BEISEINA NUNG
By CVL.Awmpuii
Thâwm a reh tlawk tlawk a, sana inchhek ri leh ka thaw leh hak ṭhin tih loh chu thawm dang hriat tur a awm lo. Zan dâr 12 a ri ṭep tawh a, tun thlengin ka pasal a lo la haw lo! A chhuah dâwn khan KṬP in hla an zir tur thû chu min hrilh ngei a, mahse an bâng tawh ngeiin ka ring. Ka pasal chungchangah hian rinhlelhna in ka khat tawh a ni ber mai. Hrehawm ka ti a, ngaih ṭha taka awm theih pawh ka duh, mahse ka rilru hi ka thunun thei tawh lo a ni ber mai.
C.V.L.Ruatpuii ka ni a, "C.V" emaw "Ruatpui" tiin emaw min ko ṭhin. Ka pasal Rohluzuala nen hian Bial KṬP inkhawmpuina aṭanga inhmelhriat chho kan ni a, kum 7 lai a lo liam ve ta reng mai. Kan Bial hian Kohhran panga min huam a, anni hi Bial ṭhuthmun niin kan Bialah chuan Kohhran lian ber an ni. Khang hunlai khan inkhawmpui hi riak lut vekin kan la kal a. Kan kohhranin khawmpui kha kan thleng a. Kan khua a lo lian lutuk lo bawk nen in khatah panga deuh zel thleng a, a aia tam nei te pawh an awm. Keini pawh ka pa Kohhran Upa a nih vang leh kan khua ro ro ah chuan tlem a kan lo khawsak ve theih vang ni hmiang mikhual 10 zet kan thleng a. Chung zingah chuan ka pasal pawh hi a tel ve nghe nghe.
Zirna vangin kan khuaah hian ka awm tam vak lova, mahse khami kum kha ka graduate kum a lo ni hlauh a. Chuvanga inkhawmpui ve hman ta kha ka nia.
Khang hunlai khan ka pasal chu rorel palai zingah a lo tel ve a. A landan aṭang ringawt pawhin Kohhran mi tak a ni tih a hai theih loh. Kan mikhual te zingah khan a len bîk vang nge a langsar bîk nulh a. Mipa hmelṭha tak tih tur ni lo mah se hmeichhe mit la tak chu a ni. A ngo hluak lo nâ in a fai em em a, a che reng reng kha a hmuhnawm ka lo ti ru viau ṭhin.
Tlangval nelawm tak a ni a, mi biangbiak a thiam em em bawk. A hunah chuan fiamthu te pawh a thawh ve bawrh bawrh a, mahse a nun a ho chuang miah lo. Midang tana zahawm deuhin a awm thiam ti ila a dik ber ang.
Bial khat na na na chu inkhawmpui zawh hnuah pawh kan inhmu veleh zeuh zeuh ṭhin a. Kan ina a lo thlen tawh miau avangin kan khúa a lo kal chang chuan min rawn tlawh ngei ngei ṭhin. Tichuan kan inkawm nel chho a, kan inhriat aṭanga kum khat a vei meuh chuan kan inngaizawng der mai. Engtik aṭangin nge kan pahnih inkarah induhna a lo lian chhoh chu ka sawi dawt thei lo nâ in kan inbe tam ta lutuk kha ni ber in ka hria.
Amah a fel in a hawihhawm em em a, min ngaihsak a, ka titau zing viau bawk. Kan inngaihzawn chhung zawng khan thîk tur engmah ka hmù lova. Mahse min duat tih ka hriatchian em avangin ka pangchang ṭhin khawp mai.
Khaw in ṭhenawm lawk kan nih avangin kan inngaihzawn hnu phei chuan kar khatah vawi hnih ṭal min lo tlawh ṭhin a. Ka hrechiang telh telh a, ka duh telh telh a ni ber mai.
Chutia inhaw lo na na na chu kan inngaihzawn aṭanga kum khat a tling awrh tihah innei tur in thutlukna kan siam ta a, Biakin hawng ngei in kan innei. Kei chuan a la hma ti mah ila a hmanhmawh nasa tawh mai si a. Neih tlak ni a ka lo hriat ve tho avangin ka nei ve ta rawih kha ania.
Kan inngaihzawn tirh phat aṭang khan an khúa a ka ṭhiante'n a chanchin min hrilh âwl lova, chanchin ṭha lam hlir ka hria. Ṭin, khang hun chhung zawng khan vawikhat pawh min sual luih a tum ngai lo. Dik tak chuan chance kan ngah ve thawkhat ania, mahse chung hunah pawh chuan kan in fawp a, inngaihzawnna a thleng thei ang zawng zawng chu kan ti ve vek. Nupa kar chauha thleng tur sex erawh chu kan ngaihlu a, vawikhat mah kan chesual lo. Chungte chuan amaha intulut lo thei lovin min siam a ni ber.
Kawngkhar thâwm ka hriat rual chuan sana ka en nghal a, dár 12 a lo pêl der tawh. Ke pên thâwm a rawn awm leh a, second tam pawh a ral hma in kan pindan kawngkhar a rawn inhawng a. Ka pasal a rawn luh rual chuan ka lo ṭhu chhuak nghal a. "Rin aiin in rei daih" ka lo ti vat a. Ngawi ngulin a inthlak mawlh mawlh a. A ṭawng tawh dâwn lo emaw ka tih hnuah "Min lo mut san mai ta che" a ti hmuk a. Ka îp nghal chawih mai.
A che zia chu ngawi rengin ka en a, min ngaihven lo tih hriat zet hian khumah a rawn mu ve nghal zat a. Awm ve lo ang mai hian min ngai ni ber in ka hria.
A zangthal duai a, a kut lukham in a chhing zui nghal daih a. Biak zui ka duh a, thu tam tak sawi pui ka duh. Mahse tunlai a khawsak phung hian amaha nelawmna tam tak kha a paih thlà a. Ka tana pasal ṭha em em ni ṭhin kha tunah chuan ka hriatthiam phak bâk a ni tawh.
Engmah sawi zui tawh lovin ka mu ṭha a, amah hnung chhawn zawnga inlet in thil tam tak ka ngaihtuah a.
Kan inneih hnu khan KṬP O.B ah a ṭang chho a, tunah pawh hian secretary nihna a chelh mêk. Kohhran rawngbawlna lamah a buai tih ka hria a, ka sawisel ngai lo. Hna lamah lah nise kan khuaa P&E (Power and Electricity) Department ah Hruaitu chan changin a awm a. A tlangval lai aṭanga thawk tawh anih avangin rin râwl berah an nei a. Inchhung khur, hna leh kohhran rawngbawlna a kawp a. A buai tih ka hria a, theihtawp in ka lo pui ve ṭhin chuan ka hria.
An hlawh a chhe zawk zawk lo bawk a thlà tin in luah man têl tur kan lo nei bawk nen kan khawsa thei ve ang reng a. Pathian malsawmna dawngin sum leh paiah harsatna kan tawk hran lo. Unau pali zinga Upa ber a ni a, a nau chiah mipa hian nikum khan nupui a nei ve bawk a, anni'n in pui an nghak a. A farnu te pahnih pasal nei lo an la awm ve bawk. A unau dangte pawh chuan hna mumal tak neiin thlà tin hlawh an nei vek.
Chhungkaw khawsa thei pangngai tak an ni sa hrim hrim a. Mahse chapo taka an awm âwm ka hre ngai lo. A Nu leh Pa te pawh ka chungah an ṭha em em a, reilote kan chênho chhung pawh khan min duat viau kha ania. Chêngho reng dâwn pawh ni ila hrawn hrehawm tur ka hre lo. Mahse an tê ber Rindiki erawh biak thiam ngai ve deuh chî a ni a. Kan inneih hma pawha ka ṭhiante min huphurh pui ber ania. Mahse vanneih thlak deuhin min nêl ta hlauh a,sawiselna tur ka hre lo.
Pathian kaihhruaina leh malsawmna kan dawng a, kum 5 dâwn chu inngeih takin kan la innei tluang ve zel chu ania. Nupa na na na chu han in khak a, han intihbuai chang a awm lo thei lova. Chung hunah chuan upa zawk a nihna leh puitling zawk a nihna hi a lo lang leh ṭhin a. A zawldawh zawkah a ṭang leh nge nge zel. Kei ai kum 5 in a upa a, min tihlungawi dân chu a hre lutuk ringawt.
Mahse tun thla hnih thum liam ta vêl aṭang khan a awmdan a rawn danglam chho a. Inah a awm tlem em em a, a tirah chuan rawngbawlna vangah ka lo ngai mai a. Mahse tunah chuan chumi piahlam thil chu a ni tih hai rual a ni tawh lo. A chhan hriat ka duh a, sawipui ka tum ṭhin. Mahse ka tán a inhawng hlawl lo a ni ber. Sawi ka tum apiangin min pehhel na tur a zawng reng a. Tunah chuan keimah ngeiin chhui chhuah ka tum tawp tawh. Han tih vak ngaihna ka hre chuang bawk silo. Ka awm deuh tlawk tlawk rih a ni ber.
"C.V..." âw zawi thum dût chu ka mang hriat ruai ruai a, "C.V....C.V..." a rawn ti leh a, ka dâr a rawn tawk zeuh bawk. Ka meng chhuak riai riai a, ka mit a la kawpza rul mai. Ka pasal hmel dam thlup ka hmuh rual chuan "Imm..." ka ti ringawt a. Ka harh hlim hlawl bawk nen ka âw a chhuak ṭha thei lo.
Ka meng ṭha hlei thei lo chu ka chhing zui leh daih a. "Dár 10 a ri ṭep tawh ania" a rawn ti leh a, ngaihtuah chiang mang hlei lo hian "Imm..." ka lo ti leh ringawt a. A kut vawt thlur in ka chal a rawn dek a "I khúa chu a sik lo tiraw?" a âw rîk chhuah dân chu a ngaihnawm riau. "A sik bawk silo" amah leh amah chu a inbia a. Ka mut a la chhuak ngang mai a, ka lo chhâwn peih tawh thlawt lo.
"C.V..." a châwl dat a, "Ka hna kal a hun tawh ania..." a rawn tih leh rual chuan ka harh ta chiah. Ka meng chhuak nghal a, "Maww..." phâwk zet hian ka ti a.
A tho nghal thurh a, ka mutna bula ding chung chuan "Hna ka tlai ṭep, i duh leh lo la mu la, ka kal mai ang" a ti dam thluam a. A landan aṭang chuan hna kal tur in a insiam peih diam tawh anih hmel.
Sana ka en vat a "Dár 10 a ri ṭep tawh anih hi " ka tih rual chuan "Ka hrilh che kha" a lo ti vat a. Ni e, a sawi tak alawm. Ka mumal loh vang vek a ni.
