Katana

[Cck Lalchhuanawmi]

Katana
Chapter-4
Ziaktu: Cck Lalchhuanawmi


Haro a bêng hawi sawk.


Remlali chu Yushuke thisen kai a ni a, amah ngeiin a thisen Dragon-in a duh thu a sawi tak kha.


Ka lo hre thiam lo a, Haro erawh chuan a lo hre daih tawh.


Min zui chhan pawh, Remlali thisen a lak theih nan.


Lal Fanu nen hian eng nga tan nge Yushuke thisen chu an tih?


Dragon an hua tihna a ni a, Dragon hoin Yushuke thisen kai ven him lo duh ta se, Remlali nunna a derthawnawm loh tihna a ni dawn a.


Chutiang chu han ni mai sela ka va ti em!


Haro leh Lal Fanu an ṭang dun a, Shogun hian a hria ang em?


An thusawi chiang leh zualin ka ngaithla a, Haro chuan, "Min ngaidam rawh", Lal Fanu hmaah a ṭhingṭhi a.


Lal Fanuin, "Tho vat rawh", thinrim takin a au tuar a.


Haro pawh a tho vat.


Lal Fanu chuan, "A nih, chu hmunah chuan i kal tur a ni. Yushuke thisen nen i lo haw tur a ni bawk", a ti fak a.


A thinrim hle a ni.


Lal Fanu tak tak a nih ka ring ta lo, a awmdan leh ṭawng kamin Lal Fanu nihna an pho lang tawh lo.


Haro chuan, "Hmanlai thawnthu mai a ni a, a awm ngei dawn tih chian a ni hleinem", a ti chu, Lal Fanuin a melh na ngaih ngaih.


A mitmeng aṭangin mei alh a chhuak tawh dawn emaw ka ti hman.


Haro chuan a hlau, Lal Fanuin, "Naomasa Akai chu a kal ngei ang, naktukah a chhuak nghal ang a, i zui tur a ni", a tih chuan, "A kal duh dawn em ni?", Haro-an a ti ve bawk.


Lal Fanu chuan, "I lo en dawn alawm, haw tawh rawh", a ti a.


An pahnihin an inpawm leh vawng vawng.


Mahni in ka pan thuai a, an thusawi ka ngaithla tih an hriat ka ring lo.


Ka nu a lo la meng a, mut hmain kan titi. Khawi hmunah pawh nise, Nu te hi chu an lo inang tlang vek a ni e.


"I pa ṭhianpa fanu saw nupui atana neihsak che kan tum a",


"Nupui neih nan ka la naupang deuh lo em ni?",


"Naupang tawh lo e, i farnu pawhin pasal a chhia a ṭha a duh ve dawn a, Mo kan neih hmasak phawt a ngai alawm", ka nu nen an va inang tak em.


Mahse, nupui ka nei ang tih ka tiam thei lo.


Kawng thui tak paltlang tur ka la nei.


"Mu chawl tawh rawh, naktuk lamah kan sawi ṭha dawn nia", ka nuin a ti a.


Thoin a hnung lam aṭangin ka kuah, ka nu ka va ngai tawh tak em aw!


Muhil hauh loin ka inngaihtuah tlaivar.


Remlali bulah Katana a awm ngei tur a ni.


Onu sawi kha, Katana awmna hmun kha Haro kha chuan thawnthu mai mai a ti a, Dragon Lu chu Emperor ho inchhuanna tham leh, Dragon veh hrat ni hlawmin, Yushuke-ten Katana an chher a.


Dâwi a tel bawk.


Yushuke ho chu Dâwithiam an ni tihna emawni dawn?


Dragon ho chuan an nunna hum him nan Yushuke zawng zawng thisen an chhuah.


Ni tak e, Yushuke zawng zawng ni lo, pakhat, a tlan bo tak e.


Khawiah nge a tlan bo ang a, tuin nge lo hum ang a, tu mipa nen nge an innei ang a, Mio hi a lo pian tak ang le?


