MUMANG THUAHTHUM chapter- 1 (Remake) ziaktu, Laltanpuia

[April Hmar Liverpool]

Mumang Thuahthum (remake,2023)

Time Travel, unau in hmangaihna, duhthusam tihhlawhtlinsakna, zirtir leh entir nei tha,,,tlangval pakhat chu a hmangaih ber nen a an nunhlui ah thawn kir leh ani a, a hmangaih ber nen chuan an intawng leh em? Thil chinfel tur awm te chu chinfel theih ani a ngem?

Bung Khatna



A hun kal tawhah duh a thlang sual a, thutlukna a siam sual a, a thinlung awmdan ni a a hriat chu alo hresual der a ni, a duhthlan sualna chuan inchhirna leh inthiamlohna a khat nun a pe ta hlauh a, a thutlukna siam sual chuan beidawnna leh natna pe in a nun chu milem bu ang chauh ah a chantir ta a,



A pawimawh hun lai ber leh nun insiam chhoh hun lai a a tih sual pawi tak avang leh thutlukna dik lo avang chuan inchhir leh pawi ti reng reng in a hun a hmang ta a, nun raptleu laklawh tawh leh hliam sernung laklawh tawh chu a tuam damna tur leh hliam thuina atan puan nem tha mi leh lazai tha mi chu awm ve bawk thin mahse, hliam dam thei lo tuam reng na atan eng puannem tha mi mah hi a hman tlak reng bik silo a, hliam thui nan lazai pawh chu a chuang liam ve ang lek an ni si.



"Thianpa, Pathian hi awm tak tak se chu ka dilna zozai hi chu hre tawh tur chu a ni ve tawh maw le" ti a ka thianpa remsanga'n a zu no a dawm mek lai chu ka melh vang vang a, ka rilru chuan 'Pathian chu a awm reng alawm, mahse lalrem, Pathian hi kan duhdan a awm tur a nilova, Pathian duhdan a awm tur zawk hi kan ni asin' ka ti a,



mahse kei chuan "ni e tiraw, Pathian te chu hmun tinah a awm tih a ni si a, heng i dilna zozai te hi chu han bengkhawn sak ve tawh tur che hi a nia, nang lah hi i duh hi chu i duh tlur mai zel si a, veroi hi zawng tumah hian an tluk zo thei tak tak dawn lo anih hi maw, i thinlung hi a lakah hi chuan a tui ral hneh ve ngawt mai" tiin nui rah rah pah chuan ka meizial chu ka han fawp vang vang a. Hei hi ka thianpa remsanga'n veronicai a kalsan lai a ka hnena a thusawi a ni.



Ka thianpa remsanga chu a thutlukna dik lo leh a duh thlan sualna chuan damlai nun hi hremhmun ang chauh a chantir ta si a, a duhthusam mei ang a mit lova chhungrila nung reng erawh hei hi a ni chauh ta awm asin. 'Hun hi koh kir leh theih nise ka ko leh kir ngei ang' tih hi.



"Mama kha camp chhuak hlim a ni bawk a, tawngtaina chu hmang rawh se aw" ti a a pa in a ni camp chhuak hlim a han phut der ve na pawh chu a ni tan chuan a nuihzatthlak zawk hial mai, nimahsela a pa a ngei luatah leh hmel hlim sang mai a amah en thap tu a unau te leh a nu awmdan chuan a run em avang in han runluih hrim hrim leh tih el nan a phur awm taka a pa phutna pawh chu han tlingtlak sak ve hrim hrim chu tul tlat a hriatna erawh a nei thung a. Chhungril lam atang chuan sual ling tha vet vawt tak mai leh mih mai mai tum lo tih hriat tak chuan a rawn tur mek ani tih a hmel leh awmdan a rawn langchhuak hial khawp a inthup thei lo atang chuan a chiang mai awm e.



