Katana

[Cck Lalchhuanawmi]

Katana
Chapter-9
Ziaktu: Cck Lalchhuanawmi


Dragon chuan mei alh phuh chhuakin, a Katana hmangin Akai chuan a lo dang a.


Phit dut dutin, chu Dragon chuan, "Ka Ropui ber", ti ziazangin a chhuangte chu a tiparh a.


He Dragon hi chu a ni lo, mahse; Remlali Nunna chhan nan a thah a ṭul.


Akai chuan a Dâwi hmanga Dragon bula Thingkung titluin, Dragon-in Thingkung tlu a melh zauh chu, Akai chu a tlenga tlengin Dragon âwm(a lu hnuai, nghâwng deuh reuh) thûk taka vitin a tai thler a.


Dragon na ti au ruai chungin, "Min chhaihkawlh", ti ni hrimin Akai chu a tawngpawng bei ta ringawt.


Katana vai vir bakah, a Dâwi a hmang chuak thiam tawh a. Dragon chuan hliampui a tuar nasat tawh em avangin tawng pawng basa ngam bak atan a awm tawh lo tluk a ni.


Dragon chau chu tlu hnawk tawhin, Akai chuan a dinchilh a.


Dragon chu zawi zawia mihringa changin, saruakin a let bam a. Dragon khâ khâwng chuan sawi tum a nei a ni.


Akai chu ṭhingṭhiin, a kun hniam a, "Dragon ho hian engvangin nge Yushuke thisen in duh?", a beng a dah hnai a.


Rinku, Dragon chuan, " Dragon dumte hian Dâwi kan nei ve lo a, Dâwi kan duh ve a ni. Dragon Var te chauhin an nei a, Yushuke hnena Dâwi hlan a ni tih kan hriatin-", a ti a.


A kâ aṭanga thisen khuh chhuakin, a mitmeng a phi ruai a.


"I hria em? Dâwi nei ta pawh ni la, i hlim theiin i inring em? Dâwi i neih avangin hotu nih i chuh leh ngei ang. Mahni chanpuala lungawi hi har viau mah se, lungawi taka awm erawh kan tihmakmawh a ni si. Mahni chanpuala lungawia hmâ tihsâwn zel hi a hlu zawk asin.


Ro hran reltu i ni lo tih ka hria e, Yushuke thisen aṭangin Dâwi la chhuak pawh ni ula, i chan ve i inring em? Ro hran chawk chhuaktu zawkin a chang vek ang a, a rap bet hmak ang che u.


Hahdam takin awm la, thla muang takin chawl tawh ang che. Dragon Thlarau chawlhna hmunah chuan, an ngaihdam ngei theih nan che 8, lungawi takin an Rawng bawl ang che", Dragon mit chu a dul ruai tawh a.


"Ka...lawm....e", Dragon thu hnuhnung ber a ni ta.


Akai chu ṭhingṭhi ṭhain, Wakizashi lek kângin, Rinku thin hnûnah tak chuan a vit bur a.


Mangang au thawm leh na tuar thawm inpawlh chu Ramhnuaiah a thang khâwk ruih ruih a.


Rinku thin hnûn, Akai-an Wakizashi a vih(vit) bur la phawi loin a la vuan reng a. Chuta aṭangin Dragon Thlarau chu vawilehkhatah thlawk chhuakin, Van lamah a thlawk chho a.


Akai chuan a en reng, Dragon chu hmuh theih lohin a liam ta a.


Dragon Thlarau chawlhna hmunah chuan lungmuang takin thleng sela, lo ngaidamin, a chanpual chu lungawi taka pawmin, hmâ lo sâwn zel rawh se!


Akai chuan Wakizashi phawiin, Remlali taksa ni leh ta chu puanin a khuh a. Thisen kai te chu tifaiin, a khât tâwkin, "Remi?",


"Remlal?", a ti ṭhin a.


Chu zan thim leh khawhar, Chhimbuk chaw zawng thawm bak hriat tur awm lohnaah, Remlali kohna thawm chu a ring kher mai.


Dâwi hmang chhuak thiam mah se, mitthi kaihthawhna Dâwi a ni lo tlat a ni.


