CHANLOH ‘D' LS BY MAWITEI BAWITLUNG

[mawitei bawihtlung]

CHANLOH “D" LS




ZIAKTU : MAWITEI BAWITLUNG







“ Ka naute nanglo chu tumah ka nei ngai lo vang " ka mipa hmangaih ber thusawi chuan ka thinlung chu a ti nui ver ver thei nia ,ka ring thlap bawk . Kum 5 chuang kan inzui ve tawh a ,in neih te hial kan ngaihtuah ve thin,mahse keimah ka la nau em a vang leh ka zirna ka laklawh si a vangin min nghak ve tang tang a,a kum ngaihtuah chuan nupui nei a fate pawh nei ve duah tawh tur a ni a ,mahse keimah avangin upat pawi a tilo va . Ka zir zawh hun min nghak ve tang tang a ni.









Ka hmangaih a ,ka ring bawk. A ni pawhin min hmangaih,higher school pakhatah zirtirtu hna a thawk a ,a ma tawkah a in enkawl thei ve viau mai ,a nu nen chiah an cheng tawh a . A hmeltha in a chhelo a a mah kohhran lamah a inhmang bawk nen ka chhungte pawhin an iai hauh lo,naupang zawk ka nihna angin ka tau peihin a lakah ka pangchang a ,mahse min ning miahlo in dawhthei takin min thlem a ,hengte avang pawh hian ka hmangaih zualin ka hria,kum 36 na a hmang ve tawh a ,kei erawh kum 23 chiah ka la ni .









Champhai a piang leh seilian ve ve kan ni a ,vengkhata awm ho kan ni bawk nen nitin inhmuh na na na chu induhna a piang chho va ,ka kum 18 tlin kumah min bem ve chauh,“Kum khat chiah a ngai tawh a nia ,a rei ve ta hle mai . I tan nupui tha tak ka ni thei tep tawh a nia " ka tihchuan a nui ve suk,a nuih tawh hi chuan hmeltha ka ti em em zel ,mipa tam tak angin a tawng ve zuah zuah lo va , a tihsual nimiah lo ah pawh ngaihdam dil a hreh heklo,ka chhuang ngawih ngawih zel . Kan tunlai khawvel hmeichhia ai mipa an tawngtheih tawh zawkna hmunah hian a ni ang mipa rilru nghet tlut ka tawng chu ka lawm a ni .










Kan dawr chawlhna atanga kan chhuak chu a mah lo duh ve tu Rosy-i kan hmu nghal,kan pahnih chuan min en in a nui hak a “ Ls i bialnu hnungah i zui leh det det tawh a nimaw ? " ngeiawm zet hian a rawn ti leh,ka bialpa hi vawitam a lo bem tawh . A mah hmeichhe hmelchhia a nilo bawk nen Lsa nen pawh kan inhauh phah fo, phone hmanga lo bem duhtawk lo vin an inte hialah a len chilh thin tih ka hria. Chu chu ka huat ber a ni bawk .








Kan in ngaizawng tih hre lo va lo bem chu nise ka hrethiam ,mahse kan in ngaizawng tih hre reng chungin vawitam a lo bem a ,ka thatlohna a lo va sawi chamchi reng bawk nen ka lungawi loh avanga Lsa ka tihtauh khum chang lah a tam. Kalsawn mai kan tum chu a thu rawn sawi leh a vang chuan ka ding dat “ Engmaw i sawi kha ?" ti thatin ka inher ka melh ngar mai “ I bialpa hi ring lutuk suh i awm loh chhungin enge thleng i hre ngai silo va " a rawn tihchuan ka thinrim lutuk chuan khawih mai ka tum a .









Mahse Lsa chuan min rawn chelh bet vat,min kalsawn pui nghal dawr dawr ,a bike bul kan thlen rualin ka ang nghal hlak hlak “ Engvangin nge min lo dan? A hrim hrim in engvanga a thusawi kha a dikloh thu sawi miahlo nge i nih a ? Nge ka hriatloh vin in lo in ngaizawng reng zawk " ka thusawi thinrim em em a ka sawi lai chuan a rawn nui hawk hawk a nihchu! Ka melh nghal nghek,ka thinrim tih hre renga a lo nui chu ngei zetin ka melh “ Enge nuihzatthlak awm a ,engvangin nge i nuih? A nikha i duh ve tiraw ,ka haw dawn" tiin bike bul atang chuan kalsawn ka tum,mahse ka kutah a rawn man vat.











“ Ani kha nge i rin kei i bialpa hi? Vawikhat pawh ka rinawm lohsan che i hre tawh em? A ni ang Shikhar heh lutuk ngat phei kha chu ka khawih duh i ring em ni?" nuihza zeta a rawn tihchuan ka ner sawk “ A hrim hrim in kan in biakna zawng zawng i hmu vek a ,ka chhanna i hmu heklo vang . Nang ka thlang tawh che a ,hmeichhe dang ka hnaih i ring reng reng em ni? Duh ni ila chuan nghak lo che in hmeichhe dang ka nei daih tawh ang .









