KINDER JOY chapter - 19 last chapter

[EmilyPachuau]

U mami te boralna pawh thla tam a tling ve ta,kan ngai em em a,an tello khan kan awm theilo a nilo,inhmu tawh ngailo tura an reh hlen ta vâng vang mai hi a hrehawm kan ti tlâng ṭhin khawp mai.

Engkimah u abra chungah kan lawm chhungkua a, mâkpa em nilo mah se mâkpa ang maiin a awm thiam a,over silo khan min va han chhawmdawl hneh tak em.

A ni nen erawh khuanu zarah kan tluang ta reng rih mai a nih hi. Bawihtei chu nu neih takah min nei ka ti dawn nge ni,min ban deuh chawt a,a pa lama a chhungte pawh an lo inlan chhâwk ve reng ṭhin,kum a tling ve ṭep tawh a,duh leh duh loh a hria in a ṭahbelh thar leh te chuan an châng chuan hrehawm min tih tir ṭhin,mah se a nu aṭanga kan neih awmchhun a ni a,duat rawn a ni bawk a,kan hau phal ngailo,a bawhvah theih tirh phei kha chuan pawi awm zawng zawng a khawih phâk tawh phawt hi chu a khawih chhia a ni ber mai.

A pi leh pute hian rangkachak cheiin an han chei pek bawk a,a zân mu duh lo suakbak tlema na vak lo a a hnunga ka'n beng dat ṭhin te hi a pi leh pute tilru natpuina tawk a tling em em ṭhin,fa la neilo leh nau lawm thiamlo tih takah han ti deuh viau dawn pawh ni ila ka khawr leh ṭut ṭhin,keimah chauh phei chuan ka bual ngam ngailo hrim hrim.

U abra pawh a lo lêng ve reng ṭhin a,a ni pawh zai lam ringawt buaipui tawh lo in company ah hna a hmu ve hlauh a,chhun khaw en lai chuan kan inhmu ta ngai manglo,zanah hian a lo lang leh zawk ṭhin tih leh sunday chawhnu a lo lêng tihloh hi chu,bawihtei pawhin a ngai em em a,a lo len châng hi chuan u Abra pawm hi a chuh deuh tlat ṭhin,chawte an in barh loh leh an in pawm a,a han infiampui phei hi chu mipa tih takah hian nau a dim thiam lutuk silo, sâng deuh deuhah hian a vawr tawh mai ṭhin sia,insangruh ṭeuh hian kan lo thlir a,kan lo veng ru hi a ni deuh ber.


Ka ngaihtuah ṭhin tâk daih chu,u abra nen hian inneiin,fate nei ila bawihteii ai hian a duat ang em le,tuna a mizia hi a pu hlen thei ang em le,tiangreng hian bawihteii hi min hmangaih pui thei ang em,ka nu leh pate pawh hi ti reng hian a pawh thei ang em tih lam daih hi ka rilru hian ka inzawt nasa thei khawp mai.

U abra hunawl nei khât ta lutuk leh phone a kan inbe khât ta lutuk te hi ka titau lek lek zel,u rinpuia biak a phal tawh lo bawk,a rilru puthmang a hriat vângin,ka vui lêm lo,engkima ka tan a hlu em em chu an ni tak meuh mai,mah se ka hmangaih ni miahlo vanga ka hmangaih nena buai ka duh lo,buaina hi pumpelh hram ka duh ṭhin,a tuar a tuarchhuah chu a hautak emai.


Bawihteii pawh kum a tling ve dâwn ta reng mai,Pathian zarah a fingin a rualpuite aiin a hrawl a,a châk a,a ha pawh a ṭo hma êm êm bawk,ṭawng ni chiah silo a han rak nuah nuah a nei tam a,kan lâwm hi a van tikim ve tak êm, thiam thar a neih apiangin a pi in chhung inkhawm ṭawngṭaiah Pathian hnenah lawmthu a sawi a,a nu in vana ṭang a a lo hmuh a a hlim dan tur sawiin a ṭap leh nge nge ṭhin.

Bawihteii Birthday pawh lawm ve ngei kan tum a, sâwm erawh kan ngah lo u Abra nen a Birthday ni hma chiah a bazaar kan tum rilrûk rauh rauh laiin a nî a lo thlen chuan min ṭhulh san leh daih a,ka lungawilo ru angreng khawp mai,kan kalna tur vel ka lo plan lawk nasat ve nên,mah se ka vui vai lêm lo.