Remlali lû tikangin a mal chungah a nghat a, a chalah a kut phah nghatin, "Remi, kha mangchhia aṭang khan i zalên ta e, lo harh tawh rawh", a phun sup a.


Dumdê an lo thlawk dê vâ vâ, Dumde pakhat chu, Remlali thin hnûnah tak a han fu vâng a.


"Hetah hian", tiin, Akai chu hna thawh dan an hrilh a ni ngei ang le.


Dumde zawng zawng chu an fu ta vek a. Akai chuan, a kut phar chhuakin, Remlali thin hnûnah chuan a kut a nghat a.


Mit chhingin, "Mang chhia aṭangin i zalên ta e", phun supin, Dâwi hmangin a âwm a nem kâng zawk.


Remlali chu lo thaw chhuak kâwk kâwkin, a hawi kual a, Dumdê êng hnuaia amah pawmtu chu thlêk vang vangin, mittui a baw(hua) hawk hawk nghal a.


Malsawmtluanga pov....

"Inah ka haw duh", ka âwmah ka pawm bet a, "Kan haw ṭep, a rei tawh lo ang".


A bul aṭangin mei ka chhem leh a, Dumde ho pawh an la awm reng. Thing zarah an awm a. An chawl a ni chêk ang.


Rinku thawmhnaw ken Remlali chuan a ha a, Kimono a ni tawh lo. Ka sawi thiam dan berah, Kawrfual bân tlawn Hring a ni mai.


Ka bulah ṭhuin, ṭap chungin chhang a ei a.


Rinku kha, ka hliam nasat vea ka hriat nen, a bo aṭangin hliamte pawh a dam hmak a, a lawmawm tak tak a ni.


Remlali chuan, ṭap chungin tihian a awmdan a sawi a.


"Khatia, Dragon-in min hruai khan, kha nu khan Dragon kha a kalbo tir a. Kan awmna kha, Tlang chhip a niin ka hria.


Ka hlau lutuk khan sawi tur ber ka hre lo, ka khûr chhuak vek a, din pawh ka ding nghet thei lo.


Rei loah leiah ka ṭhu ringawt.


Ka kutzungpui hi chemtêin a thai thi a, thisen chu a liak a, a ner salh salh.


"Min han bum ve khanglan chu le", ti pahin, a kâ aṭangin chung lamah mei alh a phuh chhuak a.


Thinrim taka min enin, "Yushuke thisen kai i ni hauh lo, khawiah nge a awm?", ka nghawngah min rek vak.


Thâwk harsa ka ti lutuk, ka mitmu te hi a chhuak tawh dawn emaw ka tih hnuah min thlah a, leiah bawkin ka nghawng ka dawm a, boruak ka hîp lut nasa lutuk.


Dragon-ah a inti chang a, kan khua hâltu kha a ni!


A râpawm lutuk, a lû a lian si, a hmelchhe si. A dum run bawk sia, a mitmu a sen ling hlar a, a thâw a uih ropui leh nghal", a ti chu, insum zo loin ka nui chhuak hawk.


"Tak tak alawm",


"Ka tihpalh, sawi leh tawh rawh le",


"Min hnim dan dan a, lemziahah emaw film-ah te emaw chuan Dragon hoin Thla an nei ṭhin si a, chubakah, mihringah an intichang thei pawhin ka hre lo. Mahse, ani kha chu Dragon ni tho siin mihringah a intichang thei, ka hre thiam lo reng reng.


"Tu nge i nih?", tiin ka zawt a.


"Yushuke thisen châk hian chawl lovin kan zawng ngat ngat asin. Yushuke-te thisena luang Dâwi hi, Dâwi awm zawng zawnga Dâwi ṭha ber kawltu Dragon Var-tena an hlan chhawn a ni tlat atin ni.


An thisen kan zawnna lamah, Dâwi hrang hrangin kan inbual a.


Chumi azarah, Mihringah kan indâwi chhuak thei ta a ni", a ti a.


