KA KHAWVEL IN NI

[ilefi imoz]

KA KHAWVEL IN NI.

Short Story

Ziaktu : ilefi imoz


(FICTION)


Ţomir thla ral lam tawh hi a ni a, khaw nuam lo leh ruahsur bur bur reng kârah chuan Aizawl khawpui chu Sumo-in kan lût ve ta a, khua a thim thet thet tawh avang leh ka vawikhat kalna chauh a la nih avangin ka chîaî ru angreng hle a, Power House an tih hmuna Sumo a din rual chuan zâmna leh hlauhthawnnain ka khat nghâl a, he Khawpui zau takah hian ka bo mai angem? Khawiah pawh kal ila hriat ngâi loh hmun hlîr a ni dawn tih ka chianga, 'helaiah hian hmânah ka kal tawh' tia han sawi theih tur vêng pakhatmah ka tan chuan a awm lo.


Ruahsur hnuaia Sumo driver-in ka bag lian vak lo min hlân thlâksak lai chuan mangang ru angreng tak hian ka hawikual thuak thuak a, mi ţhenkhat, nihliap nena tei vâwk vâwkte chuan min ngaihven lêm lo tih hriat takin hmanhmawh takin min kalpel suau suau a, piah deuh fêa streetlight êng vâ vâ leh chhaklama dâwr tetaktêtê inhawng ve far te chu êng awmchhun an ni deuh mai.


Sumo Driver u Famkima chuan min nghawk zauhin, "Motor hi ka siamtir duh nghâl dawn a, i chuan man min pe tawh em kha?" Tiin min zawt a, ka la pe hauh lo tih ka hrechhuak ve chiah a ni.. Ka inthiam loh thu hrilh mawlh mawlh chungin pawisa chu ka han pe a, reiloteah min kalsan zui mai bawk a, keimah chauh ka ni ta, vawikhatmah la tla hrang ngai lo tih takah, chhaklama building ding khup mai bathlarah te chuan ka chho ngam lova, chî âina nen sumo stand-ah chuan ding tlawk tlawkin ruahsur chu ka do ngat ngat mai a, rei tawk fang ka din hnu chuan ka bag chhunga ka dah ka thuamhnaw te pawh an huh zawr hneh tawh hle. Hmeichhe tana mahni chauha han din nan chuan a him lo mah mah tein ka hria.


"Tluangliani i ni em?" Kawngpui lehlam aţanga rawn ti thâm chhaltu tu avang chuan phâwk zetin ka dâkchhuak a, chutah, kawngpui lehlama Railing vuana patling pakhat lo ding chu va hmu vein thâwk ka la ham ham a, thlamuanna chuan chawp leh chilhin min rawn tuam nghâl hlup hlup a ni ber mai, chhung leh khat, laina leh ţhian hnâivâi ni hauh si lo avanga ka thlamuan ve vawikhatna a ni hialin ka ring..


"I ni tiraw?" Ti leha rawn tlânpheiin ruahsur chu a rawn do ve a, zak angreng tak chungin lu ka lo bu nghat nghat a, TV leh Phone vela kan lo hmuh ţhin ai daihin a hmelţha zawk, a patling a, a hawihhawm hmelin a zaidam hmel ngawih ngawih bawk.. "Nichinah i chhungte ka phone a, Power house in rawn thlen tawh thu an sawia Driver-in a kalsan tawh che tih min hrilh bawka, hmanhmawh deuhin ka rawn tlân phei nghal a, i bo mai ka hlau hman lutuk alawm, lo kal rawh, i bag kha min lo pe la, piah deuhah saw'n Car ka daha kan haw nghâl mai dawn nia, ka fate an lo mangang palh ang" ti leha ka bag a rawn ban lai te chuan zak deuhin ka la ding khawng reng a, a hrethiam aniang chu, ka bânah rawn vuanin min pawt kal ta dawt dawt a, chu chu kan intawn hmasak berna a ni.


Rei vak lo kan tlân hnuin kawngpuiah Car chu a tiding dat a, "Inchungte Garage-ah hian ka dah ve mai ţhin a, i bag hi khai chhuak la step-ah hian min lo nghâk lawk rawh aw, ka rei lovang" tia min rawn melhin, hnunglama ka bag dah chu a ban a, min pe a, ka chhuahpui thuai a. Ruah a la sur avangin step sira mî In bathlarah chuan ngawi reng hian ka lo ding a, a sawi ang ngeiin a thang rei lo, a rawn lang thuai a, a nui sâng reng bawk, "lo kal rawh le, Chaw ei kan lo nghâk che a, Naupangte pawh an ril a ţam tawh maithei" tih paha min hûi zauhin step-ah chuan min chhukthlâkpui a, nichina ruah ka dona mai bakah ka insangmar ţeuh reng bawk nen ka taksa chu khawng ţha tawh tak a ni.


Inhnuai chiah kawngkhar chu hawngin lut turin min sawm a, "Âpa" tia lo pantu chu a fapa naupang zawk a ni tih ka hria, "Junior, in ril a lo ţâm tawh em? Hei, Ânu Tetei anih hi, a fel hmel tiraw?" Ti zung zunga ka lam rawn hawiin a fapa chu min kawhhmuh a, "Junior-a anih hi, a Û chiah saw Bawihpuia, Bawihpui, lo kal teh hei, i Nu Tetei hi rawn chibai rawh" tia min inhmelhriattirin a fapa te nen chuan kan in chibai hlawm a, ka room tur min kawhhmuhin, "I inbual duh ka ringa tuilum ka lo chhuansak che a, inbual lawk la chaw kan ei dawn nia" tiin min chhuahsan zui a, ka pa te rual vel lai tur mah ni se, tleirawlte rilru leh nunphung hi a man chak lutuk tih TV leh Phone vela a sermon kan ngaihthlak ţhin aţangin ka hre tawh a, tunah hian a takin ka man chho ve ta a ni.


Laltluangliani ka ni a, 'Tete' tia koh ţhin ka ni thung. Thingtlâng khaw pakhata chêng ka ni a, kan chhungkua kan rual ve deuh avangin ka duh chen lehkha ka zir thei lova, Pawl Sawm ka pass rualin Higher Secondary school kalna tur, admission fee-ah kan buai nghâl pang a, ka u leh naute dinhmun zawng zawng nen ka ngaihtuahin zir zawm tawh lova thingtlang hnathawh ve mai kha kan chhungkaw din chhuah ve theihna tur a ni tih ka hria a, sikul ka bâng ta mai a, inchhîr châng ngah ţhin mah ila khatih laia ka lo bâng kha ka chhungte tan chuan phurrit pakhat lâk kian huai anga thawventhlak a ni zawk dawn tih ka hre thar leh hnuhnawh ţhin.


Kum 21 mi ka ni ve tawh a, kar hmasa lamah Thuhriltu ropui tak pakhatin Awmpui tur nula a duh thu a chhuah chu ţhenawm khawvengte min fin chhuahna liau liauvin kan lo hre ve a, amah chu Pu Joshua Hmingliana hi a ni.. Tlangval anih lai aţang tawha Pathian mi hman bîk a ni a, Pastor leh Missionary te ang pui puiin hlawh neia Pathianthu sawi ţhin ni ve lêm lo mah se, Mizo mipuite khan an ngaisang ţhin hle a, chutih hunlai chuan kei chu naupangtê ka la ni.. A nunah Pathian ropuizia a hmuh theih a, a thusawi reng reng a nungin mite hian an ngaisang thei hlê ţhin.. Keipawhin tleirawl ka hriat ve tirh aţanga ka mi ngaihsan a ni a, TV-a a sermon an rawn pek chhuah châng te hian en loh ka hlau thei khawp mai, a hmel leh a zia hrim hrimte hi ka duh a, ka pa te rual lai mah ni se ka tleirawl chhuah tirh Star kha a ni ve tlat.


