Ember, January Amber By Rza Pachuau

[CVL Awmpuii]

SHORT STORY

EMBER, JANUARY AMBER

By Rza Pachuau





A natna khumah chuan a rose ngainat ber nen ka va pan a. A hmel dang bel te leh a hmui ro tak te chuan a mawina ti chul deuh mahse ka mitah erawh kan intawn ni ang reng khan a la mawi ka ti.

“Nang elo? Awi, Amber Rose! I la hria a ni maw?”
“Engtin nge ka theihnghilh theih ang?”
“Rawn kal kher a ngai lo asin”
“Engtin nge hetiang em em a lu tuam bur ngai khawpin i chetsual theih zawk a?”
“Ka duh vang a nih bik loh hi”
“I lu a hai leh tawh ami?”
“Ka lu a hai reng bik lo”
“A nih eng vang nge?”
“Min hau leh dawn chiang sa...”
“I sawi loh chuan ka hau zawk ang che”
“A nih...Ka tlu sual a”
“Eng a?”
“Ka tlu sual ka tih chu”
“Fimkhur lo lutuk” ti pahin a luah ka khawng a. A tluk sual ngun tawh em avang hian vawi tam tak a kalna en turin ka hrilh fo tawh. Kawng kan lah a thiam lo,a vannei asiamin motor hian an la su lo mai mai zawk a ni.Engah mah hian fimkhurna chang a hre hlawl lo,amah hi a inngaihtuah lo ni berin ka hria.

“Aiah! I va mawl tak! Ka lu”
“Sorry!!Ka tihpalh lutuk!! A na em?”
“Na e,I khawn hma khan chu te chu ngaihtuah hmasa ve ta che”

Kan in en a, kan nuichhuak leh nge nge thin. Tihtauh hrat pahnih hi engtin nge tiang takin an inkawp reng theih zawk? Ka hre bik lo. Chapona avanga ngaihdam in dil tawn hreh ve ve pahnih, thinrimna chhan ropui ngai lem lo, inthlem tum ngai lo pahnih kan ni. Mahse a tawpah kan nui dun leh tho thin. A thawh dan ka hre bik lo, eng emaw inzawmna tuma sawifiah theih loh bik hi kan nei ni berin ka hria.

A khum bula thu ve tur chuan min sawm a,ka kut a rawn ban a,nghet takin ka lo vawn sak a. A kut lum leh no tak te kha thlasik dai far ang hialin a vawt tawh a. A mitah ka thlir reng a, ani’n a mit a la sawn duh hek lo.

'Tun tak hi ka rilru chhungril a hnena ka puanchhuah hun remchang chu a ni' tiin ka thinlung ka fuih sauh sauh a.

“Ember, ka sawi ngai lo na chu,hrilh duh che ka nei. Rei tak chhung ka lo zep tawh a,tunah hian hrilh che ka duh."
Thawk ka han la det a,
"Ka...” ka ti dek dek a,
“Keipawn” tiin ka thusawi lai a rawn pawtchat.
“Eng a?”
Ka bo hu a, ka awih lo zawk hial.
“Sawi a ngai lo,ka hre vek alawm. I mitmeng khan engkim min hrilh asin”
“Chuan?”
“Chuan, keipawn chutiangin. Ka mitah te hian hmuh theihin a awm ve lo em ni?”
Ka lungphu te hian awm dan an thiam meuh lo. Ka laihna te hi ka biang leh beng te’n an thup seng chuang lo. Ka hlimna hriatthiampui turin ka sakruang hian i rauthla te kawngka kik ri hi hawn sak mahse a hrethiam zo chuang lo ang. A tawpah chuan, ni e, a tawp a tawpah chuan.
Ka darah a bei a,
“Engtikah nge i sawi ang tiin ka lo nghak reng thin che asin”
Sawi tur ka vai tak zet. Sawi hmasak ber tur pawh ka hre zo lo. Rilruah thu tam tak awmze nei lovin a leng vel chei chuai a,eng ber nge ka hrilh ang a,engtin nge ka chhan let ang ka hre lo. Ani lahin chhan let a phut hek lo. Tawngkam tel lova hmangaihna kan inhrilh tawn lai hian, thu sawi hauh si lova kan rilru zawng zawng kan inhriat sak si te hi, tuma hriatthiam ve phak loh kan inhriatthiampui bik tlat te hi, hetiang ang hun rangkachak hi ka damchhunga ka tawn leh tawh ngai loh tur thil a ni. Ka am a ni, ka am.

