ROMANTIC BUS

[Alora hmar]

Ka chuanna city bus tawt lutuk ah chuan tluk mai hlau lutuk in seat leh seat inkar a ding in seat a vawn tur awm chu ka man bet ran reng a,ka vawn chhan nal ru deuh bawksi leh bus break leh thut thut ṭhin vang chuan ka kat leh deuh nak ṭhin.

"Awii ka nu" Ring zet a ka tih rual chuan bus chu a che luih a,hma lamah ka bawk thlawrh dawn emaw tiin mit ka chhing nghal vak a,mahse hnunglam a ka bag ah hmang a hneh lutuk a min rawn pawt let dawrh tu an awm avangin ka hnunglam a ding zawk chu ka nek ta rawk rawk zawk a,ka au ring bawk nen bus a chuang ve dang te chuan min melh deuh ṭhup in ka hria.

Zak chung chung in ka tlu tur min lo pawt let tu hmuh tum chuan ka lehhawi riai riai a,school naupang pakhat hian nuih zat hmel zet a min lo en in bus chunglama vawn tur a an siam chu a melh chho zauh a
"I vuan pha na nge?" Ti in a ha var rual zet lang ṭha chuan min lo nuih a,ner deuh nang chung a
"Pha ve nang" zawi leh uar tak si a ka tih chuan
"Ka lo vuan bet tlat tawh ang che" Ti leh in in vawn tan nan a a hman loh lam zawk chuan ka bag a rawn vuan a,ka lo nuih let ringawt tawh.


"Tah khuan zu ṭhu rawh" Ka hnung a ding pa chu ka beng bulah a rawn phun sup a,ka melh rual in a zawn chiah a ṭhutna awl pakhat chu a kawk zauh a.

"Ṭhu zawk rawh...stand dawtlehah ka chhuk tawh dawn tho a" Ka tih chuan

"Keipawh ka chhuk ve dawn tho a lawm...ṭhu rawh" A lo ti ve tlat thung a,ka ke a kham tawh bawk nen ka tlawmngai duh ta bik lo.

A school form pheikhawk siai pek ṭhan tih hriat zet a tliang deuh hlarh chu ka en reng a,a kekawr pawh tuktin nawh ṭhin tih hriat zet in a ki van bawk,a sang reuh bawk nen a tukkhum kawng mul mai hmu tur chuan dah deuh vah a ngai a,a bag ah lian leh puar lutuk te chu bus tawt zetah chuan a hnawk tham fu in ka ring.


Ka chhukna tur a bus a din rual chuan ka tho chhuak nghal vat a,kan chuanna bus a tawt bawk nen chhuk chhung pawh a rei deuh.

Bus aṭang a ka chhuah rual a kawngpui chhak lam step a mipa tlan chho mek chu en in "Hey" Ti in ka au zui vak a,rang zet a a rawn lehhawi chu lo nuih var var in
"Ka lawm lutuk aw" Ti a ka kut ka vai zauh rual chuan rawn nui let ve sak in "Keipawh" Ti in a tlan chho leh nghal hlawk hlawk a,keipawh tlai mai hlau lutuk in college lamah hmanhmawh zet in ka kal ve nghal a.


Kar khat a liam a,nitin bus ka chuan a piang in kha school naupang kha ka zawng ru ta ziah a mahse khami ni bak kha ka la hmu leh miah lo thung. Hmuh tawh loh atan a ka ui em avangin an school form ang ha mipa rual ka hmuh chang phei chuan 'A awm ve mial takin' tih rilru pu in ding chung meuh in ka lo thlir leh vang vang ṭhin a. Mahse ka mi zawn erawh zawn loh ang hlauh in chan ruk ran ran reng pawn hmuh tur a awm ngai si lo.


"Dam maw" Ka bul a rawn ṭhut pah a tu emaw in a rawn tih chuan pawn lam thlir a ka dak vauh vauh chu ka lehhawi nghal zawk ka,ka rin loh lutuk mihring ka hmuh vang nge ni dawn ni ka taksa pumpui chu a lum chhuak nghal pup in ka hria.

Lai hmel zet in a nui sun sun a,kan hma a seat nghen chhan chu a kut lehlam a vuan in min melh ve reng a,chutah nuih let ve in "School i van kal khat" Ka ti ve ta ngawt a,a school kal leh kal loh hre ngai hlei lo in chutiang thil ka sawi chu sawi sual in ti rilru zet in "I va vang" Lai zet in ka ti leh hnuhnawh a.

"Min zawng ṭhin chiang" A tih chuan rang zet in
"A awihawm loh" Ka lo ti vat a,a nuih suk rual chuan ka lo nui ve leh ringawt. Lai leh lai in biak chuan za hlei lo in kan nui kan nui mai in ka hria.

"Vang min tih si" Ti in min melh nghal ran a,chhan let mai dan tur hre lo a ka awm chu nuih zat hmel zet in mit min lo kan khum uk a "Ka hmuh ngai loh vang che lawm" Ka tih rual a "Kei chuan ka hmu ziah che a sin" a lo ti chu awih lo zet in ka nur khum nang a.
"A ni lawm le..nimin pawn kawr sen zet i ha a,i lansarh viau kha" A tih chuan ka nui ri deuh hak a.
"Ka van hmu ve lo che"

"Hnunglam hawina chang hre ṭhin lang chuan nitin min hmu ve mai tur" Ti tu chu chhan zui ngaihna hre lo zet a nuih let chung in tukverh lam ka hawi san ta daih a.