Rang takin ka nu ten an be pawp nghal a, a zân lâ lâ in an Ina awm tura min duh thu arawn sawi ta mai bawk si, thingtlang mî, rethei leh berhchep ve tak kan ni tih pawh ka nuten an sawi, chuti chunga min pawm duh tho te chu a Pathianthu bik hliah hliah hian ka hria a, ka ngaisang zual hlê bawk..


Ka inbual zawha Chaw ei tura dawhkan kan kîl lai chuan Pa Joshua chu a ding a, ţawngţaina a hmang a, an Ina ka awm ve dawn avanga an lawmziate chu Pathian hnenah a sawi mawlh mawlh a, min venghima min kaihruai zel turin min dilsak thlap bawk.. "Ei ţeuh rawh, zah a ngai lo ania tumah zah tlâk kan awm lo, heti ve mai hi kan ni a, inpawh tlâng takin awm ila kan hlim tlâng a ni mai" tia min tih tlângnel tum taka a ţawng siam siam lai te chuan a aw thâm mawi deuh chu ngaihthlak nuam ka lo ti em em a, mipaah chuan Aw thûm lo berte zing ami a ni, chutih rualin a aw chuan min hîp riau lawi a, a Pa hrêk hrâwk lohna hian mi nelawm takah a chhuahin ka hria, tin, a aw thâm ţiak pawh chu âwm ka tihpui viau tho, hmun hrang hrangah Pathian thu hrilin a vâk kual a, aw ţha tak nei chi a ni tawh lo ve bawk a ni.



"Ânu Tete, keini chu zânah Âpa te nen game kan khel ţhin asin, i lo telve duh em?" Junior-an a tih tâk lauhah chuan nui lui hak hakin, "tehreng mai" tiin ka lo chhâng a, ţawng mawh min ti ve ngawtin ka ring, chu chu ka ze pangngai ve ania, ka tlângnel lutuk lohna hmunah hian han sawi mai tur hi ka haihchham riau zela, ka ngam tlâk takte bulah erawh ka ri bawrh bawrh ţhin.. "Ânu Tetei a châu ang, arawn kalna a thui a, nilenga motor chuan chu hrehawm duh deuh asin Junior, zanin chu chawlh hahdam tir phawt ila, naktuk zan aţangin kan infiamnaah kan telh ve dawn ania" Pa Joshua chuan a lo ti a, min rawn melhin a nui sâng bawk..


Zîngah hma takah thovin choka ka pan ding nghal a, an bungbêl dahna leh sekrek bâwm awmna te chîk taka ka enkual dan dan hnuah thingpui ka lum a, nizan chaw ei laia Pa Joshua thil min hrilhte chu zawm diak diak ka duh avangin room ka thlen rualin Note bu têah ka ziak thlap kha ania, phone ka neih loh avangin note bû ka keng a ni. Chaw chhum tur zat min hrilh anga ka chhum hnuah chawhmeh bâwm ka hai kual rak rak a, siam tur ka hmuh ang ang chu siamin, eirawng ka bâwl zawh ţêpah an pafa thumin an rawn thochhuak ve a, "I va tho hma ve Tete, i chauh âwm tehlul nen thawh hma duh loh tur che alawm, vawiin inrinni a ni lehnghala intih hmâ viau a ngai lo asin" Pa Joshua-an a rawn ti phei lâng lâng a, keiin Nopui ami thingpui chu ngawi rengin ka lo thlit thung.


Ka thingpui no pêk an ban diat diat laiin Pa Joshua bawk chuan, "eirawng i lo bâwl diam tawh bawk a ni maw? A inthlahrunawm lek lek zawk dawn alawm mawle, mahni In anih loh vang maiin inthlahrung leh kan mitmei vêng deuhin i awm ang tih ka hlau ania, i In ang chiahin ngai rawh aw, mihausa kan ni lova, sum leh thil ţha chi tinrengin kan vùr thùr thûr thei dawn lo che a, mahse tlangnel taka i awm theih chuan itan a nuam dawn ania" ati leh dap dap a, an bula awm hi a dam dap a, inchhungkhur boruak chu a thâwl huau ni berin ka hria.


Ka bai chhuan vila gas bula ka din laiin zawhna min zawt mawlh mawlh a, kan chhungkaw khawsakphung leh dinhmun te a ni deuh ber, ţha tak leh tlang takin ka chhâng zel a, inthup ţit ţet chi ka nih ve loh avangin kan chhungkaw harsatnate pawh ka hrilh fai vek a, lungngai lo tur leh engkima Pathian rinchhana thil ti ţhin turin min fuih nasa khawp mai, zankhat lek an ina ka la riak chung pawhin an inchhungkhur ralmuanzia ka hre dêr tawh a, fate ţulpui ţhak tur chi mizia a nei tih thlengin ka hria.


A nupui nen an inţhen chhan pawh ka nu te sawi dan hmangin uirena vang a ni a, kum 6 kalta ami daih tawh a ni nghe nghe.. Pathian thu hrila Thingtlang vela a vah kual chhungin a nupui chuan mipa dang a lo mutpui ţhin niin an sawi a, a hriatchhuah meuh chuan a thinlung na lutuk avangin intihhlum hial a tum a ni âwm e, chutih lai chuan kei chu tleirawl chhuak hlim hlawt ka la ni a, eng angin nge a tâlbuai ka hre ve chiah lo, tun hnua ka ngaihtuah châng erawh chuan, a nat dan tur chu hriatthiampui ruakin ka inhre ţhin.. Fa pahnih an nei tawh a, hmangaih leh duhsak taka a neih a nupuiin mipa dang laka a lo uiresan tih a hriat meuh chuan a puakkeh lo chauh dawn tih ka hrethiam takzet a ni.


Chhunah tumah kan chhuak lova, inchhung sekrek khawiha ka buai laiin Junior-a leh Bawihpuia ten Computer games an khel a, Junior-a hi kum ruk mi niin, class 1 a zir ve tawh a, Bawihpuia ve thung chu kum 10 mi niin class 5 a ni ve mêk thung. Pa Joshua pawh sumdawnna lam buaipuiim room-ah a inkhung nilêng a, Bazarpuiah dawr hawngin midang a nghahtir a ni âwm e, an Pafa thum hian room pakhat an inţâwm a, khum khatah an mu ho vek a ni.. Thingpui no chawia an room-a ka va luh chuan pa Joshua chu lo tho chhuakin lawmthu min hrilh thlap a, tlai eirawngbawl hun hmâ chu mu hahdam turin min hrilh bawk, chu erawh ka zâwm lêm lo, ka thawh zawh loh thawk zo turin chokaah ka chhuakphei a, pa Joshua-an zan inkhawm a duh avangin eirawng ka bawl nghal sawk sawk bawk.


"Kan committee dawna kan rei maithei a, Bawihpuia te lo mutpui mai rawh aw, ka tlâi châng hian an lo hlau ţhin a" tia min hrilhin a chhuak zui a, "Ânu Tete, infiam tawh ang u" an room aţangin Junior-an arawn ti lauh mai! Tîm dêka an room-a ka lut chu Bawihpuian, "Âpa in, a duh duh danin lo awm rawh se a ti che" a lo ti a ka nui ta ringawt a, an bula awm chuan chhungte meuh pawh an ngaihawm hman meuh lo chu a ni.


