The Feared Crimson King 2

[B.laltlanhlui]

Alice POV

Sipai te'n min rawn hual vel lai chuan ka zam lutuk hi ka khawng lo chauh. Ka khur beuh beuh in ka hria, min tihlum duh mai ang em? Lal Artus, ka pa hnenah chhinchhiah na atan thu thawn nan min hmang mai ang em? Samuela pawh chu a zam ve hle in ka hria, a hawi tawn zak zak

Kan inbiak remna ang khan a hmun kan thleng ta ngei a, tinge min hual leh daih si le?

An che sawn miah lova, an helmet khum avangin an hmel ka hmu thei lo

An zinga sang ber chu a rawn kal hnai a, rangkachak rawng a inbel a, kan lam a rawn hnaih zel. A thiltihtheih tur zia a hmuh theih hial mai, kawng an lo kian sap sap mai alawm

Samuela chuan a aw a thian kharh a, Lal hmaah chuan a ṭhingṭhi a, tihtur ber hre mai lo chuan ka ṭhingṭhi ve tawp a, ka tluk loh hram ka beisei. Ka hawichhuak ngam tawh lo hrim hrim

"Aw Lalber, i hmaah Lady Alice ka rawn hruai e-" Samuela chu a ṭawng tawp chawt a

Lal chu ka lam panin a rawn kal a, Samuela chu mak ti deuhin a rawn hawi a, chu mi nunrawng hlauhawm tak chu ka lo en reng a, thla chuan a chet zawngin a inthuamna te chu a rawn kap tle sur a, tlanchhe lo tura insumtheih a ngai hle mai

Lal chuan ka bân ah vuan nghet in min pawt tho a, ka na ti chu ka lo rum nghat. Ka bân rek chu a en nghal a

Ka thinphu nasa lutuk chu ka bengah a ri vut vut mai. A thir hmaikawr chu tlem a hawng deuh a, ka bân a chhinchhiahna chu a tâ nen a inang em tih a en dun a, a hmel erawh ka hmu chiang thei lo. Min thlah hnuah min rawn en a

Ka lo hawihai hle mai. A mitmeng pawl ram chuan ka lu bur hi a hawlh tlang vek ang mai a ni. Eng nge a ngaihtuah hriat a har

"Lo kal rawh" a ti ringawt a, a ṭawng ring lo na in ka bengah chuan a khawk rum rum tho

A inher vut a, an lo chhuahna lamah a kir leh a, zui ve mai ka tum laiin a kut a rawn vai a, kal zelin "He pa hi that ang che u" a ti a

Sipai ho chuan a chem chu an phawrh a, Samuela chu an hual deuh ṭhup. A tan chuan tihngaihna a vang ve khawp ang

A hmai a dâng nghal vek a, a hlauh hmel takzet. A khur nghal char char mai

"Ngawi teh, khawngaihin!" Ka lo au a, "Khawngaihin that lo hram rawh, naupang mai a la nih saw" Lal dar ah chuan vuan in ka dil ngawng ngawng a, Samuela nen hian kan kum a inthlauh vak loh avangin ṭhian angin ka en mai a, Lal inah pawh a thawk rei tawh

"Lal in a tir mai chauh ania, thiam lohna a nei lo" ka ti leh hram a, ka aw pawh a thâm ṭuak mai

Ka sawi thui hma chuan ka biang vei lam hi a rawn thip zawk, min beng na lutuk chu leiah ka tlu khut a

"Ka thusawi chu in hre lo em ni? That rawh u ka tih chu!" Lal chuan a sipaite chu a vin leh ṭhak a, engah mah min ngaih loh hmel takzet

Nilo, Nilo, Nilo, Nilo, Nilo, Nilo, Nilo!

"Engvangin! Engvangin nge pawisawi lo chu thah i tum?" Ka vin leh hrep a, mahse ka tlai hret a ni. Samuela a awm tawh lo tih ka hriat rualin ka hmulthi a ding sung sung. A lu bung chu leiah nunna nei lo tih hriat zetin phulah a lo leg bam a, ka mit ka hup tawp. Ka hlau lutuk hi ka thidang dawn hialin ka hria

"Min vin leh chuan i lu i chan ve nghal ang tih hre rawh" Lal chuan min rum khum a, a vawikhatnan a mit aṭang chuan a thinlunga a vei a hmuh theih

Huatna

Ka mittui a rawn tling kuang a, ka biangah rawn luang thla in hlauhna te, thinurna leh hrilhhai na chuan min rawn tuam hlup hlup a

Samuela ruang let reng chu kan kalsan a, heng mipa ho hi ka hlau in ka haw takzet. Ka zui mai pawh chu duhtawk lovin min pawt kal lawp lawp a

A lalna ram chhung ramhnuai kan luh lai te chuan ka mittui ka khap per sawk sawk. Ka in leh chhungkua te, ka hlimna te chu ka hlat telh telh

He ramhuai zahngaihna hnuaiah tak tak hian ka awm e, tlanchhiatna tur reng ka nei lo

Sakawr tawlailir lal chuanna ngeiah chuan min ṭhut luih tir a. Kan chuanna chu lian ve hle mahse ka kawppui tur tan hi chuan a chep lam deuh chu a ni

Ka che sawn ngam tawh lo hrim hrim. A helmet chu zawimuangin a phelh a, amah chu ka en ngam lova, a rawn chet thut chuan ka phu deuh zawk. Ka biang rawn chul in ka lukhum chu a pawt thla a

Ka mittui tlakna leh ka ṭhi awrh, kawrfual thleng chuan chik zetin min thlek vang vang a, chumi hnuah rawn ṭawng chhuak in "Eng nge i hming?" A ti a

Ṭawng tum chuan ka âng zuau a, engmah ka sawi thei lo. Samuela khan ka hming a sawi tawh khan ka hre sia, tinge min zawh nawn leh tak? Hlauhna in min rawn tuam leh a

"Zawhna ka zawt che in ka hria" a tih pah chuan a meng thip ram mai

"Alice" ka ti zawi sap a

Tukverh lam chu a thlir vang vang a " 'Aw Lalber" tiin min ko tawh ang che, tihsual i neih chuan ka hrem ang che chuan ka thupek i zawm reng tur a ni. Ka thusawi chu i hria em?" A ti a

Ka lo bu nghat

Kan tlan chhung chuan engmah kan sawi tawh lo. Ka rilru in ka inbengdai char char, eng thil pawh ti ila a zia phah dawn lo tih ka hria

Min rawn melh leh ṭhin tih chu ka hria mahse tukverh darthlalang lam chu ka hawi tlat. Thim in min rawn tuam chhah luk mai

Hun te hi an kal chak riau in ka hria, kan thlen meuh chuan ni a tla fel der. Lal mi vau ching tak chu a ṭawng tawh lova, engmah ka sawi ngam bawk si lo. Vengtu sipai pahnih in ka pindan awmna tur lamah chuan min hruai a

****

Chhunzawm tur