"I number min lo pe" A rawn tih chuan ka lo phu leh deuh zawk tawh.

"Nga tan...aah,phone i nei a mi?" ti in a lam ka hawi a,lungawi loh hmel fe a nur nang in
"Phone nei lo rual ka nia mi?" A lo ti let ve a,ka nuih leh ringawt lai in "I phal lo a mi" A rawn ti leh khauh a.

"Phal e..a hek hlei nem" Ti a ka number sawi mai ka tum lai chuan "Lawk aw" Ti in a bag aṭang note bu te leh pen hring a la chhuak a. 'Sawi rawh le' min ti ni awm takin ziak tur a a in rin hnu chuan min melh deuh rulh a. Bus tlan lai a chuang kan ni bawk nen a number ziah chu a lang mawi lo hle lehnghal.

"Tunge i hming?" Kan sawi rual chiah avang chuan kan nui dun nghal hawk a.

"Benjamin" ti a min rawn en leh rual chuan
"Remremi" Ka lo ti ve vat a,kan nui leh ringawt ṭhin chu a chhan ka hre lem lo na a nuam erawh ka ti hle thung.


"In ka thlen hunah ka rawn be dawn che nia aw" A zak hmel thup tum tak a a tih chuan nuih var var chungin
"Yess" Ka lo ti zangkhai vah a. Chumi rual chuan
"Helam ah hian ka peng dawn a,a nih phawt aw" Ti a ka kal lohna tur lam zawk a a kal zui nul nul chu ka thlir zui reng a,ka chhungril lam a engemaw riauh awm chu ka hmuh loh avang a engtin emaw ni ka awm ṭhin ai kha chuan a thawh dan a dang a,thil ṭha tak nei ang mai a hlim in ka awm ni ber in ka hria.

An in chu kan in ai in a hnai zawk fe a ni ngei ang,in ka thlen ve hma daih in message a rawn thleng a. A message chu seen a,a dp en chian te a number save ve nghal te chu chak viau mah ila in thlen hunah hahdam tak a biakah khek in hmanhmawh zet in ka kal zui hlawk hlawk a.


Ṭhian ṭha leh tun hma aṭang a lo in hre tawh ṭhin kan nih miau loh avangin sawi dun tur kan hre lem lo a,sawi tur ngaihtuah chung a in bia kan ni nge mawni kan in chhang zung zung hran lo a mahse nuam ka tihna erawh a nep phah chuang lo.

A dp chu ka en nawn sek a,a chang leh ka zoom thul. Ui lian pui hmul ngah leh buang thuk mai bulah ṭhu in hlim hmel zet in a nui sang a,ui chu a kuah bawk. Tshirt var leh kekawrbul a ha a,ka en zin poh leh ṭha ka ti zual tulh tulh mai in ka hria a,ka tih ang chiah a a lo tih ve ka hlauh avangin ka dp ah pawh langṭha ka in tih berna ka hmang hnuhnawh leh vel a.




"Remrem" Bus stand ka thlen rual a ka hming ngei a min lo au tu lam chu ka hawi nghal vat a,uniform dak ṭha zet a ha a,a pheikhawk pawh a dum tliang nalh lehpek hle. A bag hrui chu a kut pahnih a vuan in a ding tlawn zuah a,a san em vang hian a ding mai mai pawh hi a model zuih in ka hria.

"Min u dawn lo a?" A bul a din pahin inla upa zawk zet in min ka kan khum ak a,nui deuh suk chung in
"Kei ai te ka u ngailo" A tih chuan hnar tih sawih khum vak in

"I nu pawh maw?"

"Tunge mahni nu te u ngai" A tih chuan kan pahnih chauh a awm ang mai in kan nui dun leh chiam a.

"In lo chuang dawn em?" Bus conductor in dam dup a a rawn tih chuan rang zet in bus ah chuan kan lut a,ṭhuthna a lo awm hlauh bawk nen midang in min ṭhut khalh ang tih hlau zet in tukverh bulah chuan ka ṭhu nghal sawk sawk a,Benjamina erawh in kan hnung chiah a patling rawn lut chu ka bul chiah a ṭhu tur a lo kawhhmuh in a ding ta zawk a,chu tiang a a tih vang te chuan ka lo hmu pa em em ringawt a nih chu. Bus chu rei vak lo ah a tlan chhuak a,stand hmasa ber kan thlen chuan nutling leh patling rawn lut an awm nuk a ṭhalai deuh zawk ṭhutna nei te chuan kan lo kian sang sang hlawm.

City bus ah hian mizo nun ze mawi leh ai a upa zahna hi a lang chiang ṭhin ka ti,ṭhalai zawng zawngin nachang hre vek lo mahila a tam zawk chuan kum upa zawkte ṭhutna ken nachang kan hria a,upa ho pawn tlawmngaih chhuah in ṭhutna kian tu te hnar der ve ṭhin mahse ṭhalai zawk an han ding sang sang ṭhin hi chu nuam an ti ru ve ṭhin ngawt in ka ring.

