Mr. Detective

[Cck Lalchhuanawmi]

Mr. Detective
By:Cck Lalchhuanawmi

Angaihi leh Zuali te nen First Love, Nam-i te kan en a, he film hi LPS-6 Channel kan va call a kan thlan ngat.

Ṭhutthlengah kan inpawm khawm chial a, puan kan sin bawk. Inrinni zan apiangin, chhungte inkhawm hlanin kan lo en ṭhin.

Zirtawpni tlaiah kan call ṭhin a, LPS-6 Channel neitu te an fel êm a, inrinni zan dar sarih a rik tawh chuan an lo pe chhuak ngei ngei.

"Pshone-a hmelṭhat dan saw",

"Top-a hmelṭhat dan saw", a laiah ka ṭhu bawk a, ka beng bulah an au chel chûl a, ka beng a chhe lo hi a mak zawk ngawt mai.

Ngawi rengin an en hle hle thei ṭhin lo, Pshone leh Top-a te-ah hmelṭha zawk inhmin ve ve an tum a, an inhnial reng zel.

A laia awm tih takah, Pshone nge Top hmelṭha zawkah thutawp siam turin min ti ziah zel bawk a, Mr. Detective tiin ka lo chhang ziah bawk a, an lungawilo thei nasa lutuk.

"Baby, lo ding teh", ka ding a, ka hmaah tak a lo ding a, a tarmit la thlain,,"In bang chiah em ni?", nui sâng chungin a ti a. Ka bu nghauh nghauh.

Ka khûr leh dar dar tawh, ka ṭawng chhuak ṭha hleithei lo leh dawn. "Khawiah nge i ṭhian te?", a ti leh a, ka hnung lam ka hawi ringawt.

"An pên san leh che em ni? Lo kal rawh, ka va thlah ang che", a hnung lam a hawi zeuh a, Bible ka pawm nghet sauh sauh.

Ka theitawpin, "Ngai lo mai, ka haw thei alawm", ka ti zawi sap a. A hriat theih ka ring lo, ka ṭawng zawi em mai.

"In kawmthlangah khan ka lêng dawn a, lo kal rawh", scooty seat a beng dup dup. Ka chil ka lem khawlh a, ka chuang ta nge nge.

A sir zawngin ka ṭhu a, kawrfual ka ha chu ka inchhir lo teh e. Kan inkhawm bâng emaw, ka bazar emaw ka haw tur min hmuh chuan min thlah haw ngei ngei.

Keimah chauh ka ni chuang lo, kan class-a mi zawng zawng hi chu a phur vek. Ṭanpui ngai emawa kan awm a hmuha a hriat chuan, a inpeih at zel.

A tarmit a vuah ṭha leh a, Scooty tinungin a tlan ta a. School kan la ṭan loh vang te pawh a niang, a lu a buk chhap mai.

"Class-11 khawiah nge i kal leh dawn? A ngaiah em ni?", a au lung lung a, ka bu nghat nghat. Khawi School-ah mah ka insawn duh lo reng reng.

Class-8 aṭang ka kal ṭan ve a, amah vang liau liauin ka chhungten School danga min dah an tum pawhin ka hnial ṭang ṭang.

Kan in kawtah a ding a, ka chhuk thuai, "Ka lawm e", ka phun sap ringawt. Ka hmui phun aṭang a hriat ka ring tho.

"I pass ang em?", ka nui sak, en pawh ka en ṭha ngam lo. "I din dan aṭang reng te hian, Zirtirtu ni awm i ni", a khi suk zui a, "Va lut tawh rawh, nih aw", a ti a.

Kan kawm thlang chiahah tlanin a ding leh chawt a, a scooty hung ṭhain inchhungah a lut a. Ka thlir reng ringawt.

Inchhunga a luh hnu rei vak loah keipawh in te hawngin ka lut a, fan ka on nghal, a lum lutuk. Fridge hawngin tui ka la chhuak a, no-ah thliin ka in khawlh khawlh. Khawlum pawh a zia ta deuh.

"Result a chhuak hnai tawh sia, Bawihte, School dangah kal tawh ta che, School ngaia kal reng chu a ṭha lo zawk ang a?",

"Nu, school dangah ka kal duh lo, zirlaibu a inang reng a, school dangah pawh kal ila, zirlaibu ngai tho kan zir dawn a",

"Ni ve tho mai, Pathian zara i pass hlauh a nih chuan, school ngaiah i kal leh dawn nia, i duh tlat bawk si a", ka nuin a ti dam dup a.

