MUMANG THUAHTHUM last chapter (Remake) ziaktu, Laltanpuia

[April Hmar Liverpool]

Mumang Thuahthum (remake,2023)

Bung Thumna



Chu lai America ram ropuiah chuan zan hun te chu a duhawm bik tlat a, hriatthiam mai harsa zawk hian hun chuan remsanga leh a thian te chu an duhthusam ram atak ramah a chantir mek si a.



An thlenna hotel a zanriah an kil mek lai chuan a mize cool raih mai leh zuai ru zet mai chu a thian midang te hlim hmel leh nuam ti hmel karah chuan a langsar lo thei lo. An thian zinga mi duhzuala chuan chu chu hria in "lalrem, vawiin beach lamah i che nasa deuh a ni maw? I chauh hmel riau mai" a han ti a, Chuveleh Jeffrey chuan "imm, a ni dawn tak, vawiin khan lalrema hian thawnthu min hrilh a, a dangdai khawp mai, a ni chu future atang a lokal anih thu leh veroi nen pawh future ah chuan an inngaizawn thu te, veroi chu a thih tur thu te thlengin min hrilh a" tiin chumi ni a remsanga awmdan leh a thusawi te chu midang hriatah chuan a han sawi chhawng ve a.



An thian dang te pawh chuan nui rah rah chung chuan Jeffrey thusawi chu an lo ngaithla dauh dauh hlawm a, duhzuala vek chuan "jeff, veroi ber kher chu a changtunu nilo se, a chhan chu unau inngaizawng te chu a" tiin a ner deuh nang a, midang pawh chuan "dik chiah mai lalrem, mawitei zawk changtunu ah i hmang lo anih chu maw le, nangmah ber changtupa tur i nih hmel si a" an lo ti fiam thu ve sap sap bawk a, remsanga chuan a rilru chuan "ni e, unau inkar a in hmangaihna a pian ve chu dan kalh tlat a ni. He hringnun a hmangaihna in a huam chin ah hi chuan unau an tel ve lo ani" tiin a rum hawk a.



A thian te hmel a hlimna leh lungawina te, nuam an ti hmel te chu a hmuh chuan an duhthusam ram chu a tak ram ah an chantir mek ani tih haider sak theih an ni hauh lo. Mahse a ni ve erawh he tawnmang ram ah chauh pawh hian veronicai nen a an in hmangaih ve chu phalsak an ni chuang lova, hmangaihna dan ah chuan an ni inkar a hmangaihna ve chu phuar beh sak tlat an ni si a.



Zanriah te chu an ei kham hnu chuan florida khawpui chhung chu fang in hun hlimawm tak an hmang a, kum 2009 kum a flo rida hla lar low tih te an ngaihthlak nasat thin zia kha, mahse khami hun lai kha tun a an hun hman mek hi a ni si a, tin kum 2010 kum khan club cant handle me tih hla kha a rawn lar leh hle anih kha, an han duh theih zia mai kha, chuveleh remsanga chuan a mobile phone a a music playlist chu a han en nghal vat a, a hla zawn low tih hla chu alo awm ngei mai.



Duhzuala chuan "Lalrem, kal ru, saw tah sawn chuang ve ang u" tiin an hma mai a ferris wheel lian turu zet mai lo awm chu a kawk a. Chuveleh midang pawh chuan "ni e, kal ru, kan kal chhan ber a ni alawm, a nuam thei ang ber zel in le" tiin ferris wheel a chuang tur chuan an phur tlang hle a.



Chumi zan chu hun hlimawm tak leh chhinchhiahtlak tak nen an tlingtla a, an thlenna hotel lama an kir leh meuh chuan dar 1 a pel thuak tawh mai, an chau tlang ve deuh bawk a nia nge, khum dup nuam tak tak, an mikhual te tui ti taka an mutthilh theihna atan a a bik taka an duan khum ah chuan tui ti takin an muhil tlang ta siai siai hlawm a.



A mumang chu mak a tih em avang leh a ngaih a that loh deuh tlat avang chuan a mutna atang chuan a thochhuak thuai a, sana chu en in zing lam dar 8 alo ni tawh, tho tlai a inti kher mai. Choka lam a pan nghal thuai a, a nu in alo hmuh rual rual chuan "lalrem, i rawn thochhuak tlai lutuk a, kha vantea pawh khan a nghak chhuak zo ta lo che anih kha, chuveleh remsanga chuan "nu, pu vantea maw?



"Aw, ni ang chu maw le, a nghak reng che a, enge i chanchin zel a rawn ngaihven duh che alawm maw le" chuveleh remsanga chuan "aa nu, ka na vak lo tihna a niang maw" tiin a taksa te chu a han indap kual a, na engmah a nei hauh lo. "Nu, ka bike kha a chhe viau em?" A han ti a, chutah a nu chuan remsanga chu a han en ang he haw a, chutah "lalrem, eng chungchang nge i sawi a?" a han ti a, remsanga chuan "aw ka accident avangin ka na viau turah ka inngai, bike pawh a chhe nual in ka ring maw le" a nu chuan "eng a ni? Mak a tih hmel kher mai, "engtikah maw i accident?"