"Hetah rawn ding rawh" Ti in min lo hui zauh a,kawngka bul maiah a ding a a hma chiah ah min din tir in ka tlak palh hlau ni awm tak in kawngka a vawnchhan awm chu tlak dal tur zawng a in vawn nan a hmang ran a,keipawn chu tho chu in vawn tan nan ka hmang ve bawk.

"Ṭhut ai chuan a thaw nuam zawk daih a nih hi" Ti in ka sam thli in a chhem len vawk vawk chu ka in vawn tan lohna lam zawkin ka huih ṭha a.

"I tla tep a nge,in vuan nghet rawh" Ka hnung a mi chuan a lo ti vat.

"Ka tlak vaih chuan ka pawt tel ve dawn che nia" Ka tih chuan a lo nui ri hawk a.

Kawngka bul a ding kan nih miau avangin stand a bus a din rual chuan kan chhuak nghal vat a.

"Lal Ben" kan bul lawk a hmeichhe ding in a rawn tih rual chuan ka bul a ding nen chuan kan hawi rual nghal ṭhawt.

"I va tlai ve" Benjamina'n a tih lai chuan a hmeichhe biak chu ka lo en chik hle. A form hak aṭang chuan an school luhna a in ang tih ka hre thei a,an thil sawi dun dan aṭang an in classmate tih a hriat theih bawk.

Bus a kal leh dawn tawh avangin kan pathum chuan kan in zui lut a,chhuk an tam tehreng nen a hnung ber a kan luh vang nge ṭhutna pakhat chauh a lo awl tawh a,Benjamin leh a ṭhiannu chuan ṭhu tur in min ti ve ve a,tlawmngai a a ṭhiannu zawk ṭhu tur a ka ti ve tlat chung pawn ka hnial hneh loh zawk tak avangin ka ṭhu ta zawk a.

Ka bul mai a ding te chuan eng eng emaw an sawi zui dun reng a,an in pawh hmel in an in hriatna a rei tawh tih a hriat hle. An thil sawi karah chuan an nui dun leh hak hak ṭhin a,kei chu min ngaihsak zui ve tawh lo reng reng.

Ni reilo te bak ka la hriat loh ka star ruk em em leh hmeichhia tunge a nih pawh ka hriat loh inpawh deuh a an ti ti na hmun a lo awm ve reng chu nuam ka ti lo a,ka thik ru deuh tlat in ka hria. Ka starpa lah school naupang mai a nia,kei erawh BA 3 semester zirlai college kal mek ka ni thung a. Kei ai naupang zawk mipa ka star ru tlat chu nge buaithlak ka tih a,hmeichhia nen a an titi reng zawk chu niang aw.

"Ṭha deuh in lehkha zir rawh aw" Bus aṭang a kan chhuk hnu chuan min be ve ta hram,chhang lo in ka nuih let ringawt.

"Tunge a?" A hmeichhe kal puinu in a tih ri chu ka la hre pha a,a chhanna erawh ka hre zui ta lo.

Mihringte hian hmel duh zawng leh mize ngainat zawng kan nei ṭheuh a,chung ang mi kan tawn chuan hun rei pawh nghah ngai lo in kan mi tawn te chu kan nun a mi pawimawh tak ang mai in rilruah an awm reng tawh ṭhin. Benjamina pawh hi a mizia chu ka hrechiang hauh lo na a,a hmel leh a lan dan in ka mit a lak em avangin ka vawikhat hmuhna aṭang ka chhinchhiah nghal a,hun reilo te chauh la hre mah ila ka tan enge maw nih tir ka tum vang te pawh a ni mahna keimahah hian danglam bikna riauh a nei a,ni e a danglam bik chiang a lawm.


Classah te chuan ka ngaihtuah zui reng a,hmeichhe dang a biak vang ringawt te khan ka lo hlim lo ve ringawt chu a nia. A changin ka in ngaihtuah lungawi lo a,a chang leh á in ti zet in ka in nuih leh lairih ṭhin..he naupang hmelṭha zet hian ka thluak a ti buai tih chu phat rual a ni lo.

A nui hmel ka mitthlaah a rawn lan rual in ka nui ve nghal a,kan in hmuh hmasak ber ni leh nimin a kan in hmuh leh hlawl dan te,kan in biak zui dan te ngaihtuah in ka rilru ka kawm melh melh reng a. Tunah hian enge a tih ve mek ang,min ngaihtuah ve tho a ngem? Tih te thleng a ngaihtuahin ka rilru chu a vak kual ruai a ni ber.

A mak ka ti,mihringte hi kan duh zawng tak kan tawn avang a kan thil ngaihtuah tam sawt zia hi. An duh zawng leh ngainat zawngte hriat sak kan chak a,kan be chak em em reng a mahse kan be zak tlat lawi a,hmuh kan chak em em lai in han hmu ila kan lai leh ṭut bawk a. Hringnun a mi danglam rawn lang ve hlawl ṭhinte hian hriat ngai loh ram min fan pui ṭhin vang a nia nge he ti tak a mihring rilru leh chet phung a danglam kual vel ṭhin ni.


