister rawn campaign an kat nuk reng a. Chung rawn campaign zing ami pakhat chuan kan nufa chanchin lo hria in, min rawn tlawh nghe nghe.
Tlangval nêlawm tak a ni a, nuih a duhin, ka nu chauh nilo, kei thlengin min ti lungawi thiam em em bawk.
A tawi zawngin sawi ta mai ila, chutia an campaign zawh hnuah chuan an sorkar chu an tling ta mai a. Khawzawl a rawn chhoh apiangin, eitur chi hrang hrang leh thawmhnaw mawi tak tak min rawn ken fo mai.
Ka nu a hrisel lo si a, enkawl tu kan mamawh tih chhuanlamah hmangin, ka nu nên chuan an innei ta a. An inneih ni khân min hmangaihtu, pa ka nei ve ta ti in, ka hlim hle anih kha.
Aizawl, Tuikual venga a chênna inah kan nufa chuan min hruai lût a. Ka nu pawh doctor thiam tak pan pui in, a hrawk cancer chu zai a, a la dam theih thu kan hriat veleh a rang lamin phaiah kan kal pui nghal.
Hlawhtling taka an zai theih nân ka pa hrawn nen pawh kan ṭawngṭai nasa. Kan beiseina tih hlawhtlin in a awm a, ka nu chu tluang takin an zai ta anih kha. A dam hmel ka hmuh leh ṭuma ka hlim zia leh, ka pa hrawn fel ṭhin takin min hmangaih êm avâng khân khawvela hmeichhe vânnei ber, ni angin ka in ngai hial ṭhin.
Tichuan hlim taka ni chhuak kan chhiar ho ṭhinna kum pawh a liam ve zel a. Kum 8 ka nih in, tuna ka hmangaih em em, ka neih chhun ni ta, Agatha Lalhlimpuii hi alo piang ve ta a ni.
Mahse, engahnge maw vanneihna hi kan ta anih rei ve theih der loh le. Vanduaina chuan min um phâk leh in, kha zân, ka damchhunga ka theihnghilh tawh loh tur mangchhe rapthlâk tak lo thlen aṭang khan ka nun chu rah beh in a awm leh ta.
Agatha-i kum 4 a tlinna piancham lawmin, zan tîr lamah chuan kan hlim tlâng hlawm khawp a. Ka pi leh pu (ka pa hrawn nu leh pa te) te leh ka nitei te nên zanriah kan kil ho bakah, cake ei ho na te kan nei anih kha.
Dar 10 rik dâwnah kan mu ve hman chauh a. Ka nau hi kum thum a nih aṭang khan ka bulah lo chuan a mu duh tlat lo. Ka pa hrawn pawhin a rem ti mai zel a, min en hranna a neih loh avâng hian kei chuan ka pa diktak angin ka ngai hmiah tawh. Mahse, ka nau piancham kan lawm sak zanah chuan engkim a danglam vek.
In hau thâwm ka hriat avangin, khum aṭang chuan ka ṭhu chhuak hlawl a. Ka nau, tui taka muhil mek chu en in, rizai ka sin ṭhat tîr hnuah ka thâwm hriat chu ka nu leh pa te an ni nge ni lo fiah tumin ka tho chhuak a.
An room lam ka pan lai chuan ka hnung lamah ke pên thawm ka hriat zêl avangin hawi pawh hawi lêt ngam lovin ka nu te room ah chuan ka tlân lût a.
Chutah le, ka pa chuan an khumah ka nu chu lukhama a lu a hup sak lai ka va hmu a. "Pa, engatinge" ka ti hman ṭawk, ka hnung lama ke pên thâwm ka hriat khan min rawn nang chîngin, ka mit a rawn hup nghal.
Ka pa te room aṭang chuan min nawr chhuak hlawk hlawk a. Ka mit hupna a thlah chiah chu, store room chhûngah ka lo awm reng tawh. Min hruai lût tu lah chu tu dang ni lovin, ka nitei, min duat em em ṭhin tu ala ni zui.
"Abi, hlau suh aw, i nu leh pa te an in hauh chhûng chu hetah hian lo awm rih ang che. I nau ka han hruai leh lawk ang, i hlau lovang tiraw." Ṭha deuh chuan ti in, ka chhânna nghakin, min melh kiau a.
Ka lu bu nghatin, buara in thuah ṭun chungah chuan ṭhut hmun ka rem nghal. Reiloteah ka nau chu a rawn pawm lût a, a la mu tui viau.
Ka nu te room a ka thil hmuh kha sawi chhuakin, a chhan ka zawh chuan ti hian min chhâng a.
"An in hau mai mai anih kha, i pa hi pa fel tak ani a. I nu chungah eng thil ṭhalo mah a ti lovang. Zanina thil thleng hi sawi chhuah miah loh tur aw, anih loh chuan, nangmah venghim tu vântirhkoh te khan an kal bo san mai ang che." Ka nau tih harh hlau tak chuan, zawi tê in min hrilh siam siam a.
Kum 12 mi chauh ni chûng hian, thil thlen dan hre kim vek lo mahila ka pa khan thah a tum tih chu hrilh kher ngai lovin ka hre chiang hle a ni. Ka nitei mitmeng verther tak pawh hi hre hrang lo rual ka ni tawh lo.
In ngaihtuah harhin, store room aṭang chuan ka chhuak lui hrâm a. Hmanhmawh takin ka nu te room lam ka pan nghal. Kawngka ka hawn rual chuan tukverh aṭanga ka pa'n ka nu a nam thla lai chu chiang takin ka hmu a.
"Nu," ti a râk tuarin, a in sawh nat hlau in, kawngkapui lam panin ka tlân thla leh dawr dawr. Ka nu bul ka thlen chuan ka kuah nghal a, a lu aṭanga thi lo chhuak te chu tih tawp sak tumin ka kut chuan ka dawm nghal. Pui tu tur zawn nachang pawh ka hre lo, "nu, harh rawh," vawi engzatnge ka sawi nawn pawh ka hre lo.
Ka pa leh ka nitei te chu an rawn lang ve a. Tuar ber anga langin nitei lah chu a ṭap ring ringah a ṭang leh nghal.
Ṭhenawm te an rawn lang rang khawp mai a. Ka nu chu damdawiin pan puiin awmzia a nei tawh lo. Ka pa hrawnin a that ngei a ni, ka nu, min hmangaihtu kha.
