MUMANG THUAHTHUM chapter_2 (Remake) ziaktu, Laltanpuia

[April Hmar Liverpool]

Mumang Thuahthum (remake,2023)
Bung hnihna

Inrinni a ni a, chuti teh fakau a mangang leh thlabar a ka hnen a a fapa awmdan a hriatthiam loh thu min rawn hrilh tu chu tudang an nilo, ka mi hriatchian em em mai remsanga nu nu malawmi a ni a, kei chuan chuti taka mangang leh thlabar a awm chu ka la hre ngai lova, mak pawh ka ti viau reng a, hmanhnawh tak chuan nu malawmi te in lam chu ka pan ta nghal vat a,



min lo hmuh rual rual chuan "Jeffrey, i thianpa awmdan hi ka mang a ti ang a nia" alo ti nghal chung a, kei chuan in chhung chu han thlek kual nghal vat vat in, "khawnge midang hi?" ka han ti a, nu malawmi chuan "midang tumah an awm silo a, ka mang a ang lutuk, nang in a ngaihna i hre deuh ang tiin ka rawn pun ngawt mai che a ni" a han ti leh a, a hmel ah leh awmdanah chuan chuti taka nu malawmi mangang hmel leh chi ai hmel chu tun hma in ka la hmu ngailo.



"Nu malawm, engtin nge a awm lalrema chu? Tiin lalrema room awmna lamah chuan kan inzui nghal dawr dawr a, room kawngkhar chu chhung lam atangin alo inkalh tlat mai a, kei chuan lalrema chu ka han au a, "lalrem, rema, kawngkhar hi lo hawng teh, engtin nge i awm a? Hei nu malawmi i ti mangang lutuk alawm maw le, a zia lo em mai" tiin kawngkhar chu ka han chum dat dat a, thawm chu a reh diak a, chhung lam atang chuan chhanna engmah kan dawng hauh lo mai.



Kei chuan "nu malawm, zing ala rawn thochhuak miah lo i ti em ni?" Ka han ti a, nu malawmi chuan phawk fe hian "aw ni e, nizan khan a rawn haw tlai em em mai a, a rui hle nghe nghe, tichuan kei chuan ka lo zilhhau a, mahse a ni chuan lo ngaithei lovin kan inhau zui hrep mai a, a mu zui ta alawm maw le, zingah a rawn tho miah lova, chaw pawh ala ei lo, kaihthawh ka tum lahin thawm a nei hauh silo a, hei tunah lah a tlai tawh si a, ka ngaih a tha lo ta alawm maw le, nizan khan a rui si a, khatiang em em a a ruih ngai awm kha ka hre ngailo, a ni hi alo muhil hlen ta mai anih te hi ka ring ta rum rum mai alawm maw le, kawngkhar ka chum vak vak pawhin min chhhang lo reng reng" tiin a lung chu a chhiat hmel hle mai a,



"Nu malawm, eng em a tilo ang, kawngkhar hi ka tlawh hawng mai dawn" ka han ti a, nu malawmi pawh chuan "aw, a pawi reng reng lo" alo ti vat a, chutah kei chuan na zet hian kawngkhar chu ka han tlawh vak vak a, chutah ka taksa chuan theihtawp in ka han nek leh vak a kawngkhar chu a in hawng thei ta hram a.



Hmanhmawh zet hian khum lam chu kan pan nghal thuai a, lalrema chu khumah chuan alo mu phek thlar mai, a hmel a dawldang in a cher hle mai a, a hma a lalrema kha a ni ta hauh lo tih a hriat theih a ni. A mar chu ka han dek nghal vat a, lalrema mar chu alo la phu dat dat mai. Ka thaw nghal hawk a, "a mar chu ala awm e" tiin khumah chuan ka thu hnawk a, chutah nu malawmi chuan "mama, lalrem, rema, harh rawh, harh teh bawiha" tiin lalrema chu a sawi nghal mawlh mawlh mai a, chutah muangchang hian lalrema pawh chu a rawn meng tiam tiam a, chutah zawi sap hian "enge ni vak vak a?" a rawn ti ta a.