Class kan ban hma ni a nih avangin keipawh hma deuh ah ka haw a,school naupang ban a la hun loh avangin tu emaw hmuh tum in ka hawi kual ruai hran lo.

"In bang hma a mi?" zan riah eikham a phone ka en rual chuan message tam tak zingah a lo langsar nghal nalh a,nui ver ver chung a open in "Aw,nilai hi kan ban hma ni a nia" Ti in ka reply a.

"Nilai ah chuan kan haw rual thei ṭhin dawn lo ni maw" a message chu chhiar in ka nui leh sak a,ka reply hma in

"Naktukah ka lo nghak leh ang che aw" A rawn ti leh a.
"Kal pui tur dang i nei si" Tih thawn tum a ka type zet tawh chu deleted leh in "Yessii" tih zawngin ka reply ta zawk a. Dik tak chuan khanu kha ka thik ve ringawt chiang a lawm,mahse ka thik tih hriattir tur khawp in kan la in be tam tawk bawksi lo. Ti tak a a lak a ka thikthu chhe ve nghal ngawt hi mak ka ti zawk e a. Ka message chu reply kher ngai a ti tawh lo nge ni a reh zui ta daih a,keipawn ka ṭhiante ka biak chhunzawm ve nghal zat bawk.

School naupang ka star tih an hriat avangin "Duh naupang" Ti in min fiam laih laih reng a,ka ex chungchang an sawi thar hlut bawk. Class 12 ka nih lai khan kan class a mi bialpa ka nei ve ṭhin a,mahse zei lo chi leh thikthu pe chhe ve bur chi ka nih avangin min ning vat nge ni kan in ngaizawng rei lem lo,chu ta ṭang chuan bialpa ka la nei leh ta miah lo a mahse bialpa hual ka nei mek thung.



Ka mipa duh chi hi sang zen thlarh,ngo leh hmel lang felfai chi an ni tlangpui a. "Korean mipa ang chiah i duh" Ti in ka ṭhiante pawn min fiam ziah zel. Keimah hi te chhe lo mahse lian lem lo ka nih avangin mipa sang deuh hian ka mit an la ve hrim hrim a,fresh deuh ka duh ṭhin avangin ngo lam hi ka duh tlangpui bawk.

*Vawin chu romantic bus ah ka chuang haw lo* Benjamina status chu en in ka nui deuh hak a. A status ka view zo chiah tihah a message a rawn lut zui nghal.

"Bialpa te i nei ve ṭitṭet em?" A message avang chuan ka nui leh ringawt tawh,hepa vang hian ka va nuih tam phah tak.

"Ṭitṭet lo"

minutes tam fe a liam hnu pawh a ka message a reply tak miah loh ah chuan beidawngin ka mu zui ta daih a.Mut hmun ah chuan
min duh ve chiang
min duh lo se khatiang zawhna min zawt lo ang.
Mahse tinge min reply loh le

Tih vel ngaihtuahin ka in let kual chhen a,zing ka thawh in ka mit a kham ṭhum phah.

"Good morning...bus stand ah ka lo nghak ang che" Ni zan a kan thil sawi chhunzawmna awm miah lo a min rawn wish na chu ka en vang vang a,beisei ka neih san ve tawh tehreng nen a rawn sawi zawm leh miah si loh avang chuan reply peih lo in ka thawh san ta daih a.

Min lo duh lo a nih pawh in min duh ngei theih nan ṭan ka la dawn khawp tih rilru pu in tuk dang zawng ai in ka in uluk a,ni dang a ka hak peih vak ngai loh kawrfual senno khup khuh zan chu ha in khawlum chung chung in ka sam te chu ka thlah hnap a,make up pawh ka bei uluk hle.

"Ha ziah rawh,i in hmeh ka tih ka tih kha" In aṭang a ka chhuah dawn a kanu in a lo tih vang te chuan ka confi zual sauh lehnghal.

Nimin a a dinna ngai tho a a lo ding leh ka hmuh rual chuan ka in huih ṭhat leh te te hnuah ka pan phei a.

"Min nghak rei tawh em?" Ka tih rual chuan min hmu ve chiah in ka hria,min en deuh vung vung hnu ah

"I vaaa...i va mawi hnilh..hnelh ve" A tih chuan ka lo nuih seih a.

"Len pui tir i nei a mi" Bus a kan ṭhut luh rual a a tih chuan.

"Nei mai mai lo" Ka lo ti hlak a.

"I vul em a" Ti in a nui vur vur a.

"Chhelo min ti viau suh" Ka tih chuan lo khi ve suk in.

"I chhelo ve em a lawm leee" A lo ti khauh a,in thup tum viau mah ila ka lai nghal ngar ngar hle.

Ka in chei chhan pa ber in nalh min lo tih tak viau si ah chuan nuam ti zet in nileng hun ka hmang a,ka ṭhiante pawn "Khi reng'i" min ti ringawt tawh.