Khatiang hmeichhia mipa bem hmasa zawt zawt ngam khan min hip ve lem lo ,nang i awma ka hmangaih che . Chu chu a tawk,ka nu nilo va ka neihchhun ini tih i hria,chuti chung chuan ka kalsan duh che i ring em ni ? Duhlo pawh nimahla keichuan ka hlat thei tawh lo che ,chu chu hre reng rawh . Miin eng pawh lo sawise ka hnen atanga i hria a i hmu ngei a nihloh chuan ring ngai suh,i tan ka awm reng dawn . Thu ka tiam tawh che a ,mipa lelo zet anga thutiam sut leh thin mipa nih ka duh hek lo .









Ka tawn hma che kha chu i awm ve tih ka hriat hma an ni ,an kal liam tawh tun nang leh kei kan awm tih kan inhriat tawnna khawvelah erawh nang leh kei chiah kan ni,tumah an tel ka phallo ,i hria em? Mite thusawi avang mai mai in kan inkar hi nghing suh se ,an ni chuan rindan sawi tur leh dawt phuah tur an hre lutuk ,keimah min zawt la fiah hmasa la chuti a nihloh chuan min kalsan tum ngai suh,i hria em?" a tihchuan ka bu nghat ,ka kut chu hum vang vangin a bike ah chuan min hlang nawlh .








A rawn lawn ve nghal zat,kan tlanchhuah lai chuan ngawi rengin a thusawi chu ka ngaihtuah ,a dik ka ti viau . Tun angah chuan mi chhiatna leh mi chaklohna hmang a beih phet kan tum a ,milar nih nuamlo khawpin milar leh milar pawh a ber nih chak avangin kan inkap tawn luai luai tawh a nia . Kan in kan thleng ,inchhung lam atanga thawm rawn chhuak a vang chuan rang zetin inchhungah chuan kan lut ,ka u Mama a lo haw a nih hmel








A zu rui chu a lo ang leh buan buan tawh a ,ka naute leh ka nu leh pa chuan an en thap ringawt “ Kan mihurnu chu tlangval ilo lenpui leh tawh a nimaw,zahna chang lah hi in hre silo va ,Lawmsangzual nangpawh rawn kal fo suh ka ti che a nilawm ni,kohhran leh khawtlang tana inhmang ve viau si hmeichhe lenpui erawh nuam iti leh em em tho sia,hetiang hi chuan inhmang lo ve law law rawh . Chubakah ka farnu hi i nei ngai hauh lo vang " pawr zet chuan a rawn ti thuai thuai a ,Lsa kut chu ka hum bet .








“ Nang ang hmeithai fapa ve mai mai khan keini chhung hi min phulo ,sawrkar hnathawk ve satliah mai mai in ka inla chapo ve te i tih " a tihleh phei chuan tawng chhuah mai ka duh tawh . “ Bawiha a tawk " ka pa chuan a lo ti ve ,mahse an tar tawha ka u lah tlangval lian ve pangngai tak a ni bawk nen a sualin a thinchhe bawk si ka nu leh pa tan pawh thunun a har tawh a ,ka dem em em lo “ Lo ngawi rawh u,Zoremtluang nangpawh kha mipa kha hnaih lo tur in ka tifo che a ni lawm ni " ka u chuan min rawn melhin a tivin leh khur khur .









Lsa chet tum chu ka dang tang tang a ni ,ka thlah a nih vaih chuan buaina lian zawk kan hmachhawn dawn tih ka hrechiang si “ U enge u Lsa hi a tlinlohna ,hmeithai fapa pawh nise eng pawi ,tunlai tlangval tam tak aiin a let in a tha zawk " tiin ka bialpa thlavang chu ka hauh,ka u erawh a thinrim zual sauh tih hriat takin min rawn panin ka hmaiah chuan a rawn beng thuai,ka kut a Lsa vawnna chu thlahin ka thu thla hnawk . Lsa chu a insum thei tawhlo tih hriat takin ka u chu a hnek tlu thuai,a ni zurui lah lo zawi tawh bawk nen a che thei lo hrim hrim .









“ A tawk Ls" ka nu chuan a rawn vuan bet ,an ni pawh hian ka u chu an tan em em lo tih ka hria . Ni e ka u zu ngawl vei a vang hian vawitam an lo mualpho tawh a ,vengchhung tlangval hnawksak an sawi hringtute an nimiau si a ,ka u chu engmah hre theilo tih hriat takin a mu zawi hnuang,a room lamah chuan kan zawn phei ,ka hmaiah Lsa chuan a rawn dawm ,ka hmai chu a na ngut ngut ,a vung in a duk ngei ka ring bawk “ Ka tihpalh ka lo dang hman silo va " tiin ka hmai chu a tuai hauh hauh.








Ka nu leh pa pawh chuan min rawn panin min rawn buaipui ve a “ I u hi zawng,engtik ah nge a harh chhuah ve ang le ,a nun pum chu zu a vangin a chhe ta a nih hi . Ls nangpawhin min hrethiam dawn a nia,kan fapa a ni miau si a ,hetiang dinhmuna rawn len reng pawh nuam iti in ka ring lo ve ,a naupan lai a ngaihawm vawng vawng mai,keini lah tar lam kan pan tawh a ,kei ni tan han khuahkhirh theih a ni tawh bawk silo,Pathian hian kan chungah zah a ngai em a nga,engtikah emaw chuan a nun pangai a neih let leh theih ka beisei " ka pa chuan a tisup .







