KINDER JOY chapter - 1

[EmilyPachuau]

Ka rilru na leh tihngaihna hrelo lutuk chu kan class opposite a bathroom kawngkhar bulah chuan ṭhutungin ka ṭap ru keuh keuh a,keimah chauhin ka awm a maw ka tih vâng chuan ring tak ni siloin ka inhnit hlap hlap bawk.Chutah,ka chhîpa rawn chûl heuh heuh pahin,' bâng tawh rawh le,kinder joy ka lei ang che',rawn ti tu hmel chu a ngaihna hrelo deuha ka chhoh en chuan, tu dang niloin ka star em em u Abrahama (u abra) a lo ni.

Ka zak leh hnuhnawh viau mai, chutia ka awm lai kher min hmu chu,a ni tal chuan ka chaklohna ka tilang lai hi hmu ve lo se ka ti asin,min endan a dan ka hlau, a mah hi lo danglam ve lo ta se midang leh khapa ang tho khan, engtinge ni ang? Ka tawrh hnu tawrh nawn leh kha ka zuam chiah em ka hre silo.
Ngawi rengin ka ding a,ka lo ṭhutung rei deuh nge ni ka ke mu chuah chuah chu hrehawm ka tih êm avângin ka ṭhen saka,a lo khi suk ka hmuh chuan tûm deuh bar chungin,'lapawchini pawh ka duh tel',ka ti zauh a,min eiloh hmel deuhin a lo ner nawk.
Awm nuam lêm lo deuh chuan a bike dahna lam kan pan a.

U Abra hi ka ṭhiannu te veng a mi niin kei aiin kum 4 velin a upa a,mi fel tak niin ka hria,inkhawm a taima vak lo a,inkhawm ṭhat hi fel leh fello teh nan ṭhenkhat chuan kan hmang fo mai,keichu a mihringte miziaah a innghat zawk ka ti ve tlat, Guitar perh a hnehsawh em em a,a zaithiam em em leh nghal,hna pangai tak chu duh se chuan a thawk thei tih ka hai lo,lehkha a thiam a,a zir sâng thawkhatin a tih chin chu a tluang chho viau ni pawhin ka hria, hmelṭha lua ti a sawi tûr nilo mahse zûn a nei ka ti,a mitmeng a pâ in hnar ngûl sâng leh sei lam deuh ni in,a hmui te chu mipa hmui ve si a senno nalh em em a, vunrawng uk lam hret pu mahse a inhmeh em em tho,chu chuan a ti pa zual ngawih ngawihin ka hre bawk,mipa vantlang pawl niin fit 6 a hawlh thuak a,a lu meh mawi lutuk chuan a hmel hriam lam chu a chawi hle bawk,mi hausa pangai tak chhungkua aṭanga seilian niin a nu zirtirtu a ni a,a pa erawh tûnhma lamin Politics a khel a,a ruihchilh ve em em ṭhin tih ka thiannu hnen aṭangin ka hre bawk. Leather Jacket dum hnuaiah T shirt var a mah ti fresh zual em em tu a hak hian ka luangliam zual,a bulah pawh 'ka luanliamna thawmhnaw' ka ti zauh tawh,a lâwm em em leh nghal,kan inhmuh fuh châng a a lo hak fuh chuan mit min lo siai zauh ṭhin