Chutah le, a nu hmel leh awmdan ah a uang hauh lo ani tih a lan chian tak em avang chuan remsanga chu a buai ru leh ta hle mai a, 'imm he hun ngei pawh hi tawnmang mawl dang leh bawk a niang maw? A han ti a, "nu, ka accident hnu khan engtin nge ka awm? Ka harhchhuak a hmun hran daihah ka lo awm a, chuan ka lo muhil a, tunah he laiah kalo awm ve leh mai bawk a, thil thlen dan hi ka hrethiam lo hle mai" a han ti a, chutah a nu chuan "lalrem, accident zawk chu nangmah niloin i nau mimii zawk alawm" a ti a, chuveleh remsanga chuan "imm, nu, mimii a accident i ti e law? a na viau em? Chumi rual chiah chuan Mimii chu pawn lam atang chuan tiang hawl chung chuan a rawn bai lut auh auh a, a ke dinglam chu a incher khawng ut mai bawk.



"Lalpa leh! tiin remsanga chuan a nau mimii en vawng vawng chung chuan a ding ngawi reng ringawt a, chutah a harhchhuak zawk mai. "Imm, a ni ngei e, mimii hi hetiang chiah hian khami kum, kum 2018 February ni 20 zirtawp ni khan a awm anih kha, ni e, ka la hrechiang khawp mai, khami tum a thil thlen dan ang chiah chiah kha a ni. Mahse khatih hun lai mimi'n a ke a tih nat hun lai kha chu kum li liam ta a mi daih tawh kha a ni si a' chuveleh remsanga chuan hmanhmawh fe hian "ka nu, nu, vawiin hi eng ni nge? engtik kum nge? tin eng thla nge? a han ti a.



A nu chuan mak tih hmel zet a a fapa en ha chung chuan "nang hi i rui leh tawh a ni maw? Alo ti a. "Nu, engemaw ka ruih ngawt ang ni, ka mu ka tho ve chiah anih hi, ka zawhna chu min chhang teh" a han ti a, "lalrem" a nu chuan a en ngun ngang mai, "vawiin hi ni 11 ni Saturday a ni e, chuan enge a dang? i tho fuh vak lo anih dawn hi, ruihtheih thil khawih tawh suh ang che, veroi te zawng i tluk teuh lo, a ni te chuan hma lam a pan san nal nal ang che, nang ve hi chu a hnungtawlh zawngin i awm tlat a, veroi hian a hmusit mai ang che maw le, lungleng ang te, amah ngai ang te hian awm duh reng reng bik suh"



"Nu, eng thil chiah nge maw ka chungah hian thleng ta mai le? Nu, veroi nen chuan engtin nge kan awm a?



"Lalrem, i pachang lo bik lutuk, in inthen a ni lawm ni?" Remsanga chuan mak a va han ti kher em ve le! "Ka nu, veroi nen maw?



"Aw, in inthen thu an sawi a, nangmah ngei pawh hi ka rui e te i han tih danah hian i lungleng leh inthen tuar loh vang bak va ni suh, a tha lo a nia, ruihhlo khawih phah nan a hman mai mai loh tur"



Remsanga chuan "nu, thil awmzia engmah hi ka hrethiam lo, ka thusawi tur hi ngun deuh in ngaithla teh, nu he lai hmunah hian ka rawn awm ve tawp mai a ni. Tun hun hi hun kal tawh a mi a ni. Hun diktak ah chuan veroi a awm ve tawh lo, kan inthen ngei mai nia, imm kum 2018 february thla ah ngei kha chuan kan inthen alawm ni e, mak ka ti hle a ni, kan inthen hun lai ah khan ka let leh a ni, chuan chumi tifiah turin ka nau mimii'n a ke a tina bawk a, ni e, mimii pawh a ke a tliak lo chauh anih kha khami tum khan, tichuan veroi nen pawh kan inthen ngei a, nilo, keiman ka kalsan zawk a ni. Veroi kha engmah ka hrilh lo a, ka kalsan tawp a, ka be duh lova, kan inkar chu kan pahnih tan a a that zawk nan tihtawp ni rawh se ti a thu ka hnutchhiah bak kha chu eng dang mah ka hrilh lo, ni e a ni pawh kha a reh ve mai bawk a, min rawn tihbuai zui emaw a rilru dam loh thu leh a rilru nat thu kha engmah ka lakah a thlen zui lem lo, ka thuchah hnuhnung kha a tawi viau na in a chiang in a fiah em bawk a tin ni.



