Lunpaua_ziaktu, April Hmar Liverpool

[April Hmar Liverpool]

LALLUNPAUA

By, April Hmar Liverpool

A Eng a mah hma a luliana han nih thawr ringawt pawh chu mi tu mah hian an duh hauh loh tur thil ani. Chumi rual chuan he pa pui roh pawh hi mi pangngai lo leh bawl nuam deuh ang type ah khan ngaihdan kan lo si thlu palh hlauh dah a nge,chutiang ang mi chu a ni em em bik lul lo asin.

A ek bathlar tawlh deuh lurh avang leh a ngum khak de tlep tuar mai zah pui chu sawi loh, a hmai uan nan tak a a hman thin avang a a chungchang an sawi rik a pianga 'the saphai' tih tawngkam hmanga an delhkilh ziah thin,a invawn peih loh vang ni hauh lova thaw uih em em reng mai Lunpaua chanchin hian Zoram leilung hi daidar se ka tih vang ni hauh lovin, ka kuthlei phiangsen avang leh a tul vang ni hauh lova lunpaua chanchinin ka ngaihtuahna chhungril tak a zar buai tlat vang a ni pakhat daih ang.

U lunpaua ka ngaihtuah chhuah apiang hian boxer rorum leh hrat khawkheng,American boxer ropui Mike Tysona'n inla vei leh inti neitu tih hriat taka ring chhung a a han inhrosa khur khur lai hi ka mitthla tel thin. Amaherawhchu tysona leh u Luna te hian kawng tinrengah in anna lai zu han nei miah lo teh tlat thung si a.

Tum khat chu veng lu a nula hmeltha leh hleitling zet mai rochhingi kan rim tum a ni a,veng lu tlangval senior awm tha duh lo,a senior tawh em avanga a nu leh pate meuh pawh in 'vanlalsenior laltinlal' ti ngat a an koh thin,laltinlala leh kan u,tawnhriat ngah tak leh a chetdan rothap pui pui te avanga kan ngaihsan ruk em em thin u lunpaua te chu chaw heh zawk nih inchuh a an thu inhmu rem hleithei meuh lovin an in ngur lo chauh ta mai a.

Chutah le! Laltinlala thinur thut insum hman lo ta pek chuan hrechiang nek lovin keipui hmaah a at a so ta mai alawm mawle! Laltinlala chuan aw ki hniam vawt raih mai hian, "lunpau, ka nula theih zat pawh ila thei ve ngut lova nge,ka mit tikham zawng leh ka beng ti thlep zawng hi chuan khawsa lul suh. I thaw te lah kha a uih ropui si,ka lakah hi chuan i tuang ti chhah ve lul suh ang che. Ka vel nek mai tur che a nia" tiin u Luna chu a vau ta khur khur mai a.

Chutah le! A aia aw ki hniam zawk mah hian, "naupang,i ka kha chim ringawt rawh. Chutiang a sakhiin keipui te 'ka vel ang che' te han tih chu le! khawnge, keimah zawk hian ka kut thak hnawih nan i sakhmel pawisawi zet kha ka han belchiang teh ang" tiin a tho ta ur ur mai a. U Luna chu, kan u lunpaua ngei mai chu.

Chutah zet zawng,laltinlala pawh chuan a aw ki a hisap sual a ni tih inhria in aw ki dam zawk leh zuai zet chung chuan, "aa, u lun, ka han fiamthu mai mai a nia,fiam i dawl leh dawl loh ka han enchhin duh mai mai a nia,min hrethiam hram teh khai" ti a dawih aw chhuahin a aw ki a hisap sual duh ta bik lo mai pawh a, tlem a tlemah keipui riltam a zuam sual thelh a ni.

U lunpaua hi pa te reuh te,palian chet tlat mai,a hmel han en maia tlawmngaihna tlakchham hmel tak,nimahsela han belhchian erawh chuan inthlahrun rawk rawkna tham tur khawp a mi tlawmngai leh rilru dik pu mi ni si a ni a,tin, a ha hmai chunglam a bal then danah chuan tharum ngaina mi leh inbakkaih lam sukthlek mi ni mai tura ngaih theih tur hi a ni tel tlat bawk. Nimahsela, a ha hmai chunglam a bal then chhan chu a ruih phur laia en chiang mang lova kawlthei hel a pawng tawng dih vang a ni daih thung.

Mi mak leh mi tak,mi ngeng leh mi hrang,a damlai reng pawha hrang luliana an tih chu,lung lian leh hnar lian, ke phah ngap thet thawt, a taksa ria thel thawl tak leh cher chhe ve tak phu lova chaw heh, sangchhuak liana, chaw heha, aa, a tam mai, hming a ngah em avanga kohhran meuh pawhin tum tam tak an lo phuar tawh a chu, chanchin a ngah em avanga a a hming a rik ruala khaw khat nula hmeltha hming lam rik tel ngai ta ziah mai a chu, chu pa ngei chu a ni u lunpaua chu. Chu zawng zawng aia hriat hmaih thiang hauh lo chu, pa rilru tha tak a ni vei roh bawk.