U abra ka tawn dan chu~
June thla laihawl vel niin zirtawp zân a ni a,ka thiannu ka bestfriend saii te vengah concert a awm dawn vângin kal ve tûrin min sâwm ngat ngat a,a kal châk a chhûngte chhuah an phal silo hnehah ',tluangi pawh a kal dawn a chhûngte a dil tawh,' a lo ti ngawt pek a,engmah min hrilh tawp silo a chhûngten min rawn call a ka lo aw liam ngawt phah tâk kha,ka thlarau dawt a lo sawi tir ringawt chu ka chokeslam châk teh mai asin.
Phur fahran lo chuan kan inkap chhuak dun ve leh rawih a,Zan Dar 8 a ti dawn,mipui an la lâm nasa si,ka zo lo lam lek lek,lalsaii bialpa kan lam pana lo kal phei dén dén ka hmuh chuan lalsaii concert kal châk em em chhan ka hrethiam chiah, lalsaii'n min rawn kheuh zeuh a gate pawn lamah Kan inkai chhuak nghal zat,kawngpui chhuak deuh a dawrte kawtah chuan coffee in pahin kan ṭhu a,eng eng emaw an sawi laiin ka phone ka lo bih san a,ka hma lawka phone lo tla ka hmuh chu chhar tuma ka kûn zuau lai chuan leh awi a na lutuk, dawr chung chu ka han tauh ta maw ka tia,ka hawi chhuak leh chu phone chhar lo tum ve tho pa nen kan intauh tih ka hrethiam mai,a ri bup alawm a na a ti ve tho ang,en pawh en si se tawh loin ka zak lutuk chuan,"ka lu a lian deuh a",ka ti ringawt. Chu pa chu a nui hak a,a len hranpa loh kha tih pahin a kal zui daih,a va han zahthlâk zo zai tak lalsaii vâng vek.
Ka phone ri ka la chhuak ka bih zeuh chu ka nu a lo ni,ka haw hun tur min rawn zawt min ngai tawh a ni maithei a ni.Lalsaii kheuh zeuh pah chuan ka nu min lo biak dan vel chu ka hrilh a,haw mai a rawt tawh dawn maw tih laiin u Abrahama te an zai leh dawn a en zuai ila kan haw dawn nia a ti ta daih,ka va han phur lo phiangsen tak êm,peihlo engang mah ila minti lui leh tlat dawn tih ka hriat sa vangin concert naah chuan kan inzui thla leh a,saii bialpa erawh a awm ve tawh lo.

"Khawnge in pa" ka tih hnuah,"a cousin Birthday lawm tûrin a kal leh nghal dawn a nih kha" a ti chang fak,an lo inhau leh hman amawni.
Ṭhen silo hlim silo hian an inkawp ve reng,kum 1 leh tlem chu an inngaizawng ve tawh ang,kan thleng thla chu tlemin minawlpui chu an lo haw tawh a, chutah music nalh dangdai lutuk a rawn in play, âw sial mangkhengin a aw phuloh Lengi a rawn ti zet chu a satu ka hmu theilo ang tih ka hlau lutuk lalsaii zawk chu ka pawt dawr dawr a,stage hmaah chuan ka va dinpui chat,a satupa han chhiatloh dan em em chu ka luangliam nghal zawih zawih,a âw nge a mah chu ka vei zui nghal tâk ka hrelo,khata ṭang chiah khan ka thinlung hi ka ta chauh a ni ta lo,he hla sa nalh lutuk pa phuloh Vala ta hi a ni tel nghal tih ka feel thei,mah se phuloh Vala a ni dawn chiah em ka hrelo,hma lak dan tûrin ka rilru a luah nghal mawlh mawlh mai,ka ban te ka phar a ka zaipui a video ten ka cover a,awmngaihna ka hre ta lo khami ṭum kha phuloh lengi hla tawi ka tih ber ṭum a ni hial âwm e,a sa lungrun nalhin a satu hmelin a zir bawk si ka va han khamlo tehrêng êm.

Haw hnu pawh chuan ka rilruah a châm hneh ngang ni tur a ni lalsaii ka va zawt ta nge nge,mipa pakhat ka tawn khan min hliam na em a mipa hi ngaihzawng en a en ka tum tawh lo mipa hi ṭhian ang chauhah ka ngai a,mah se mipa zûnah chuan ka uai leh si,ka rilru a rawn thlak danglam hneh êm a ni.

A number te ka dil a,ka hmuhdan vel ka sawi tui lai tak chuan lalsaii chuan ka mood ti chhe vek tur a rawn sawi,"bialnu a nei a,Rosy-I model kha i hria em? Kha kha a nia,'a rawn tih chuan ka beidawng nghal tawp.A number erawh chu ka save ru rân a,a dp ah chuan a bialnu nen a an lanna chu a hmang nghe nghe leh nghal,ka ner vak a ka muhil chhunzawm a.