Ka awmah a bei reng a, dim tea a sam buang mawi tak ka chul lai chuan ngawi rengin a dawh heuh heuh a. Ka thin phu ri a ngaithla a nih ngat erawh chuan ka lung phut dan dik tawh loh zia a hrethiam pha ve ngei ang.
Ani chuan, ka mitah tak min rawn chhoh en pahin
"Morphy, ka vantirhkoh Morphy"
Mi nung thlarau leh mitthi khua te hian rem ti se zawng nem te'n kan heh a intawk ngei ang.
Mahse a mit mawi takah khan lungngaihna leh mittui thuk taka thuhruk chu ka va hmu pha si.
"A rem lo em ni? Morphy, a rem lo em ni?"
Ka bo tulh tulh mai a.
"Ember,Eng thu nge i sawi?"
A mit a chhing det a,
"Engmah a ni lo" ti chungin ka awmah chuan a bei leh ta hle hle a. Amah leh amah a inbia ni maiin ka hria,hmeichhe naupang te ang maiin pangchang zetin a phun ser ser a,
"Morphy,Morpheus...I hming hi ka duh thei lutuk asin. Ka mit a la tlat zel. Thil engkimah, Morpheus tih hming ka hmuh tawh chuan ka phili buai nasat theih zia. Tu phuah nge?"
A hming ka hmuh apianga ka ngaihdan dik tak a ni. Ngaihtuahna ang khat kan intawm a ni law maw ka ti hial,
"Ka pi kha i la hria em? Ka bialnu emaw ti tu che kha..."
"Aw, la hria. Hmeltha min ti deuh tu kha maw?"
A nui sen sen a,
"Aw, kha kha...Morpheus hming ka put chhan alawm"
"In mo atan i pi khan min it ru tih ka hre thei"
"I over aw..."
"Aw...I u nupui atan te pawh min it thei a"
"Ka haw dawn"
A kut ka thlah hmak a, thawh ka tum uaih uaih hman a.
"A mak, ka uang a nih kha. Fiamthu hi i la na thei lutuk"
Tihtauh a hrat ang bawkin tihtauh ka hrat a, tu amah hi thlem kan intum hran lo. Hauh erawh kan inhau zing, tawngkam erawh chuan ngaihdam kan indil tawn ngai hauh lo na a, kan titau rei thei ngai chuang lo.
Ka ngawi vang vang a, a thaw ri halh halh te, a taksa lum tak te, a sam rim te chen khan a khat tawkin ka hriatrengna zunzam a kaitho leh thin. Amah tein a phun ri leh tan a,
"Hmanlai Greek thawnthuah chuan Morpheus hi mumang siamtu Pathian an ti thin asin. Pukah a riak thin a, a khum bulah chuan pangpar tam tak an par a. Pangpar chi te chu lain chu pangpar chi atang chuan mumang a siam thin"
"Sandman ang khan ami?"
"Mmm...Sandman angin. Ka sandman, ka vantirhkoh, ka mumang thlen dik tirtu i ni tihna a nih chu"
"Mahse pangpar pakhat bak ka nei ve hlei nem"
"Aw...Vantirhkoh khawngaihthlak, chu par chu eng par nge?"
Min rawn melh a, a nui hmel atang chuan a uang tih ka hria. Mahsela ka thutak thung si
"Tlai ni tla tur anga mawi, eng sen mawi tak, Amber Rose"
A laihchhiat a, a hlim ka rin nen, a hma ang bawk khan lungngaihna tho chu ka va hmuh sak leh ta tlat a.
"Ember, i awm dan hi a dik lo. Thil awmzia min hrilh rawh."
Min chhang duh lo.
Kan ngawi dun vang vang a,ka awmah a bei a,ka kut a la thlah hauh lo.
“Min kalsan suh aw,khawngaihin”
A rawn ti chhuak hlawl a, a aw atang chuan a hlauthawng tih ka hria. A inhnit leh thin.
“Ti nge chutiang te i sawi?”
“Khawngaihin Morpheus, min tiam rawh. Ka tan i awm reng dawn tih min tiam rawh”