"Ni e, mahse khami hun lai ah khan ka kir leh a maw? a va mak em em? Hei hi ka duhthusam thin kha a ni a ni lawm ni? Mahse ka duhthusam ah chuan veroi kha ka kalsan lovang a, nghet takin ka chelh bet tlat tawh zawk ang' tiin duhthu ka sam a ni si a, mahse ka hun kal tawhah chuan hruai kir leh ka ni a, mahse mahse, thil thlen dan erawh a danglam phah chuang silo, kan inthen tho si a"



"Lalrem, i nau nen hian lo awm rawh u aw, ka chhuak lawk dawn a nia" remsanga chuan "nu, tun hun hi kum 2018 kum a ni tak tak em?



"Lalrem, i ruihtheihthil tih vang a ni ngei ang, vawikhat mah ti tawh suh ang che, aw ni e, calendar te kha en ta mai che, hahthlak thei lutuk mai"



Calendar chu a han en a, kum 2018 February ni 11 inrinni alo ni a, a hun kal tawhah chuan a let leh ngei niin a lang, chutah lalrema chuan chung mumang pahnih ah chuan chhan tha tak nei a thawn let leh a nih ngei ring in thil awmzia chu a ngaihtuah dauh dauh reng a.



A mumang hmasa ah khan kum 2009 kum a let tir a ni a, khami kumah khan an thian za chuan America rama kal tumin inthurual an lo tum ve tawh thin a, mahse khami tum khan engemaw harsatna neuh neuh leh chhuanlam a ngaihtheih tur thil dang a awm avang khan an thil tum kha an thulh leh ta kha ani a, an mahni kaihruai thei tu tur pawh an awm vek, mahse an mahni lam khan chhuanlam engemaw siam in an tum an thulh a ni.



Ni e, kha thil an suangtuah ve fo thin leh an chak em em thin America ram a zin kha an tan kal theihna hun tha a in hawng ngei mai, kha hun kha an hun lo awm leh zel tur atan a thil pawimawh tak ala nih dawn vang ani ngei ang. Ni e, khami tumah khan an thil tum kha lo puitlin ngat ta se zawng, an hun lo awm leh tur pawh a danglam ngei dawn tihna a ni a, veronicai nen pawh an inngaizawng kher lo maithei ani.



A diktak chuan a nun pum pui a buai zui tak nachhan chu veronicai nen a an in hmangaihna kawng bumboh tak vang a tih theih a, veronicai nen khan in hmangaih lo se chu a nun kha a tha lam zawngin a kal ngei ang. Hmangaihna vanduai avang in a talbuai chho zui ta ani ber a, tin a tawp kharna lai tur kha a pawimawh hle bawk. Veroi nen an in hmangaih hma a an thian za a an thil tum, America a kal kha a tawp kharna ah khan a tum leh chiah kha a ni a, mahse vanduai thlak takin a accident zui ta a, kha ta tang a hetia thil buai chho leh ta hi a ni a, hun kal tawhah a let leh ta fo mai a ni.



Amaherawhchu a mumang hmasa ah khan kum 2009 kum a an thian za a an thil lo tum tawh leh an buaipui em em mai chu tih hlawhtlin alo ni ta thung a, ni e, kha khan enge awmzia a neih? ni e, a tir ah kha chuan a hlim in nuam a ti hle a nih kha, mahse a tawp lamah erawh veroi chungchang avang bawkin a rilru a na a, a zuai zo leh thova, a hlimna leh a lawmna neih ve te chu veroi nen hmangaihna kawng bumboh an lo zawh tawhna chanchin chuan a ti danglam phak tho a ni.



A rawlthar lai, veroi nen an inhmangaih hma a suangtuahna leh duhthusam a an khahliam hun laiah khan a let leh ngei mai, tin an duhthusam ram chu tihpuitlin lo niin an chen mek bawk, mahse kha thil khan a tak ram a hriatrengna leh thinlung a la cham reng veroi nen a tawnhriat an lo neih tawh te chu a mangnghilh tir thei chuang lova, chu hriatrengna duhawm lo tak mai chuan hlimna leh nun pangngai tak tur chu a tibuai phak tlat tho si a ni.



Tichuan mumang dang leh bawk alo nei leh ta a, ni e siamtu chuan a mumang pakhatna chuan duhthu ala sam lo deuh a ti a ni a nge, a ai a tha zawk ni a a ngaih mumang pahnihna a pe leh mek a, mahse he mumang ah erawh hi chuan a hmangaih ber nen a an hun tawn chhoh hun lai velah khan a dah kir ta thung ni ngeiin a lang, ni e veroi nen a an inkar a awm ve lohna hmunah khan awm tir mahse hriatrengna a thaibo mai theih loh tur avang chuan thil a danglam phah dawn chuang hauh lo tih a hriat a, chuvang chuan veroi nen ngei a an inkar a awmna khawvel ngei chu pek kir leh a han ni a, a fair zawk ngei ang.



