Katana

[Cck Lalchhuanawmi]

Katana
Chapter-10
Ziaktu: Cck Lalchhuanawmi


Zanin ang hian, lungchim takin ka thlîr thei tawh dawn lo.


Sava chiar nak nak thawmah harhin, khua a la vâr chiah lo.


Mau dang suih zumin, Sangha ka khawh leh a. Mau thei pathum siamin, pakhatah chuan tui in tur ka dah.


Lungalhthei ka pai phawrhin, mei chhemin, Sangha ka rawh leh a, Mau Thei pakhatah tlem azawng chhum lehin, a bak ka rawh leh vek.


Khua pawh a var ṭha ta a, Remlali kaitho.


Phak chuapin, meng mang hlei lo tê hian a lo tho a, "Vawksa", a ti chu, a rukin ka nuih rah rah.


Mang rama lêng chungin kan kal miah miah tho.


Muangchan a chi tawh lo.


"Awi, khi Pangpar khi a va han nalh tak", a kawhmuhna ka en chho.


"Nauban a nih khi, i hmuh fo kha", ka ti a. A ner sâwng.


Tui in lai emaw, Sangha ei lai chauhin ka chawlhpui. Chu pawh, "Ka tui a hâl", a tih emaw, "Sangha ei lawk ang, ka ril a ṭam", a tih azawngah ka chawlhpui chuang lo.


Sangha pawh, pakhat tê têin kan ei a, a ke a nat pawhin chawl hman kan ni tawh lo.


Zanah pawh kan kal a, ka paw(pua) tawp zel.


Yushuke thisen kai ka nihna ai mahin, Samurai ka nihna chuan min tikhauh a, min tichhel bawk.


"Mala, khawiah nge kan khua kha?",


"Hmar lamah kan awm alawm, kha kha khawthlang a nia. Zanah chauh kan lut ang aw".


Mei chhem a ngamawm tawh si loh, Haro-te hian ka awm hnai tih hriain, min lo pan zawk sela ka ti mang e.


Ka kalbo tawh hnuah, eng kim a danglam vek tawh dawn.


Lal Fanu leh Haro-te ṭangkawpin thuneihna an lo la tawh mai thei bawk. Chuti a nih vaih zawngin, hmabak a ko khawp ang le.


Remlali chuan min pawm chawt a, ngawi renga awm kan tan a ṭhat zia ka hrilh avangin a ṭawng lo.


A muthilh hnu rei vak loah, ṭawng bul bul thawm hi ka hria a.


Remlali kai thoin, "Bengchheng loin min lo zui rawh".


Thawmna awmna chu bawk vâk chungin kan pan ṭhem ṭhem.


Samurai panga vel an ni, pahnihin meichher an keng a, man an nei tlata ka hriat avangin, "Tah hian lo awm lawk rawh, ka rei lo ang", ka ti a.


Remlali chu bawkkhupa a beng hup tlat turin ka hrilh bawk.


Hmun zâwl vek a ni si a, lungpui emaw te chu awm se, a zia deuh tur.


Biru thei ang berin Thingkung phenah ka awm a, min kal pêlh lai chu ngun takin ka lo thlîr.


An mi mante chu Onu leh Date-te an ni.


Hnung lamah an awm tawh lo tih chian nghal vat vatin, Katana phawiin hnung lam aṭangin ka bei thut.


Inring hman lo an nih avangin reiloah ka tukzal thuai.


Onu leh Date an phuarna Thir chu ka sât bung a, "Akai, min ngaithiam mawlh teh", tiin, an pahnihin min kuah.


"Min lo zui rawh u".


Remlali chu bawkkhupin a lo la awm reng, a beng a lo hup ṭat, "Remi", a phu zuk.


"Tho tawh rawh", a mittui a tla zawih zawih. A darah kuahin, ka kâwngah min kuah tlat turin ka ti a.


Hmun him lamah kan insawn phawt, mei chhem ngam a la ni chuang lo.