Phur hmel fe hian a han ding vut a, a chhung te chu a en kual dan dan a, a nu hmel chu a hlim kher mai, a en hian a eng phet phet ni ber hian a hria a ni. A nu hmel a lawmna lo lang, an fapa duat leh hmangaih em em, tihngaihna an hriat tawh loh avang a tawngtaina a hlan chung a an beidawn thlir tawp tawh mai in a chutia chhung inkhawm a tawngtaina hun a han nei tur avang a hlimna, hriatthiam sen rual loh leh, a fapa chu a chhuang tak zet zet a ni tih chu han hmuh hmaih a han hriat hmaih theih hauh loh tur thil a ni miau si a ni.



An fapa hian a hun hmasa lamah hmangaihna vanduai tak mai chu alo tawnhriat ve tawh ti a sawi theih turin a hmangaih ber chu an pahnih tan a an that tlan zawk nan tiin a kalsan a, a hmangaih chu a thisen zawm pui, a unau nu a ni tlat si a, nimahsela chu thil chuan an ni pahnih inkar a hmangaihna inmung mek chu hai rual loh a an sawi hmangaihna mitdel an tih thin ngei chu a ni tih erawh a nemnghet tlap si a ni,



tichuan a mipa zawk chuan a ngaihtuahna leh a thinlung zawng zawng nen a pachang tak a thil a ngaihtuah hnu in duhthlanna leh thutlukna a siam ta a, a hmeichhia zawk remtihna leh hriatpuina tel hauh lovin a kalsan ta ani. nimahsela chu hmangaihna nunrawng tak mai chuan chhuah mai mai alo tum hauh lova, chu hmangaihna chu taksa leh rilru, thlarau nun ram thleng atan a natna hlauhawm berah a chang zui ta a ni.



An fapa chuan tawngtaina chu a hmang thei dawn talo emaw an tih tawh hnu ah chuan nu ber chuan "Mama, i tha em? A han ti a, chuveleh a nu aw ri a hriat rual chiah chuan remsanga chuan a mit chu chhing nghal in "lalpa Pathian" tiin tawngtaina thu chu a chham zui nghal zat a.



A thinlung zawng zawng a a hmangaih em em leh he khawvel a a ngainat ber ni hial tur nen khawvel hran an han zawh tak hnu ah chuan a khawharna leh a nunruak te hnem turin amah chauh chuan tlang pakhatah, thlifim leng heuh heuh karah chuan rannung te hram thawm ngaithla in duhthu a sam veng veng thin a, chu duhthlanna leh thutlukna rawng tak avang a a tluk hlen mai loh nan leh khawharna leh lunglenna avang a a thamral zui mai loh nan khuanu chu a dil melh melh thin a ni.



A chang chuan ka hnenah lokalin a harsatna leh veroi lak a a inthiam loh zia te, kum khua a amah chu a inngaihdam theih tawh ngai loh tur thu te sawiin kei pawh chuan ka theihtawp in kalo thlamuan ve thin a, fuihna thu te ka lo fah ve malh malh thin a ni. mahse remsanga hi a tih tawh chu ti tlur mai mi a nih avangin nun thar nen a hmalam pan tura tanpui tum chu mahni leh mahni inphat chung a rawngbawlna peng khat vuan ang hi ka in chan tel deuh thin a.



"Kan pa van a mi, a chang chuan thutlukna siam har tak leh thinlung hliam tura hmangaihna nunrawng tak alo lan chang a awm thin a, nimahsela chu hmangaihna nunrawng tak avang chuan" an fapa thu chham avang chuan nu ber chu a nghing dawt mai a, chutah a han meng ru dek dek a, amaherawhchu a fapa hmel leh awmdan a han hmuh chian meuh chuan lawm lo tih hriat tak hian a ner deuh sak a, chutah lungawi lo fe hian a chhing leh ta a,



mahse nu ber tan chuan tawngtaina hmang mek tu in a tih tak loh zia leh chhung inkhawm chu a la thutak lem lo ani tih haitheih hauh loh tura a awmdan a hmuh zawh rual chiah a lung si taka mit han chhin zui leh chu a awl ai dawn lo hle niin a lang. A rilru a Chung lam tanpuina dil ru mawlh mawlh chungin nu ber chuan tui lo zet chung chuan a mit chu a chhing leh thei hram a.