Chuti ni se, Haro leh kan Shogun-a fanu te hian eng vangin nge Yushuke thisen an lo duh ve kher?


Yushuke thisen duh ho te nen an ṭang kawp tihna nge?


Lalpa le!


Khawi hmunah nge min hruai tak?


Eng buaina nge min hmachhawntir zel dawn le?


Khaw var tirhah in aṭanga chhuakin, Mio, Remlali nu leh pa te zawngin ka tei kual.a.


An khaw mi ho awmna hmun thlengin, ka hawi kual a.


Tho an la awm mu mal lo, a la hma ve em a ni.


Nu pakhat, in pakhat aṭanga lo chhuak hmuin ka be vat a, "Mio tih hming pu i hria em?",


"Hria e, kan khuaah Mio tih mi pakhat chauh a awm. A nu leh pa rualin a kâng hlum vein ka hria",


"Ka sawi chu, nula a nia",


"Nula chu alawm ka sawi, a kâng hlum tlatin ka hria, ka hre sual mai thei bawk a ni. Eng nga tan nge i tih?", Remlali chu a ni ngei mai a, a kâng hlum lo.


Nu hnenah chuan, "Ka ṭhianpa pakhat nen, aa, an inhmel duh deuh a, Takashi zawng turin a chhuak a, ka lo ngaihven sak mawle. Kei ni pawh kan chhuak dawn a, min zawh ngei ka rin avangin hriat ka duh a ni", ka ti a.


Dâwt sawi chu ka ni der.


Dâwt var a ni mai ang chu.


Nu chuan, "Mio ka hmuh hnuhnun ber chu a nu leh pa bula, an in alh hluah chhunga an awm kha a ni. Chu bak ka hre tawh lo. Tlan chhuak kan awm ṭeuh bawk a, chung tlan chhuak zingah a tel ve te pawh a ni ang, a chin reng hriat ka nei lo", a ti a.


Min lainat deuh chuan ka hria.


"A nih, zawhna pakhat leh chiah. Mio te chhungkua chanchin i hriat ang ang min hrilh thei ang em?",


"I ṭhianpa tan tho em ni?",


"Ni lo e, hei chu keima tan", Nu chu a han nui deuh a.


"Mio hi chu fahrah a nia, a nu leh pa hian fa an nei thei lo hrim hrim. Tlai khat, Mio pa ram kal hian hmeichhe nausên, piang hlim tih hriat tak hi a lo hawn a, an nupa chuan tun thlengin an enkawl a, Mio tiin a hming pawh an sa".


Remlali chu Yushuke thisen kai ngei a ni tih a chiang ta!


Chuvang a ni ang, Dragon-in an khua an hâl. Mio an zawng.


Dragon dum, Thla nei lo a ti a, Hmana Emperor fanu leh Yushuke thisen phuttu a ni thei mai ang em le?


Kha Dragon kha chu a thi ve em em tawh ang, a rei tawh em mai.


Hmana mi Dragon a ni a, tuna mi hi chu a dang a ni ang.


Haro leh Lal Fanu ten Yushuke thisen an duh chhan ka hrethiam ta lo.e.


Hmana Dragon te khan Yushuke thah chimih an duh chhan a hriat mai a. Tun thleng thlenga Yushuke thisen duh an awm hi ka awih thei lo a ni.


Kan Chhungkaw eizawnna, Chhang dawr ka thleng a, ka pa a lo ṭhu tawh.


Ka pa nen kan titi leh a, "I nuin nupui neihsak ang a ti chhen a, ka ṭhianpa fanu biak kan tum mai asin", a ti a.


"Samurai tan Samurai fanu tluk an awm lo ang", a ti leh a.


Ni e, ka pa pawh hi Samurai a ni a, a hrisel ṭhat loh avanga chawl mai chauh a ni.


A ṭhianpa pawh chu Samurai tho a ni a, ani pawh a chawl tawh.