Mahse engvang nge? Veroi nen chuan pawh then tho tur an ni tihna em ni? A ni duhthusam ah kha chuan veroi chu a kalsan tawh lo tawp ang tih kha a nisi a, mahse hei a kalsan leh ta tho tihna a niang maw? Enge thil awmzia? Imm, a kalsan tawh tur a nilo, veroi thih hma ngei hian kha thihna kha a pumpelh tur ani, Pathian chuan chance chu a pe kir leh ngei e, mahse a siamtha vat tur a ni a, a ni hian tih tur a nei ve ta thung a ni.



Chanchin kimchang leh thil awmzia hriatchian vat tum chuan a mobile phone chu a han hmet malh malh a, veronicai chu a han bia a, mahse veroi phone lo la tu chu mipa a ni tlat mai. Chutah hriatthiam loh hmel tak chuan "hello tunge? veroi ka be duh a" a han ti a, lehlam atang chuan "tunge i nih? A rawn ti fiah kawlh mai a, a hamhaih lek lek thei hial mai, chutah remsanga chuan a aw chu han thian kharh kharh in "imm, kei hi a bialpa ka nia, amah a awm lo em ni? A han ti dam thlap a,



chutah le lehlam atang chuan teu zet hian "engtin a ni? veroi bialpa ka ni i ti e law? a awiawm loh lutuk, kei hi a bialpa ka ni alawm, veroi nen hian inneih pawh kan tum asin, chutia midang daih daih ngaihzawng a neih ka ring lo, tunge i nih a? e he, hei i hming a save dan chu brother tiin a save che anih hi, a unaupa i niang maw? a rawn ti leh ta mai a, remsanga chu a zak kher mai. "Aa, aw ni e" a han ti bah deuh nuai a, chutah lehlam atang chuan "imm, min rawn fiam tihna a ni maw? ka lo ring deuh reng a, hei amah chu a awm lova" a rawn ti leh ta a.



Remsanga chu a nghing dawt mai a, a thu hriat avang chuan a zak ngawih ngawih a, a thin chu a ur takzet. 'Imm vero, nang hian min lo kawp reng a ni maw? Ka hriat loh in midang hmangaih ilo neih vang a ni maw? chutah uluk fe hian a han inngaihtuah a 'e khai, lalpa leh, hei hi thudik a nih ngai chhan awih har ka van ti tak, Pathian, veroi nen a kan inkar a rem lohna chhan hian chhan tha tak alo neih vang alo ni maw? Veroi hian min lo kawp reng vang alo ni maw? Anih chuan khatia kan inkar titawp tura veroi ka kalsan kha ka tisual lo tawp tihna a ni maw? A ngaihtuah thui zel a.



'Imm kei khan ka tihtur diktak zawk ka ti alo ni, mahse ka va na tho si em! Thil thleng chu a danglam ta ngei mai. Mahse natna erawh ka chanvo a ni ta tho anih hi. Mahse mahse, ka nat dan erawh a dan a dang ta deuh, ka kalsan avang a inthiamlohna leh inchhirna nen, veroi thihna avang a ka natna ang kha a ni ta lo. Tunah meuh zawng mahni indem thei ka ni ta lo, amah veroi zawk hi dem tur chu a ni ta, min phatsan avang leh min lo kawp reng avang zawkin ka na ve ta thung ani. khatih lai khan ka lak a a hmel hlim tak mai leh duhawm tak phen a a lemchanna tenawm tak kha kalo hmuh fiah theih reng reng loh vang a ni ngat mai ka ti.



Vero ilo va han tenawm tak. Engtin nge ka chungah hetiang thil hi i tih theih zawk le, a na ka ti hle mai. Mahse ka thiam loh a ni tawh lova, ka dem hle zawk che a ni. Hei vang ngei hi alo nih dawn hi kan inkar a hmangaihna chungchang ah hian sawi neuh neuh leh a rem lohna thu hriat tur alo tam em em thin ni, kei ngei pawh khan khang mi in kan inkar chungchang an sawi duh em vang a thil diklo ni a ngai a khatia kalsan ta che kha ka ni reng a.



"mahse mite khan min kawp tih te, mipa dang awm an awm ve reng ani tih te hi an lo hriat ruk vang vek em ni zawk? Kei khan khatiang lam reng reng kha ka ngaihtuah ngailo hrim hrim, ka duh em che avang leh ka hmangaih em che avang in ka mit alo del nasa hle tihna a niang maw? Ka lo va han mawl tak em! A harh kawk kawk thei hial a, 'alo va han ni khua loh theih ngai ve aw, nang chuan min lo bum kual vel mai mai tihna chu a ni sia, awih a van har tak em! A zahthlak tak zet a ni. Bible meuh pawhin mi mawl te, mi â te a huat zia leh a run zia chu kan hmu a' tiin amah leh amah chu mawl chhah a inti kher mai.