U lunpaua hi lunglenna leh khawharna te hian a tibuai pha ve meuh lo ni ngei tura ngaih palh mai pawh hi awl deuh tur a ni asin. Mahse,Chutiang ang mi chu a ni bik hauh lo. Chutihrual chuan kan u lunpaua lunglai hliama nat tirtu hi an awm ve anih ngai chuan maw, khaw khat nula hmeltha leh chhuan tawlawl lalthasangi te vang a ni hauh silo lo ang a,khawvela a mi ngaihsan em em fam ta Michael Jackson-a vang pawh ani Chuang lovang. An naupan lai ata tawh a an hmelma kumhlun, an ngam bawk siloh avanga a hnapkhir barh lui thintu lalthianga vang pawh ala ni Chuang lo cheu. Nunhlui mual liam ta avanga lunglenna leh khawharna ani zawk ngei ang. Vanah thla a bial phuk tawh hi chuan rochhingi te verandah a a tingtang senior pension hmel pu ve tawh tak nen a in awih tlei mai loh chu tih theih dang a awm tawh thin lo ani.

Kan lip se ta sa sa tho va, insum lo law law teh ang. Tumkhat chu Christmas chakkhai lamin Aizawlah kan zuk in bazar ve ngei mai a, u lunpaua ho chuan, Chutah, thawmhnaw zawrhna dawr changkang angreng tak mai pakhatah hian kan inzui lut ve dam dam mai,thingtlang mi tih takah. Dawrah chuan darthlalang lian leh fiah tha kelh kawlh tak mai hi a intung ruau mai bawk a,Chutah le! Darthlalangah chuan kan u lunpaua chuan ama thla a han inhmu phut mai chu, a phu chiang teh asin le.

Chuti chuan u lunpaua chuan silipar var thianghlim em em mai pakhat chu la in a han inthawlh chhin vel a, a duhthu pawh chu a sam hmel viau. Chutah le! Silipar var thianghlim em em maiah chuan kan u lunpaua ke phah ngap thet thawt tak mai leh arh tha phek phawk tak mai thla chu a chuang ta kuau mai anih tehreng chu! Chutiang thil a han hmuh rual rual chuan ama ke thla ngei mah nise dawr nghaktu hmuh chu hlauin a ke thla chuanna silipar chu a han zakzeh deuh tut tut mai a, nimahsela dawr nghaktu nu chuan teu zet chung chuan u Luna chu a liak ta erh thung. 'Silipar ruk tum' tiin u lunpaua leh keini ho chu zak tak chungin dawr atang chuan kan chhuak ta hnak hnak hlawm a.

U Luna chanchinah hian a mi zaleng in a an kurpui teh chawk thin hmangaihna chungchang pawh hi kan vawrh lan ber tur pawh a ni ngei ang le.

U lunpaua hi rin ai daiha chet lak awlsam leh zei tak mai hi a ni a, nula lamah hian, 'a luck' han tih thawr aiah tiin 'a peih' kan ti mai thin. Mahse, chutia a peih a peih ta ngang chu mahni tawka tlangval luck dengthuama te meuh pawh in a an chhai ngam loh lalthasangi te meuh pawh u lunpaua lakah chuan an zawr hnap zel thin zu nia.

Mak kan ti. A nihna takah phei chuan kei ngei pawh hian mak ka tiin awih har hi ka ti thin hle reng asin. Mahse, phat rual loh a thudik ni si a ni a,zep pui sawt hauh lo leh thuhruk sawt hauh lova langsar a ni tlat si. Eng tactic hi nge a hman bik thin ni? Hmanah tawh khan a ram kal rawn haw lawk ta lo chu ngaih tha lo in khawtlang in kan zawng chiam tawh a, khami tuma kan zu hmuh khan lui kamah hahdam leh thlamuang tak mai hian zangthal vanvadakin alo maimitchhing siar siar roh a, khami hnu atang kha chuan nula lamah a ne pawh hi ka ek phak ta meuh lo a ni. Khatia kan zawn vak hnu atang kha chuan eng tactic bawn turu lutuk emaw ni hi amah ah chuan a bet tel tlat tawh ni hian kan hria ani.

Ramhnuaiah khan lasi alo zawl ta mai em ni ang? Nimahsela, lasi zawl hmel erawh a pu bawk silo. Nge ni a, keini hriat pui loh leh hmuh pui loh lamah hian tan alo khawh nasa viau thin zawk em ni? Han ti dawn ila chu pawh thil thleng thei a ni lo hrim hrim. A bula tap deuh chawt thin kan ni a, chutiang ti turin hun a nei hauh lovang le. A titi duh zawng pawh zu pawl sa leh phivawk sa tui zia hlir an ni si a.