Hrilh ka ngai lo, rethei leh rethei an innei a, hausa leh hausa an innei tih ang deuhin, Samurai chhungkua leh Samurai chhungkua an innei ṭhin.


Lehkhabuah ka chhiar tawh.


Remlali chungchang ka sawi a nih chuan, an remti dawn lo.


Mahse, sawi hrim hrim ka duh.


Ka pa bulah chuan, "Ka pa, hmeichhe pakhat a awm a, chutia nupui neihtir min tum chuan chu nu chu ka duh a ni", ka ti ta a.


"Samurai chhungkuaa mi a ni em?", he zawhna hi dawn(dawng) ka inring reng a ni.


"Ni lo, tunah hian ka chhan chhuah hun nghakin hmun hlauhawm takah a awm mek a ni",


"I duh chiah maw?",


"Duh takzet", ka ti a.


Ka pa lung a ni chiah lo.


"Samurai tan Samurai bawk hi an ṭha asin. A nih, chu nu chhan chhuak turin i kal dawn tihna em ni?",


"Ka kal dawn, vawiinah ka chhuak ang. Ka phatsan thei lo a ni", ka pa chuan chik zetin min en kal a.


Ka hmelah ka tihtak zia a hre thei ang.


Remlali lo, mi dang pawh nise chhan chhuak turin ka kal ngei ang.


Remlali a lo ni kher a, a tel loa hun pangngaia ka let vaih zawngin a chhungte ka hmu ngam lo ang a, dam chhungin ka inthiam thei tawh ngai hek lo ang.


"I nu hrilh ngei ang che",


"Aw le".


Inah hawin ka nu ka hrilh leh ta a.


Hmeichhe pakhat, hriat chian loh chhan chhuak tura kal a phal lo.


"Chutiang ka rem ti lo, amah chhan chhuaktu tur chhungkua a nei lo em ni? Lal hnenah sawi la, midangin chhan chhuak rawh se. A thu hrimah, a thi tawh ang", ka nuin a tih phei chuan min deng dawt.


Min ngaihtuah vang tih hre tho mah ila, min tilungngai.


Remlalin mangang taka, "Mala", tia min kohna te chu bengah a kiu leh vawng vawng.


Engvang pawhin ka kal tur a ni.


Onu leh Date ten Lal Ina kal turin min lo ko, "Lalpa din hmun ṭha lo tak a ni, nizan aṭangin a ni tawh, hmanhmawh taka kal tura koh kan ni", an ti a.


Min ko har ka ti tawh reng a ni.


Haro leh Lal Fanu te chuan Lal chungah eng thil chiah nge an thlentir ang le?


Onu leh Date te nen Lal In panin kan kal a, ka bengah, zana hmeichhe âw ngai bawkin, "Ring suh, ring suh", min rawn ti leh.


Haro tel se chu ka hrethiam, Onu leh Date te an ni a, anni hi chu ka ring.


Chutia ring lo tura min ti chu hriatthiam har ka va han ti tak.


Eng mah hriatthiam alawi ka nei tawh lo.


"Onu, zana i sawi, Katana awmna hmun kha, thudik nge dâwt?",


"Thudik tak a nih kha",


"A nih, Katana la tura thawk chhuak an va awm lo ve", ka ti leh ngat a.


Tlem chuan rinhlelhna ka nei ṭan ve.


Onu chu, "Katana awmna hmun thleng tura paltlang ngai khirh leh hautak zet kha i hre lo em ni? Samurai-ah pawh Samurai chungchuang leh mi bik nih a ngai, kei chuan ka zuam teuh lo mai. Katana la tura Tlang lawn chhuah hmain Ramsa emaw eng Sa Sa emawin min pawt sawm tawh ang. A nih loh pawhin, Tlang lawn chhuah hnuah Dragon hmanchhawn a la ngai dawn. Ka huaisennain a tlin mawlh lo", a intlawh khalh zung zung.


Ka mawh chuang lo e.


Date ngawi reng chu, "I kal ngam ang em?", tiin ka zawt a.