"Tukṭhuan engtin nge? I ei tawh em ni?" ka tih chuan a lo bu vat a. "Eirawng ka bawl peih vek tawh a, i duh hunah i lo ei ve tawp mai dâwn nia. Thawh i hai nasa hle mai" a ti zui zat a. "A va zialo tâk" tih bâk sawi tur ka hre tawh lo.
"Umm...i rawn thawh chhuah ve mai ka ring a. Hrilh hre lo che a chhuah mai ka lo tum tawh a, mahse ka rawn kai tho ta tho che anih hi. I duh leh mu leh rawh. Ka kal aw" a ti zung zung a. A hmanhmawh tawh bawk aniang ka chhanna pawh nghak hman lovin a chhuak zui ta daih a.
Khuma la awm reng ka nih avangin ka chhing zui leh vang vang a. Nizan ka ngaihtuahna ka kawm nasa lutuk a, thawh ka hai zo ta vek chu anih hi.
Ka pasal hmel ka mitthla rual chuan ka khi sak a, tukin chu tuk dang zawng aiin a ziaawm tho mai. Min ngaihvenna âw zawng zawng kha a la bo bîk lo tih ka hre thar a. Ka hlim veng veng mai.
Ka hlimna ho sawt zia ka ngaihtuah chhuah rual erawh chuan ka rilru a na veng veng thung a. Beisei säng nghal hluai lo turin ka infuih ru nghal mawlh mawlh mai.
Ka awm âwl lutuk chuan ka inngaihtuah lungpuam leh ang tih ka hläu a. Ka tho chhuak nghal daih a. Chawhmeh ka en rual chuan ka nui var var mai Parbawr kan leh bawkbawn bai a lo siam ve ngei a. Dâl kan leh antlak hâng pawh a awm. Choka-a a che vêl tur chu ka mitthla a, a hmuhnawm leh pek ang chu. Tui ti deuhin ka pasal eirawngbawl chu ka ei a.
Inchhung sek rek tih fel ngai zawng zawng ka tih fel hnuah ka insu leh a. Nupa terek chauha khawsa ni mah ila suk tur hi chu kan nei ve reng zel. Eng dang vang a ni lo kan inthlak zing em a ni. A rei berah thawmhnaw ngai hi ni khat bâk kan ha ngailo, bâl lo eng ang mah se bâl angin ka inhre tlat zel a. Ka pasal pawh chutiang chiah chu.
Ka han chêt zawh meuh chuan tlai eirawngbawl a lo hun leh der tawh a. Behliang ka then laiin kan ṭhenawmnu U Rci a lo kal a. A rawn ri lut leh nghal bawrh bawrh tawh.
Ani hi kan veng Nula senior a ni a, a kumin a chaldelh tawh vang nge ni a ri phawng phawng mai a, han zah ṭit ṭet hi a nei vak lo. Amah pawh hian fiam a dâwl em em a. Kum upa lam chu sawi loh naupang tê ber thlengin fiam takah an nei a. Engmah lah hi a haw ngai der si lo. A rîk ang bawrh bawrh hi a ni deuh tawp mai. A rilru a zau em em bawk.
Kan inah hian tlai tin deuh thaw a lo tei lut ṭhin a, mahni chauha innghak ka lo ni ṭhin bawk nen ka khawhar min hnemtu pawimawh tak a ni tawh. A lo kal loh chang pawhin râl aṭang hian ka va au tal zel a, a rawn tei lut leh nge nge ṭhin.
Ka Alu kan lai chu a rawn tem a rawn tem a "A va tui eee" a ti leh ṭhin a. "Engtin nge i siam?" a tih chuan "Ka kang deuh tawp" ka lo ti mai a. "Nang hi chu i kut a hmui hrim hrim anih hi" a ti leh ringawt tawh.
Ka behliang then lai chu min rawn then puiin a titi zui leh bawrh bawrh a. Kohhran leh khawtlang aṭanga sap ram thlengin min luh pui a. A chang leh Zirna chungchang a sawi leh bawk a. Ṭhahnem hi a ngai ṭhin ania.
"Nizanah hla i zir ve em?" ka tih chuan " Zir e, in pa pawh a ex nen an nui dun nasa ania" a ti liam puat a. Ka zawt satliah mai kha ania, mahse ka thil duh loh ka hre tel ta tlat mai. "U Chhantei nen maw" ka âw chu pangngai thei ang bera lan tir ka tum a. "Ni e mawle, an hlim dun hawr hawr khawp mai" tiin a nui zui hawk hawk a. Nuih pui harsa ka ti ngei mai. Ka huat tur leh ka rilru tina tur zawnga sawi a ni lo tih hre mah ila lâk nat loh a harsa ngang mai. Kan nupa boruak ṭha lo zet nen ka hmehbel lo thei lova ka hah nghal hluah hluah mai.
U Rci chuan ka hmel landan aṭangin a lo hrethiam aniang "Ngai thutak duh suh, in pa chu a fel ve hrim hrim a. Nang a nei tawh che , Chhankhirhi te chu a duh tawh teuh lo mai. Mahni nupui te phatsan duh tur khawpa mipa nêp a nilo ania" tiin min hnem zui leh mawlh mawlh a. A lo sawi chhuak ta kher kher chu pawi a tih ve hmel khawp mai.
"Ka ring tawk alawm" ka ti ve tak nâ in tunlai a awmdan zawng zawng nen hian rin tawk chu harsa ka ti ngang mai. U Chhantei phei chu kan inngaihzawn hma zawng zawnga a lo kawp tawh, a kum tel lo inzui ve chawt tawh kha an ni si a. A thinlungah hna a thawk nasa dâwn tih ka hai bîk der si lo.
U Rci chuan fiamthu a thawh zui leh bawrh bawrh a, thinlung taka nuih pui harsa ka ti tlat tawh. Zawh zui zel ka chak a, mahse mahni pasalte ringhlel lutuk anga lan chu ka hlau bawk si. A chang leh "An nui dun ve a nimai a" tiin ka inhnem chawp leh ṭhin a. Thik thu tih chhiat lutuk chu ka duh bîk lo nâ in U Chhantei kher hi chu ka thîk tlat ṭhin. Hmeichhe dang thîk tur an awm ngai loh vang pawh a ni mahna.
U Rci haw hnu thleng pawh chuan ka ngaihtuah zui ta reng a. Ka lak aṭanga a hlat tâk viau chhan pawh hi a ni thei mai ang em tih thlengin ka ngaihtuah hman. A chang leh 'An nui dun satliah mai a ni a, ngaih thutak tur eng nge awm vak' tiin ka indem leh a. Ka rilru chu a nuam thei der lo. A lo haw huna zawt ngei turin rilru ka siam fel ta tawp a.
Dâr 4:30 velah a rawn haw a, ka lo awm âwl lai tak a ni a. Ka rilru a buai sa tawh tehlul nen ka ngaihbelna ti zual tur tingin U Chhantei nen ber kher an rawn la inzui lût a. An rawn nui lût dun hawk hawk lehnghal a.
Min rawn hmuh rual pawh chuan an hmel lan dân a danglam eih lo, ka lo en uluk tehlul nen mak an ti vak lo aniang.
U Hluzuala chuan "Tah khan lo ṭhu lawk rawh, room ah ka dah a, ka'n la zuai ange" tiin U Chhantei chu ṭhu turin a mitmei a. Min rawn melh leh a "Faith Promise a lo khawn a" a ti a, a inthlahrun ve hmel deuhin ka hria. Ka lo bu nghat ringawt a. Min hrilh hre ve hrim hrim chu ka lo lâwm ru khawp mai. Min be miah lovin kal tlang sela chu ka lungawi lo viau ang.
Room ah a lût zui nghal a, chu veleh U Chhantei chuan "Venglaiah kan rawn intawk a, ka hmanhmawh bawk nen a motor ah ka lo chuang phei ve ta mai anih hi. A tihzia tak tak a ni, ka khawn zawh hma phah dâwn a" a lo ti nghal zung zung a. A insawifiah ni ber in ka hria.
"Imm...thingpui ka'n lum ang che aw" ka ti daih a, ka sawi thui pui duh vak lo. A ṭul anih chuan ka pasal ka zawt ve tawh mai ang. U Chhantei chuan min lo hnial vat a "A ngailo, ka awm rei hman dâwn chuang lova min pek veleh ka chhuak leh nghal a" a ti a. Ka ti lui duh bîk lo, a ṭhu reng ang tih ka hläuh ruk nak laia.
U Hluzuala chu rei lovah a rawn chhuak leh nghal a, a hmanhmawh bawk aniang inthlak pawh a la inthlak lo. Pawisa an inpek fel hnu chuan an in mangṭha zui a, ka lo thaw huai pek anih chu!
"Ka va intifai ange" tih leh inher a rual a "U Hluzual" ka tih rual chuan a lo hawi leh vut a. Min melh nghal rûn a, engmah ka sawi thei leh pek tawh lo. A landan chauh hmel lutuk chuan ka hmui a thunun a ni ber. Mi hnathawh hah laia zawhna lo zawh nghal vut vut chu thil tih chî niin ka hre leh lova. "Va intifai la, chawhmeh ka lo chhuang lum ang a, châw kan ei dâwn nia" ka ti ta ringawt a. "Umm" tiin room ah min luhsan zui nghal a.
Rilru nuam zan lo chuan chawhmeh te chu ka chhuang lum sawk sawk a. Zaninah chuan engkim ka sawifel pui tawh ngei ngei ang tiin ka infuih ru sauh sauh a. Kan nupa inkar hi kei nin kan siam ṭha lo anih chuan tuman min rawn siam ṭhat sak dâwn lo.
Zanriah chu ngawi rengin kan ei dun a. Ṭum dangah chuan ka chawhmeh siam te hi min fak sak ve hlut ṭhin kha ania. Tunah chuan khatiang kha hriat tur a awm tawh lo a. Zawi zawi in a inthlak danglam tial tial ni ber in ka hria.
Châw ei hmun min seng fel pui vek a, hei chu hman aṭanga a tih tawh ani a. Ṭul lo ti mah ila min pui lui tlat zel, tun hnai a mizia a danglam lo awmchhun a ni hial ang.
Thleng ka sil lai chuan Ṭhutkhawmna ah a lo awm a, hla zir tur a a chhuah leh hma in titipui ngei ka duh a. Hmanhmawh deuhin thleng chu ka sil a, hei bâk sawipui na hun ṭha ka nei lovang.
Thleng ka sil zo chiah tihah room ah a lût a, rang zetin ka zui lût ve nghal rawk rawk a. Ka hmanhmawh lutuk chuan a ti hamhaih ve deuh aniang room kawngkhar ka kalh rual chuan a rawn leh hawi vut a. "U Hluzual" ka ti nghal tawng a, mit a lo kan âk a. A phone chu khuma theh thla in a kawr a hlip a. Wardrobe chu hawng in a Tshirt nghawng nei, kan inneih kum khatna pual a ka leisak chu a inthawlh zui nghal a. Chhuahna tur a nei leh tawh anih hmel.