Remlali chu ka mal chungah a lu nghatin a muhil a. Onu leh Date-te pawh ka titipui thei ta chauh.


Onu chuan, "Akai, Katana zawng tura i kal kha lo kal tir lo tawp che ila ṭha tur. Pawi kan ti, min ngaithiam hrâm rawh aw", a ti a.


Date pawhin, "Ni e, kan thiam loh a ni. Haro khan Daimyo aiawhtu i nih tur thu a sawi ṭhin a, chu chu kan duh ber pawh a ni. Kan Daimyo niha, min hruaitu turin kan duh che.


Mahse, Daimyo i nih hunah chuan hnuaichhiah taka min enkawl ṭhin tur thu leh, hamṭhatna leh hming ṭhatna te nangma'n i neih vek tur thu leh, kan Lal Fanu nena in inngaihzâwn thu te, chumi avanga Shogun hnen aṭanga duhsakna dawng bik i nihzia te a sawi ṭhin a.


Chumai bakah, nang hian min ngaitheilo angin min hrilh chamchi a. Chuvang chu a nia, Emperor leh Katana thawnthu kan sawi.


Khami zan khan Haro-an Shogun ei turah tûr a telh a, chu tûr chu Dragon thisen chauhin a that thei tih Khawnbawl-in a sawi theih nan Haro khan a tham bawk.


Haro sawi leh danin, hming ṭhatna i chan theihna a nih dawn phawt chuan, Katana leh Dragon thisen zawng tura i kal chhuah ngei tur thu a sawi a.


Lo dang tur che hi kan ni a, engtin nge Haro thusawi kan lo rin theih ka hre bik lo.


I kal hnu lawkah, Lal Fanu chuan Lal Ṭhutthleng a luah hmak a, Haro chuan Onu nen min tântir hmak bawk.


Kan hriat chhuah leha chu, tuna kan Lal Fanu hi Lal Fanu a ni lo, Dragon a ni!


Haro pawh Dragon tho, an pahniha Dâwi âtin kan awm a ni. Yushuke thisen an duhna chhan pawh, Yushuke thisena bet, Dâwi an duh avangin, chuvang chu a nia, Yushuke thisen kai nia an hriat chu an thah hmiah hmiah", a ti a.


"Kan Lal Fanu tak tak hi khawiah nge a awm ang le? A mak ngawi mai. Nge ni a, tuna Dragon hi Lal Fanu tak tak a lo ni zawk. Akai, zaninah min thah an tum a, i zarah nung damin kan la awm a, engtikah mah i ṭhatna hi kan theihnghilh tawh lo ang", Onu pawhin a ti a.


Remlali muhil thlêk vang vangin, ka hawi chhuak a, "Ka duhthu ngeia kal ka nih kha, a tir aṭangin ka hre vek alawm",


"I...i hria maw?",


"Hria e, Chhim lamah min kaltir phet in tum a, mahse; Hmar lamah ka kal ta zawk a nih kha",


"Engtin nge i hriat zawk a?",


"A chhan chu, Yushuke thisen kai hnuhnung ber ka nih avangin".


Onu leh Date awm ngaihna hre lo chu an ding leh zawt ṭhin a. An ṭhut hmun an siam rem chhen bawk.


"Eng, engtin? Nang, Yushuke?",


"Ka rin loh che u avangin Hmar lamah ka kal kha a ni a, kei pawhin chu hmunah chauh ka hria. Tin", Remlali sam hnawk hui ṭhain, "Hei hi, kan Lal Fanu Kyoko ngei a ni. Nausên a nih laiin Dragon nen sawn an thlak a ni".


Onu leh Date-te chuan zawhna min zawt char char a, keiin chhânna ka pe zel bawk.


"A nih, Katana i nei si lo, engtin nge kan tih ang?",


"Daimyo hnenah a awm, him takin a lo hawpui ang", ka ti a.


Daimyo dam thu an hre leh zel chu, tihngaihna hre loin an ngawi tawp tawh.