Lsa pawh chuan a hriatthiam thu leh keichu min thlahthlam ngai dawn loh thu a sawi ,ka lo thlamuang ve em em ringawt . Ni e mite hmuhah chuan mi awm thei tak leh mi awhawm ,mite it rawn kan ni ve . Mahse hausakna pawh hian hlimna leh lawmna alo ken loh zia ka hrechiang tawh a ,kan neih rosum te hi chhuan tlak a nihloh zia hmu chiang tu chu keimahni hi kan ni,sum ngahna chuan kan chhungkaw nun a tichhia a ,ruihhlo bawihah ka u tan tirin kan chhungkaw nunah hlima awm lo vin min siam chu a ni si a.









Hausak hi keichuan nun awhawm ah ka ngai ve thei lo,rethei te pawh nise an in chhungkhurah Pathian a lal a ,an in hmangaih chhung chu khawvela mi hausa ber an ni zawk . Ka hmai chu tuilumin min dehsak a,min ngaihtuah zia ka hria ,hetiang chung chuan nak tuk lamah pawh College ka kal ngamin ka ring lo . A haw hnuah chuan ka nu leh pa chuan thu min hrilh mawlh mawlh “ I u ti thinrim lo zawng in awm phawt mai rawh u,a buaithlak a nih hi . Lsa pawhin a hrethiam em em ang ,i u lungawi loh chhung hi chu inhmu rihlo mai rawh u " tiin ka pa chuan a ti dap dap .









“ Pa ka u hi hetiang reng chuan engtin nge kan tan in nghahna tlak a nih anga,mi hmaa rawngbawla kal chhuahte hi ka tan a zahthlak a sin,ka u pawh kan siam tha theilo va he ti chung hian Ktp a in hman pawh ka tan hian a zahthlak a sin,Lsa rilru hi a tha hlauh zawk a ,a ni ang mipa ka tawng hi ka lawm zawk a sin . Mipa tam tak ang chu nise min kalsan daih tawh ang,ka u in a hmuhsit zia hre chung hian engtin nge min la vawn duh zawk tihte hi ngaihtuah ve rawh u ,ka u hian a hmuh sit em em mipa hi a tluk hauh lo










An ni chuan sum ngah em em lo mahse an hlim a sin, kei ni chu han rethei chiah phei ila chuan tumah hi chhungkhat kan nei lo vang,kan hausakna a vang chauhin a nih hi thenrual kan neih" tiin ka room ah ka lut ,ka mittui chu ka hru mawlh mawlh . Vawitam ka u avang hian kan na tawh,ka huat rualin ka u a nihna erawh a bo thei der silo . Lsa lakah vawi tam inthiamlo reng reng in ka awm fo ,a chang phei chuan ka u hi kan chhungkua atang hian bo daih se ti a ka ngaihtuah chang lah a tam.









Ka rin ang ngeiin Lsa chu ka nu leh pa ten rawn leng tawh rihlo turin an hrilh a ,ka rilru ana viau . Ka khawngaih bawk si ,phone atangin min hnem ve mawlh mawlh ,mahse ka inthiamlohna a reh chuang lo,theihse hetiang lo deuh hian kan inkar hi ka her rem ang mawle . Hun a liam a ,inhmuh loh karin ni te chu an kal duak duak bawk ,ka vah chhuah chang pawhin hmuh tur a awm tawh lo va ,thenkhat phei chuan an thenawm a hmeichhe pakhat Aizawl atanga rawn haw thar nen an inzui nasat thu an sawi thin.








Fiah ngei ka chak a ,mahse ka ngam ngang bawk silo,rilru hrehawm takin ka awm renga ka taksa pawhin a chhiat phah nasa ,ka cher dawk a,ka vun te chu an dang lep bawk . Ka call a chhang ngai ta lo va ,min thlah hlen tawh a nih ka ring ve ta ,chuti mai a kan inkar tawp tur anga ka ngaihtuah chuan ka na ngawih ngawih,ni e hmusit ngawih ngawih tu chhungkaw makpa nihchu a chak bik ngang lo a nia nge . Rei pawh a la nilo,a nupui neihna tur ah kal tur a sawmna ka dawng a .









Thinlung rum vawng vawng in ka en tlawk tlawk ,chu midangte tana lawmpui tura an kal khawmna hun tur chu kei atan erawh chuan tahna ti tam tu tur mai an ni si . Ani leh keia khawvel chauh ti thin tu khan,kan khawvel chu zauh belhin mi thar a nunah a la lut a ,hmangaihtu in ka nghak ve reng tih hrelo in a liam ta bawk . Thinlung rum vawng vawng ka awm tih hrelo vin a ni chuan midang bula a hlim tur zia min au khum nimaiin ka hria ,ka awm chu ka dawm vawng vawng .