Ka tawng chhuak thei ta hauh lo.Min mawlh tlattu sawifiah theih si loh chuan ka ka a hup bet a. Mittui! Mittui a rawn far nawn tluk tluk bawk.
“Morpheus! Morpheus” tih thawm leh lusun tap ri chu ka bengah a inthum rawn tluk tluk a.
Ka harhchhuak ta a,
“Morpheus! Morpheus! Tho tawh rawh! Chhunah hian i mu leh thin a.”
Ka u chuan min rawn kaitho a, ka a ruai mai. Thil thleng chu awmzia ka hre hauh lo. Ka lukham huh leh hnawm te chuan ka mittui tla erawh a tak a ni tih min hrilh. Ka mang pawh kha a tak a va ang chiang. Ni lo a takah a thleng tawh alawm. Nimin thil thleng ka mangphan zawk a ni,ka chiang alawm. Ni lo se chu 'Naktukah ka pe ang' tia ka sawi, Stephen King-a lehkhabu atang ka pawhthler kha ka hum lo ang. Chu lehkha chu kum tam pek ka tum thin,Ben-a'n Beverly tana a poem ziah,

"Your hair is a winter fire,
January embers.
My heart burns there too."

tih ngei kha pek ka tum thin. A bula sawi kha ka hlau a, ka zam a, hla thu tal hian ka rilru ka phawrh chhuak mahna tiin pek ka tum thin a, mahsela nimin thil thleng atang kha chuan a ngaih tawh ka ring ta hauh lo. Mahse ka pe tho ang. A va han nuam chiang, Ember-i nen pumkhat kan ni ve ta! Ka lawm mah mah emaw ni aw tih tur hial khawpin ka’n mangphan velah!

Room atang chuan inphih fai turin ka tho chhuak a, Sitting room lamah chuan ka ni te chhungkua an lo thu thup mai a.
“Kha! I rawn tho harh peih ve maw?”
Ka ni chuan nui sangin a rawn ti a. A thil sawi duh dan atang chuan ka thatchhiat hmel ka ti tak zet. Ka in en a, dar 3 a rik dawn lek lek hnua mit ek leh sam delh sual phunga han thawh reng reng chu, mi taima ka an loh hmel hrim hrim reng bawk a. Ka nuih liam a,ka hmai ka phih a.


Choka tukverh atang hian Ember-i te in a lang thei a,parda a zar loh phei chuan a room chhung pawh chiang takin a lang thei thin. Tlaiah hi chuan ni tla tur a vai liam duh avangin a hawng ngei ngei a. Zing, chhun leh zanah erawh a hawng ngai hran lo. Thil siam mawi tak te pawh hian thil siam mawi tak te hi thlir nuam an lo ti ve tho a nih dawn hi.
Tlai ni tla tur thlira a dah chhuah apiangin keiin amah thlir turin ka dakchhuak thin. Kha kawrfual pawl nen khan a va inhmeh tak em! Tlai ni nem chuan mangtha nan dim tein a biangah a fawp a. Ni zungin nem te'n a vun no var ngaihnobei zet leh sam buang thap mai te a chhun dan chu a nalh em em a, ka en kham thei lo. Min hmuh chang apiang chuan nui sangin min rawn vai liam thin.