Rin ang ngei a ni, an fapa neih chhun lalremsanga thu chu a nawi tial tial a, a zuih tial tial a, a tawp lam erawh a rawn tang tha leh phian thin thung. Chu erawh an chhungkaw hunserh hman lai a thil thleng atan a thil awhawm ber anilo tawp ang le.



Remsanga chuan thu chu a chham zel a, chutia an fapa tawngtai a nawi tak deuh avang a lung si zan lo tih hriat tak pa ber chuan a aw chu alo thian kharh a, mahse pa ber awmdan chuan tawngtaina hmang mek remsanga chu a run ngang mai, "lalpa, kan chhungkua hian i venna leh i hualhimna hi phu hauh lo mah ila kan lawm tawk em em tho ani tih min hriat sak la" pa ber chu alo khuh khawlh mai, a rum zui nghat bawk. Chutih lai chuan nu ber ho chuan a unau te chu an lo ip chawih chawih tawh a.



"lalpa ka pa hi a hriselna tha lo ni a inhriatna a nei tlat hi a diklo a ni tih hi hriattir tawh la, a chhung te tan a phurrit leh ninawm a a awm thin pawh hi amah leh amah inhre chhuak ve tawh se" nu ber chuan hlauthawng fe hian a aw chu alo thian ve kharh a, "chuan ka nu pawh hi fel ber leh tha ber emaw a intih tlatna thlrau sual hi amah atang hian thehchhuak daih tawh la" remsanga nau mimi chu alo nui khek tuar a, "chuan lalpa ka nu hi misual a ni kan ti miah lo, amah a sual awm te hi a sual ve reuh em anih hi ka ti mai zawk ani tih he hun ka hman zawh rual hian hriatthiam tir leh nghal daih ang che" a u ramengi chu alo nui leh huk a, "ka u pawh hian a lerh lutuk hi sim ngam tawh se, chuan ka nau mimi pawh hian kan kawmthlang pathlawi khu vawikhat mah melh tai tawh reng reng suh se" mimi chu a insum thei ngang lo, "a awih awm loh lutuk u, tuman awih reng reng suh u" a ti chhuak hlawl mai a. Nu ber chu a nui veleh phut mai bawk, tawngtaina hmang mek tu erawh chuan pangngai takin ala chham malh malh zel a.



"ka pa hian mi tak ber emaw a intih tlatna leh puitling ber emaw a intih tlatna thlarau sual hi a kawchhung atang hian hnawtchhuak ngam tawh se" "e hem! ehem! pa ber a ni. "Chuan ka nu pawh hian rau ber emaw a intih tlatna phen a u lianzaua a melh no dan em em thin te hi sim daih tawh rawh se"

"a awih awm loh lutuk lalremsang" nu ber chuan a rawn tichhuak veleh phawng mai, pa ber chuan "hmm, hmm" tiin alo rum nghat nghat tawh mai a, "lalpa Pathian, ka u hian a bialpa ngah lutuk mai leh mi pa te ngaihzawn a sim hleithei lo thin hi i tanpui vat a nih loh zawngin a ha hmai lei chek thaw khawp in ka beng duh mai ang" Mimi chu za fe hian a nui ta vak vak mai a, a u ramengi chuan na zet hian a va sik vak a, "ei ahh a naa! Chumi pah chuan ramengi chuan tawitaina hmang mek tu chu rum mangkheng hian a han melh zui leh rawm rawm mai a, remsanga lah chuan ramengi chu lei alo chhuah khum hlawi a, ramengi chuan a ngei ngang mai.



