Kei anga hmangaihna lama vanduai tam tak tuar chhuak leh tate pawh an awm tih ka hria. "Khuareiah i dam ve mai ang", tia min hnemtu lah bo lo. Ni e, ka ring tlat a ni, mahse engtikah nge ni ang? Lenrualte chu hlimlai par tlanin an inpel suau suau tawh mai si a. Nge nia khawvelah hmangaihna par ka chhuang ve thei dawn lo em ni zawk?
Hma lam pan tur leh engkim theihnghilh turin Phai lam ka pan a, mahni tawkah ka buai ve thei hle a. Ṭhian thar pawh ka nei nual, mahse a hma ang khan tumah hi ka kawm thei tak tak tawh lo. A hma chuan ṭhian hi ka ngaina hle a, ka kawi duah zel. Mahse mihring chu kan danglam zel a, ti mai teh ang. Tumah hi ka ring tak tak thei tawh lo a ni ber.
Tunah hian Gujarat-ah ka awm mek a, kum nga lai chu ka awm ve tawh. Ṭhiante ho nen hnathawh zawhah zanah kan party leh ṭhin a. A hunlai hi chuan nuam ṭhin viau mah se, a daih rei tak tak lo. Chhunah hi chuan buai nen, engmah a ngaihtuah hman ṭhin loh a, zanah lah ni se, ṭhianhote nen kan ri luih luih zel a.
Hrehawm ka tih ber ṭhin chu, zanlai hi a ni. Mi zawng zawng, nungchate thlengin an reh ṭhuap a. Sana chek ri leh ka lung phu ri bak hriat tur a awm tawh lo hun hi a ni, chutah tak chuan suangtuahna chuan kil tin a dap a. Ngaihtuah duh lo mah ila, rilruah a lo lang leh ṭhin si.
Zingah chuan ka phone riin min tiharh a, nizan lam ka mu ṭha lo bawk nen, ka ngei kher mai. Phak chualin ka pick up a, "Umm", ka ti a, mumangahte pawh ka la chamin ka hria.
"Kimbawih", ka pa chuan a rawn ti deuh lauh a, "Umm", ka tih chuan, "I la tho nange?", a rawn ti leh a, "Tho a nimai", ham bai bai chung chuan ka ti a. "I call hma lutuk ka tih reng kha", ka nu chuan ral aṭangin a lo ti ve bawk.
"Eng nge ni ta?", ka tih chuan, "Hei, i pi hi a damlo a", a rawn tih chuan ka ṭhu chhuak hluai a, "Thihngamin a na a, i hming a lam a lam tawh mai a, a dinhmun chu i hriatthiam tawh mai ka ring, i hna i laklawh loh chuan i lo haw mai dawn em ni?", a rawn ti nghal zung zung a, kan pi ka dil phawt tur thute hrilhin kan inbiakna chu kan ti tawp a.
"Lalrinkim, jaago, breakfast", tiin Lalnunpuii chuan ka pindan kawngkhar chu a rawn beng dawt dawt a. Mut leh chu khawi lamah. Ka hmai te phihin ka hate ka nawt fai a, insiam sa vekin ka pindan aṭang chuan ka chhuak a. Breakfast kan ei zawhah kan hnathawhna hmun kan pan a.
Hair saloon-ah ka thawk a, ka hnathawhna hi dawr hlun ve tawh tak a ni a, a lun ve hle. Chhun thil pawh dar hnih velah kan ei hman ṭawk a. Pi chu ka harsatnate hrilhin chawlh ka dil a, vanneihthlak takin a lo phal hlauh a.
Ka dil dawn pawh khan a phal ka ring tho, Pi hi mifel tak leh mi hriatthiamna ngah tak a ni a, ka vannei khawp mai. Mite, phai rama hnathawk vanduai tak tak an awm laia, kei eng mah ni lo ka vannei bik em em chhan hi ka hre bik lo.
Ka nu leh pate chu call-in naktuka ka haw theih nghal tur thu ka hrilh a, remte kan ruat fel nghal zung zung a.
Zanah ka ṭhianten min thlah nan party an buatsaih leh a, vawiin chu kan buai a zual deuh nge ni zanin party chu ka phur vak lo a, mahse an ti deuh tlat bawk si a, ka ngai hlawm dawn nen kan han party leh ta poh a.
Phur teh chiam loh nen mihring a zawnga ka nin em em mai, Raju-a a rawn tel ve a. Min ngaizawng a, ka duh lo nasa mai si a, min zui kual reng a, vai ṭawngin min bia a, mizo ṭawngin ka chhang ṭhin.
Ka ṭhiante lah chuan an fuihpawrh ka ti dawn nge an bawl ka ti zawk dawn, an sawi ang apiang a pawm vek a, ei leh in pawh a tum vek. A lawmawm lamah ngai mai ang.
Zing thawh hma ka ngaih avangin an kham lo chung ka haw luihpui a, ka thawmhnawte pawh ka la siam fel lo. A lo berah thla khat vel ka cham ka ring a, ka haw lohna a rei tawh vang chuan ka phur ve hle.
Ka mut meuh chuan dar 1 a pel tawh a, ka flight kha dar 6 a ni a, kan awmna leh airport hi a inhlat vak lo a. Dar 4:30-ah thoin airport lam chu ka pan a, ka ṭhiante pawn min lo thlah nghe nghe.
Airport chhungah chuan lutin ka ṭhutna tur chu ka zawng kual a, ka ṭhut fel hnu chuan hmelhriatte pawh ka hmù nual a. Kan han inchibai ang lawp lawp a. Ka ṭhutpui tur pawh a rawn ṭhu ve chiah a, a perfume rim zet chu! Ka hip lut vang vang a, ka rim hriat tawhah chuan a la tui ber ang ka ring.
Thlawk chhuak turin kan hanin tin tuah a, thlawhna ka chuan zin ve tawh nen ka hlauh hi a la reh thei lo. Inhumruh vakin ka maimitchhing a, ka thaw dep dep bawk. Kan thlawh dawn chiah chuan ka bula ṭhupa chuan ka kut chu a rawn vuan a.
Amah chu ka en deuh kawk a, ka kut lak sawn ka tum chuan a lo hum nghet sauh. "I hlauh kha, i kut ka lo vuan ang a, a zia mai ang", a ti thum chhal a. A sawi ang deuh tak tak chuan ka hlauhnate chu a kiam ta daih a. Kan thlawh san hnuah chuan ka kut a vawnna chu a thlah a.
"Ka lawm e aw", ka tih chuan a bu deuh nghat a. Chhum chunga kan thlawhte chuan thlà ka la kual a.