A ruang bulah ṭhu in, midang an ṭah lai chuan ka pa, ka nu hmai si lek leka ṭap ve mêk chu ka melh kalh a. Thusawina hun a hawng ta, ka nu hi tihpalh thil thu a tla hlum anih loh zia ka au chhuah pui a ngai a ni.
Thusawi tu in thu a sawi laklawh lai chuan, ka ṭhutna Y.M.A ṭhutthlengah chuan dingin, "Anu hi thah a ni, apa hian...." Ka sawi zawh hma in, nitei'n ka kâ min hup sak leh a. "Kan tihpalh lutuk, ala naupanga, a tuar thiam lo anih hi." Lo ti zung zungin, room a min pawm chhoh a tum lai pawh chuan tal vak vak in, "apa thah anih kha, tukverha a nam thla lai pawh ka hmu vek alawm." Ti in ka au chhuak chiam, ka pu in min rawn khap ve sateh mahse, ka ngawi duh ṭhak lo.
Ka pa hrawn lah chu fel ber awm ang zia zângin, "ni e, Matei hian a sawi dik, keimah vang vek a ni. Matei nu, min ngaidam rawh aw, lo chhuahsan lo tur che ka ni asin." Ṭap pur chunga ti in, ka nu chu a kuah leh a.
Ngawih mai ka tum bik lo, ka pa hrawn lem chan ka man lutuk chuan ka thin a ti rim ngawih ngawih. Agatha-i pawh buaipui thei lo khawpin, chhuatah chuan ka sapa tal ta vak a. Ka nu chu ka pa thah ngei anih thu aw râwl tawp meuhin ka au chhuah pui ve.
Mahse, ka pa ṭap ri chuan mipui a hneh zawk tlat nge mawni ka thusawi chu min uk sak duh rêng an awm lo. Ka tuar na lutuk awmngaihna hrelo ah min ngaih sak ni berin ka hria.
Chumi zan aṭang chuan ka pa hrawn nen kan inkar a chhe ta. Biakinah Pathian thu a hril dup dup a, a hminga MLA leh kohhran upa ni ta chu mi zah a kai bawk nen, tawrhpuina thu pawh kei aiin a dawng hnem zawk.
Ka nu thlarau zah lêk lovin a boral aṭanga zan thumnaah nitei nen an mu dûn nghal a. Thudik ka sawi chhuah hlau in, min vo reng bawk.
Ka nau lah chu a fa diktak anih loh thu sawiin, ka hmuh lai ngeiin kut thlâk a hreh lo va. Zu nen, pawn lam mite hriat loh turin kan inchhûngah chuan nawmsip a bâwl chho ṭan ta.
Tichuan a tisa châkna leh tuihâlna chu nitei a kham khawp loh avangin ka chungah a ṭuan phah a.
Kha zan rapthlâk, ka thianghlimna ka hlauh zan khan intihhlum ka tum hial anih kha. Mahse, ka nau kha kum naupang tê ala ni a, kei lah hnathawk turin ka kumin ala tlin bawk silo.
Inchhûng chu nuam tihna pakhatmah ka nei tawh lo va. School ah lah ka ṭawp zia an hriat hlau in, in kil tawih rêng rêngin hun ka hmang ṭhin.
Ka chunga a châk na hri thla mêk tu, ka pa, ka pa hrawn mitmeng tenawm tak chu ka en ve reng a. Vawi engzatna nge ni ta, ka chhiar sêng tawh lo.
"I nau chungah a thlen ve i duh loh chuan, ngawi hmak ang che." Ti in, ka nghâwnga rêk chung chuan min vo leh a. Ngawih chhan tur chhuanlam ṭha, ka nau alo awm kher hi chu a pawi ngawt mai.
A sûlhnu ṭawp tak, ka taksaa kai chu ti fai turin bathroomah ka tlân lût nghal. Tui leh sahbawn pawhin a tlen fai zawh loh, ṭhan thi ka neih hma aṭang tawha ka taksaa a sûlhnu châm nghet tlat hi engtinnge ka tih fai ang.
Kum a vei meuh chuan ngaiah ka nei tawh. Min khawih loh chuan ka khua a har tlat a. Keimah zawkin pan chang ka ngah ta khawp mai.
Ṭhan thi ka neih hnuah chuan nau ka pai hlau in, damdawi min ei tîr fo a. Nitei hriat lohin kan pafa chuan hun kan hmang dun ṭhin.
Chutianga nun ṭawp tak hmang chung chuan higher ka thleng ve der mai. Nun hlutna ka hre tawh lo va, ka damchhung hun chu, chu inah chuan hmang ral turin ka in ngai tawp tawh.
Mahse, higher a ka luh pui, mipa pakhat hmelṭha leh in khai thli zo veh vawh, lehkha thiam thei tak chuan min lo hmel duh ve hlauh mai a. A tîrah chuan a hma ang tho in, in kil tawihna lian tak neiin, chhân pawh ka chhâng lawk lo.
School kal dâwnah kan gate bulah min lo nghâk reng ṭhin a. Bânah pawh ka hnungah min zui ru fo mai. Class ah lah, buaina ka tawh apianga min pui ṭhin tu a ni a. Kan inah pawh eng eng emaw chhuanlam hmanga rawn len a hrat chho ṭan ta.
Chutianga thla li lai min zui tâk reng avâng chuan ka nihna zawng zawng hrilh vek ka tum ta a. Engkim hre vek chunga min la duh dawn anih chuan, ka tan a ni aia ṭha an awm lovang.
Ni 12 July a ni a, break ah tiffin ei turin ka dawhkân min rawn ṭawm leh tawh. Ka ṭhut puite pawhin kan inngaizawng emaw ti in, min fiam nasa ṭhin hle a. Ani lah chuan chutianga ni anga min fiam ṭhin chu nuam ati zawk emaw tih mai turin, ka chungah a theihtâwpin ṭhat a chhuah ṭhin.
Tiffin kan ei zo a, "in be lawk ang," ti in, kan schhool chhaka ṭhutna an siamah chuan ka chhoh pui.
"Abi, min chhâng tawh dawn tiraw?" Ka hnung lam aṭang chuan a rawn ti deuh chhên a. Chhâng lovin ṭhutna tura an siam na lam chu ka pan lui zêl.
Chutia vawi tam zawhna ngai min zawh nawn sek hnu ah chuan kan thleng chho ve thei ta hram a. Thawk lak pahin chhêm dam thli rawn thaw chho heuh heuh chu ṭhutthlenga ṭhu pah chuan ka dawng heuh heuh, hetiang renga hahdamna hi ka la tawng ngai lo.
