DEAR CHRISTINA_By, April Hmar Liverpool

[April Hmar Liverpool]

DEAR CHRISTINA

B, April Hmar Liverpool


Kum naupang te ka la ni a,ka la dam ve laia ka lungngaihna leh ka harsatnate avanga rilru na a ka tahna te,ka hlimna avanga mittui tla hiala hun ka hman tawh dan te,tum engzat nge ka rilru hi hliamin a awm tawh ang? Tum engzat chiah nge ka thlarau hi khawih chetin a awm tawh ang? Ka hriatrengna ah hian engzat hi nge chhinchhiahin a awm ang tih te chu chhutin chhui thin mah ila,a tawpah ka thutlukna chu hla phuah nge ni ang a,eng thil chiah nge anih ka hriatchian mai bik loh,ka thinlunga 'Dear Christina' tih thu nung leh awmze nei tak mai avanga ka suangtuahna nena rilru leh ngaihtuahna inpawh tak chunga thu in share tawn hi a ni leh si thin.

'Dear Christina' tih thu nung leh awmze nei tak hmang hian tun hun,hrisellohna leh bawrhsawmna ten min tlakbuak tak hnu hian ka in awi tlei vel ta mai mai zawng anih hi maw. Amah Christina-i chuan piallei daiah thlafam dairial min chansan tawh chu a ni si a,lung te pawh a leng dawn dawn mai...............





Dt 21.4.1998 a ni a,ka room ka singsak felna lamah ka khum hnuai,kilkhawr angreng takah hian lehkhapuan hlai vak lo,a rei tawh em avanga eng deuh kuk tawh, a ziak chhiar hleitheih tawh loh,thu tawi te inziak,hla phuah nge ni ang a thil dang tih ka hriatchian loh hi ka chhhar chhuak nawlh mai a,eng ti tiha helai khum hnuai kilkhawr daih daih a lo tawm im nge a nih pawh chu ka hrethiam viau lo. Ka lehkha,ka mimal thil chu a ni lo phawt mai. Chubakah,ka rilru chuan 'ka dah emaw ka lakluh emaw a ni thei lo hrim hrim' tiin ka rilru leh keimah chu ka inhrilh mawlh mawlh bawk. Mahsela,engatinge ka room chhungah, thlamuang taka ka mutna khum hnuai kilkhawrah teh daih, chu tia awmhmun alo khuar theih ni. Thil tam tak thlirna tlang 'A' atanga 'Z' thlengin,chulai hmuna chu lehkha alo awm ngawt theih dan tur ka zeldin kual chiam hnu pawh chuan ka thutlukna chu 'a ngaihna ka va hre lo em!

Chu thuziak tawi te chu uluk fe hian a awmzia hriat tumin ka han thlek dauh dauh a,a thuziak ka chhiar chhuah hnu chuan chu thuziak chuan min sawi nghing dawt dawt a,tek den ang mai hian ka za chuai chuai a,thlahrang hmu ang maiin ka mur sung sung thei hial a,ka hriatna thazam te chu an nghilh dup a,a chang leh ka rilru chu a tawt leh ang up up bawk a. Chu hun chu a reilo. Minute tlemte chhung chauh a ni. Mahse,chu hun reilo te chhunga a mi deh dan erawh chu a rilin chhungril a khawih takzet si a ni.

Chu lehkha, min ti â zo mai dawna ka hriat lehkha chu chhungkaw member dangte hnenah chuan a chinchang an hriat leh hriat loh ka han zawt chiang a,mahse Chutiang lehkha hlui pakhat ve mai chu an lo bengkhawn tehchiam lo. Ka room chhunga alo awm ngawt danah lah chuan 'ka chet fel loh rah' bakah min ngaihsak duh der lo. Ka ngaihven em em danah lah chuan an buai peih lul lova,an theng a thawngah a tla hlawl lo a ni ber mai.

Chu lehkha tawi te,a thuziak tawi te avang chuan ka suangtuahna kawngka pui chu hawnin alo awm phah ta a ni. Loh theih loh thil avangin chu lehkha a thuziak awmzia chu ka chhui ta chiam mai a.