Darkar hnih chuang lai kan chuang dawn a, ka ning der tawh. Ka earphone phawrha hla ngaihthlak ka tum chuan, "Tu nge i hming?", ka ṭhutpui pa chuan a ti a, "Lalrinkimi, Kimkim min ti mai rawh", ka ti a, "Hming mawi tâk a nih chu, Nathan-a ka nia, Nathaniel Vanlalthlamuanpuia", tiin a kut chu a rawn phar a, lo vuan ve vatin, "I hming pawh a mawi a lawm", ka lo ti mawi hnai ve a, nui sukin, "Mawi mah se a sei", a ti a.
"A ṭha a lawm", ka ti mai a, "Ṭha pawh ka ti lo, ka naupan lai phei chuan ka ṭahpui nasa thei lutuk", a ti leh a, nui deuh hak chung hian, "Ti nge?", ka ti a. "Handwriting velah, 'My name is Nathaniel Vanlalthlamuanpuia', tia ziah deuh duah a ngai a, naupang tan chuan a ninawm, puitlin hnuah pawh ka la ning", a ti deuh duah a, ka nui deuh hawk hawk a.
"Mizorama haw ve tur tho em ni i nih?", ka tih chuan, a bu nghat a, "Khawiah nge in awm a?", ka ti leh a, "UK-ah", a ti leh daih a, ka zawhna a man lo emaw ka ti hman a, mahse, "Upper Khatla, UK", a ti a, ka man chiah. "Nang zawk?", a tih chuan, "Hortoki-ah", ka lo ti vat a, "Chhungte ka nei asin", a ti deuh hluai a.
A chhungte a sawi chu ka hre hauh lo, mahse zin tur ten mawi hnaiah ka sawm ve a, a phur hmel hle a. Mipa ngeng tak, ṭawngmawh leh inla lem lo tak chu a niin ka hria, chuvang a ni ang ka ngainat ruk nghal em em.
"Chuan", a tih leh chuan amah chu ka en leh vat a, a hmel ka hmu chiang chiah, mizo mipaah chuan ṭha ve pawl tak a ni. Ka hmel duh zawng tak a ni lehnghal, "Gujarat-ah eng nge i tih?", tih min zawt a, "Hna ka thawk a, nang zawk?", ka lo ti vat a, "Kei pawh hna vang a nia", a ti ve leh a.
A hnathawh vêl te chu ka zawt a Photographer a lo ni a, a zin tawhna velte ka zawt a, ram hrang hrang a tlawh kual tawh a ni awm e. "Khawi ram nge nuam i tih ber?", tia ka zawh chuan, "Canada hi nuam ka ti ber mai", a ti a. Ka kal ve chak thu leh ka kal chak chhante ka sawi nghal zung zung a, "Ka la hruai ve ang che", a ti a.
A zin tawhnaa a chet chhiatnate a sawi a. Ka nui deuh hawk zel a, a chang phei chuan ka lo nui ring mah mah ṭhin a, min en hrek hrek hlawm a. Za deuha ka nuih lohna chin pawh ka hre tawh lo.
Darkar hnih pawh a hma kha chuan rei ka ti ṭhin a, vawiin chu ka ṭhutpuiin a zir bawk a, a rei pawh ka ti hman lo. Kolkata airport kan thleng a, dar 9 vel chauh a la ni a, dar 11 - ah daih flight ka nei leh chauh a. A rei dawn ngar ngar khawp mai.
Mahse ka ṭhianpa nen khan kan flight hun a lo inang leh chiah a, a lawmawm khawp mai. Ka rilṭam chu ka pum a ri deuh kawrh kawrh a, a ri ring ang reng sia, Nathan-a chuan a hre pha ang tih ka hlau ru khawp a.
"Kan flight hun tur a la hla sia, tei hawi mai mai ang hmiang?", tiin min rawn a, ka hnial lo khawp mai. Kawng kamah chuan Pani Puri an lo zuar a, ka pan ding nghal chawt a. A hma chuan kawng kama an siam hi ka ei duh ngai lo, kutkawr an bun loh chuan, ka ten ṭhin. Mahse, ka ril a ṭam tawh em a, ten vel a sawi theih tawh loh.
Lei tuma vaipa biak ka tum chuan, "A ṭawp emai, restaurant pangngai zawng ang", tih leh kal sawn a rual a. Amah a sang sia, a pen zau bawk sia, kal pangngai deuh mah se ka um pha meuh lo.
"Kan kal hla lutuk ang e", ka ti a, a tawp a tawpah chuan a ding ve ta hram,a changkan hmel em em lehnghal. Ka pawisa neihin a daih dawn em mawni,ka ti deuh, mahse ka rilṭam tawh lutuk chu ka lut ve ta tawp a.
Kan luh rual chuan waiter te chuan min lo chhawn vat a, Nathan-a nen chuan an inhriat ṭhat hmel hle a, ṭhutnate min kawhhmuh zung zung a. "Eng nge kan chah ang?", tiin Nathan chuan min zawt a.
"Ka hre lo, i duh duh kha a nimai, ka ei thei vek", ka tih chuan a nui deuh hawk a, nuihzatthlak ka sawi pawh ka hre si lo a.
Ka hmaa ṭhu chu chiang zawkin ka hmu thei tawh a, a hmelṭhat mai bakah a inthuam dan mawlh chu! Camiz var chungah pull over uk a ha a, a camiz ban chu a kiu thleng a thlep chho a, a hnuaiah kekawr cotton jeans off white hain, sneaker var a bun bawk a, a smart tawp a ni mai.
Eitur chu a chah hnem ang reng a, mahse kan ei zo dun deuh thaw, ka la ei hnem zawk zui. Zingkara chhangthawp leh bawnghnute chauh ka ei-in bak kha engmah ka la ei leh lo bawk a, a tui bawk nen, ka hmaa ṭhu pa hre chang lo lekin ka ei.
Kan chhuah dawn chuan ka purse ka phawrh chhuak ve nghal a, "Vawiin chu ka treat ang che", a ti a, kan thil ei zozai kha a to si a, ka lo hnial vat a. "He laia waiter-te hian ka bialnu emaw an ti vek che a, a man ka pek loh chuan mak an ti lutuk palh ang", ti zung zungin a man chu a pe vek a.
"Mahse", kan chhuah leh hnu chuan ka ti leh hram, "Nakinah min la rul dawn nia", a ti liam puat a. Airport kan thlen leh chuan darkar chanve a la awm a, Kolkata airport chu pui tak a ni, fan tham laih a ni.
Thlawhna chhungah chuan a vawi hnih nan kan han lut leh ta poh a, mak tak maiin Nathan nen chuan kan ṭhutna tur a lo inang a. Amah lah chuan, "Khuanu ruat", a ti a, kan han nui leh ṭhin.
Mizoram Airport thlen nan darkar khat vel chuan a la ngai a. Cabin crew-ho chuan an tih ṭhin ang thoin, inven dan te, buaina kan neih chuan an mahni be vat turte min hrilh bakah duhsaknate min hlan hlawm a. Kan thlawh chhuah dawn chuan Nathan chuan ka kut a rawn hum vat a, tun ṭum chu ka nui var var.