Eng nge a an tawh? Zia lam a pan ang em? A sawh na mah mah a mawn le aw? A tho peih tawh ang a? Khumbet rawk khawpa lu han sawh mai chuh! Ka rilru chu amahah hlir a la kal ding char char a. Ka ngaihtuah tawp hlei thei lo. Tukverh bulah chuan an in chu ka melh char char a, ni pawh a tla lek lek tawh tihah pawh a la rawn chhuah mai loh avang chuan ka ngaih a tha hlei thei lo. Ka u te ti ti thawm pawh ka hre pha,
“I nau chu a lung a va len hmel ve”
“Tih ngaihna ka hre bik lo. Theihtawp chu kan chhuah vein ka hria”
“In chanchin ka lo hria a, a zia lo ka ti tak tak. Tu nge a hmeichhia hi?”
“Ember-i ,kan kawmthlang deuh lawkah sawn an cheng a,tleirawl fel tak a ni maw le”
“Chutin ka lo hrechiang chiah lo a, eng nge thleng a?”
“An inchung step-a a chhoh lai khan a lu a hai thut a, a tlu sual a, a lu a sawh palh a. Damdawiin chu kan thlenpui hman a, mahse...”

Awhaw! Room tukverh a inhawng! Ember-i chu a kawrfual pawl nen a rawn dak chhuak a, ni tla tur chu a thlir dauh dauh a. An thil sawi pawh ka ngaihven tawh lo,Ember-i chu a tho chhuak leh peih tih ka hmu a, a damtha viau niin ka hria.Thil dang an sawi ta daih a,kei emaw Ember-i chanchin an sawi ta lo chu ka lawm viau, chu aia ka lawmna erawh Amber-i hmel chu!
"A hmuna a tap miah lo leh a hnu lehzela a tap lo hi chu mak chu ka ti"
Ka nui lai hmel chu an hmu fuh emaw ni, an titi an tawp a,
"Eng nge i hmuh a? I khik vur vur a?”

Ember-i chuan min rawn hmu fuh a, min seih a. Min rawn hui a.
“Ember-i! U, ka chhuak dawn a nia” tih leh kawngka pan ka rual a
“A tih leh ta, Morpheus lo ding lawk teh” Ka u chuan min koh din a tum a, mahse ka thei lo. Nimina thil thlen hnu atang phei kha chuan sawi tur ka ngah lutuk tlat,tin, ka ngai bawk, ka ngai takzet. Ember, ka rawn kal!

Kawngka bulah chuan ka nu a ding reng a,
“Chaw ei hmain ka rawn let leh vat ang, ka ti tak tak”
“Khawiah mah i chhuak lo ang” ti chungin kawngka a kalh tlat a.
“Nu, eng nge awmzia? Ember-i a tha chhuak tawh a nia,i lawmpui ve lo mi?”
A mitmengah chuan beidawnna leh lungngaihna ka hmu, ka lakah a beidawng ni mai hian ka hria. Khawngaihna mitmeng a ang zawk hial.
“Eng nge awmzia, nu, fiamthu lo teh”
“Morpheus, thu rawh, inbiak a ngai”
“Nu, a tlai mai mai. Chubakah ka nite chhungkua an awm ve reng hi a zahthlak a nia”
“Thu phawt rawh kan ti ti dawn nia!”
“Ni lo, i hrethiam lo a ni...!”
“Thu rawh Morpheus”
“Sawi loh tam tak ka la nei...”
“Min ngaithla rawh!”
“A dam tawh alawm...kal ka ngai”
“A TAWK! A TAWK! Harh chhuak tawh rawh Morpheus”
Room chhung chu a reh duk a, ka nu chu a thu hnawk a, ring takin a tap chhuak ta hawm hawm mai a. Ka hrilh lah a hai nasa tual tual mai si.