"Abi, nang chu min ti laklawh. Dar a rik hma hian sawi vat vat rawh." Ti in, min tur leh chhên, ka bula ṭhu tura ka sâwm pawhin, "i sawi hma chu, No, animai." A ti teh tlat a, sawi a huphurhawm zia hi hria se chuan min tur chhên lovang mawle.
"Duhzual," ka ti zawi sap a. "Pumbaa min ti rawh," a ti leh tlat tawh. A Lion King âtchilh hi a reh thei lo reng reng.
Ka aw thian leh kharhin, "Pumbaa," ti in, a vawikhatna atâna ka koh na chu a hlimpui ngei mai. "Yes, engpawh sawi rawh, ka tan chuan hakuna matata vek animai." Thawveng zet chuan ti leh in, ka hmaah ka ṭawng leh hun ngaichâng rân in a rawn ding a.
"Pumbaa engtiang chiahin nge min duh, sawi phawt la, ka sawi tur ka sawi chauh ang." Ka sawi hreh êm avâng chuan ka ti ta ringawt.
"Chi tel lovin,bai hi a tui i ring em?" Ti in, zawhna min zâwt daih a. Chung te chu hriat sa ania, eng atân nge a tih teh daih le.
"Chi a tel loh te chuan bai a ni dâwn em ni?" Lungawi vak lo hian ka chhâng a, ka zawhna min ngaih pawimawh sak loh avâng chuan ka thin a rim ru ṭûn tawh.
"Ok, i formula a dik thlap. Bai ah chi kan thlâk loh chuan a tui thei lo. Chutiang chiah chuan ka nun hi i tello chuan a tui thei lo, a dik thei lo, a hmin zo lo, â a tam lutuk. Ka tân chuan chi ang vel i ni ka tihnaah ngai mai rawh. Library kal ka ngai dawn tlat, duh angin ka che romantic thei dâwn lo." A tukhum hiat nauh nauh pah hian a ti a. Ka nui chhuak hak, thutak deuhin sawi tum ve mahse, a tlin lo leh nge nge zêl.
Min duh a ni tih chu sawi kher ngai lovin, thla li lai beidawng duh lova min zui char char khan a ti chiang hle tawh zâwk a ni. A ṭawngkam a thlum ve hran lo, mahse, a ṭawngkam thiam lohna tak hi ka thinlung ti tuiral tu a ni lawi si a.
Hreh ru tak chungin ka chanchin ka hrilh ta. Rei vak lo chu a mitmengah danglamna a awm zauh a, mahse, ka sawi zawh hma in, ka hmuiah min rawn fawp. Ka chhâng lêt lo chungin, rei tak chhûng min fawp lui a.
"Nun hlui nei lo mihring kan awm hlei nem. I nihna zawng zawng nena min pan duh anih chuan, kei hian ka hnar ang che maw. Hnai lo ve, nunhlui chu ni in a liam pui tawh. Kan pahnih in nunthar kan ṭan dawn ania." Chutianga min chhâng chu mak ka ti, sawi tur pawh ka hre tawh lo. Engtinnge minute tam pawh a liam hmaa inngaihtuah buai miah lova min pawm nghal mai theih le.
Ti chuan buaina awm miah lovin hmangaihna kawng kan zawh dun ta. Kan in zui aṭangin ka pa hrawn pawh ka hlat phah hret hret a. A sulhnu la châm tlat avanga châkna rawn chhuak leh ṭhin pawh Pumbaa vangin ka hneh chho ve zel.
Ka pa hrawn lak aṭanga in thiar fihlim turin min ti fo a. Mahse, ka nau vang hian chhuak thei dinhmunah ka ding ṭhin si lo. Kan in hauh phah fo, mahse, inṭhen thei silo in, rilru nuam chiah si lovin kan awm reng a.
Nitei chauh nilo, hmeichhe dang an rawn lût chhuak ta fo mai a. Zu leh damdawi nen ka pa hrawn roomah chuan nuam an tawl nasa ṭhin.
Chutianga hmeichhe hrang hrang a kawp kual hnu chuan, amah ngeiin damdawi te ti in, chhungkaw in rel bâwl dan pawh a danglam chho zel a. Sum dinhmun te tla hniamin, higher bak ka kal zawm thei ta lo.
Pumbaa chuan Computer engeneer nih a duh avangin Delhi ah min chhuk san a. Kei erawh ka nau school kalna tur tuakin, restaurant ah ka thawk ve lawp lawp mai.
Ka nun dan ṭawp tâk avângin ṭhian ka siam duh ngai lo va. Pumbaa bak biak ka nei ngai lo bawk. Chutiang anih avang chuan buaina ka tawh châng pawhin thlenna tur ka beih vai ru viau ṭhin.
March ni 13 a ni a, restaurant ah buaina ka tâwk leh ta. Kan hotupa a dam loh avangin a rawn kal thei lo va. Customer kan ngaha kan buai teh reng nen, kan pi ber,a nupui chuan a pasal ei tur pe turin min tîr a.
An in hi restaurant aṭanga a hlat loh avangin ke in ka kal mai. Ka thlen chuan hotupa bak tumah an lo awm lo va. A ei tur chu en in, a duh aia a daih avangin min chhuan lum tîr leh rih a.
Chutia ka chhuan lum lai chuan ka hnung aṭangin ka kawngah rawn kuah thut in, ka nghâwngah a rawn fawp kual dun dun mai.
Min thlah tura ti in, ka sual lêt ve nasa. A chak si a, ka hneh dâwn lo tak ngiala ka hriat avangin gas a ka soup chhuan lai chu la lawkin ka theh ṭhawt mai. Chu veleh ka tlân chhuak nghal a, restaurant ah tlân lût in, ka bag ka la nghal. Pi berin min biakna pawh chhâng tawh lovin ka tlân haw ta ringawt.
Mangan nak laiin, inchhung ka lût chiah chu hnam dang hmel ka hmu nghal a. Ka pa hrawn chuan ṭha taka min bia in, an bulah chuan ṭhu thla turin min ti bawk.
Ka nau pawh chu a school bân ala hun si lova, engvanga rawn haw hma ve ringawt nge maw anih le!
Thu haw lam leh kal lam hriat tumin an bulah chuan ka ṭhu thla ve ta a. Mahse, ka thu hriat chuan min ṭhawngin, chhân ngaihna pawh ka hre lo. Ka pa hrawn chu rilru na takin ka melh tlawk tlawk a.