Ka pass hlauh a nih chuan, school danga kal loin school ngaia kal leh ka duh. Angaihi leh Zuali ka la sawipui ang.

Anni hi chuan, School danga kal an duh tawh zawk a, mahse, kei chuan ka la duh lo reng reng.

Class-10 result a chhuak ta a, 1st-ah ka pass hlauh, ka lawm lutuk chu ka mittui a tla deuh reng. Kei ai aiin ka chhungte an lawm zawk emaw tih tur a ni.

Angaihi leh Zuali an lo kal a, kan inkuaha kan zuang vak vak, "Pshone-a hmu turin Thailand-ah ka kal dawn", Angaihi a au tuar tuar a.

"Ptop-a hmu turin Thailand-ah ka kal dawn", Zuali pawh a au tuar tuar. Hemi te pahnih hi chu aww.

"Aw, ṭhu teh u, ṭhu teh u", ka nuin a lo ti a. Khi ṭhaw hlawm chungin ṭhutthlengah kan ṭhu a,,kan che sek tho.

"Khawi school-ah nge in kal dawn?",,ka ti a. An school kal duhna an sawi a, "Nang chu a ngaiah", an lo ti a. Ka nui ver ver ringawt.

"Felicitation hun ka nghakhlel tawh e, ka va han inche nalh dawn tak",

"Awihawmlo e, uniform alawm kan hak dawn",

"Chu pawh nise, ka intinalh dawn tho tho", ka lu ka lo thing nar nar ringawt.

Class-12 result chhuah aṭanga kar khatnaah, Felicitation hun kan hmang a, kan classmate ṭhenkhat fail an awm avangin kan kim thei lo a, kan ngaih thu kan sawi liam liam.

Tuna pass-te paw hi, a ṭhen chu School danga lut tur te an ni nawk hlawm a, class-11 ah chuan kan darh vek tawh dawn, an va ngaihawm hlawm dawn tak em.

Kan Class CR-in min ko a, kan classroom hlui ni tawh turah kan awm khawm. Kan Assistant CR-in Chatuan Sweet a lo keng ṭeuh a, kut kan beng dur dur, a phur fal an au bawk.

"Tun aṭanga kum nga liam hnu Teachers' Day-ah, he School, he classroom ngeiah hian inhmu khawm leh vek ang u aw", Mr. Detective-an a ti a.

"Pawm thlap e, Sir", kan lo ti a. A nui hak hak. Class CR ka hriat tawh zawng zawngah chuan, a la fel ber ang, CR a nihna angin classroom a vawng ṭha a, a nau te ho hi min hrechiangin, harsatna kan neih pawhin min pui zel a.

A phawk ve thei lutuk te hi, kan hlimpui ber zel. A tarmit kar aṭanga mi a en kuau tawh erawh hi chuan, a lungawilo ve hle tihna.

"Sangsang, hetah i zawm dawn tak tak maw?",

"Zawm dawn, nangni pawh lo zawm ve leh mai r'u, class-12 chhuah thlengin kan kal ho ang chu", ka ti a.

An tel loa classroom-a ṭhut tur chu, ka huphurh ve reng. Pathian zara dama class-12 kan chhuak leh te a nih chuan, College kal ka tum tawh si lo.

"Mr. Detective-a vang mai maiin, i ho eee, ka school kalna turah lo kal ve leh zawk mai rawh",

"Awm tir mai mai rawh, College kal a tum si lo a, kum hnih chauh bak amah hnaih theih nan hun a nei dawn chuang hleinem",

"In sawi zawh tawh chuan haw ang u", ka ti ta ngawt a. Ka kalsawn nghal. A chang chuan, Angaihi leh Zuali ang hi nih ka châk ṭhin.

Anni chuan, a ruka duh deuh an nei pawhin, midang an hmuhin an lo duh hmasak te an theihnghilh leh mai ṭhin a.

Kei erawh, chutiang ka nih ve lohna tak hi a buaithlak ṭhin. Class-8 zir tura School chhunga ka pên luh hmasak ber ṭumin, Mr. Detective-a hian min be hmasa ber a.

Class-8 room-ah min hruai lut a, chutiangin class-8 zir ve tur ho an lo kalin a be liam liam a, a hming te a sawi a.