Ka lo en reng lai chuan "Sawi la" ngaihsam zet hian a rawn ti sup a, rawn hawi lêm lovin khuma a phone bawk chu a ban leh a. A hmet zui mual mual a. Ka ngawih tâk rengah chuan min rawn melh ve ta nge nge a. Min ngaihsak hmel ve ta deuh e.
"Kan nupa inkar hi sawifel ang" ka ti ta tawp a. Ka inngaihtuah buai leh hma in hetia sawi pawp mai hi ṭha in ka hria. Chuti lo chu engtikah mah eng thil mah kan sawifel lovang.
A ngawi reng a, min melh rûn a, engkim sawi ngam turin ka huaisen hle a ngai tih ka hria. "Hetianga i awm hi thlà thum dâwn a ni tawh. Ka lakah lungawi lohna i nei anih chuan min hrilh rawh, ka insiam ṭha ang. I ngawi reng a, thinrimna i neih âwm ka hre bawk silo, hrehawm ka ti. Hetiang hian awm tawh lovang, a hah thlak emai" ka ti ta bawrh bawrh a. Ka thâwl huai maiin ka hria.
"Engtin nge ka awm vak a?" a lo ti nghut a, ka beisei loh lam daih a ni. Min melh rûn a, min nin hmel hluah hluah in ka hria. Ka rilru no rawn chhuak tur chu duh lo lutukin ka intipaukhauh lui ngar ngar a.
"I danglam chak lutuk" ka sawi chhuak thei hram a ni. A rawn thaw chhuak hawk a, a hmai chu a kut pahnihin a tuai thuak a. Ka beisei loh lutukin a dinna bula wardrobe chu a chhir pawp anih chu! Ka lo ṭe nghal ṭhawt a, ka thin a phu nghal zawih zawih bawk. A chêt danin min ṭhawn lutuk avang chuan ka rilru no lo chhuak tur zawng zawng te khan min thlawh bosan nghal vek.
A kûn ngul a, a kawng dawmin a thaw zui kâwk kâwk a, a awmdan chu ka râp lutuk. Kan inneih aṭangin vawikhat pawh min la thinrim khum ngai lova. Kan intih thiam loh ve deuh pawh in âwka vîn takngial pawh min hman khum ngai lo ania. Hetianga a awm hi ka vawikhat hmuhna a ni.
Wardrobe chu a chhir leh pawp a, kan room cement bâng châr ṭha zet chu vawi thum lai a hnek leh chawrh chawrh bawk a. A khawsak phung in min ṭhawn lutuk avang chuan ka lo melh mawl tawp ringawt tawh.
Ka lam a rawn pan rual chuan thlabar lutukin ka lo tawlh sawn rawk rawk a, ka chhing zui nghal daih bawk. Mahse room kawngkhar inkhar bur ri ka hriat rual chuan ka thaw huai mai, ka ṭap zui hlawp hlawp bawk. Ka na em a ni.
Ka thinlunga natna in phum tam tak chu ṭah chhuah tumin ring zet hian ka ṭap rawng rawng a. Ṭhenawm khawvengte pawh ka hmaizah zo tawh lo ani ber. An lo hria anih leh an lo hria ni tawh mai teh se.
Darkar khat dâwn chu kan room kawngkhar bulah ka ṭhu sawp a. Ṭap rawng rawng tawh lo mah ila ka mittui chu a hul thei der lo. Tun hi kan inneih tirh aṭanga rilru nat vanga ka ṭah vawikhatna a ni. A bâk chu lawmna mittui vek asin mawle.
Khumah chuan ka mu meng kar a, ka ngaihtuahna hi ka ṭhian ṭha ber a ni der tawh. Hmalam hun ka ngaihtuah a, a êng zawnga thlîr luih tum hram hram mah ila nichin lawka thil thleng te kha ka ngaihtuah tel lo thei lo a, kan nupa hmalam hun hi a thim mup maiin ka hria.
Kum 22 mi chauh niin pasal ka nei a, kum naupangtê a pasal nei si ah chuan puitling ka lo intih ruk ve ṭhin nen hmalam hun ka lo hre lo em ani. Tun thla thum chhung vêl leka ka pasal awmdan pawh hrehawm ka ti a. Mi te chuan an damchhung in pasal zu rui, kut thlak chîng, chhungkua a buaina siam ṭhin an nei ania. An lo chhel zia ka ngaihtuah thleng pha hial mai.
Sana chu ka en leh ṭhin a, dár 12 a ri leh ṭep tawh. Min chhuahsan danin zir lo viau mah se ka pasal a ni a, ka hmangaih miau si a, ka ngaihtuah zui lo thei lo. Call ka tum deuh ut ut a, mahse a awmdan kha ka ngaihtuah lêt a, thinrim rilru na bawk si in ka awm a. A lo haw hun hunah lo haw tawp mai teh se.
Ka phone message tone a rawn rîk rual chuan eng ka hria ni maw rang zet hian ka ban a. A message a ni, "Ka awmdan kha pawi ka ti, min ngaidam rawh. Zanin chu hahdam deuhin, tui deuhin lo mu la, khawvar hma in ka lo haw ang" tih tê mai hi ania. Ka mittui chu a dîr in a rawn dîr zawih zawih mai. Ka lâwm nge lâwm lo pawh ka hrethiam lo, ka pasal message chuan min ti ṭap ringawt a. Ka ngai nghal ngawih ngawih bawk.
Chhuak zetin ka ṭap leh ta nge nge a, "Rohluzual...i sual emai" tiin amah awm lo mah se ka hau bawrh bawrh a. A lukham te chu ka vaw leh pawp ṭhin a. A chang leh ka ngaih thû leh ka hmangaih thû ka sawi a. Ka awmdan chu a mumal hlawl lo.
Zing dár 2 a ri tawh a, ka ziaawm deuh tawh chuan ka hria. Mahse ka ṭah nasat lutuk avangin ka mit chu a kham ṭhum a, ka muhil thei chuang bawk silo. Kan thlalak hlui te ka en a, kan inngaihzawn lai aṭanga kan inneih hnu thlengin. Thil engkim chuan ka lung a ti lêng ngawih ngawih. A hmaa ka pasal Rohluzuala kha ka duh leh a ni.
Chiang lo ruai hian ka harh a, chêt mai ka tum chu taksa khauh zet hian min lo kuah bet ṭung a. Ka harh fîm telh telh a, min lo kuah bet tu chu a rim aṭang ringawt pawhin ka hai lo nasa, ka pasal a ni.
Chêt sawn ka tum a, mahse a aia nghet in min rawn kuah leh a. "Ka la muhil mumal ve lo, min thawh san suh" a ti hnawk ṭuak a. Min kuah mai chu duhtawk lovin a kê in min rawn kherh bet zui nghal a. Thei leh thei lovin a hmel hmuh tum chuan ka ring ka fân a, hahdam hmel zet hian a mit a lo chhing vang vang a. Hetianga kan inhnaih chilh lohna hi a rei tawh lutuk ringawt.
Ka ngai a, ka thlahlel em em a, ka chesawn duh tawh bîk lo. A kut min kuahna chu ka hmer zui vang vang a, a lo la mu nghet lo a ni mahna ka samah chuan a rawn fâwp nghal tawk a. Mittui tla tur chu la nei ila tunah hian lawmna mittui ka biangah a luang leh tawh ngei ngei ang.
Ka lo muhil veleh a nimai thei ka harh meuh chuan keimah chiahin ka lo mu tawh a. Mu leh tur a min ti tu zawk kha ania min thawhsan leh daih si chu ka lâwm lo ru viau. Nichin lawka thil thleng avang khan ka beisei ka lo tisang leh hman viau tawh anih ber chu!
Sana ka en chuan dár 10 a lo ri ṭep tawh. Min kai tho hreh ang a, office min kalsan tawh ani ngei ang. Muangchangin ka tho chhuak a, darthlalangah ka inen chiah chu ka inchhir nghal. Tinge maw nizan khan ka lo ṭah vak kher ni. Ka mit chu khuai zûkna ang maiin a bui lûk a, ka hnar a sen vek bawk a. Ka hrisel loh hmel ngawih ngawih. Hmelchhia chu ka inti phal bîk lo. Hmai te ka phih zawh hnuin room aṭang chuan ka chhuak zui nghal a. Choka a ka thil hmuh chuan min ti phu chiang kher mai. Hna ah a kal daih tawh ang chu tih nak laiin eirawng a lo bawl surh surh a. Jogger pants grey a ha a, kawr a hak loh avangin a lang lian zual a, a taksa inphut mawi zet pawh a langsar ngang mai. Kawr ha lo hian a awm khat viau ania lum a ti deuh a ni mai thei.
Min rawn hmuh rual chuan a nui lui suk a, "Lo kal rawh, ka bâwl peih ṭep, kan ei nghal daih dâwn nia" a ti a. "Hna ah i kal daih tawh ang chu ka lo tia" tiin ka va pan ve mai a. A eirawngbawl na bulah chuan ka ṭhu nghal bawk. "Vawiin chu chawhnu lam chiah ka kal mai ang" a ti awlsam then a. Hmarcha rawt tur a rawn lâk chhuah rual chuan "Ka lo rawt ang" ka lo ti vat a. Mahse ngawi rengin amah bawk chuan a ti zui mual mual a. A che vel chu ka lo en reng ringawt a. Nizan thil thleng kha sawi chhuah chî a ni ang em ka hrethiam chiah lo. Tunah sawi ta ila kan boruak a tihchhiat leh nghal vek ka hläu bawk si. Kan hre lo der tlang ang nge kan sawifel dâwn pawh hriatthiam a har ṭalh mai.
A sawi ang tak takin hmarcha a rawt zawh chuan Tukṭhuan kan ei nghal daih a. Ka beisei phak bakin ka ei thei ta phian, ani paw'n a ei ṭeuh mai. Chawhma chhung chu inah kan awmdun a, in ka tihfel chhungin lehkhabu a lo chhiar a, min lo pui veleh zeuh ṭhin bawk. Kan boruak chu a ṭha tih chiam tur ni lo mah se a hma ai ngawt kha chuan ziaawm tak a ni.
A hna kal tur a insiam dâwn chuan room ah ka zui lût ve a, "Min lo zui lût lawk" ti miau hek le. A insiam chhung chuan Khuma lo ṭhu turin min ti a, thuawih tak chuan ka ṭhu veleh mai bawk a. A insiam zo a, ka lam a rawn hawi ta, chiang zet hian min melh a "Nizan thil thleng kha..." tiin a ngawi dat a. Inthiamlo ngawih ngawih hmel hi a pu. Ka hma zawnah chuan ṭhingṭhiin ka kut, ka hûm ruh tlat chu dîm te hian a rawn chelh a. "Ka thiam loh a ni tih ka hria...min ngaidam rawh aw..." tiin min melh vang vang a. A ngenngawl hle bawk.