"Engtin nge kut invuanin hlauh a zia tih i hriat a?", tiin ka zawt a, "Ka nu khan a hlau thei lutuk a, ka pa khan ka nu kut kha a vawnsak ṭhin a, chuan ka pa achhan ka zawt ta a. 'Kan inthlamuan bakah ka venghim tih entirna a nih hi. Thil eng pawh tawk dawn se, a kiangah ka awm reng ang, tih entirna a ni bawk a', a ti a", tiin min chhang a.
"Van sweet", ka ti chhuak a, ka nui var var bawk a, "Chuti maw?", a tih chuan ka bu nghat a, hmangaihna thawnthu tuipui mi ka ni bawk nen ka lo hlim ve ringawt. "Mahse, a venghim zo ta lo a nih kha", a ti zuai raih a, ka nui tawp riai riai.
"Eng nge awmzia?", ka tih chuan, "Ka nu chu brain tumor vangin a boral ta tho, khatih lai khan kum 8 chauh ka la ni a, mahse ka nu chu ka ngai ṭhin khawp mai",a ti a, a nu a ngaihtuah aniang, a ngawi vang vang a. "I pa chuan a theihtawpin a venghim a lawm, thihna hi chu kan dan theih rual a ni lo a", tiin ka thiam ang tawkin ka hnem ve a.
"Nia, Pathian remruat hi dan theih rual a ni lo, ka tetlai khan ka pi khan, 'Kan tana ṭha lo turin Pathianin rem a ruat ngai lo", kha a ti ṭhin a, tun hnu hian ka hrethiam chiah", a ti leh a, "Engtia?", ka ti haw a.
"Ka pa hi a tlangval lai chuan tlangval hawklak, khawtlang tan pawha hnawksak a ni ṭhin a. Ka pi sawi dan chuan ka nu a tawn aṭangin a nun a inthlak hlawk a, chhungkaw khai dingtu a nih theih phah a. Ka nuin min boralsan khan a tuar hle a, mahse ka nuin Pathian a belh ṭauh ṭauhna kha ka paah khan a lo lang ta a, tun thlengin kan nunah vuina tur kan la hmu lo", a ti a.
A ropui hle mai, 'Hmangaihna hian mi a siam ṭha ṭhin', an tih ka hre fo tawh. Thawnthuah bak a awm ka ring ngai lo, mahse a takah pawh a lo awm ve a nih hi. Kan ngawih dun vang vang hnu chuan, "Bialpa i nei em?", a ti deuh thawr a, ka chhanna nghak chuan min en reng a, ka neih loh thu ka sawi chuan, "Good", a ti leh ringawt a. Ngatan nge maw a tih le?
A tawp a tawpah chuan Mizoram pawh kan thleng ta, eng ram pawh fang ila Mizoram tluka nuam hi a awm lo a nih. A boruak a thiangin a nuam bawk si a, ka dam sawng sawngin ka hria. Kum 5 hnuah zo thlifimte pawh ka dawng leh thei hi ka lawm. Kan ṭum fel hnu chuan ka ṭhiante message-in ka thlen tawh thu ka hrilh nghal a, kan chhungkaw group-ah pawh ka sawi nghal a.
Airport aṭanga kan chhuah hnu chuan, "I chhungten an lo hmuak dawn che mi?", Nathan-an a ti a, ka bu nghat a, "Nang?", ka ti ve vat a, "Ka pain min lo hruai ka ring", a ti ve mai a. Ka nutei ka call vat a, "He lamah, i vei lamah lo hawi phei rawh", a rawn ti lawng lawng a, ka hawi phei vat a.
Pa Siama, ka nutei, Duhsaki leh Bobo-ate chuan an ban an lo vai lauh lauh a, an au vak vak bawk. "I chhungte maw?", Nathan-a chuan a lo ti sup a, "An nih saw", tiin ka nui var var. Ka trolley min kensak chu ka ban vat a, "Ka lawm lutuk, a nih phawt le", tiin ka nuih sang a. Pen nga vel ka pen hnuah, "Kimkim", a tih leh avang chuan ka leh hawi vat a, "Kan inhmuh leh ka beisei", a ti nghat a, "Ni e", tiin ka kalsan ta a.
Ka nutei te awmna ka va thlen chuan pangpar bawr min lo pe a, "Welcome", tih lehkhaa lian deuha inziak hi ka hmuh theih tur hian an keng kang a, Bobo-an video-in a lo cover char char bawk a. YouTube-ah channel a nei ve a, a atchilh bur a ni mai, kum 17 a tling ve tawh a, a rilru naupang chhia erawh a la reh thei lo.
Thlate kan han la leh te te a, kan lak zawh chuan an in lam kan pan a. Mission Vengah an awm a, zanin chu chutah chuan ka riak phawt ang a, naktuk zingah kan khaw awmna lam kan pan ang.
In kan thlen meuh chuan dar 7 a ri ṭep tawh. Pa Siama chuan chaw kan ei peih loh a ring a, Chicken nuggets a lei ṭeuh a. Ka inbual zawh hnuah kangin kan ei a, ka vairam awmna chanchin vel chu ka hrilh a, ka chet chhiatnate ka sawi chuan uar deuh deuhin ka nutei leh Duhsaki an nui a. Pa Siama leh Bobo-ate pawh an khi ve suk suk mai.
Thil hawn tur ka lei hman loh avangin ka kawr neihsa chu ka naute chu ka pe ta tawp a, an lawm thiam ngang mai. Ka chauh deuh avang chuan mut hma ka tum a, mut tuma ka insiam lai chuan Duhsaki a lo lut a, a rawn nui lut vur vur a.
"Eng nge?", ka tih chuan, "Vawiina mi kha", a ti leh ringawt a, "Eng?", ka ti haw a, "Aw, U Nathan-a kha", a tih chuan ka hre chhuak leh chiah. "In inhria elo?", ka ti chu, "In inhre zawk elo?", tiin min zawt let daih a.
"Vawiinah khan kan inhre ve chiah", ka tih chuan a meng phawk khawp a, "Thlawhnaah kan ṭhutna a inang a", tiin kan intawn dan velte chu ka hrilh a, mak a ti leh zual chu mak ka ti leh chhawng.
"Ka ṭhiannu cousin a nia, star-tu a ngah thei lutuk, mahse hmeichhia a ngaihsak thlawt lo a.'Pangpar leh hmeichhe mawina a hre lo' Nubawihin a ti a, a chhiat loh loh nen. Chuan vawiina ka hmuh dun che u khan thla ka lo la a", tiin a thlalak chu min hmuh leh rih a, "Nubawihi chu ka va thawn a, Nubawihi chuan, 'A hnathawhpui tih loha hmeichhia a biak ka vawi khat hmuhna', a tia", a ti a.