"Lalpa tawngtai lai a men ruk ching ka nu leh ka u ramengi te hi rilru lam a chian lohna nei an ni hauh lo na chungin"

"lalremsang!" Ramengi a ni, chuveleh pa ber chuan a fian ken hmang chuan thleng chu a han khawng ri thak thak a, an reh nghal diak mai, chuveleh pa ber chuan "lalrem, chhunzawm zel rawh" A ti bung nghut a. "Lalpa, ka nau mimi ang em em a vir leh ei tur dap peih mi hi chu kan chhungkaw tan a innghahna tlak a nih hi ring lem lo mah ila i tanpuina nen chuan amah a thlarau sual awm hi ala hneh ngei ngei ang tih hi ka ring tlat a ni" "uu, ti khan min ti ziah bik suh. Nangpawh i ni ve tho"



"Tin, ka pa mi an lohna hi a hriatthiam ve kur siloh a i lak bo sak daih nan leh ka nu thlarau dawn dik lo hi a tan a zah chem chemna tur tel silova i lak kian a ka u nau te lerh lutuk leh mipa bula awm ngaihna an hre lo lutuk te hi an taksa atanga i hlap chhuah sak zawt zawt hunah meuh zawng kei mi tling lo leh a ruka fel em em si hian i hnen ka la thleng ve ngei mah na le amen"



Pa ber chu a thu kun chhal mai a, nu ber chu a melh rum ngang mai, nu ber chuan sawi chhuak hauh lo mah se 'awih reng reng suh' tih melh hian pa ber chu alo melh let zak zak thung. Chutah pa ber chuan a fa te chu a han melh rum leh khur khur mai a, mimi chuan nui sen sen chung leh tim dai chung hian "pa" alo ti a, a thusawi tam lo mahse a hmelah erawh an tawngtaina hmang tu chu a dem ru hle ani tih leh a ngei ru hle ani tih chu hmuh hmaih theih hauh lo ani thung. An unau zinga upa ber ramengi erawh a mood ah a chen loh hmel kher mai, a nau mimi rilru tur chu tawmpui tih hriat zet hian tawngtaina hmang tu chu a melh zui ram ram thung a.



Remsanga chuan hlawhtling intih hmel zet hian a thut hmun chu a han her rem sauh sauh a, chutah an camp na a speaker thuchah tawi sawi tha tak tak te chu chawhmeh han ban da da pah chuan a chhungte chu a han hrilh zawm nghal mawlh mawlh mai a, a phur hmel phian lehnghal. Pa ber chuan chaw chu ala bar ve thei tlat lo, chutah nu ber chuan pa ber chu han en ha chung chuan "duhtak, chaw kha ei la" a han ti a, chuveleh remsanga chuan chaw bar puk puk pah chuan "a sak deuh e law? Alo ti zauh mai. chutah le, pa ber chuan chang zet hian remsanga chu en in "camp chhuak zingah i nawi ber, vawikhat mah hun i hmang ve tawh lovang" a ti fiah ta kawlh mai a. Chutih pah chuan a ha lem hlui tawh zet mai chu a seh chik tawt tawt thei hial a.



Ka hnen a an chhungkaw chhung inkhawm neih laia thil thleng a sawi te chuan kei ngei pawh chu min then tir deuh chak chak thei hial mai. "Lalpa le, chutiang te a i tih mai mai ni" tiin ka nuih za chu insum a har hle. Kei chuan "ngawi teh lalrem, i nu leh i pa te chu an va insum thei zawk ve, kei a thil tih ni ve ngat se zawng ka pa in min pet chhuak nghal duh ngei ngei ang" tiin ka la nui ngat ngat reng a. Lalrema lah pek chuan "mai mai a, tawngtaina hmang tur te a min han phut reng reng ni, a awm ang thil hi chu hriat ve tur" a han ti bai bai a, kei chuan "e khai, chutia i tih mai mai, camp i lut a i chhuak chauh a, i lakah pawh beiseina sang tak an nei ngei dawn asin, boruak i ti uih zo vek zawk anih chu, i ti bam chiang em em lutuk a" tiin ka la nui tawp hleithei meuh lo.