Vawikhat chuma dam mai thei chu nise hetiang em em hian a nat belh lo vang mawle ,hetiang em em hian a nimaw kan tana ruat nisilo kan hmangaih ve si ten a min tihnat theih dan chu,aw tinge ka chelh theih hunlai khan ka ta ka lo nih tir mai loh le ? Enga tinge hetiang a thlen hma khan ka lo chelh mai loh,tunah chuan dan tum mah ila a theih tawh loh . Lo hre lawk ila pawnlam dam si chhungril lam kehchhe mek hian ka awm lo tur ,tinge he khawvel hi kan hmangaih te nena kan awm theihna awm chhun an ti si a ,kei lem in ka kalsan a ngaih tak mai le !.








Enge ka tihsual anga hetianga min thawng tur thu ka dawn tak le . An inneihna Biak in ngei ah chuan mittui tla zawih zawihin pawnlam atang chuan ka en ,a nupui tur hmeltha zet mokawr var fual hnalh mai ha a a bula ding chu ka en ,ka tah nuih hak “ En teh maw ka thinlung rum ri hian i hming a sin ala lam,aw ka lungphu lungmawl ,duhtawk tawh rawh. I sulhnu theihnghilh a ,hliahkhuh tur a thinlung dang seng lut tu sawn a hmangaih ve tawh lo che .







A vuan ve duh tawh lo che . Kaltir tawh rawh aw,saw en teh i hlimna chuan midang a vuan tawh a , nang lo parmawi dang a belh tak saw,nang chu inthiar fihlim zawk rawh aw " ka mittui chu hru in ka thu thla hnawk . Lawmpuia kut beng ri te chuan ka thinlung an tikeh darh a ,hmana nang chauh ti thin tu in phatsanna hmel min hmuh tir meuh chuan hei ai kehchhe leh tur ka awm tawh meuhlo .







“ Zorem ilo kal a nimaw " Anu hmel ka hmuh rualin ka ding chhuak ,“ Lo kal rawh rawn hmu vela " tiin min kaiphei nghal zat . Hniallo in ka zui tawp,thla an lakna bulah chuan min va din pui ,u Lawmsanga pawh chuan min lo hmu ve nghal,a hmelah chuan inthiamlohna a lang chhuak zawk a . Min biak tumin a ka a ang zuau chu ka tlanchhuak nghal,ka mittui luang zawih zawih in ka tlan zel.









I hlim tiraw ? I hlim ang tiraw,keiai a i thlan chuan i duhthusam thin te kha a pe thei ngei ang che tiraw ,keichuan i hlimna ka pe ve thei ta silo che a,kawngpuiah chuan ka tlan mawp mawp . Khawpawn lawka tlang thengthaw nuam zetah chuan ka ding thli rawn tleh chuan min chhem a,a vawt sung sung chuan ka lungphu lum thin vawt tan mek chu a tilang chiang hle in ka hria “ Naute " Lawmsangzuala aw ka hriat rualin ka inher








Ka lamah a rawn pen “ Lo kal hnai suh" tiin ka au that ,ka mittui lah chu an tla reng bawk . Hetiang em em a na tur hian enge maw ka tihsual le “ Ka tan i hlu lutuk tih i inhria tiraw ,mahse ka tihpalh " a rawn ti sup “ Sawi tawh suh sawi suh,ka hria a lawm kei ang hmusit ngawih ngawih tu che farnu hi ka tling lo tiraw? Chu chu em ni i sawi duh" ka mittui chu rawn hru in ka namsawn tumna chu vaisawnin min pawm bet .









“ I hria a lawm,ni e nang leh kei chu khuanu ruat kan ni lo va nia nge ,i phu tawk tawng in a ni chu vuan la ,keichu min nghak tawh suh " a thusawi chuan min tina takzet “ Tinge? Tinge anat em em le ,ka ring che a sin nang chiah ka ring che ,mahse nangpawh ka rintlak i ni leh chuang lo ,hetiang reng ai chuan piang nawn leh dawn pawh ni ila ka duh tawh lo,kei ang tan chuan ana in a hahthlak ,min ngaihtuah suh " ka namsawn,tap chungin ka kalkiang a .








Ka lung chu dawmin ka hawi kual,engkim chu ka tahna tur vek an ni “ Ka ta nilo tur chuan lo piang lo zawk law law la a tha tur ,lo piang miah lo la hetiang em em hian ka nat a ngai lo vang tiraw ,hei chauh hi ka chan tawk ni tur chuan a na mah mah a ni ,arsi tak ngial pawhin kawppui an nei a ,kei erawh a hmangaih ber pawh chelh zo velo hmangaihna tluantlinglo tawngtu pakhat ve mai ka ni. Hmangaihna min hriat tir te te a ,duhlo vin a hnawl leh si,a nunrawn thlak mah mah a ni .








Kawngkal ho in mak tih hmel zet in min en ,min dem suh u keiang tan chuan a na em a ni . In ka thleng a ,inchung ah ka chho nghal,nitla tur chu thlirin ka au chhuak,thu thla hnawkin ka awm chu ka chum vak vak,ka nu chu rawn tlan chho vin min rawn pawm bet,ka tal vak vak “ Tinge ka kal tir a ngaih bik,ka kal tir phallo a sin,nu a ni kha ka tan au kir lul teh " ka nu chu kuahin ka tap char char ,ka nu pawhin min kuah bak min hnem dan a thiam bik heklo.