Chung chu eng vanga min hrilh deuh chiam nge a nih ka zawt a, "Pangpar leh hmeichhe mawina hre loin chutianga a buaipui vel che a nih chuan", tiin mitmeng lerh zet hian min en a. "Awi, Kdrama hi en vak vak suh, i ngaihtuahnate hi a dik lo zo", ka ti hluai a. Vawi khat inhmu dek dek a, chutiang lam lo ngaihtuah nghal te chu a, bakah ngaihzawng neih ka tum tawh lo hrim hrim.
"Mahse, a chhiat loh em kha", a ti leh a, "A ho, ka chau, ka mut a chhuak", tiin khumah chuan ka lawn kai a. "Zanin chu i mumang a nuam bik awm sia, ka tibuai rei lo mai ang che", a ti leh a, ka hauh lah chuan nuam a ti zual sauh. A chhuah pahte chuan min la chhaih zui hram a, a va han chimawm tak.
Zing dar 9 velah kan tho a, tukṭhuan eikhamah muang changin kan insiam a, kan chhuah meuh chuan dar 10 a pel tawh. Nizan ka mu hnem bawk nen ka harh vang khawp a, ka naute chu an la muthlu lup lup mai. Mission veng aṭang chuan darkar 3 leh minute 15 vel tlan a ni a, dar 2 hma chuan kan thlen theih ka ring.
Ka pi chu a zual deuh an rawn ti a, rilru a hmanhmawh tawh ngang mai. Vai rama ka kal dawn pawh khan a phal lo a, min tihtauhsan nghe nghe. Thla hnih chuang fe min biak duh loh hnuah min ngaidam thei ta chauh a nih kha. Ka pi nen hi chuan kan inzui nasa a, huan fehnaahte min hruai a, a kalna apiangah min hruai a ni ber. Kan inngai em em a, kum 10 ka nih aṭangin Gujarat-a ka kal hma thlengin a kiangah ka cheng a, a tute zingah pawh min duat ber zel, ka unaute pawn min thik chuang lo.
"Hei le, Hortoki chu kan thleng ta", Pa Siama chuan a ti hluai a, ka naute pawh an rawn harh hlawl mai. "I lung a leng em, Kimbawih?", ka nutein a tih chuan, "Leng ve khawp mai", tiin ka hawi kual a, kum nga chhungin a lo danglam chak ve khawp mai.
Tlan pelh zuai mah ila ka hmuh hman tho, Pi Hmuaki dawr kha, a la awm ve reng a nih dawn saw. Kha dawr kha ka hmangaihna thawnthu inṭanna bul a ni a, a tawp dan erawh a lungchhiatthlak hle a nih kha. Kum nga chhung ka lo tlan bosan tawh chu nimin ang mai chiang khan a rawn lang nawn zut zut a ni ber.
Ka ṭhiannu Thanthani nen nitin school ban apiangin Pi Hmuaki dawrah khan kan kal dun ziah a. Ei chawp dawr a ni a, a neitu hi Pi Hmuak kan ti mai ṭhin. Thil kan lei emaw lei lo emaw, a dawra kan luh loh chuan kim lo riauin kan inhre ṭhin. Ni khat chu mipa pakhat chhe lo deuh hi a rawn lut a, ka ṭhiannu nen chuan kan vawi khat hmuhnaah kan luangliam nghal tawp a. Nu Ṭha-i fapa Rinmuana a ni tih ka hriat phei chuan awm ngaihna ka hre lo.
In ṭhenawm reng ṭhin kan ni a, kan tetlai pawn kan inkawm nasa thei lutuk. Kan han ṭhang lian a, Aizawlah lehkha a zir ta daih a, kum 10 hnua ka vawi khat hmuh lehna hmasa ber a ni. In ṭhenawm reng ta na na na chu kan inhmu zing a, kan tetlaia ka lo star ruk ṭhin a ni bawk nen nuam ka ti khawp a. A mizia chu a danglam tawh hle a, mahse a lan dan chu pa ka ti.
Aizawla a school kalna ṭhinin an hnawh chhuah avanga lo haw a ni a, kan school-ah lo kal zawmin kan inkawm zawm a. Kan ni ta reng bawk a, a duh pawh kan induh viau. Kum 3 zet kan nih hnuah ka nutein nau a pai vangin awmpui turin Aizawlah thla nga ka awm a, ka haw leh chuan ka ṭhiannu, ka ṭhianṭha ber Thanthanin nau a lo pai a, chu pawh Rinmuana fa a ni.
A tir kha chuan awm dan tur pawh ka hre lo, thil thleng zawng zawng kha mumang vek ni khan ka hria a, ngunhamin ka thinlung hi a rawn vit tlâng nimai hian ka hria. Kha mi ni aṭang khan ka awm dan leh ka nun dan a inthlak danglam vek a, pangpar mawi tak chu thliahin a awm a, a chul ta ang hian ka inchan ber.
Kan in kan thlen chuan mi an lo tam khawp a, eng sawi set set loin ka pi awmna pindanah chuan ka lut nghal a. "Ka nu, hei, Kimbawihi a lo thleng a nia", tiin ka pa chuan ka pi chu a sawi deuh a, oxygen an lo hiptir a, ka pi ka hmuh chuan ka mittui a tla nghal ringawt.
Ka va pan hnai vat a, "Pi, ka lo thleng a nia", ka tih chuan theih leh theih loh hian a rawn meng a, mahse min lo hre lawk lo a, a vai ruai tawh a ni ber. "Keimah, Kimkimi", ka tih chuan min hre ta a niang, a rawn nui ve thei ta a. A kut chu zawi muangin a phar a, ka lo vuan vat a. A mittui a rawn tla ngiai ngiai a, kei pawh ka bang bik lo.
Theih leh theih loh hian a khum bula pawh dawh chu a kawk a, ka pawt hawng vat a, diary ni awm tak, lehkhabu hi a lo awm a, la chhuakin ka pi chu ka en a. Eng emaw sawi hian a phun a, a sawi hriat tum chuan ka kun hniam a, a hmui zawnah ka beng chu ka dawh a.
"Hlim takin awm rawh, dam chhung a rei lo, i Siamtu hre rengin i hun i hmang dawn nia, ka hmangaih che Bawihno", a ti a, "Kei pawn ka hmangaih che pi", ka ti hman hram, ka pi chu ka kuah nghal a, ka ṭap riin a zui nghal.
A tawp nan ka pi awri dam diai ka hre leh thei chu ka lawm a, mahse ka pi hmun ruak hi a zau dawn khawp mai. Ka nu leh pate ai pawha ka ngaih zawk ṭhin ka pi kha, ka hlim leh lungngaih min ṭawmpuitu, ka damloh laia buai em em ṭhin, ka pi kha, ka ṭhian ṭha ber a ni asin.
