KINDER JOY chapter - 17

[EmilyPachuau]

U abra pawhin ṭhat lam a pan a,buai neuh neuh leh han ruih sual a,phone a min rawn phun khum bual bual châng chu nei ve mah se,kan kar ti chhe pha khawp a buaina erawh kan nei ta lo.

Phai ka awm lai a min lo call tu Sawmi inti kha,a ruih lai remchanga la in keimah angin u abra rui, harhfim mumal lo bulah a lo insawi a ni âwm e,u Abra'n sawi fiah tum viau pawh nise ka ngaithla zawm duhlo,hmeichhe dang bula a awm tih ka hriatna khan min ti na.

Training zo lo ta na na na chu inah ka awm deuh tawp a,in enkawl hi ka tih tam ber a nimai. U Abra'n min lo rîm zeuh zeuh a,mah se a pawi tur angin kan awm ngailo,ka duhthlanna min zah sak thiam a,chu chuan ka rilru a hneh a,a mah a ka intulut telh telh a,min paihchhuak te a nih loh chuan ka thu chuan chhuah tumna ka neilo.

A ṭawngkam a thlum lua lo a,a kamchhuak erawhin min hneh viau tho mai,kan kar a hmangaihna hi hruihrual nen a tehkhin ka phallo a, pangpar nen a khaikhin pawh ka phallo, hruihrual pawhin chah hun a nei a,pangpar pawh a chuai ṭhin si..

Kumkhua leh chatuan kan daih dawn em ka hrelo a,chuvangin a tâwp hma loh chu niin kan inkar thu chu ka sawi ṭhin.

Harsatna tawk lo kan nilo,kan tawk lutuk zawk,chuta pawimawh ber chu inrintawnna hi a ni,mahni na hmulian lo ila,thup chin erawh nei mah ila lanchhuah hun awm se,thu haw lam leh kal lam hrelo leh bangbo lutuk a inkalsan ai chuan,engkim hria leh nat huam pawh a in mangṭha chu a la ṭha zâwk fe si.

Vawikhat u Abra lo lêng chuan

"I bialpa hlui kha i ngai ṭhin em?"

A rawn ti hlawl a,ka ngawih deuh vang vang hnuah

"A tîr te kha chuan ngai ve ṭhin e"

Ka ti a

" Anih tunah?"

A tih leh chuan

"Ngai mai mai lo, chutiang inzawh tlâk pawh anih loh chu"

Ka ti hlak hlak a

"Nia,ngai duh suh,innei pawh ni ula naute hmelṭha deuh kha a neih pui thei chuanglo ang che" tih pahin a nui deuh hak hak a

A nui ri hi ngaiah ka nei theilo,a ri a mawi ka ti,a ṭhiante bulah pawh tiang hi chuan a nuih tam ka ring lo.

Eng eng emaw kan sawi a,min rawn hnaih telh telh a,ka che sawn eih lo,a tih tum ka hria a,ka hmui ka lo dawh lêt zâwk

Ka hmui a lo tawk a,rei pawh kan hmui a insik hma in,ka phai awm lai a sawmteii bul a a lo awm kha ka hrechhuak zawk,ka thinrim ṭha leh chuan a chhîp sam chu theihpatawpa na in ka ṭham vak a,sâng zâwk e tilo chuan a dâk ve deuh awrh mai.

"Kha kha ngatan nge?"

A rawn tih chuan

"I lerh man" tih chauhin ka chhâng a,a ngaihna a hriatloh hmel khawp mai.

A meng kual hrek hrek a,ṭhutthleng sir a a guitar dah chu ban in,hla min sak san ta daih.

"Sakhmelmawi ṭhasensiari
Lamkawiah dar ang intawnni
A her dawn loh ai chuan,
Chhuihthangvala lunglenna
Buannel ram dai mahte'n
Ka ṭuan ngei ang"

A tih te chuan,

Tinge maw ka thinrim châk thut

"Hmeichhe dang ngaihtuah paha sa i nih chuan ka ei zo nghal vek ang che"

Ka ti thla ve ringawt

"Ka hlau lutuk" tih pahin a kut te chuan an lo inhliahkhuh vel a

Tinge maw keimahah hian setana a chêng ang tlat a hriatna ka nei,ka thinrim châk et et u Abra pawi sawi ka duh

"Ka pawi sawi teh,insual ka duh" nui miahlo a ka tih chuan

"Tinge tikhan i awm a,i period dawn a mi?"