"Chuti ahnu, duhtawk ta mai che u, Yushuke thisen in ngai tawh hleinem, Mihringte hi chuan Dâwi kan nei lo a, nangni chuan in nei tawh a, duhtawk ve em em tawh rawh u", tiin, ka theihna zawng zawng sâwm khawmin, ka aukhum nghek.


A thinrim chuan, a meiin min vai thlu hnawk.


Na ka ti lutuk chu, ka taksa khawilai ber nge na ka hre lo.


Mihringah a chang tawh a, ka chhip samah ṭhamin min kaitho, "Thi turin inpeih rawh", thinrim tak hian ka ti a.


Za em emin a nui khâwk rum rum.


Dragon-ah chang leh thutin, Tlâng chhip aṭang chuan a meiin min vai thla vawn vawn.


Ka hlau lutuk chu, ka ko chûl mai che a, mahse, a sâng lutuk a, ka taksa a khawng hman vek.


Eng thil emawni chungah hian ka tla a, chung lamah ka kâng chho.


Dragon lek chu a lo ni a, Tlâng chhipah min dah leh, "Thi thei lo tura duan ka ni tih hi i hre lo em ni? Tu mahin min that thei lo, Yushuke thisen ka neih hnuah phei chuan, he Khawvelah hian Dragon hoin Ro kan Rel tawh ang", a ti khâwk rum rum.


"Dragon ka hmuh tawhah i hmelchhe ber, Malsawmtluangan a that khawp ang che. Khawvela Martial Arts thiam ber a ni a, tu mahin an hneh thei lo. Martial Arts Lawmman awm zawng zawng, ama'n a dawng vek zel", ka ti bawrh bawrh", ka nui hawk hawk.


"Ka thinrim ve em alawm",


"A hmelchhia i ti kher a",


"Pawi chai lo, a hmelchhe em alawm", Remlali chuan a ti hlak a.


Tihian, a sawi zawm leh.


"Dragon chuan, "Martial Arts a? Lawmman, Khawvela thiam ber maw? Ngawi teh, chu i mi sawi chu ka hre ve lo, hriat pawh ka duh hek lo. Min cho a nih phawt chuan lo kal rawh se", a kâ aṭangin ka lu chungah mei a phuh chhuak.


Ka sam a kang ta emaw ka ti hman.


"A lo kal dawn alawm, a hmasa berah nang hi a that ang che", ka ti leh.


Dragon chuan, "Tak tak maw? A tan tu nge i nih? Yushuke thisen kai i ni bawk si lo, a nupui, farnu, ṭhian emaw ngaihzâwng emaw pawh i ni lo tih ka hria. I tan a lo kal chiah i ring em ni?", a ti a.


"A lo kal dawn, Dragon thusawi mai mai ka ring ve lo", ka ti deuh hmuk a.


Dragon chu mihringah chang lehin, "I lo thlir teh ang", ka bek sam a chul a, "Yushuke thisen kai i nih loh takah chuan, a thlawna kal tir che ka tum lo", ka khabe dawm kangin, "I hmel ṭhat roh hi le!", a nui ver ver a.


A mak lutuk, a mitmu kha a var vek a, keimah kha, Thlawhna aṭanga ka tlak dawna ka awm ang chiahin ka ni leh huih mai.


Ka harh chian chuan, eng lo, Sava bawm angah hian ka lo awm.


Mahse, kha Dragon thil tawn ang zawng zawng chu keimahah khan a thleng ve vek.


"Khawiah nge ka awm?",


"Min kaltir rawh", tiin ka au vak a.


Awmzia awm lo.


Ka hriat chhuah taka chu, ka taksa hawhin, keimah tak zawk chu, ka taksa chhungah kalh khumin ka awm tih.


Yong-pal film-a changtunu an kalh khum ang chiah kha a ni mai.


Hetia ngaihtuahin, mihring kawchhungah mihring dang a awm theih loh.


Ka thlarau min kalh khum.


Ka taksa chu duhdah takin a suasam a, dan(dang) tum mah ila, ka dang thei lo a ni.


A rei lutuk a, i lo kal pawh ka ring lo. A chhan chu, i tan eng mah ka ni lo a. Min chhan chhuak tura i lo kal ka ring tawh lo.


