The Feared Crimson King(TFCK) 1

[B.laltlanhlui]

Alice POV

He mi khawvel ah chuan tu pawhin khuanu ruat an nei vek. Mi pahnih te chu an dam dun chhunga cheng dun tur an ni. Anmahni zawn chhuah chu in rin ang khan a har vak lo, mi pahnih te chuan tattoo inang an taksa khawilai ah emaw an nei ṭhin

Kan pian chhuah pui a ni a, siam chawp erawh a ni lo. Chutianga khuanu ruat te chu chhungkaw dinhmun inang lo tak pawh ni se, a tawpah an innei zel tho

Ṭhenkhat chuan an kawppui tur an hre lawk a, a ṭhen te erawh chuan a hnuah an tawng leh ṭhin. A tawpah erawh awm dun tur chu an intawng leh ngei ngei zel

Kan khuanu ruat nilo kan neih chuan ka pa Lalram Lyria ah hian hrem theih an ni. Ka pa hian khuanu ruat hi a ring em em a, mahse awmzia a lo nei lo ve thei tho asin....
____________________________________________

"Tawlailir kha din tir rawh u!" Samuela chu a au a, ka hmaah ṭhu in ka kawppui tur hnenah min hruai mek a ni

Ka chil ka lem khawlh a, ka thaw halh bawk, chutih laiin Samuela chuan Sakawr tawlailir kawngka a rawn hawng a

Ka nun hi heti zawng hian a inher kual ka ring ngai lo. Ka thihna tur lam panin ka kal mek a ni
<<<<<<<<<<<<<<>>>>>>>>>>>>>>>>>>>>

*Kar hnih hma lamah khan*

Ka pindanah ṭhu in kan ram History ka lo chhiar a, kawngka an rawn kik a "Lo lut rawh u" ka ti a
"Hello, ka naute Alice" Lalpa chu muangchangin a rawn lut a, ka lo inher vat

"Tlai chibai ka pa, min be duh em ni?" Ka nui seih a, ka rilru a buai ru ve khawp mai. Ka pa chu mei tuahna lamah chuan a rawn phei a, ka ep chiah chair sen ah chuan a ṭhu a

"Aw be duh e..." kan inkara sasua thing a ker dawhkan mawi tak chu a en reng a, sawi chhuah dan tur a ngaihtuah a ni mai thei. Ka lo ṭawng hmasa a "Ka unaupa chungchang em ni? Thil dik lo a awm tih min hrilh lo hram rawh" ka ti a

"Awm love! Parcival chu a ṭha e, eng thil mah a chungah a thleng lo" Lalpa chuan a ṭhutna a siam ṭha mawlh mawlh, a rawn ṭawng chhuak leh a "A ṭha ania, ramri a buaina pawh an chawl rih e..." a ti a

"Anih leh eng thil in nge ti lungngai em em che?" Ka awm a nuam ta lo tawp mai
"I kawppui tur kan hmu a Alice" min rawn en a

"Eng a? Eng tikah? Tu nge a nih?" Ka lo ṭhu tung ut a

"Ka duatte min lo ngaithla hram teh" a lunngai hmel chuan min ti hrilhhai zo vek, a sawi zawm leh a "Crimson Lal saw i tana ruat niin kan hria a, i rilru tur chu ka hrethiam alawm" a ti a

Ka lungphu a rang nghal zawih zawih "Mi nunrawng tih hreh nei lo kha maw? A chem hriam tak sei zeta mi thah pawisa lo kha maw? Zahngaihna lantir ngai lo kha maw? Amah vanga indona hi chhuak a ni asin ka pa!" Ka au chiam a, he thil thleng hi ka awih thei lo

"Tunah inbengdai nghal vat rawh!" Lalpa chuan min vin hrep a

Chair ah chuan ka ṭhu thla rawk a "Thil theih a ni lo, tihsual a awm aniang...." ka ti leh hram a