Benjamina nen pangngai tak a kan in biak aṭang thla khat dawn a liam ve tawh a,belhchian a dawl in a bul a awm a nuam hle. Mipa rilru puitling leh poilte tak a nihna phenah naupangchhiatna nei ve bawk mahse a rilru a ṭha in a zaidam em em a,a lan dan a pian leh a hmelṭha tak ang pawh hi nei kher lo pawh ni se ka mipa ngainat zawng tak a ni dawn tho tho tih ka chiang. Inngaizawng ti a sawi theih ni silo in ṭhian nihna piah lam in kan in ngaina a,kei phei chuan a tir aṭang a ngaizawng ru sa ka nih avangin thikna ka ngah a,ti lang in sawi chhuak ngai lem lo mahila hmeichhia nen ka hmuh dun te hian hlim hmel hmuh ṭha duh lo a,a message tak ngial pawh reply duh loh te ka ching ṭhin. A ni erawh a la ngai reng in ka hre ṭhin thung a,min ngaizawng a niang ti in beisei pe sang ve deuh dawn ṭhin mah ila kan in biak dan leh nun phungah hmasawnna em em sawi tur a awm lo a. Nitin bus hmang in kan kal rual ziah a,tlai lam ah kan ban hun a rual changin kan haw dun leh a,zan tin kan in be ziah bawk. Hmeichhia zawk ni si a a lak a ka feelings ka thup theilo lek lek ṭhin hi buaithlak ka in ti a,pehhel a biak tam loh tum viau pawh ni ila ka ngai leh tho ṭhin bawksi.


"Vawin ah i bike chuang lai ka hmu a" A message chu en in ka nui sak a. Ka ṭhian ten a thik tur in awm rawh an tih avangin ka ṭhianpa pakhat bike in ka in thlah tir a,tum ang ngei in min lo hmu thlap a nih hmel.

"Nia..min thlah haw a" Nui pat pat chung in ka reply a.

"Bus ai chuan a nuam zawk daih ang" A message rawn thawn chu kan ṭhian ho group ah ka share chhawng ve zel bawk nen ka reply zung zung hran lo a,ka ṭhiante zawk chu an za cheng in ka hria.

"A thengthaw zawk a" Emoji ṭhen sang nen ka reply na chu a seen rang hle.

"Keipawn bike chu ka nei ve" A tih chuan lawm lutuk in ka ke ka leng nghal vak a,thawm ka siam mai ang tih hlau in ka hmui ka hup bet tlat bawk.

"Naktukah chuan bike in kan kal ve tawh dawn nia" Tih a rawn thawn leh te chu hlim pui vur vur tak hi ka ni.

"Licence i nei a mi?" Tih ka thawn let ve chuan

"Kum ka tling tawh" Tih ringawt in min reply a,zan a rei tawh bawk nen chhang zui tawh lo in ka mu ta daih a.


Zing ka harh vel a phone ka en chuan a message a lo awm leh va tawh.

"Morning"
"In in ah ka rawn lam ang che,kawngpuiah min lo nghak la" thawhphan pawh awm lo in ka nui var var, mood fuh zet a tho in ka che zui sarh sarh a.



Phone a ken dawn miau loh avangin an in aṭang a a rawn chhuah dawnah min hrilh lawk a,keipawn kawngpui ah ka lo chang ran bawk.

School uniform ha a bike dum nalh leh tliang zet a rawn khalh rik vut vut meuh chuan pa hi kan ti zual mai mai khawp ah,a lang tlangval sawt ten ka hriat phah hial.

Ka chuang ang a kan tlan chhuak mai dawn a maw ka tih lai in a helmet phelh in a mah chu a rawn chhuk zui nulh a. Bike ngheng deuh run a ding in a hma a ka lo ding sawi ve reng chu nem lem lo tak hian min en run a. Ka chhungte tukverh a an lo dah leh dan lo ka en chuan tumah an lo awm lo hlauh a ka thaw huai mai. Kan in awmna hi a mawng ve a,dawr awm lohna lai takah kan awm lehzel bawk nen ka chhungte ber an rawn lan loh chuan venthawn tur dang a awm lem lo.

"Bike lawmnu" Bul zet a a ti chhuak hluk chu ka nuih pui hak.


"Bike a i chuan chak te chuan sawi ve mai ta che" A ti leh sup chu en deuh ran chung in "ka chuang chak kher lo" Ka ti deuh hlak a.

"I chak a niang chu niminah pawh i chuan " A lo ti leh chu melh deuh haw in
"Bus ai chuan a thaw nuam zawk a,ka in thlah tir ve ni mai aaaaa" Ka ti deuh vak a.

"Kei chuan nangmah nen a bus chuan hi nuam ka ti zawk...bike vel ai chuan" Zawi deuh ruih a a tih lai chuan ka lo ngawi kar a,min melh leh run chung a "I ti ve lo mi?" A rawn tih leh vut takah chuan chhan loh chi ni tawh bik hek lo "Ti ve e" Lai ru zet in ka lo ti ve a,lawm hmel zet a nui chung in ka pheikhawk bawk chu a melh leh daih a,chu tah zawi thum deuh ruih hian
"A ṭhat chu,nangmah nen chuan bus tawt zet a kan chuan pawn a romantic tho ka ti" A hmui liak hnawm zauh in a chung lam chu a pet pah zauh a. Ka lo nuih ringawt chu chiang zet a min rawn en leh in
"I la single em?" A rawn ti leh thut a,ka in rin hma in ka taksa chu a lum chhuak leh pup in ka hria.