Junior-an almirah a va hawng rak rak a, thosilên ang tak eng emaw hi rawn phawrhchhuakin, Bawihpuian chhuatah Pher a lo phah ve thung a, Junior-a thil rawn lak chhuah pher chunga an han phah chuan Tent (puan In kaih chi) a ni tih ka hre ve chauh a ni. "Ânu Tete, a chhungah hian lo lut ve rawh, snake and ladder game khel ang u" Bawihpuian atih chuan a ngaihna hre lo deuhin Puan In chhungah chuan ka lut ve a, tihdan min hrilhin a rei deuh hnu chuan nuam ka ti ta khawp mai, nula ber e ti lo chuan ka hlimpui ta phian a, dar kua a rik meuh chuan ka naute pahnih chu an kun deuh lâp lâp tawh.


Khumah sawnin puan ka sin ţhat tir a, mipa e ti lovin an tawh a khirh lo dûn khawp mai, a pa hian a enkawl ţha viau anih ka ring, tih ang angin an awm a, thu an awihin an kum phu lovin an fing a, hetiang anih zel dawn chuan hna hahthlak lutuk nei lovin an zingah ka khawsa reng thei ang. "Ânu Tete, âpa chuan mut dawnah thawnthu min chhiarsak a, min ţawngţaisak ţhin a" Bawihpuian atih chuan ka hawihai nasa hman khawp mai a, Junior-a zawkin lukham hnuaia naupang thawnthubu arawn phawrh tâkah chuan ka lo ban vat a, ka chhiarsak ta a, rei pawh ka chhiar hman lo, ka nau te pahnih chu an chhîng diar diar a, ka auh pawhin min chhâng tawh lo.


Thawhsan mai ka tum laiin pa Joshua thu min chah kha hrechhuakin khum tlângah ka ţhu leh rih a, arawn haw hma chuan lo awmpui turin min hrilh tak anih kha.. Keimahin naupang thawnthubu chu ka chhiar a, a rei deuh hnu chuan mutchhuakin min rawn zêmin khum tlâng bawh chuan ka ka lo muhil ve ta daih a, ka taksa kâng deuh lâwp pawh chu ka harhpui zo tawh lo, mitmenga room chhung ka en kual chuan khua lo vâr tawhin ka room-a ka khumah ngei ka lo mu reng tawh a, rang lutukin Sana ka en vat a, vanneihthlak takin thawh ka hai lo hlauh, dar 5:30am bâwr vel chiah a la ni, thochhuak ţhem ţhemin chokaah ka lut phei a, thingpui luma ka rik rak rak lai pawh chuan nizana ka khum ka pan lai ka hrechhuak zo ta miah lo lehnghal.


Kum a vei meuh chuan ka awm mêkna Inah chuan ka tlângnelin ka In ang chiahin ka en tawh a, naupang pahnihte mai bakah Pa Joshua thlengin kan infiam bawrh bawrh ngam tawh a, nitin mai hian pa Joshua piantharzia ka hre nawn fo ţhin.. Engkima lâwm thiam tur leh harsatna karah pawh hlimna chhete tal zawng fan fan turin min fuih fova, ka tan mai ni lovin, mi zawng zawng tan a ţha famkim vek ni mai hian ka hria, kan khuaa Christmass hmang tura haw ka tum ţumin Junior-an min ngên tlat a, pa Joshua tihngaihna hre lo lutukin haw lo hrâm turin min ti ta ringawt a, February thla kan chuangkai leh ta reng mai.


"Tete, dawhkana ka paper dah kha hmun i phiahin i paih tel daih emni?" An room aţanga min rawn au lâwng lâwngin pa Joshua chu room kawngkaah arawn dakchhuak a, "teuh lo mai, hmun ka phiah laiin dawhkanah eng lehkha mah a awm lo, Junior-a ten an khawih a ni lo maw?" Tia ka lo zawh lêt chuan lu thingin, "An mut hnua ka dah ania, an khawih lovang, ka'n zawng ţha leh chhin ange" tiin a lùt zui leh a, reilote hnuah rawn âu lehin, "ka hmu leh si e aw, drower-ah zawk alawm ka lo dah le, a pawimawh sia i paih ta em mawni ka ti hman" a ti a, ka lo nui tawp, a fate ngaihtuahin a rilru a buai thei lutuka a haihawt tawh khawp mai.


Pathianni zan inkhawm banah kan chhungkuain kan inzui hâw ţhâm ţhâm a, in kan thlen chuan dar 9:00pm a lo ri vâ vâ tawh, "game khel ang u" Junior-an atih leh hrâm avangin inthlâk sawk sawkin an room-ah ka lut phei ve a, pa Joshua hovin an Puan In kaihah khân an lo tawm leh kûk tawh.. "Ânu Tetei chu i rei thei bik, lo kal vat rawh kan khelh san dawn che ania" tia Bawihpuia lo âu lâng lâng chu nuih puiin, an Puan In kaihah chuan ka lut ve a, bottle tivirin thruth or dare game kan khel a ni.. Bottle hmâwrin a kawh apiang chu zawhna kan zawt zel a, a châng leh tih tur te kan inhrilh a, pa Joshua pawh nui ruh ruh chunga kan lâm tîr ţum a tam khawp mai, a fate hlimna a ngai pawimawh a, a theih hrâm chuan an thiltihna kawng engkimah telve a duh ţhin.

"Ânu Tetei a kâwk?" Junior-an a ti lauh a, bottle hmâwr chuan min kâwk vâ vâ a, "Junior, ânu Tetei hi ngaihzawng a neih leh neih loh zawt ang aw, a ruktê hian a lo lerh nge lerh lo test ang!" Ti hluaia pa Joshua-an min rawn melh chuan lâi ru zet hian, "Nei teuh lo mai" ka lo ti zat zat a, dawt ka sawi miah lo, ka piantirh ata ngaihzawng ka la nei chhin eih lova, kan chhungkaw boruak an hriaa mipate hian min hlau ţhin, tlema min star ve deuhtu an awm pawhin min belchianga min be ţha duh vak ngai lo.


"Ehh, a zêp chiang mai Ânu Tetei chu, thruth or dare game anih hi aw dawt i sawi chuan a ţha dawn lo ania" Bawihpuian phùr zet hian a lo ti ve a, dawt ka sawi loh thu nasa deuha ka sawi hnuah an awih ve hrâm a, pa joshua pawh a nui ve ruh ruh zel, luck lo min ti viauin ka ring.. Game kan ţan leh a, bottle hmâwr chuan pa Joshua zawk a kâwk ve thung a, Bawihpuian rang fê mai hian, "Âpa nang, ngaihzawng i nei em dawt sawi lovin?" A tichhuak leh phawng a, ka lo îp ru châwih mai, ngaihzawng tih thumal hi a lakah tuman kan sawichhuak ngai lova, a nunhlui zawng zawngte nena dâwnpuitu tan chuan chu zawhna chhânna chu a khirh hlê ang tih a hriat theih a ni.


"Âih, nei miah lo, ngaihzawng neih kher a ngai hleinem ka bulah in awm a, nangmahni hi ka khawvel in ni alawm, Junior-a te, nangmah te, Ânu Tetei te in awm chhung chuan chhungkaw dang ka mamawh belh tawh lo hrim hrim, tichuan i zawhna ka chhâng kim em Bawihpui?" Ban charha a tih tâkah chuan ka thaw huai a, a patlinzia ka hre nawn leh ta, a fate leh keima bula pachang taka a awm tlat ţhin hi a fakawm a, amahah hian han sawisel tur eih ka hre ţhin lo.


