Katana

[Cck Lalchhuanawmi]

Katana
Bonus Chapter
Ziaktu: Cck Lalchhuanawmi


Chu chuan meialh lo kal chu ka lo indang. Katana fawnga Tlaizawng Par pathum intlar chu a êng vâ vâ.


Meialh tha chakna a nat poh leh, chu Katana tha chakna pawh a zual zel.


Katana fawng ka hum chiaha, Tlaizawng Par lo êng chhuah aṭangin ka taksa pum min fan chhuak vekin, ka thisen zâm zawng zawng neng, Thing zungin lei hnuaia an inṭai darh ang hian leh, Current hrui inthlunzawm ang hian kan inthlunzawm chhuak nghal vek.


Yushuke thisen kai ngei chu ka lo nih hi!


Dragon chuan min hneh ngang loin a tawp a, ṭawng chhuak lo mah se, "I taksaah Yushuke thisen ngei a luang a ni", a tih ka hre thei.


Rinku Dragon ang mai mai a ni dawn lo, "Ka chanpual i ni", a tih chu ka hre leh thei.


Dragon nen kan inbitum chawt.


Ka taksa aṭangin eng thil emaw tak a chhuak ṭhin a, phat rual loin Dâwi a ni tih ka hria.


Dâwi hmang thei mah ila, Dragon-in min hliam ve reng tho.


Min hliamna ai mahin ka hliamna a tam zawk ang.


Dragon chauh ni lo, Rulpuiah a intichang thei leh zel.


A inkual hru hru a, a lei sei zet chhuah zeuh zeuhin, Takashi, Onu, Date leh Mio ten Haro laka Remlali humhim tuma an inbeihna chu va panin, Remlali a vial tlum hmak.


"Keima'n", ka dang hlawm a, Haro thah ngei tumin an pan leh ta zawk.


Dragon pahnih, Rulpui pakhat maw ni a. Salaaa!


Epilouge...

Thinrimna nena Katana fawng a han hum ṭhat leh chiah chuan, Tlaizawng Par aṭangin nasa taka Dâwi lo chhuakin, chu Dâwi chuan Akai chu a hual vel a.


Rulpui chu pan hrau hrauin, Rulpui pawh a hmelma panin a tleng hnai hru hru a.


Akai chuan Katana han vai pawpin, Rulpui chu a lêng tawp a, Lal Fanu Kyoko chu a vai per lawp a.


Akai chuan pan vatin a kaitho a, Rulpuiin a rawn beih nghal mai avangin, Akai-an Kyoko chu a âwma nam sawn dawrhin, Rulpui a vai leh pawp.


Tun ṭum erawh, Rulpui tak ngei a khawih fuh tawh bawk a, Rulpui chu vial ngawih ngawihin thisen a chik chhuak puat puat a.


Mio koin, Kyoko chu a lo awmpui leh ta a.


Rulpui chu Dragon-ah chang lehin, Akai chuan, "Yushuke i hmachhawn mek a ni tih hre rawh, i duhâmnain mitthi khuaah a hnuk lut ang che", a ti a.


Malsawmtluanga pov...

Ka vawikhat vai-ah hian a thal tawp tawp a, mahse; a tlawm duh bau lo.


Haro an chai chau der tih ka hmuhin ka lawm. Rin aiin a fei reuh phian a. Chumai ni lo, Dâwi hrang hrangin a bawm khah(khat) avangin, ka tan tak hian a harsa.


Remlali, hmun himah a awm tih ka hre tawh bawk a, he hun chauh hi, Samurai Yushuke ka nihna leh Dâwi ka hman theihna a ni tawh.


Âm takin he hun hi ka hmang dawn.


Kum tam Martial Arts ka zirna leh, Khawvela Pakhatna dinhmun hauh mek ka nihna hman chhuah hun chiah a ni.


Ka khawhral phal mai mai teuh lo.


(An insual, an insual...)


A tua ve ve pawh chau tawh tak kan ni a, a tua ve ve mahin tlawm erawh kan tum nahek lo thung.


A mei(tail)-in min rawn vai a tum chu ka lo sat bung hmawk.


Na tia ruma a chalchang lai remchangah lain, a chaldarah tak Katana ka vit tlum hmuk.


Thlâ hrang hrang an rawn inhawr khawm tup tup ta mai a, Haro-a Thlâ pawh a tel.


Vawilehkhatah Katana ka phawi a, Dragon a puak darh, a nghawngah kan tlu dual.


Kan tho sang sang a, Remlali ka zawng hmasa ber, Mio-in a lo kuah a, a khûr hlawk hlawk.