"I nupui fate hi min hralh ang maw," ṭawng pawh ka ṭawng chhuak hlei thei lo. Ka nau chuan hlau tih hriat tak hian tha khur dar darin ka kut a rawn vuan nghal a.
"Abigail, hei leh chen ka enkawl tawh cheu a, in nawmna tur ngaihtuah chungin thuthlûkna pawh ka siam asin. Ka hmangaih che u tih in hriat vek kha." Chu pa mai mai chu'h, min khawichhiat tawh hnu ah min hralh a tum leh amaw. A nupui ngei thatin, hmangaihna hming a ti hmingchhe leh nghal.
"Agatha bawihte, room ah lo han chho rawh." Ka nau chu ka tîr lui a, chung hnam dang ho chu be leh in, min chhuah san turin ka ti ve hmiah.
Chu veleh ka pa hrawn chuan ka samah rawn ṭham leh in, chhuatah min paih thla nawk a. Ka kawr pawt thlêr in, ka kekawr min phelh sak nghal. Ka beih lêt ve ngial pawhin patling tha chu hneh a har deuh a ni. Ka biangah vawi engemawzat min ben hnu chuan tha pawh nei tawh lovin min tih ang ang chuan ka awm mawl tawp.
Hnam dang ho hmuh laiin min sual lui leh ta chu ania. Saruakin chhuat vawtah chuan ka mu hlawm reng a. Rilru a nat êm avâng chuan ṭawng pawh ka ṭawng thei tawh lo. Ka chawmawlh vek a, ngaihtuahna mumal pu hlei thei lo khawpin ka na a ni.
Chutiang chuan darkar khat dâwn lai ka awm tawh a. Inchung aṭanga ka nau rawn chhuk thla thâwm ka hriat chuan ka tho chhuak nghal. Ka taksa lah chu na lo lai rêng a awm lo.
Ka pa hrawn chuan, hnam dang bulah ka nau nen min hralh ta. Thawmhnaw pawh min ken tîr phal lo va. Ka hak lai a pawh thlêr vek avangin ka thawmhnaw hmuh hmasak sak chu ka inbel ve tawp. Ka bag ka ak lui hram a, hlawh kan la lâk loh avangin, ₹300 leh ka phone chiah ka ak zui.
Scorpio var ah chuan min nawr lût a, ka nau ṭap leh ṭhin chu thlêmin, min lei tu te bulah chuan tui ka dil ta ringawt. Phal tak chuan min pe ve mai bawk a, ka nau chu in tirin, pe lêt tawh lêm lovin ka hum ṭha khiau a.
Ṭhuampui kan thlen chuan khua a thim ṭan der tawh a. Khawiah nge min kalpui dawn ka hre lo, ka nau rawn ṭap leh ṭhin chu driver bula ṭhu chuan a rawn hrâwk ta hrep. Nghet takin min rawn kuah nghal a, kan hnaih bera ṭhu chuan sap ṭawng hian, "thâwm in nei leh anih chuan in nunna in a tuar ang." Ti in min la vo zui, hlauhna pakhatmah ka nei lo, mahse ka nau nunna hian a tawrh ve ka hlauh avangin ka ngawi rih mai mai a ni.
Tuirial kan thlen chuan ka nau in a êk a chhuh thu ngam leh ngam lo hian a rawn sawi chhuak a. Min phur tute bulah sawiin, kawngsirah min din pui nghal.
Khua a thim tawh tho tiin, kal hlat phal lovin motor phenah chuan inthiar tîr an tum ta mai. Motor phên pawh ni se, inthiarna atân chuan kan awmna chu duhaiin a ual au mah mah a ni.
"U, min lo veng la," awmze nei taka min melh pah hian a rawn ti leh reuh a. Ka nau hian thiltih tum a nei chiang a ni, chhuk pui ka tum lai takin ka bula ṭhu pa chuan a bula kawngka chu hawngin, motor nghêng chung hian cigarette a zu khu hluah hluah mai. "Chhuk ta che u," driver chuan min rawn hrâwk leh hrep. Ka tui ûm ken chu hum nghet sauhin, ka nau chu chhuk turin ka ti ta a.
Driver bula ṭhu, an zinga pa lian ve ber chu rawn chhuk ve in, kawng thlang lama hawi pah chuan a kekawr zipper a hawng nghal rawk rawk mai. "U pathum chauh an ni a, kan hneh thei hrim hrim ang." Ka nau chuan zawk tê in a rawn ti sar sar a, "e kham phawt la, i zawh hunah tlânchhiat dân tur kan ngaihtuah dawn ania." A bula ṭhu thla pah chuan ka phun ri ve sar sar.
"I zo tawh êm?" Kan bul ami chuan an zipper zîp ṭha
pah hian nui sûngin a rawn ti a. "Aw," ti a ka nau in a chhân rual chuan motor rawn tlân thawm kan hre ta. Vânneih thlâk takin kan dinna zâwnah an rawn ding lehnghal a. Chu veleh, ring takin ka au nghal, kan bula mi in min man beh a tum rual chuan a kap ah theihpatawpa nâ in ka lo pêt sak.
Ka nau chu pawt tho lawkin, motor dang rawn dinna lamah chuan ka tlân pui a. Patling pahnih, an hmêl pawh ka hmuh chuan theih loh te chuan driver leh ka bula ṭhu pa kha an lo bei mek a. "Motor chhûngah khan lût rawh u," patling pakhat zawkin a rawn tih chuan an motor ah chuan kan lût ve hmiah. "U ka mawng ek ka tifai lo ania," zah hmel taka ka nau in a tih chuan ka tui ûm ken ka thlauh tak kha ka hrechhuak zawk a. Chhuah ngam chi a ni tawhin ka hre bawk si lo, steering bula pawnchhe sen chu la in, "hei hian hru mai rawh," ka ti ve tawp. Hreh ru tak hian a la a, muangchângin a hru ta zâl zâl mai.
"In ṭha em?" Patling pakhat driver seat a rawn ṭhu lût chiah chuan thaw hlawp hlawp pah hian a ti a. "Kan ṭha, ka pu, in that em?" Kawngpuia min man tute let phung thlir pah chuan ka ti chhuak hlawl. "Bawihi, dânin an chungah ro a rêl ang chu, Police stationah kal nghal ang u aw. In chhûngte be ta che u," tiin a phone a rawn phawrh chhuak nghal.