Mahse keini meuh pawh in a kan lo mitmei ruk ve em em thin, nimahsela a biak ringawt pawh kan biak that ngam bawk siloh lapuii te meuh pawh kan u lunpaua chuan alo huphurh ngai hauh lo anih chu maw le!

Awle, chu mi ni tlai lam pawh chuan alawm, vengsir nula duhawm chung chuan lalhliri nena pialral tlang lam pana an inzuichhuak lai kan hmuh fuh leh tak ni. Mak kan ti lutuk ringawt. Lalhliri lenchhuahpui theitu nih chu engineer munga meuh pawhin a a thil huphurh ber ani asin. Engdang vang a nilo, a chung chuang bik em atin ni.

Mahse, u lunpaua tan chuan tuipui sen pawh a fim tlat a, tahna bang bulah pawh kan nui leh si thin. Tih theih dang kan nei lo. Nuam ti chiah lo mah ila enthlak erawh kan chak ta deuh tlat thung a.

U lunpaua tactic hi kei ni, a bula tap deuh chawt thin ngei te pawh in a kan hriatchhuah hleih theih tak meuh silohah chuan tih theih dang kan neilo a ni, enthlak ngawt mai loh chu. Thil engpawh va tawng ta ang ila kan lungawi pui ngei erawh kan beisei.

Khai le,spy hna chu tan a hun ta. Ingineer munga meuh pawh chu kan hnung lamah chuan a rawn kun phei ve zuk zuk reng a.

Nula leh tlangval te tuallenna hmun pialral tlangah chuan vai thlifim alo thaw heuh heuh reng a. Khiang thing buk luih mai kianga insi rial chung a tlaini tla tur eng sen riai mai lo thlir mek tute chu tudang an ni law, kan Target, u lunpaua leh hliri te ngei an ni. Chutah, rulpui ang mai hian kan Target u Luna te awmna lam pan chuan hnim karah chuan kan tleng phei ta zul zul hlawm a, Chutiang ang thilah chuan tumah chu hrilhhriat chawp ngai lovin kan che nalh tlang takzet. Duhtawk a hnaiah chuan kan va innghat rem thei ta a.

"Ka thinglung hi i ta asin" chu le! Hliri meuh pawh a aw ki a dik tawh miah lo. Keini lam chu 'enge kan rilruah awm ni maw' ti ni awm fahran hian kan in melh kual leh ralh ralh thin a, hmuh chak deuh erawh kan nei chiang. Mahse, chu lam chu i theihnghilh ang. A zia dawn lo em mai.

Hliri aw ki chu a puam deuh talh talh reng mai a, u Luna erawh a la silent rih. Hliri chuan "u lun, tlaitla tur chu a mawi kher mai tiraw? A han ti a.

U Luna erawh ala silent ta fo mai. Keini lam beisei angin thil a thleng dawn lo tawp tih chu kan man thiam tan a. Kan hero u lunpaua meuh pawh ti zam chhetu chu a va han chung chuang dawn ngai em. U Luna chu Hero atangin a zero mai dawn em ni le?

Hnim kar atang chuan kan han bihthla chhin dek dek a, fimkhur erawh a tul hle thung. Khiang thing nghengin mawng poh toh hian u Luna chu a ding luah mai a, tlaitla tur eng sen riai mai chu alo thlir voh voh mai bawk.

Chutah le! Hliri chu no tak mai hian u lunpaua tangah chuan a han bei thlep no ta hnap mai a, keini lam chu kan lo ip chawih chawih hlawm, ingineer munga mawng chu ala rawn thaw sup zui. Mahse, nuih chi a ni hauh silo, nuihza insum mit Val tun chung chuan munga chu kan han melh rum leh rih a, munga pawh inthiam lo ru tak chung chuan alo chhing deuh sak nghe nghe. 'A mawng rawn thawt dan ki pawh kha a uangthuang viau bik lo e' tiin munga hriatthiam tum tak chuan kan target te lam chu kan ngaichang leh thuai a.

Kan Target pakhat zawk hliri chuan thu chu a kuai thlum viau tawh mai a, u lunpaua tangnem ah ringawt chuan a lunglawm a kim dawn lo ani tih lah chu a lang reng tawh mai si. Mahse, Mahse, ingineer hnaisai lo zet mai munga mawng chu a rawn thaw leh su su mai a.

Hetiang ang huna hetiang thil laka a insum theih thin loh avang hi alawm mi tumah pawhin an thuruk an hrilh that duh ngai loh ni. A che uih thei mah mah a ni. Tun ang hunah hi chuan expert heavy taka chet a hun asin, pawng tawng vawih mai mai chi pawh a ni ngut lo ve.