Mangtha tih thu tal pawh hnutchhiahlo vin a kal a ,ni e keipawh vawiin bak hi hetianga ka awm loh ngei ka beisei .








Hun chu a kal ve bek bek a ,ka u lah chuan min sawi elin Lsa thlavang ka lo hauh thin te chu min kah letnan a hmang fova “ I mipa duh ve em em chuan nupui dang a neih san che a nia " tiin min nuih kher zel,haw viau mah ila ka chhang let ngailo ,kum khat a vei meuh chuan Lsa te pawhin fapa an nei tih ka hria,mahse vanduai thlak takin a nupui erawh nau a neih hnu lawkah a thi tih an sawi a ,ka khawngaih viau . Ka va leng ve nghe nghe,mahse mi an tam em avangin hmuh erawh kan in hmu lo thung.










Ka zirnaah ka insawr bing nasa a ,ka titha chho viau bawk,kum khat ka zir leh a nihchuan phai lama doctor zir turin ka liam lehnghal in ka ring . Ka nu leh pa pawhin min fuih nasa hle ,nikhat ka bazar chu Lsa ka hmuh avang in ka ding chawt,min tawk zawnga rawn kal a nih avangin pehhel a theih tawh der silo,thawk la ham hamin kal pelh mai ka tum “ Zote " a mikohna avang chuan ka ding leh dat “ Aw enge a " ka tihchuan nui sukin min rawn pan “ I dam maw ? Inhmuh a khat hle mai " a tihchuan ka nuih ve sak









“ Um dam e i dam zawk maw ? Nia kum leh mai hian phai lama zir zawm ka tum tawh a ,ka insawr bing deuh mawle " ka tihchuan a meng deuh ak “ Oh! I ti tha hle mai chu hma ilo va sawn tawh ve ,i hmel pawh a dang tawh hle mai " a tihchuan ka nuih leh ringawt biak dan tur ka hrelo “ Ka kal phawt ange,ka hmanhmawh tawh sia " tiin ka kalsawn hlawk hlawk,kum 1 lai liam tawh mahse ka lak a a thawh dan erawh a la ngai reng . Ka ngaihtuah leh ta ngut ngut mai,a hma ai a hmel a upa tawh a ,a cher deuh thung . Mahse chungte chuan a hmelthatna kha an la hliah zo meuhlo chu a nihkha.










A fapa teh a tha em ang chu maw ,amah chauhin a enkawl dawn chu a nisia ,in ka thlenga ka u pawh a dan ngai in a lo rui leh pek tawh a . Ka nu leh pa hi ka dem lek lek zel hetiang reng chuan a nunna pawh hian a la tuar ngei ang ,awmpui te rawngbawl chu a vin leh khur khur thin ,ka lo ip chawih chawih ringawt ,ka u hi a hma in hetiang em em a ni ngai silo a ,tunah chuan thenawm khawveng te bakah a khua in a nun chhiatzia a khat tawh a nih ber hi. Zanah chuan ka dan ngai te in inchungah ka awm chho a ,thla leh arsi chu ka thlir vang vang .








“ Ka kalsan ngai lovang che ,ka hmangaih che Zoremtluang " khang thu te kha ka bengah an la ri reng a ,chu chuan mipa dang ka hnaih tur lakah min lasawn leh thin . Phatsan ni tawh mah ila phatsantu bak ka la ngaihtuah thei chuang silo ,ka mittui chu ka hru zauh “ Min phatsan tawh a ,fa hial i nei tawh tih hre chung hian tinge ka la hriat chhuah reng che le Lawmsangzual ? Min tihnat na avangin i nupui i chan tiin nuihsawh che ila,keimah zawk hi hmeichhe tenawm berah ka in ngai leh dawn tho va .







Hmeichhe rilru chhe ber ka inti duh hial ang,i thutiam zawng zawng te ka ngaihtuah chhuah a piang hi chuan na si hian ka nui leh thin,dawt nisi kha ka lo nuihpui thin a nih si kha tiraw" tiin ka awm chu ka chum dawt dawt . Nitin mai chuan natna hlir hian min hmuak ni berin ka hria,chuvang chuan tumah ka hmuh phaklohna hmunah,ka chhungte emaw a ni emaw in ka rilru an tihnat phak lohna hmuna awm chu ka chak ber a ni . Sanga nen kan vak chhuak a ,a ni hi ka college kalpui a ni a ,kan inkawmngeih viau bawk .









Bazarah chuan thil te eiin kan nui dun leh hak hak thin,ani pawh phai lama awm ve tur tho a ni a ,hun pawh kan duham dun viau. Kan chhungte ve ve hian kan in ngaizawng emaw an tiziah a ,thian ang bakin keichuan ka en lo hrim hrim “ Apa hei duh " mipa naupang tawng zirtir ni ngei tur chuan kan bul maia JCB lem chu a ngen a ,ka hawi phei vat,Lsa nen kan inmelh nghal chat . A fapa chu a pawm a ,jcb man chu dawr neitu a zawt nghal zat “ Remte kal ila,kan tlai lutuk ange,kalna tur kan la ngah kha " Sanga chuan a rawn ti a ,ka bu nghat .








