Chapter - 14
Ziaktu : ilefi imoz
(Recap : "Ngaihzawng pawh neih hma hmaa pasal neih lo sawi te chu a" nui lui hak haka ka tih chuan min lo pawt chatin, "Bem che ka tum hauh lo ania" a lo ti leh daih a, a thusawi dan kalhmang hi ka hrethiam lo, zanina a chêt dan pawh hi a awmzia ka man pha lo reng reng.)
"Min hriaa ka hre bawk che, i rilru ka hriaa ka rilru i hre bawk. Mahse kan inkârah hian inlaichinna thûk zawk siam ka tum lo, nangpawhin i duh ka ring lova.." ti leh charh charha min en reng tâkah chuan thil awmdan chu ka hrethiam ta ruak a, min duh ve thu a sawi, mahse a ngaihzâwng tur atan êm chuan iai deuh anih hmel e.
Keipawhin ka duh a ring lo maw? Ni lo, ka duh, ka duh alawm, ka duh lutuk tlat, chu chu zantina ka lo suangtuah ţhin kha a ni! U Aron-a nen hian pangngai takin inngaizawng ve ila, mite an inngaihzawn dan ang hian hlim deuhin sunday tlâiah te lêng dun ve ţhin ila, chutiang chuan duhthu ka lo sâm ve ţhin, ka châk lutuk. Mahse ngati nge ka duh loh a rin? Ka hrethiam lo takzet a ni.
Sawi zawm lehin, "Duh leh mamawh nei ta la, i duh nge i lei ang a, i mamawh?" Tiin min zawt teh daih a, ka nu hian min hrilh ţhin, 'Duh leh mamawh hi a hrang a, mamawh zâwng anih phawt chuan neih zawng zawng pawhin lei tur, duh mai mai anih chuan pawisa chuangliam kan neih huna leiah khêk tur' a ti ţhin.
Chu chu u Aron-a zawhna chhânna chu anih ringin, "Mamawh aniang chu" ka lo ti sep a.
"A dik chiah, mamawh bâk thil chuangliam lei turin mi hausa kan ni lo va, kan thil duh nazawng kan lei thei lo, chu chu leilung pian ken a ni miau sia tiraw?" tiin a nui leh rih a, a nuih hi a za tak tak hlawl lo, ka mood a tibuai zo vek tawh. Nichin mai kha chuan ka hlauthawng em em a, tuna ka awmdan erawh hi chu ka sawi thiam ta hauh lo.
"Tuition ka pe tawh dawn lo va, zanin aţang chuan rawn kal buai a ngâi tawh lovang, zantina nula rîm ve tawh ka duh" a tih leh phei chuan mengphâwk nasa tawh tak ka ni!
"Eng nge i sawi awmzia? I rui emni?" Ka ti ta thlâwt a, zu rim a nam lova a in ngâi hek lo. Mahse a awm dan hian awm nuamin min awmtir thei tlat lo a ni. Damdawi te a lo ti ve zawk em mawni chu le?
"Enge? Nula rîm hman lo lêka zantin ka buai te chuan nupui tur ka hmu zo ve nâng! Min khawngaih lo emni? Miin, 'Amon-a chu a lêngtar' min ti se min lo zahpui lutuk dawn asin" kiai suk suk chung chuan a lo ti a, 'Amon-a' a inti leh ta!
In kan thlen thleng chuan kan ţawng zui tawh lo va, kan inah min thlah tlangin a haw thla leh nghal a, ka awm a nawm loh êm avang chuan chaw pawh ka ei mumal lo. Ka chau a, ka taksa mai pawh ni lovin ka rilru thleng hian a chau fullfil vek! Lalchaurau-i ka ni ringawt alawm!
Inbualfai sawk sawkin khumah ka inthawlh nghâl thên a, mutthilh ka tum ngial pawn ka thei tlat lo. Dar kua a rik thleng pawh chuan thlan sa bat batin ka la meng kar a, sana chek leh tlak tlak ţhin bâk thâwm dang hriat tur a awm miah lo bawk.