CR-ah a duh loh chung kan thlang a, mahse, a duty ṭha takin a hlen tho. Chuvang a nia, class-10 thleng pawha CR-a kan la thlan ngat ngat. Vui nâng nâng chung hian a duty a hlen chhuak leh nge nge zel.

A rukin ka en ngam ṭawk a, a rawng duhzâwng, a chawhmeh ngainat zâwng te, infiamnaa a ngainat ber te ka hre vek. A ruka ka chhui nasat zia kha.

Takin, keimah chauhin ka chhui lo, Angaihi leh Zuali hian min pui nasa lutuk. Anni chiah hian, Mr. Detective-a ka duh tih an hria.

A fel ka tih tawh kha, a nau te ho hi min ngaihsak ṭha lutuk a, min duh ta emaw tih te a awl lutuk.

"Naktuk aṭang chuan, kan School kalna a dang tawh dawn si a, ka va ngai dawn tak che u, Zuali phei chu, veng dangah a la awm daih dawn zui", Angaihin a ti nang nang a.

Zuali.pawhin,,"Min lo rel miah suh ang che u, chuti lo chu, ka lo haw tawh lo a ni mai", Zualin a ti a.

"Pshone-a te kan en ho thei tawh dawn si lo a", Angaihin a ti leh. "Kei deuh hian ka ngai dawn lutuk che u, Zual, Chawlhni hmang turin lo haw zeuh ṭhin la", ka ti a.

Zuali a bu nghauh nghauh. "Angaihi nen chuan, inkhawmnaah in la inhmu thei dawn tal a", Zualin a tih chuan, "I lo haw ṭhin dawn chu", Angaihin a lo ti vah.

Kan nui ho dual dual a, Noodles chhum kan hawp ri hruih hruih.

School kal turin ka insiam a, darthlalangah inenin, ka lu ka khuih hliau hliau. Ka tukkhumah ṭha fel deuhin ka ṭawn a, ka sam hi a sei lutuk lo bawk a, enkawl nuam tawk chiah a ni.

School ka thleng a, Gate hmaa Mr. Detective lo ding ka hmuh chuan, ka kal lai ka tawp chawt.

A dan pangngai tein, mi a lawm lut leh mial mial. A hnu deuhah, a ṭhiante hoin an lo dinpui a, a nui sâng a, a hmel a fai veng reuh bawk si, ka duhna a zual tawlh tawlh ni mai hian ka hria.

Ka lu ka thing nawk a, School chhunga lut tur chuan, Mr. Detective-a paltlang ngei ngei a ngai dawn.

"Baby", a kut a lo vai lauh lauh a, kaihza tha khûr der der chungin ka kal. Ka zâm thei lutuk leh, min biaka ka ṭawng chhuak thei lo ṭhin hi, a chhan ka hre tawh bik lo.

Ka ngaihtuahnaah chuan, min biak pawhin ṭha takin ka chhang ang a, khûr pawh ka khûr tawh lo ang tiin, ka mitthla vel ṭhin.

Mahse, a taka a lo thlen hian, ka ngaihtuahna ang pawhin ka che chhuak leh thei ṭhin bawk si lo, ka mangang ru thei a nia aww.

"Welcome, welcome", ka kut a thing vak vak a, ka nui sak ringawt. "Class-11 room i hriat kha, va kal la, va ṭhu chawl veng veng rawh", a ti a.

Classroom ka luh rualin ka thaw huai huai, a bula awm châk hle si hian, a bul hnaia ka awm hian ka thi lo chauh zel chu a ni bawk si, ṭhutna rem deuh zawngin ka ṭhu nghal.

"Sangsang, i va thleng hma em em", a ṭhenin an lo ti lut a. Roi ka bulah a lo ṭhu a, Mazeli a lo lut chiah tihah, min lo ko nghal a, kan bulah ṭhu turin kan lo ti vat.

"CR atan, Ramiel-a tho saw thlang ang u", Sawman a lo ti a. Kan lo 'aw' rang hlawm chiang lutuk.

Dar a ri a, Miss Diktei lo lutin, intriduction min neih tir hlawm a. A hnuah, "CR leh Assistant CR thlan nghal in duh em?",

"Aw, duh, CR atan Ramiel-a", Sawman ding chungin a ti thuai a. Mr. Detective-a chuan, "Het, ka duh tawh lo, ka hah ve tawh", a lo ti ve vat bawk.