Munga chu hnawk kan ti tan tawh hle mai a, a chet dan chu kan ngei ru takzet, inthlahrun hmel deuhin a vawih lui ziah ringawt mai tiin kan lawm hauh lo. chumi bakah angel te pawh in a an hmuh ngam loh thleng thleng chuan khawrh fai kelh kan tum a ni bik hran lo a, 4du Luna chet la hleithei lo chuan min la tul tir rih mai mai a ni pakhat zawk.

Nakin deuhah chuan u Luna chuan a position la thlak danglam chuang reng reng lo chung chuan hliri chu a han chhuk melh ve ta ran mai. Hetih rual hian u lunpaua hi 'pa lian a nilo' kan tih tawh kha. Mahse, muang mar hmanhmawh lo fe chung chuan ni tla tur lamah bawk chuan a mit chu a len leh ta veng veng mai. Kan zinga pa chiap chuan chu hun tha leh duhawm lutuk mai, chutia u luna'n ngai pawimawh lo zeta a han khawhral liam vel mai mai chu ui tak chung chuan, "u Luna chu han ni ila aww" alo ti vawng vawng mai reng asin.

Come on! U lun, tang ve ta che. I ngaih thin zia te, a tello a second khat lek pawh rei i tih thin zia te, i ngum saphai hiat tura hliri i mamawh thin zia te, a ni nena hun in neih khat thin em avanga i lunglen thin zia te, i ramvah thawmhnaw han hak tir pah che a i ipte pui lian turu zet mai han bah tir hnap tur che a hliri i suangtuah nasat thin zia te, i zalna laikhum han chuan kai zawng a rak tuarh tuarh thei a zan khatna han tlingtlak pui i chak thin zia te, thenawm khawveng hmuh lai ngei a han inchhaih fiam awr awr paha i lu thak lo pui han hiah tir vel te chu i suangtuah fo thin an ni tih te kha puang chhuak piap piap mai ta che.

Dim hlek suh Zion pasaltha, zam reng reng Suh. I aw bawm hnawh ping tlat tu i khak tangkai lo zet zet te kha chu phuhchhuak thawt thawt mai ta la, i thusawi laia i chil lo rial teivet thin te kha zawng pik chhuak zeih zeih mai ta che. I hmangaih hliri hmuh lai ngei khan i duai loh zia te, i theuneu loh zia te kha lantir ta che. Pa takin le.

Mahse, u luna erawh a la silent ta fo mai. Keini lam chu kan mang alo ang zawk za mah mai.

Chutia hrilhhai mangang ru zet chung a hun kan hman mek lai chuan munga bawk chuan thawklehkhatah hian, "ka insum thei tawh lo, u lunpau" tiin a tho kang ta vut mai. Chumi rual chiah chuan keini lam chuan, "a chi loh" tiin munga kekawr tlangah chuan kan lo vuan nghal chawt a, mahse le! Keini in munga kekawr tlang kan vawn rual chiah chuan munga chu a tho kang fel der tawh.

Ingineer meuh mah ni se kekawr lastik rul bak hak tur nei zo bik heh lo le, lang lo tura thuruk engmah a awm ta lo. Underpant lehzel pawh chu alo ha bik silo lehzel a.

Chumi lai tak chuan u luna leh hliri te chuan kan bihrukna lam chu an rawn hawi rual thawt a, chutia an piah lawk a munga, a zahmawh uai thuah chunga lo ding reng an han hmu thut mai chu enge thleng zel a kan rin le?

Khami tum a kan hun tawn ang kha chu dam chhung ni a tawng leh ngai tawh lo tur hian khuanu hnenah ka dil duh hial ta ve ang.

Mahse, u Luna tactic bawn turu tak mai chu kan hriat theih phah ta tho chuan kan inhria. Enge u luna tactic chu ni ta ang le? E le! Silent tactic chu maw le"

Tumkhat chu kan khuaah hian mikhual nula hmelchhe lo tak mai hi a rawn zin a, vengchhak a mi sinkhama tunu khawlek a mi a ni nghe nghe. Chumi tum chuan a lawm kan u Luna tactic chu kei vala hian ka lo apply ve tak ni.

Ingineer munga hruai tello ila kan duh ru viau, mahse hruai tel loh theih lohin a phur ber berah a tang ang vei roh si a.

Kawngkhar chu kan han kik ri ta dat dat a, in chhung lam atang chuan, "lo lut ru". Enge maw rokhawlhna avangin u lunpaua'n min ho thei ta silo a, keini lam chu kan khawr ru viau mai. Mahse, inleng chuangkai dang an lo neih loh avang chuan keini chuan thawm kan han nei lui deuh ta phar phar a.

Thutkhawmna pindan lamah chuan inzui pheiin titi tlanglawn te te vawrh pah chuan thawm kan nei deuh dar dar reng a. Tlem a kan han tlangnel tak deuh hnu chuan kei chuan zahtheihloh chhuah a a changtupa chan chang inti rilru tak chung chuan kan nula rim Daisy-i kiangah chuan ka mawng chu ka va hung phei vei tharh a, mahse Daisy-i chu a bula ka mawng ka hun rual chiah chuan a tho nghal daih.