Ka room kawngkhar rawn kik dat datin ka nu chuan phone call ka dawn thu min rawn hrilh a, u Aron-a anih beisei ru taka tho chhuak vatin kawngkhar chu ka va hawng a, "zingah rawn charge mai rawh" tia phone min pein an room lamah min phei san leh nghal a, rang deuha phone screen ka en chuan u Aron-a ni lovin Châmi zawk a lo ni.
"Hello"
"Sawmzel, enge in awmzia nangni pahnih hi? In inţhen emni?" Châmi chuan a rawn ti thâwr a, ka nui hak ringawt.
"Sawi chiang teh in awm dan hi ka hrethiam lo, in inţhen vang emni tuition pawh a tih tâwp ringawt a? In mak hi ka ti ê, in ni ve chauh emaw tih laiin in lo inţhen daih a" a rawn tih leh bawrh bawrh tâkah chuan, "inţhen tur pawhin kan inngaizawng reng reng lo, kan inkarah engmah a awm hleinem" ka lo ti halh a, mak a rawn tih hmel nasa mai!
"Awi, in rawn haw tlâi sia kawng lakah in rawn inhau thinrim anga in inţhen ta mai emaw ka lo ti hman lawm, ngati nge chuti si u Aron-a hi a van mak âwm em em" a rawn ti bah leh nak chu hrethiam lo zetin, "engtin nge a awm a?" Ka ti lêt thuai a.
"A status kha va en ve mai rawh ka sawi thiam duah lo e a, thil ka lo thawn bawk ang che" tih leh phone dah a rual a, a ngaihna hre lo deuhin u Aron-a status chu ka zawng ta tho a, ka hmu vat bawk.
A update na a la rei lova, minute riat liamta ami chauh a ni. Eng tak ni ang maw ti a ka view sak chuan Nuthlawi u Muani dawra nui sâng chunga an ţhu lai thlalak hi a lo ni a, U Muani, amah leh a ţhiante pahnih kha an ni a, amah chauha lêng ni lo mah se hrehawm erawh ka ti ru khawp mai!
Caption engmah a dah tel lo va, chupawh ni se ka thîk tho tho, ngati nge ani berkher an rîm le? U Muani rîm a duh vanga tuition te pawh min bân pui daih a ni thei ang em? Zawhna hlirin ka khata ka rilru lah chu a na zual tulh tulh mai bawk.
Châmi chuan message min rawn thawn a, ka han open chuan u Aron-a te thlalak tho kha a lo ni. Mahse status-a hmangtu chu U Muani ve thung a ni a, caption-ah chuan, "rei tak hnuah" tih a ziak kalh lehnghal!
Thlalak ka thlir vang vang laiin Châmi bawk chuan, "Nuthlawi u Muani hi chu tlangval hunter a ni ringawt! Amah vanga inngaizawng inţhen ta an tam tawh tehreng nen hian, a dawra tlangval lêng lût apiangte hi thlâ a lo lâkpui a, status-ah a hmang chuai chuai zel, a zak ngai bawk si lo va maw, kan mo a ni reu reu ang tih te ania ka hlauh" tih message min rawn thawn leh a.
Chhan lêt dan tur ka hriat loh êm avang chuan, "Râlkhat aţanga mî status va delete sak tawp dan hi a awm em?" Ka va ti ta ringawt a. Mittui per chuai chuai lem rawn thawn lêtin, "ka hre bik lo, a awm lo aniang, awm se chuan u Tom-a status saw va delete sak daih ka duh, thlâm chhaka ka zung lai thlalak kha a rawn hmang a, caption-ah, 'U Kâwlte' tih chiah a dah bawk sia ka ngei tak tak a ni" a rawn ti ve luam a, awmhmunah ka lo nui hak.
Chutiang te han in status sak reng reng! A number neitu an lo tam viau phei chuan Châmi tan a mualphothlâk ve khawp ang le.