Sawma leh Mr. Detective-a chu an inhnial fiam a, nui sen senin Mr. Detective-a chu ka en kar, bialnu a nei lo vang ringawt pawh hian, ka duh zual sawt.

Miss Diktei pawh chu, a nui uar uar. A tawpah, "Ramiel-a chu, CR atan kan duh em ni, midang ho khan sawi ve teh u", miss Diktein a ti.a.

Kan lo 'aw' dual dual. Mr. Detective-a chu a hui pap pap. Hneh takin, chuhpuitu awm loin CR-ah a tling leh ta.

Lehlam hawiin, a rukin ka nui var var a, ka bula ṭhu te hian min hre chhuak ang tih ka hlau lutuk.

A tihdan ngaitein, CR a nihna chu a tlin leh pap pap lutuk. Ṭawng buan buan a ching ngai lo a, âw dam deuh hian tu te pawh min be thei vek.

A hritlan hnarpin êm êm lai pawhin, school chawlh a nih ngawt loh chuan, School a rawn kal hrâm hrâm zel bawk.

"Lalzuali sual dan hi aw, Chawlhniah chuan lo haw turin kan ti ve em em a, min ngai lo khawp mai",

"Nakinah, kan la lêng dawn em ni ang?",

"A ngai lo, a induh lel lawl êm mai, class-12 pass vat vata, phone neih ve ka châk tawh",

"Lungngai suh, keipawhin ka la neih loh hi, class-12 pass hunah, Zuali nen, kan pathumin phone zawrhna dawrah kan lut ang a, kan chhungten phone leina tur min pek hmangin kan duh duh kan thlang dawn nia", ka ti a.

Kan nui dun hak hak, "Baby", ka hnung lam ka hawi a, "Khai, Mr. Detective chu le", Angaihin a tih zawh rualin, kan bulah a lo ding leh chawt.

"Angaihtei chu, va ngaihawm ngaih ngaih ve maw", nui huah huah chungin a ti a. "In bang chiah em ni?", a ti leh.

"Bang chiah e, i inkhawm ve ngai lo em ni?",

"Inkhawm ngai lo ila, ka hmelṭha dawn nang", nui suk chungin a ti a. Angaihi a nui hak hak a, keipawh ka lo nui ver ver.

Kan kawmthlang te inah a lêng leh dawn a nih ka ring. A papuia te in a niin ka hria, a ṭha hrim hrim tho, School loah pawh ka la hmu thei a.

"A ngaihawm mai mai e, CR a ni tawh awm si lo a",

"Ni lo e, CR a la ni alawm",

"E hee, van mak, a peih tawh viau lo maw?",

"Peih lo rap, Sawman miss hnenah a sawi a, thlawptu kan tam zawk bawk.sia",

"Ka khawngaih reuh e ah", Angaihin a ti a. Kan nui kur kur. Amah lo chu, CR atana ṭha ka hre lo. CR nih hi a inhmeh ngawih ngawih tawh.

Lehkha zir ta nâ nâ nâ chu, First Term exam hun kan thleng leh ta der a, Mr. Detective-a pawh a ṭang lutuk a, a hmai te a bawl.

A fel a, a hmelṭhat tel nen hian, engtin nge an duh thu hi an sawi luai luai lo zawk le, a mak ka ti ṭhin.

School-a inla ngeng deuh leh, suahsual chhuah te hi an duh luai luai zawk tlat a, kei chuan, chutiang chu ka duh ve thei lo reng reng.

Kei chu, Mr. Detective-a mize zawi tak, a duty hrechiang a,,mi hriatthiamna ngah tak, mi tu pawh be siam siam thei hi ka duh zawk.

Chu chuan, a lamah min hip ka ti mai, a hunah a tlawm thiam a, a hunah pa takin a che chhuak leh mai a, tarmit a vuah vang ringawt te hian, an zuam sual chawk.

Mr. Detective-a hi ka chik mah mah a ni, ka hrechiang lutuk ringawt. Mahse, an duh luai luai lo pawh hi ka lawm zawk, keimah chauhin duh ila, buaina pawh a awm lo ber ang.

Exam chawlh laiin Zuali a lo haw a, report kan inpe thlap thlap, bialpa te a nei vel a, Angaihin, "Va han chhe hawr hawr tak, kan hriatpui loha bialpa te i neih", ti pahin, a beng hlak hlak pah a.