"Remi?", a kut ka vuan a, nikhaw hre loin a awm zui.


Shogun pawh, Dragon a thih takah chuan a dam ṭha leh var tawh a. Lal Fanu Kyoko, a fanu dik tak a hmu leh phei chu, insût hlawp hlawpin a kuah vawng vawng.


Nikhaw hre loa awm a la nih avangin, pindanah Mio-in a lo awmpui.


Takashi, inbeihna hmuna a bo daih chhan chu, Mio unaupa Dragon-in a lo hruai chu niin.


Dragon awmna hmunah a lo hruai a, anmahni Dragon hoin Yushuke Katana chher hnuhnung ber an lo kawl.


Ka pa pa aṭanga chhiara sawmnain a lo kawl tir daih.


Shogun-in Takashi a pawh a kuah vawng vawng.


"Lalpa, hmelma ten min hual ṭhup a, zaninah ngei pawh hian min lo ṭhawng thut thei, awm mai mai thei kan ni lo", Takashi chuan a ti a.


Onu leh Date-te pawhin thil awmdan an hrilh zung zung a.


Takashi-an, Yushuke thisen kai hnuhnung ber ka nihna te, Lal Fanu hruai hawtu ka nihna te chu a sawi leh zel a, Katana pawh Shogun chuan a en.


"Ka Samurai-te zingah Yushuke thisen kai an lo awm reng a ni maw? Lo kal hnai teh", kun chungin ka kal hnai a, min kuah ve leh.b


Lawmthu a sawi mawlh mawlh bawk.


A hnu deuhah, "Takashi, engtin nge kan awm zel ang?", Shogun chuan a ti a.


Hmelma tukzal an la nih loh avangin a hlauthawng tih ka hria.


Takashi chuan, "Lalber, kan hnenah Yushuke a awm hi, he thil hi chu a kutah i dah hmak teh ang", a ti a.


Min lo en a, "Lalber, ka kutah dah rawh", ka kun zauh.


Lal In chhuahsan hmain Remlali ka hmu leh phawt. A lo la harh lo. Mio chu a rukin a lo chhuak daih tawh.


Takashi, Onu leh Date-te nen khua kan chhuahsan a, Hmelma awmna aṭanga hla vak loah dingin, kan paliin kan haw haw.


Tlem viau mah ila, awmzia a nei.


Anni meichher nen kan inhmachhawn ta ran hlawm mai.


Dragon bei zo chiah kan ni a, hliam kan nei bawk nen, chau tak kan ni. Mahse, ṭawngkam khat lek hmangin kan hnawt bo dawn.


Thâwk lain, Katana ka han chawi sâng vah a, Tlaizawng Par pathum êng chhuak chu an hmu rang khawp mai.


An phu mur mur, "Kei hi, Yushuke Akai, Samurai Yushuke hnuhnung ber ka ni", ka tih zawh rualin, Katana chu boruakah vawikhat na thei ang berin ka vai pawp a.


Hmelma ngir khup chu an meichher chawp chawpin an tlu fai vek.


Ding zawnga vai ka ni a, vei lam zawngin a vawikhatna atan ka vai leh.


A rang a ranga an insaseng chu kan thlir a, Onu-an, "An ṭhahnem tehreng nen, an va dawih em!", a ti a.


Kan hnungah Mio leh a unaupa lo dingin, "Lungngai suh u, Dragon chanchin chu Thawnthuin a kal zel tawh ang", ka ti a.


Katana pek kir ka tum a, "Unaupa, Yushuke hnuhnung ber i ni tawh a, ngun takin i hun ngaihtuah ang che", Mio unaupa zawkin a ti a.


Thlawh chhuah tumin Dragon-ah a chang.


Mio hnenah, "Unaunu, khawngaihtakin thil pakhat ka dil thei che ang em?",


"Eng nge ni ta?",


"Ka farnu angin i la awm zel thei ang em? Kyoko bula awm turin ka duh che", ka ti a.


Unaupa Dragon nen an inen, "Aw le, unaupa, i duhdanin le", a ti a.


Unaupa Dragon nen chibai inbuk nan kan lû kan inbuk khum tawn. Min thlawh liam san ta a.


Dragon chanchin chu, Thawnthu angin a kal reng tawh ang!


Malsawmtluanga aṭangin Naomasa Akai, Naomasa Akai aṭangin Yushuke Akai ka lo ni ta.


Ni hnih hnuah Lal huanah Remlali nen inhmuhna hun kan nei hlauh.