Kei chu zak rilru tak chungin mahni chuan ka thu kun deuh chhal a, ka thinur rilru viau bawk.

"Uai! I ti takzet maw nula, u luna tactic meuh hi zawng i dawl zo bik dawn emaw chu? Ti rilru ran chung chuan ka thu tum deuh luau reng mai a, ingineer munga leh pachiap te lah chuan ka che fuh lo chu mi nuihzatah an lo tlak ve vei tehlul bawk nen. "Imm, lungngai su, in nui rei dawn lo"

Nakin deuhah chuan Daisy-i chuan thingpui paw hang dal deuh rel mai chu min rawn hlui ta dan dan hlawm a, chuveleh kei chuan Daisy-i thingpui min rawn pek lo ban pah chuan a mit ah tak mai chuan chiang zet hian ka lo melh let deuh sak mai. U lunpaua'n a nula chhai tur te an mitah chiang taka a en thin ang ngei mai khan maw le. Mahse, Daisy-i hmelah chuan kei chu 'mawl' min tih hmel bak ka hmu lo.

Ka zah em avang chuan ka khawhmuh chu a bial nghal mawp mawp thei hial reng a, ka lu te chu a hai nghal mup mup mai a ni.

Chutah, Daisy-i chu ka kianga thuthmun rem tum ni awm fahran hian mi han mit mei hmasa vei tehlul a, mahse pa chiap te lamah bawk chuan thuthmun a va rem leh ta daih pek a. Kei chu han zak leh tur chuang ka awm nem le.

"Imm, tunah chuan u luna tactic tak tak ka lantir a hun ta. Daisy-i chu melh pawh ka melh duh lo. U luna'n tlai tla tur a thlir vawng vawng ang mai khan tukverh darthlalang lam chu ka thlir vawng vawng mai a, mahse Daisy-i leh ka thiante chuan kei chu mi hre chang ve lek lo ang mai hian titi an vawrh mial mial thung si.

"Nilo, a ni thei lo" ka thinlung chu a rum vawng vawng thei hial a. Ngawi renga thut tauh deuh hmur mai loh chu tih theih dang a vang rih viau. Nakin deuha chuan chutia thu ngawi ta reng mai chu Daisy-i chuan, "u ziak, i tha maw? Kei chuan Kam khat pawhin ka chhang let lo. U Luna tactic kha ka la hrechiang em a.

"U ziak,u ziaksianlal" melh pawh ka melh duh lo. Pa chiap te pawh chuan ka chet lak tum dan chu lo hrethiam thuaiin engemaw chhuanlam siamin min relh bosan ta thuai a.

Kei chu ka thu tum lung reng a, u Luna hmel hmai ang thei tur ber chuan ka hmel te chu ka ti sawi deuh bui a, ka awr te chu ka ti puk deuh ul a, ka meng si suap reng bawk. Chutia mi â ang maia ka thut tum tak luau rengah chuan nula â lo leh a ngaihna hria Daisy-i chuan he thu hi mi hrilh ta a ni.

"U ziak,i beisei ang ka lo thehchhuak thei lova min hrethiam dawn nia, mahse ka thinlung zawng zawng a ka hmangaih mi pakhat vang a ni asin"

"Aw haww! Ka va han zak dawn ve le! Beiseina nen ngaithla zel phawt ang.

"Amah chu in khaw tlangval hi a ni nghe nghe asin, tlang rel leh zah pawh ka dawn hman tawh lo, ka lunglenna leh ka khawharna avanga hetia in khaw lam a rawn thang hi ka ni asin"

"E khai! Chu, ava ropui leh si ve"

"A bulah chuan inneih ka rawt ta ngawt mai a, mahse a ni chuan ka rawtna chu ti puitling tur chuan chet ka lak a tul thu min hrilh tlat mai a, kei chuan ka duh em avang leh ka hmangaih em avangin heti zawng hian chet ka rawn la ta mai a ni. Amah chu u lunpaua a ni asin"

Ka lungphu chu a chawl ta mai emaw ka ti hman. Chumi laia ka awmdan tur chu mita min lo hmu tu tan chuan mak tih tawngkam hian a hrilhfiah zawh sak kher lovang tih ka hlauh pui zawk ma nge.

Chutah meuh zawng kei hi ka harhchhhuak ta. Hliri leh u luna kan enthlak tum a u luna a silent tlat nachhan kha. Ni e, U luna khan hliri nena inthen kha alo duh vang zawk alo ni, khatia tawngkam a neih duh miah loh nachhan kha. Ka hrechhuak ta.

He leia hringnunah hi chuan hmel duhzawng tam tak an awm nachungin thinlungin a pawh tak tak erawh an tam lo a, u luna hi chutiang ang deuh chu alo ni. Hmangaih erawh pakhat chiah neiin chu chu ka bula mi Daisy-i ngei hi alo ni.