Fuihna tawngkam tha ka theihtawp a ka fah ve mawlh mawlh reng hnu chuan ka hawsan ve leh ta a, ka ngaihtuahna ah chuan ka thianpa khawsa zia chuan ka ngaih chu a ti thalo ve ta viau mai a, a hmel ka hmuh phat khan mitthi ang mai niin ka hria, heti reng hi anih dawn chuan ka thianpa lalrema hian rei a daih dawn lo tawp mai ti rilru nauh nauh chung chuan thenawm te thingpui dawr ah chuan ka petek lut ve ta poh a.



Ni dang ang lo takin tun tum zet chu eiin lam ka insum lo kher mai, tum dangah hi chuan thingpui hi ka in a ka duhtawk deuh mai thin a, chow plate hnih leh thingpui ka in a, chuti chung chuan ka pum chu la ruak riau a hriatna ka nei tlat pek a, kuhva cheng sawmnga man ka lam bawk a, zial ka duh tel bawk avangin ka tum loh deuh chuan pawisa ka seng ta erh mai.



Zan lam hun a rawn her tawh hi chuan tihtur nei teuh mah ila engtin emaw tak hian ka lung hi a leng deuh tlat thin a hriatna hi ka nei pek thin a, ni e, thlasik lai a ni a, he hunpui hi chuan boruak engemaw tak hi chu a keng tel hranpa ve hrim hrim mai. Ka phone lo ri chu ka han en a nu malawmi alo ni a.



"Aw hello" lehlam atang chuan zuai zet hian "aw Jeffrey, lalrema ilo hmu em? Kha lamah a rawn kawi em? Kei chuan "aih, a rawn lang miah lo, a chhuak leh em ni a?" Nu malawmi chuan "aw, a chhuak lui leh talh anih kha, buaithlak tak a ni, a duh hi chu a tilui tlat zel mai si a, a chhuah chhan tur a han sawi hmang kha chuan amah ngei pawhin a that phahna tur anih ka beisei" a han ti a, kei chuan "chu, eng lam pang nge? chanchin hriat nuam lam te anih chuan a va lawmawm dawn ve aw" ka lo ti ve vat bawk a.



Kei chuan lalrema chu ka va text nghal vat a, "enge min hrilh ve loh? Ka va ti a, lalrema chuan kei chu nakinah min hrilh a tum thu sawiin ala puitlin hma hauh chuan min han hrilh nghal vut vut chu alo duh lo alo ni, kei chuan "chu, a va nuam dawn ve, i suangtuah ve fo thin chu i han puitlin dawn ta bik a ni a" hmel hlim tak emoji chu ka dah tel a, ka lawmpui zia te chu ka hrilh bawk a. A ni pawh chuan tih puitlin ala nih hma hauh a chutia ka han phul pui hlut pawh chu fiamthu ti tak deuh roh chuan mi han khap ve vat bawk a, kei lah pek chuan phur fe hian "ngawi teh, hei zet hi zawng a ropui e mai, nun thar nen bul i tanna atan hmanraw pawimawh tak a ni ngei ang, tin a zan a zan a i han ngaihven nghal chung chung danah pawh a emergency thil deuh a ni phawt a nga, engpawhnise ka lawmpui lutuk che"



Ni e, ka thianpa lalrema chu thinlung takin ka lawmpui reng a ni, tet te atang a inhrechiang kan ni a, alo suangtuah ve fo thin chu tunah a tak ram a han thleng ve thei mai tur chu ka lo hlim ru ve veng veng ringawt mai a ni. "Mahse, ruih lam kha chu sim daih tawh tur aw" tiin nui emoji chu ka dah tlep tuarh a, ka tihtur buaipui tur chuan ka inbuatsaih nghal a.



Remsanga chu alo suangtuah ve fo thin America lama liamthla tawh mai tur anih avang a a hlim em avang chuan a nun hman mek duhawm lo tak pawh chu alo mangnghilh ve lek lek thei hial a, Nimahsela ruihhlo zun erawh ala na a ni chek a nga chumi tum pawh chuan a rui viau nghe nghe a, a nunhlui te chu theihnghilh in a hliam leh ser te chu lo dam tawh se, hmangaih thar te tawngin nun thar nen bul tan leh thei se tih chu kei ngei pawh in a ka duhthusam a ni thin si. Chutia hmun dang a rilru ti thawveng tur ringawt a hun a han hmang tur pawh chu tha ka lo tihpui ve em em ringawt a, amah lalrema'n kal a chak ve em em thin alo ni bawk nen, 'engtik ni ah emaw chuan ka la kal ve ngei ang' ti a duhthu alo sam ve na thin kha a ni a, ka lawmpui lo thei lo tlat a ni.