"Awm lovang, General Owen a'n a mit ngeiin a hmu alawm. A bân rekah i ta ang chiah tattoo a nei. A thih phah ṭep a, he thu hi a rawn thlen thei hram alawm" Ka pa chuan min hrilhfiah pah a

"Mahse ka pa, a kawppui tur ka ni tih hi a ring in a awih duh dawn em ni? A hmelma ka ni a, min that duh mai lawng maw?" Ka ti a

"Chuvang chuan alawm a hriat loh che a ngaih chhan...." a ti a
___________________________________________

Ka kawrfual chung lukhum chuan ka inkhuh a, khaw vawh zan tak a ni a, thli thaw chuan min rawn chhem heuh heuh

Ramri chu zanin hian an chawl ṭhuap mai, ka kawppui tur bula ka kal dawn vang aniang. Crimson lal chu kan kal tur an lo hrilh lawk diam a

"Ke a kan kal a ngai dawn a, Lal fanu. Lehlam lalram kalna kawng chu a awm tawh lova, Sakawr tawlailir hi Crimson lal in a hmuh chuan Lal chhungkua i ni tih a hre ngei dawn si a" Samuela chuan a rawn ti a

Ka hmauh ber awmna lam panin kan kal zel a, sakawr tawlailir leh vengtute tel lo chuan kan kal a, ka hmuh tawp ber tur pawh a ni maithei a ni. An inthuamna chu rawng pawl silver a chawhpawlh ka ṭhan pui kha a ni a, ka damna hun ṭha hi a tlem ta riau in ka hria, Duchess ah min ngai chung pawh hian Lyria aṭanga kal ka nih vangin min zuah ang em ka hre lo, kan ram hi a haw hle si a

Ramhnuai thim pik taka kan kal lai te chuan thla bial tak chuan min rawn chhun a, thingkung te pawh an eng pe un mai

Min that lo anih chuan min tihluih ka ring deuh tlat. Crimson lal zahngaihna pawh nei lo lakah hian beiseina ka nei lo hle a ni. A hming ringawt pawhin kan ram mite tha a tikhur thei ania, indona a hmachhawn phei chu thihna a ni ber mai. Ka ha chang ka ṭhial tawp ringawt

Eng nge ka tihsual le? Eng vanga kei kher a hma a kun tur nge ka nih le? Huatna, hlauhna, hriatthiam lohna leh rilru hahna in min tuam vel nuaih mai

"Lal fanu?" Samuela chuan min lo au a

"I ṭha mai ang ka ring tlat a ni" ka hmaa a kal chung chuan ka lungngai tih a hria aniang, a sawi zawm leh a "Keipawh ni ila ka hlau ve tho ang mahse inzawmna hi chu a tak duh ania. Chhan a nei hrim hrim ang" min ṭawng thlamuan leh a

"I sawi dik hram ka beisei, Samuel. Min ṭawng thlamuan avangin ka lawm e" ka ti a

Kum sawmpanga anih thlengin kan chhungkaw tan hian rinawm takin hna a thawk a

A nui hmel chu tih tak na in a rawn thlak a "Kan thleng dawn tawh e Lal fanu" a ti a

A thusawi avang chuan ka thin a su dup dup. Tlanchhiat daih mai ka va duh em. Ka pa in ka naupan laia Khuanu ruat hi Pathian min pek a ni a tih lai te kha ka hrechhuak a, kan awmna tur tak a lo ruat sa diam a tih te kha tunah hian ka ring thei lo hial mai

Thingkung chunga kawng lo inhawng chu kan hmu a "Kan thlen tawh e" Samuela'n a ti a

Ka zam hle mai, rilru pangngai put hram ka tum. Hmelma sipai te chu ramhnuai aṭang an rawn chhuak sap sap a, an inthuamna pawh rawng sen a ni a, hlauhna chuan min rawn tuam vek, an zinga pakhat chiah chuan Rangkachak rawng a inbel.....
*****

Chhunzawm tur