Tin, u luna hi rin ang a nilo tual tual mai. A lo bawn zia leh alo turu zia hi kan haichhuak deuh deuh zel dawn zawng anih hi maw. Mi hrang hrang, an mize mil a chhai thluk dan tactic hi alo ngah em vang alo ni. Keini ve, kan nula duh ruk ve deuh te bulah ngei pawh a che vai tingtang lo ngang thin te tan hi zawng tluk rual alo ni lo nasa. Chu mai ani lo. Kei hian, kei ve tehlul hian lengi chhai nan u Luna silent tactic, inthenna tactic ngei mai chu nula chhai nan kalo apply ve tehlul a, ka va han zak kher em ve le. Inthenna tactic chu chhas zawn nan maw? A zia hian a daih zo lo a nih ber mai hi maw.

Mahse, engvanga kan u Luna hian thuruk lo nei nge maw alo nih chu le? Ka va hrethiam ta lo em. Keini lam hi thuruk pawh hrilh ngam awm loh khawpin em ni kan lo awm ni?

Chutia thil awmzia fiah angreng taka kan han hriat takah chuan tin zai kan rel ta a, Daisy-i pawh chuan pawn thleng min rawn thlah thlap nghe nghe. Ingineer munga leh pa chiap te chuan nuihza insum ru tak chung chuan, "i hlawhthing em? Min lo ti. Kei chuan rum zet hian, "nahi" tih hmuk pahin hmalam ka pan ding nghal nal nal.

A tuk zingkar boruak nuam tak mai leh thiang tak hnuaiah chuan kei chuan u Luna te In lam ka pan ding nghal chat a, u Luna chuan a sam thur buk chhurh thin kha alo vat fai vang tawh a, zozial rimtui zet mai zu in ni lum chu alo ai a, chutah eng khaw sawi set set lovin kei chuan, "u lun, engtikah maw inneih chu in tum a? Chhuahchhal aw tak mai chuan ka ti nghal tawng a. U Luna chuan nui sang chung chuan, "hliri nen maw? Alo ti. Kei chuan ip chawih chawih chung chuan, "aih, . Daisy-i nen zawk maw le" chutah, u luna chu za em em mai hian a nui chhuak ta hawk hawk mai a.

"Nuihzatthlak a awm em ni? U luna chuan "ka thian, ka tihpalh, ka insum thei ngang lo a ni. Nizan khan i che ropui lutuk tlat. Daisy-i nen kan inbia a, thil thlen dan engkim min hrilh vek alawm"

Kei chuan thil awmzia ka fiah tulh tulh takah chuan zah nachang pawh ka hre tawh lo. Engdang sawi lo chuan, "engtikah nge inneih chu in tum a? Dan khatna in em ni?

"Immm, dan khatna in kan ti tlu ta anih kha. Thianpa, heng thil zawng zawng hi in hriat ve ka duh rih lo. A chhan chu surprise che u ka duh vang a nia, inneih dawn tepah surprise thut che u ka tum alawm. Mahse, hei tunah chuan engkim in hrechhuak ta si a"

Kei chuan ka hma a u Luna, hmel bumro tak mai leh hmel sawrbawl ve tak mai chu thlek vang vang in, "Daisy, i dawn chiang lo a ni" ka ti chhuak sap a.

Daisy-i hi nula te chhe lo, hmel hmai invuah rem nalh thlap mai, mit meng bial kal mai hi a ni a, a sawi dan tlanglawn berah chuan nula chhelo pangngai tak ti ila a funkim ber mai awm e.

Inneih ni chuan inneih dar chu a inkhawng ri bul bul reng a, kei pawh chu rin ai takin ka phur ve viau mai. Ka suit man to ber hmang chuan ka induang ve zaih mai a.

Biak in chhungah chuan mipui an tlim hmur mai. Kei pawh chuan tlar hma lamah chuan thuthmun ka rem ve vang a, ka bul chiahah chuan pa chiap pawh chu a thu khi ve sang reng bawk.

Kan thian dangte hmel pawh hmuh an nuam in an zangkhai vah hlawm mai, engdang vang a nilo, kan u luna'n nupui a nei dawn tlat alawm le.

Inkhawm boruak chu a reh ta thiap mai le! A chipchiarin ka sawi dawn lo. U luna chu ka va thlek leh thin a, ava hlim ngai em. Thil awm lo a ni hauh lo. Amaherawhchu mopa thianah ingineer munga a din teh tlat avang erawh chuan thil chu a khawbaw zo leh palh mai ang tih kan hlau ru viau thung. Tun ang hunah lehzel hi chuan ingineer mawng a thawt tawh loh hram kan beisei.