"Ka pu, chhûngte kan nei lo," ka lo ti bul hmuk a, phâwk zeta rawn hawiin, "in pian hmain in nu leh pate an thi em ni?" Nui vur vur chunga a tih rual chuan a ṭhianpa ni âwm tak chu hah hmêl tak hian a rawn ṭhu lût ve a. "Zams, Doma kan call dawn nge, Neverland lamah kan hruai dâwn?" A rawmawla a hmai hru fai chung hian a ti nghal bawrh bawrh a. "Zars, bawihi te hian chhûngte an nei lo, Doma call la, hetah hian lo nghak mai ta che. An motorah sawn eng emaw man tur a awm tho ang. Bawihi te hi chu ka kutah awm rih mai rawh se, ka lo buaipui mai dawn ania." Tiin Zams zâwk chuan ro a rêl nghal zung zung a. "Chhûngte in nei lo tak tak em ni? Engtinnge sawng hi sawn an man che u." Zars chuan ka mita min melh rûn chungin min zâwt a, ka chhân leh hma in, "aw ka hrethiam e, Zams, engtin emaw ka lo ti fel mai dawn ania. Kal pui phawt rawh, thlahthlam chi an ni lo ania aw." A ti leh zung zung, sawi tûr pawh ka hrelo, chîk taka min en khan ka sawi tum a hre vek ni maiin ka hria.
Zars chuan min chhuk san leh ta a, a ṭhianpa ho in kan hma lamah chuan kan tlân chhuak leh ta ringawt. Kan kalna tur min zâwt a, ka hriat loh thu in ka chhâng tawp. Hmelhriat loh chutia ka chhang ta mai chu ka inchhir nghal rum rum. "Kan resort ah riahna tur a awm ang, tun ang zan reiah mi fel tak in tawng hlauh a, in vânnei hle mai." Ti in, a nui suk a, kawnglaia kan lo awm rikngawt na chhan min zâwt lo kha mak ka ti. Ka nau lah chuan vantirhkoh kan hmu angah a ngai hmiah.
Rilru nuam zân lovin an resort a sawi thleng chuan kan chuang ve zel a. Riah na tur room a tih ah min hruaiin, rin aiin a lo nuam phian leh nghal.
Riah man ka zawh lah chuan, pêk a ngaih loh thu in min chhâng tlat a. Kan ril a ṭam leh ṭam loh te min zâwt lêt daih. Ka nau sawi ang tak takin vântirhkoh kan tawng ta ah ka ngai ve ta ngawt.
Kan ril a ṭam tawh êm avângin a ei tur min siam sak te chu chuang bâng awm miah lovin kan fai vek a. Ka nau nen zan hun nuam tak kan hmang ve thei ta.
Khang misual ho kha a ṭhianpa'n engtinnge a tih zawm zêl hriat ka châk em avâng chuan ka zâwt leh ta hmiah mai. "In rilru ti hah duh suh u, vawkpu generation anih hi, engkim a ṭha vek mai ang. Tûnah chuan thlamuang takin mu phawt ula, naktukah zinkawng thar in zawh dawn ania." Tiin min chhâng mai a, duhkhawp lo viau mahila, ka zâwt nawn ngam tawh ngang lo. Engpawhnise mi rintlâk anih ka ring a, engkim a ṭha vek turah ngai rih phawt teh ang.
Zingkarah min rawn kai tho a, kan awmdan tur min zawh chuan Guwahati a kal kan duh thu in ka chhâng ve ringawt. Mizoram chu kan tân a hlauhawm rih, ka pa hrawn khan Mizoramah kan awm tih a hriat chuan min zawng hmu leh em em ang. Kha tân ina tân nawn leh kha ka tum tawh lo bur.
Chu pa, a hming pawh Zams tih chauha kan hriat chuan, a motor in min hruai thlap a. Kawng tluanin mask a vuah tluan ṭhak, hri laka a fimkhur ve viau turah ka ngai leh hmiah.
Guwahati Mizoram house ah min luh pui a. Ani pawh zan khat riak ve in, a haw dâwnah, kan unaua kan hman tur ₹10000 lai min pe bawk. House kawtah chuan a haw tur thlir liam tumin kan zui thla ve hnak hnak a. Kan unaua min ṭanpui tu anih avangin a hming tal hriat ka duh ta tlat.
Zah pawh dâwn zo lovin ka zâwt ta nge nge a. "Vawk pu," ti liam puatin, motor a ti nung nghal. "Min mamawhna in neih chuan hetah hian min lo be dâwn ania. Chuan bawihi, ka ṭhianpa khân engkim a ching fel tawh a, engmah hlauh tur a awm tawh lo aw." Ti leh in, card mak deuh, a hma lama a phone number inziahna leh a hnunga phengphelep chuang chu min pe zui bawk a. "Thil pakhat chiah ka zawt thei che angem?" Tlân chhuah a tum lai chuan ka dang leh rih a. A lu bu nghutin, zawhna mitmeng nen min en nghal. "I ṭhianpa khan engtinnge zawhna dang min zawh belh miah loh, engtinnge engkim hrethiam vek anga a lan." Ka vei rûk ve em em chu ka zâwt leh ta phawng mai. "Psychiatrist legend anih kha," tih tawpa min chhângin, gate in hawng ah chuan a tlân chhuak ta a, ka nau nen mak ti takin kan thlir zui vawng vawng.
Tichuan, hna zawn nan kar khat lai hun ka hmang ral a. Room luah man leh eiin man ah kan pawisa neih chhun pawh a kâm ve duak mai.
Vânneih thlâk takin ṭhian pakhat ka tawng fuh hlauh a. A hna thawh na spa ah therapist an lâk belh dâwn avangin min lo sawi pui a ni âwm e. Thla, laklawh viau mahse, pawisa kan mamawh êm avângin ka thawk ve ta râwih a. Ka thawh hma in, mi hmeh dan min zirtir bawk a, thla khat ka thawk tluan ve thei hram.
Mahse, thawk tu te zîngah chuan thil tenawm ti an lo awm a. Police in kan thawhna spa chu min khâr sak leh ta. Vanduaina hian a ûm in min ûm zel zawng anih ber hi maw.
Hlawh pawh kan la hman lo, mahse, nitin deuh thaw tips kan dawng ve a. Chung ring chuan kan la nung ve ṭawk ṭawk a ni.