Ni e, Kalsan tawh mahse a bul a la chambang ve ang mai a ni, a ni kha chuan an inkar a hmangaihna vanduai tak avang khan harsa ti tak chungin a kalsan a ni a, mahse veroi chuan tunah zawng a kalsan hlen ve ta thung a ni. Ni e, thihna meuh hi zawng a kalsan tu tur tan a huphurhawm a, a kalsan tak a te tan tak hian a na em asin. Pathian pawh hian he thihna kut vawt kher hi zawng lo duang ve malek lo se ni tur hi a nia, in hmangaih te tan tah vawng vawng na tur a ni a, in hmangaih hauh lo te tan ngei pawh he thihna kutvawt meuh hi zawng a zuamawm mawlh silo.



"Lalrem, khawiah nge i kal dawn a? lokal teh, lo chawl kawi ve teh, in hmuh a khat si" ti a an thenawm nula lily-i lo sawmna pawh chu hnar in "a khai lily, hei ka tul rih viau mai, ni dangah ka la rawn leng kawi ve zawk a nge" tiin hmanhmawh takin a kalna tur lam pan chuan remsanga chu a kal leh nghal daih a.



"Lalpa Pathian, engvang a veroi nen a min then hrang hi nge i nih? Engvang a ka hmangaih nen chuan awm dun ve thei lo tura min ruat nge maw i nih reng reng le? Aw Pathian, tunah zawng ka chuai zova, ka tlusawp zo ta anih hi, min en teh, min lainat ve lo em ni? Hun hi min han kohkir sak leh lul teh, he ka nun laktlak lo tak mai leh thlakhlelh awm loh tak lak ata hi zalenna mi han siamsak teh" Chu thu chu a tawngtai apiang a a chham thin avang leh ka hnenah ngei pawh a sawi fo thin avangin ka thianpa lalremsanga tawngtai thupui a ni tih leh a duhthusam mei ang a mit lova chu a ni tih ka hrechiang hle a, ni e, kei ngei pawh hian vawikhat chauh tal chu a tihsual siam tha leh tur hian chance han awm leh se ka tihpui ve thin kher asin.



Speaker chuan "lalrem, i nundan ah hian vuina tur leh lungawi lohna tur chu chhan tha tak chuan i nei ve ngei mai, keini te pawh kan ni ve vek alawm, mahse rema, hei hi ngaihtuah ve teh, Pathian kan chung a a that zia hi, a malsawmna kan dawn zo zai te hi kan chhiar thiam hi a tul asin"



Remsanga chuan "pu vante, ka beidawnna nun hi bansan ka lo tum hial tawh zawk a, hetiang ang teh hrep a nun hahthlak leh nun khawro hi ka ning ve tawh bawk ani" speaker vantea chuan phur hmel tak chung chuan chu "e he lalrem, a va tha dawn ve, nun thar nen bul han tan tak tak teh khai, i nu leh i pa i unau ten an hria em? An va han lawm dawn em, kei ngei pawh hian lawmawm ka va han ti em ve aw, khaw maw han in chibai nghe nghe teh ang"



"Nilo nilo, pu vante, chutiang lam a nilo, ka nun beidawng hi ka bansan tum dan i hrethiam lo ani. A chang chuan he ka nunna tlak tlai lo zet hi chhah mai te pawh ka duh thin asin, hringnun duhawm lo zet nen a nun hman ve reng ai chuan thi mai ila ka tan pawh a hahdamthak zawk ngei ang' tih chang ka nei thin alawm"



Ni e, hun hmasa lam kha a ngai thin ani lalrema hi chuan, rawlthar kan han ni chho a, khatih lai kha chuan hringnun ah hian tumah midang kan awt bik ngailo, mahsela vanduaina runthlak tak mai chuan a nun zawng zawng a vaw chhe vek a, a hmangaih ber chu a kalsan ngei a tul si a, kha thil a tih dawn khan tun hnu ah a inchirna zakhua a sei dawn ani tih reng erawh a hre lawk bik silo.



Mahsela a hmangaih ber Veronicai a han kalsan tak hnu khan amah ber pawh chu natna leh inchhirna. Inthiam lohna leh harsatna hrang hrang te chuan a tlakbuak chho ta zel zawk a, chumi hnu ah veronicai chu a thih thu kan han hre leh zel kha a ni a, kha thihna pawh kha amah avang ngei hi niin a hre tlat a, a inthiam thei lova, amah leh amah chu a in ngaidam thei lo a ni.