An ngawih vang vang hnuah, "Khuaa awm dan tur sawi phawt teh ang", Onu chuan a ti a.


"A rukin kan bei dawn nge?", Date pawhin a lo ti.


"Ni lo e, a rukin kan bei lo ang. Langsâr takin kan bei ang", ka ti a.


"Kan ring ang che, i thu ang zelin kan awm ang", an pahnihin ka hmaah, an khûp ding lama ṭhingṭhiin an kun a.


Zahna chibai min buk chu, "Tho rawh u, kan bulah Lal Fanu a awm a, a thu ang zelin kan awm ang", ka ti a.


An din chhuah hnuin, "Thih thlengin kan bei ho ang, tu mah inphatsan tawh loh tur", ka ti a.


A tuka Remlali tho chu, Onu leh Date-ten, "Lal Fanu, zing chibai. Kan zinga i awm ve avangin kan lawm e. Kan chungah zahngaihna lantir ang che", tiin chibai bukin, a hmaah an ṭhingṭhi a.


Remlali mak ti lutuk chu min lo en, kei pawh a hmaah ka ṭhingṭhi.


"Ngati nge, khatia in awm? Tho rawh u", mangang takin a ti a.


Kan tho a, "Mumangah ka la awm tihna chu ni lo tiraw?",


"Awm lo, Yushuke thisen kai aiin i pawimawh zawk. Kan Lal Fanu i ni a, tunah hian i mite'n an nghak che a ni", ka lo ti a.


Ngawi rengin a ding, "Lal Fanu, tunah hian kan kal nghal a ngai a ni. A bikin, Shogun nunna a derthawng", zah takin Onu chuan a ti a.


"Nangma'n hma hruai rawh", min lo ti a.


Onu leh Date-ten hma hruaiin, Remlali nen hnung kan dâwl.


Thil awm dan zawng zawng ka hrilh vek a, "Yushuke thisen kai awm nia an hriatna hmun an luhchilh mai ṭhin, Shogun fanu i ni tih hre tawh loin, Yushuke thisen kai emaw an ti leh che a, chuvang chuan thah che an tum an ni. A chhan chu, i nu kha min hringtunu lam hnai a nih avangin".


"Ka la hrethiam chuang lo reng reng",


"Hriathiam tum loin, a nihna ang angin i paltlang dun phawt teh ang", ka ti a.


Khaw thlen hma deuhin kan Hmelma thawm kan hre leh. A ruka min rawn bei an tum chu niin.


Chumi awmzia chu, zanina kan zawh hman ngei ngei a ngai tihna.


"Zanina kan tih tur kan tih ngei ngei a ngai",


"Akai, Yushuke Katana kan nei si lo, Katana chu awm se, Dragon hneh turin hun a duh rei lo ang mawle",


"Katana hian Samurai min nihtir em ni? Ni lo, thinlung khauh leh chhelhnain a ni Samurai min nihtir chu. Tunah hian Yushuke Katana kan ngai lo, Samurai kan nihna hmang hian kan bei ang a, kan hneh bawk ang", ka ti a.


"I thu ang zelin le", Onu leh Date chuan an ti a.


Khaw dâiah khaw thim hun kan nghak.


"Mala, kan thi dawn em?",


"Thi dawn lo, hemi bak hi chu hlauh tur a awm tawh lo ang", Remlali pawh a khawngaihthlak tawh lutuk.


Ka mit ka chhing a, "Mio, kan mamawh che", rilruin ka ko a. Kan awmna lamin ka hrilh.


A hnu rei vak lohah, Mio a lo thleng.


Min hmuh ve leh, "Unaupa", tiin, ka hmaah a ṭhingṭhi.


A darah vuanin ka kaitho, "I chungah ka lawm e", ka kuah vawng vawng.


Min venhimnan a nunna dinhmun derthawngah a dah a ni.


A bul aṭangin Ro kan rel ṭha.