Dar 11:00pm pelh hretah kan game khelh chu kan duhtawk thei ve hrâm a, Junior-a ka thlâk fel mawlh mawlh laiin Pa Joshua leh Bawihpuia ten khum an lo siam thung a, Junior-a pawm pheia khuma ka nghah hnuah ţhingţhiin, pa Joshua chu ka ngaichâng a, a inpeih thawkhat hnuah chuan khum bul dawhkana bible chu banin, a chhiar dap dap a, ţawngţaiin kan zavai chuan Pathian kutah min hlân leh thlap bawk, zantina kan tih ngei ngei ţhin anih avangin ngâiah ka neih tawh a, keima tawkah tun hma zawng aiin Pathian nena kan inkar pawh a ţha zawk..


Room chhuahsan tuma kawngkhar ka pan rualin YMA information Centre aţangin chhiat tawh thu an rawn puang a, ka ding chiang khawp mai, mitthi an awm reng renga ka hlauh ţhin zia ngaihtuahin tun thlenga ka la dam te hi mak ka ti zawk.. Hmanni deuh pawhin vêng dang daihah mipakhatin a ţhiannu a vithlum a, anmahni hmel takngial pawh ka la hmu hauh lo chungin zankhuain ka khur a, ka muhil thei lo, thâwm awm hlekah ka phu zuk zuk renga, zingah mit sen rûmin ka thawh phah a, pa Joshua-an a chhan a hriat chuan a nuih a zain min khawngaih hlê nghe nghe..


"Khai aw.. avahan zia lo ve pu Rûma chu, ka hritlâng ropui si a zanah chuan ka chhuak chho peih tawh lovang a.. Zingah ka kal mai ang, Tete, i hlau leh dawn si a zanin chu hetah riak ve mai ta che, khum a zâu thova Junior-a sîrah hian mu ve mai rawh, hlauh neiha mahnia awm chu a ţha lo, almirah-ah sâwn blanket a tam mai, va lâ la, kan bulah mu ve mai rawh" tia pa Joshua rawn ţawngchhuak chuan ka hlauhna a tinêp ta deuh a, chhungkaw khum pui meuha mut chu ka hreh ru ve bawk si, a ngaihna hre lo angreng taka ka din reng laiin amah zawk chu a rawn thochhuak a, Almirah chu hawngin blanket lian ţha pangngai tak hi phawrhchhuakin min pe a, "chhuatah hian mutna ka siam anga ka mu mai ang" tia ka hnial pawhin, "i muhil thei dawn chuang lo, kan bulah lo mu la i hlauh apiangin min rawn sâwi harh dawn nia" a ti deuh tlat a, awm nuam lo viau mah se ka hnial zui duh tawh lo, mitthi kher kher hi chu ka hlau ve êm a ni.


Pa Joshua chu a fate pahnih inkarah muin kei chu Junior-a sirah ka mu a, light a off ruala ka thin phu dawt dawt avang chuan ka inlukhup rang kher mai.. Ka awmdan chu hrethiam ni âwm takin light chu a on leh nghal a, "i ţha em? Intipachang rawh, i bulah kan vaiin kan awma hlauh tur engmah a awm lo ania Tete, i mutthilh theih loh i ring emni?" Tia min rawn sâwiin ka blanket chu a rawn pawt a, khûr deuh hlak hlak chunga ka mengchhuak chu hnai deuh takah min lo melh reng a, Junior-a taksa bawhkanin min ngaichâng reng hi a lo ni a, a inthlahrunawm duh viau ná a, ka hlau êma awmngaihna thlawt ka hre lo a ni.


"I mut theih i rin loh chuan ka menpui dawn che nia, zanah hian ka muhil khât khawp mai, i peih chen chen ka menpui ang che, men kher kher chu ka theih zawng tak a ni," atih leh tâkah chuan thâwk la vakin ka tâl sat sat a, "mutthilh tum rawh, ka mut a la chhuak lo deuha chuvang mai mai anih hi" tiin hrilh ve bawk mah ila mutthilh chu a tum hmêl bik lo hkhawp mai..


"Thil ka hrilh ang che i duh em? Ka thuruk, tu hnen maha ka la sawichhuah ngâi loh?" Tih paha Junior-a pawm kâng lâwpin a mutna zawkah chuan a muttir a, ani chu Junior-a mutnaah zawk rawn insawnin an rizai sin lai chu a sin ţha sat sat a, a mizia ka hrechianga hlauh enah ka en lo hrim hrim..


"Eng thuruk maw?" tia ka zawh chuan inbengkhalhin ka lam a rawn hawi a, "Nupui neih leh chungchang," tih zawng sawiin a ngawi leh rih a, a hmel ka en chuan natna thûk tak pairu hmel ka hmu tel ni mai hian ka inhria, sawihreh deuh kan neih chânga kan hmel landan ang hi a pu a, a inti pachang lui hram hram tih pawh ka hre thei.


"Kei leh ka chhungkaw chanchin chu a tam zawk i hre tawhin ka ringa, mi tam zawkin an hriat tawh ka ring bawk, a hunlai kha chuan Zoram titi ber a ni pha hial a, min tawrhpuitu leh ka nupui hawtu kha an tam asin, khatih hunlaia ka rilru puthmang leh chêt duhdan kha tun hnua ka ngaihtuah hian Pathian lakah ka inthiam lo ţhin khawp mai, phatsan ka niha kan chhungkua kan kehdarh rual chiah khân thih duhna thlarau sualin min luhchilh nghal a, ka beidawng leh rilru na lutuk khân hruihrual banin intihhlum te ka tuma, mahse mak ve deuh chu, ka fate pahnih hmêl ka mittlaa an rawn lan rualin ka thil tih tum dik lohzia leh Pathian pawi sawina lian lutuk a ni tih ka hrechhuak ta a, chu mai bakah ka fate pahnihin anmahnia khawvel an rawn sual tur ka ngaihtuah leh lek phei chuan thi tura ka la inpeih lohzia ka chiang thar uar uar a, thinlung kehsawm vek chungin ka fate tana Pa ţha ber nih kha ka thlang ta zawk a ni.


Kum a liama hunpui tam tak a liam a, ka faten 'Nu' tia koh tur an mamawhzia ka hria, anmahni enkawla hmangaih taka pawm tleitu tur an mamawhzia hriain Pathian hnenah ţawngţaiin ka dil fova, ngaihzawng nei leh mai turin vawitam thuthlukna ka siam ţhin, mahse a hmaa hliam ka nih tawhna avang khan nunhluiin min vaw châu a, hmangaih nei leh ngam tawh lo turin min pawtlêt zel, phatsan ka nih leh ka hlauva, kalsan nih leh ka hlauh lutukna khân hma min sawntir thei lova, Pathian hnena ka dil ţhin chu ka bawhzui ngam lo zela tun hi ka thleng ta chu ania.


Nichina zawhna ka dawn kha i hria anga, chhân mai dan tur ka haihchham rukzia erawh i hre lo maithei, Bawihpuia hian vawitam min zawt ţhin a, nupui nei leh turin min nawr ţhin bawk, annu kha chiang takin an hre hman lova, an ûksâk lutuk ngai lêm lo, tereuhtê an nih lai aţanga ka kuta tla chawt an nih avang hian hmangaiha kuangkuahtu tur Nu an awt ve hlê tih ka hria a, tihngaihna vak ka hriat loh avang hian an tan Nu leh Pa nih ka kawp tawp mai ţhin, tunah hei, chhia leh ţha hre rual an rawn ni chho ve a, a manganthlak duh thei khawp mai, chhung leh khat han belh viau tur nei si lo chu kan chhungkua hi kan bûl angreng khawp a, Pathian hi bêl tlat lo phei ila chuan kan chan a chhe viau ang, i hnenah vawitam ka sawi ţhin, engkim hi chhan nei vekin a thleng a, Pathianin hetiang buaina leh hrehawmna zawng zawng ka hmaa min chhawpsak hian chhan ţha tak a nei ngei ang tih ka ring, chu chuan kan chhungkua hi min la khâichhuak anga, dinhmun ţha zawk nen lei rem kan la rah ve ka beisei tlat a ni" tia thâwk la vang vangin a lu a kamna kut chu a la sawn a, a mu thla dat a, zangthalin ceilling a melh chho vang vang bawk.