Ka ṭhiannu chuan hna dang, hlawk tak a hriat thu min hrilh leh ta a. Mahse, khawvela ka thil duh loh ber te zing ami, nawhchizuar ang maia mi hausa ho hnêna in zawrh a ni.
Ka rilru ka khâp buai viau a, Pumbaa nen kan inkar a ṭhat loh lai alo ni bawk nen, ka nau zirna tur buaipui ka duh bawk si. Chutiang teh nuai anih avâng chuan, ka pa hrawn pawhin a thlawnin min sawisa fo alâwm tihna rilru ka pu ta a. Ka ṭhiannu hnung zuiin, mi hausa tak tak te nên zankhuaa hun hmang dûnin, pawisa ka hlawh chhuak leh ta.
Chutianga ka nun tâk avâng chuan Pumbaa pawh thu tâwp ka sawi pui ta ringawt. Ka ṭap ve nasa, mahse, retheihna hian min ei ral ai chuan hetianga nun hi ka thlang zawk miau a ni.
Thla li lai ka in zawrh hnu ah, ka nau nen apartment kan luah ve thei ta a. School pawh ṭha takin a zâwm ve leh e.
Duhâmna sualah lût thûk zêlin, ka nun zawng zawng ka hlauh ta a ni ber e. In zawrh chauh duhtawk lovin, damdawi ka vawrh tel bawk a. Kan unaua kan suangtuahna ti hlawhtling turin ka theihtawp ka chhuah.
Mahse, nun hlutna ka hriat loh mai bakah, damdawi chuan ka nun a ti tawi ang tih ngaihtuah lêk lovin, nawmsip bâwl nan ka'n ti ve khang lang a. Ka rilru hahna leh Pumnaa ka ngaihna ti bo tu atân ka thlang ta. Chu damdawi lah chuan ka thluak fan chhuak vek in, khawvel dangah min hruai ṭhin a. Chu chuan reilote chhûng chu hlimna min pe in, hmana keimah kha min hmuh tir ṭhin a ni.
Ka nau pawhin ka nun dan tenawm tak chu a vaiin hre vek lo mahse, ka damdawi tih leh ka zu in ṭhin te a hriat takah chuan kan in hau ta fo mai.
Sim tumin ka bei ve nasa, mahse, hma lam ka pan hlei thei lo. Damdawi châkna leh tisa châkna chuan min ṭhâm na êm a, hneh theih loh nun nei ve hek lo le, duhâmna leh mi nun awt reng reng a khawsa hian sual kawng bawk chu ka zawh leh ṭhin.
Ka nau ṭawngṭai ka hmuh peih loh avangin inah pawh ka haw khat ta pharh mai. A naupang zâwk hian ka zilh e, min ti ve khanglang ṭhin bawk a. Ka thawk a ti ipik zual tulh tulh tih a hre silo. Ka nun chhûngril khawhar zia lah min hriat pui lovin, min ân khum bawrh bawrh reng a.
Ni e, a hrethiam lovang, min hrechiang ber tu ka lukham lah hi a ṭawngthei bawk si lo va. Zan tin mittui ka mut pui ṭhin tih te hi hria se chuan, hmangaih takin min kuah vawng vawng tur hi ania. Mahse, khawvel a ni miau a, hlimna tluan tling khawiah mah a awm hlei nem. Ṭhuro ang hian thla nei ve ila, lungkham nei lêk lova boruak thianghlim tak kâra thlawh bo vang vang châk chang ka ngah mai.
Kum li a liam meuh chuan, ka thiltih in ka taksa ah nghawng lian tak a nei a. Insawiselna nei chho in, dam ni hmel hmu hlei thei lovin hun ka hmang ral ta fo. Mahse, hêng natna ai hian ka thinlunga ser, reh thei lo hian min ti na nawn leh ṭhin. Chu chuan phuba lâk duhna a hring chho a, khawvel ka chhuahsan hma ngeia ka tih tur hlen chhuah chu ka thil tum lian ber a ni ta.
Chutianga hun hmang chuan hun leh kum ka chhiar liam ve zel a. Dam man a awm lo, engkim mai hi ṭahna tur hlir a ni. Ka saltanna aṭang lah tâl chhuah ngaihna awm lo khawpin ka lût thûk tawh bawk si. Chhûn leh zan hian ka tan danglamna a nei teh chiam lo. Chutiang bawkin thlasik boruak vawt tak chuan ka thinlunga natna thûk tak so but but hi a ti dai thei lova. Nipui lahin tlâng kâng tûr ang maia sa in ka chhûngrilah chuan a in mun vut vut reng bawk a. Mittui a chhuah tam luatah beidawn êm avanga nuih tawp chang lah ka ngah. Hei hi ka khawvel chu a ni, sum hian hlimna a lo thlen chuang hauh lo.
Khawvela awm kan nih miau si avangin hun in her liam zêl pawh chhiar loh theih loh a ni a. Kum a vei leh duai hnuah ni khat chu Mizoram lam chanchintharah ka pa hrawn, kan hma lawka inthlanna lo awm tura a campaign lai ka hmu fuh a. Ka nau bulah erawh engmah ka sawi duh lo. A damchhungin he mihring tenawm tak hi hre tawh lo se ka duh a ni.
Tichuan, phuba lakna hmahruai tu atân a thlalak chu screenshot in, ka hmelhriat thlalak edit thiam tak chu min pui turin ka ngên a. A man ah a chhin sen, a kar khat tla tur ka pe nghe nghe.
Ka pa hrawn nen saruak ngal ngata mu dun angin ka ṭhianpa chu ka edit tîr a. Karleha a campaign na turah chuan a duh aiin a lar dawn khawp e.
Internet a phone hlui an zawrh chu leiin, sim card a black in ka lei bawk a. Chu thlalak chu dah lût in, ka nau kalsanin, Mizoram lam ka pan ta. A account ah pawisa ka dah nual avangin, ka zin chhûng reilote chu amahin a lo khawsa ve thei turah ka ngai.
Hotel changkang tak, Euricka hotel an tih fo ah chuan ka innghat a. Ni hnih ka châm hnuah phuba la turin ka pa hrawn campaign na hmunah chuan ka kal ve ta hmiah mai.
Internet ah chuan account lem siam in, ka pa hrawn campaign na hmuna awm pah chuan thlalak chu ka thawn chhuak ta. A thusawi ngaithla tui em em tu ka bula ding chu bia in, chu thlalak chu ka en tir a. Mak ati ve kher mai, mask ka vuah hlauha, ka fihlim lel asin.