"Gle e" Zawi zet a ka tih chuan

"In ngaizawng daih ila" Ti in a tukkhum a tuai thuak a,lo melh deuh haw chung in "Ti tawp hian maw" Ka ti deuh ha a.

"Ni mai ..in kawmthlangah ngei hian sawi fel teh ang" Ti in kan in lam chu a melh zauh a.

"Ka zei hran lo,mahse ka duh riauh che" A ti zui leh a,ka rin dan lo lutuk a a awm vang nge ni chhan ngaihna hre lo in ka hawi deuh lawl lawl tawp tawh.






"Kal phawt teh ang" A sana bih zauh pah a a tih takah chuan ṭawng tum a ka ang zuau hman tawh chu ṭhulh leh in bike ah chuan ka lawn zui a.

"Min duh loh pawn in thlahrung suh,ka duh char char dawn tho che nia" A tlan chhuah hnu a a rawn tih chuan a hnung a bei kak chung in ka nui var var a.


"Benja" Bike aṭang a ka chhung rual a ka tih chuan
"Bena te ti ve mai ṭhin la" A lo ti leh bui bui tawh,kan in nel deuh hnu aṭang khan "Benja" ti a koh hi ka ching a,duh lo viau mahse tunah chuan tiang a koh hi ngaiah ka nei der tawh.

"Tlaiah min phur haw leh a ngem?"

"Min duh loh chuan ka phur haw peih lo che" A lo ti deuh hmuk a.

"Ka duh char char dawn che i tih kha" Ka tih hliai rual chuan min en run pah in "Min duh lo a mi?" A ti bul lehnghal hmuk a,nui deuh hau a en chung a
"Duh e" Amah ang chiah a bul a ka tih ve rual chuan nui ri hawk in "Nih chuan ka kal dawn,tlaiah chuan sawlai step thlangah khan ka lo nghak ang che"ti in a bike chu a turn a, biak lehna hman pawh awm lo a an school lamah a tlan chho zui daih chu ka en zui vang vang ringawt.


Thil thleng mek leh thleng leh tur suangtuah vel reng reng in classah pawh chuan ka ngaihtuahna bawk ka kawm zui leh a. Duh zawng tak ngaihzawn nih chu a nuam in a feeling hi a hlimawm veng veng a,mood hi a chhe thei lo reng reng.

Class banah chuan phur zet in min nghahna tur ni a a sawi lam chu ka pan a,ka thil hmuh avang chuan ka pen lai chawl deuh dat in step a lo ṭhu dunte pahnih chu ka en deuh vang vang a,hmanni a hmeichhia bawk kha a ni tih ka hriat chuan engtin emaw ka awm leh nghal ringawt tawh.

Kawngpui aṭang a sang deuh hlek step a ṭhu an nih avangin ka kal phei chu min lo hmu lawk sa a,ka hmu ve tih a hriat rual chuan kut vai chungin a rawn nui nghal vur vur a,a hmeichhe ṭhut puinu pawh chu ka thlen phei hma in a kal zui daih.

"Tunge a?" Pangngai tak a ka tih chuan.

"Mawii" A lo ti ve nghal dut a,bike ah chuangin helmet a khum nghal than a.

Zawh chian ka chak viau na in tukin aṭang kan in ngaizawng ṭan ve chiah a,thikthu chhia leh lhirh deuh ang a lan nghal ka hreh ve deuh avangin engmah ka sawi zawm ta lo.


"I ril a ṭam em?" Traffic jam avang a kan din dat lai chuan min rawn thlek zawk a.

"Aih...thil kan ei tlai lutuk a,i ril ṭam a mi?"

"Ṭam lo e,a nih ei chak i nei em?"

"Neih pawk ka hre lo" Ka tih chuan "Nei ve la" Ti in a nui nghawr deuh dat a.

"Tinge?" Keipawh ka nui ve nghal tho.

"Thil ka lei chak che..ei tur kher lo pawh" Helmet a vuah vangin a hmel lan dan ka hmu thei lo a,mahse a thil sawi zawh rual khan a hmui hnuai lam pet in a nui ang a,a lang duhawm leh viau dawn tih ka chiang.

"Pawisa i nei a mi" A helmet hnunglam en ran pah a ka tih chuan ka rin loh lutuk in "Naaaa" A rawn ti chhuak deuh hluai a,mak ka tih em avangin a mah ai ring mah in "Enge?" Ka lo ti ve nghal vat.

"Bialpa te chutiang han zawh...thil lei ka chak che chuan pawisa ka nei tih a chiang reng a lawm" A tih leh bui bui lai in ka lo nui nghal hak hak a.

"Ni dangah min lei mai rawh" Ka tih letna chu a tlan chak em avangin a hre tawh lo nge ni,min chhang let tawh lem lo.


"Naktukah ka u in pasal a nei dawn a" Kan kawmthlang a a din rual chuan a ti a.