"Tui deuhin mut tum rawh, khua a vâr ang a, engkim a dik leh thlap mai ang, u Aron-a a rawn haw veleh information groupah khan ka rawn report leh dawn ania" tih rawn thawn lehin, "aw le muttui" tiin ka reply a, a seen a, a reh zui mai bawk..
Kei erawhin u Aron-a status chu vawi eng emaw zat ka ennawn tlut tlut a, nuthlawi u Muani berkher a rîm chu ka tuar dam thei ngang lo a ni.
Tlâia a thusawi, duh leh mamawh tih vel te kha ka ngaihtuah kâi zel a, ka chhût nasat poh leh ka bo thui ting a ni mai bawk si, zanin atan chuan keimah nih hi a nuam thlawt lo a ni ber e.
Kar khat zet a liam ta a, ka mize danglam sâwt lutuk chu ka chhungte mai ni lo, keimah ngei pawh chuan mak ka ti! Ka ţawng tlêm sâwt hlê a, sawitur ka hriat loh vang erawh a ni hauh lo. Sawi lo ila ka hlim ka ring a ni ber ang chu, ka nun a zâwi-âwi hlê a, khawlai ka ngaina ta lo viau a, thil lei tur takngial pawhin pâwnah ka chhuak peih tawh mang lo. Ka nuin min hauh châng pawhin ka hnial lêt ngai tawh lo va, mak min ti deuh aniang ka awmdan dik loh chhan chu min zawt deuh reng zel.
Pi leh puten, 'Zawltling vawn nat' an lo tih ţhin kha tun hma chuan ka lo hrethiam ngâi lo va, a awm tak tak pawh ka ring ngai lêm lo. An ngaihzawngte an ngaih vanga na ta lua nia insawi ka hriat ţhin te pawh kha ka lo nuih pui vel mai mai ţhin a, tunah erawh a takin ka tawng ve ta!
'Zawltling vawn nat' an tih hi taksa pâwnlam na vawng vawng leh khawsika tlun vut vut ang kha a lo ni hauh lo va, tûma hriatpui loh hian kan chhungril nun hi a châu ngawih ngawih a, kan zuai a, kan chul a, kan rawp ral lo chauh a, kan na nget nget zel mai a ni!
"Dawrah Dâl leh Âlu va lei rawh, neutrela i lo lei tel dawn nia, i ei turin" ka room kawngkhara rawn dâk dêk dêk chungin ka nu chuan a rawn ti a, hnial buai lova tho chhuakin a pawisa min pek chu ka la mai a, dawr awmna lamah ka phei ta nghâl bawk.
Dawr chhungah chuan rin lâwk ang ngeiin kan tlangval senior leh pathlawi pahnih te chu an lo ţhu leh rûn tawh a, an common ve ngawt mai!
"Sawmzeli glow-up sâwt zia hi chu aw, i hnute pawh a len belh deuhin ka hria" U Maliana chuan a lo ti nghâl lûng lûng a, melh pawh ka melh peih lo. Ka lei tur ho chu ka en kual san daih a, nidang ang bawkin titi zahmawh deuh deuh sawiin an nui leh huah huah tawh..
Pawisa pea kal mai ka tum chu, "Sawmzeli te ho ka hmu tawh lo tur ringawt te hi hrehawm ka ti" dawr nghaktu U Sêni chuan a lo ti vang vang a, "ngati nge? I zin dawn emni a?" Mawi hawihah ka han zawt ve a.
"Singapore-ah ka kal dawn, dawr pawh hi kan tiral dawn a, U Muani saw a rawn insawn phei ang, atan Vengchhak aţanga Venglaia innghah reng kha a ninawm ve deuh aniang, kan tawp tur a hriat rual rualin ram neitute a lo be fel nghâl thlap a, kawng lehlam takah chuan a tihzia angreng, keini kan tawp daih chuan in vêng ho tân dawr dang pan na a hla dawn lutuk a" ti barh barha a nuih lai chuan nuih ve ka tum ngiala ka thei lo chiang khawp mai.