'Nilo, a ni lo, chutiang zawng in ka inti hreawm in thil ka thlir tawh tur a nilo, ka thil thlir dan ka thlak danglam tawh tur ani. mi zawng zawng hian thuruk leh thudik chu an hre vek thei bik lova, mahse thudik leh thuruk chu hriat a nih hunah chuan' chutih lai tak chuan speaker vantea thusawi chu a hrechhuak zawk mai a, 'imm ni e, mihring nun a ni miau a, chhel tak leh pachang takin kan awm a tul thin reng ani. Phatsan ni mah ila ngaihdamna nen rilru puitling tak ka put a tul zawk a ni. Mahse, mahse' uluk lehzual chuan a han ngaihtuah leh a.



'Imm, ka tihsual a nilova, veroi pawh ka dem thei ngawt bik chuang lo. Unau inkar a hmangaihna awm hi thil mawi lo leh thil dik lo ani tihna ani maithei asin, chumi anih chuan veroi hian a tih tur diktak zawk a ti a ni, a hmangaih tur diktak zawk a hmangaih kha a tul reng alawm' A lu chu a tuai nawk nawk a, a chal chu a dawm vang vang a, 'ni e, veroi nge nge a rilru a puitling in thil awmzia alo hmu fiah zawk daih, thil nih dan tur dik tak a hmuh thelh lo zawk daih a ni. Dem tur ka ni reng reng lo. Mahse, engatinge vero nang a pawh chu ka bulah thudik tak leh thil awmzia diktak min hrilh ve mai loh le, i rilru puthmang diktak te, hetiang a kan awm hi thil dik anilo tih te chu tlang tak a i sawi ve mai loh le aw. Min hrilh that ve mai tur che hi a nia'



'Ni e, khatih hun lai khan in duhna te, in ngainatna te, inthlakhlelhna te, khang ah khan ka luangliam lutuk mah mah a ni. Miten kan inkar an sawi sep sep na karah khan keimah nilo mipa dang awm an awm ve thu pawh hi an lo hre ruk vek tawh in ka ringhlel ta hauh lo mai, mahse ka rilru a nat lutuk kha an hlau a nga, kei kha chu kha lam thu kha min hrilh tha duh lo ani ngei ang, mahse heti zawng hian, unau inkar inngaihzawnna awm chu a mawi loh thu te, a dik loh thu te chu an sawi duh ta viau zawk a ni ngei ang.



Ni e, remsanga chuan zirlai tam tak a zirchhuak ta niin a inhria a, a thil thlir dan a zau kawk a, a rilru puthmang a puitling in thil a hrethiam chho ta kuar kuar mai. A nu leh a pa, a chhung te ngei pawh kha an lo zak ru in hreawm an lo ti ru viau thin ngei ang le, mahse a sawt tawh lo, tunah zawng mi thar hlak a ni tawh a, a khawvel diktak ah khan a kir leh vat tur a ni, a rilru puthmang a thlak thei tawh a nga, a nun tlu chhe hnu chu kai tho leh turin amah leh amah ngei chu a intanpui thei tawh ngei ang le.



"Mimi, mimi" tiin a nau awmna lamah chuan a phei vat a, mimii chuan a u phawklek hmel tak leh buai hmel tak, a lam rawn pan mek tu chu lo en in "u, enge ni ta? I va buai hmel ve? Alo ti a, "mimi" tiin a nau bulah chuan thut hmun chu a han rem ve nghal vat a, "mimi, mutthilh ka ngai" a han ti a, mimii chuan a u hmel buai deuh nuai mai leh phawklek hmel tak mai chu ngaihthat loh hmel fe a en in "u, mut hun pawh a nih loh hi, i mu rei ber a kan kaitho duh lo zawk che a, mut te chu ila duh a maw?



"Mimi, ka thusawi tur hi ngun deuh in lo ngaithla rawh, tun a kan hun hman mek hi hun kal tawh kum li liam ta a mi anih hi" a han ti a, chutah remsanga vek chuan "kei hi kum li lo awm tur future atangin ka lo let leh a ni" Mimi chu a mengzau kawk a, "nang hi i tho fuh vak lo ani lo maw" a han ti a, "mimi, i tan chuan awih a har ang tih pawh ka hrethiam lutuk, mahse thudik tak ani. Mimi, hun lo awm tur ah chuan nang chuan kan kawmthlang pathlawi u masanga khu ila star dawn lutuk, ila melh tai dawn chauh" a han ti a, mimii chu a ner nang a, "i tenawm u, i ti awm ang lo em mai" a han ti hlak hlak a, a hawi tau deuh nghat bawk.