A rawn ti heu

Ni tak,ka period a hun ṭep tawh,keiai pawhin ka period hun a hre tawh zâwk,

"tunkar chu setana ka be leh dawn anih hi,ka bialnu ka van ngai lâwk tak" tih pah chuan ka dârah a rawn kuah vei thlup a

"Thlatharah ka nu te an lo haw tawh dawn asin,mami te pawh an lo riak phei ang ka ring"

Ka tih chuan

"Thlaleh leh pekah palai ka lo tir ang"

A ti ringawt,a chhûngte nen pawh kan la inhre mumal lo a

"Ngawt a che,inchhungkuaah i thu lo ber,Fian dahna sawn i rawt pawhin an phallo an ti"

Ka tih leh chuan

"Ka uang hleinem,nupa nih ka châk tawh,pasal neih i duh hunah meuh chuan,i thi a hul tawh ka ring"

A lo ti ve nghal zat

"Nangmah fe,nupui duh hun a neihloh avânga boral ta ka la hrelo,min nghâk hle hle la nimai"

Ka tih leh chuan ka chalah a rawn pen ri kauh a

"Hmui ferrari"
A ti sap bawk

"Min neihloh chuan i nuamsa lo ang"

A rawn tih leh chuan a fiamthu tih hre tho mah ila ka na zawk mai,a tello a awm theilo turah min ngai viau amawni

"Tuna i ṭawngkam kha lem thei la chu khâ i ti ngawt ang"

Ka tia ka ṭah a chhuak leh daih.

Min thlem nan a Jacket ipte,ṭhutthleng nghenchhana a dah chu a dap rawk rawk a,kinder joy a lo phawrhchhuak hlawl mai.

Ka rilru na zuai pawh kha a dam leh nghal vek.

Min tih thinrim phawt a min tih lawm leh hi a thiam em em a,ka ngei ṭhin,ka chaklohna lai a hre lutuk hi chu.

Kei ve ka tih thinrim chuan a titau char char a, text a a tihtauh te hian,zanah a lo lêng thut a,a hnungzâng te min malis tir a,a tihtauh a reh hma chu a thu thu a awm a ngai ṭhin.

Tiang rêng rêng chuan nî kan vûi zo a,intitaurau reng chung hian kan induh khum tak tak theilo.

Vawikhat pawh
"Nangmah chauhin i awm ṭhin sia,i khua a har thei si ran vulh te i duh lo a mi?"
A ti ve ngei a

"Zawhte leh uite hi ka ngaina tawp mah se uite chu hmânah kan nei a a thi daih a,ka nei duh tawh lo ka ṭap nasa lutuk a bâkah zawhte chu allergy ka nei sia"

Ka tia.

A tûk zanah kawngka a rawn kik ri dawt dawt,ka va hawn sak chu,percel lian deuh chhunga zawhte no 3 leh a pui rem lo deuha lo bawk rûn hi a lo pawm niin,ka hahchhiau nghâl tuar tuar,

"Tinge hei"

Ka tih chuan

"Aw i khua a har sia"
A lo ti fel et

"Ka allergy tih ka sawi tel kha,min thah i tum a mi"

Ka tib leh chuan

"Wow,ka chhiartel hmaih a nih chu,tikhan lo la mu suh,ka ṭhianpa te ta ka rûk sak ve che sia,i duh silo a ka va dah leh nge,zawhte leh nula te chu rûk thiang"

Tih pahin a car lam a pan nal nal,a va han chhaw chhah ve tak,

"Fîmkhur rawh"

Ka ti zo chiah chu min lo en let pahin
"a dawtah chuan nangmah ka ru ve tawh ang che"

Inti sawi ṭha fe a a sawi zo a inher chu a car ah a khup a tauh ri deuh bur.

Hei ham,khua hi a var lo a ni e.


Cont....