Chu thuziak tawi teah chuan thawnthu mak angreng tak pakhat hi a inphum a,mi hrisello leh bawrhsawm tak, Christina-i pasal chuan a thinlunga thuziak leh a suangtuahna luangliam chanchin a puanchhuahna ril leh inthukru tak mai,hla thu ang deuh a a ziak a chu chu lehkha tawi te,ngaihtuahna min sen tir zettu lehkha chu alo ni a,tichuan ka suangtuahna nen,chu lehkha tawi te nen,kan pathum chuan mawng lam leh lu lam pawh hre lo lekin kan inkawm ta mial mial mai a ni.

Hmeichhia,nun tlawm ve tak leh nun mawlmang ve te pakhat hi a awm a,a hming chu Christina a ni. Chhungkaw khawsak harsa ve tak pakhat atanga lo chawrchhuak a ni a,eng ram leh hnam a mi nge tih erawh hriatchian theih a ni lo. Chhungkaw khawsak harsa,mahse chhungkaw inhmangaih leh chhungkaw hlim tak atanga chawrchhuak erawh a nih ngei a rinawm. A tlatna hmun apiangah chuan Christina-i chu mite fak hlawh leh mite ngainat,nun chenfakawm leh thlakhlelhawm tak neitu a ni thung a,mi taima leh nungchang mawi em em mai,mite thinlung hneh dan thiam tak leh mite ngainat rawn,han en mai chuan mi ropui tak a ni ang tih rin harsa tur tak,Mahse hmeichhe danglam leh chungchuang ru tak erawh ni si,chutihruala a nun tlawmna leh a nun ngainatawm ru tak avanga midangte hipna ngah em em tu chu. A kianga reilo te chhung chauh pawh hun hman thlakhlelhawm,a nui hmel hmuh ringawt pawh damna tham tling,chu nu ngei chu a ni mite ngainat rawn Christina-i chu.

Nun pangngai leh nun tlawmte a nun hman chu a duhdan a ni a, mite tana luanchhuah nuam ti mi a ni tlat a,a phak ang tawkah mite hlimna thlentu,mite tana malsawmna thlentu nih chu a nuam tih dan a ni. Amah ngaina lo tu an tam hauh lo. Pitar putar,nu leh pa,thalai leh naupang chenin an ngaina em em mai a,an khua chu chu nula mize mawi leh ngainatawm em em mai chanchin chuan a luahkhat hneh hle. Tu kiangah pawh awm se nuam ti tak leh hlim takin a awm thei zel a,tute mai pawh a kawm hlim thiam em em zelna te chuan amah lo hre thawi tawhtute chu amah hriatchian lehzual a chak tir a,amah hmu fo thintute pawhin hmuh nawn leh fo an chak a,a kiangah amah nen a hlim taka hun hmang tawh thinte pawhin a kianga hun hman hlutzia an hrilhfak a tling fo thin.

Chhungkaw dinhmun erawh harsa in rethei ve thin mahse,an harsatnate chu lawmpui hial chakawm zawk khawpin an hlim em em reng thei tho a,a mize mawi leh duhawm tak tak te chu sawi lohva tlakah an uiawm mah mah si. A hmangaihna thinlung turu tak mai te chuan a ni, chu hmeichhe awmnem ve mai chu a ropui zia leh a chungchuan zia pholanga chawimawi thin ni. Amaherawhchu,khawvel hian a par mawi mawi chu thliakin beisei loh lamah a tirliam thin si a, Christina-i hmangaihna thinlung leh, ama nunna ngei mai pawh chu ala laksak dawn ani tih hi rin ava harsa si em!