Lsa chuan min en zui reng tih ka hria ,ni e a tello a hmalam ka pan ve a ngai tawh a ni . In lam pana ka haw lai chuan kan in chhak kawia Lsa lo ding ka hmu nghal ,kal pelh mai ka tum lai chuan min ko dingin inbiak a duhthu a sawi sup a ,muangchang chuan ka pan nghal . Mi hmu lohna tur deuh ni a kan hriat lam chu kan pan a “ Enge i sawi duh a " tiin ka sana ka en zauh “ Chhuna mi kha i bialpa em ni" a rawn tihchuan ka en kar mai “ Naute" a mi koh dan avang chuan ka rum hak .







“ Khatiang in min ko suh,ni e ka bialpa a nihkha " engvanga chutiang thu chu sawi mai nge ka nih ka inhre bik lo,mahse hei erawh ka hria . Kei hian Lsa hi tihnat let ve ngei ka duh tih hi “ A lo nimaw ,hmalam i pan ta chu ka lawm pui a che " a aw ah chuan lawm tak tak nge a nih a min lawmpui satliah pawh ka hrethiam lo ve a “ Nia keipawh ka lawm,min ngaihsak tu leh min phatsan ngailo tu hi an lo hlu ber a nih hi,ka kal phawt ange a tlai tawh si a" tiin chhuah mai ka tum a ,ka kut chu a vuan bet tlat “ Enge ila duh Ls" tiin ka en ha “ Kalsan che kha ka duh bik lo a sin,mahse ka kalsan loh che chuan nang emaw kei emaw khan kan tuar dawn ,i u ngei thusawi a nihchu,keichuan ka tuar thei .







Mahse nang chuan i tuar thei dawn lo,i hlimna tluka duh ka nei heklo " a tihchuan ka kut ka hum ruh “ A tlai tawh ,ka kal dawn i fapa chauh ngaihtuah rawh . Tunah chuan bul tan leh tur chuan ka pawm thei tawh lo che ,nupui nei tawh i ni a,i nupui a thih avang mai a hnaih leh tumna che pawh ka nei tawhlo ,ka na tawk tawh Ls" tiin ka mittui tla tur chu ka khap kir sak a,kal mai tum chuan ka che leh hrat ,ka darah a rawn bei a alamah min kuai her nghal zat .








Chiang takin ka mitah a en ,ka mittui chu a luang ta ngiai ngiai,chiang takin a nipawhin ka tap tih a hmu ngei ang “ Ka hria e ,ka lo tina lutuk che a ni e ,hlim takin in awmdawn nia,kal tawh rawh . Ka tibuai leh tawh lovang che ,ka tihpalh i mittui bak ka ti tla ngai silo va " tisupin a tihfo danin ka chalah chuan dim te hian a fawp zauh “ I tan chuan ka tling tawh lo reng a ni,duhlo a kalsan tu che ka nih bakah ka tihsual tih hriat nan ka nupui ka la chan zui a ,i tan chuan duh chi ka ni ta lo ve " tiin a nipawh chu a vawikhat nan a tap ve ta .







“ Dam takin Remrem " a tihchuan ka tap chhuak hak ,kan in ngaihzawn tirh a min koh dan ngeia min ko chuan min ti tap lo theilo “ Dam takin Ls" tiin kan inlam chu ka pan a ,theih se vawn leh ka duh . Mahse a rem tawh silo,khua kan tlai ve ve tawh si a .





Kum a liam leh meuh chuan keipawh Bangalore lamah ka training a ,kum li hnuah doctor puitling ka ni thei chauh dawn bawk,midang te ai ahma atanga ka lo zir tawh avangin ka chhuak hma bik dawn a ,ka lawm viau,doctor puitling tak ni tur chuan thenkhat chuan kum tam tak an beih laiin kei erawh ka vanneih vang leh ka lo inzir hmat avang in ka training rei vak dawnlo rhunga, . Nitin mai inchhiar leh practice a ngai a,hah pawh ka hah viau,doctor tha ber nih ka duh avangin ka training nasa zual bik a ,keimah a ka awm lai thlengin lehkhabu ka thil zirna a min pui thei tur ang chi chu ka chhiar vek zel . Ka hahdam deuh chang erawhin ka ngaihtuahna leh thinlung zawng zawng chu kha ka kalsan tak Champhai tlangah khan a awm thin.







Min tina tu chu ka la hmangaih reng a ,thu maia ka mangtha kha ka taksa leh rilru chuan a mangtha hlen ngailo,min ti tap fo tu kha ka la ngai em em reng a . Midang ta a ni tawh tih ka hriat reng chu ka ta nise ka la tifan a ni,mahse chung ka duhthusam te chu thleng ngai tawhlo tur ka hringnunin a a herliam pui ve zel tur a ni si .