"Ngam lohna tur a awm lo", ngeng ngalin a ti khawlh a. Onu nen chuan inang lo tak an ni.


Date chuan, "Daimyo Takashi ber hi ni ka ngaihtuah chu, Lal hnenah ama zawnnaah min kal tir ve turin ka dil a, a phal tlat lo. Min tibuai takzet a ni, Ronin nih ka duh miah lo", lungchhe vankai takmeuh meuh hian a ti leh a.


"Ring suh, ring suh", tih bak bengah a lut chuang lo.


Hrilhhaithlak ṭhin ngawt mai.


Tu tak nge rin tur ni ta ang aw!


Lal In kan thleng a, Haro-a chu Shogun mutna pindan pawnah a lo ding heu tawh.


Min hmuh ve leh, "In lo thleng tawh maw? Ka lo nghak reng tawh che u asin", a lo ti a.


Lal Fanu nen Shogun chungah eng thil chiah nge an tih hre lo mah ila, a ṭha dawn lo tih ka hre mai.


"Nizan avangin thawh kan hai hlawm chu a nih ber hi", pangngai thei ang berin ka hmachhawn a.


Samurai dangte pawh an lo thleng chawpchilh.


Shogun mutnaah kan lut ta a, bang kil lam chhuatah a lo mu a, a bulah Lal Fanu lo ṭhuin, a lo inhru fap fap.


Nimina a hmel nen inang tawh lo tak a ni.


Niminah kha chuan mi nung a nihzia lantir nan thisenin a la luan a, tunah chuan Mitthi chiah chiah a ni tawh.


A la thaw ṭawk ṭawk tih min hrilh niawm takin a âwm a insêp kâng ve auh auh a.


A hrawkah hnawhtu awm ang takin a thaw ri hrawih hrawih.


Khawngaihthla a la zawk alawm.


Shogun aiawha thupuangtu chuan, "Lal ber nunna chhan nan thil pakhat tih tur a awm", a ti a.


Lal Fanuin, "Chutiang mai mai ka awih lo, kan Khua ven him a ngai a ni. Thisen tih mai mai, Hmelma ten eng lai pawhin min lo run thei reng a, Thisen zawng mai mai tura Samurai-te kal chhuah ka rem ti lo", a ti bawrh bawrh a.


A sawi dik, Hmelma hoin phuba la turin min lo run thut thei.


Shogun-in keini aia an intodelh thu a sawi kha a dik ang.


Haro chuan, "Thisen a? Eng thisen nge ni in sawi? Lal ber tana damna Thisen tur chu khawi hmunah pawh awm se, kei hian ka lo thlen ngei ang", a ti a.


Zah takin Lal Fanu hmaah a lu a kun zauh a.


Khawnbawl chuan, "Kan khaw Chhim lama kal zel a, Lui sawmhnih kân a, Dîl za zet kal tlang a, Tlâng sâng tak tak Sawmpanga leh Ramhnuai bit tak, tlawhpawh loh, Sa Hrâng tam tak awmna hmun tawn tlanga, Tui Khawhthla sâng taka lawn chhoha, chumi chhipa Pûk ṭihbaiawm zet chhungah Dragon Vâr hi a awm a. A chaldar tak aṭanga thisen chhuak chu damna a ni. A taksa pêng dang aṭanga thisen chhuak erawh chu thihna a ni thung. Chu Dragon chu a chaldarah tak Yushuke Katana chher hmanga vih bura, chumi aṭanga thisen chhuak chu, far khat lek pawh tu emaw thih ngama awm apiangin a in chuan a dam pui nghal ang. Hliam pawh chu thisen chuan a tidam thei", a ti muang ban charh a.


Dragon dum leh Remlali la bo tu bakah, Dragon Var an awm leh ta.


Dragon pawh chu an va tam em em ve mawle aw.


Khawnbawl sawi leh Onu sawi a inang chiah, Dragon Var a ni tih Onu kha chuan a sawi ve lo.