Chak zet hian a bike nen chuan a tlan fua fua a, a ngaihtuahna ah chuan thil dang engmah a leng mawlh lo, tawnmang ang mai niin a hria a, a nun a thil thleng lian tak zing a mi anih dawn avang in a thaw ipik na ata pawh chu a veng hawk thei hial in a inhria a ni. Amah ngei pawh chuan tlanchak a inti deuh nge ni alo rui ve deuh bawk nen, a ngaihtuahna ni deuh chiai reng mai ata chu a harhchhuak hlawl mai a, chumi rual chiah chuan a nu in a hnena a hrilh fo thin kha a hrechhuak zawk a, ni e, a nu chuan a fapa chu tlanchak lo turin a hrilh fo thin reng a ni.



kawng kual lai takah chuan a kual mai thei ta tlat lova, lehlam atang a motor light rawn eng phut chuan a mit chu a tivai nghal vek a, chumi rual chiah chuan motor horn ri tuarh ri a hre zui bawk. A lirthei chu a thunun hman ngang lo va, motor lo tlan mek nen chuan chiang zet hian an insu ta bur mai a ni, a taksa chu boruakah a leng delh delh ni hian a hria a, mahse a rei lo, chutah na zet hian leiah a tla thup awk a, a thaw chu a tawt nghal up up mai, a taksa chu na hlir in a khat zui a, theihtawp chhuah in thawh kan mai chu a han tum a, chu erawh a thil hriat hnuhnun ber leh a tih theih hnuhnung ber a ni ta ani.



Remsanga chu a harh hlawl mai a, a lung chu a phu nghal dawt dawt mai bawk. A taksa chu na hlirin a khat a, a lu chu a hai ngang mai. Chutah hlauthawng fe hian a han in beng kang da da a, a khaw hmuh a han fiah tial tial mai chu mak a va han ti kher em ve le!



Tuipui zau em em mai kam a vun ngo ho leh mi dum ho in kal thelh sup sup karah chuan tiau vut zingah alo muhil alo ni. Chu tuipui kam mawi em em mai leh tui fawn hlep hlep mai te, hmeichhe hmeltha leh pian nalh em em mai te, mipa hleitling zet zet mai leh naupang duhawm tak tak te chu duhthawh zet hian a thlir vawng vawng mai a, tui pui lai taka lei indawh phei zui mai te chu ava mawiin a va ropui chung chuang em ve le, a naupan lai leh a rawlthar hun lai a alo suangtuah fo thin, kal ve alo chak em em thin panama city tuipui kam mawi leh ropui tak mai chu a ni thei mai a ngem?



Chu tuipui kam mawi leh ropui tak maiah chuan hun a hmang mek chu a ni si a, hetiang em em a tuipui kam mawi leh ropui hi a tak ramah ala hmu ngailo a, a tak ngei a a han fan ve takah chuan alo beisei leh ngaihruatna chu a khum chiang hle niin a hria a, a thil hmuh engkim mai chu a thar sar vek a, boruak te mawlh mai chu zo thlifim nen chuan inpersan hle mahse chu aia boruak thiang leh duhawm chu a awm leh tawh kher bik dawn em ni?



A awmna hmun chu khawi lai tui pui kam chiah nge anih? panama city beach chu a ni reng em tih hriat tumin a kiang a mi ngo pakhat hnenah chuan a english thiam tawp chuan a han zawt ve luam a, chu mingo pa pawh chuan an awmna hmun chu panama city beach anih thu chu alo hrilh ve mai a, remsanga chuan mak a va han ti tak! A naupan lai leh a rawlthar hun lai zawng zawng khan khawvel a tuipui kam a fan chak ber thin chu he panama city beach ngei hi alo ni tawh thin a, tunah hetiang a hahdam tak leh thlamuang tak mai a hun alo hmang thei ta mai chu awih har a ti lek lek hial a ni.