Kum a liam a ,ka haw leh hmasak ber chuan a fapa nen khawlaiah an rawn chhuak a ,min hmuh ruala min envawng vawng kha kuah thlawp lo turin ka insum nasa viau,ka telloa hmalam pan thei tello chuan hmalam ka pan ve thei lo . “ Remrem" a hmui phunin ka hming a lam a ,a fapa a mah au tu chu a en leh vat thung. An inchhun pafa hle ,sawngte saw kei nen a kan fa nise ka ti a ni,ani nena chhungkua dina fa neih kha kan suangtuah ve nasa a sin .







Ka u pawhin nupui a lo nei ve tawh a ,fa te pawh an nei ve bawk . Kan inchhung chu tlemin hma kan sawn nang in nuam tihna erawh ka nei tawh lo,ka nun chu miten mi hlawhtling ti a an sawi nisi in a hlim ngailo,chhunglamah hian ka ruak ngawih ngawih,ka insum thei tawhlo chuan Lsa te in lam ka pan a ,khua a thim tawh avangin tuvak mahin min hriat ka ring lo . A nu pawh a thi tawh tih ka hria,kawngka chu ka kik karh karh ,ka khur der der bawk; engtin nge min lo chhawn ang? Min ngai diklo mai angem ? Tihte chenin ka ngaihtuah hman vek .







Kawngka a rawn inhawng a ,a fapa ngei chu rawn chhuakin min en kar “ Ilo leng dawn em ni ? Apa hei a thlalak i thlir ngun deuh kha a lo kal a nia " a tihchuan mak tizetin ka en ,Lsa chu a rawn lang zui thuai ,min hmu chu mak ti tih hriat tak hian min en reng “ Ka lo lut thei angem " ka tihchuan harh chhuak thut ni awm tak hian kawng min kian a ,a fapa chu a be zui thuai . “ Lo thu la " tiin sofa lam chu a kawk a ,a in pawh a hma ai chuan a lo danglam tawh “ Ilo haw chiah em ni" a tihchuan ka bu nghat “ Apa ka mu dawn " tiin a fapa chu roomah a lut a .








Lsa pawh chu a bu nghat ,kan pahnih chauh chuan kan awm ta ran “ Doctor puitling tak ini tawh tih ka hria a ,ka lawmpui hle mai che " a rawn tihchuan ka melh zawk “ Ni e keipawh ka lawm,hna a vang tawh si a ka hmuh mai pawh ka beisei loh nen " tisepin an inchhung chu ka melh kual vang vang,kum 4 lai a liam ve ta . Kei ngei pawh ka kum 27 na ka hmang ve ta reng mai ,u Lsa chuan min rawn thut hnaih a ,ka kut a rawn hum nghal chat “ Ka ngai lutuk che " a rawn tihsup chuan ka en kar ,alam hawi zawngin ka taksa chu a siam rem a .







Min kuah bet nghal thlawp “ Nupui nei tur a rilru ka siam chhan pawh kha nangmah vang hi a sin,i u khan min pawm ngai dawn lo . Keimah vanga kutthlak i tawrh reng lah kha ka phal heklo,chuvang chuan Hlutei kha neih ka rem ti ta a nihkha ,a nipawhin ka nupui nihna bak a beisei loh tur thu a sawi avanga nei ka ni ,ka nu a tar tawh bawk si a ,i hmalam hun tih chhiat ai chuan tiin ka kal tir ta mai che a nihkha . Mahse nitin khan ka nun kha a nuam ngai lo .






Min rinna zawng zawng ka tichhe vek a ,na takin ka siam che kha ka in ngaidam ngai reng reng lo,tun hnuah pawh hian ka tana neih che ka tum chuang lo,a chhan chu i tan chuan ka tling tawh lo . Keichu pathlawi mai ka ni tawh ,mahse hei chiah hi chu min rem tihsak rawh " tiin min kuah nghet sauh sauh,ka mittui a luang zawih zawih . Ni e ka u khan a vau ngei ang,chu chu ka chiang ka u avanga kan inkar chhe ta vek tih ka hai biklo “ Min hmangaih ve reng reng em Ls" ka tihchuan min kuah nghet zual sauh.







“ Ka hmuh tirh atang tawh che khan ka hmangaih tawh che " tiin ka hmuiah a rawn fawp ,ka hniallo ka sam karah a kut a rawlh lut a ,min en vang vang “ Naute " a tisup . “ Inru mai ang,Ls i kiangah ka awm duh " ti tiauin ka en reng ,ka hmaiah chuan a chul heuh heuh “ Chu chu ka duhthusam a ni,mahse i chhungte i chunga an thinrimna tur tih ka duhlo " a tihchuan a kut chu ka paih thla lawp .






“ Pawisak neilo in ka pan che a ,min la hnawl tho va. Ka tan hian i bei ngam lo a maw ,min hmangaih miah lo zawk a nihkha ,ka kal ange ka rawn in lan leh tawh lo ang,keihian beisei awm lo turah beiseina ka lo nei sang lutuk a nih hi,ka tihpalh a thleng leh tawh lovang " tiin kawngka lam chu rilru na zet in ka pan hlawk hlawk ,ka hnung lam atanga min pawt her lawpin ka hmuiah a fawp nghal chat,min kuah bet tlat bawk “ Ka kaltir leh tawh lovang che ,ka nupui i ni mawlh ang " tiin room lamah min hruai lut a .