Remlali la botu Dragon a ni nge ni lo?


Katana pawh chu, he mangchhia aṭanga han thawh kân thuai ka va han châk tawh tak.


Thluak a buai zo mai dawn.


Haro bawk chuan, "Yushuke Katana chher kan nei si lo, a Katana chher kher a ngai em ni?", huaisen takin a Katana dawm chungin a ti a.


Onu leh Date leh Samurai dangte pawhin Haro an thlawp ṭha khawp.


Khawnbawl bawk chuan, "Chu Dragon Var tawm pûk chhungah chuan a awm", a ti leh a.


Lal Fanu lo inrawlh vatin, "Tu mah chu hmunah chuan in kal tawp lo ang, Dragon leh Katana tih aiin kan khaw ven him a pawimawh tun dinhmunah. Hmanni lawkah Dragon-in min lo bei tawh a, kan Hmelma te min rawn beina a ni lo ang tih pawh a sawi theih loh. Tun aṭanga kan lo inpuahchah ve mawp mawp a ngai", thinrim takin a vei kual chhen a.


"Kal rawh, kal rawh", ka bengah a rawn kiu leh rawng rawng.


A ṭha alawm.


Ka dinna aṭanga pên chhuakin, Lal Fanu hmaah ka kun zauh a, "Lal Fanu, kei ka va thawk chhuak ang e. Ka tiam a che, Yushuke Katana leh Dragon Var Chaldar tak aṭanga thisen nen ka lo kir leh ang", inringtawk tak ka ni.


Hetiang reng renga inrintawkna hi ka la nei ngai lo.


Yushuke Katana, Dragon Var thisen leh Remlali nen kan kir leh khawp ang.


Lal Fanu chuan, "Ka remti lo ka tih chu, Lal Fanu ka ni a, nang Chhiahhlawh mai chuan ka thu i zawm tur a ni", min kawk ta siah siah.


Ka hlau chai si lo.


A tider tih hai rual a ni si lo, hrep tak a!


Katana hi phawiin a thin hnunah tak ka vit bur chat dawn nge, a chaldarah tak ka vit zawk dawn?


Mala, insum hram hram teh khai.


Yushuke thisen duh vanga mahni hringtupa ngei nunna lak pawi ti mai lo chu!


Lal Fanu chu dam deuh zawka ṭawngin, "Thisen aiin kan Lal Ram hi a pawimawh, ka pa pawh hi a dam vat mai ang", a mittui a han titla der a.


A pa chu duat takin a chul a. Awle Pitar nise a inhmeh dawn lutuk.


"Kal rawh, kal rawh", hrilh rutu ka nei leh tlat.


Lal Fanu chibai buk leh zauhin, "Lal Fanu, kei mah chauhin ka kal ang. Tu mah ka ngai lo, kei mahin hna ka thawk chak zawk. Min kaltir hram rawh", ka ṭhingṭhi a.


A ruka a nui ka hmu thei.


Lal Fanu chauh ni lo, pindana awm zawng zawng an hlim vekin ka hre mai.


Lal Fanu chuan a remti ta a.


Lal Fanu thu chhuah a nih avangin ka nu leh pain phal lo viau mah se, ṭap chungin min thlah.


Thih ka tum lo bur.


Ka farnu Mio pawh a ṭap nasa mai.


Kan khaw Chhim lam kawngah ka ding ta ran.


Onu, Date leh Haro ten min thlah a, "Kan lo zui ang che", an ti nghe nghe.


"Ni lo, Lal Fanu thu angin lo awm rawh u. Hmelma te chet hmaa lo kir thuai ka tum ang", ka ti a.


Chhim lam Rama thang tura ka pên chiah chu, "Hmar lamah zawk le", tih chu, hmeichhe âw bawkin min rawn hrilh leh ta!


Dragon leh Katana awmna chu Chhim a ni si a.


He âw thung chuan Hmar lamah kal turin min ti.


Khawi zawkah nge ka kal dawn?