KINDER JOY chapter - 14

[EmilyPachuau]

Kan exam zawh hnu kar hnihna ah Bangalore lam panin ka chhukthla nghâl a,ka nute min thlah buai ngailo in,u abra chuan an car in Lengpui thleng min thlah fel thlap a,ka kal hma kha chuan

"Ka ngai duh che ang em le"
A ti a tia,ka kal dawn tak tak kha chuan a pangchang thar leh vel a,mipa zawk si khan bottle chhin pawh a hawng thei ta lo vel a,ka nuih a ti za ru khawp mai.

A mah vang liau liauin saii min thlah tum ruh em em pawhin min thlah loh phah a,min tlanbo pui daih kha ka hlau ru lutuk ringawt.

U rinpuia pawhin min lo text ve zuau zuai ṭhin a,mahse ka reply ṭha ngailo,beiseibo beisei tura siamtu nih ka duh lo,

"Ngai dawn e" tih pahin ka mit sir ralh a

Nuih pawh a nui ṭha duh tawh lo,car te chu a khalh muang luiin ka hria,min tih muangchan theih dan tûr hlirin a che nge ka ngaihbel ka hrelo,a zung sek a,a châng leh motor check a ngai tiin min chhuk san leh daih a, Phunchawng leh RV inkarah ringawt pawh vawithum kan ding hman.

Tiang rêng rêng chuan Lengpui chu kan thleng thla ve hlawl mai.

Gate ah chuan a mah en kar pahin

"Min ngaih ai a hlauh i nei em" ka ti a,sweet deuh a min chhan ve ka rin vang a ni pakhat bawk

"Merry go round a chuan a nimai"

A ti leh daih,in la zei fu si hi tinge a chhaw rûk huih le

"Heiham" tih deuh vak pah chuan ka ban pahnih chu ka phar a,min lo kuah ti ila pawm nghâl chat

Ka beng bulah

"Kal lo mai rawh" a ti sât sât a,a ṭawng zawi viau nain ka hre fiah khawp mai.

A lak aṭang a inla hrangin a lu ah chuan ka dawm a,ka chhoh en ha bawk

"Min lo nghak hram hram rawh,thlahnih chauh alawm,lerh lo la,min biak theihnghilh lo la,min hmangaih nitin rawh"

Ka tih leh chuan

"Ka thu thu" tih pahin a inla hrang ta daih

A thusawi vanga ka rilru ka thlâk a beisei,a beisei ang nilo a ka ṭawng daih vângin a titau reh tawh sa a rawn kaitho leh a ni ringawt

"Bye aww" tih pah a ka luggage ka hnuh dawn chuan,ka ban a vuan pahin min kuah leh vang vang a,ka rim chu a hnar a chân hlen tir tum ni âwm takin ka dar zâwnah chuan thawk a la leh vang vang,a duhtawk a rei min kuah hnuah ka chalah chuan a lo fâwp leh zauh a

"Ka lo nghak reng ang che"

A ti leh,kum chuang inhmu lo tur ang chiah hian han awm vêl a,ka nui lui hram hram a,kalsan chu ka hreh ve khawp mai,kan tân vek tiin ka infuih leh a,ka kalsan ta.


Airport kan pel chiah kha ka ngai nghal ngawih ngawih,a mi uapna kha ka kham lo,ka mittui a luang a,ka bula ṭhu ten an hmuh loh nan tiin tukverh lam ka hawi tlat,pawn lam erawh ka en lo thung,van boruak zau leh thiang,hmuhnawm takte ai chuan ka mitthla a u abra hlim hmel leh ka bula a awm a a chetla lo langte hi a hmuhnawm daih zawk.

Ka bula a insiamrem zung zung ṭhin te,ka laka a nem bik ṭhin te,midang bula a tihlan duh miahloh a naupan chhiat rûk riauna a phawrhchhuak ngamte,midang tan a biak hlauhawm hmel khawp a men lai a dam thlup a min en ṭhin bik te hian Special ta riau ah min inngaih tir ṭhin.