Zingah chuan sil zetin ka tho tham tham,a ni erawh a la mutui hle , room atanga ka chhuah chuan a fapa chuan min lo en kar “ Anute apa nen inriak dun a mi " a tihchuan ka zak hle . “ E taka apa hian a ngai thei lutuk che a ,nitin hian a be ziah che a ,a nu ai pawhin i thlalak a entam fe zawk" a tileh reuh a ,ka nuih a za lek lek “ Tunge i hming bawiha" ka tihchuan Emmanuela a nih thu a sawi a ,ka nuih var var mai “ Um Emma anu atan min duh angem" ka tihchuan phur zetin a duhthu in min chhang a .







Ka kuah nghal vawng vawng,ka chhungten inah ka awm lo tih an hre ngei anga engtin tak rawn che ang maw ,Lsa a rawn thawh chuan Emma nen chuan rawng kan lo bawl zo diam tawh,kan nufa a kan che dun chu min en in a nui suk “Hmuh in nuam lutuk" tiin ka biangah a rawn fawp zauh “ Apa i ngaih em em a lo haw tawh sia i zawng tawh lovang tiraw " Emma an a lo tih chuan “ Kam tam suh" a lo tihluk,ka nui hak hak mai .






Lsa chuan kan in lamah palai a tir a ,ka nu leh pa chu a hmin maiin ka ring a ,mahse ka u ber chuan ngaihtuahna a luah lo theilo ,palai te chuan zanlama ka u a rawn kal tur thu an sawi chuan ka hlauthawng hle ,thil pawi a thleng ang tih ka hlau ber . Ka rin ang tak takin ka u hmel kan hmu chu a thinrim hmel hle reng a ,sofa ah chuan a thu a ,kei leh Lsa bakah Emma chu a en ngur “ Remsangpui doctor hial i ni tawh chung leh mipa dang tam takin an hel chung che pawhin a ni mi pasal ni tawh fa mah nei hial tawh tho hi maw ila thlan a " a tihchuan ka u hmaah chuan ka aw nghal vat.







A thaw hawk mai,thinrima min hruai haw luih ka hlau ber “ Lawmsang ka nau hi i hmangaih takzet em " a tinghut ” I nau hi ka hmangaih a ,ka damchhunga ka hmangaih awmchhun tur a ni bawk,Hlutei ka neih chhan pawh nangmah ngeiin i hriat kha" Lsa chuan a tive nghut . Min kaltir mai mai a tum tawh biklo tih ka hrechiang hle “ Ni e ,ka nawrluih avang che a nei i ni tihchu ka hrechiang khawp,mahse ka nau hian nang ang pathlawi hi a neih mai ka phal bik hleinem" a tileh nghut .








Ka u hmaah chuan ka thingthi a “ U khawngaihin,Lsa lo hi chu neih ka duh lo,kha chen ka awm bo chung pawh khan a nilo chu hmangaih ka nei chuang lo,u khawngaihin kha chen ka lo tuar tawh a ,duh chu ni ila pasal ka nei tawh ngei ang . Mahse Lsa lo hi chu tu mipa mah ka tana tling tur ka hmu lo ani,u nangpawhin nupui i nei tawh a ,keini ang hian i nupui tur chhungten duhlo ve ta che sela hetiang ang hian i awm lo bik dawn em ni" ka tihchuan a ngawi vang vang.






“ Awle in inneih ka phal ang,mahse ka nau hi vawikhat pawh iti na a nihchuan ka ngaidam lovang che " tiin ka u chu a chhuak zui a ,Lsa nen chuan hlim zetin kan in en “ Tunah chuan ka ta ini kumkhua tawh ang" a tisup a ,ka tah nuih hak . Hun a liam a ,Lsa chuan nitin min hmangaihna ka hriatbelh thin . Ka u nen pawh an inkawm ngeih tawhin ka u pawhin zu a nghei ta bawk,a nupui fel vang ka tilo theilo,ka lawm takzet a ni ,fanu duhawm tak ka neia ,Lsa chu a lawm berah a tanga a fanu chu a kalsan phal meuhlo, Emmanuela pawhin a nau chu a duat ve hle .






En hranna ka nei lova,ka pasal fa a nihnaah pawh ka hmangaih bawk . “ I lokir lo ang tih hi ka hlau thin" tisup tu chu enin ka nuih var var “ Chanloh D Ls ti a ka tahpui thinlai che khan hetiang tak hian hringnun hi a nuam a ni tih ka hre ngailo,ka chanloh tur a an dah ni a ka hriat kha tunah chuan kumkhua a ka pasal tur ini ve ta " tiin ka kuah vawng vawng . Tlai nitla tur a hma zawnga mittui leh khawharna nena ka thlah liam thin chu hlim hmel leh ka pasal kut ngei vuan chung chuan ka thlah liam ve thei ta .





A TAWP TA