Tlangval hmeltha leh pianthiam zet mai (a hming hriatloh), pakhat a awm bawk a,a hausa in thil a ti thei em em mai a,chhungkaw chungnung tak atanga chawrchhuak a ni thung. Chu tlangval chu hmelthain fing viau mahse, tuma hmuhpui loh a chhungril thim tak leh vawt ru tak avang chuan tlangval tihbaiawm ru tak mai a ni thung a,mahse chu chhungril thim tak chu pawnlamah langsar takin a lantir mai mai ngailo. Mite chung en,an zah rawn leh an ngaihsan rawn,an chawimawi fo thin a ni a,a tan chuan hringnun hi lemchanna dawnsan mai an ni. A hmelma nih chu thil thlakhlelhawm loh ber a ni a,lamtang atan erawh tu te tan pawha iaiawm loh ber a ni ngei ang. Chutihrual chuan a chhungril thim leh vawt ru tak chu hmachhawn chakawm tak a ni hauh lova, a hmelma te chu tuma hriat lohin an bo pil hmiah hmiah mai zel a,sumah buaina a nei lova, Sunday school a an thil zirin a nunah nghawng a nei phak tak tak lo. A duh chu a nei mai zel a,mi â a nilova,fing tak in rem a ruat a,felfai takin a remruatna a bawhzui mai thin.

Vantirhkoh ang maia hmeichhe duhawm Christina-i leh thim lal ang mai a mawi,chu tlangval inkarah chuan hmangaihna alo piang kan ti dawn nge,Christina-i'n a hmangaih tak tlat avanga he thu kan tarlan hi tul dawn ta ni. Kei chuan ka thiam tawpin ka chhui zau zel a,tichuan loh theih lohin chu nula duhawm tak leh tlangval tihbaiawm ru tak mai te chu suihzawmin hmangaihna hruihruala kan phuar alo tul ta a ni.

Hmangaihna chungchang hi a sawi a sawi tur ni ta se,keini aia sawi thiam tur leh khak fuh fe fe tur hi thahnem tak an kat nuk ang tih ka ngaihtuah rual hian, keini ai pawha sawi tur haihchham ve tak tak tur pawh, an awm ve ngei ka rinna hi ka rilruah alo lut tel thin. Chu chuan huaisenna min pe a,mahni phak tawkah ka han kamhlei kamkhat ngam ve ta thin a ni.

Christina-i chu a hmelthatna te, a duhawmna leh a chungchuanna te chuan a chhehvel a fanchhuak mek zel a,chu tlangval hausa leh thil tithei tak mai pawh chuan hmeichhe duhawm leh hmeltha chungchuang chanchin chu alo hriatin alo bengkhawn ve thuai a. Christina-i chuan chu tlangval chu a hmuh in a hmangaih nghal a,sap hovin 'first sight,first love' an tih ang kha an ni pahnih inkarah pawh hian a thleng a ni. Nimahsela Christina-i chuan chu tlangval chu a hausakna leh a thiltihtheihna avang a hmangaih a ni lova,a hmelthatna,a finna te leh a hausakna te chu chhan tam tak zinga pakhat,a hming chauh an ni zawk ngei ang. Christina-i chuan a hmangaih chhan chu a hriatthiam mai rih bik loh thuin chu tlangval, a hmangaih chu a chhang ve ngei awm si a,hei erawh a Chiang. Tlangval chu a hmangaih takzet zet a ni tih hi.

Bul an tandan hi bultan mawl tawp an ni bik hauh lova,Christina-i zingkar insawizawi chu chu tlangval chuan lo tibuaiin damdawi in awmna alo zawt a,chutah, Christina-i chuan damdawi in awmna chu a hrilh a,chumi mai nilovin amah Christina-i ngei chuan a hmunah ava hruai thlap nghe nghe,chu tlangval chuan a lawm zia entirna'n a in a lengah a sawm ta nghe nghe a,chutiang Khatiang ang chu an ni chho ta zel niin a lang.

Thuziakmi tamtakin tawngkam mawi hrang hrang hmanga an chei ran fo thin, chu hmangaihna pawh chu Christina-i leh tlangval inkarah pawh chuan a piang chho ve zel a,hmangaihna hrui hrual chuan a phuar nghet tial tial a,a tawp a tawpah Christina-i leh a hmangaih tlangval te pawh chuan 'tiam tlat e' tiin pumkhatah an insiam ve ta nge nge a ni.