"Pathian i rinzia ka hriaa amaha innghat tawp ţhin mi i ni tih ka hre bawka, aman hun atih hunah i fate nu tur chu a pe em em ang che, engkima ka entawn leh ka mi ngaihsan i ni a, i tawrhna zawng zawngte pawh a takin rawn tawrhpui ve kher lo che mah ila, a na dawn tih ka hria, mahse nang chu i chhel a, patling takin i hmaa tihtur awm te i hlenchhuak thei zel alawm.. Fa duhawm deuh deuh i neia i nunhlui lak aţangin an la la hrang thuai mai ang che" tia ka ţawngkam thiam ang tawka ka lo hnem ve chuan bu nghat nghatin, "Ka beisei, naktuk tlaiah chaw eichhuak ang u aw" a ti teh daih a, ka bangbo ru viau mai.


Eng eng emaw sawia kan titi melh melh laiin ka lo muhil ta aniang, ka harh leh meuh chuan khua a lo vâr tawh a, ka sirah tui zetin pa Joshua te pafa an la mu a, ka sir chiaha mu a ni bawka pa Joshua nen chuan kan lo inhnaih ngang mai, Rizai sin hrang tho mah ila min lo khan chial a, kan inhawitawn chiang lutuk te chu zahthlak zawk tak a ni..


Thâwm dîm thei ang bera thochhuakin chokaah ka lut tlang a, thingpui luma eirawng ka bawl rak rak laiin Bawihpui-a a lo chhuak phei ve a, "Ânu Tete ka zun a chhuak tawh lutuk, âpa ţawngţai lai laiin ka lo phei tawp" arawn ti chhuak barh barh a, bathroom-a a luh hnu reiloteah rawn chhuak lehin an room-ah bawk tlân luh leh a tuma, "ngati nge? I mu nawn leh dawn emni?" Tia ka zawh chuan, "aih, Âpa a la ţawngţai zo lova mit ka va chhîng leh lawk ang" tiin dîm têin room kawngka a hawng a, a lut zui mai bawk.. Tûk tin an thawh rualin a pa hian an lu chunga kut nghatin a ţawngţaisak thlap ţhin a, ani tluka fate enkawlna kawnga mibik hi an awm thei tawh lovang ka ti ve tlat.


An rawn thawh chhuah tâkah chuan thingpui lo thlit sakin ka eirawngbawl ka chhunzawm a, "Vawiin tlai kha aw Tete, chhunah lo insiam la Bawihpuia leh Junior-a te school bâng ka lam anga, an insiam ve thuak thuak anga kan chhuak dawn nia" thingpui no dawm khu hlat hlat chunga pa Joshua-an atih chuan bu nghatin, "programme pawimawh a awm dawn emni a?" Ka lo ti hâ a, "awm hran lo ve, han chhuah vah vel hi kan nei khât êm a, intihthawven nan i eichhuak mai mai ang u" tia min lo chhângin a fapate hnenah chuan tlaia chaw ei chhuah kan tum thu a hrilh zui a, an phùr dûn tawh nasa mai!


"Mitthi vuinaa ka kal zawhah dawr ka va en fel anga ka rawn lam hman ang che u, in inthlak anga kan kal nghal dawn nia" tih zawm lehin a fate chu a melh thuak thuak a, a mitmenga hmangaihna hlîr langchhuak ţhin hi alawm a ngainatawm em em nachhan! A fate hi a neih zawng zawng an ni tih a langchiang ţhin a, ro dang engmah nen a thleng phal dawn lo tih chu chiang sa a ni! A fate hian kalsan thut se awmngaihna hre lovin a â vek thei ang tih tur ang chi kha a ni.


Chhunah a theih anga tam inchhung sekreh ka lo khawih a, an rawn thlen hmain ka inbual hman chiah chiah a, ka la insiam lo thung.. "Tete, i la inpeih bik lo tiraw? Sawtah kal leh lawk na tur ka neia in nufa thumin lo insiam ula ka rawn lam kâwi leh ang che u, hei, kan rawn hmu fuha kan rawn hawn che" tia thil min pek zauh paha Pa Joshua-an min chhuahsan leh tâk avangin Bawihpuia te unau chu ka chei mawlh mawlh a, chumi hnuah kei ka inchei ve leh a, an rawn thlen ruala a thil min pêk ka hawng chu mak ti lutukin ka meng â heu ringawt..


Make-up set manto hmel deuh deuh chi ang hi a lo ni a, ka inchei ngâi lohzia a hria a chuti chunga min rawn leisak tho chu a chhan ka hrethiam lo hlê a, make-up artist nih ka châk thu hi a hnenah ka sawi ve zeuh zeuha, chu chu a lo la hria a ni maithei! Lawm tak ka ni, hmanhmawh deuhin min chhuahsan leh mai bawk sia lawmthu pawh ka hrilh hman lova, a lo lêt leh hunah ka hrilh mai aniang chu.


"Awi leh Ânu Tetei chu, nangmah i van ang lo em em" chokaa ka chhuah phei rualin Bawihpuian a lo ti hluai a, dawhkan kîlin a nau nen nepnawi an ei mêk a ni. "Enge? Ka danglam viau emni?" Tia zawtin ka nui hak a, "i danglam viau chuang lo a mahse i hmelţha lutuk, khatiang khan inchei ziah la bialpa i nei vat mai ang" a ti ve ngei anih chu! Âwm ka ti ve viau tho mai, make-up inhnawih ngai mang lo khân ka han inhnawih thar leh vel ania, kan khuaa ka awm lai chuan make-up hlui chhe deuh deuh tawh hi ka khawn khâwma ka ţhiante chei nan ka hmang ţhin, nalh an inti ve thei hlê a, keimah tak erawh ka inchêi khât viau thung.


Reilote hnuah kawngka biangah pa Joshua arawn lang hlawl a, a rawn luh rual rualin Junior-a chuan, "Âpa, Ânu Tetei hi a hmelţha tawh lutuk lo en ve chhin teh," tih leh kan lama rawn kaih phei a rual a, dang hman hek lo le, zak ru chem chem chungin ka lo nui lui sâng a, "anih tak hi mawle, Junior-a Ânu Tetei chu a hmelţha hle mai a.. Ngaihzawng min neihsan daih ang tih a hlauhawm zawk alawm.." ti vang vanga a nuih ve tákah chuan thaw huaiin lawmthu ka hrilh sep sep a, "lawmthu inhrilhna chi pawh a ni lo khatiang te chu, hei chen kan bulah i khawsa tawha keimahni zawk hian lawmthu hrilh mawlh mawlh tur che kan ni, make-up artist nih i tum thu i sawia i inchei ngâi mang si lova, i inchei hmêl ka hmu châk a" tia min lo hmakhalhin amah zawk chuan lawmthu te min hrilh letling a, a dangdaiin a hahdamthlak ţhin ngawt mai.