“Bawiha! A ni thei lo! Ka fapa hi tia’ng ringawt hi chuan ka chan thei lo!”
Ka hrilh a hai lutuk tlat. Ka kun hniam a, ka nu bulah chuan,
“Eng nge a awmzia? A dam tawh alawm, ka va kal zawk ang a,ka rawn let leh dawn alawm.”
“Kum tir atang tawh khan chu hlir chu i sawi thin” Ka u chuan a rawn ti a.
Ka bo khawp mai
"Eng maw ka sawi a?"
"Ember-i i hmuh thu"
"Engtia kum tir? Ka hmuh thu sawi chu eng nge a pawi viauna? U, i thusawi te hian awmzia a nei miah lo a nia"
Ka ni chu a lo inrawlh vat a,ka u hnenah chuan,
"Bawiha, ti lo mai rawh. A tha lo zawk ang"
"En ta che ni, ka nu hi...Nitin a fapa a chan lai a hmuh fo a ngai a, a na zing lutuk tawh. Keipawn ka tuar thei tawh lo. A hun tawh,ni...a hun tawh"
Ka u thusawi chu ka hrethiam hauh lo.
"In thil sawi hi pakhat mah ka man lo a nia, ka hrethiam lo bawk. Eng maw hun tawh?"
Ka u chuan ka darah min vuan a
"Mama,i mangram leh suangtuahnaah i cheng nasa tawh lutuk. Khawngaihin harh chhuak tawh rawh. Kan hnenah lo kir rawh. Ember-i hi...”
A sawi zawh hmain ka tal sawn a,
“A awihawm loh...” tiin ka nuichhuak a, a thil sawi leh a sawi tum chu ka hrethiam. Ka chhungte hmel chu ka en a, tumah chuan uang hmel an pu lo, chu ber chuan min ti hlau a ni.
“A awihawm loh lutuk, in fiamthu a nih chuan a nuihzatthlak miah loh a nia."
"Ka nu hi en ta che, fiamthuah i la ngai a mi?"
Ka thinrim leh hrilhhai ka fawm a, vin zetin,
"Nimin pawh khan a la dam alawm. A khumah ka thutpui kha...Pangpar pawh ka ken kha...”
“Mama, thla 5 a liam leh tawh alawm."
A ni thei lo. A dik lo. Engmah hi a dik lo. Tun ami pawh hi ka mumang a ni hrim hrim. A tak a ni thei lo. A tak a ang lo lutuk ringawt. Engmah hian awmzia a nei lo.

“Mahse, a dam tho a ni law'm ni?”
An ngawi thap a, an reh duk a. Tu man min chhang ngam eih lo.
“Zawhna ka zawh che u chu...Ka kal lai kha chuan a dam reng kha”
“I kal lai khan kan awm ve alawm. A chhungte pawh an awm a, khawtlang leh vengchhung mi te zawng zawng pawh. Pangpar tam tak nen.”
Ka nu chu a la tap reng a,a tap ri chu ka bengah a la thangkhawk reng. Sawi tur ka hre lo a,mumang a nih beiseiin harhchhuah ka la tum fan a. Engmah ka ngaihtuah thei rih lo.
Ka nu chuan,
"Tlai tin, saw tukverha sawn dakin i hmuh thu i sawi thin. I chhuak a, kan dang duh lo thin che. I rawn hlim haw thin em avang khan lungngaihna thlen che kan duh lo a. Mahse nitinin kan fapa hi ka chan a..."
Ka nu chuan ka biang a vuan a, ka mitah tak min enin,
"Ka fapa Morpheus kha i ni tawh lo."

Chhuah chu ka tum lui fan a, ka u chuan,
"Kawngkhar pawnah khan hlimna i hmu lo ang. Morpheus lo kir la, takram hi hmachhawn tum rawh"
"Tu mah ka ring lo che u" ti chungin ka chhuak lui ta a.