"Eng lo..." a tih lai mêk chuan ka lo pawt chat a "Imm...thleng nawn tawh lo se aw" ka lo ti vat. Nizan chungchang kha chu sawi thui vak ka duh tawhlo, a hrehawm emai. Kei chuan tun hun chauh hi ngaihtuah ka duh. Kan boruak tichhe thei thil engmah chu ka duhlo a ni tawp mai.
A hna kal tur chu Pawn thleng ka thlah a, car-a a luh rual chuan bân a rawn vai zeuh a, a tlân zui nghal a. A tlân liam thleng ka thlîr zui vawng vawng mai. Nizan thil thleng kha awm lo ta se tun ang hian kan awm âwm der si lova. Hrehawm viau mah se rah ṭha a chhuah zawk chu ania, a chhuah zel beisei phawt ang.
Tlaiah U Rci a rawn titi lût leh bawrh bawrh a, kan nui leh nasa tawh mai. Kan ṭhenawmnu tho Pi Rampuii a lo lêng lût ve hlawl bawk a. Kan pathum chuan eng eng emaw sawi in kan nui ho dár dár a. Ka anṭam then lai min rawn then pui a, maian min hih pui leh bawk a, hna an ti sâwt dun ngang mai.
Thingpui kan in ho laiin Pi Rampuii chuan "C.V, râi tawh ta che" min rawn ti hlawl a. Ka hamhaih lek lek a ni, "Ringawt a, duh duh huna râi theih a ni ngawt bîk hlei nem" tiin U Rci chuan min lo chhan khalh hlauh a. Zà lo deuhin ka lo nui lui tawp ringawt. Dik tak chuan ka awm a ti nuam lo nghal vek.
Pi Rampuii chuan "In inneihna pawh kum nga lai a ni ve dâwn tawh a, râi chu a hun tawh mawle. Nge i râi thei lo zawk em ni?" a rawn ti leh hram a. Hrehawm ka va'n ti tak. Pi Rampuii hi chu a thlasik mau puah phawng mai zel a. A chang chuan hlim pui viau ṭhin mah ila mi pawi hi a sawi ve nual ang. Mi ṭhenkhat hian an ngai thei vak lo ṭhin.
"Nu Rampui, lo buai duh suh, Pathianin hun a tih hunah an la pai ve mai ang" U Rci bawk chuan min lo chhan sak leh hlauh a. Ka läwm kher mai.
Pi Rampuii chu a ngawi tawh mai dâwn emaw ka tih laiin a rawn ṭawng leh hram a. "Fate hi nupa inkar suih nghettu pakhat an ni ve alawm. Fa neih hi nupa karah chuan a pawimawh teh ania. Fa neih hma chu mipa rilru hi a pelhe a, an nupuite ah a bet lo tlat zel alawm. Nangni pawh fa in neih vat loh chuan Hluzuala hi a nghet lo mai ang. Tunah fel viau mah se nikhua a lo rei ang a, hmeichhe dangah ṭuanna tur a zawng mai ang. Fa hi kan nei thei lo te a nih ngawt loh chuan neih zung zung tur, in dan reng reng loh tur. Fa neih tam hi a Pathian thû teh ania" a ti leh duah a. Thu tam deuh a sawi belh leh bawk a, mahse chungho chu ka beng kawrawngah a lût hlei thei tawh lo.
A thusawi leh ka pasal awmdan te ka tin zawn a, thil ni thei tak tur niin ka hria. Mahse ka duh vanga Fa la nei lo ka ni bîk si lo. Pasal ṭha tak neih a fa duhawm tak tak neih te chu ka duhthusam ania lâwm.
Pi Rampuii chu a tupa in a rawn ko a, a haw ta daih a. U Rci chuan "Nu Rampuii thusawi hi chu ngaih thutak duh loh tur, nang paw'n a mizia te chu i hrechiang tawh ang chu. Rilru nawm loh phah nan hmang duh suh, hahdam deuhin awm rawh. Chuloah Hluzuala te zawng sawi leh sawi hnu a fel emai. Nupui te phatsan duh tur chî a nilo ka tih tawh kha, a atchilh che bawk si" tiin min hnem tum tak hian a nui zui hak hak a. Ni hram teh se.
Zanriah kan ei laiin U Hluzuala chuan "Naktuk zanah Branch O.B commitee neih lawk a ngai dâwn a. Kohhran Hall-a commitee lovin tu emaw ber in remchanga commitee mai nise an tia, hruaitu in kan ina neih a rawt a, ka lo remti ve mai ania. Nizanah khan sawi ka tum a, mahse hun a awm ta si lova ka hriatchhuah laiin ka sawi anih chu " a ti dam thluam a.
"Anih chuan thingpui hmeh vêl lei a ngai dâwn anih chu" ka lo ti vat a. "A hmanhmawh thlak loh, naktuk zan an lo kal khawm hunah kan lei chawp dâwn nia. Mi paruk eikhawp lek te chu buaipui tham a ni hlei nem. An duh zawng kan zawt ang a, chuta ṭanga inlei chu a finthlak ber ang" a châw bar mawlh mawlh pah chuan a rawn ti veleh a.
Tlai lama Pi Rampuii thusawite kha ngaihtuah loh luih ka tum ngial paw'n ka thei thlawt lo, min kam ṭun mai a. U Hluzuala nena kan inkar erawh a danglam âwm ka hre leh tawh lo.
Fa neih chungchang hi kan inneih tirh khan kan sawi ve ngei a, a hmanhmawh loh thû min hrilh a. "Kum hnih vêl hi chu nupa induatna hun atân hman tur mi thiam te'n an tia lawm. Keini hi han induat hliau hliau phawt mai ila, kan nupa inkar hrisel tak hnuaiah kan fa chu lo piang rawh se" a ti kha ania. Mahse indanna ei erawh a phal hauh lova "Pathian rorel danah mihring in ramri kan lo kham ve ngawt tur a ni lo. Eng emaw harsatna riau a awm te a nih loh chuan indanna chu ei suh aw. Fa kan neih hma leh Pathian malsawmna ania nga, kan neih har leh kan nupa tan zel a nimai" a ti mai ṭhin a.
Mahse kum hnih a liam hnu meuh kha chuan kan mangang ru dun viau tawh. Vawi tam tak kan sawi dun a, a hmanhmawh loh thû min hrilh fo mah se fa hi chu a awt ve tawh reng tih ka hai lo. Khang hun chhung zawng khan min hnemtu ah a ṭang ṭhin a. Ka túr tlat avangin ṭum eng emaw zat chu kan inentir tawh bawk. Mahse ṭhat lohna engmah kan nei silo lai tak hi min tihrilhai zual tu a ni. A lawmawm zawk rual rualin ka rai thei mai chuang bawk silo.
Nikumah khan inentir a duh tawh loh thû sawi in naute neih chungchangah rilru tibuai tawh lo turin min ti kha ania. Khata ṭang khan tuman kan sawi ri leh tawh lo. Mahse vei ru deuh siin kan awm ve ve chuan ka hria. A chhungte lam aṭangin eng harsatna mah ka tawk lova. Ka tana hrehawm tur leh nuam lo ka tihna turin an awm ngailo. A tirah kha chuan ka Nu hian naute chungchang min sawipui leh zeuh ṭhin a. Mahse tunah chuan kan dinhmun dik tak a hrethiam ta ania nge engmah a sawi tawh ngailo. Keima chhungte zawk hian min fuih âwl lova, an fanu neihchhun ka nih miau avangin min ngaihsak zual a. Ka nuṭa te aṭanga kan mo te thlengin an ngaihtuah rawn ka ni.
Zanah chuan a chhuak lo ve teh mial a, "Hla in zir dâwn nange?" ka tih chuan"Umm zanin leh nak zan kan âwl dâwn" a lo ti ṭha ve mai a. "Tinge ina awmpui tur che in min duh vak nange?" a rawn ti leh a. Ka lam rawn hawi loh mah se a taksa che datah chuan a nui tih ka hria. Hei pawh thlà thum hnua thil thar a ni a, min fiam khat tawh lutuk tlat.
"I awm vak ngai silo a" ka lo ti nghat a, ri meuhin a rawn nui chhuak hawk hawk mai. Min fiam chang hian ka lo chhang ve hlak hlak zel a, hei hian a nuih a tiza ṭhin. "I thiltih lai kha dah la, zanin chu awm hahdam teh ang" a ti hluai a. Choka ah naktuk chawhmeh siam tur ka buatsaih lawk a. Hetia lo in ruahmanna lawk hi ka tih ṭhan dân a ni tlat tawh.
"Min lo tih pui ve zawk la" ka tih chuan ka rin loh deuhin ka ṭhutna bula chair ah chuan a rawn ṭhu ve nghal thurh a. Ka chemte ken lai chu min chhuhsak in alu chu a vel nghal zung zung a. Ka sawi mai mai a, min rawn tih pui tak tak pawh ka ring miah lo kha ania. Ka lo en reng lai chuan "Thil tih tur a dang la awm em hemi lo hi?" a ti a."Tih tur te chu a awm reng alawm duh phawt chuan" ka lo ti mai a. "I nghal siah" a ti hluk a, a thinrim lo tih ka hria, ka lo nui var var tawh thung a.
Hma deuhah kan mu ta a, zanah hian in a awm ṭhang lo lutuk a, a awm ve chhunah chuan kan mu hma ṭhin khawp mai, hahdamna hun a ti mai ṭhin a. Mahni a mut erawh a duh ngai der lo.
Kan han mu chu amah si chêt in min pawt hnai a, nghet zetin min kuah bet tlat bawk a. Min thlahlel ve tak tak niin ka hria. Zantin insi lova mu thei lo kha thlà thum dâwn inhnungchhawnin kan mu tawh ania. Tukin zingkar kha chu thuhran nise zanin hi hetianga kan awm leh vawikhatna a ni tak meuh meuh. A taksa si chêt a ka mut tawh hi chuan ka hahdam sawng sawng zel. Mahse vawiin tlaia Pi Rampuii thusawi te kha ka ngaihtuah chhuak zel a, awm nuam in min la siam famkim theilo.
Ka thaw chhuak leh hak ṭhin chu a lo hria aniang "I awm a nuam lo em ni?" a rawn ti zawi sup a. Ka lu ka lo thing nghal vat, amah hmachhawn thei tur chuan ka insiam rem nghal sat sat a, min lo thlah dul ve vat bawk. "U Hluzual..." chiang zetin kan inmelh a, a mitmeng aṭang chuan a hahdam hmel hliah hliah. Vawiin tlaia Pi Rampuii thusawi te kha sawi ka tum uk a, mahse a hmel landan avang chuan ka ṭhulh leh tawp. Nizan ang mai khan a awm leh ang tih mawlh ka hläu a ni.