Pi ka van ngai dâwn tak che em, Pa ang chhungah chuan hlimten lo chawl la, apu nen pawh in inhmuh ngei ka beisei. In hnena ka lo kal ve theih nan van aṭangin min lo thlir reng ru aw. Kan inhmuh leh hma loh chuan mangṭha phawt le.
Kar a liam a, min hnemtute pawn an ṭin zo tawh. Khawharnain min luah khat nghal a, ka pi hmun ruak pawh a zau telh telh a, ka tuar telh telh bawk. Gujarat-a ka ṭhiante pawhin min rawn hnem ve sap sap a, lawmthu hrilh bak tih theih ka nei rih lo.
Ni khat chu, ka rin loh deuh hian Nathan-a a rawn lut hlawl a, mak ka ti lutuk chu ka lo chhawn ṭha mumal thei lo. Ka chhungte nen chuan an inbe mawlh mawlh a, a tlangnel nghal em em maite chu mak ka ti leh zual. Ka chhungte lah chuan, "Kimkimi ṭhianpa ka nia", a tih vang chuan an phusa nghal chiam a, an makpa chei nghal tawp a ni mai. Duhsaki lah chu a lo nui ruh ruh a, Nathan-a chu a lo be ve seuh seuh a, inhre ṭha ve pangngai tak chu an ni ngei ang.
Bathlarah chuan ka ṭhutpui a, "I lo zin em ni?", ka tih chuan a bu nghauh a, "Engtin nge kan in i hriat a?", ka ti leh a, "Duhsaki ka zawt a", a ti leh mai a. Thil ri sut sut ka hriatna lam chu ka hawi phei a, ka chhungte chu kawngkharah chuan an lo bet ṭhup a, a va hahthlak ṭhin tak. Chhuanlam eng emaw siamin an kal darh ta hram a, Nathan-a nen chuan inenin kan nui dun ta ringawt.
"I chhungte chuan tlangval hmelṭha an hmu ngai lo a ni maw?", tiin a nui suk a, "A nih kha", ka tih chuan, "Hmelṭha min ti maw?", a ti hluai a, ka lai ve ringawt te chu a chhan ka hrethiam lo hle, amah lah chu a thutak hmel ropui lehnghal a. Chutah rawn nui chhuakin, "Ka fiamthu a nih kha", a ti a, ka nui ve tawp.
"Kan khua chu a nuam i ti em?", ka tih chuan, "Nuam ti turin nizanah ka lo thleng chauh a", a ti a.
"Engtik thleng nge i cham dawn?",
"Kar khat chu ka cham ang ka ring",
"Nuam i ti ngawt ang, lui a tam a, sanghate a man theih bawk a, hmun nuam tak tak a tam a nia..", ka tih chuan, "Min kalpui la", a ti a. "I chhungte sawm la, a nuam zawk ang, kei chu kum nga lai ka awm tawh lo a, thil thar a lo tam ve tawh bawk si a, ka bo ve deuh tawh", ka ti niah niah a.
"Ka chhungte chu an buai vek a, hmelhriat nei lo ila chu ka lo zin kher lo ang", a ti leh a, "I hmelhriat chu sawm la", ka tih chuan, "Ka hmelhriat chu nangmah i nia", a ti leh zel a, a tawp a tawpah chuan min sawm thlu thei hram.
Kan in gate bul thleng chuan ka thlah a, "Naktuk chu engtikah nge ka lo sawm ang che?", tih min zawt a, "Mmm... ka hre lo... dar 1... velah min lo sawm la", ka ti tawp a. "A nih phawt le", tiin ka sam chu a tuai a, a tuai thur vek leh nghal. Rawn leh hawi lehin a kut chu a vai a, ka lo vai let hnuah a kal liam ta a.
Inchhunga ka luh chuan ka chhungte chuan zawhna an lo ngah nghal mawlh mawlh hle a, an zawhna ka chhan kim hma chu engmah ka tih an phal leh dawn chuan loh avangin an zawhna chu a mal te te chuan ka chhang ta char char a.
A tukah chuan ka chhungte chuan Nathan nen kan chhuak dun dawn tih an hriat vang chuan an phur hle a, han phurna tur teh chiam ka hriat loh nen hian. Duhsaki chuan a duh ang thlapin min chei a, Nathan-a a lo thlen chuan kan inzui chhuak a, "I duh chen chen leng rawh", ka nu chuan a ti a, ka pa thlengin an lo phur, a zahthlak ṭhin mange.
"Ka rin aiin i chhungte khan min duhsak", a ti ta reng a, "Kei ai pawn an duhsak ang che", ka tih chuan a nui suk a. "In ina ka lo kal tirh dawn khan ka zam ve lutuk, mahse ka rin ai tâk khan min lo dawngsawng ṭha a, an fel hlawm ka ti", a ti ṭha leh a.
Luiah chuan ka hruai a, Favang thla chauh a la ni a, a boruak pawh a la nuam tawk khawp mai. Ka tetlaia kan ṭhianhoa kan infiamnate chu ka hmuh kual a, ṭha deuh chuan a lo ngaithla ve mai bawk a.
A tuk leh zelahte pawh kan leng chhuak dun ta zel a, ka lunglengte pawh a hnem ta riau a, a bulah chuan a lungngaih hman loh reng reng, nuihna tur hlir a ni mai. Ka chhungte lah chuan kan inngaizawng emaw an lo ti hmanhmawh a, chaw eia sawm turin min ti chhen lehnghal. Kan nih loh thu ka sawi ka sawi pawn, an ngaithla duh tawh ṭhak lo.
Naktuk maia a haw tur thu a sawi vang chuan chaw eiah chuan ka sawm ta tho a, ṭhian chaw ei tura sawmah ka inngaih laiin ka chhungte erawh chuan an lo ngai ve lo nasa mai a, min chhaih reng hlawm a, ka pi kha chu la awm se a hau hrep tawh ang maw le.
Chaw eikham chuan kan in tual zawlah ka ṭhutpui a, thla a eng bawk nen, a nuam phian a. "Kimkim", a tih chuan ka en vat a, "Tunah hian bem ta che ila, a pawi i ti ang em?", a ti a, a sawi teh thut a, ṭawng ngaihna ka hre lawk lo. "Maw?", ka ti thei ṭawk, "Ka duh che", a ti tawl a, ka hamhaih leh zual.
Engmah ka sawi loh avang chuan, "Min duh ve la", a ti leh a, a thu tak hmel em em mai bawk si a, "A theih loh", ka ti phawng a, ka ding chhuak hluai a. "Ka... Eng lo...", ka thaw chhuak halh a, Nathan chu rawn ding chhuak vein, "Ka tih palh, i rilru tihbuai ka tum lo a nia, ka tih palh lutuk, mahse midangin min neih khalh che ka hlau em a, ka sawi chhuak ta mai a nih kha", a ti a, a nui suk bawk.