Engvang a veroi kha kalsan mai nge anih le? engtin nge a tih theih zawk? Veroi rilru nat dan tur zia te, a hrilhhai dan tur te, hreawm a tih tur zia te kha a hre lo a ni phawt awm si a, khatih lai khan veroi khan engtin tak a hun hmang ang maw? Tunah lah piallei daiah thlafam dairial a chang ta mai si a.



"Ni e pu vante, zep lohah chuan tum thum lai mai chu mahni intihhlum kalo tum ve tawh asin, mahse mak tak mai hian ka him leh zel a, mahse ka nunah nun thar hmel hmuh tur erawh a awm thei chuang lo, ka beidawng lutuk hi beidawn ngaihna pawh ka hre zo tawh lo hial zawk ta ve ang. Kha ka thil tih avang khan ka nunah hian rah tha hmuh tur a awm khat ta viau mai a, ka vanduai bikna leh ka harsatna te chuan vui hmui pu min siam in lungawi lohna leh nun lem tak nen heti hi ka ni ta reng mai a nih hi maw, ruihhlo lah ka ban phak a mi khawih loh pawh hi ka nei meuh tawh lo ang. Khawvelah ka theih ang tawkin ka tlan a, ka chhungril a khawharna leh inchhirna te chuan kian zai reng an rel thei mawlh silo"



"E khai, chung te chu nakinah i han puitling chho tak tak a nga hmanlai an la chang dawn alawm, beidawng mai lo la, tunah erawh i tan a thil pawimawh tak mai chu tih hram hram na nun i neih ve hi a ngai alawm, in kum te a la tam lova, tin nangmah ngei pawh hi harsatna nun hneh thei turin i tling tawk a ni tih hi ka hmu chiang em a, ni e, hmangaihna a han vanduai bik hi chu a huatthlalaawm in a runthlak duh thin khawp mai, mahse kan nun ah hian zirlai harsa tak tak kan hmachhawn ve loh chuan eng zirtirna tha mah hi kan pawchhuak thei hauh lovang.



"Chuvang chuan tun atang chuan i nun te ilo siam tha zel a nga, kohhran lamah pawh hian i theih ang tawkin in hmang lui ve hrim hrim rawh, a tih a tih luih hrim hrim hi a tul ve a nia, heng hian chakna a pe che a nga, i hun hmasa a i tihsual lian tak ni a i hriat, i nun ram pawt hniam em em tu pawh hi i kum tamna leh i tawnhriat ten ala chaldelh em em ang chu chu ka chiang"



Ni e, hman ni mai kha chuan keimah ngei pawh hian psychiatrist ka va pan pui hial anih kha maw, kha psychiatrist kha lo awm lo ngat se zawng a nun beidawn avang hian a hmel hmuh tur a awm lo hial ta ve ang chu, camp ah te a han lut zui bawk a, kei ngei pawhin ka theih tawkin ka fuih ve thin, tlem te chuan a nun pawh a inthlak ve hret hret zel, tin speker vantea leh a chhung te hian an ngaihtuah in an ngaihsak em em reng a, hemi chauh pawh hi dam thlakhlelhna tham a tling reng si a.



Mahse amah a inrinhlelhna awm leh inchhirna chu a hneh thei tlat lova, Veroi kha a unau pianpui chu a ni lo ngei mai, an in chhungkhatna pawh a hla viau tawh, mahse unau an ni tlat si a, khatia an kar a hmangaihna awm kha a bansan mai a tul tlat si a ni. Mahse amah chauh alo inngaihtuah lutuk bik a, veroi rilru tur kha alo ngaihtuah ve ngailo a ni. Veroi thih chhan ah pawh hian amah hi a inmawh puh lo thei lova, a kalsan avang a rilru na leh hrilhhai tak a awm veroi khan a thih phah ta hial si a ni, kha thil khan an inkara hmangaihna chu hmangaihna namai lo tak a ni ngei a ni tih a lantir chiang viau mai awm e.