"Tunlai chu ka hming lam hluai a ngawih leh daih i chîng riau" tiin min fiam zui a, a nui hmel chuan min ti hahdam hluah hluah. Ka ngai thar riau bawk a, ka lung a ti lêng tlat te chuan ka ngaih a ti ṭha lo. A khabe hmul ṭo siar siar chu ka han ban de de a, ka kut a lo man bet vut mai. "Hahdam leh lo mai ang" tiin a nui zui hawk a.
Chu veleh a saisir zawnga ka mu chu min lehthalin min rawn bawhbet nghal rûn a. Ka inrin hma in ka hmui a rawn khar chilh nghal hmiah. Zei zet hian min fawp zui tawn tawn a, a duhthawh ngang mai. Ka thiam ang tawkin ka lo chhang let ve a. Kha chen lo innei ve tawhin nupa nun pawh vawi duai lo kan lo hmang ve tawh a. Ka taksa a hriatchian tluk zetin a taksa pawh ka hrechiang ve tawh lutuk tlat.
A che reng reng chu a hmanhmawh em em a, khang kum 5 chhung zawng khan heti em em a ka zau thau hi ka la hre ngailo, ani pawh anih ve tho ka ring. A chêt duh dân chuan a nem nghet chiang hle bawk. Virgin ve ve a innei kan ni a, sex ah chuan elpui tumah kan nei lo tihna anih chu. Heihi kan nupa kan in chhuan ve na pawh a ni reng a. Tawn hriat nei lo ve ve ni mah ila kan pahnihin engkim kan paltlang dun a. Kan lungawi tawn ṭhin bawkin ka hria.
Zingah chuan mut kham lo deuhin ka tho chhuak a, ka pasal erawh a ni leh ni lo angin a la mu tui viau. Zan lamah khan mu hma viau e ti lo chuan kan muhil har khawp a. Ani phei chu kei ai a la muhil har zawk ania a la mutui viau ang.
Hna kal a ngaih miau avangin chawei dâwn tê ah ka kaitho a, nizan chungchang sawi in min la fiam zuk zuk zui a, a va han nghal mai mai tak. Tukṭhuan eikhamah a hna kal tur chu pawn thleng ka thlah a. A tlân liam thleng chuan ka nui zui var var mai. Kan nupain ngai kan awh chho leh tawh dâwn nia ka hriatna chuan min tihlim veng veng mai.
Zan lamah commitee an rawn nei dâwn si a, theihtawpin Inchhung chu ka'n ti felfai zual a. Kan in hi lian lutuk ni lo mah se a tê chhe zawk zawk lo a. Han tihfai dâwn tak tak chuan a hautak ve ṭhin khawp mai. Chawhnu herah chuan Rindiki a lo lang teh nawlh a, "Hna i kal nange?" ka tih chuan " Vawiin chu thawh ka hai pek alawm le. Ka chhungten ka kal daih tawh emaw tiin min lo ngaihven lova " tiin a nui zui hak hak a. Primary School ah zirtirtu in a thawk ve a, naupang ho sawi kalhmangah a strict ve viau anih hmel.
"Ka û hi tlaiah bâk a lo haw leh lovang tiraw?" a tih chuan"A ni mai ang chu" ka lo ti ve mai a. "Enteh maw U C.V..." a ti hluai a, ka plants hruk lai chu min rawn hrukpui ve nghal zat bawk. "U Hmachhuani rai saw ka hnê tawp a, a rilru a no bakah a thinchhe bawk si. Ka û saw a vîn leh hrep zel a, ka hnê zia chu eee" uar zet hian a ti a. Hmachhuani chu kan pa nau chiah Ropuia nupui ania, ka mopui nu a nih ber chu. An inneih hnu lawkah nau a pai zui a, ka hriat sual loh chuan thlà leh mai hian nau a nei tawh dâwn a ni. Kan inhrawn tam loh avangin a mizia ka hrechiang lutuk lova, mahse Rindiki hi chuan a ngai thei vak lo. Ka Nu leh Pa te chuan an sawisel ngai miah lo thung. Mahse a fel vak lo anih ka lo ring ve tawp a, mi te sawi kalhmangah a taima vak lo anih hmel.
"A rai vang anih dâwn chu" ka lo ti satliah ve mai a, han sawipui chiam dân tur hre miau hek lo le. Heti hian ka bulah a rawn âng veleh zeuh zeuh ṭhin a. Ka lo sawipui ngai azeng pawh a nilo, amah hian ka bula inbunruah hi a duh ve niin ka hre ṭhin. A mi huat ni lova a ngainat ka ni zawk hlauh chu lawmawm tak a ni.
"A rai vang chu a ni tho ang a, mahse a hneawm tawh em em alawm. Rai no lai pawh ni tawh hlei lo. U Hluzuala nen hian fa nei ve vat vat tawh zawk ula U Ropuia te fa aiin ka duat zawk ang mawle" a ti leh zat zat a. Fa neih chungchang sawi tawh hi chuan keimahah nuam lo tihna a rawn awm vat zel.
"Ka Nu leh Pa te an dam ṭha em?" ka ti ta daih a. Khaw khatah awm mah ila kan veng hi a inhlat ve ang reng a. U Hluzuala hna leh rawngbawlna lamah a lo buai ve bawk nen intlawhpawh zung zung a lo harsa ve tawh a. Mahse harsatna hranpa kan nei anih loh chuan kar khatah vawikhat tal chu kan va lêng ṭhin.
Rindiki haw hnu lawkah U Rci a rawn kal leh a, mahse rei a awm lo, a hmingin a rawn dâk lût zuai ani ber. "Hei veng leh lamah ka chhuak lawk dâwn, ka rawn lêng hman dâwn silo a min lo ngaihtuah takin ka rawn in report zuai anih chu" a rawn ti lût han ham a, nuih hi a tiza ṭhin ania.
Zanriah kan eikham hnu rei vak lovah commitee tur te chu an rawn kal khawm ṭan a. Inhmelhriat sa vek kan nih avangin kan han infiam bawrh bawrh a. An ṭan tak tak hma in an thingpui hmeh duhzawng ka lo zawt hlawm a. A inang lo nuaih an sawi, thingpui hmeh ah ringawt pawh an inthurual theilo ania engtin tak commitee khaikhawm ang maw. "Ka duh duh duh ka rawn lei mai ang" ka ti ta tawp a. Ka pasal in min lo thlawp ngang mai. Midang ho chu an lo nui dar dar a "Aw va lei mai teh" an ti ve ta nge nge a. "Ka lo kal ve dâwn mi?" U Hluzualan ka hriat tur tawk chauha a rawn tih chuan ka lo hnial vat a. A ṭhiante hi lo kawm zawk rawh se.
Kan in bula bakery tê fel ran ah chuan ka lût a, helai hi chu a khawnawtin kan rinrawl ve ber kha ania. An dawr hi tê mah se an neih chikim bakah an chhang ur te hi a thar sar reng a. Khawpuia dawr tam tak hian an tluk miah lovang. A neitu te lah an fel in biak an nuam bawk si.
CheeseCake leh DoughNut chu ka la a, heihi an ei duh zinga rualkhai ber kha niin ka hria. Chhang pangngai chu pack khat ka la tel bawk a, a tawk viau chuan ka hria.
Ka inleifel zawh hnu chuan tawi khawmuang lovin in lam ka pan lehnghal a. Ka pasalte commitee tur chu an thâwm a ṭha ngang mai, kan inkawt aṭangin an nui ho dár dár ri chu ka hre pha, an lo la ṭan lo anih hmel.
Kawngkhar ka pawt hawng tur chu an thusawi avang chuan ka tawp nghal chawt a. "Hluzuala chu i zei lo deuh a ni lo maw..." U Nunpuia, an asst.leader âw a ni. "A process a man chiah lo aniang, naute siam nawm nawm nen" an nui zui dár dár a. "Current fix ringawt te hi i lo thiam aniang a..." U Tluangpuia, an asst.secretary ve thung a ni. "Naute siam dân tur chu nakinah a rukin ka hrilh ang che" U Nunpuia bawk a ni. "Kan hrilh zin tawh kha mawle " U Sawma, treasurer ve thung a ni.
Ka hriat loh laiin ka mittui a rawn luang thlà nghal pap a, engtik laiin nge kan garrage awmna chu ka thlen pawh ka hre lo. Ka thil leite chu a polythene chawpin leiah ka dah tawp a. Kan motor ngheng chung chuan ka ṭhu thla nghal hnawk bawk. Ka ṭah chhuak lutuk chu ṭap chhuak hlei thei si lovin ka awm a, ka hrawk ah a inhnawh tup tup mai. Ka nâ tih piahlam a ni e.
Ka pasal kha an fiam nge an diriam? An tih dân kha mipa tán a tlawm thlak tur zia ka hriatthiam pui vek. Kan dinhmun a ding ve lo te chuan an hrethiam hauh lovang.
Mizo te hi hnam nuih duh, fiamthu duh kan ni a. Mahse kan infiamna tam zawk hi chu an fiama te tana nuihpui harsa tak a ni. 'Fiamthu alawm' ti mah se a fiamtu chauh nuihpui theih thil hi fiamthu a ni theilo. Fiamthu chu a fiam a te paw'n haw miah lo leh rilru nâ miah lova an nuih pui theih a ni dâwn lo'm ni?
Tunah chuan a hmaa ka pasal danglamna zawng zawng te kha ka hrethiam ta ruak mai. An titi kalhmangah khan tun hi khatianga an vawikhat fiamna kha a ni tawhlo tih a chiang reng mai. Anni'n fiamthu a an ngaih kha kan nupa inkar sawi nghing tu a ni thei ang tih an ring pha bîk hauh lovang le.
Ka ṭap khur ngat ngat a, ka pasal hmel ka mitthla a, amah lainatna hlirin ka khat a ni ber. Nau ka pai sak thei mai lo chu ka inhua a, a hma zawng aiin hrehawm ka ti thar bawk. Rai ve vat ila chu khatiang khan a ṭhiante'n an ti lo tur ania.
Ka kekawr iptea ka phone dah a rawn rîk rual chuan ka intuaihul thuak a, ka pasal hming ka hmuh rual chuan ka hnuk a ulh zual ting mai. Ka rei a ti deuh tawh a ni mai thei a ni. Ka rin ang ngeiin phone ka lâk rual chuan "I lo haw hman ṭep em?" a rawn ti dam thlup a. Chhan pawh ka chhang thei lo, ka ṭap tih a hriat ka hläu si ka insehruh vak a, ka insumna lamah ka khur ngat ngat mai. "C.V..." a rawn ti dam leh thlup a, phone ka hmeh tawp rual chuan ka ṭap chhuak nghal hawk a. Ka insum thei tawh ngang lo a ni. Heti em em a rilru tawt leh hrehawm hian ka la awm ngai lo asin mawle. Ka tawrhna ai chuan a tawrh dân tur a nâ fe zawkin ka hria.