"Nilo mimi, ka rawn kalna future ah chuan i star thei lutuk alawm" nui vur vur pah chuan a han ti a, mimii chuan a u chu ngei hmel zet a melh ram ram pah chuan "i phuahchawp peih mai mai e a" a han ti a, chutah remsanga chuan "imm tichuan maw nau te, veroi pawh hi tun atang a rei lo teah hian a thi dawn asin" a han ti leh a, mimii chuan "u, i a e mai" phawk fe chuan a han ti a, chutah remsanga bawk chuan "ka thusawi tur hi uluk deuhin ngaithla rawh, kei hi ka mutthilh leh vat a ngai, kalsan che u hreh viau mah ila hun pangngaiah khan ka kir leh ngei a tul tlat si a ni" tiin a thil tawn te chu a nau hnenah chuan a hrilh ta malh malh reng a.



Mimii pawh chuan a u thu hrilh te chu mak ti tak chung leh ngaihnawm ti tak chung chuan a ngaithla dauh dauh reng a, chutah mimii chuan "u chu, i thil sawi ava han mak em em, a tak tak maw? A han ti a, remsanga pawh chuan a lu chu buk nghat nghat pah chuan a hrilh zel a.



Zan a ni a, remsanga chuan a hun kal tawh a a chhung te a han kalsan leh mai tawh tur chu harsa a ti ve kher mai. A nu leh a pa, a u ramengi te nen chuan a thil tawn mak tak mai chungchang chu an sawi ho a, a chhung te pawh chuan an fapa chu a â ta anih loh vek pawhin alo sawi dik ve reng thei ani tih chu an ringhlel hauh lo. An fapa thil tawn danglam tak mai chanchin ngaithla chuan zan hun chu an tlingtla ta a.



Remsanga chu a mutna atang chuan thawh kan mai hi a han tum a, a tho mai thei hauh lo, a taksa chu a chau takzet a ni. Chutah muangchang chuan a mutna atang chuan a han inbeng kang a, khua chu alo var vek tawh a, ni zung chuan tukverh darthlalang chu rawn paltlang in a hmaiah chuan a rawn chhun siar siar reng a.



A taksa chu a han in en chiang a, mahse hliam emaw engmah a nei hauh lo. Choka lam atang chuan naupang aw hian "pa, a pa" ti a a pa a au lauh lauh thawm chu hriat tur a awm reng bawk a, Chutah le, darthlalang hma ah chuan ding in a mit chu a han nuai nawk nawk a, darthlalang a ama hmel a han hmuh chian nak chuan a phu chiang kher mai. Mak tihna leh hrilhhaina in a khat nghal a, darthlalang a hmel lo lang chu amah a nilo emaw a ti hman hial mai. A khabe hmul chu a zuah buk hle a, a sam chu a sei viau mai bawk. A hmel upat hmel zet mai a hmuh chuan hun tam tak lo la awm turah a harhchhuak ani tih chu a hrethiam ta a.



Choka lama naupang thawm a hriat pawh kha ama fanu ngei ani tih a hrethiam a, 'a pa' tih a a koh a pawh kha amah ngei chu ani tih a hrethiam zel mai. Imm, tunah meuh zawng a kum pawh alo tam ve ta hle mai tihna a niang maw? Nupui fanau nei in chhungkua te alo din tawh tihna a ni awm si a, tunge a nupui chu ni ang? Veroi bawk chu a hrechhuak a, mahse a ni nen kha zawng kha ti kha an thawnthu a ni a, hriat zui zel atan a chanchin duhawm lo tak a ni tawh.



Helhhawlh ru tak leh phur ru tak chung chuan choka lam chu a pan ta da da mai. Choka lam a eirawng lo bawl mek tu chu a hnunglam atang chuan nu hleitling tak, a pian a nalh in a sam chu a sei hle mai a, a che vel leh a khawsa te reng mai chu mit ti kham hauh silo hian a zangkhai vah mai a, chu nu chu a hriat ngai awm ala hre hauh lo. Hmeichhe naupang kha alo lang vat a, imm, chu hmeichhe naupang te chuan a nau mimi a ti hrechhuak chiang hle. A duhawm in a nghal reuh phian dawn ani tih a hrethiam nghal mai a.



Chutia a che vel uluk taka lo thlir reng tu a han hmuh ve takah chuan a nupui ni ngei a lang chuan hmel zangkhai tak pu chung chuan a lam chu a rawn pan thuai a, chutah a chal chu han deh sak in "duhtak, i tha maw? A rawn ti thawp sat mai. Remsanga chu a mur chem chem a, chu nu kut chu a va no in a mi deh nih chu a va han nuam danglam tak. A hmel lah chu a that dan a nghet charh mai a, nutling pui ni hauh silo hian a nutling ru tlat a, ngaihnat loh theih loh khawp a mi hipna leh nunchang mawi amah ah chuan a hmuh theih tlat ani.