Thutiam lak a hun hnai a, u luna bawk chu ka han thlek leh thin a, a hlim takzet a ni. Chutah, ka mit nghal ta pek chuan mopa thian ingineer munga chu ka han thlek leh ngial a, ava han inlak pawimawh hmel tak em aw! Tul lo puiah 'tarmit ka vuah e' te a ti vel. Tum dangah a vuah ngai der silo a. Ni e, inneih ni a ni tlat alawm le'

Chumi lai chuan u luna'n theihai kung hnuaiah te, tanky chhaka zoruthei kung hnuaiah te, tuikhur kiangah te, bawlhhlawh paihna ah te tum tam tak alo kaih phar tawh hnu nula te chu engtin tak awm ang maw? An lo thik nge ni ang a, an lo lawmpui viau zawk? Hriatthiam mai erawh a har ve riau.

Chumi lai chuan tlangval 'kei ka ni' inti tam tak pawh anlo then leh deuh sak thin a, chu chuan enge min hrilh tih erawh ka hrethiam mai bik tlat lo. Rochhingi kan rim zana chaw heh zawk nih inchuh a alo inchaltauh pui hrep tawh laltinlala meuh pawh chumi tum na na na chu hmuh a nuamin a hmel a zangkhai vah mai a. Khami zana thil thleng khan a rilru a chawk buai pha lul tawh love. Inneih ni a ni tlat a ni.

Biak In chhung chu ka han thlek kual thin a, mipui an thahnem viau a ni tih chu hai theih a ni mawlh lo.

An fapa te ngaihzawng pawh duh duh danah lo khawsak pui thei thin tu, an fanu duhlai te khawi lo kawmkar hmun fahrah te te pawh a lo CK pui thei mai zel tu, a awm mai mai pawh hi 'hranga' nih tawh sa nak alai a a zurui thinur han invilik meuh tawh chin in a khawtlang a tihbuai hnem thin zia te kha. Mahse, chutiang zawng chuan han khawsa ve zauh thin mahsela tlangval zurui awm tha duh lo han malis tu tur atan erawh a ni aia duhthlan tur dang an awm chuang bik law.

Chutiang a a chungchang chhe lam kan han tarlan tak a mai vang erawh chuan u luna hi mi awm tha duh lo a ni nitin bik lova, a laktlak lo chhun tin zan tin bik hauh lo. Engemaw kawngah te chuan laktlak tehreng e le, khawi lo kawmkar hmun fahrah te te ah te pawh khan maw. Chu lovah, mi fanu te duh lo chung chung pawh phar ching leh mi inngaizawng Kara tlakzeh ching a ni full moon thak bik hek lo. A themthiam vang liau liau a ni asin le.

Mitin hian talent kan nei theuh a, kan Pathian thu ngei pawhin engtin nge a tih kha? Talent tih pun hi a support a ni lawm ni kha.

Mahse, tukthuan kil ruala thenawm te rel nghal mai ching dawklak tlat tawh te leh mahni mit a hmawlhte hmuh kan a midang ngum khak hmu thei dawklak tlat tawh thin tu te chuan u luna talent ve liau liau pawh hi 'a ler vang' an tih sak leh talh tho ang chu.

Inneih thutiam an lak dawn lai chuan u luna chu ka han en a, hlim namen loh in a ni a hlim ni. Tin, enge maw ngaihtuah chu a nei chiang alawm. Engdang a ngaihtuah lo, chumi ni chu ral thuai se, zan boruak thiang nem dam diai hnuaiah a khum chik theia a nupui thar nena hmangaihna tui nung lui han tlan dun kerh kerh tawh te chu a hisap lo thei tawh lo. "Engtin nge hma ka lak ang? Keimah zawk hi ka che hmasa dawn a maw ni le? Engtin nge ka thaw lo uih teivet thin hi ka block ang aww?

Eng dang a dawn lo, zankhatna lo thleng tawh mai tur chauh chuan a ngaihtuahna a luahkhat a ni. Pastor thusawi chu a beng a rawngah a lut lo Chiang hle a ni tih a awmdan a tang pawh chuan a hriat mai a.

Chutah Daisy-i chuan u Luna lo meng da va deuh ruai ruai thin chu a han nghawk zauh a, u Luna chu a harhchhuak zawk mai. Chutah, inthiam lo fe chung chuan, "tiam tlat e" a han ti nghal tawng a, mipui lam an lo thum hak mai. U Luna pa, pu manzanga chu a thut hmunah chuan pawi ti tak mai hian alo chek tlak tlak mai a. Chuveleh, Daisy-i chuan u Luna hnenah chuan, "tiam tlat hun ala thleng lo deuh" tiin thil awmzia chu a han hrilhfiah ta a. Mahse, mahse, chutiang mai maiin a ti zam chhe lul lovang. Zam mai chi lah a ni hek lo. A hun leh a hmun a zira inthunun thei tak mi u luna chu pangngai tak chuan a awm ve leh mai bawk a, keini lam chu kan lo thaw huai mai.