"First love a chhuak tawh dawn e", Angaihin a ti a. Kan ṭhu ṭha nghal sauh sauh.

"Sangsang, i First love chu Mr. Detective hi a nih duh hmel, kum li i duhna a ni tawh, a rei ngat ngat e", Angaihi a phun sap sap a.

"Nih duh hmel ni loin, a ni tawh reng zawk alawm,,kum li em em chu, a em em e, kei chu, kum li chu sawi loh, a rei berah ni li, ni li hnu aṭang chuan ka duhna a bo vek zel", Zuali pawh a phun sap sap.

"Tiang hi, one sided love an ti ṭhin bawk tiraw, ka khawngaih che e",

"A hreawm ngawt ang, mahse, kan la naupang a, nakinah chuan a la theihnghilh chho ve zel mai ang", an pahnihin an phun sap sap a.

Ka chungchang sawi hi chu, nuam an ti thei e, a hma chuan ka ngei thei lutuk a, mahse, tunah chuan nuam ka ti tawh.

"Mr. Detective-a hian a rukin lo duh ve se, Pshone ang sawn, awiii, a nuam dawn lutuk", Angaihin a ti lang lang.

"I suangtuahna kha a uih", Zualin a lo ti hlak.

"Mr. Detective-a Sangsangi te kawmthlanga a lo kal ziah te hi, chhan a awm ngei ngei ang",

"Mr. Detective-a papuia te alawm", Zualin a ti leh. A buaithlak ṭhin teh e.

Top-an Nam-i lenchhuahpuiah a sawm vel mek tihah, "Pa, pa, Ramiel a accident a nia, pa", ka thin a phu dup dup a, ka ṭhu ngil awt nghal.

"Sangsang", ka chapal ka bun ṭha sauh sauh a, ka tlan chhuak nghal vat. Kawngpui ka thleng a, Mr. Detective-a an lo mut zangthal tir ka hmuh chuan, ka ṭhu thla hnawk.

Helmet khum mah se, a biang thlaah te chuan thisen a luang ngiai ngiai a, a mit an lo chhintir tawh a, mitthi tih a hriat ngawih ngawih, Mr. Detective-a chu, mitthi a ni tawh!!!

"Ramiel, Ramiel, harh teh, Ramiel", an ko vak vak a, ka rilruin ka ko ve mawlh mawlh bawk.

"Sangsang, intipachang rawh, mi an tam em hi", Angaihi leh Zuali ten min kaitho a, anmahni rinchhanin ka ding ve ṭawk ṭawk.

Truck nen an insu a, Police motor leh Ambulance a ri vû vû a, Mr. Detective-a chu Ambulance chhungah an chawi lut a. Nunna a nei tawh lo tih hriat takin, a kut pakhat chu zawi hnuangin a tla thla a, ṭha takin an dahsak leh.

Mi an kalsawn hnu vek pawhin ka la awm char char a, Angaihi leh Zualin min awmpui.

Ka la awih thei lo, ka mumang a nih te ka ring rum rum. Ka biang a lum thla pap pap a, ka mit a vâi ruai bawk.

"E he, saw saw, Mr. Detective-a tarmit kha a ni em?", Angaihin a tih chuan, tarmit let reng chu ka va chhar nawlh.

Ka thlêk vang vang a, Mr. Detective-a tarmit ngei kha a ni. A darthlalang veilam a lo keh a, ka mittuiin a far khum fap fap.

Mr. Detective-a tlaivarpui a ni a, kan class CR a nih avangin, uniform hain, Pawndum awrhin, kan call Teacher hoin a ruang chungah thla kan la a.

Angaihi leh Zuali, School danga lo kal ta te pawh, a theih theih an lo kal khawm bawk. Mittui dan hrâm hrâm a ngai a, a harsa lutuk, a chang chuan ka dang zo lo a, ka hru thuai zel.

Mr. Detective awm loh hnu aṭang chuan, ka ruak huai hian ka hre mai, classroom te, School te, kan veng leh kan in ngei te pawh chu, a ruak ngawih ngawih.

A bikin, keimah, engmah ka ngaihtuah thei lo. A thih thu hriat ai chuan, bialnu a nei tih hre zawk ila, a nih loh pawhin, nupui a nei tih te hre zawk ta ila, thihna kher hi chu, a tawp chiang êm a ni!