"Duhtak, i chauh hmel riau mai, bawihte, a pa hi thingpui in tur lo pe rawh aw, chuan inbual te i duh a nga tiraw? Remsanga chu a mur chiai chiai reng a, 'nilo, he tawnmang zet chu a va duhawm ngai em ve aw'



A vawithum nan a nupui chuan "duhtak", a han ti leh a, remsanga chu harhchhuak zawkin rang fe hian "aw enge? alo ti thuai a, "duhtak, i tha maw? A nupui hmel a hriatthiam lohna lo lang chu hmu in "aa, ka hrethiam teh nuai lo hle mai" a han ti thla ngawt a, a nupui chuan "eng maw? enge hriatthiam loh tur awm a? A han ti a, chutah remsanga chuan "aa ngawi lawk teh, chaw ei i peih tawh em? Ka ril a tam deuh riau mai" a han ti leh a. "Imm a ei theih chu a ni mai. Ka kaitho duh lo che anih kha, nizan lam i meng rei si a, i chau dawn tih ka hre lawk vek alawm, kha aw thingpui" tiin a fanu thingpui rawn pek chu a pasal hnenah chuan a han pe ve leh a, 'imm, chhungkaw tangrual tak zia a hmu tel tlat mai.



Remsanga chuan a rilru chuan 'e he! hei zet zawng a dan a dang ta hle mai. Ka nupui hi ka hun lo awm leh tura ka tawn tur a ni tihna a niang maw, chuan ka nau mimii ang deuh fanu duhawm tak ka nei bawk a, chuan khawiah nge ka nu leh ka pa, ka u ramengi te ve hi le?" tiin a han hawi kual ruai a.



Pa ber chu a ngawi thei hle mai a, nu ber leh a fanu notei te chu an in tawng chhawk deuh char char mai, an nufa chuan an inkawm ngeih hmel hle mai a, an fanu notei pawh chuan a nu chu a titi pui ve mawlh mawlh mai bawk a, notei khawsa zia leh a chezia te chu a puitling ve et reuh a, a tawngkam a felfai in a thutak ve thei zek leknghal, tin an nufa chuan fiamthu hunah pawh an inkhuang rual thei ngang mai a.



Pa ber pawh chuan a nupui leh a fanu chu an hrilhhai lutuk tur chu a duh bik hauh lo, thil awmzia hrethiam ang tak chuan a awm ve zel a, a mumang mak tak tak mai leh hun danglam dan chungchang te chu a nupui hnenah pawh chuan han hrilh ve chu duh viau mahse, chutia thil kaldan pangngai taka a kal phawt rih chu tha a ti zawk a.



Nakin deuhah chuan a tum loh deuh hian "e he! Pathian ni ani tih reng ka lo hre hauh lo" a ti palh ta zauh mai. Chuveleh nu ber chuan "imm, mak ka ti reng che a ni. Tuk in zing atang hian i mizia a danglam lutuk a, i hriatna i hlauh ta mai anih te kha kalo ring hman rum rum dawn alawm, engmah i sawi tha ve duh silo a, i ngawi reng mai a, kan nuih rualin ilo nui ve ringawt a, kan thusawi ah 'imm' tiin ilo bu leh nghut thin ringawt a" tiin a pasal chu chhuahchhal zet hian a han thlek ha a, remsanga pawh chuan a nupui rilru tur chu hrethiam in thawk chu a han la halh a, chutah



"imm, i hmusual lo e, kei hi i pasal tak tak ka la ni dawn reng em tih chu ka harhchhuah hunah kan la hria ang chu, duhthusam a awm a, duhthusam chu pek in a awm a, mahse duhthusam ramah chuan mi mawl mai ani tih leh mi puitling lo tak ani tih hriattir ani ta hlauh a, a rawlthar lai a tum an lo neih ve te, puitlin tur a an ko a innghat anlo neih ve te chu a hlen zo lova, hlawhchhamna leh a thalo zawng a hun in a herliam pui hnuah chuan hmangaih a tawng ve a, mahse chu hmangaihna atthlak tak chu ala puitlin tawk loh zia leh ala at ve zia tarlanna hmanraw chi khat mai an ni leh ta a.



"Mahse chung a puitlin lohna te, a mawlna te, hriatthiamna a neih loh avang te chuan a nun a tleu laklawh tlat tawh si a, a nun a he tlat tawh si a, mahse a thinlung khawi maw laiah chuan beiseina atak a thleng thei ngailo tur leh duhthusam thleng ngailo tur chu mei ang a mit lovin a nung reng thung a, chu chuan a nun chu chauhthubarawh takin ala chhanhim hram hram a ni ve chauh awm asin, a hringnun a zirlai tuk sak anih chu a tan a harsa mah mah deuh em ni ang? a hringnun zirlai pek anih chu harsa a ti si a, a zirthiam thei tlat lova, a hriat fuh theih tlat siloh avang chuan chance pek leh a ni ta a.