Car-a kan luh fel ţhap tawh hnuah kan kal chhuahna tur hmun ber tuman kan la thlang lo tih kan hrechhuak a, kei min han râwn der ve a, nitina In awm ţhin leh a ţul huna bazara kal ve mai ţhin ka nih avangin khawi hmun mah ka hre ve dêr lova, a tawp a tawpah Pa Joshua chuan, "koris Dining-ah kal mai ang u, a tui hmel thei riauin ka hria" a ti a kan inkhalhchhuak zui a, a hmun kan thlen chuan mî an lo tam khawp mai, an dawr chhung a changkangin mi nazawng luh phâkna tur chi niin ka hre lova, ka tan ngat phei chuan Junior-a te chhungkua awm lo se vawikhatmah ka rah loh tur hmun a ni tih ka chiang.


Bathlar lama ţhutna an hûn lam chu panin kan inzuiphei a, kalkawnga kan mi tawh ţhenkhatte chuan pa Joshua chu chibaiin thlâ te an lo lâkpui nak hlawm a, nui sâng chunga chhâwnin, 'Lalpan malsawm che u rawh se' a ti thei zela, a tawp a tawpah kan ţhutna tur chu kan va thleng ve thei hrâm a, menu an chhawpah chuan eitur reng reng chu Korean hming nei deuh vek an nih bakah to deuh deuh hlîr hi an lo ni a, han chah ve mai tur ka hre lo lutuk chuan an chah ang ang ka pawm tur thu sawiin ka khup thak a, Bawihpuian a duhzawng sawiin a ziak mawlh mawlh mai.


"Ngati nge Korean hlâ hlir an play a?" Tia ka zawh chuan, "Koris dining anih hi, an play ve loh ten, kpop i ngaisang ve vak nange? I ngaihsan ka ringa duhsak deuhin ka thlan sak che asin" Pa Joshua-an a lo ti a, ka inthiam lo lutuk chuan, "Ngaisang e, ngaisang lutuk, i ti lawmawm" ka ti bah naka, ka ngaihsan lohzia erawh keiman ka hrechiang ber ang, korean ho ai chuan Mizopa pawh ka ngaisang fê zawk, entirnan amah Pa Joshua ang te, chutiang vel chu a ni.


Kan eitur chah a rawn thlen meuh chuan dawhkanah a khat hnûr a, han ei mai tur pawh ka hre lo, noodles lampang a tam em em a, sa leh thlai hring chi hrang hrang, tam tak a ni, heng zawng zawng kan ei zawh chuan kan thâu haw nalh thei ang.. Hetianga eitur tuihnai deuh deuh ka hmuh hi chuan ka chhungte ka hrechhuak lo thei lo, an ei phâk loh thil tui tui ka ei laiin anni chuan hna hahthlak tak thawkin chawhmeh mumal lo zet zet an ei a, dinhmun inthlâu lutuk ţhin hian minti ipik fo mai.


Pa Joshua chuan a ei thei vak lova, "Washroom-ah ka va kal lawk ange, tui deuhin ei rawh u" tia min thawhsanin a kal sawn a, chumi hnu reilotea nutling pakhat rawn kal chu tunge anih ka hre mai lo.. "Bawihpui! Junior.. In niin ka hre rêng a, i pa hovin emni in kal?" Tia zawtin Junior-a bulah chuan a ţhu thla sawt sawt a, Junior-a hmelah chuan nuam lo tihna a langchhuak thâlin ka hria, naupang mai a ni bawka a rilru a thup thiam lova, nuam a tih chânga a hmel landan leh nuam lo a tih chânga a chêtphungte hi ka man zung zung ţhin.


"Hei tunge? I pa bialnu emni?" Tih paha min rawn kâwk deuh sawk chu phut pui zukin ka âng zuau a, "Juliet!" Tia pa Joshua rawn kalphei deuh hmawk hmawk ka va hmuh avang chuan ka ngawi leh ta zawk a, a hmela hamhaihna langchhuak chuan a nelawm ţhinna te kha an hliahbo zo a ni ber mai, nutling lah chu a ding mar awt lehnghal.. Pa Joshua-an kan bul a rawn thlen rualin nutling chuan, "ka fate hi nuhrawn hrawn mai mai turin ka phal lo, hetia ngaihzawng i neihsan mai mai dawn anih chuan ka bulah rawn dah rawh.." A ti nghâl phar phar a, a awmzia chu henu hi Pa Joshua nupui hlui kha a ni ngei ang!


"Nang âi fê chuan ka enkawl thei zawk ang, sum leh pai thuah ni se i neih leh ka neih inthlauhzia kan hriat dun kha, min pe la, henu nen hian innei rawh u, tihian nang leh kei hi enge kan danglamna? Fate ngaihzawng kan neihsan ve ve a ni maia, kan dinhmun a in ang ta chiah a ni lawmni?" Tih zawm leha Junior-a a kuahbeh rual chuan Junior-a chu a ţap deuh hawk a, hlauh hmêl lutukin a khùr dar dar bawk.. "Lo kal rawh Junior" mangang zeta tiin Junior-a chu a nu kut aţangin ka la sawn a, "sawtah kan lo va awm ang aw" tia kalpui mai ka tum chu nutling kha lo ţawng lehin, "a ngai lo, hetah hian ţhu ula vawiin hian thu tâwp siam ang u" a ti deuh tlat a, inthlahrung deuha pa Joshua hmel ka en chuan mit tizîm san chungin min lo melh lêt ve a, ţhu tura min mitmei avang chuan a sirah Junior-a pawm chungin ka ţhu dat a, kan boruak ngaichânga kan lam rawn hawi leh zak zak ţhin kan piaha ţhute avang chuan awm a nuam lo khawp mai.


"Chuan, engtin nge ni dawn? Hei i bialnu lah chu a la naupan hmel em em lehnghal a, hetia ngaihzawng neihsana fate nuhrawn hrawn tir leh mai mai tur te chuan hmânah khân min rawn hrilh tawh tur che alawm, ka rawn la vat mai tur ania, nang ai chuan ka enkawl puitling thei zawk daih ang, sikul ţhaah pawh i luhtir ka ring lo, tlâkchhiat lam i pan mek an tih lehnghal che kha" ti leha Pi Juliet-in min rawn melh râwm râwm lai chuan pa Joshua chuan ka kut a rawn hûm vang vang a, ka phu leh zawk tawh, kan dinhmun ţang ru zet laka inthlahdul tura min hrilhna anih ka ring.


"Juliet, i ze ngâi i la paih lo a ni maw? Han ngaihtuah chiang teh, in khata kan awm ho lai khan enge ka sawi tam ber ţhin? Neihsum chhuan hi Pathian hlatna kawng hnâi ber a ni ka tih fo kha, ka neihin rual el ve lo mah se, engkim min hneh tirtu Pathian ka nei alawm, nupui/pasal neihlaia fate ngaihzawng neihsan leh, nuthlawi/pathlawi nih hnua fate ngaihzawng neihsan chu a dân a dang hlak, i danglam ve deuh tawh ang chu tih laia, i ze ngâi bawk i lo la neih reng le! Ka faten nu an mamawh lai bera kalsantu i ni a, chuti chunga anmahni enkawl thei âwm ziazânga i han ţawng chu, i huaisen hlê mai, ka ngaihzawng neih leh neih lohah te, ka fate ka enkawl danah te hian inrawlh lo tum hauh suh, i duh lohva i kalsan tâkten hmalam an pan lai i hmuh chuan lawm takin lawmpuina thu min hlân zawk ta che, ngati nge a kheuhbeuh zâwnga thu i la rawn lâk kual ţâlh mai le?" Ti ve charh charha pa Joshua-an ka kut a hûmna a tihngheh lai chuan thâwk ka lo la ham ham a..