Ka chakna zawng zawng sàwm khawm in inchhungah chuan ka lût a. Commitee an lo ṭan hman hlauh chu ka lâwm kher mai. Anmahni lam pawh hawi ṭha duh lovin choka ka pan zui nghal a. Ka pasal in min melh zuina erawh ka hrechiang ngang mai. Ka thil lei te chu ka rem a, tui hnai ti taka lei kha ka nia tunah chuan ka hun tawnin a zir lo lutuk a ka luak a pawt tlat tawh. Thingpui ka chhuang zui nghal bawk a. Nichina ka pasal an tih dân te kha ngaihtuah loh luih hram hram ka tum a ni.
Ka ngaihtuahna a fîm tial tial a, Kohhran mî, Pathian tih mi tak an ni vek hlawm a. Khawtlang ah pawh inhmang tak, mi te zah kai an ni. An nundanin a zir em a, mi dah san leh chung en an ni. Ka pasal kha an diriam pawh a ni bîk lovang, an ngaihdanah chuan an fiam ve satliah te pawh a ni ang. Mahse a lo dawngsawngtu turin a lo dawnsawn dân tur an ngaihtuah zui lo erawh kha chu pawi ka ti vawng vawng mai. Tumah saw ka haw hranpa lo, mahse inenfiah vek se tih chu ka duhthusam a ni.
Kan ṭawng chhuah dâwn reng rengin mite rilru tina thei a ni ang em? Mi pawi ka sawi phah ang em? tih hi ngaihtuah hmasak a ṭha khawp mai.
Thingpui ka siam mêk lai chuan ka pasal a lo lût a "Nichin khan i rei lutuk a" a rawn ti sup a, a hmelah danglamna lang lo mah se ka lainat lutuk ringawt. Ka hnuk a ulh leh nghal ṭun tawh a, chhan pawh ka chhang theilo. "I mit te chu a bui riau a ka hriat" a rawn ti leh deuh deuh a. "Eng nge i rawn tih?" zahzelah ka lo ti daih a. Ka âw a ṭial lek lek bawk, ka hrawk lah chu a nâ ṭun mai bawk si.
"Kan zo ṭep tawh a, ka lo endik che" tiin a nui suk a, ka chhang lei te chu a phawrh chhuak diat diat a "Tui hmel hlawm ve" a ti a. Hmana ka bialpa, ka pasal dik tak kha a ni leh tawhin ka hria. Mahse keimah zawk hi ngai ka awh thei rih lo. Ka lo nâ vawng vawng mai chu ani sia.
"Va kal rawh, ka lo sem ṭep tawh ania" tiin gas lam hawi chu ka inher daih a, ka mittui rawn puang chhuak chu a hriat palh hläu lutukin a ruk thei ang ber chuan ka tuai hul vat a. A reh tâk vang vangah chuan a kal ta anih hmel, ka thaw buai mai.
An commitee zawh chuan thingpui leh a hmeh te chu chang hovin an titi leh bawrh bawrh a. Kohhran a ṭhahnem ngaih a ṭul zia te leh member hla te hnuh hnaih dân tur te chu sawi in an vei zawngte an sawi khawm a. Ka pasal chuan a lo zawm ve zeuh zeuh tih loh chu thû tam a sawi lo. Chu te chuan nichina thil thleng kha min ngaihbel tir lo theilo. Hemi te ho hi haw vat se hahdam deuha awm ka duh. Mahse U Hluzuala nen chauha awm chu ka hreh ru riau bawk. Ka insum zo lo mai ang tih ka hläu em ani. Nichina thil thleng kha hrelo anga awm tlang law law ka duh zawk. Sawi chhuah a, a rilru tih nat thar sak kher ṭul ka ti lo.
An haw hnu chuan an chêtna hnuhma ka tifel leh thuak thuak a. U Hluzuala chuan an commitee report a ziak nghal char char bawk a. Mahni tawkah kan buai dun ve viau mai.
Ka intihfel zawh hnu chuan mutsan turin min ti a, ka lo nghak lui duh bîk lo. Tunah tak hi chuan engmah hrelo a mut hahdam vang vang ka duh ber. Mahse ka mu ta chêng a, ka muhil leh thei der silo. Thil chi hrang hrang ngaihtuahin ka inlet tawn sek a. Nau pai ringawt ka rilruah a awm tawh. Ka ṭhu leh hluai a, ka mut dâwn khan ka ṭawngṭai tho nâ in ka ṭawngṭai nawn leh sak a.
"Lalpa, mi te chuan an duh lo chungin nau an pai a, an ti tla a. Tinge nau pai duh ngawih ngawih si hi ka pai ve theih loh. Vawi tam tak Doctor kan pan a, ṭhat lohna kan nei bawk silo, tihngaihna hlawl ka hre tawhlo anih hi" tiin ngenngawl zet hian Pathian ka au a. Ka vawikhat dilna pawh a ni tawh lo, vawi tam tak ka dil tawh asin mawle.
Ka muhil thei ngang lo chu ka va tho chhuak leh tawp a. Ka pasal chu chawei dwhka laptop nen a lo in chhawp hnawk deuh nuaih a, min rawn hmuh rual chuan a la phu âwk zui a. A laptop chu a khup nghal daih bawk a. A awmdan chuan min ti hamhaih lek lek zawk a ni.
"I muhil tawh emaw ka tia" a âw chu ani leh ni lo angin a nghet churh lo reng reng. "Eng nge i en?" ka lo ti daih thung a, ka va pan hnai vat bawk. Ka thin a phu nghal dawt dawt a. Ka rilru hrisel loh lai tak a lo ni bawk nen U Chhantei ka ngaihtuahna ah a rawn awm nghal a. An lo inbe mêk a ni thei mai ang em? Ka thâ a khur nghal zawih zawih mai.
"Eng nge i tih?" ti leh nghat in a laptop chu lâk mai ka tum a, ani'n a lo ban ve bawk si kan inchuh chu a ni der mai. Ngawi rengin Laptop chu kan inchuh a "Rohluzual!" ka ti tuarh a, ka ṭap leh der tawh! Ka awmdan chuan a tihrilhai a ni mahna laptop chu a thlah a, keiin ka lo la vat thung a. "U Chhantei nen khan min bum in tum tiraw?" ka ti leh tuarh a, a hamhaih hmel ngawih ngawih. Laptop chu ka hawng nghal a, mahse ka thil hmuh avang chuan ka thâ a zawi nghal vek.
U Hluzuala chu a lo insawifiah nghal zung zung a "Ka lo en fuh palh anih hi" a ti tak nâ in dawt chiang lutuk a sawi tih kan hrechiang ve ve. Laptop chu ka melh ngat ngat a "IVF treatment" tih te "IVF process" tih te, IVF lampang hrim hrim chu google ah a lo in search thlà tuarh mai.
Ka sawifiah thiam dân chuan IVF chu In Vitro Fertilization a ni a, nau pai thei mai lo ten damdawi thiamna säng zawk hmanga nau an pai theihna a ni. Mipa chî leh hmeichhe chî lakawpin laboratory ah an dah kawp a. Surrogate nen a danglamna a tam lo khawp mai. IVF danglamna chu Naute Nu tur dik takin a pai a, chu zawng chu a nimai.
Mittui luang zawih zawih in ka pasal chu ka melh leh a, ka mittui vangin hmuh pawh ka hmù fiah thei lo. A laptop chu zawi muang in a rawn ban a, a khup zui daih bawk.
"Engmah a ni lo ania" a rawn ti hnawk ṭuak a, "Fa i awt a ni tiraw?" ka âw chu a ri chang chang a ni. Ngawi rengin a rawn tho chhuak a, a lamah min pawt hnai in a âwm ah chuan min kuah nghal hlu hlu a, ka ṭap chhuak nghal hawm hawm mai. Ka hnungzang chu a beng thak thak a. Nghet zetin ka lo kuah bet ve bawk a. Thu tam sawi kan ngailo, kan rilru a inhmu tlang viau in ka hria.
Chutia rei fe kan awm hnu chuan inlahrang hmasa zawkah ṭangin ka chalah chuan a rawn fawp vang vang a. "Ka hmangaih che" tiin min kuah leh vang vang a. Ka mittui lah chu a hul thei der lo lehnghal. Zanin kan boruak tawn zet chu nizan ai pawh khan rapthlak ka ti zawk!
Ngawi rengin khumah chuan kan mu dun a, min kuah hle hle bawk. Ka mittui chu tla tur pawh a awm tawh lo. Dik tak chuan ṭap nasa tawh viau mah ila ka ṭah a la chhuak ṭun tho.
"U Hluzual" ka tih rual chuan "Muhil tawh rawh" a lo ti daih a. Mahse ka lo duh der lo, laptop-a a thil en chungchang kha sawipui ka duh. A tirah khan hamhaih in ka rilru nâ viau mah se tunah chuan beiseina min petu a ni tlat. Ani pawh hi a la beidawng lo tihna ani.
"IVF kha" ka ti dek dek a, "Ngaihtuah buai suh" a lo ti nghut mai. Ka tho chhuak uaih a, khumah chuan innem khalh in a lam hawi zawng chuan ka inher a. "Ka ngaihtuah alawm, beiseina i nei em ni?" ka tih chuan a lo thaw chhuak hawk a. A mitmeng sen rûm aṭang chuan a ngaihtuahna a tibuai ve thawkhat tih ka hai bîk lo.
A rawn tho chhuak ve nghal a, a lukham chu ngheng ṭha sauh sauh in min lo hui zauh a, a lama ka va tawlh rual chuan amah si chêt in min kuah bet a. "Hlawhtling an awm ve nual tawh asin, phai lamah khuan kan ṭhianpa in a tihna hmun tur ṭha deuh a hria a. An hlawhtling vek lo nâ in hlawhtling tawk chu an awm ve tho a. A tih chî ang em chu ka hrethiam chiah lo" rilru buai hmel zet hian a ti a.
"Chuan beiseina i nei tihna maw?" tiin ka en chho a, a lo bu nghat mai. "Eng a tinge i sawi mai loh? A ruk a ral in thil i ti a, ṭha deuhin kan sawi dun thei reng alawm" ka lo ti nghat a. "Zanin aṭang chiah khan alawm ka en, i hriat lohin engmah ka ti ngailo" a lo ti ve vat a. Kan ngawih dun rauh rauh hnu ah chuan ṭawng chhuak hmasa zawkah bawk ka ṭang leh a. Zanin hian engkim tlang takin ka sawipui tak tak tawh dâwn. Kan nupa buaina lian ber ni ta a ka hriat chu kan inveng thâwng tawn lutuk hi niin ka hria.
"Zanina i ṭhiante tih dân che kha..." ka châwl dat a, a mita melh kalh chung chuan "Engkim ka hre vek" ka ti ta a, a tirah chuan meng buai deuh mah se hrehawm ti hmel in a rawn thlak nghal a. "Khami vang kha a ni tiraw a hma khan i danglam en em?" ka ti leh a. Zà lo tih hriat zet hian a lo nui hawk a. "Mipa te chu kan fiamthu a sâng alawm" Lâk lâp tum tak hian a ti a, mahse a mitmeng hi ka hrethiam ve tawk tawh.