Khua a thim fel ta a, Onu leh Date-te nen Lal In kan pan. Mio leh Remlali erawh, Lal In hnung aṭanga lut ru turin ka ti.


Lal In kawngkhar pawna vengtu ten min dang a, kawng min hawnsak duh lo.


Katana phawi thutin vengtu te chu ka vit tlang zawk zawk. Kawngkhar ka pêt hawng ṭhuai.


Lal In hung chhung kawtah intihlimna an lo nei, Lal Fanu chu Lallukhum khumin a ṭhu vâng a, Haro pawh a bulah a ṭhu.


Min hmuh chuan, "Akai, i thi emaw kan lo ti hman tawh asin", Haro-an a ti a.


Ka bula ding Onu leh Date-te chu hmuin, "Onu leh Date-te nen, khawiah nge in inhmuh a? Lo kal rawh u, Dawhkan hi lo kil ve nghal mai ta che u", Haro chuan No keng chungin min lo pan a.


Ka darah min kuahin, Lal Fanu ṭhutna lam min panpui, "Kan Lalpa nunna chhan nan Dragon thisen zawngin a chhuak a, mahse; kut ruakin a lo haw a nih hmel. A ni tiraw?", Haro chu a nui uar uar a.


Midang pawh an nui nasa mai.


Lal Fanu lo ding chhuakin, "Samurai Naomasa Akai, i tlai hret a ni. Tunah chuan, ka pa aiawhin Lal Lukhum ka khum tawh. Thuneihna ka kutah a awm ta a, i ṭhiante pahnih leh in chhungte nen, he khua aṭanga hnawh chhuah in ni. Ka pa nunna chhan theihna tur, Dragon thisen lah in lo hawn si lo", a ti phiar phiar.


"Lal Fanu hmaa ṭhingṭhi tur i ni asin", a ti leh.


Kei chuan, "Kei hi, Yushuke Thisen kai hnuhnung ber, Yushuke Akai ka ni", ka ti a.


Lal Fanu a tawlh hnung dawrh a, midang an phu suau suau.


"Chuan, Lal Fanu hmaah ka ṭhingṭhi ngei bawk ang. Lal Fanu dik tak hmaah chauh", ka ti leh.


Lal In kawngka aṭangin Mio leh Remlali an lo chhuak.


Remlali chu Kimono Hring Da lam hain, a samte chu nalh takin a inzial a. Lal Fanu Kyoko!


"Lal Fanu Kyoko", tiin, a hmaah ka ṭhingṭhi. Onu leh Date-te pawh ka bulah an lo ṭhingṭhi ve.


"Hei hi, eng nge awmzia? Dâwt muhlum mai mai kan awih in ring em ni?", Lal Fanh suak chu a au thlêr duai duai.


Dawhkana bungrua awm chu a hnawl thla rem rum.


Lal Fanu dik tak zawk ka en chho a, "That rawh", a ti chuan, din leh Katana phawi ka rual.


Lal Fanu suak chu a lo indang, Haro lo inrawlh chu Onu leh Date-ten an lo buaipui.


Lal Fanu suak chu a thinrim ka cho chhuak thei ta.


Dragon-ah a intichang ta nge nge.


"Nang hi maw, Yushuke chu. Ka zawnna che a rei tawh bawk a, khaw'nge, i han ti tak tak teh ang", a phit dut dut a.


Thla a nei si lo a, Rulpui emaw tihte a awl.


A siak chu lian tak a ni.


Thâwk a la a, Meialh phuh chhuah a tum tih ka hria, nghet takin Katana fawng ka hum.


Dragon-in mei a rawn phuh chhuak chiah chu, "Yushuke", tia Daimyo Takashi rawn auin, Yushuke chher hnuhnung ber Katana a rawn vawr phei chu ka lo man chat.


Chu chuan meialh lo kal chu ka lo indang. Katana fawnga Tlaizawng Par pathum intlar chu a êng vâ vâ.


(Naktuk zanah, Bonus aw. Zanin chu ka indaihlo deuh hlek:))