"I ngaihawm dawn hle mai" ti sepin ka chhuak zui a, ka rilru tibuai zual tur tinga dawrah te ka lo kal reng reng chu le!
Hetah u Muani'n dawr a rawn siam anih chuan kan awmna aţanga dawr hnai ber a ni dawn bawk nen kan dâwr lo thei dawn lo va, a hmel ringawt pawh huat tawh sa nâk alaiin kan inhmu chhên dawn anih hmel e! Hetiang hian mipa pakhat lek vangin ka awm ang tih ka lo ring pha ngai lo kha ania, min vahan thlâk danglam chiang hlak hlak tak êm aw!
Zanah chuan Châmin ka nu phone-ah a rawn call leh a, "Nuthlawi u Muani'n in vêngah dawr a rawn sawn dawn tih kha i lo hre tawh em?" A rawn ti nghâl thâwr a, ka hriat tawh thu ka hrilh chuan, "ka peih loh pui che ê, a hmel hmuh ringawt mah itan a nawm loh dawn nen, U Aron-a lah hi a rawn thleng chho reng dawn tih hriatsa ania, u Muani lah chuan min rawn bia a, karleha a dawr sawnnaa pui ve turin min rawn sâwm mawle a zah theih lohzia chu, ka pui lo viau ang" a rawn ti barh barh a, kei ai mahin a lo ngei zawk emaw tih hial tur a ni.
Rei fê u Muani kan rêl hnu chuan, "I ze pangngai i hloh nasa lutuk tawha kawm i nuam tawh lo, hmana ka ngei deuh ţhin Malsawmzeli kha ni leh rawh, i ngeiawm a, tâwn luih i harsat hmelin i chimawm tel bawk a, u Muani tana zuamawm lo thei ang ber tura i awm a ngai ania, naktukah ka rawn leng anga plan kan siam dawn nia" tiin min fuih sauh sauh a, ka pawm ta khawp mai.
U Aron-a vanga hetiang ka nih hma kha ka ngai ţhin, vei leh lungkham em em ka nei ngâi lova, ka duh apiang kha zak miah lovin ka ti pawp pawp zel bawk. Khatih laia keimah kha ka ngai a ni, Châmi sawi ang hian awm ka tum chhin ang a, ka theihna apiangah u Muani pawh ka runluih ţhin ang, chutiang tur chuan rilru inpuahchahna ka nei hmin ta hmak bawk.
Zirtawpni a ni a, nimin lamah u Muani a rawn insawn phei a ni âwm e. Puih tum lo viau anga insawi Châmi chuan a pui ta tho a, u Aron-a a hman loh vangin an chhungkaw aiawhin a rawn pui hrâm niin a sawi.
"Ţawkpui nena kan pawlh tur nghapih pack tê chi ang kha va lei rawh khatia lâm hawh hawh lo khân, i zia hi chu a dangdai ve ngawt mai, kar hmasa lawkah biak ţawng theih loh khawpin i zia a zâwi a, tunah erawh chîp hman lo khawpin i kâ i ânga i lâm leh ang hawr hawr a. I inti mitak ve dawn ţan aniang chu ti a ka lo lâwm ve hman tehreng nen, i zia hi engtin nge maw ka thlâk sak dawn che ni?" TV hmaa ka lam hah hah laiin ka nu chuan a rawn ti bawrh bawrh a, ka sawi tawh angin ka ze ngâiah khân kir leh ka tuma khawvel ka runluih ţhin, ka nu thinin tuar leh viau dawn lo mah se ka nihna pangngai hi ka duh zawk miau a, ka cool raih tawh dawn lo.
"Kar hmasaa ka mize cool deuh te kha chu maw nu, trial card mai mai anih kha" tia a pawisa min pêk ka lo ban lai chuan chek tlak tlakin, "eng card a?" A lo ti hâ a, "i hrethiam ve chuang lovang, hrim hrimin, mî kan broken heart ve em ema inla mitak tur emaw te min lo tih daih, i fanu natnaah hian i lâwm zawk a ni maw?" Ti leh hrâma pawna ka tlânchhuah chuan a rawn au zui lâwng lâwng a, Pa Pianga te in kawt ka thlen phei hman tawh avangin a thusawi erawh ka hre pha tawh lo.