Bawihteii Birthday pawh a lo thleng der mai,ka buai em em a,ka phe ve char char hi a ni deuh mai, nilêngin u Abra a rawn lang ve lo,ka ngei deuh leh lek,cake te kan zai a,chawte kan ei pawh chuan an rûkin ka melh kual hrek hrek renga,a hmel ka hmu ve thei bawk silo,presents te kan hawn vek hnu leh min lawmpuitute haw rêm lamah bawr deuh hian a rawn lut ve hlawl,a hmunah mi pahnihin thil dang an lo zâwn lût bawk.

Mak ti deuh a en deuh hâ in chhâwn nachâng pawh ka hre lawk lo,a hah lutuk chu a thaw deuh hluam hluam a,a thla pawh a bek a thisen-zâm rawn pawngchhuak zâwnah chuan a luang thla tih ka hmu thei.

Ngaihna hrelo deuh a mi pahnih bawm lo zâwn luh ka en pah chuan

"Hei eng nge a"

Ka lo ti vat a,

"Present,i ta tur a awm ve rih lo" tih pah chuan a mitko min rawn sân khum euh a

Over reuh mai e a,tunah dar 9 a vaw thuak tawh a,ti êm êm a han tlai,bawihteii pawh a muhîl daih tawh.


"Hei,bawihteii thil tur a rukin internet ah ka chah ve a,a lo thlen hun tur an lo delay sia,vawiin pawh ka rawn lang hmanlo,ka nghâk char char a,ka lo lam hmasak chuan chhuah leh a harsa âwm sia"

Tiin a insawifiah zung zung,a chaw ei tur te ka siam leh ang lâwp lâwp bawk,lungawilo viau e tilo chuan ka lâwm ru leh tawh kher mai,a nachâng a hria ka tiin ka duh zual phah leh sawt,box chhunga awm leh a thil lo ken luh chhunga awm ka zawh lah chuan naktuka bawihteii harh hun a hawng chauh tur leh suprise a nih thu a sawi tlat a,kher kher hian a,naktuk a ti nghahhlehawm.


Rei vaklo hnuah bawihtei muhil en deuhin min haw san leh ta,ka ruak leh ta

Zîng kan tho chu Bawihtei nen a pi leh pu nen,u Abra thil lo khai zâwk chu kan han hawng a,kawrfual te, pheikhawk te, hmeichhe naupang lawm a lo awm ṭeuh a pink deuh chuaih bawk,a ma remhriatna chauh a hmang theilo hrim hrim,a nih tur ang a ni thlap tlat,box lian zawk kan hawng chu, naupang chuan theihna chi Truck lian ang kha a lo nia,chu pawh a pink tho,

Ka nu chuan "Awwwww hetiang te chu a man a tam âwm tehlul nen a va inthlahrunawm ve,a dang a tihsak tho bawk si" a ti deuh vawng vawng a

Ka pa erawh chuan

"Makpa hual pawh move a bei mawi e" a lo ti sap

Hetiang ṭawngkam hi a hman ka vawikhat hriatna
U abra zarah ka pa pawhin tunlai ṭawngkam a chhâkchhuak ve nulh mai

__________________________________________


Thlaruk hnuah


U Abra'n vawiin chu bawihtei te nen Sialsuk tlângah lêng ang u a tih vângin a ni pawh hunawl insiamin kan lêng ve ngei a,
Chhungkua amaw min ti tâwk an awm ve nuk mai a nuam dangdai riau bawk kan awmdan vel hi.

Tlai ni nêmah chuan bawihteii u Abra'n a pawm mut chu a rawn harh rualin

"Pa"

Fiah deuh tak hian a rawn ti hlawl mai,ka lawm lutuk chuan phâwk deuhin u abra chu ka en a,min lo en ve chiah

Bawihteii chu u Abra lak aṭang a la sawn silo in ka kuah vang vang a,

"A pa tak tak min nih tir tawh mai rawh"

U Abra'n ka beng bul set a a rawn tih chuan a mah ka en leh vat

Nui sen senin a kekawr ipte a zungbun chu a rawn phawrh a,ka chhânna a chiang sa tih hria ni âwm tak chuan ka kut ṭangah a rawn nawr lût nghal zat bawk.



A tâwp ta....