Ṭhutthlengah a lo ṭhu a, "Lal Fanu", tiin a hmaah ka kun. Ka hawi chhuak a, Remlali hmel chu a dâng bel mai.


"I dam maw?",


"Katana kan hmu let tawh a, kan la haw thei lo em ni?", a âw a khûr a, tihluihna hmanga ṭawngtir a ang ber.


Kan pahnih chauhin kan awm, "Têt laia Lal Fanu nih kan duh theih tehreng nen, Lal Fanu ka ni chêng a, jail tâng chiah ka niin ka hria. Ni hnih chhung lekin mahni duhzâwng pawh kan ti thei lo.


Tih tur leh tih loh tur a tam lutuk a, thluak a tibuai thei dawn alawm. Ṭhut dan tur te, ṭawng dan tur te, chaw ei dan leh tui in dan tih neuh neuh a tam lutuk.


Dragon nena insual aiin ka chauhpui daih zawk. Lal chhungkaw inrelbawl Dan ka zir mek, a har a nia aw.


Mio-in Japan ṭawng min zirtir a, tunah chuan ka zia tawh lutuk. Haw thuai thuai a, ka chhungte bula awm ka châk tawh", a mittui tla a hru zeuh.


Katana kan nei tawh a, kan la haw thei si lo.


Haw theihna kawng a awm ngei a, a kawng kan hre lo mai a ni.


Mio lo kalin, "Lalberin a hmu duh che", min rawn ti a. Remlali nen kan kal. Daimyo Takashi, Onu leh Date-te pawh an lo awm tawh.


Shogun vei lamah Lal Fanu Kyoko chu a ṭhu a, a mita en chu sawi loh, feet khata hnaiah pawh kan hnaih thei tawh lo.


"Akai, Yushuke thisen kai hnuhnung ber i ni tawh a, Yushuke Chi(sperm) a tawp mai ka phal lo. Takashi nen kan lo sawi dun tawh a, a fanu nen ni thum hnuah in innei ang. Min hnial tur a ni lo", Remlali ka melh zauh.


"Lalber, min Chawimawina leh Duhsakna avangin lawnthu sawi sen loh ka ba a ni. Ka hnial lo ang che", ṭhingṭhiin ka ti a.


Ka hawi chhuak leh tawh lo, "Lalber?", Remlalin a han ti a. "Nang chu lo ngawi rawh", Shogun chuan a ti dam dup a.


Remlalin, "Ka tihpalh a ni e", a ti leh.


Chumi chin chu Remlali nen kam inhmu leh tawh lo.


Khua hi a har veng veng, Mio hian a awmdan min hrilh ṭhin a, "A ngai thei lutuk che, tlanbo te a tum a, mahse; ka dang hram hram a ni. Tuna khawvel leh in pahniha khawvel a dan(dang) thu a sawi ṭhin. In khawvel aṭangin tuna khawvelah in lo kal tiin a sawi a, tak tak em ni? Khawvel pâwn aṭanga lo kal in ni maw?


Kan Khawvelah kir thei loin, suihzawm ni ngai dawn lo pawh ni ila ka vui lo. Mahse, Kristian kan ni a, Kristian Dân loa nupui a nei tur hi ka ngaingam lo a ni.


Samurai leh Lal Fanu an innei thei si lo, nupui i neih chuan a dam lo zualin ka ring".


Mio nen hmaichhana inbia kan ni chuang lo, chhungril aṭang hian kan inbe thei tlat, Dragon hoin Dâwi min pek vangte pawh a ni ang!


Daimyo Takashi fanu nen kan inneih ni a thleng ta a. Nupui neih ai mahin, Remlali hmuh theihna hun a nih dawn avangin ka nghakhlel.


Ka hmuh hnuhnun ber aiin Remlali chu a dângin a cher em em a, Thlarau ruhkawl hlang hi a ni tawp.


Biak duh mah ila, kan biak phak a ni si lo.


Kristian Dân loin nupui ka nei dawn a, hreawm ngei mai!


Shinto Inneih Danin kan innei a, Puithiamin Khuanu hnen aṭangin kan nupa tan Malsawmna dilin, Sakaki Thing Thianghlim thingzar min pe ve vein, No tê tak têah Buhzû thli chhuakin, No thum kan in a.


Tichuan, inneihna a zo chu a ni mai.


Zanah, Mio hnen aṭangin, "In inneih hunserh chhung zawngin a mit tui a dang char char. Kan kalsawn chiah tihah nasa takin a ṭap a, vawikhat tal chu lo bia la", tih ka dawng.


Kan inneih zan a ni a, nupa kan nihna ka nemnghehpui hnuah pawnah ka chhuak a, ka tei ka tei.