"Thil thleng thei ngailo tur ni a ngaih a duhthusam pathum chu pek ani ta ani. Pakhatna chuan a hlawhchhamna leh a thulh san leh tak, a nun insiam chhoh zelna atan a hlawhtlinna rahbi pawimawh tak la ni tur alo bawhzui tak loh hun ah chuan hruai kir leh niin hlawhtlinna chu a pek a pek ani a, mahse chu chuan zirlai tha a pawchhuak zo tlat lo. A hriatrengna a thi theilo a natna zung chuan bu ala khuar nghet tlat si a.



"tichuan duhthusam pahnihna chu pek leh a ni ta a, a hriatrengna a a natna tihdam nan chance a pe ani, a kawhhmuh a, a hriattir a, a entir a, a tina a, a fuih pah bawk. Mahse chu thil ah chuan zirlai tha leh pawimawh tak mai chu a zirchhuak thei ta hlauh thung, thil awmzia leh thil nihna diktak, Pathian remruat awmzia tak chu a hmu fuh ta hlauh mai a, tichuan duhthusam pathumna pek leh a ni a, chu duhthusam pathumna chu alo beisei ngam ngailoh leh a thleng ang tih pawh a rin ngai loh niin chu chu chhungkaw duhawm tak niin a hun lo awm tur atan a ruahman sak a ni. Chu hun chu tun hi a ni. Mahse hun diktak ah a harhchhuak thei tawh silova"



A pasal thusawi chu a hrethiam chiah lo tih nu ber awmdanah chuan a hmuh theih a.



Ni e, remsanga tan chuan he duhthusam pathumna hi a man a tlawm mah mah a ni. Tin, a awlsam mah mah bawk. He ti teh tawp a duhthusam pek anih na hian tawnhriat awm lo duhthusam ringawt chu a famkim tlat lo ani tih a hmuh tir a, a tak ngei a tawnhriatna nen a duhthusam puitlinna chuan hringnun a suangtuahna hi a taka thleng thei ani tih erawh a entir zawk si a.



A muhil ringawt anih chuan a harhchhuahna hmun tur diktak ah a harhchhuak leh tawh ngailo ang tih a hrethiam tawh a ni, heti reng mai hi a ni zel ang a, awmze nei lo tak leh hriatthiamna leh fiahna telloin a theuleu kual mai mai dawn ani. Pathian in a duhthusam a pe niin a ngai mai a, mahse Pathian hnen a alo vuina te, alo lungawi lohna thin te, a nun alo duhkhawp lohna thin te leh a duhthusam tihpuitlin sak tura alo dilna zawng zawng te chu a sut leh ta vek zawk a, Pathian hnenah ngaihdam dilin a chanvo tur diktak chu huaisen tak leh chhel taka hmachhawn ngam tur chuan a rilru chu a siam fel ta zawk a. Ni e, a muhil tur anilo, a hun ngaiah chiah khan a kir leh dawn anih chuan accident na tak, a nunna hial pawh in a a tawrhphahna tur thil kha a tawh ngei a ngai tlat si a.



December thla a ni a, thlasik anih avangin khua pawh a vawt tawh hle mai. Ka thianpa thih champha kum hnihna a nih avang in kei chu ka lung a leng hle mai a, kan rawlthar hun lai te, kan naupan hun lai te, min boralsan hma thleng pawh khan kan la in kawp deuh chawt reng a, khati mai a a nun a han tawp ta mai kha na ka ti ani, a hringnun vanduai tak mai leh runthlak em em mai avang te hlei hlei khan ka thianpa thihna khan kei ngei pawh hi min nghawng viau reng a.



Choka lam a awm ka nu hnenah chuan ka thianpa thlan tlawh tura ka kal tur thu hrilh in ka chhuak a ni deuh nghal mai a, ni e, he thihna kut vawt meuh hi zawng a ngainat awm lohin a huatthlalaawm takzet a nih hi maw.



Ka thianpa thlan awmna ka thlen chuan ka rilru a vak kual nasa hle mai a, ka thianpa thlan kiangah chuan ka ding ngawi reng ringawt mai ani, keimah chauhin ka ni si.



"Thianpa, i dam lai ni ava rei lo em, hei i thlan bulah ka awm mek asin" Ka pangpar ken chu thlan lung ngheng chuan ka dah a, ka mittui a rawn hnam nghal tiam tiam mai. 'Nilo, a ni thei lo' tiin insum tak chung chuan ka let leh nghal vat a, ka awm rei anih chuan ka insum thei hauh lovang le. Mahse kei chu ka ding chawt a, ka thianpa thlan chu en in ka leh hawi leh thuai a, "thian duhtak lalremsang, thlamuang takin chawl nawn fo ang che, vero nangpawh, lalrema nen khan pialralah chuan min lo nghak reng dawn nia aw" tiin mittui hru mawlh mawlh chung chuan thlanmual chu ka kalsan ta a.



A Tawp Ta