"Sawmzeli hawh hawh chu, khawiah nge i kal dawn i va inchei ve?" An sumhmun aţanga pa Pianga'n a lo tih chuan ka inthlêk thuak a, ka mutkawr ka la thlâk lo va, ka inchei awkawng lo, min lo ît a ni chiang mai.
"Awi pa Piang, mual vêng nu ho ţawngtheihzia chu maw, plastic surgery ka tih vanga hmelţha ang te'n min lo sawi a, ka zak tawp" nui hawr hawr chunga tiin ka kalpel a, a zawhna leh ka chhânna chu in tu-ha lo a ti ve viau ang.
Pawisa vâwr hah hah chunga dawr chhung ka luh chuan a hmaa luahtu te ai fê khân bungrua a lo inrem muk zawk a, rawng an hnawih thar sar bawk nen a changkang ru riau. Nuthlawi u Muani dawr ni kher lo phei se chuan nuam ka ti viau ang, a nghâktu hian zir se dawr chu a nuam a ni mai.
"Enge i lei duh? I duh duh kha lo thlang rawh kan zuar chikim ania" pawisa bâwm bula ţhu chungin Nuthlawi u Muani chuan a lo ti zat zat a, a ţawngkam hlêk hlûak te chu ka ei lo laklawh aniang, ka hmu milem vek. U Aron-a nen zana a dawra kan kal ţum te kha chuan melh pawh min melh ţha duh lo va, tunah lêm min lo tiţha hluak lawi a, ka ei thlâwt lo.
"Eng lampang nge i duh?" a rawn tih leh chuan harhchhuak zawkin ka hawi lêt thuak a, enge ka lei tur kha? Ka lei tur ber ka hre tawh miah lo, enge ka nu khân min chah?
Nuthlawi u Muani chu tham loh hmel deuha melh lui vak chungin, "ka duhzawng i nei lo anih hi" ka ti deuh nghat a, ka chhuak zui nal nal bawk.
A vawikhatna aţanga in dah zero nghâl êm chu ka duh bik teuh lo, vanneihthlak takin ka thluak hi mipangngai thluak aiin a lo chak hlauh a, chhuanlam tur hre hlauh lo phei ila chuan ka indah hero to zero viau ang le.
Lu thak lo pui hiat nuah nuah chunga kan veng kawng ka zawh phei leh lai chuan ka thil lei tur chu enge ni ang aw tiin ka ngaihtuah kîr vang vang a, ka hrechhuak zo miah lo lehnghal.
Pa Pianga te in kawt ka thlen chuan ding datin, "Pa Piang, nichina kan inbiak khân ka lei tur ka hrilh mial che em?" Tiin ka zawt ta ngawt a, engmah lei lova ka kîr leh hmêl ka nuin a hmuh huna a awmdan tur ka hre lâwk miau a ni..
"Hmelţha i intih hlarh hlarh viau thu bak i sawi lo" pa Pianga'n a lo tih chuan, "chutin ka sawi loh kha aw, Mual vênga ka tlâng than dan ka sawi anih kha i dawthei ziap zuap lutuk, i biak tlâk loh ve sia, nichina min hmuh te khân, 'enge i lei dawn?' Te min lo tih ve tal tur ania" ti hlak hlakin phûr lo zet chuan kan in lam chu ka pan a, kawngkhar bula ka nu lo ding vung vung chu hreh deuhin ka pan phei hnak hnak a.
"Khawnge i thil lei chu?" Inkuangkuah âta min melh tûr khui chungin a lo ti ţial ruai a, "ka lei tur ka theihnghilh" ka tih ruala a kut a lek vut avang chuan lo bum zauhin inchhungah ka tlân lut fua a, pawisa chu dawhkanah dahin room-ah ka tlân luta ka inkalh hnan nghâl hmiah bawk.