"An thusawi kha engah mah ngai suh, fa neih leh neih loh hi keini mihring te thû a ni ngawt hlei nem. Pathian remruatna a ni zawk" ka ti hmarh hmarh a. Rilru nat ai mah chuan kan hun lo paltlang tawh te ngaihtuahin ka thinrim dâwn lek lek mai.
U Hluzuala chuan "Khatiang kha chu hman zan aṭang khan ka dawngsawng thiam tawh alawm. Min fiam ngun khawp a, ngaiah ka nei tawh" a lo ti awlsam then a. Mitmeng dam zet hian min melh bawk a, engah mah a ngaih loh hmel tak takin ka hria.
"Hman zan maw?" ka lo tih hu chuan ngainat awm zet hian min nuih a "Imm...hman zana ka tih hlauhthawn vak ṭum che khan mawle" a lo ti leh mai a. "Wardrobe i chhir vak leh bang i hnek vak ṭum khan maw!" ka tih chuan a nui hawk hawk mai.
"Khami zan khan engmah min zawt zui ta lova zankhua in i pasal awmna pawh i hre miah lo ania aw" tiin min fiam zui a. Ka lo ngaihtuah miah lo. A hnu lawkah kan inkar a ṭhat tak em avang khan zawh zui enah pawh ka lo en tawhlo kha ania.
"Khawnge khami zan khan i awm?" ka ti ṭha leh a, a nuih mai lai chuan a chhanna tur ka lo ngaichâng ran thung a. "Zankhua in patling a pumpa Biakin ah ka va ṭap alawm mawle" tiin a nui zui hawk a, mahse a nuih a zà miah lo tih ka hria. A chhanna chu ka rin loh lam daih ani.
Sawi zawm leh in "Khatia in aṭanga ka chhuak chiah kha Biakin ka pan nghal a, ka pan tih pawh ka inhre mumal chuang lo, Kohhran Inkhawm zan a ni lo hlauh kha ka vannei, chuti chu nilo se ka kal hun kha inkhawm hunlai vêl a ni ngei awm sia. A tirah chuan harhfim lo deuhin ka va ṭhu tlawk tlawk a. Darkar thum dâwn ka ṭhut hnuah rilru fîm mumal ka pu thei chiah a ni. Chu veleh ka rawn text ta nghal che anih kha. Zanin thil thleng chu i hriat kha, ka ṭhiante min fiam dân kha..." a tih laia a hrehawm ti hmel chu thil hmuh nuam tak a nilo. Mahse nui hmel in a rawn thlak vat a. "Khang thil te kha keimahah a inṭham rei lutuk a, a tirah chuan ka nuih pui ve thei mai a. Mahse tun thla thum liam ta vêl aṭang khan ka dik lo chho a. Nang paw'n i hrechiang ang, i chunga ka awmdan te aṭang pawh khan i man thiam vekin ka ring. I lakah ka ṭuan a, hrehawm ti takin ka siam che tih ka hria. Mahse hman zan khan ka puakkeh a, Biakin a ka va kal khan kawng tam takin min pui. Patling a pumpa ka ṭap tlaivar ka tih tawh kha..." tiin a nui suk a.
Tunah chuan ka hrethiam ta chiah mai "A tirah khan engkim tlang takin sawi dun ila chu kan buai lovang mawle" ka lo ti a. "Nizan anga nuam kha kan tawng nang " a lo ti hmanhmawh. A sawi awmzia ka hriat lutuk avang chuan ka chûm pawp a, a lo nui chhuak hawk hawk mai, keipawh ka nui veleh tho.
"Tak taka kan hun tawn apiangte hi zirlai pawimawh tak tak an ni vek tih ka hmù thiam tawh. Khang te kha tawng baw lo ila chu zankhua in Biakin ah vawikhat mah ka ṭawngṭai ka ring lo. Ka hun tawnin ti lo thei lovin min siam a, a hlu lutuk ringawt. Tunah chuan khang khan chakna min pe tawh zawk dâwn alawm" a ti leh dap dap a. Chu erawh ka pawm zawng tak a ni.
Kan nupa inkar êm a la chhe vek lova, siam ṭha turin hun ṭha pek kan ni hlauh a, hun hlu chu bawhpelh lovin kan lo hmang ṭangkai a. Chuvanga tun hun thleng thei hi kan ni.
IVF chungchang chu kan sawi dun leh a, kan Nu leh Pa te kan rawn phawt ang a, an remtih puina thlap a hmalak kan tum a ni. A tukah chuan in pui lamah kan phei ta nghal a, ka Nu leh Pa te chu an roomah khunkhan deuhin kan titi pui a, kan hrilhfiah vek hnuah min remti pui hlauh a. "Puih in ngaihna apiangah kan pui ang che u" tiin an lo inhuam viau bawk. Min hringtu ka Nu leh Pa te pawh phone kaltlangin kan rawn a "Beiseina in neih phawt te chuan a ṭha alawm. Mahse hlawhtling nghal turah ngai kher lo ula. Engpawh hmachhawn tur a inruahman tluk hi a awm lo ania" ka Nu chuan a rawn ti duah a. Ani hi chu a dâwn thui ṭhin ania.
Kan chhungten min remtihpui takah chuan ngaih ṭha deuhin kan awm ta a, tih nghal chuk chuk kan tum chuang lo. Kum laihawl kan chuang kai tawh tho bawk a, kum tâwp lama tih chu kan rilruk a. I Hluzuala chuan a ṭhianpa chu chinchang a zawt reng bawk a. Phai lama ṭha ber tur a ngaihtuah a. A ṭhianpa pawh kha a ring zo leh tawhlo aniang, a aia ṭha tur awm ang a la zawn kual tir hram a. Pathian zarah sum leh pai ah harsatna kan nei lova. A thlà tin hlawh bakah in luah man tel tur kan nei ka tih tawh kha. Tin, kan chhungte an lo inhuam veleh zel bawk a, manganna tur a awm lo.
Tunah chuan mi thusawi te pawh ka dawngsawng thiam ve ṭan tawh a, a nazawnga rai tura min ti leh ringawt ṭhin tute pawh ka nuih liam vêl mai mai thei tawh. Mahse hrehawm tih a rilru hah chang erawh ka nei veleh thut zel. Chung hunah chuan U Hluzuala hi min hnemtu zawkah a ṭang tawh ṭhin a. Ka hahdam veleh sawng sawng zel.
Ṭum khat chu Pathianni zan inkhawmah thupui awm sa hmangin kan Kohhran Upa min in thu a sawi a, inthlah pun chungchang a ni. A sawi deuh fak fak a "Mi rethei zawkte paw'n fa an neih duah duah laiin a Hausa zawkte hian an nei ṭha duh mang lo ṭhin a..." a ti a. Fa nei lo zawk lo nih miau chuan inngaihbel a awl ngang mai. Ka inngaihbel na ti zual tur tingin U Chhantei khan inkhawm bân veleh min ṭawngkhum zeuh a "Rai tawh ta che nang pawh hi, i rai peihlo zawk nge mawni. I pasal in sum a thawk chhuak a, fa tal hrinsak ve ta che" min ti zek a. A nui sawng lehnghal, huat hleih theih si lohin min ṭawngkhum a. In kan thleng chiah chu U Hluzuala lakah ka ṭuan veleh a. "Chhankhirhi chu a ṭawng ve mai mai anih chu" tiin ka thinrim khumna pawh chu a haw duh der lo. Thinrim khum rei theih pawh a nilo.
Hmachhuanin naute a nei leh chiah chu rilru a thar em em a. Kum khat an innei tling awrh a, fanu pekin an awm nghal a. Keini ve kum nga chuang kan nghak tawh a, kan la nghak chhuak theilo chu a nia. A chang hi chuan Pathian rorel dân pawh hi hriatthiam a har ṭhin ngawt mai.
U Hluzuala nen chuan kan ṭawngṭai âwl lova, IVF pawh chu tih tum ve ngawt mah ila a hlawhtlinna tur chu Pathian ah chauh a ni. Hun duh rei dâwn bakah risk tak tak a ni dâwn a. Beiseina ka ti säng hluai ngam chuang lo nâ in hei lo chu beisei tur dang kan hre bawk silo. Fa nei zung zung thei te hi lâwm vawng vawng teh se. Keini'n rilru zawng zawng sêng in fa neih theih dân tur kan ngaihtuah ania.
U Hluzuala chuan min ngaihsak zual em em a, kan nupa inkar chu a hma zawng aiin a ṭha emaw tih mai tur a ni. Chu mai bakah kan chhungte aṭangin ngaihsakna ka dawng nasa zual a. Ka Nu phei chu U Hluzuala hna kal chhungin a lo lêng veleh zeuh ṭhin a. Mahnia inngaihtuah ngut ngut ang pawh kha ka nei tlem tawh khawp mai.
Pathianni tûk a ni a, inkhawm tura ka insiam lai chuan ka lu a rawn hai deuh thut a. Ka mit nghal sulh a, ka tlu tur chu ka pasalin min lo dawm hman hlauh a. A phun hluk a, khumah chuan dîm tê in min nghat a. Ka luhai lutuk chu ka meng ngam tawh der lo.
"I ṭha em?" min ngaihtuahna a khat hian a ti a, "Ka lu a hai lutuk" ka âw chu a ri chê chê a ni. Nikhaw hrelo a awm chiah si lovin ka vai muai muai a. Ka luak a chhuak hluah hluah bawk. "Damdawiinah kal ang aw" tiin min pawm kan leh mai a tum a, mahse ka lo hnial vat "Aih...min ti che lo lawk teh. Ka luak a chhuak lutuk " ka ti a. Ngawi rengin ka bulah chuan a lo awm ve ta reng a. A reh veleh mai ka rin tehlul nen a zual tulh tulh emaw tih mai turin ka chau zual tulh tulh a.
Hmanni deuh aṭang khan khawsik ser ser leh luak chhuak hluah hluah ang hian ka awm ṭan a. Mahse tun ang em em hi chuan ka la awm ngai lo. A hma kha chuan ka che lui a, thei thur te ka ei a, a reh veleh mai zel kha ania.
Minute 15 vêl min ngaihchan hnu chuan a ngaih a ṭha tawh ngang lo aniang "Damdawiin ah chuan kal ang" a ti ta bur a. A hrehawm emai a, ka hnial duh ta bîk lo. Dîm tê in min pawm kang a, ka taksa a chet hlek chuan ka lu hai a rawn zual zel tawh bawk si. Car-a kan chuan lai chuan ka pum a rawn che bulh a, ka uak nghal tuarh mai. Chu veleh U Hluzuala chu a ding vat a, ka uak vak vak tak nâ in tui hnâng bâk ka luak chhuak theilo. Tukverh ah ka dak chhuak hman tawh si lo car hma chu ka ti berh vek a. Ka luhai chu a ziaawm deuh tawh, mahse ka luakchhuak chu a rawn zual sauh thung a.
