Katana

[Cck Lalchhuanawmi]

Katana
Chapter-8
Ziaktu: Cck Lalchhuanawmi


La hnehsawh ṭha par par tak a ni.


Nunna pakhat humhim turin, nunna pakhat tihbo a ngai dawn a ni.


Thingkung hnuaiah ke kawkalhin a ṭhu a, mit chhingin, a rilru a sawrbing a ni. Hun chu a tihdin theih ni lo mah se, suangtuahna ngaihtuahna ramah Hun a tiding thei a, ngun leh zualin chu Hun chu a chhûi chiang thei a ni.


Hmelmate nena an indona aṭangin a chhûi kir a, Takashi bo dan te, a hmuh lai ngeia Remlali hruaibo a nih dan te leh, Tadagu Haro leh Shogun Fanu-in Yushuke thisen an duh chhan te, Remlali taksa hmanga Rinku awm chhan te leh, chu'ng zawng zawng chinfel dan tur nen lam a hre fai vek tawh.


Muangchanga mengin, "Ṭhut muan hun a ni ta lo", Yushuke thisen awm chhun a nihna chu a pawm fel vek ta.


Tukṭhuan ei khamah, "Ka hriat tur ang chu ka hre vek tawh a, eng buaina pawh tawk ila, hmachhawn dan tur pawh ka thiam tawh. Kei hi, Yushuke thisen kai awm chhun ka ni", a ti a.


Chu a thusawi hria a piang chuan lawm takin kut an bêng a, "Yushuke thisen kai awm chhun, Yushuke Akai, chak leh huai takin awm rawh. Ṭanpui i ngaihna hunah chuan, i tan kan awm reng a ni tih i lo hre dawn nia", an ti a.


Rinku pawh chu a thawmhnaw, hak hnih thum chu puanah tuamin, a hnung puak a.


Kimono hain nalh takin a inchei tawh bik lo.


"Samurai hi kalsan hlek suh ang che", an ti liam liam a.


Akai chuan, a lo kal tawhnaah bawk Rinku chu a hruai a, a hnungah kal tirin, a mitsir zauh zauh bakah, an ṭhut chawlh lai pawhin a rukin Rinku chu a thithlai ru reng a.


Khua aṭanga hla takah awm mah se, chet a la ngam mai lo.


Ni han tla se emaw, Thla lo chhuak ve phawt se, chutah ngei chuan a che ang. Khaw ên(êng) laia chet ngam chi a ni lo.


A ruk thei ang bera a chet a ngai a, Thihna chu Nunnain a thlak dawn a ni.


Ni van lai zawl(chhun lai) a nihin, Lui kamah a chawlhpui a, Rinku-in Chhang a ken chu inphelhin an ei dun a.


"Samurai, ṭawng tam lo ve tak i nimaw? Ka duhzâwng tak",


"Chhungkaw eizawnna Chhang dawr kan nei a, chutah chuan min ṭanpui ang a, ka Farnu Mio nen pawhin in innel thuai mai ang",


"I fapa hringtu atana min duh loh chuan, min hruai chhan ka hre ta mai lo. Lo zui malek che ila, ka nuamsa zawk dawn tihna a ni a", Akai chu a nui mai a.


Nawmsakna te chu, Romei ang chiah a ni.


Mawi takin a lang a, Chhemdam Thliin a chhêm kiang leh thuai ṭhin.


Chawl rei loin an kal leh thuai a, Akai chu fimkhur tak leh inring rengin a awm a. A Katana chu phawi chhuak mai thei turin a Fawng a vuan chawt bawk.


A hnunga Rinku a kaltir chu, a huaisenthlak thiltih kher mai.


Hnung leh hma, vei leh ding, lei hnuai leh Van aṭangte pawhin beitu a nei reng thei.


Hma lamah chauh a mit a lên tir thei lo a, hmun tinah a mit a lên tir a ṭul a ni.


"Samurai, in chhungkaw eizawnna chu a ṭha tawk em?",


"Ṭha tawk khawp mai, mi tu pawh hian puar theihna kan duh ṭheuh a, Chhang hmanga eizawn chu a hlawkthlak hle a ni".


