Katana

[Cck Lalchhuanawmi]

Katana
Chapter-5
Ziaktu: Cck Lalchhuanawmi


He âw thung chuan Hmar lamah kal turin min ti.


Khawi zawkah nge ka kal dawn?


Hma lam pana kal zel chuan ka thi ngei dawn!


Hnung lamah min phiarrututen nghakhlel takin, an thang kamna hmuna ka kal tur min thlir a.


Haro chu chiang takin ka hre tawh a, Onu leh Date te hi, mi rinawm an nih leh nih loh ka chiang lo.


Khawiah nge ka kal tak ang?


Tunah hian, mahni khum ngei maiah han harh chhuak zawk mai ila, ka va lawm dawn em aw!


"I thinlung ngaithla rawh", hmeichhe âw bawkin a ni.


A ni, Hmarah kal ka duh ta zawk.


Inherin, "Hmar lamah ka han kal zawk ang e", ka ti ta a.


An pathuma hrilhhai hmel chu a hmuhnawm lem loh.


Haro ṭawng chhuak hmasa berin, rin ang chiah a ni. Mahse, tu hriat loh Âw hi ka ring tlat thung.


"Akai, Hmar lamah eng mah a awm lo. Chhim lamah alawm engkim a awm", Haro chu lo zawmin Onu pawhin, "Ni e, kei pawhin ka sawi ka sawi tawh kha, Hmarah kal i tum hi mak", a ti ve a.


Date erawh chuan, "Ṭha i tihna hmun apiangah kal rawh", a ti thung.


Sawi buai tum nasa teh mah se, Hmarah ka kal dawn tho.


Haro leh Onu-ten kawng dik loa kal tur ka nihzia min hrilh hrep a, Date thung chuan min thlawp viau.


Samurai ka ni a, ṭha leh dik nia ka ngaiha ka thinlungin ti tura min tuksakna apiangah ka kal mai tur a ni.


Samurai nih awmzia a awm nang le!


"Dam takin, Ṭhiante u, inhmuh leh hma loh zawng".


Hmar lam panin ka kal ta a, Hakama inbelin, Katana leh Wakizashi nen chhuak ka ni a.


Tu mah hlauh reng ka nei lo, buaina chinfel thuai thuai a, chhuah ka duh tawh.


Hmelma tawk thut thei ni tih inhriain, inringtakin ka awm reng a.


Katana Pâi chu ka thlah mawlh lo.


Ramngaw bit takah lutin, eng Ramsa Sa te nge tawh tur hre hek lo, thawm ka dim ṭhin teh asin.


Kan Pi leh Pute sawi 'Buannel' an tihah ka awm mekin ka hria.


Ralkhat aṭangin Savawm nufa inzui ka hmu a, a va han hmuhnawm tak em!


Ka thlir doh doh a, an kal hnu rei vak loah Sazuk chal ṭha em em mai, a ki hreu ṭha tak ka han hmu leh nghal.


Sazukah khan mi le Chawngtinleri a ṭhut kha?


Martial Arts chauh ni lo, he hmun aṭanga chhuah hunah chuan kan Pi leh Pute chanchin emaw thawnthu emaw ka va han zir chiang nada dawn rua em!


Luitê luang ri her her te chuan, Mizoram min ngaihtir vawng vawng.


Fiara Tui, chhâwl hâl tihreh nana han hman phei zawng, kawchhungah a fan thla vawt thap kâk ralh ralh mai ni.


Zanah Thingkung hnuaiah mu tawpin, bûk sual chuang lo mah ila, eng Sa mahin min tibuai chuang lo.


Thing zîk leh Ram hnim ei theih ang angin ka inhnawhpuar mai zel.


Chutia chawl loa kal zel ta na na na chuan, khaw pakhat ka thleng.


Hmeichhe âw ka hre tawh lo a, a duh hun hunah hian a lo.lang zut reng mai, tu âw tak ni ang maw?


Riahbûkah lutin, pindan awl a awm leh awm loh zawtin, "A awm tawh tlat lo", a ti a.


Pawna chhuah tuma inher mek laiin, "Chhuak suh", tih bawk chu bengah a ri leh.


Pawimawh tawpkhawkah bak a rawn ṭawng.chhuak ngai lo a nih hi a.


"Ei tur min rawn pe rawh", dawhkan awmna lamah ka kal nghal. Intihthu theihna hun a nia, Samurai an ngaihsan hun lai leh an zah hun lai a ni a, ka che na rep rep dawn hi a ni ringawt.


Hei bak, hun ka nei tawh lo.


Mi mit la tak ka ni, a nuam reuh phian.


Samurai ka nihna khawvela châm hlen mai pawi tih lohna a piang thuai dawn tlat.


Nula pakhatin ka dawhkana ei tur a lo dah chu, en ngun tak ka ni.


