CHIQUITITA

[Da Buckwheat]

CHIQUITITA
by Da Buckwheat

Ka camis var, reh thei lo a kai ka hlauh avanga a hranpa hlaka ka suk, var thianghlim sar chu ka ha a, a chungah ka coat vutbuak rawng chu hain a mil tur chiah kekawr smart ve tak ka ha bawk a, ka pheikhawk neih zahawm ve bera ka ngaih chu ka bun bawk. Nidanga baggy tak taka inchei ṭhin kha ka ni a, mahse; vawiin chu Biak ina hun ropui tak hmang tura insiam ka ni miau sia.


















Biak in ka thlen chuan ka ṭhutna tur takah ka ṭhu a, ka ṭhuthmun aṭangin ka suangtuahna ramah ka pêm a, ka lo pil thuk hman khawp mai.
















Ka nupui ni mai tur chu ka vei lamah ṭhuin ka vei lam chu ka hawi sek. A chhan maw? A chhan chu ka nupui chuan ka lung a tiawi hliah hliah êm a ni. A hmel ṭhat chu thu hran, a mawina belhchhah turin kawrfual var mawi êm êm mai chu a ha a, a kawng fêk nalh tak chu tight ṭha takin a kawrfual kawng chuan a hreng a, a awm bawr pawh a fun nalh ṭha khawp mai. A hnuai lam erawh chu ka mal rawn hliah vek khawpin a puk thung.















Inneih thuthlung chu kan chham ta. Ka bula ding hmeichhe nalh em em mai, a mawina piah lama nungchang mawi leh rilru ṭha tak chu ka nupui a ni ta. A zam tih hriat takin a beng chu a sen tar a. Hming te kan sign fel hnua kan ṭhutnaa kan ṭhut fel leh chuan a kut chu ka vawnsak a; a zam apianga a awm dan angin a kut chu a lo thlan dap. "I ṭha em?" a hriat phak tur tawk lek chuan ka phun sap a. Min rawn en ve lai erawh chuan a hmelah hlim hmel chiah ka hmu, a la nui mawi em em zui. "Ṭha mah mah" a rawn ti ve sur sur a; chu chuan ka hlimna a va belhchhah tehreng em!














Pastor chuan kan kohhran zaipawl chu sawmin mawi tak maiin an rawn zai a, heti hian


"Fanau maltluan chawi dunin,
An dam chhung ni lo sei se;
Hmangaihnaa intichak tawn turin,
Malsawm rawh" chu chuan Pathian malsawmna dawng bik hliah hliah angin min inhriattir.












Suangtuahnaah hian cham hlen daih theih se ṭha tur. Ka suangtuahna aṭang chuan ka harh chhuak zawk a, khawvela ka hmeichhe hmangaih ber chu kei ni lo midang nen inneihna thuthlung an chham dun a. Kei erawh kohhran zaipawl member pakhat, nupa tuak tharte tana zai ve mek zawk chu ka ni.















Chu hmeichhe hmel ṭha tak chu a pasal chuan a kut vawnsakin a duat hmel khawp mai, a hlimna chauh ka duh ti fo mah ila kei ni lo midang bula a hlim hmel erawh chuan min tina tlat a nih chu maw le.















Kan hla sak mek chu ka thinlung taka ka pawm leh pawm loh ka inzawt a, chhan harsa ka va ti em! Mahse hei hi ka chhanna chu a ni, 'Ka pawm'.













Keimah zawk min thlang tura ka chapona zawng zawng dah ṭhaa ka ngen ngawih ngawih lai te kha ka mitthlaah a lo lang a, khati khawpa tlawma ka ngen pawhin, "A rem lo" tih zawng kha ka chhanna dawn a ni ṭhin a nih kha. Khatih laia ka thinlung naah khan chi an phul thar leh ang mai hian an pahnih awm dun chuan min tina a. Mahse ka bula awm duh lo na na na chu ka chelh reng thei bik lo. Kei ni loin ani bulah sawn a hlim a; chu chu ka dan theih a ni lo. Pathian leh a kohhran hmaah thu an thlung tawh a, chu chu keia lo pawm loha lo va ṭhen hran theih niin ka hre lo.
















Biak in luhka hmaah ngei mai chuan an rawn chhuak dun ta. Thla te an lakpui lai chuan kei chu gate bula biakin hungna bang ngheng chuan ka ding a; monu mawlh chuan ka mit a la la tlat. Ka inthunun thei lo lek lek.