Pi Juliet-i erawh a ţeu ţha hlar hlar tawh khawp mai, "Chutin min ti khanglang suh, Pathian rawngbawla hmun hrang hrang i fan kual lai khan, i nupui leh fanaute hringnun tur i ngaihtuah ngai em? I kianga hun hman châka an thlâkhlelh ve ngawih ngawih lai che khân khawiah nge i awm ţhin? Hmun hla tak, hmuh phâk lohvah Pathianthu sawiin i au dur dur ţhin a ni lawmni? I chhungten enge an tih a, eng buaina nge an tawh tih pawh ngaihtuah hman lova Pathian rawng i intihbâwl ve na khân rah ţha lo a chhuah ve a ni mai" a ti ta khawl khawl mai a, ka îp ru nasa leh tawh lutuk, kan piaha ţhute lah chuan kan lamah an beng an rawn dawh hnâi sauh sauh a, awmdan tur pawh ka hre tawh meuh lo.


"Ka awm loh laia lo venga lo enkawl tur che u in Pathian hnenah ţawngţaina nen ka hlân ţhin che u a ni lawmni? Harsatna leh kawng bumboh in tawh châng apianga thlamuan tur cheu in Pathian khi ka ngên ţhin asin, atana thawkchhuak ţhin ka ni a, ka chhungkaw tana Pa ni turin a rin ngam tih ka hrechiang hle bawk, vên sên loh leh Pathian kalh zâwng hlîra hun i lo hman avangin anih kha kan kehdarh tâk! Mî chhungkaw pa ber pawhin Pathian rawngbawlin an chhungkua an feh chhuahsan fo, nang anga tâl hiar an nupuite zingah an awm ve lo, puhmawh tur zawnga ţawng zawt zawt lovin inhmuhchhuah nan hmang zawk rawh" pa Joshua chuan a ti ve ta hmak a, a thusawi dikzia hretu tan chuan ţan loh chi pawh a ni lo.


"Chupawh ni se i dik bik lo, hetia hmeichhe dang ngaizawnga i fate nuhrawn hrawn tir theihna dan hi i nei bik lo" pakhatin a lo tih ve lai chuan ţawng tumin ka âng zuau a, pa Joshua chuan min pawt deuh sawkin, "theihna nei tehreng e, ka fate hian Nu an mamawha, chû an mamawh chu pe turin dikna ka nei, nang erawh i ni tawh lo thung ang, anmahni hmangaiha enkawl a, an mangan ber lai pawha kalsan ve ngai lo tur Nu ka pe dawn a, anni pawhin lungdam takin an pawm ang, ka hmangaiha ka nei vat dawn bawk, min dâl han tum chhin teh, kan chhungkaw tana engmah i nih tawh lohzia i hre nawn awn awn mai ang" min lo tih khalh leh zung zung a, 'kan inngaizawng hleinem' tia sawi tum kha ka nia, ka ţawng zui ngam leh ta lo. A thusawi dan te lah chu, innei vat tur angin min la sawi lehnghal..


Pi Juliet-i chu thinrim insehruh ţûn chungin a ţhu ngawi renga, keini erawh insaseng hmasaah ţangin kan ei man a pe a, Rs 3000/- man dâwn kan lo chah chu niin.. Pawna kan chhuah thlâk hnu chuan min dinpui vang vangin ka kut a rawn vuan a, ngaihţha lo deuha ka melh chhoh chuan vân lam a lo thlîr vang vang a, thâwk a la kâwk bawk.. "Khatiang thil kha a thlen ka beisei miah lo, kan boruak a rawn tichhe ringawta a zia lo hle mai, nidangah chuan a thleng tawh lovang, i haw mai ang u" tia min kai sawnin Car lam kan pan a, Junior-a a pawm a, keiin ka kut lehlamin Bawihpuia ka kâi thung a, chhungkua te pawh kan ang tak tak zawk alawm le.


Car-a kan chuan chhûng zawngin tumah kan ţawng lova, inchhunga kan luh pawhin naupang pahnihte chuan room an pan ding nghal a, an ngui nghiai mai.. Inthlak tura room-a ka luh hnuah chhuak phei lehin Chokaah ka lut a, dawhkan kîl chunga pa Joshua-an tui a lo in lai chu va hmuin, thâwm dîm thei ang berin fridge ka hawng a, naktuk zinga eirawngbawl hran ngai lo turin zanah inbâwl lâwk ka tum a ni.


Gas on a Anţam tui tur ka chhuan rualin pa Joshua chuan, "Vawiin tlaia Juliet-i bula ka thusawi kha.." Arawn ti deuh thâwr a, "eng chu maw?" Tih paha ka va hawiphei chuan chîk deuh hian min lo melh renga, lâi ru deuh ţûtin ka hawi sawn leh vat a, "inneih chungchang kha" a ti sup mai.. Chhâng lova ka ngawih reng tâkah chuan amah bawk chuan, "Thleng thei tak tak se ka ti khawp mai" a ti leh supa phâwk lutukin ka meng vaka ka inher nghâl vut bawk..


"Lo kal teh hetah hian.." Tia min hûi zauhin dawhkan hnuaia stool inhûng chu ka ţhutna turin a pawtchhuak a, tîm daiin ka va ţhu thla dat a, inhmatawna ţhu kan ni bawk nen nuam ka ti lo takzet, a zahthlak mai piah lamah boruak a rit deuh chûrh a, a hrehawm lek lek a ni.


"Ka fate hian Nu an mamawh, chu chu keiin ka hriatchian tluk zetin i hriatchian kha, ka hmuh hmasak ber che kha chuan tleirawl fel hmêl tak angin ka hmu che a, hetia kan inhrawn rei hnu hi chuan nula fel leh hmangaihna ngah tak i ni tih ka hre tawh, a rukin ka chîk fo che a, ka chîk che hi ka inchhir lo hlê bawk, engtiklai khan nge hetiang khawp hian ka nunah i lo pawimawh tâk ka hre lova, ka hriat zawng chu ka duh hlê che tih zawng a ni.. Zantinin Pathian hnenah itan ka ţawngţai fova, ka fate nu ni turin vawitam a hnenah ka dil ţhin bawk che, vawiinah khân tlang taka hrilh che ka tuma mahse, kan boruak tawn chu i hriat kha, ngaihzawng atan min pawm ve thei angem? Chu chu ka hre duh a ni" ti supa ka kut arawn hûm lai chuan ka boruak hîp chu a lûm pup pup bik hian ka hria a, chhân mai dan tur ka haihchham lutuk chu khûk ral chem chema khûk ral daih mai ka duh hial a ni.


"Tete.." Atih leh tâkah chuan, "kan kum inthlauhna te hi ngaihtuah ve la, chu mai bakah mî min sawi dan tur chenin ngaihtuah tel rawh," ka ti ta sep a, dik tak chuan pa Joshua lakah hian feeling nei lo ka ni bik lo, an Ina ka luh hmâ daih aţangin ka hre tawh a, ka ngaihsan leh ka star ruk theih em em kha a ni, chutah kan han inhrawn a, a rintlâkzia leh a thlamuanpuiawmzia ka hrechiang zela ka duhna a lian ve sawt sawt zel a, mahse vawiina a thusawi ang hi chu ngaithla phâk turin vawikhatmah ka la indah chhin ngai lo.. A mak êm a, awmdan tur leh han sawi mai tur ka haihchham a ni.