Mahse nichin khan, nichin mai khan a lirthei ah chesual in nikhua a hre lo zui anih kha, enge thil awmzia hi ta ngai le? Thawklehkhatah Aizawl atang in florida ah a in sawn thut tihna maw? Ni e, America ram a kal tur kha chu anih ngei tak kha maw le, mahse chuti teh thut a thawklehkhat a hun hran daih a a han awm ta mai chu mak han tih loh rual a ni tlat silo a tin ni.



A rilru chuan time travel an tih ang te chu a hriatchhuah tir uai uai mai a, tin he hun duhawm tak, suangtuahna thleng dik mek hi tawnmang mawl mai chauh pawh alo ni reng thei' tiin amah leh amah chu a hmaiah te chuan a han in beng sawk sawk a, thil a danglam phah chuang silo, a tho thut a, tui ah chuan a va inchiah harh a, a lu te chu a nuai nawk nawk a, thawk te chu a han la hrawk hrawk a, mahse thil thleng a danglam phah hauh silo.



"Lalpa leh! hei hi ka mumang ram a ni silo maw? Kei hi, kei hian ka duhthusam ram chu ka fang mek a ni si a" chutah uluk leh ngun tak chuan a han inngaihtuah vang vang a, engtin nge chu lai hmunah thawklehkhat a alo awm thut theih? America ram a kal tur a in buatsaih mek kha chu a ni a, nge ni a khatia a chesual kha a hriatna leh a rilru te hi a hlauh ta ang a, hun rei tak hnuah America ram chu a kal thei chauh zawk ni ang, tun a khatia alo mutthilh lai khan a hun hmasa lam a a chetsualna kha alo mangphan leh a nga he lai a hun nuam tak a hman mek hi a tawnmang ram emaw a ti ta hlauh zawk ni ang? Mahse mahse, America ramah a kal lai awm reng a hre chhhuak thei tlat lo. thil thleng mek hi a tawnmang mai pawh chu lo ni zawk pawh nise, han thamral leh nghal mai atan chuan a phal mawlh lo.



"Imm" tiin a mutna bula mingo pa bawk kha an tun hun hman mek chu eng tik kum nge tih te, eng tik thla nge tih te, eng ni nge tih te chu a han zawt leh ta ngawt mai a, chu mingo pa chhan na pek chuan remsanga chu a va ti hrilhhai chiang em ve le! Mingo pa chuan an tun hun hman mek chu kum 2009 kum niin nipui lai april ni 21 anih thu a hrilh ta mauh mai anih chu.



Remsanga chuan ring zet hian "oh my god" a ti vak ringawt a, chumi baka han chhut zui vak ngaihna erawh a bo viau thung. Ni e, kum 2009 kum te chu kum sawm leh pali liam ta daih tawh kha ani tlat si a ni, mahse hei erawh chiang takin ala hria a, kum 2009 kum ah kha chuan remsanga te chu rawlthar an ni chho ve tan a, khatih hun lai a tuipui kam a kal ve a chak thin zia kha a hrechhuak uai uai mai, veronicai nen khan an la inngaizawng lo nasa a, mahse khati chung khan a unau nu veronicai bulah khan he tuipui kam a a kal chak thin zia te kha a hrilh vak vak zel anih kha, thawkkhat lai phei kha chuan a thian te nen india rama tuipui kam awmna hmun a kal ve hial te kha an tum anih kha, mahse he panama tuipui kam kher erawh a duhthusam ram a ni tlat thung a, chhan tha tak nei a he tupui kam hi ngaina leh kal chak kha a ni thin a.



chutia hrilhhai leh mangan ru tak a a awm takah chuan chu hun a tawn mek chu a suangtuahna emaw a mumang mai anih chu a ring ta a, chutah chu tawnmang duhawm tak mai atang a a harhchhuah hma ngei chuan tiin a zuang vak bak a, a te chel chul bawk a, tui ah te chuan nuam a tawl vel a, a changin a zai pah a, a chang in tuipui kamah chuan a tlan vak vak a, a ban chu phar in chung lam ah a dak a, chutih pah chuan tui fawn karah te chuan a vir kual vel vak vak bawk a.