Hun leh ni an liam a,Christina-i chuan a pasal in ropui leh nuam tak hnuaia hun hlimawm tak a hmang mek emaw a intih lai chuan,hremhmun sipaite chuan an hna tenawm tak leh huatthlala awm tak mai chu thawk turin an lal thupek chu an bawhzui ve mek si. Khua a dur khup khup a,chhum dum chhah pui pui leh thlipui,tui fawn sang tak takte chu rawn thawkin. Mahse, Christina-i erawh thlamuang tak leh ngaihngam takin a muhil sek sek si a.

Hun a kal a,nakin deuhah chuan Christina-i pasal mizia diktak chu a rawn inlarchhuak tan ta! Zu ngawl a vei a,hmeichhe leplerh tam tak a kawp kual thin a,thian rapthlak tak tak leh buarchuar pui pui a khawm duah a,a lungawi loh chang leh a thinur chang chuan a nupui chungah chuan a tuan mai thin a. A pasal hmuhsitna leh diriamna,chhiahhlawh ang maia cheibawl a tawng ta fo mai. In ah,a nupui kiangah hun a hmang ngai meuh lova, khawvel tan a hun tha zawng zawng chu a hmangral thin a ni. Ruihhlo a khawih nasat avangin natna hrang hrang leh tihbaiawm tak tak a vei a, Christina-i tan chuan hun lungchhhiatthlak leh rapthlak a nih lohna a tam lo khawp ang le!

Hun leh ni an ral ve zel a,a nun a bawraw tak em avang leh a nun a thlahdah sawt em avang chuan Christina-i pasal chu a tlachhe deuh deuh zel a,an chhhung leh khat,an then leh rual tha te nen an intuithlar chho ta hial mai. Chutihrual chuan Christina-i hringnun hmalam chu tuna a hun hman mek dan nen chuan han khaikhin chi rual erawh an ni tawh hauh lovang le!

Zing khua a var a,tlai ni a tlak leh a piang hian Christina-i pasal nun chu a tlachhe deuh deuh zel a,a rawp chhe tial tial a,chumi mai a ni silo. A hmelma ten awh ngei tumin an lo pel ve reng a,police te nen buaina an nei awllo. Hektu leh dotu an pung tial tial a,chumi hunlai a Christina-i hringnun hahthlak tur zia chu ziakmi te pawhin ziakchhuak turin an ziakfung ken an ken fimkhur a tul ve ta hial ang. Mahse, heti chung pawh hian Christina-i chuan a nu leh a pa,a chhungte leh a then leh rual te hnenah chuan thil kaltluang lai chu,a eng zawnga a thlir tlat thu leh beiseina leh rinna nen hmalam pan a tul zia chauh chu a thuchah an ni zawk si. A hma a Christina-i,mite hlimna leh lawmna thlentu,nun chenfakawm tak leh duhawm tak neitu kha tunah ngei pawh hian a thlauhthla duh chuang hauh lo. Chu tak chu hmeichhe danglam bik a nih zia leh a chungchuan bik zia lantirtu pakhat a ni ngat mai. A pasal tan chuan 'tiam tlat e' alo tih tawh avang ni pakhat bawk Mahse, a nihna tak zawkah chuan hmangaihna vang tih loh rual a ni lovang.

A pasal avangin Christina-i hringnun chu harsa in ralti thin mahse,buaina leh hmingchhiatna te chuan Christina-i thinlung chu ti khurin ti mangang ve fo Mahse,chu hmeichhe ropui tak leh chungchuang tak mai nungchang chu muangchangin a rawn tarlang ta zawk a ni.