"Mihring pawh hi i ni ve lo em mawni? Thluak chhe tê i nei ve a hmanna tur i la hre map lo zui a, ţawkpui kan pawlh atan nghapih va lei rawh ka ti che anih kha, kha, pawisa hi lâ la, va lei rawh, i rapthlak lutuk em mai" ka room kawngkhar chum pawp pawp chunga a rawn tih chuan, "i duh leh nangman va lei rawh, ka lei âwm lo ê, sâw dâwra nghapih va lei ai chuan a ţawkpui chawpa ei miah loh pawh ka duh daih zawk, nghapih kher kher lehnghal" tiin awmhmunah ţan ka lo khawh ve tlat a, tihngaihna tak a hre bik lo aniang a thâwm a reh zui daih a, chaw ei tura chhuah a huphurhawm leh dawn mange.
Zanah chuan ka pain tapchhakah vawk chaw a chhûm a, kan vawk an la len lutuk loh avangin an chaw bêl pawh a lian lêm lo va, meilum âi a nuam tawk chiah tih theih a ni..
Kawngkhar rawn kik karh karhtu chu ka nuin lo chhâwnin, "lo leng rawh" a ti nêm diai a, Pa Ringa a lo lût dawn emaw ka tih laiin kawngkharah chuan Châmi a rawn dâk paw pheu mai!
"Sawmzeli a awm em? E, i awm elaw?" Tîm hmêl deuha tiin a rawn pên lût a, ka sir chiahah rawn ţhuin min sik hlak mai, eng chu kan hria ni maw?
"Awi nangni pahnih kher kher hi chu inkâwm tawh miah lo mah ula a pawi lo, in â dun si, in sual dûn si, pawisak vak innei si lo va e, inzui tam suh u, Châmi phei chu hmanniah in ţhenawmnu nen in inbakkaih deuh an ti lehnghal a, hmeichhia niha tleirawl nih bawk phei chuan fel tur" ka nu chuan a lo ti nghâl bawrh bawrh a, a duh loh zâwngah hi chuan a sual thei ania, Châmi'n nuam lo a ti ang tih pawh a ngaihtuah leh tawh lo, a duh duh a sawia a ţawng leh phawng phawng tawh mai.
"Awi eng nge hmanni te kha chu, ka thusawi apiang huat tur a lo zawng ve hrim hrim anih kha, an fapa hmelchhiat thu ka sawi fiam mai maia a lo ngai thutak hlut anih kha, dik taka sawi chuan a hmelchhia pawh ka ti tak tak bik lo va, khatia an rawn lâk vâwng hluai tâkah kha chuan an fapa kha ka han belchiang deuh a, a chhiat thu ka sawi ai khan belhchian phei chuan a lo hmelchhe fê zawk mawle, 'nangpawh enge i nih bik?' Min tia, 'engmah phei chu ka ni lova, mahse kei chuan ka lu-ah khuavang ka nei ve lo' ka lo tih hlak kha" Châmi chuan pâwr fêin a ti hlak hlak a.
Lû a khuavang awm a sawi danah an ţhenawma Pi Tluangmami te fapa, a lû a sernung lian deuh nei kha a lo rêl a ni khawp ang, accident vanga ser nei ania, han belhchian chuan khuavang pawh a ang tak tak a, a dumna laiah tak sam a ţo ve miah bawk si lova a sawi thiam ka ti angreng khawp mai.
"Chupawh ni reng reng se, mî pawi hi in sawi hnem dawn lutuk nangni pahnih inkawp hi chuan, a mal ve ve pawn kan vêng sêng lo che u ania" ti a ka nuin alo hnial leh chuan nui tet tet chungin, "Mî pawi sawi reng hi ka tum a ni bik lo, mî hian pawi an lo ti thei êm a chuvang alawm. Anni pawi tih leh tih loh te chu keia va control phâk pawh a ni bik hleinem" a lo ti leh zet zet a, ka nu meuh pawhin chhân zui ngaihna a hre tawh lo aniang, "anih chu a" tih zawng sawiin an room-ah min luh san daih.