Engtin tin emaw, exam te ka paltlang ve leh zel mai a, class-12 classroom-ah ka ṭhu ve vang tawh mai.

Mr. Detective-a awm tawh lo mah se, school ngaiah ka la kal a. A chhan chu, kan School Hall hmaah, Mr. Detective-a thlalak an tar vang a ni!

Min la uap reng hian ka ngai ṭhin a, a chang chuan, a thlalak ka en vang vang hian, min lo nuih ang te hian ka hre ṭhin, ka va han ngai tak êm.

Chawngmawii leh Hrangchhuana Thawnthu kan zir te chuan, Mr. Detective-a ka ngaihtuah chhuak lo thei lo ṭhin lo.

Arsi-ah changin, Hrangchhuana angin min lo nghak ve reng ta se, a va nuam dawn tak em.

Tukverh ka hawng a, Van lam hawiin, Nam-i angin Arsi pe phut chu 'Ramiel' tiin, ka thaizawm a, Mr. Detective-an min nuih suk lai hmel ang te ka hmu.

Ngaihtuahna mai pawh ni mah se, a va hlimawm si em.

Class-10 leh class-12 Felicitation hun kan hmang a, Mr. Detective-a hming Zirtirtu ten an lam ngun asin aw.

Hall-a ṭhutna chanve dawn hi, Mr. Detective-a puala a chhungte lo dah a ni a, tuna ka ṭhutna mek pawh hi. Ka sawi kha, khawi hmunah pawh awm ila, Mr. Detective-a hian min uap reng a ni.

Hall hmaa Mr. Detective-a thlalak chu ka en a, "Kum nga hnuah ka lo kir leh ang, min lo nghak rawh aw, i duh ang ngeiin Zirtirtu ka ni ang, chuan, he School-ah ngei hian ka thawk bawk ang, i awmnaah hian", ka rilruin ka ti mawlh mawlh a.

"Chuan, kan School hluiah chuan, Zirtirtu hna i hmu ta a", Angaihin a tih chuan, ka nui sak.

Ka thaw huai huai a, a tawpah chuan, a tawpah chuan ka tithei ta. "Teachers' Day thleng tawh se, Classmate hlui ho hmuh an chakawm tawh", Zualin a ti lang lang.

"Teachers' Day thlen nan, thla thum chauh lawm awm tawh", ka ti a. An nui ver ver.

School kal turin ka insiam a, ka lu khuihin, ka tukkhumah ka ṭawn a, Mr. Detective-a tarmit la chhuakin ka vuah a, a darthlalang veilam ka siam ṭhat tir a, tunah chuan, ka tarmit a ni tawh.

Hall hmaah dingin, Mr. Detective-a thlalak chu ka thlîr vang vang. "Mr. Detective, ka duty ka hlen chhuak ta e, min lo nghak rei em?", ka phun sap.

Ka kut la kangin thlalak chu ka khawih zeuh, min chibai lai te kha ka ngai vawng vawng.

Mr. Detective-a ka tih chhan chu, Class-8 ka kal ṭan tirhin, monthly fee ka tibo a, Mr. Detective-hian min zawn pui ngat ngat a.

A tawpah, amah vangin kan hmu let a, mi zawng zawngin 'Sangsang' tia min koh laia, Mr. Detective-an 'Baby' tia min koh chhan pawh, ka pawisa tibo mangang lutuk ka ṭah vang kha a nia.

"Hetiangah an ṭap ngai lo, Sweet ka pe ang che, Baby chiah chiah i ni lawm le", nui sâng chungin a ti a.

A kekawr aṭang sweet la chhuakin min pe tak tak. Mr. Detective, ka ngai lutuk che.

One sided love an tih hi a awm thei ngai em ni? Awm thei tehreng e, tupawhin, hmangaih kan nei ṭheuh alawm. Kan hmangaihte lahin, kan hmangaih tih pawh an hriat loh hi.

First love hi a awm em ni, theihngilh tak tak theih a ni em?

A chhanna chu, "Awm e, First love a awm tak tak, tupawhin First love kan nei vek.

Theihnghilh tak tak theih a ni lo bawk, tumahin kan First love te kan theihnghilh ngai lo", tih hi a ni e.

"Mr. Detective, hna thawk ṭan ila", ka ti sap a.

***Thinlung aṭanga chhuak Hmangaihna hi a mawi a ni***

A Tawp Ta