Kum tam tak a liam leh hnu chuan Christina-i pasal chu damlohna leh hrisellohna in a tlakbuak nasat tawh avangin in lamah private doctor ruaiin an in enkawl ta deuh chawt a. chumi lai chuan hmelmate,leibatna te leh police chenin a pasal chu an rawn hel reng mai. Mahsela vantirhkoh duhawm ang maia a seilenna khua pawh lo awi tlei tawh thintu leh, pangpar mawi ang maia mite thinlung lo thawidam sak tawh thintu a nupui christina-i,a hmuhsit em em thin khan,a pasal bawrhsawm tak,ke pawha kal thei tawh lo,wheel chair a nawrlirh ngai mai,mahse a theihna leh a chakna zawng zawng,a thinlung,a tisa,a thlarau thlenga a hmangaih leh a duh ber ni bawk si chu,chu buaina leh harsatna zawng zawng lak ata a mize duhawm leh mawlmang ve tak,a tlawmna te,a nunnemna te,a ngilneihna te,a dawhtheihna,a tumruhna,a huaisenna,a inpekna leh hmeichhe tam tak neih ve loh a nungchang leh a nihna chungchuang tak hmang chuan ropui tak angin lang lo mahse,ropui tak leh runthlak tak ni bawk si chuan a chhanchhuak ta hlauh zawk ani.

A chhanchhuah dan kawng thui tak leh hautak tak,hahthlak leh hreawm,a tawpna rapthlak leh runthlak tak mai chanchin chu khawvel hian a hriatpui silo. Mahse khawvelin hriatpui lo mahse,a pasal,a hmangaih em em chuan a hriatpui a a lawm tawk viau.

Mittui nena a hnukchat lai mek thlir rengtu chu tudang a nilo. A ka atanga chhuak khat em em mai,'ka hmangaih che' tih thu duhawm leh hlu ber mai chu a pasal,a hmangaih leh duh ber mai hnen atang chuan a dawng tho va, thlamuang tak leh ngaihngam takin a kal thei tawh ang chu.

"Ka hmangaih che. Christina,ka hmangaih che" tiin a nupui hnukchat mek chu a thlir vawng vawng a. A kalsan ta, a nupui chuan. Christina-i ngei khan.

Christina-i pasal chuan hmelma a nei tawh lova,police te nen buaina an nei ta hek lo. Amah thah tumtu tumah an awm tawh lova,a nun chu thlamuang takin a hmang thei tawh a ni. Thil pakhat, he zawhna hi,engtiang in nge hmeichhe pakhatin chhanchhuah ngaihna awm lo tura ngaih atanga a pasal a chhanchhuah theih le? Chu zawhna chu zawhna pangngai reng a ni kumkhua tawh maithei asin. Mahse thil pakhat erawh, Christina-i chu tunah chuan he khawvelah hian a hmel hmuh tur a awm ve tawh silo. Piallei daiah thlafam dairial changin a zal ta si a. Chu hmangaihna lungchhiatthlak,a pasal anchhedawng,thinlung vawt leh thim tak mai chu a hmangaihna ropui leh chungchuang tak mai nen chuan a thleng ta tihna maw?

A rauthla chuan pialral lamtluang chu zawh ta mahse,a chanchin lungchhiatthlak chu khawvel hian hriatpui lovin bengkhawn lo mahse,amah hrechiangtute thinlungah chuan a dai ve mai mai tawh dawn lova,a damlaia a hmangaihte mitthla-ah a thamral mai na hek lovang. A hlimthla leh a sulhnute chuan a ropuina thuruk chu mite thinlungah ala rawn hriatchhuah tir chawk ang a,a hmangaihte thinlungah sik leh sa hun inthlak danglam thinte hian a sakhming chu ala rawn thar thawh tir fo bawk ang. A hmangaih ber,a pasal thinlung thim leh vawt tak chu,chu a thihna runthlak tak mai chuan ala tham chhuak dawn chauhva,thangthar lo la chhuak zel turte chuan chu hmeichhe ropuina thuruk chu an thinlung thuvawn ala ni ang. He leiah i hun hnuhnung avangin tapin inthen mah ila,engtik ni ah emaw chuan kan hlimlai nite kha kan la kurpui leh ngei kan beisei 'Dear Christina'.