Ember-i te in chu ka pan a, kalkawnga ka kal lai te chuan an thil sawi kha ka bengah hian a ri nawn tluk tluk a. Dawt an sawi ka ring si lo a, mahse thudik ni turin ka ring phal si lo. Engkim hi a lem vek, eng nge thudik ni a, eng nge dawt ka hrehrang thei lo.
Ember-i te kawngka ka kik thawm aiin ka thin phu ri chu a ringin a rang zawk hialin ka hria. Ember-i nu chuan a rawn hawng a,

"Morpheus, nang elo! Lo leng rawh, lo leng rawh"
"Ember-i a awm em?"
"Aw, awm e...pindanah khan a mu ang.Va lut rawh."

Chutia a pindana luh ka tum lai tak chuan, ni danga ka hmuh ngai loh, banga Ember-i thlalak intar chu ka hmu fuh a. A hnuaiah chuan "-18.1.2023" tih hi ka va hmu fuh a. A pindanah pawh chuan ka lut ta lo. Ka ding reng ringawt a, mittui a rawn luang a. Ka hrilh a hai a, tah chiam ka tum a, mahse ka hrawkah min rek bet tlat si. Ka thin hi a tawt up up a, engkim kha mangchhia ang mai a ni. Kan hun lo hman ho zawng zawngte pawh kha mumang ang chauh ni ta vek maiin ka hria a. Engmah khan awmzia a nei lo reng reng. Vawi leh khatah an thamral ruai ruai a.

Ember-i nu chu ka kiangah a rawn kal a,
"Vawiin chu ni dang i va ang lo ve. Ti nge i tah tak mai a?"
Chhang thei dinhmunah ka ding lo,
"Lo kal rawh, thu ila, kan titi dawn nia"
Min thutpui a, mipa ka nih hre chang lo khawpin naupang ang maiin ka la tap ta hawm hawm a, a darah ka bei a, ka awm dan a thlir chuan min hrethiam niin ka hria. Ka sam a rawn chul a,

"Bawiha, i hmangaih zia ka hriatpui che alawm. Khami ni pawh khan i tap lova, i lungngai ve hek lo. A kut i vuan a, a kiangah khan pangpar nen i awm chilh tlat a, i hlim em em bawk si."

Ka mittui a rawn hru fai a,
"Vawiin chu in in lamah va haw tawh zawk ta che, i chhungte'n an mamawh zawk ang che"
tiin min thlah liam ta a. A pindan chu ka en zui vawng vawng a, a thlalak erawh ka en duh tawh lo.

Ember-i nu hnenah chuan lehkha them chu ka pe a, rei tak chhung pek ak lo tum tawh kha
"Hei hi Ember-i chu i lo pe dawn nia" tiin Ember-i nu chu ka thlah liam a.

Kalkawng te chu a reh dup hian ka hria, a hma ang khan engmah hi a awm tawh lo. Kawtthler te chu a khawharthlak ruih a, mal ngawih ngawih hian ka inhria.
Tap chunga inchhung ka luh lai chuan ka u-in min rawn kuah, a mittui chu ka samah a far tluk tluk a.

"A tha leh vek ang. Engkim hi a tha leh vek ang"
tiin min hnem a.

A tawp nan ni tlak hmain tukverh chu ka va en leh a,Ember-i chuan min lo la thlir reng a, a mawi ngai khan a la mawi reng asin.

Mittui! Mittui bawk a rawn hnám leh ta. Tunah zawng ka hrethiam tawh e.


“Ember, he khawvel leh thih hnu piah lam khawvel thlengin ka tiam a che, ka kalsan ngai lo ang che”
Ka thinlung ka hrilh a.
Amber-i chuan min hmu a, tlai ni tla tur leh a nui hmel duhawm tak nen, min vai liam ta a.


A TAWP TA


_____________*__________*__________*_______