Rinku chuan zawhna hrang hrang a zawt a, a nih loh leh, Samurai chanchin te a zawt.


Akai pawhin ṭha takin a chhâng ve zel bawk a.


Chawlhna tur hmun zâwl leh biru tak a melh ru reng bawk.


Zanriah chhum hun(tlai lam dar thum) a thlenin, "Chawlhbûk siam ang, vawiin atan chuan tawk rawh se", Akai chuan a ti a.


Rinku pawh leiah ṭhu sawpin, "Ka chau tawh reng a ni, chhâwl a hâl huam huam mai, Buh changrum leh Sa a ngaihawm", ngaihno bei takin a ti seuh seuh a.


Akai tan ngei pawha tawrhhar tak a ni.


Insumtheihna, inthunun theihna zir a ni a, a hun leh hmun dik taka che chhuak tura duan a ni bawk.


Chhang ei tur an la neih avangin ei tur zawn an ngai lo a, tui in tur lah an la nei.


Kâwl a liam fel ta a, Mei alh êng tih loh êng dang reng a awm lo.


Chhawrthlapui meuh pawhin hun lo thleng tur hriatpuitu nih duh loin, a biru bo hmak.


Akai chuan, Rinku pawh inring rengin leh chet chhuah tum ranin a awm ve tho tih a hre kar.


Rinku chuan, "Mut zâl mai ka duh tawh a ni", chau zetin a ti a.


"Ka lo vêng ang che", Akai chuan a ti a.


Chhâwlbuk chhunga Rinku kal chu rawn hawi.let thutin, a kawr hnuaia a thuhruk chemtê chuan a vawm a.


Inring renga awm Akai chuan a Katana phawi chhuakin, chumi hmangin a lo dang a.


Hnung lama invawrhbinin, awm hmun rem nghalin, Rinku nen an inhmachhawn ta ran.


Akai chuan Katana chawi sâng vahin, "Remi, min hrethiam mawlh ang che", a rilrua tiin, Rinku chu a va pan hnai ta a.


Akai chu vir pawp pawp thei a ni lo, rang thei ang bera Nunna lak tur a nei.


Rinku thinhnûnah tak a vih a ngai a ni!


Akai chuan Rinku hnungah a sât a, Rinku chu hma lamah a awn duai duai.


Akai chuan a kut hum ruhin Rinku lamah a pharh chhuak a, chu a kut phar chhuah aṭanga Dâwi chhuak chuan Rinku tlu lek lek chu a bawhkhuptir thlawp.


Rinku chu tho thuaiin Akai chu chemtêin a rawn vawm leh a, nimahsela; hmeichhe tha ve mai chuan Mipa tha chu a hneh lo a ni.


Akai chuan hnehsawh takin a lo dang zel a, remhnriatna a hmang awl lo.


A hnungah a hliam tawh a, hliam belh a tum lo.


Rinku chu a chawl dat a, hah takin a thaw hluam a, a hnung hliam aṭanga thisen chhuak te chuan a buah huh zuih.


An indona lamah an Mei alh pawh chu an tithi zo ta a.


Thim thamah pawh nise, khaw êng ang maiin fiah takin an inhmu thei.


Rinku chu, hliampui tuara rum kâwk kâwkin, "Zanin hian Yushuke thisen ka in ngei ang", âw hlauhawm tak chhuahin a ti a.


"Yushuke kut zâla thi turin inring rawh", Yushuke Akai chuan a ti a.


Rinku chu Van lam hawia ring taka auin, a taksa chu pawng ṭawlh ṭawlhin, a silhfen inbelte pawh an darh seng sung a.


Akai chuan a Katana fawng chelh nghetin, che chhuak turin a inring tawh hle.


Vawilehkhatah, Akai chu eng emaa hian Ramsa hian a thlawh khum fua a, Dragon dum, Thla nei lo nen an inhmachhawn ta ran mai le!


Dragon chuan mei alh phuh chhuakin, a Katana hmangin Akai chuan a lo dang a.