Engmah sawi lo chuan ka ding ngawi reng a, "Tunah min duh ve loh pawhin min duh hun ka lo nghak mai ang che, mahse kumkhua chuan min nghahtir lo la", tiin ka biangah chuan a rawn dawm a.
"Ka duh thei lo ang che", ka ti deuh tawp a, ka biang a dawmna chu a la sawn a, min melh chhuk run bawk. "Nathan, ṭhian hi a tawk viauin ka hria", ka ti leh thlawt a, kan boruak chu a hahthlak ngawih ngawih.
"Eng vangin nge min duh theih loh ang?", a ti thum dut a, "Hmanni lawkah kan inhmelhriat chauh a, engtin nge..?", ka tih lai chu lo pawt chatin, "Tunah min duh lo mah la, min duh hun ka nghak ang che ka ti reng a lawm", a ti hulh a, "Nang pawn engtin nge min duh nghal ngawt theih?", ka ti a, kan inhriatna thla khat pawh a la tling em em lo a, hetianga min duh nghal ringawt hi chu ka awih thei lo a ni.
"Ka thil duh tawh hi chu ka duh satliah mai ngai lo, ka atchilh bur zel. Hmeichhe laka tiang rilru ka putna hmasa ber i ni, kei pawn mak ka ti, ka chhungten hre ngat phei se la chuan mal an sawm duh hial ang che", a ti duah a, a nui deuh suk bawk a. "Hriat chian pawh min la hre chiang lo a, kan inhriatna lah a la rei lo",ka ti leh a, "Hre chiang tur chein kar khat hetah ka rawn cham reng a lawm, ka hre chiang che a, ka duh che", a ti a.
Ka ngaina a, a bula awm pawh nuam ka ti, mahse....
"Mipa pakhatin a tihnat vang mai che khan mipa zawng zawngin an tina vek dawn che tihna a ni kher lo a nia Kimkim", a tih chuan ka melh deuh kawk a, "Eng maw?", ka ti chhuak hluai a, "Ka hre vek, Duhsakin min hrilh vek tawh", a ti a, Lalduhsaki mai mai chu aw... A va han ṭul lo ṭhin tak.
"Tina lo tur che chuan ka tiam lo ang che, mahse ka phatsan lo ang che. Ka thil atchilh tawh chu ka thlahthlam mai mai ngai lo, min ring ngam a nih phawt chuan", a ti nghet leh charh a. "Min duh thei lo", tih bak sawi tur ka hre lo.
"Ka thei a nih si hi, ka thunun theih piah lam a ni tawh", a tiril raih a, ka ṭah a chhuak ringawt lehnghal. Engtin nge maw he pa hi ka hrilhfiah dawn ni, ka chhuanlam tur zawng zawng pawh a lo hre sa vek bawk si.
Ka tihngaihna hre tawh lo lutuk chuan, "Pangpar leh hmeichhe mawina pawh i hriat loh kha", ka ti ringawt a, "I mawina ka hre thung a lawm", a lo ti hmiah, ka dang chiang kher mai.
"Bakah i nu leh pate phalna thlapa bem che ka nia, ka beidawng dawn lo reng reng, min la duh ve ngei dawn", tiin ka hmui a rawn tawk zauh a, ka ding khawng at a, chet ngaihna pawh ka hre tawh lo, "Kan inhmuh leh hma loh zawng, dam takin le, ka duhnu", a ti a, a kal sawn zui a, "I chhungte kha min lo mangṭha-sak mai rawh", a tih chuan ka harhfim chiah. Gate bul a lo thleng der tawh, a kal liam lai chu ka thlir zui vawng vawng ringawt.
Nathaniel Vanlalthlamuanpuia, ka rilru a van tibuai tak, mi fel tak chu a ni ngei a, nichina a thusawi zawng zawng pawh kha a tih takzia ka hai lo. La inhre rei lo viau mah ila, a bulah chuan ka hlim a, ka him bawk. Ka duh ve tih pawh min fawh zauh laia ka lungphu su dup dup khan a rawn nemnghet chiah a nih kha. Mahse, ka na nawn leh ang tih ka hlau tak zet, ka chhungte lah chuan min duhpui em em mai bawk si a. Mahse, ka duhna aiin ka hlauhna hi a la lian zawk tlat a ni.
Inngaihzawnna hian tawp chin a nei a, ṭhian erawh chuan tawp chin a nei ve lo. Ṭhian nih ka duh a, mahse ani lah chuan, "Ṭhian chauh atan chuan i laka ka rilru puthmang hi a thuk tawh lutuk", a ti tlat bawk sia. Mahse, zinga a message "Good morning ka la duat tur-nu", tih leh zan mut dawn awm vela "Muttui ka la duat tur-nu", tih a rawn thawn chuan min ti hlim veng veng zel.
Tuk tin zan tin chutiang message chu min rawn thawn ziah ṭhin a, a changin ka chhang let a, a changin ka chhang let lo a. Mahse ani chu a tih ngai a rawn ti reng tho, nat nawn leh ka hlauhna hian kan inkar hi a la tizau mai mai a ni. Ti hian beiseina siam lo ila, a la beidawng ve leh mai ang.
Hetah thla khat awm tling veleh tawh a, khu lama kan pi pawn an buai thu leh chhuk thlà vat tura min duh thu a rawn sawi reng a, ka nu leh pate ka rawn chuan heta awm tawh mai turin min duh a, ka contract a lo zo bawk si lo.
"Thla hnih vel chiah thawh ka ngai tawh tho a, ka contract a zawh veleh ka lo chho nghal ang a, hetah in bulah ka awm char char tawh ang a", tiin ka nu leh pate chu ka hmin thei hram a.
Ka pi thlan ka tlawh a, "Pi, ka van ngai tak che, i awmna chu a nuam tawh awm bik si a, apu nen pawh in awmdun leh thei tawh bawk ang a tiraw? Min ngaihna chang pawh i hre tawh lo ang a? Pi, Gujarat-ah ka kal leh tawh dawn a, mahse ka lo haw leh vat ang, apu kha min lo biak dawn nia", tiin ka mangṭha a.
Ka haw lam chuan Thanthani nen kan intawk a, ka hmuh hnuhnun ber ai khan a lo thau tawh a, naupang kum 5 mi awm vel hi a kai bawk a, Rammuana fa a ni ngei ang. Min biak tum chuan a ang zuau tawh a, mahse hre lo awm ang hmakin ka kal pel a, khatih laia ka rilru nate kha nimin ang maiin a rawn chiang nawn leh hian ka hria.
Ka insiamte chu ka che sawt thei lo, Nathan-a lah ka chhuk tur ka hrilh loh avangin a lo thinrim ve leh ringawt a, hahthlak hlawm lutuk mai. Ka chhuk peih lo mood off sa nen chuan ka thinrim ṭun a.