A mit hnawih dumin, a hmui tai hlarhin, ka hmuh hmasak bera a Kimono hak dang tawhin, inhmelhriat ṭha ni lo mah ila, vawikhat chauh tak tak inhmu pawh ni mah ila, ka hmaa dinga min melh nô viutu hi Remlalliani a ni tih ka chiang lutuk.


Remlali ngei a ni, a hmela hlauhna leh he hmuna a awm ngawtna chhan hre lo.phi ruai a bo zo tawh a.


Tuna a hmel hi chu, mahni inringtawk tak, Japanese nula chiah chiah a ni.


"Samurai, chaw ni loin duh dang i nei a nimaw?", ka hmaah a lo innemkhalh a.


Kimono a ha pawhin ka hre lo, a âwm a lang thui em mai.


Remlali a ni chiah em?


Nge ni a, a hmel anpui zawk?


Chu nu chuan, "Samurai, i duh chuan ka pindanah i tan hmun ruak a awm reng a nia aw", a phun sep a.


Nui seihin a kalsawn.


Dawr chhunga mipa awm zawng zawng chuan an en zui vek.


Ka bul chiaha ṭhu pa hnenah, "Kha nu kha tu nge?", tiin ka zawt a.


"He khuaa an Nawhchizuar man to ber a nih kha", a ti chu, ka thin a sa phat.


Nawhchizuar aa ni!


Hrep tak chuan le.


Khawnvar êng hnuaiah ka kut hum ruh an hmu thei lo, ha chang ka va ṭhial nasa riap riap tak.


Chu pa bawk chuan, "A man a to hu ang chiahin a manhla ṭhin khawp a nia", a ti leh zel.


A dawr ṭhin chiang a ni.


Remlalliani a ni thei lo ang.


Nula dang pakhat lo kalin, "Mamawh dang i nei em?", tiin min rawn zawt a. Thlênga ei tur awm chu khawih loin a pangngaiin a la awm reng tih a rawn hmu.


"Thil dang mamawh te i nei em? In tur lam te", nô fahranin a ti leh a.


Remlali nungchang thar khan lung a tiawi mawlh lo. Amah a ni ngei em tih chiang ngei mah suh i, a hmel nen an inang em a, lung a awi thei lo.


Nula hnenah chuan, "Nichina ei tur min lo.petu kha tu nge a hming?", ka ti a.


Mio tia min chhân loh hram ka beisei a ni.


Mahse, "Yamasutke Mio a nih kha, zanin atan chuan hmun ruak a awm tawh lo, keimahah erawh a awm thung'?", a ti a.


Ka ning, Mio tih hming tam lutuk hian, min tiâ zo dawnin ka hria.


Remlali leh ka farnu kha chu Mio an ni tih ka pawm thiam, mahse, he Nawhchizuar, Remlali phirpui niawma mawi hi Mio a ni tih ka pawm thei lo.


"Mio a ni tih i chiang maw? Ṭhiana, Mio a ni tak tak em ni?", ka bula ṭhupa bawk ka zawt leh.


Buk nghauh nghauh pahin, "Ni chiang e a", a lo dawr ve tawh avanga intithei takin a han ti a.


Eng khaw sawi set set loin ka hnek thlu ṭhuai.


Nula chu a au ṭhawt, ka hnek thluka chuan mak ti deuhin min en.


A rei lo, "I eng pawi nge ka sawi a, khatia min cho", tih leh thawh a rual a. Min hnek tuma a kut a lo phar chhuak chu man chatin a dula lo hnekin a leng dawr.


"A ni thei lo", ka phun sup.


Dâwi, Dâwi a tel, a tel chiang lutuk.


Tha chakna hmanga hnek ka ni lo, Dâwi a tel a ni!


Mi dang pawhin mak ti takin min en, ka hnek thlukpa kha lo thoin, "Nang hi, tu nge i nih?", min rawn ti a.


A mitmeng chu hlauhnain a khat.


"Tu thlah nge i nih? Tu nge i hming? ", ka hnek thlukpa bawk chuan hlau hlawpin min zawt leh.


"Naomasa Akai",


"Ni lo, ni lo, i ni lo", khûr hlawk hlawk chungin a ti ta mai a. "In thi vek tawh emaw kan lo ti a", a ti leh.


Dawr chhunga mit zawng zawng keimahah a fu ṭhup.


Chutianga kan thi vek tawh emaw te tih!


Putar pakhat hian a ṭhutna aṭangin, "Samurai zinga Dâwi hmang thei awm chhun te chu, Yushuke thisen kai te chauh an ni", a rawn ti muang charh.


Remlali hmel ang pu kha rang lutuka lo inlanin, "Yushuke thisen a? Tu maw Yushuke thisen kai chu?", a rawn ti bawrh bawrh.