"U Aron-a rualin ka rawn chho a, ka haw duh hunah ka call ang a kan haw rual leh ang" ka pa hriat hlau zeta min kheuh ru zeuhin Châmi chu ka beng bulah a rawn phun sar sar a, "enge u Aron-a chuan atih dawn a?" tiin ka lo zawt lêt ve thung.
"Naihdan tâwk i nei thiam mai lo emni? Helamah tu emawin dawr a rawn hawng thara khawiah nge kal vak se i tih a?" Ti a min lo zawh lêt tâkah chuan ka nui uar uar a, u Aron-a nula rîm chu ka tuar rei lo khawp mai, kâr khat chhung vel ka mu tluk tluka kârtâwpah meuh chuan nuihzat lamah a kal ţan dêr tawh.
Amah ka duhna leh neih lêt leh hrâm ka duhna erawh a la reh hauh lo va, na deuha tawrh tlawk tlawk ai chuan a thawveng chi a runluih a fuh zawk dawn tih ka hriat avangin ka tuar buai peih tawh lo. Chu chu alawm ka nihna chu! Thil engkim hi a pâwngpawrh zâwnga lâk chuan chhiatpui rup theih vek a ni a, a nêm zâwnga la zeltu tan chuan hringnun hi a hrehawm ngai lo. Chu chu ka nuna ka zir chhuah tawh ngêi a ni.
"Engmah rawn lei phei nachâng ka hre lo va, lo kal rawh dawrah thil va lei ang" tia min pawt thovin pawnah min kaichhuak dawr dawr a, ka nu chu chokaah la awm se zana chhuah a ţul loh thu min sermon khum leh nasa tawh ngawt ang.
"Awi in vêngah pawh zanlaia pawnto an lo la chîng ve elaw?" Kawta naupang inchâi ho thlir zui vang vang chunga tiin min dinpui dat a, dân ngâi tê bawkin kan vêng naupang ho chu tualah an lo inhâwrkhâwm leh laih laih a, an zinga a lian deuh ber pahnihte chuan an kut ve ve suihzawmin kawngkhar ang deuh hi an siam a, naupang dang zawng chuan an ţhiante kawr hnung ţheuhah vuanin kawngkharah chuan an lût dial dial a, "tîrah mei kaiah, chhimtirah mei kaiah" tiin an zâi dial dial hlawm bawk.
"Lehkhazir a ngaih loh zânah chuan ka en nasa thei lutuk, khawpuiah chuan hetianga infiam te hi an chîng ve bawk si lova" ka lo tih chuan, "chu chu alawm, khawpui nun hi chu duh aiin a chêp hmel ka ti ţhin. An naupanlai pawhin hetiang hian an infiam ve ngai lo vang ka lo ti fo a, a dik anih dawn chu. Pî leh pute tih dan hi khawpuiah chuan an hlamchhiah tawh ang ka ti fo ţhin alawm" tiin min lo chhâng ve duah a, reilotê kan din khawmuan leh hnuin nuthlawi u Muani dawr lam pan chuan kan inzui phei ral ral a.
"U Muan, Frozen food lampang hi i kawl ve mial em?" Dawr chhung kan luh ruala Châmi'n atih chuan u Muani mai ni lo, keimah chen chuan mengphâwk tak kan ni!
"Eng frozen food maw?" U Muani chuan a lo ti deuh hû a, "aw, âr thin te, a thial te, a bawp te an dah khala an zawrh ţhin ang kha, awi i nei lo a ni maw? Kan khuaah chuan i dawr hi a changkang deuh berin ka hria a mahse, neih loh pawh i lo nei ve tho anih hi a" ti leh zat zatin Châmi chuan dawr chhung chu a fang kual dan dan a, kei erawhin u Muani bul chiah ţhutthlenga U Aron-a lo ţhu chu ka melh leh ralh ţhin thung!
(Han comment ve leh reng reng teh u
)End of chapter - 14