___________________________________________

Bangalore ka awm tirh karhnih vel chu chhumlo chat loin zantin kan inbia a,text a ngaina lo call kher emaw video call kher a duh ngei ngei ṭhin,mah se karhnih hnu aṭang khan a mah ah danglam a awm tlat a hriatna ka nei,
Kan inbiak phei chu kan ṭhulh pawh a nilo,a zia a zawi a,min hmuh a a hmel nung sarh kha a reh tial tialin ka hria

A chhan ka zawhin engmah a nihloh thu hlirin min chhang a,a chanchin ka zawh a sawithui tur a neih ngailoh nen ka chanchin ka sawi chuan a ngaithla kham thei ngailo

"Chuan engtin" a ti char char zêl.


Nikhat kha chu min be lo nileng a,a buai ve ah ngaiin ka be ta bik lo,a tûk a ka va morning na a reply loh pawh ka hrethiam,zan thleng pawh a min lo ka biak loh cheu a vangin ka va call ta nge nge

Mah se lo pick up tu chu hmeichhia a ni daih

A rawn hello puam ṭalh a

"Tunge ka biak ka ti nghâl"

"Sawmi, tunge ka biak"

A rawn tih zui leh chuan,

"Ka hming a in save kha han chhiar teh"
ka tih leh chuan


"A in save lo a,i âw aṭang chuan tluangi i ni em"

A rawn ti leh a
Ka hrethiam lo, engtinge min hriat

"Aw, engtinge min hriat,khawnge Abrahama"

Ka ti chang ta fak mai,min bawk kual mai mai a nih chuan a chaklo ngawt ang.

"Ka bulah a mu,i bul aiin ka bul a mut a nawm thu pawh a sawi asin "

Tih pahin a nui sak a
Ka hmelhriat pawh ni hlei lo in a chutia mi rawn ti nghal thawr chu a mak ka tih piahlamah ka hrilh a,ka thinrim vang a niang ka thin te hi a sawt chhuak daih dawnin ka hria

Ka ngawi char char a,

"E lawks" tih pahin a ri deuh bawrh bawrh

"Abby,abby" tih pahin a bul a mu chu a ben harh tumin a ban velah a beng dat dat a ni maithei a thâwm aṭang chuan

"Umm" mipa âw in a tih leh chuan

"Ka bula mut hi a nuam i ti ber tiraw"

A tih leh chuan mipa âw bawk chuan

"Umm a nuam ka ti" tih zawng a sawi.

Umm u abbra âw ngei a ni,ka chiang khawp mai,mah se rui chu a ang,a ṭawng phual phual mai, tinge a ruih?eng nge a hriat?harsatna nge ka tello in nuam a chên?nilo ka ngaihtuah tawh tur a nilo,ka tello in a hlim tih a lantir a nih hi.

Sawmtei inti bawk chuan

"Hmangaih ber chân chu eng nge a an?"

A rawn tih leh chuan,dang mai ka tum tawh lo

"Ka hmangaih ka chân rêng rêng lo,ka buaina i la kiam zawk a nih kha"

Tih pahin phone chu ka dah hmak~

Ka khumah chuan ka mu tawp,sana ka en a zan dar 10 em pawh a la nilo asin,ka kal aṭang thlakhat êm pawh a la ral lo asin,min lo nghâk ang i ti sia,tinge i hlen ngamloh tur thu min hrilh mai le,ka mitthlaah a hmel a lo lang zut zut a,ka mittui a luang ngiai ngiai mai.

Tinge ka vanduai em em,ka hmeichhiat puite hnuh hniam hian tinge ka awm fo?min Hmangaih miahlotute hi tinge ka lo chelh leh ṭhin

U abra engkim a tâwp tihna tiraw?
Bul kan ṭan ang nga,kan thawnthu phêk pawh keu tham a tling ve dâwn chauh asin,tinge a tlar tâwp êm pawh kan khar hma a thawnthu dang a a changtu nihna mi chan san le?

Luahlan ka awl viau em ni?Keimah ah hian kim lo a awm zâwk em ni? U abra i chhan sen ngailoh tur zawhna tam tak ka thluakah hian awm mek asin, chhâng tur erawhin ka phût lo che.

U Abra number chu ka block a,ka delete a,a thlalak ka neih erawh ka delete phallo,haw em em chung siin 'thut' emaw 'palh' a awm hlauh tâkin tiin ka dahṭha kiau a,ka rilru chuan haw hle mah se ka thinlung zâwk hian a huat hma hauhin a ngaidam si.


Cont.....