Higher kan kal lai mitthlaah a lo lang a, Hmangaihi nen hian ṭhian ṭha tak kan ni ṭhin. A ṭhian ṭha ber anga min ngaih lai zawng zawng pawh khan kei chuan ṭhian anga ka hmangaihna chauh ni loin ka hmangaih tih ka hre tawh. Mahse; ka hrilh kha chuan kan inṭhian ṭhatna a chhiat phah ka hlauh vangin hun rei tak chhung ka zep a nih kha.











A ruka thiltih thiam lo mi ka ni bawk nen, ka zep reng thei ta lo. Ka huaisenna sawm khawma hrilh ka tum mek lai khan "Thil hrilh tur che ka nei" min tih khalh ta zawk a. Chutah zet chuan beiseina sang tak nen huphurh tak chungin a thusawi tur chu ka ngaichang ta ran a, "Nizanah Chhuana'n min lo bem a, ka lo 'Yes' a" hlim hmel zet chuan a ti a, kha zan khan lawmpui harsa ka van ti tak em!














Chhuana nen chuan an inzui ta reng a; kei chu an inṭhen changa a inhnemna mai ka ni, ni e, min dem maithei; mahse ani hi ka hmangaih hmasa ber piah lama ka ṭhianṭha ber a la ni reng a, a mangan chhawktu tal nih chu ka duhthusam a ni reng ṭhin. Tunah pawh hian a la ni reng maithei.












Ka insum zo ta lo. "Ka hmangaih che Chiquitita" a mita en chung chuan ka ti ta. Chiquitita tih chu ka koh ziah ṭhin dan a ni. "Zawma, nang chu ṭhian ang chauhin ka en thei che, bialpa ka nei a; i hre ve vek sia"












"Ka hria lawm, ṭhian chauh kan ni. Mahse ka hmangaih tho che. En teh, Chhuana nen hian vawi engzat nge in inṭhena in intihthiam loh tawh? Chumi chhung rei lo teah chuan tu nge i pan ṭhin? Keimah ka ni. Eng ngati nge i hriatthiam theih loh? Ani kha theihnghilhin a hun pum hloh veka hmangaihtu che hi i hmangaih ve mai thei lo em ni? "



Chu thu chu ka sawi tum pawh a ni lo, ka thawl hawk dawn emaw ka tih laiin ka thin a rawn na et et.








" Zawma" harsa tih hmel zet chuan a rawn ti ṭiak a, chutah chuan keima tawka ka chapo vena zawng zawng dah ṭhain "Khawngaihin min thlang zawk rawh" ka ti chhuak ta hawk. Mahse "A rem lo" tiin min kalsan ta zawk a nih kha.










Hmeichhe pakhat hian ka darah a rawn beng dat a; ka phu deuh zawk. "Nang hian i la thlah tak tak lo tiraw?" a tih chuan ka nui tawi tak. Ani hi Kimkimi a ni a, higher kan kal laia kan chungchang hre chiang bertu a ni.















"Ani chu Chiquitita a la ni reng alawm, ka little girl pawhin hei, pasal a nei ve ta chu nia" ka tih chuan "Ka rin ang chiahin nang hi i la ngai reng a nih hi" min rawn en chho chung chuan a ti leh a. "2015-a monu batchmate-te" tih a rawn rîk chhunzawm mai vang chuan mo leh mo neitu leh an ṭhiante lam pan chuan kan phei dun a, kan classmate ṭhinte zawng zawng nen. Monu bulah tak chuan ka va ding a, a hmet mai dawn amaw kan tih tawh hnuah cameraman chuan a camera lens vel chu a'n endik leh rih.















Chumi chhung chuan ka bula ding chu hun rei tak hnuah ka be ta. "I dam maw Chiquitita" ka tih chuan zawi te hian, "Ka hming pangngaia min koh a hun tawh a nia, Zawma" a rawn ti sar sar a. Engtik lai pawhin min tibeidawng reng dawn a nih hi.












Hmana a rim tho kha a la nam reng a, a rimtui ka ti takzet. A bula ka din chhung rei lo teah khan ka rilruin nunhlui a chhui let nasa hman khawp mai.









Little girl tiha ka koh ṭhin kha a duh lo a, chu vanga Chiquitita tiha ko ka ni. Chu pawh chu little girl tihna tho a ni sia. Kha little girl kha amah Chhuana te inah ngei chuan a lawi lut ta. Kei erawhin ka mangṭha a hun ve tak tak tawhin ka hria.








Engtik niah emaw hma lam ka lo pan a nih pawhin, ani kha chu ka Chiquitita a ni reng ang