"A nih chu..a nuam ngawt ang" Ti in bike aṭang chuan ka chhuk thla nghal tharh.

"I lo kal ve duh em?" Ti a ka kut a rawn ban lai chuan kan in lam chu ka hawi zawk a,a ni pawh in a lo en ve tho tih ka hmuh rual chuan ka nui deuh hak.

"Chi nang.....mahse keimahin ka kal dawn ni maw?" Ka tih chuan

"Umm...min rawn inkhawm pui ve la" Thutak zet in a lo ti leh a. "Zahthlak awm emai a" Ka lo ti deuh hlak chu min en run in "A nih bike thengthaw nuamah lo chuang haw tawh miah suh" A tih chuan ka nui nghal hak hak a,a nui ve duh miah lo thung.

"Yesssii" Zangkhai tak a ka tih chuan "Ka thikthu a chhiah a nia" A ti deuh sup rual in rang zet in
"Keipawh a chhe ve tho" Ka lo ti ve nghal zat a. Kan nui dun leh ringawt tawh.


In a thlen velah min rawn hrilh nghal a,zanriah eikham velah kan in be leh bawk a. Au pasal neih vel tur avang a a buai ve deuh avangin rei erawh kan in be kem lo.


Chhunah te chuan au te innneih pic a rawn status te chu ka en kual thuak thuak a,coat suit navy blue leh kamiz sky bule a hak chu a in hmeh em em lehnghal.

"I van chhelo em em" Ti a a status ka reply na chu rei vak lo ah a seen in "Tian ka ha char char ang a,zanah smart deuh hian ka rawn rim ang che" Ti a a rawn reply na chu ka hlim pui lehpek hle.

"Bena'n bialnu a nei maw,tunge ti? Kar hmasa a ka zawh pawh khan neilo ang in a in sawi sia" Bus a ka hnung chiah a ṭhu chuan ring zet hian a ti a,an rawn lut lai ka hmu a Benja te school a lut ve tho an ni tih ka hria,an mi sawi chu ka Benjamina a nih ka rin rilruk deuh avangin ka beng ka tun nghal hru a.

"Nei.....niminah pawh bike in a rawn phur ka hmu lawm,college kal tawh" Pakhat zawkin a tih ve leh rual chuan an mi sawi chu Benja ngei a ni tih ka chiang.

"Oii a van mak,Mawii nen khan an in ngaizawng leh dawn maw ka tia"

"Dik chiah tiraw..an in ṭhen tak tak a niang"

"Ṭhen a mi..vawinah pawh Mawii chu au pasal neihna ah khan a inkhawm ve sia"

"A nih chuan nimin a a rawn phurh kha a bialnu ni lo niang"

"Oi hemi te pahnih hi chu e an in ṭhen thei tak tak lo,Mawii pawn a sawi a lawm 'kan in be lo thei tak tak lo' a ti"

"A ṭhat hlauh chu..an inhmeh sia,kan lo hre ṭha ve ve bawk nen inneih daih thei se"


Ka hnung a hmeichhe pathum titi nak nak reng chuan ka ngaihtuahna a ti buai kual vel nasa hle,ka bialpa ve hian a bialnu hmasa ṭhen lo in min lo ngaizawng reng a mawni le ! Tih ten ka ngaihtuah kual a,ka ring phal chiah silo mahse Mawii chu Benja u pasal neihna inkhawm a tel ve ang in an sawi bawksi. Tun hma a ka la neih ngai reng reng loh riltu natna in min rawn tuam raih raih a,duh zawng tak ngaihzawn ni a in hria a hlim tak a ka awm lai in rilruna veng veng in ka awm leh si.


Va biak a ṭhen leh daih rum rum mai ka duh hman hial a,mahse ngaihtuahna fim zawk hmang a ka in ngaihtuah leh takah chuan hmaichhan a sawi dun a,engkim hriat chian vek phawt ka duh ta zawk a.

Zan dar 8 velah chuan kan in piah reh lai deuh zawk,ṭhenawm ten in sakna tur a an lak cubic lung in rem sang ah ṭhu in ka lo nghak ran a. Ka awmna hmun bike headlight in a rawn chhun en pup rual chuan ka hawi chhuak vat a,a lo eng ṭha tehkher bawksi nen ka kut pakhat a in hliah in ka meng nur deuh nang. Bike hung ṭha a ka bul a a rawn ṭhut rual chuan "Vawin a ka thil hriat hi enge a awmzia?" Ka lo ti nghal thawr a.

"Eng thu?" A ti deuh hu chu rum zet a en in "Mawii kha" Ka ti hman ṭawk tihah "Ka nau te nen an inkawm ṭhin vang a lawm a rawn inkhawm ve" Rang zet in a lo ti nghal a.

"I bialnu tiraw?" Thawk deuh halh pah a ka tih chuan

"Nangmah a lawm" A lo ti nghal khauh a.

"Sawi chiang rawh..vawinah i classmate te nen bus ah kan chuang ho a" Vin deuh lek lek a ka tih chuan.

"Ka bialnu hlui a nia" A rawn ti chhuak ta sup a.

"Engtikah nge in in ṭhen?Engtia rei nge in in ngaihzawn...chiang deuh in sawi rawh ?" A thil sawi tlang mai lo chu ning zet in ka ti chiam a.