Ama hming a rawn ko tu a hriat rual chiah chuan a harh zawk a, a bul maiah chuan a thianpa jeffrey pawh chu alo awm ve reng mai a, Jeffrey chuan nui sang chung chuan "a nuam bawk a niang maw" tiin thla chu a rawn lak sak a, chutih pah chuan tuipui kam leh a chhehvel te chu camera chuan a la kual pah zel a.



"Jeff, nang maw?" Jeffrey chuan "lalrem, enge kei chu?" tiin thla chu ala kual pah zel a, "ngawi teh, khaw maw, thlalak tam deuh ka duh a nia" tiin remsanga chu jeffrey camera ken hma ah chuan a han ding a, "aw hmet mawlh mawlh mai rawh jeff" tiin a ban te chu a phar a, a chang leh a kut a kuangkuah a, a chang in lehlam te chu a hawi bawk a, Jeffrey pawh chuan a thian pa in post kual vel chu nuih vur vur pah chuan a thla chu a lak sak ve zel a.



"Jeff, khawnge midang hi? kan pahnih chauh hian kan ni em ni? Jeffrey chuan a kawr chu han phelh mawlh mawlh in "a lum hle mai" a han ti a, remsanga bawk chuan "jeff, thil engkim hi ka hrethiam lo takzet a ni. Keini hi kum 16 chauh maw kan la nih? veroi te hi an tel ve em? Jeffreya'n a thianpa hmel a mak tihna leh hrilhhaina lo lang chu hmu in "hey, nang hi i tha meuh maw? Enge veroi te chu an tel ve ngawt ang a? Kan thian za in kan kal ani tih hi i hriat loh tak tak ka ring lo. Chuan eng thil nge i hriatthiam loh chu?" a han ti a,



remsanga chuan "jeff, ngun deuh in ngaithla rawh, tun atang a kum sawm pali lo awm leh tur atang in ka lo kal a ni. Ka sawi awmzia chu future atangin ka lo kal tihna anih chu" Jeffrey chuan a thianpa hmel thutak lutuk mai leh uang thuang lo zet mai a han hmuh chuan "lalrem, eng thawnthu nge min hrilh i tum a? chuan nang chu star ropui tak emaw i inti a ni maw? A hab ti a, mahse remsanga hmelah chuan lungngaihna leh hriatthiam harsa tak hmel hmuh theih in a lo lang chhuak a, "jeff, veroi hi a thi tawh"



"Engtin maw? Lalrem, i a ta mai em ni? Fiamthu hun pawh anih loh hi" rensanga chuan "jeff, ka thusawi hi awih a har ang tih pawh ka hrethiam lutuk, mahse thudik tak a ni. Veroi nen hian kan inngaizawng asin, mahse"



Jeffrey chuan "mahse unau in ni alawm, lalrem, engemaw i hriat le, i a tlat, fiamthu pawhin mahni unau te chu ngaihzawn chi pawh va ni suh" Alo ti hlar a, a ni pawh chu a thutak tawh hle. "Jeffrey, enge thil awmzia hi ka hrethiam bik lo, hei hi ka mumang anih loh chuan hun ah kei hi ka zin tihna a ni ngei ang, ngaithla teh, tun atang a kum nga lo awm leh turah hian veroi nen kan inngaizawng dawn a ni. Kan in hnangaih hle a, tuma then hran rual loh in kan in zawmna a nghet a ni" Chutah a thianpa mak ti leh a ngaihna hriat loh hmel taka amah en ha tu chu en in remsanga hmelah chuan lungngaihna thuk tak leh natna thuk tak chu hmuh theih a ni a.



"mahse kan inkar a hmangaihna chu thil dik niin ka hre ta lova, chutia unau han inngaizawn ringawt mai chu a mawi lovin ka hre ta a, veroi rawn miah lo leh a rilru tur pawh dawn miah loin ka kalsan ta a ni. Mahse thla thum a liam hnu chuan jeff, nangmah ngei hian veroi thih thu min rawn hrilh asin" Jeffrey chu a mengzau kawk a, "chu, thawnthu ngaihnawm tak anih ngei dawn chu" alo ti a, remsanga chuan "nilo Jeffrey, thil tak tak a ni. Tichuan kei chu ka thil tih avang in inchhirna leh inthiam lohna in ka khat zo ta a, ka nun ram chu a hniam ta rawih rawih mai a, ka chhungril a khawharna leh ka inchhirna avang chuan ka nunphung pangngai zawng zawng pawh chu ka hlauh ta vek a, tichuan khawvel ah ka tlan ta a, ruihhlo ka hmuh ang ang ka khawih chho a, beidawnna leh natna a khat in ka hringnun chu ka chhiar chho ta a ni"