Thian duh tak, he hmangaihna huatthlaawm tak leh thil tithei tak nisi hi zawng duhkhawp loh a na thin a ni tiraw? Hmangaihna leh vantirhkoh duhawm,mite tana malsawmna ni thin chu an inbuan a atawpa hnehna changtu zawk chu hmangaihna atthlak tak chu a ni ta a ni. Tin, hmangaihna atthlak tak hi hmangaihna dik tak alo ni duh khawp lehnghal a.

Tunah chuan Christina-i pasal laktlak lo tak chuan a nupui,a In a a chhiahhlawh awmpui pakhat ve mai ang hial a a en a chu, a tan mi ropui alo ni reng tih a hrethiam ve tawh ngei ang. Ama tana a nupui inhlanna chuan nunthar leh khawvel thar a pe ang a,zirlai thar a zirtir tawh bawk ang. Nimahsela, a taksa lam bawrhsawmna erawh atan chuan buaina tenau thlentu an nih phah dawn ta a ni. Chumi pawh chu khawvel a chenna rahchhuah a ni ti ila dik deuh talhin ka hria a,a dik ngei bawk. Khawvel tan a hun tha leh a parmawina zawng zawng a pek vek avangin a man chu damchhunga bawrhsawmna leh hrisellohna a ni ve ta thung. A nupui chuan he bawrhsawmna lak ata lehzel hi chu chhanchhuak turin a tlin bik lo a ni ang e,ama nunna ngeiin a tuar ta si a.

He thilah hian lungawi lovin insehruh sa teh mah ila,pawikhawihtu zawk chu court in chhuah zalen ta ang hialin ngai mah ila,he lei dana thiamloh changtu chu chunglam dana thiam alo chan ve theih na atan vantirhkoh tirhchhuah a tul thin si a,'lalpan a pe a,tunah a la leh ta' tih ang deuh kha a ni mai alawm.

Mahse,'lung a awikim hleihtheih tak miau silohah chuan' tiin eng ber nge kei hian kalo tih ve tak ang le? tiin ka ngaihtuahna chu a inluhchhuah chhawk ta deuh zut reng mai a. Chutah,ka rilru a thil pakhat lo lut chu 'he thil hi ka ti ve tur ani. Christina-i hriatrengna engemaw tal ka buatsaih ve tur a ni' tiin.

Ka thian dang pahnih ka sawi hmawrhmuh a,anni chuan min lo phûl pui hlut mai. Ka rinloh lam daihah ka thiante chuan Christina-i hriatreng na atan tiin hriatrengna lung phun an han rawt ta mauh mai a,kei pawh chuan chutiang ang ngaihtuah chhuahna chang ka lo hre lo chu Christina-i thlarau lakah inthiam lo ru tak chung chuan ka pawm thlap thung.

Hun a liam zela ,thlan lung chu kan phun fel ta,thlan lunga thuziak mawlh mai chuan kei chang a ni lo,ka thiante pahnih pawh chu a vel thei hial mai. A background chanchin hre hauh lotu te mit ngei pawh chu, chu hriatrengna lungphun chuan a la nalh dawn a ni tih kan chiang.

Chu hriatrengna lungphun chu keini thian za chuan fur ruah sur hnuaiah chuan kan din bial taih hlawm a,kei chu ka hnuk a ulh teuh mai. Insum a har ka va ti tak em! Tlangval a pumpa hi thian karah ka mualpho lo chauh a ni. mahse,engah mah indemna tur a awm lo. He thil hian kan mittui chu kochhuak hial mahse indem theih a ni hauh lo. A tawpna atan tiin chu hriatrengna lunga thuziak, suangtuahna rama khawizu leh hnute tui hmanga min chawmtu chu ka han thlek nawn leh ngat a,Chutah,chu lungpheka thuziak chu ka han chhiar nawn leh a.

Lunga thuziak chu:

DEAR CHRISTINA,

AW,NANG HMEICHHE ROPUI;
VANTIRHKOHTE CHHIAHHLAWH RINAWM,
THLAMUANG TAKIN CHAWL MAWLH ANG CHE.