Ka pi khuma mahni chauha ka mut lai chuan ka pi lehkhabu kha ka hre chhuak thut a. Pawh dawh chu hawngin, lehkhabu chu ka la chhuak a. Ka'n keu chu, ka tetlai thlalak te, ka piancham kan lawm ṭuma kan thlalakte chu a lo inbel tuar a. Hmeichhe duhawm tak ka nih thu te, ka pu awm tawh loh hnua ka tihhlim ṭhinzia te, ka chanchinte chu a lo inziak tlar dul a. Rammuana leh Thanthaniten min phatsan laia ka awm dan hmuh hrehawm a tihzia te chu a ziak a.
"Bawihno, hlimna min thlentu hian hlim i phu asin, mite hi i tan an va nunrawng em tiraw? Mahse maw Bawihno, i thinlung tinatute chu ngaidam rawh aw, ngaidam theitu mihring chu mi ropui tak a ni ka tih ṭhin kha, i ngaidam lo a nih chuan engtikah mah i hlim thei ngai lo ang. Tinatu che chu nakinah an tihnat man che an la hmu em em ang, he khawvel hian i ṭhat hram hramnate a la rul let leh ngei ang che. Nangmah chauh lo chu i hlimna dal thei an awm lo a nia, i Siamtu hre rengin i ṭhatlai chen la, hlim takin awm reng rawh, i hlim hi ka duh ber a ni a si a", tih hi a tawpah a lo inziak a.
Ka mood chu a inthlak danglam vek a, ka dam huaiin ka hria. Ka chhiar nawn a, ka chhiar nawn leh ṭhin, tunah hian ka pi kha la awm se chu ka kuah vawng vawng ngei ang.
A tuka airport pan tura ka insiam lai chuan ka flight an delay thu min rawn hrilh a, naktuk tuk leh lamah daih a ni an sawn.
Nathan-a lah chu a lo lawm em em lehnghal a, naktukah photo exhibition a nei dawn a, kal ngei ngei turin min ti a, "Sawmna a ni lo, thupek a ni", a rawn ti bur mai, a rawn inla thu ve em em ringawt.
Ka chhungte ka hrilh chuan an lo phal nasa khawp a, ro an rel nghal zung zung a. Vawiin tlaiah Aizawl pan nghalin ka nutei te inah kan innghat a, naktukah Nathan-a exhibition neihnaah ka kal ang a, a tuk lamah Airport kal nghal thei turin.
Pi hmuaki dawr kawt kan tlan pelh dâwn chuan, Thanthani Pi Hmuaki dawr aṭanga a lo chhuak ka hmu a. A chanchin ka hriat danin an fanu kum khat a tling ṭawk ang tih-ah Rammuana chuan a uiresan leh a, tunah Rammuana chu home-ah a awm mek bawk. Ka pa chu motor tiding turin ka ti a, motor aṭang chuan ka chhuak vat a.
Thanthani chu ka au ding a, an zawn ka va thlen chuan Thanthani chu ka kuah nghal tawp a, "Ka ngaidam che", tiin ka phun ri sep a. Chutah Thanthani chu a rawn ṭap chhuak hawk a, "Ka tih palh lutuk, ka duh reng vang a ni lo, ka tih palh lutuk", a ti zung zung a. Kum nga liam hnuah kan inṭhianṭhatna chim tawh chu sak ṭhat a ni leh ta. A fanute chuan a chhun takzet, hun ka ngah loh avangin ka kalsan ta a, ka thawl deuh hawk mai.
Tunah chuan keimah lo chu ka hlimna dal thei an awm tawh lo, ka pi sawi ang chiah khan.
A tukah chuan Nathan-a photo exhibition-ah neihnaah chuan ka kal a, traffic jam vangin ka nang hman lo zui. Mahse, Nathan-a chuan min lo la nghak reng a, "Awi, ka tih palh, traffic a jam turu lutuk a", a zawn ka thlen chuan ka ti nghal tawp a, "A pawi lo, a hun takah i lo thleng zawk", a lo ti then a, "A ni maw?", ka ti haw a, bu nghatin studio chhungah chuan min kai lut a. Thlalak ho ka hmu chiah chu.... Ka thlalak a ni em? A ni thei lo.
Ahmedabad Airport-a ka phone hmang lai te, Kolkata ami te, lengpui Airport ami te, kan ina ka ṭhu lai te, luia kan kal laite. Awi, heng zawng zawng hi engtik khan nge a lo lak hman le? Ka hmel chu a lang lo na a, keimah ka nih tih erawh ka hre thei.
Nathan chu ka en a, min lo en ve reng a, "Engtin nge?", ka ti ringawt, sawi tur ka haih chham deuh a ni. Chutah Nathan chu rawn kal hnaiin ti hian a sawi a.
"He hmeichhia hi ka hmuh tirh aṭang tawh khan ka mit kha a la nghal tawp a, mak tak maiin kan ṭhutna a lo inang chiah a, thlawhna thlawh chhuah dâwn khan a hlau em em a, ka nu min hriat chhuahtir hial. A kut ka vawn lai khan hetiang em em hian ka rilru leh ngaihtuahna a luah hneh ang tih ngaihna ka hre lo. Ka hriat zel dan chuan a thinlung chu hliam tawh hnu a ni tih ka hre leh zel a, kha hmeichhia a nuih zawnga a hmel nung sarhte kha nitin hmuh ka chak a. Ka pain ka nu kut a chelhsak a, a venghim ṭhin ang khan, he hmeichhia hi venhim ka duh. He hmeichhia hi ka ta ni thei se chu he hmangaih bik awmna khawvelah hian ka hmangaih bik hliah hliah tur".
A sawi tawp lamah chuan min en a, a mitmeng aṭanga min duhzia lang chhuak chu ka hai lo. Engmah ka nih loh vei nen, heng thil zawng zawngte hi ka phu mawlh lo a ni. Mahse, hmangaihtu chu tu nge hnawl thei ang? Hmangaihtu hnawltu chu khawvela mi â ber a ni ngei ang.
Han sawi ṭan dan tur mai pawh ka hre lo, ka lai deuh tlat a, amah zawk chuan, "I laka ka rilru puthmang hi chiang zawka hrilh che ka duh a, chiang taka ka hrilh che a nih chuan nang pawhin chhanna mumal min pek theih tawh ka ring. Mahse, 'Ka duh thei lo che, min duh thei lo chuti khati, ṭhian ni zawk ang eke bale', tih awih loh, chhuanlam a tling lo. Min duh lo chuan sawi tlang tawp rawh, mipa puitling ka ni a, ka tuar thei em em ang " a ti leh duah a.