A fanu ngei khawih chhe tu leh hralh bo tu tih ka dah tel kher te chuan mipui beng a ti vir zualin ka hria.
Ka nau pawhin a hmu ve ta aniang, hotel ka thlen hnuah min rawn call a. "I tih hmingchhiat dâwn pawhin i hmel tih lan tel kher a ngai hlei nem. I hmingchhe tel ve vek dâwn asin." A rawn ti hlak hlak mai, khawih chhiat ka ni tawh a, dam chhan tur ka nei tawh chuang em ni. Duh leh ka saruak thlalak tak tak pawh theh chhuak mahila engnge pawi. Mipa tam tak mit a ti tleiin, missionary thawnthu ai chuan ka thawnthu hian ngaihsak a hlawh daih zawk ang chu.
Phone chu hal ral in, ka pa hrawn chanchin beng verh tak thawm a reh hun nghakin, hotel ah chuan kar khat ka awm leh a.
Chumi hnuah chuan a in ka thlithlai rûk reng avangin, in leng a neih vak tawh lo hnu, zan lai dar 1 velah chuan door bell ka hmet ri ta ral ral mai.
A rawn hawn rual chuan ngeiawm tak hian ka lo nuih sâng a. "Zawngi," tih leh ka sama rawn ṭhâm a rual nghal. Inchhungah min kêk lût in, chhuatah min paih thlu leh ṭhuai. Na tihna pakhatmah ka nei tawh lo, a kut thlâk hi ngaiah ka lo nei reng tawh pawh ani mahna.
"Min tih chhiat i tum ve khanglang amaw," ti in ka pum a rawn chhir pawp. Ka nghâwngah rawn rêk leh in, "thi rawh, nunrawng nu, thi rawh," ti in, min thah ngei tumin na takin min rêk a. Ka ṭanna lamah ka kut tin chuan a bânah ka ham pilh nung mai.
Khawngaih dîl lovin, a nun tenawm tak chu hmusit veleh chhawngin thâwk harsa tak chung chuan ka nuih lui ṭawk ṭawk a. "Min nuih ngam vel amaw," ti leh ka hmaia hnek a rual leh nghal.
Min khawih a tum leh rual chuan, a kut chu lo man sakin, theihtâwpin ka sek sak ta hrep mai. Na ti in a ṭe teng tung a, a kut lehlamah chuan min thlah tîr tumin ka hmai a ṭham leh tawn tawn.
Thih tha teh meuha ka seh takah chuan, a kut chu ka seh thi nung tawh a. Thawh a tum mai silo, ka âwmah min do tlat bawk si. Ka tihngaihna hre lo chuan, ka kut lehlam chuan a mipatna ka ṭham sak leh chiam.
A theih tawpin a kut lehlam chuan min hnek mahse, thih leh thih ti a, ka kut ka thlah duh miah loh avangin a tlawm zawkah a ṭang ta.
Ka bulah chuan a rawn mu thlawp a, kei lah ka lo chau ve bawk nen thawk la ham ham in, "hremhmunah min lo hmuak dawn ania." Tih leh thawh ka rual a.
Rawn thawh ve a tum chu a kap ah bawk chuan ka tlawh leh pawp. Na tuara a vial ngâwng ngâwng lai chuan choka ah ka phei a. Gas on in, store room a khawnvartui tlêm a zâwng lo awm chu la in, ka pa hrawn tho ṭha hlei thei lo chu ka leih ta.
Sitting room a a lehkhabu la leh in, ka pawt thlêr a. Gas alh ah chuan hliau in, ka pa hrawn lo tho mêk chu ka hal ta hmiah mai.
Ka thil in hnathawh nge pawh ka hrelo, a na tuar thawm chuan min ti hlimin a taksa kâng mek tih mih tuma a tal buai chiam te chu kut ka lo bên khum sak sak a.
Chutah duhtawk mai lovin, chokaa chemtê hriam ber chu la in, a tal buai lai chuan ka duh duh na laiah ka vit leh pawp pawp a. A hnuk a chah dâwn thleng chuan inchhirna nei miah lovin, nui var var in ka lo en reng.
Ka sawi zo chiah chu, ka thaw a veng thei nia mawle. Ka hmaa ṭhu chuan, mak ti taka min en in, "inchhirna i nei miah lo tak tak em?" Ti in min zâwt nghal a. Ka lu bu nghatin, "ka tih sual engmah ka hre lo, chung lamin phuba min lak sak duh silova, keiman ka la ta mai a nih kha. A hahdam ve ngawt zâwk ang chu." Ka lo tih khum hmiah, tihngaihna vak an hriat bik ka ring lo. A chhan chu ka thiltih hi chunglam rorêl phak bak a ni tlat.
"Anih chuan, zawhna pakhat chiah ka zâwt leh ang che. Kar khat chhûng i tâng tawh. Damdawi châkin, i suffer nasa tih ka lo hria a, tûnah khan ila châk reng em?" A zawhna ho lam tak avâng chuan ka nui chhuak hak a.
"Châkna chu lo nei ta ila, min pe dâwn tihna em ni? Min pe duh suh, ti hian ka thi dâwn tho tho." Kan inbiakna hun tih tawp ni tawh se, ka ti rilru ngawih ngawih.
"Abigail, naktukah court chhûngah ngei, Pathian hi a awm tak tak a ni tih i hria ang." Chu doctor chuan ti leh in, duty te a ko zawm zat a.
"E taka, i ngaih em em, Pumbaa kha, naktukah a lokal ve dâwn aw. Bella, naktuk atan kan in buatsaih a ngaih kha, tirawh i kal teh ang." Ti leh in, kawngka ah chuan min chhuah khalh a.
Ka tân in chhûngah chuan a ngai tê bawkin, na ka tuar leh ta. Khumah ka mu tlawk tlawk a, ka taksa na lutuk chuan engdang mah min ngaihtuah tir thei lo. Kum engemawzat chhûng nawmchen nana ka lo hman ṭhin chuan min ṭhing lêt in, ka taksa pêng tinah chuan a duhtawkin nuam a chên mek a ni.
He ka hringnun darthlalangah hian ka nundan zawng zawng tih lan in a awm mêk a. Hlimthla tak ngial pawh nei tawh lo tura ṭawih ral mai mai tur hi engvang teh kher nge heti hrepa a sawhkhawk na tura ka lo chen le. Âw thihna nunrawng, ka chungah thlâ i zâr dawn anih chuan, tûnah, tûnah ngei hian i thla zâr hnuaiah chuan min awm tîr ta che.