"Kum hian hmangaihna a dâl lova, hmangaihna hian kum inkâr a thliar ve vakin ka lo hre hleinem, kum avanga inngaizawng tur kan ni lova, induhtawnna vang zawk a ni dawn a, buaina tur awmin ka lo hre lo kei chuan, Pathian kan dah hmasak ber chhung chuan" a ti lehzel a, "mahse, mite hi an ţawngthei tawh si a, In khatah kan chêng lehnghal a, a mawi lo deuhin ka hria kei chu, inneih ka la ngam lova, ka chhungkua ka enkawl ve phawt a la ngai tih min hriatpui kha, bakah.." Ka tih niah niah lai chuan min lo pawt chat a.


"Pawmlai ţhen tawh ka ni a min hlâu niin ka hria, duh leh hmangaih tak takte lakah chuan a lo insûm theihin, hma hun tur thui tak dâwn chunga ke pên nih phei chuan invên thiam a ngai tih kan hria a, ka hlauhawm lutuk lêm lo ania" ti sup supin ka sam a rawn chûl a, na deuha lu lo thingin, "chutin ka sawi loh kha, miten min sawi dan tur te hi ngaihtuah rawh ka ti mai alawm, 'Pu Joshua chu a awmpui nula nen an inngaizawnga, in khata chêng an ni lehnghala thil tam tak a thleng tawh ang' tiin min sawi ngei dawn a, chu chu ka duh lo, a lang chin chauh hriaa a chhungril rawn pawh pha ve tak tak lo te hi a ţawng tam tam an ni ţhin a" ka ti ve duah a ka sawi zâwng ringawt pawhin ka ţim ur ur thei hial a ni.


"Mite ngaihdan nge Pathian hmuh dan i dah pawimawh zawk? Hei chen kan kiangah i awma vawikhat chauh pawh mawi lo takin kan khawsa dun tawh emni? I puan hmâwr pawh ka la dek lo tih hi nang leh kei bakah kan rin Pathian khian a hre ve bawk a, mite chuan an duh duhin thu chu lo veivir ang hmiang, danglam ngai lo Pathian zawk khi min hriatpuitu atana kan thlan phawt chuan, lungkham tur kan neih ka hre lo" ti charh charha min melh leh reng tâkah chuan lu ka bu ve ta nghat nghat a, a sawidik tih ka hria, ani nena kan inkar hi Pathianin min hriatpui a, thianghlim taka kan inhêl reizia pawh a hrechiang lutuk ang, engati nge mite ngaihdan mai mai ka lo ngaih thupui fûn vak le?


"Tete, ka nunah hian vawikhat thil ka tisual tawh a, vawikhat ka tlu tawha vawikhat ka na tawh, chû vawikhat lek chuan hmangaih nei ngam tawh lo khawpin min sawp châu a, tumah ring leh tawh ngai lo turin ka rilru pindan hi a khâr fel vek tawh bawk, hmangaihna hming hi ka hua a, rinawmna tih thumal hi ka ten hle ţhin, boruak harsa leh khirhkhân tak kârah ka rîla rah ka fate ka enkawl an ngai a, an mangan nîin puitu an mamawh dawn tih ka hria a, an tan theihtawp ka chhuah ţhin, chu chu nang baka hrechiangtu tur an awm lo, ka tan chuan anni hi ka khawvelte an ni a, ka neih zawng zawng leh ka neihchhun an ni, anni min hmangaih puia min enkawlpui theitu tur Pathian hnenah ka dil fo ka tih tawh kha, chutiang mi chu mipakhat chauh a awm, ani chuan keiin ka fate ka hmangaih ang chiahin a hmangaih a, a duhsak a, an lawm zâwng a siamsak âwl ngâi lo, chu chu nangmah i ni a, ka nuna senglut lo thei lo chein i nungchang leh zia hian min hîp tlata, ka fate pawhin Nu atan an duh dawn che tih ka hria, an pawm thlap che anga, an lungngaihna zawng zawng chu nang leh kei leh Pathian hnenah an thlen ţhin ang, Pathian hnena ka dîl ţhin hi nangmah i ni tih ka hre tawh asin" ti leha min rawn hnaih chuan ka mittui a tla tawp tawh a, kan nun hman mêk hi mumang nuam tak ang mai a ni.


"I chhungten an mamawh che a, en san tura tih che ka tum lo, chhungkua chu inpui tawna in ţâwiâwm tawn tur kan ni alawm tiraw? I inpeih hmâ chu ka nghak ang che, thianghlim takin, ka nupui i nih hma loh chuan a mawi lo zâwngin chêt ka la ngâi lo ang a, mahse i ngaihzawng ka nihzia erawh mi zawng zawngin hria se ka duh thung ang" a tih zawm leh phei chuan ka kuah thlawp tawh a, ani tluka kan chhungkaw dinhmun hrechiangtu hi an awm lovang, hrisel lohna avangin ka pain hna min thawhpui thei tawh lova, ka Û ten thingtlâng lo neiin ei an zawnga, kei helamah awmin ka naute pahnihin sikul an la kal a, ngaihzâwn tlâk loh ber mihring min ngaizawnga min duh tlat te hi Pathian ropuizia tilangtu niin ka hria.


"Min en san dawn lo tih hre chunga Pathian ka lo bêlh ve ţâng ţangna rah ka seng ve tawh dawn anih hi Tete, ka theihtawpin ka duat ang che u, nang leh ka fate pahnih hi KA KHAWVEL IN NI, ka neih zawng zawng piahlama ka neih phâk ngaia ka rin loh hlimna min neihtir tute in ni a, i rinawm dawn tih ka hria a, itan chauha rinawm tur ka nih ka inhrechiang hle bawka, dilna ngawihsan ngai lotu kan Pathian hi a ţha tiraw? A dawhthlêng zâwk min siamrem a tumna lamah kan duh loh danin thil a thleng fova, natpuiin hrethiam lo dawn viau ţhin mah ila, a hun takah chuan kan beisei loh lam aţangin kan ţawngţâi chhânna min pe leh nge nge ţhin anih hi" tia min kuahlêt vein ka hnung a bêng thek thek a, tunge hlim zawk ang tih pawh ka hre lo.


"Âpa.." Room kawngka aţanga rawn tlân chhuak chung hian Bawihpuian arawn ti lâwng lâwng a, inlahrang vata kan ţhut rem sawt sawt hnuah Bawihpuia chu rawn thleng pheiin, a pa phone arawn hûm chhuak a.. "Ihmaw pa.." Tia a pa phone a kheuh mual mual hnu chuan,


"Falkland-ah bike leh motor an insû a, bike khalhtu zawk a thi an ti"


Pa Joshua nen chuan kan in melh zawk a, a nui a, ka nui ve a.


"Ava zia lo ve aw.. Tete, Junior-a bulah i mu dawn nia" nui deuh ruh ruh chunga tiin pa Joshua chuan Bawihpuia nen room lamah min kai phei a, hmân zân anga rilru nuam lo leh inthlahrung khân ka awm tawh lo bawka mutna tur chu ka siamfel sawk sawk a, Junior-a pawh laptop enin a lo la meng.. Mu tura kan intintuah hnuah pa Joshua chu khum aţanga chhukin chhuatah a ţhingţhi a, keipawh a sîrah ţhingţhi ve in, ka sirah Junior-a, a pa sîrah Bawihpuia, mit kan chhîng ţhap a. A pa chu a ţawngţai ta a.


"Lalpa duhtak, ka khawvel te an nih hi, min enkawlpui la, min vên sak fovang che, Lalpa, khawngaih rawh aw.."


A TAWP TA.