"Thla 1 ai in a rei tawh ang...thla 5 kan in ngaizawng tling hman ṭep" A tih chuan melh deuh ram chungin
"Tinge in in ṭhen" Ka ti chhuak sap a,a ni erawh a hmui hnuai pet zauh in a lo nui deuh suk tawh thung.

"Romantic bus ah ka chuang a" Ti in a khi zui vur vur a.

"Uang lo in sawi vet teh" Ka lo tih leh hlak takah chuan

"Nangmah hi ka duh che a" Ti in thawk a la deuh suai suai a.

"Bialnu nei reng chung a star che kha ka duh lo a chuvang chuan kan in ṭhen" A tih chuan ka en deuh vang vang a.

"Keimah hmelṭha min tih vangin i bialnu i ṭhen a,kei ai ṭha tih i neih leh hunah min ṭhen ve leh mai ang a" Elhsen hmel zet a ka tih chuan a nui ri deuh hawk a.

"Min ngai lerh viau suh..ka duhthlan ngei a ka bem awmchhun i nih hi aw" A tih chuan ka nui deuh sak a,ka awih loh hmel a ti deuh nge ni
"Ka ti tak tak bialnu chu ka nei ve nual tawh a mahse nangmah ang a vei hi ka la nei ngai lo. In sawitheihna ni lo se ka bialnu ni tawh te khan min bem zawk vek a" Ti in van lam en in a dak zui vauh vauh a.

"Ka hmuh hmasak ber ni che khan ka thinlung hi engtin a mawni a awm a" A awmdan ngai a la awm reng chung chuan a ti a.

"I danglam bik ka tih chuan i awih lo maithei a,majse i pawimawh fal"

"Min ṭhen suh aw" A rawn tih chhuah leh sup rual chuan ka tum reng vang ni miah lo in ka nui chhuak hak.

"Kei chuan bialpa hlui pakhat chiah ka la nei a,min rinawm loh san ka hre lo na a ka thik tur khawp a hmeichhe dang a biak ṭhin avangin ka ṭhen a" Ti in amah chu ka melh ralh a,min lo en ve reng bawk.

"Ka thikthu a chhia a,thik tur nei reng a min siam dawn chuan ka ṭhen dawn che a i rinawm"

"Ka rinawm dawn..min ṭhen suh" Ka sawi tum ka sawi zawh hma in min lo pawt chat a.

"Nangmah chauh ka duh reng dawn che" Ti in ka biangah a rawn fawo zauh a,ka rin loh lutuk a a rawn chet thut avang chuan ka taksa chhung chu a lo sa leh nghal pup tawh.

"Coat suit nen khan chhelo min ti sia,inthlak miah lo in ka rawn rim che a nia" Tih pah a a ding hluai chu hmunnawm tih zet in ka lo en ngawih ngawih a,a rawn thlen hma a ka rilru in sual buai nasat zia leh ṭhen mai duhna rilru ka put hman hial tawh dan te ngaihtuah let chung a khi deuh sak in "Chhelo pa" Ka ti chhuak sap a.


Hun a liam a,sik leh sa in thlak chuan ka bialpa nen a kan in duh tawnna a thlak danglam pha lo a. Thlasik khaw vawh lai a coffe khu hlat hlat in pui a ka duh ber a nih ang chiah in,nipui khaw lum uap churh hnuai a ice cream ei pui ah pawh ka thlang ber a,fur ruah tui tlak lai a nihliap min zawn tu atan amah tluk a duh ka nei lo a,favang boruak nuam zet kar a len chhuah pui a ka duh ber pawh amah tho a ni.
Amah nen a nih chhung chuan thla bial zan a piang a thla eng lawm leh,chhiar zawh rual an ni lo tih hrereng chung pawh a arsi chhiar dun te chu ka ning thei ngai lo.


"In ngaizawng daih ila" A tih aṭang a kum 1 na a liam ni chuan,kan in tawnna leh kan thawnthu inṭanna hmun bus tawt zet ah ngei mai chuan hriatrengna hlimawm chhui let in kut inchelh chung in kan lut a. Amah nen chuan bus zawng zawng hi romantic bus a ni a,eng ang pawn chep mahse kan tan a hmun hlu tak a nih avangin bus chuan dun hi kan ban san phal ka ring lo.



Kum 5 dang a liam leh meuh chuan hmeichhe naupang sam ṭawn kak teuh a pa in sang tak a a kokichhuan avang a intithei zet a hawi lauh lauh chuan a kut phar chhuak va chung in fiah mang hlei lo hian
"Saw romantic bus" Ti in a au lauh lauh a,chumi rual a lo nui dun nghal hak hak te pahnih chu keini kan lo ni ta a.




*******
"Bul ṭanna ho te,hnual suat suh" an tih ṭhin kha maw,kimchang lo in hawl kim lo viau mahse ka bei ve zek tho a nia. Ka story ziah ho tham tak leh beitham zet i lo chhiar avangin ka lawm a,a lehpek a awm leh te a nih chuan hei ai hian a kaihkimin a ngaihnawm ve thei deuh tawh mahna.