Min chhan tura lo kal i ni em? Nge, thildang vang zawk? Min chhan tura lo kal i ni tiraw?", a ṭap khûr zawih zawih chu, ka kuah vawng vawng a.


"Nang mah chhan tur chein alawm ka lo kal, keimah avanga helai hmuna lo kal i ni a, hruai haw leh che chu ka mawhphurhna i ni. Tun hnuah chuan, eng Dragon mahin an hruai bo tawh lo ang che".


Remlali chu, Chhawlbûk chhungah mu duh loin, mei bulah, ka mal chungah a lu nghatin a mu a.


A thiltawnin a zir em avangin nge, hlauthawng taka au ruaiin, a harh chhuak leh hlawl ṭhin a.


A chang chuan, a ṭhu chhuak hlawl zel.


Chutiang chuan, muhil mang hlei loin ka vêng tlaivar.


Kal zel tur kan ni si a, a chang chuan Thingkung hlim hnuaiah kan han muhil rih thul.


Ṭawngvai a ching roh bawk a, "Vawksa, Vawksa ka ei châk", a ti ṭhin a.


A chilthli a tla ziah bawk.


Chawhmeh zawnga kalsan tur pawhin, amahin a awm ngam thlawt lo.


Lui kan thlenin Sangha ka chânpui, lui kamah takngial.pawhin a lo awm ngam lo. Ka hnungah ngawi rengin a ding a.


Mau suih zumin, Sangha khawh fuh ngei tumin, kan pahnihin lui kan dâi ta a.


Ka kawr hmawr chelhin, thawm dim thei ang berin a pên ve chhet chhet.


Sangha pathum inhmatawna Lung lian vak lo bula awm, pakhat chu vawilehkhatah ka khawh bur chat.


"Sangha, Sangha, kan man", a kut a bêng vak vak a, a zuang per chhak chhak bawk.


"Kan va han thiam em em!", a ti a.


A puan puaka Kawr pakhat, Sangha man dah nan kan hmang a.


Lî thûk lam pan zelin, kan khawh hnem tawh viau.


"Tawk tawh mai rawh se",


"Nia, hei, a tam tawh lutuk",


"A nih, kal rawh le".


Mau Theiah a zah(zat) ve lawih chhumin, a zahve kan rawh a.


A tuka ei tur kan la nei.


"Tun hmain, Sangha hlang ka la ei ngai miah lo, engtikah tak ei leh thei ang i maw? Ka ei leh theih ka ring tawh lo",


"Ngati maw? Luiah i kal ngai lo em ni?",


"Kal ngai e, tun anga hlang tawp hian, Buh leh chawhmeh dang awm loin ka tihna a nia. A tui e, naktuka ei tur hi pakhat ka lo ei, a rawh hmin sa hi",


"Ei rawh, ei rawh, i duh chuan ei zo vek rawh. Zingah kan veh leh dawn alawm", ka ti a.


Nui ver verin a ban a, a rawh hmin sa, Mau Theia kan duh chu pakhat tê têin a ei leh mial mial.


Dumde an lo thlawk leh sup sup.


"An va han mawi tak. Dumde hi maw, kan man a, a mawng a dê lai saw lain, kan chalah te, kan banrekah te kan bel ṭhin asin. Kan tet laiin a nia, tunah pawh ka la ching tho, kan ṭhenawm naupangte nen hian kan la ti ṭhin",


"Chutiang ka hre ve miah lo, a nuam ngawt ang",


"Insual ringawt i buaipui a, kha vang nih kha", ka nui sak a.


"Mahni tuina zawng i pan a ni ve mai a, a ho lutuk. Tet lai hun hlimawm zawng zawng ka hman kêp vek cheah ngai rawh",


"Ni rawh se", a nui ver ver.


A ding a, a kut min lo pein, "Lo kal rawh, Dumde hmangin infiam ang", a ti a.


Ka kut ka pe thuai.


Dumde.manin, a mawng lai chauh kan la thla.