Court in ka chungthu a rêl hun alo her chhuak ta. Ka taksa dawrawm tawh tak hian rorelna dik hmachhawn ngei rawh se.
Guard te chuan Court a kal turin min rawn kai chhuak a. Kal pawh ka kal ṭha thei tawh lo. Chakna nei tawh lo he taksa chau tak hian, midang chakna rinchhana kal chu duh lovin vai kian ve ka'n tum tak naa, khua pawh hmu fiah zo tawh lo hian midang puihna tello chuan engtinnge Court ka thlen zawh tehlul ang.
Ka chung thu an rêlna pawh ngaithla ṭha thei lo khawpin, ka rah seng mek chuan min hneh zêl a. Thu min zawh lai pawh chuan engtin nge ka chhân ka hre mumal thei tawh lo. Mittui aiin thlan a chhuak hnem zawk a, ngaihtuahnaah ka nau aiin, ka damdawi ngaihna chuan hmun a luah hnehin, dam thlâkhlelhna nei tawh lo hian he damlai hremhmunah hian a a tawp ber na atân nun ve châkna reng ka nei lo leh ta.
"Abi," Pumbaa aw chu fiah lo deuh hian ka hre rêi ruâi a. "Abi, i ṭha tawh ania," a aw ka hre nawn leh ta. Mit ko rit zet chung chuan muangchangin ka meng a. Pumbaa hmel ka hmu tak tak, ka thi tawh tihna em ni?
"I dam dâwn, i bulah ka awm tawh alâwm." A ti fiah leh kâk mai, chau chung chung chuan ka ṭhu chhuak lui a. Ka bâna venflon an vuah ka hmuh rual chuan phih thlâk tumin ka kut chu ka ban nghal. Mahse, Pumbaa'n min lo dangin, "a tawk tawh Abi, in ti na tawh lovang. Kan tuar hnem tawk tawh e." Ka kut vuan chung chuan ti thawp sup in, ka chal ah min fawp vawng vawng.
"Nun hi engnge ka tan a hlâwkna, ka nau min hmuh tir la. Thlamuang takin ka châwl hlen duh tawh." Muangchang chuan ka phun chhuak sap sap a.
"Thlamuang takin ka kiangah ila châwl hahdam dawn alâwm. Agatha, i u in a hmu duh che." Ti in, a au leh lung lung.
Ka nau, mittui tla chunga min lo pan tu chu thei leh thei lovin ka lo ban nghal a. "U, min ngaidam rawh, keimah vang vek a ni. A hrehawm em, i na hi chhawk thei che ila âw." Nghet taka min kuah chung chuan ti in, a ṭap zui hliam hliam. Ka mittui ka dang zo bik lo, ka nau hi ka ngai tawh êm a ni. Ngaihdam ngai zawk hian ngaidam tura ngenna ka dawng a. Inthiam lova, na ngawih ngawih tur hian engvanginnge hmangaihna ka dawn.
Damdawiina kar khat lai mai ka awm hnu chuan Jail ah ka kir a hun leh ta a. Ka chung thu an rêl lai khan, nikhua ka hriat mumal loh avangin ka tân hun tur pawh ka hrelo anih kha.
Ka pa hrawn thihna chungchangah khan self defence anga min chhuah avang leh khawih chhiat ka nih avângin dân chuan ngaihdamna sang tak ka chungah an lan tîr a. Tichuan, internet a ka pa hrawn, saruak thlalak hmanga ka tih mualpho avang khân, IT Act, 2000(section 67) hnuaiah kum 5 lungin ka tang dâwn a. Hei bakah hian cheng nuaikhat lai ka chawi dawn bawk a ni.
Damchhûnga jail bang zût tur khan, chutiang lek hremna ka hmu chu mak ka ti in, ka hamhaih ru hle.
Ka nau leh Pumbaa ten min thlah liam ta a. Ka ngaih em em te pahnih ka hmu a ka khawih leh thei kha ka tan chuan damna ropui tak a ni.
Kum hnih ka tân hnuah chuan ka taksa pawhin ngai a awh leh ṭan tawh a. Damdawi châkna ka neih tawh loh bakah, ngaihtuah pawh ka ngaihtuah chhin tawh ngai lo. Kar tin kan tu ka nei reng a, nitin phuloh malsâwmna dawngin ni thar ka hmu ve zel e.
Tuk khat chu zing inkhawm kan neih naah kan speaker rawih mêk U Hmingsanga chuan hun nei leh in, a Bible châng chhiar chuan ka rilru a luah hneh hle a. Chhinchhiah ka tuma a bung leh châng ka hriat tawh mai loh avangin inkhawm bânah zawh fiah tumin ka pan nghal.
Mahse, midangin an chim buai nasat êm avângin biakna hun ka chang ve thei lo va. A rawn kal pui, a ṭhian pa kan piah lawka Bible keu a lo ding mêk chu ka va zâwt ve tawp.
Ani chuan, Isaia 53:5 anih thu min lo hrilh a. Ka lawm lutuk chuan ka chibai ta ringawt. "Bawihi, thil ropui tak i hmu chhuak ah in ngai rawh. Engpawhnise, kalvari hawi zawng zela kal tur aw. Buaina i neih châng pawhin, he Bible hian a chin fel sak zêl ang che." A ti dam thlap a, hlim takin lawmthu te hrilh in ka cell lam ka pan san ta.
Ka Bible keu in, Isaia 53:5 chu ka chhiar nawn tluk tluk a. Kum tam tak hnuah a vawikhat nan, thinlung leh tihtakzetin ka ṭawngṭai ve ta.
"Lalpa, nunrawnnaa khat he mihring hian ka mamawh che. Thlalêrah ni tamtak chhûng ka vah bo san che a. Tûnah i hnênah ka lokir leh e, ka inchhirna au thawm hi khawngaihin min hriat sak la. Ka lamah i beng lo chhing hram rawh."
Ka ṭawngṭai zawh meuh chuan mittui chhiar sên loh lo luang chhuak chu hru hulin, hahdamna leh thlamuanna ka lo zawn rûk ṭhin chu ka chhar chhuak ve ta.
(Nimahsela, ani chu kan bawhchhiatnate avângin hliamin a awm a, kan khawlohnate avângin vuak thitlinin a awm a; kan thlamuanna tûra thununna chu a chungah a tla a, a vuakna vualtea tihdamin kan awm ta. Isaia 53:5)