Ka nui deuh hak a, " Ka thutak ve a nia ", a tih phei chuan ka nuih a za zual sauh. Amah pawh a nui ve ta tawp a, ka pi sawi ang khan keimah tih loh chu ka hlimna dal thei a awm lo. Nathan-a hi ka kaltir a nih chuan ka na dawn tho, natna hi chu mihring kan nih chhung chuan a awm reng dawn.
A hmaah chuan pen hnaiin a nghawngah chuan ka kuah a, ding dihlipin a hmui chu ka han tawk zauh a, a mak ti hmel chuan nuih a ti za kher mai. Inlak hran ka tum chuan amah zawkin min pawt hnai leh a, "Kha kha eng nge a awmzia?", a ti a, "He hmeichhia hi i ta a ni e", ka ti sap a, a hlim hmel chuan hlimna chhiar sen loh min la pe dawn tih hi ka ring tlat a ni.
Min kuah a, min fawp a, min kuah leh a, kan inthlah hlei thei lo. Nakinah chuan ka la na leh mai thei, mahse nakin chu nakinin a la hril ve mai ang, tun hun hi a lawm pawimawh ber chu. Naktukah ka hlim dawn lo a ni mahna, vawiinah ka hlim tho a lawm, chu chu a tawk chiah.
Kan hun neih ang ang chu am takin kan hmang dun a. Anu thlanahte min hruai a, a nu bulah chuan ti hian a sawi a, "Nu, i la hria em? 'Bialnu ka neih dawn chuan nangmah ang ka duh', ka tih ṭhin kha, hei, Kimkimi a nih hi. A hmelṭha em? Amah ka hmuh apiang hian i hlimthla ka hmu ṭhin, ka pain a venhim ṭhin ang che khan ka venghim ve tlat ang".
Mipain a nu hnenah a bialnu a humhim tlat tur thu a tiam a nih chuan, ka ringhlel lo e.
A tukah chuan airport lam kan pan a, heta ṭangin darkar khat leh a chanve tling lo hret tlan a ni a, mahse ka flight hun kha dar 10 a nih avangin kan kal hma deuh a, traffic jam tur zawng zawng nen kan ngaihtuahin dar 7 velah kan chhuak a.
Airport kan thlen chuan dar 9 vel a ri tawh a, Nathan-a chuan min lo call a, ka ngaihtuah lai tak lehnghal. Ka pick up rual chuan, "Ka rawn thlah hman lo che, Bawihi", a rawn ti zuai raih a, "Ti nge?", ka tih chuan, "Thil tih tur pawimawh deuh ka nei a, ka tih palh lutuk", a rawn ti a, ka hnual nghal rawih. "A pawi lo", ka ti tak nain pawi ka ti, thla hnih lai kan inhmu dawn lo a n ia, kei aia thil pawimawh chu thil pawimawh tak a nih ngei ka beisei.
Ka chhungte nen chuan kan inthlah a, ka nu chu a ṭap ringawt a, kan han inhnem leh te te a. Bobo-a leh Duhsakin ka haw leh huna ka hawn tur min chah ṭeuh a. Ka chhungte chu vai kiangin Airport chhungah chuan ka lut a, ka bungrua leh thil dang tih ṭul ang ang ka tihzo a, nghahkhawmnaah chuan ka ṭhu ta vang a.
Kum nga liam ta khan, rilru na takin Mizoram ka chhuahsan a nih kha. Khaknain ka khat a, ṭhiante zingah nui ve bawk bawk ṭhin mah ila ka hlim ngai lo. Zan tin ka ṭap a, zing ni chhuak eng mawi tak hmuh kha ka tan chuan natna mai a ni ṭhin. Tunah chuan hlim takin Mizoram pawh ka chhuahsan, ve thei tawh ang a, hlim takin ka nui ve tawh ang a, zing ni chhuakte pawn beiseina thar min pe tawh ngei ang.
Thlawhna chhungah chuan lutin ka ṭhutna ka zawng kual a, ka ṭhutna turah chuan mipa pakhat hi a lo ṭhu a, ṭhu sawn turin ka ti ngam bawk si lo, a bulah chuan ka ṭhu thla ta tawp a, tukverh bula ṭhut ka duh tehreng nen. Ka ṭhu fel chiah chu perfume rimtui ka tih deuh kha ka hria a, ka bula ṭhupa chu ka en vut a, a hmel ka hmu thei lo. Mask a vuah a, luhkhum a khum bawk a.
"Amah a ni lo, Lalrinkim, i ngaihbel mai mai a nih kha", ka ti rilru mawlh mawlh a. Cabin crew ten an tih tur ang ang an tih hnuah thlawk chhuak tur chuan kan inbuatsaih ta hlawm a. Ka hlau leh hle tawh, ka maimitchhing a, ka mitthlaah Nathan a rawn lang a, ka zia deuh chuan ka hria.
Kan thlawh chhuah dawn chiah chuan ka bul ami pa chuan ka kut a rawn vuan a, ka hawi phei chu, a lukhum leh a mask kha a lo phelh tawh a. "Nathan", ka ti hluai a, a lo nui sun sun mai, "Khuanu ruat", a ti sup a, "Hmela, hei hi maw thil pawimawh deuh chu", ka ti a, ka ṭawng ring leh deuh tawh a niang, Nathan-a chuan ṭawng zawi deuh turin min ti a.
Ka beng bulah, "Ka bialnu hian thlawhna a thlawh chhuah dawn lai hian a hlau thei lutuk a, a hlauhna tikiang turin a kut ka vawn a ngai a, eng pawh lo thleng se, a kiangah ka awm reng a ngai a, chu chu ka tan a pawimawh a lawm", a rawn ti sa sa a, a romantic em em reng mai zawng a nih hi. Mi dang awm ve lo se chu ka fawp vawng vawng ang mawle.
"Eng pawh lo thleng se, he kut hi ka chelh reng ang", tiin ka kut chu a vuan nghet sauh a.
A TAWP TA.
(Hi, min la hre ve hlawm em? Kumtirah khan thawnthu ka rawn dah ve zuai tawh a, mahse ka chawlhsan leh ta daih a. Hei, tunah ka rawn thar thawh leh a nih hi, min lo chhiarsak leh avangin ka lawm e, a ngaihnawm inti emaw ti lo emaw comment kha min lo hnutchhiahsak ve hram dawn nia. Duh khawp lohna lai pawh in neih ka ring, lo sawi hreh lo ula, ka lo inzir zel ang.
Nakkumah a bung awm ang khan rawn ziah ve ka lo tum ang, chhiartu zawng zawngte Krismas nuam deuha hmang turin ka duhsakna ka hlan a che u.
Chuan thawnthu ziahna lama min phurpuitu ka unaute, ka ṭhiante leh ka nute zawng zawng chungah he mi kaltlang hian lawmthu ka sawi bawk nih rawh se. An inhre mai ang
Kan inhmuh leh hma loh zawng, dam takin le.)