Jeffrey chuan ner nang chung chuan "mahse hei hetah tuipui kam ah kan awm reng hi" alo ti a, remsanga chuan "jeff, voroi kha engvang in nge ka lo hawisan kher kher le aw? Kei khan dawihzep tak leh mahni hmasial takin khatiang thil kha lo ti ta lo ila chu he nun ah ngei pawh hian hlimna hi ka tawng ve tur hi a ni a, mahse jeff, ka kalsan si a ni. Ka thil tih avang a inchhir leh beidawng reng reng a ka awm lai chuan vanneihthlak tak maiin America ram a kal theihna chance ka nei ve ta hlauh mai a, en teh jeff, kan rawlthar lai zawng zawng a ka duhthusam thin kha i hriat kha, America ah hian engtikah emaw chuan ka la zin ve ngei ang' tiin ka sawi thin anih kha ila hria em jeff?



Jeffrey chuan "imm hei, kha i duhthusam kha a tak ngeiah a thleng mek chu anih hi, mahse engemaw in a tibuai ta thut che anih loh vek chuan i thawnthu sawi te chuan min ti hrilhhai angreng viau mai. A bikin veroi i hmangaih thu i sawi ta mai te chuan min thawng takzet a ni"



"Jeff, hun kal tawh ah ka lo kir leh alawm, ka thusawi te chu ngaithla teh, chutia America a kal tura ka inbuatsaih mek lai chuan vanduaithlak takin ka lirthei hmang chuan ka chesual ta hlauh mai a, ka khaw hmuh a thim vek a, ka mit sulh a, ka thaw a chham vek bawk. Mahse ka han harhchhuah leh meuh chuan he laiah hian ka lo muhil reng mai a, thil awmzia te ka han hriatchian tak hnuah chuan hun kal tawh, rawlthar kan nih hun ah khan ka kir leh a ni tih ka hrethiam ta ani"



Jeffrey chuan veroi chungchang bawk chu alo la helh ngang mai, "lalrem, veroi te chu unau in ni a, a mak ka ti takzet, nge ni a nang hian ilo duh ruk tawh avangin heti zawng hian lem i chang kual ta vel tihna zawk ni" tiin a thianpa rinhlelh hmel tak chuan a han melh ra a, remsanga chuan "a teuh lo lutuk jeffrey, dawt ka sawi reng reng lo. Tunah kum engzat nge i nih? Tin i hmel te pawh hi kum 16 hmel chauh kha ila ni a" han ti a, Jeffrey chuan "a mak ma nge aw lalrem, America a kal tur hian kan bei ve fat fat thin anih kha, tichuan tunah kan duhthusam ram chu kan thleng ve ta anih hi, a bak engmah a awm lo, veroi hi ilo vei ru hle thin tihna a niang maw, zep lo law law mai rawh lalrem" a han ti a,



remsanga chuan a thianpa in a thusawi te a awih sak loh em avang chuan han hrilhfiah vak in awmzia a nei thui dawn lo tih a hria a, chutah a rilru chuan "imm, hei hi ka mumang mai a ni, engtik ah mah hun kal tawhah ka kir leh lo tawp ang, ka mumang mai mai anih hi" tiin jeffrey hnenah chuan "jeff, khawiah nge midang kan thian dang te chu an awm a?" a han ti a, jeffrey chuan "lalrem leh, i hriatna hi i hloh ta thut mai tihna a mi le, i fiamthu hmel siloh a" tiin mak ti zet hian remsanga chu a en vang vang a, chutah jeffrey chuan "imm, an ni chu hmun dangah an kal alawm, i hriat ve reng kha, keini pahnih hi he laiah kan kal ve thung a" a han ti a, Jeffrey vek chuan "nang hi i fiamthu lo tak tak a maw?" A han ti leh a, remsanga chuan hnuai lam chu a bih ngat a, "imm jeff, ka fiamthu lo takzet" a ti a.