Ka chalah pathum a bel a, ani pawh a chalah panga ka bel sak. A banrekah Ngun angin ka tlar kual a, Bengbeh angin pakhat ve ve a bengah bel bawkin, a Nghawngah Ṭhi angin ka bel sak bawk.


A kut veilam zungû-ah, Zungbun angin ka belsak leh bawk a.


"Lasi Lanuah ka puang a che", a hmaah ka kun zauh a.


Ṭhen ṭhawin a nui, "Buannel Ramdai ka chuanpui ang che", ka kutah min rawn kai a.


A duhna lam lamah min hruai ve tawp.


Dumde hoin min zui reng bawk a, thim khuih mah se, Dumde êng karah chauh pawh a hmel chu Thlahlei Nga chiah a ni.


A âw chu, bengah chauh ni lo, thisen luang chawlhtir thei khawpa ngaihno bei a ni tlat.


A inchhuih tlu tur chu a kâwngah ka dawm a, "A thim lutuk a, Lasi anga awm ka tum tehreng nen", a vûi deuh nang nang a.


"Kal hlat a thiang lo tihna a nih chu, kan riah hmunah let leh tawh ang",


"Naa, inlakzei tum ve laklawh sin le",


"Lo kal rawh", ka hmaah ka kaltir a.


Ka kut a rawn kai leh, ka thisen a rawn lum pup pup. Ka hmaite hi a sâ hat a, ka lûng phu lah, a rang kher mai.


"Lo haw thuai rawh", tih hi, ka bengah a rawn kiu leh vawng vawng.


Nui ver verin Remlali lah a lo lehhawi leh ṭhin a, a taksaa Dumde kai ho chu an êng dûl ṭan.


Mio-in hmanhmawh turin min ti a, naktukah chuan chawl hlek loa kan kal char char a ngai dawn a ni.


Dragon nen kan la inhmachhawn leh dawn chu a ni a, tun ṭum chu, Rinku hmachhawn ang mai mai a ni tawh dawn lo.


Yushuke thisen kai ka nihna ka lantir ngei a ngai dawn a ni.


Sangha ei pahin, Dragon leh Yushuke chungchang min zawt a.


"Dragon Sual ho khan Emperor Ryurishi fuihpawrhin, an Dâwi â a ni mai ang chu. Mahse, ka pu kha a tlanbo ta si a",


"Katana i sawi kha, Airport-a mi ang a nih chuan, kan lo kalpui lo tihna mi? Khawiah nge a awm ang le?",


"Hmun himah a awm, mi pakhatin a humhim mek".


Mitthlain Daimyo Takashi a hmu zui mawlh mawlh. A vênghim tlat dawn tih ka hria.


"Naktuk aṭang chuan chawl awm loa kal miah miah a ngai tawh ang, chuvang chuan, Sangha hi ei zo vek rawh. Kan buaina hi a fel ṭep tawh a, kan haw thei ṭep tawh e", mittui tla chungin a bu nghauh nghauh a.


"Dumde ho kha, la thla la tawh rawh, a mê palh ang",


"Ni dawn tak e", ti pahin, a la thla a.


A che reng reng chu, hmuhnawm ka ti.


"Mala, engtin nge ka awm ve dawn?",


"Thawmhnaw nalh tak tak hain, chaw tui tak tak i ei dawn alawm. Pindan nuam takah awmin, puan lum tak i sin dawn. Japanese chaw-ah ei châk i nei em?",


"Sushi ka ei châk ber, Japanese chaw reng reng chu ei ka châk vek. Chopstick hmang ngeia Sushi han ei te ka suangtuah nasa thei lutuk".


A duhthusam a sawi a, lungchim takin ka lo thlîr.


Ka nu nen an inkawmngeih dawn lutuk, an hmuh apiang an rel dun char char thei ang.


"Remi, nang hi, Shogun fanu Kyoko, a pian hlima bo ta i ni, tuna a fanu anga awm saw chu, Dragon sual zinga a hotu ber, tuna kan hmachhawn leh tur a ni", tia hrilh mai ka nâp a.


Mahse, khua thleng phawt ang.


Boruak tihchhiat ka duh lo.


Zanin ang hian, lungchim takin ka thlîr thei tawh dawn lo.