U Hluzuala chuan midang a pun ta ringawt a, engtin tin emaw damdawiin ah chuan min hruai thleng ta hram a. Car kha tunge a khalh tir pawh ka hre tawh lo, damdawiin thlen hma kha chu min kuahbetin ka bulah a ṭhu tawh bawk si a.
Doctor chuan min lo check nghal zung zung a, men pawh ka meng ṭha peih tawhlo. "Hlauhthawnna tur engmah a awm lo aw, rai no i haw ve dâwn anih hi" min ti chiah chu ka meng phawk chiang asin. "Maw!" ka pasal a ni,"Nau in pai tih in la hre miah nange. Ka lawmpui che u" Doctor chuan nui var var chungin a lo ti a. "Heti hian damdawi ka chawh che u ang a, drip khai zawhah in haw leh nghal thei mai ang" a ti leh zung zung a.
Kan nupa chuan kan inmelh ren rawn a, doctor in min chhuah san hnu pawh chuan kan la hamhaih dun ngang mai. Ka luhai leh luak chhuak te kha an reh ta vek emaw tih mai turin ka harh kawk a. Ka thu hriat khan min ṭhawng em a ni.
U Hluzuala chu a rawn nui chhuak ta hawk hawk a, a hmai chu tuai puat in a rawn kun hniam a. Ka biang tawn tawnah chelh in lungchim zet hian min melh a. Min hmangaih ngawih ngawih hmel hi a pu.
"Engtin nge ka awmdan hi ka sawifiah ang?" a âw a mumal lova, a kut a khûr dár dár bawk. Min tih nat hlauh hmel zet hian ka âwm ah a rawn bawk titih a, a khûr ngat ngat mai. Hepa hi! A ṭap emaw ni! Ka nghawng a rawn vawh tâk thlerah chuan chhanna ka hmù nghal in ka hria.
"Hey..." nem sawn ka tum a, min rawn bawh bet zual sauh mai. "I ṭap elo?" ka tih chuan a rawn thaw chhuak hrawk a. A inlahrang a, a mitmeng a sen râm a, mittui a la tling pam bawk.
"Ka lâwm em ani" tiin a nui hawk a, darkar chanve vêl chu rilru mumal pawh pu thei lovin kan awm a. Ka kuta chelh chungin min melh leh vang vang ṭhin a, a lungawi hmel hliah hliah. Drip kan khai zawh hnu chuan Doctor a va hmù leh a, damdawi eng eng emaw khaiin bawr deuhin a lo lêt a. A nui khi ṭhaw reng bawk a. Tunah tak hi chuan a kâ ah pawh zen ila min seh lovang.
Doctor-in in dîm tura min chah mawlh mawlh hnuah kan haw ta a. Tunah chuan ka ṭha leh vek tawh a, harsatna ka nei tawh hran lo.
In kan thlen veleh ka car luah khum chu tihfai nghal ka tum a, a lo phal lo nasa mai. Phur deuh hian a tifai turh turh a, a che reng reng chu a phur surh reng a. Ka nuih a va han tiza tak.
Khuma min muttir leh thlap hnuah kan chhungte kan hrilh kual ta chauh a. A tirah khan kan hamhaih dun lutuk a, midang reng reng kan lo ngaihtuah tawh lova. Kan demawm hran lo, kan thû hriat khan min ṭhawng dun em a ni.
Kan chhungte pawhin min lo lawmpui ngang mai a. Ka Nu leh Pa te phei chu rei lo te hnuah an rawn thleng phei nghal a. Zawhna chi tinreng min zawt a ni ber. Hun rei tak kan nghah hnu, kan beisei ngam tawh loh hnua hetiang dinhmun thleng hi kan ni a. Tute pawhin min lawmpui ka ring.
Zanah chuan U Hluzualan ṭawngṭaina hun a hmang a, ka dula kut nghat chungin kan fa lo piang tur tán chuan a ṭawngṭai thlap bawk a. A thlamuan thlak hliah hliah mai. "Tlai ngai lo Pathian a ni a, a hun takah kan tán rem A ruat anih hi" a tih chu ka pawm khawp mai.
Rai no chu ka han haw em em khawp a, thlà khat tal tap chu thil ei mumal thei lovin ka awm a. Ka ei theih tur dap in ka pasal a buai thei vut vut khawp mai. Ka chhungte thleng thlengin an buai a, ṭhenawm khawvengte ngaihsak rawn ka hlawh lehzel bawk a. Ka vanneih zia leh mite ṭhat zia ka hre thar awn awn mai.
Ka nau paiin thlà nga hmel a hmuh meuh chuan ka dul pawh a lian ve tawh khawp mai. Inchhung chêt ka harsat ve ṭalh tawh a, Rindiki a phur bawk a, min rawn awmpui deuh chawt a. Ka chêt a phal ngai lova, a û ang chiahin min duat in min ngaihsak a, a fel thar thar khawp mai.
Pi Rampuii a lo lêng ziah a, pawi ta ber chu ka haw tlat lai hi a ni. A hmel hian ka luak a ti chhuak tlat zel a. U Hluzuala bulah ka rel hrep zel a, min nuihzat thei viau.
Ka hua pawh chu thil âwm lo a ni hran lo, ka rai hma zawngin 'Rai tawh ta che' min ti fo a. Ka rai ta cheng a 'Tunlai nau pai hi chu in pai leh lutuk a' min han ti leh kher a. Ka kêk hrep châk ṭhin.
Rai chu haw hle mah ila hrehawm ka ti phal lo, kha chen kan lo nghak tawh a, phun nawi phei chu ka tum ngailo hrim hrim. Ka pasal lahin duat chikim in min duat a. Ka pangchang viau bawk.
Pathian malsawmna dawngin June ni 5 ah chuan fapa duhawm zet pekin kan awm ta! Kan inneih nî nen a la inang chiah zui a. Kan inneih kum 6 na ah chiah fapa pekin kan awm anih chu! A pa lung a dun ngang aniang an inpawm nghal chawt a. A thlîr ngawih ngawih reng mai. Kan fapa hmingah chuan Vanlalremruata tih a sa nghal thlap bawk.
"Pathianin a hun takah rem min ruat sak a, muanga kan ngaih ang hian Pathian khi A thutiam kawngah a muang reng reng lo. A remruatna hnuaia lêng kan ni a, kan fapa pawh hi A remruatna a piang a ni. Chuvangin Vanlalremruata ni rawh se" a ti dap dap a. Kan pawmpui nghal thlap.
Kan beidawn tawpah, nau pai dân kawng dang kan dap ruai hnu ah Pathian malsawmna kan dawng a ni a. Kan lawmna hi a sâng emai a, Pathian hnena lâwmthu sawi mawlh mawlh kan ba a ni.
A hmaa ka pasal fiam fo tu te kha hun lawmawm kan tawn pawhin min ngaihsak ber ber te an ni leh a. A hma khan lo ngei viau mah ila tunah chuan ka dawngsawng thiam tawh. Kan ṭawngkam ah fimkhur tur kan tih rual hian ṭawngkam eng pawh dawngsawng thei turin kan rilru kan lo tih paukhauh ve a ngaih zia ka zir chhuak tawh a. Tunah chuan harsatna hi ka zuam chu ka ti lo, mahse Pathian vangin ka hmachhawn zel thei tawh ang.
Ka hun tawn zawng zawngte khan zirlai tam tak, ṭha tak tak min pe a. Thil engkim hi awmze nei veka lo thleng ani tih ka hrethiam tawh.
Kum 5 dang a liam leh meuh chuan chhungkua tak tak kan ni ve ta! Pathianin Vanlalremruata min pek hnu lawkah fanu duhawm zet mai Vanlalpeki min pe leh a, kan tê ber Vanlalruathlua pawh kum khat a tling veleh der tawh. Chhangchhiat kan han tawng chho ve tak tak mai chu lung a zîng ṭhin khawp mai. Mahse ka pasal a fel bakah kan chhungte an fel em a, ka buai tur ang aiin ka buai lo hlauh ṭhin zawk a.
Ka pasal chu a ṭhiante'n an fiam an fiam leh ṭhin a. Hmana an fiam ang kha ni tawh lovin fiam dân dang chî in an fiam tawh a. 'Lersia se chi ṭha' an ti an ti mai a, ani lah chu a han intithei em em mai khawp a. "A hun tak hi kan hria alawm" tiin a uang zui ve chiam zel a. Mahse a tawpah chuan "Pathian malsawmna anih hi" a ti leh ngei ngei zel.
June ni 5 a ni a, chhun lamah Remruata birthday leh kan inneih kum 11 na kan lawm avangin ka zan mu chu ka kawng a kham ṭhum mai a. Naupang muthilh fel vek hnuah U Hluzualan min hmet a, ka hahdam sawng sawng mai.
"Number panga hi kan nunah a pawimawh tiraw?" a tih chuan ka ngaihtuah chiang a. A sawi dik chiah. June ni 5 ah kan innei a, kum 5 hnuah nau kan pai a, June ni 5 ah vek kan fapa a lo piang veleh a. Kum nga dang a vai leh meuh chuan chhungkua tak tak kan ni ve ta chu ania.
"Nakkum June ni 5 ah naute dang nei leh chiah bawk ila" a rawn ti uang leh a. "I duh duh ti thei emaw hi inti suh" tiin ka lo nui hak hak a.
Kan mut tak tak hma in kum nga liam ta aṭanga kan nupa châng vawn chu kan chhiar dûn leh a. He thû hi :
I thuruatte ka zir theih nân Tihhrehawma ka lo awm kha ka tân a ṭha a ni. (Sam 119:71)
A tirah chuan mihring te tán Pathian remruat hi hriatthiam harsa hle mah se kan tana ṭha tur vek a ni. Harsatna kan tawh tam tak te khan kan nupa in hmangaihna a sawh nghet a. Tunah chuan khang hun harsa te kha kan lo paltlang lovang tih ka hläu ngawih ngawih tawh.
Hlimna tawng baw turin lungngaihna kan paltlang hmasak a ngai fo a. Beiseina Nung nei turin beidawnna kan tawn buak hmasak a ngai fo bawk. Pathian hnathawh ropui lanna turin fiahna hautak zet kan paltlang hmasak a ngaih châng a awm fo bawk a. Pathian thuruatte hrethiam thei tura hrehawmna kan paltlang hi kan tán a ṭha a ni.
A TAWP TA.
(Ka readers duhawm tak tak te min lo chhiar sak leh avangin ka lâwm e. Pathian zara dam chuan story thar pangngai tak kan chhawpchhuak vat thei turah ngai ang aw
. Ka Short Story ziah hmasa ber chu eng nge in ngaihdan lo sawi ve reng reng ula tiraw
.)