"Pu vante, hei hi Pathian hian min han tihhlawhtlin sak thei ngat se chu hei aia duh dang hi ka nei ngailo ang a, hei aia thlakhlelh dang hi a awm thei hek lovang, hun liam tawhah khan min han hruai kir leh mai se zawng, ka tihsual tak te kha siam tha leh turin hun hi min han kohkir sak leh se, tin chumi chu ka tawngtai apiang a ka dil thin a ni, he ka inchhirna leh ka tawrhna hreawm tak ata hi zalenna min pe ngat se zawng Pathian hi a awm ngei a ni tih hi ka theihna zawng zawngin ka puangchhuak hial ta ve ang chu"



"E khai, chutiang te zawng thil thleng ngailo a ni a, duhthusam thil mai an ni alawm" nui hak hak pah chuan vantea chuan a han ti a, vantea vek chuan "thil theih loh tawp a ni alawm, hun kal tawhah te chuan tute mai pawh hi kan let leh duh vek ngei ang, kan thil lo tihsual tawh te, kan thutlukna lo siam sual tawh te kha siam tha turin hun hi han her let leh thei mai ila, chu zawng rema, duhthusam thil mai an ni e"



"Mahse pu vante, kei chuan ka tawngtai apiangin ka dil thin asin, hun kal tawhah khan let leh ila, veroi kha ka kalsan tawh hauh lovang, ka hmangaihna kha huaisen tak in ka pawm ang a, nghet tak in ka hmangaih chu ka chelh tlat tawh ngei ang. Pathian te chu thil engkim siamtu leh rel tu a ni a, a ni tan chuan thil tih theih loh a awm tawp awm silo a"



Vantea chu a nui sang reng a, "ni e rema, chung te zawng thil thleng palh ve thut thei te pawh an ni maithei asin" ti a han fiamthu hlut pah chuan "ti teh, hei alo tlai ve ta phian mai, mi va thlah lawk mai teh, nang ngamtlakah" a ti ta a.



Remsanga chu a taksa a chak tawh lova, ruihhlo avang in a talbuai a, mahse chu ruihhlo ngawlveina nghet tak mai pawh chuan veronicai a kalsan avang a a inchhirna leh hun kohkir a duhthu a samna lak ata chu a chhanchhuk zo chuang hauh lo. Ruihhlo chuan a natna chu a belhchhah zawk a maw ni chu a tih theih a, chhungkaw boruak tha a awm khat ta hle, a nun chu a dai pelh nasat tawh em avang in a he tlat tawh a, amah ngei pawh chu milem bu zing a milem pakhat ve ang lek chauh ah a in ngai hial reng a ni.



Mangchhia rpathlak tak tak te chuan zan mu thei lovin tum tam tak a awm tir fo thin a, tawnmang chauh nilo, hringnun ah ngei hian mangchhia a khat nun chuan a dimdawih hauh silo zawng a nih hi maw.



"Lalpa Pathian, zanin chu tun thla chhung zawng a a tumkhat na atan ka vawikhatna a ni ve dawn tlat mai" a ruih em avang chuan a tawng chu a sehchilh nawk nawk mai a, Pathian pawh chu a zu in pui biak mawlh mawlh mai reng a ni. "Lalpa, ka thian pa, ka va ngai che ve, hei zanin chu ka nawi leh deuh a min hrethiam ang che aw, lalpa Pathian thil ti thei tak tak ni la chuan ka dilna tam tak hi chu i ngaipawimawh ve tawh ngei ang maw le, ka dilna hi i beng thleng phak tur khawp chuan ka ka atang hian i hnen lam pan a thawnchhuah zin ber pawl a ni ngei awm si a, nge ni a nangmah zawk hi i awm tak tak lo em ni?"



A khum ah chuan a bawkkhup thlawp a, a kam a chilthli uai nguah nguah chung chuan a muhil zui ta bawrh bawrh a.