Inneih hi ka duhdan a ni bik lo, buaina bul ber leh chinfel ngai ber zawk chu, Yushuke thlah kaltir zel a ni tlat.


Remlali a muhil dawn lo tih ka hriat avangin, mut a chhuak thei hlek lo.


Engtikah tak, haw thei ang maw?


Yushuke la dam ka awm tih an hriat avangin, Remna duhin Lal dang an lo kal sup sup.


Samurai zingah, Daimyo Takashi aiawh ka ni ta mai a. Ka chungah amah Takashi chauh a awm a, a ni mai.


Kum khat hnuah, fapa ka hring ta a. Shogun chuan ruai nen min lawmsak.


Yushuke thlah a kal zel ang a, a boral lo ang!


Ka fapa kum thum a tlinin, Katana fawng ka hum tir a, Yushuke thisena bet Dâwi ka kawltir bawk.


A zawng zawng chuan kan inhlan lo a, a hman dan a thiam chhoh ang zelin, Dâwi pawh a pung ve zel.


Remlali nen a fala inbiakna hun nei tawh lo mah ila, Lal Ina kal apiangin a rukin ka thlir ṭhin.


Pawm thiam bak tih tur a awm si lo, amaherawhchu; induat nachang hre tawhin, hlimna tur a zawng thiam tawh a, chu chuan min tilawm a ni.


Ka fapa tan lehkhathawn ziakin, a nu hnenah, "Kum sawmpali a tlin hun nghak zo loa ka lo boral a nih chuan, he lehkhathawn hi lo pein, lo chhiartir ngei ngei ang che", ka ti a.


Dragon nena inkungkaihna kan lo neih dan te, Emperor-in Yushuke thisen kai zawng zawng a thah karah, Yushuke boral loa kan la dam ve ṭawk ṭawk dan te nen ka ziak a.


Dragon chanchin erawh, Thawnthu anga kaltir zel turin leh, kan inṭhianṭhatna thup tlat turin ka chah mawlh mawlh.


Mio chungchang ziah lan a chi loh, amah Mio ngeiin hrilh rawh se.


Yushuke thlah a boral loh nana a pawimawh dante nen lam ka ziak a. Hun dang aṭanga kal ka ni tih erawh ka ziak tel lo.


Zawi zawiin Martial Arts ka zirtir a, kum nga a nih chuan, duhtawkin thing aṭanga siam Katana a vai thei tawh.


Tukṭhuan ei laiin Remlalin min lo tlawh, ka fapa tan Hakama a lo keng a, amahin a haktir nghal.


"A falin kan inbe thei ang em?",


"Thei e, Lal Fanu".


In hnungah kan pahnihin kan awm a, sawi tur a vâng ngei mai.


"Inhmuh loh kâr a rei thei ngei mai", ka ṭawng chhuak hmasa a, a nui sêih.


"Lal Fanu ka ni tih min hrilh daih tawh la chu, Ramhnuaia kan awm lai khan min hnutchhiah turin ka ti ang che. A nih loh pawhin, min lo zawn leh theih nan ka tlanbo mai thei a ni", nui ver verin min lo en a.


"A pawi miah lo ang", ka lo ti .


Min nuih sen sen. Remlalliani ni loin, Lal Fanu Kyoko a hmuh theih.


"Kan thih hnuah chauh he hmun aṭang hian kan chhuak thei dawn a ni ang. Chuti a nih chuan, kei pawhin pasal ka neih ve ngei a ngai dawn tihna a ni a", a hmel hlim tak chu lungngaihnain a inthlak thuai.


"Chuti a nih chuan, chu hunah chuan kan pahnihin innei ve tawh ila", ka lo ti a.


Nui sen senin, "Thil ni lo lo sawi suh", a ti sep.


"Hei hi", puana intuam hi a phawrh chhuak, "In inneih nia pek che ka tum vei nen, ka thei thlawtlo a ni. Katana tê chi a nih hi", ti pahin a tuamna a phelh.


Ka hmuh chuan ka nui hak, "Wakizashi ti ve mai la", ka ti a.


"Ni lo e, Katana a nih hi. I Katana ang chiahin a fawngah Tlaizawng Par pathum ka tlar tir. A ruka ka chhertir a nih kha, inneih thilpek atan", nui sângin a ti a.


"Lawm takin ka pawm e, Lal Fanu, ka chunga i ṭhatna avangin ka lawm lutuk e", kun zauhin ka ti a.


Katana chu lawm takin ka pawm.