Nakin deuhah chuan u Luna leh Daisy-i te chuan "tiam tlat e" tiin inneih thu chu thlun ngheh alo ni ta a.

Biak In tualah chuan thla chu an la sup sup reng a, keini thian za pawh chuan thla kan la awl lo. Kan camera ken ve chu kan inhmeh chhawk deuh reng mai a ni.

Kei chuan monu leh mo pate chu thlir nin har ka ti viau nge maw, ka rilru chuan 'beauty and the beast' te pawh kha min hriatchhuah tir uai uai thei hial mai.

Nula leh tlangval,a bikin u Luna ngaihzawng hluite chuan monu leh mopa te chu an duhsakna an ka an inhlan chhawk deuh reng hlawm a. Lalhliri ngei pawh chuan nui har har pahin monu beng bulah chuan a vanneih thu leh a lawmpui thu chu a han fah ve luam bawk a. Nimahsela, chutiang duhsakna tam tak karah pawh chuan sawichhiatna leh 'inhmeh lo' ti a nupa tuakthar te kara hem lo thlak duh ta mai pawh an bang bik lo.

Mahse, he leiah hi chuan fakna leh selna nilo eng thil dang nge beisei tur awm chuang le? Daisy-i chuan nula te hel rawn pangpar mawi a thliah theih bik a mai vanga amah itsikna anka chu alo ngai thutak duh hran lo. Thenkhat phei chuan 'pa leh a fanu' ang chauh an ni' ti a monu leh mopa kara tawngkam duhtui vak lo pawh an awm nghe nghe. Diktak chuan kei ngei pawh hian inhmeh ka ti thei thlawt lo. Mahse, Daisy-i chuan selna tam tak chu lungawi takin alo hre lo der thiam zel a, boruak pangngai nen inneih boruak chu a kaltluang ta chauh zawk a ni.

Program behbawm zawh fel hma deuh chuan ka lu chu a rawn na deuh riai riai reng a, chutah dawidawi ei ka duh avangin haw zai ka rel ta a. Biak In pawn gate bulah hian khual khua atanga lokal naupang pakhat hian tap deuh par chung hian a pa hnenah chuan haw alo rawt sek reng mai, Chutah, a pa, hmel tung lam deuh, pa inkhaithli tak, zaidam hmel tak mai leh dawhtheih hmel tak mai chuan aw ka nem dam thlap chung chuan a fapa haw duh chhan chu a han zawt a, chutah, naupang chu tap bangin a pa hnenah chuan, "a pa, mopa a hmel chhe e mai" a ti ta mai a, ngaihtuah a thui duh kher asin.

Zan boruak thiang tak hnuaiah chuan nupa tuakthar te chu innei hlim te zan khat hmanna atana beitham tak mai leh ngaimawhawm tak mai, u Luna room ung deuh khak tawhah chuan an inzui lut ve ta ral ral mai a. Chutah, u luna chuan hlauthawng ru fe chung chuan a ka a ang hman zuau, Chuveleh Daisy-i chu u Luna khum chik theiah chuan dimna tel map lo hian a han bawkkhup nghal thlawp mai a, u Luna chu a lo ip chawih chawih mai.

Mahse, u Luna khum chu a chik miah lo. A hma te kha chuan han lawn kai zawng te khan alo rak tuar tuar zel kha a nisi a. E, ni dawn tak! A hrechhuak leh si. Chutia an fapa neihchhun meuh in nupui a han neih ve dawn tak a ruaiah chuan tiin a nu chuan nupa tuakthar te khum tur chu mistiri naukhup-a hnenah alo siam tir a ni tih a han hrechhuak leh hnuhnawh a, ava han teuh thiak thiak tak. U Luna chu a thaw hawk thei hial mai.

Engpawhnise, kual thui lutuk tawh lovang, u Luna'n a nghakhlel nasa tawh mai si a.

Daisy-i chuan uluk muang mar fe hian a silhfen chu chung lam atang chuan a han kheh thla ta da da mai a, u Luna chuan a hrawk bawk kal rulh khawp chuan a chil alo lem khulh mai. Daisy-i chuan a mal no leh var hai mai chu u Luna hmuhah chuan a han hlim lang leh dek dek a, Chutah u Luna lungphu chu a su dup dup a, a thaw te chu a chham lo chauh tawh maw le.

Mahse, u luna awmdan chu a dik ta hauh lo. A hma zawng pawhin nula tam tak lakah tum tam tak alo insawh sil ve fo tawh, tun a taka chutia a han awm tak tlat mai chu. Thil pangngai a ni ta hauh lo mai.

Chutah le! Hlauhthawn ang ngei ngeiin kan u Luna lungphu chu thawklehkhatah a chawl ta thut mai anih chu mawle! Daisyi chu mangang zet hian a mengphar awn awn mai a,Chutah u LUNPAUA chu chhuatah chuan a awp hniam ta rup rup mai ani.

A Tawp Ta.......