Ka fapa leh nupui hnenah hrilhin ka hmuh ve.


"Ka pa, a pâi aṭang hian ka phawi dawn asin?",


"Ngawi rawh, i pa pawhin a phawi chhuak bik hleinem, amah kha phawi tir rawh",


"Ka duh alawm", ka fapain a ti tlat a.


A nu pawhin a hnial hneh lo.


Ka fapa chuan muangchangin a phawi ta a. Khaw hmuh vâi leh ruai ruaiin, ka bing leh mup mup.


A tawpna tur a ni tih ka hrethiam.


Vawilehkhatah mitsulhin, ka harh chhuaha ka hmuh hmasak ber chu inchung var pup.


Thawh ka tum a, ka nâk a rawn na zawk.


Ka lu a intuam tih ka hre leh zel a, ka bulah mi ṭhahnem tak lu tuam emaw, kut leh ke tuam an mu bam hlawm bawk.


Male Nurse-in min rawn pan, mu rih turin min ti a, thil awmdan ka zawt nghal chung chung.


"In thlawh chhuah hnu lawkah in accident alawm, thi an awm lo a, hliampui tuar in awm lo hlauh bawk", a ti a.


Male Nurse chuan, khum hnuai aṭangin eng thil emawni a rawn la a, "Hei hi, i hum tlat a, kan laksak thei hram che".


Remlalin Katana tê chi min siamsak ni rengin!


A fawngah Tlaizawng Par pathum a awm, ka phawi a, engtin mahin kan awm tawh lo.


Kum sawm dawn chu kan awm thuak ang, "Vawiin hi ni engzat nge?",


"In accident aṭangin darkar nga a liam chiah. I chhungte an rawn thleng ṭep tawh ang", Remlali, ni tak e.


"Hmeichhia leh naupang khawiah nge an awm?",


"Room piahah", hriau ka phawi, "Sir, i chhungte an awm a nih chuan sawi la, ka lo zawn sak ang che",


"Ni lo, keimah ngeiin ka zawng dawn", Katana kengin, ka nâk na lai dawmin ka chhuak a. Ka kal kun bâwi bâwi.


Hmeichhia leh Naupang awmnaah ka kal a, Remlali reng ka hmu lo.


Ka hmuh apiang ka zawt a, a awmna chin an hre lo. Amahin a chhuak thei lo tawp ang.


Nge ni a, hun kal tawhah te hian a la awm reng zawk? Katana phawi laiin a awm ve lo tak e.


A ni thei lo.


Katana chu ka phawi ka phawi a, eng a ang thei lo. Min zuitu Male Nurse hnenah, "Hemi lo Katana sei in hmu tel em?", tiin ka zawt.


"Hmu lo, khami chauh kha", a ti bawk si.


Mi an phut mur murna karah, ka mi zawn ka hmu thei lo.


"Remi? Remlal?", ka ko ta ngawt a, hmun tinah ka zawng.


"Remi?", tha tawpin ka au rawng rawng. Ka rualin a rawn chhuak tur a ni ringawt.


Beidawn tawpah, "Mala?", tih thawm ka hre ve leh ta. Ka thaw a veng huai huai. Remlali âw lo chhuahna lamah kalin, ka ko ve zel.


Kan.pahnihin kan inau tawn a, a tawpah kan inhmu thei ta nge nge.


Ani pawh, a lu an tuam, a ke dinglam a bâi deuh bawk a, a bak chu a ṭha vek. Hun kal tawhah boruak dang uapna hnuaiah kan awm rei lutuk a, kan inkuah vawng vawng.


"Kan chuanna a chesual hi ka ring thei lo, kum tam tak a liam a, hetah chuan ni khat êm pawh a liam lo reng reng. Engtin nge kan lo chhuah theih le?", Katana ka hmuh a.


"Hei vang hi maw?",


"Ka fapa khan a phawi a, Thlawhnaa Katana i phawi a kan awmdan ang chiahin ka awm a, ka rawn harh chhuak hlawl",


"Ni maw? Kei chu, khatia kan haw kha Dil-ah keimahin ka kal a, kotlangah ṭhuin ka ke ka.chiah. Chuan, a mak lutuk, Dil chhunga Lotus Parin ka mit a la tlat a, ka tho kha inrappialin ka tla a, ka harhin hetah ka lo awm reng. Ka va han lawm tak", ti leh mawlh mawlhin, kan inkuah leh vawng vawng.


Katana min chhersak har mah mah a ni.


Mahse, a hun takah a che thung.


Tihi chuan, tu te pawh kan hlim tawh ang.

*** A Tawp Ta E***