The Feared Crimson King 3

[B.laltlanhlui]

Alice POV

Pindan pawh a ang chiah lo, mi tang te leh chhiahhlawhna te awmna a ang zawk mah. Tukverh pawh a awm lova, khum pakhat chauh, Dawhkan tereuhte, chair leh thawmhnaw dahna lian vak lo nen a awm ve hram

Ka zawhna chu sipai te chuan an chhang lova, bati an chhit en hnuah an kal sawn daih. Kawngka an kalh ri pawh ka hre thei

Hei hi em ni ka chan tur chu? Ka dam chhungin hetah hian ka tang dawn tihna em ni? Mahnia han awm chuan thil thleng tur ka ngaihtuah lawk thei a, a ṭha zawk viau mai

Ka inhnit leh feih feih a, ka awm a tawt vek. Ka mittui a rawn far fep a, ka awm zel dan tur ka hre lo nen ka rilru a buai takzet

Ka puitlin chhoh khan khuanu ruat te chuan hlimna min thlen ka lo ring ṭhin. Mahse engmah a lo nih loh hi. Ka unaupa in a kawppui a hmuh tirh khan ka pa in chaw ei khawm a rawt a, hlim takin a hmangaih a hmuh na ni chu kan lawm anih kha. Bang chu nghengin ka ke ka tawm chawt a, ka biangah mittui a rawn luang ngiai ngiai a

An in tawn hnua an inneih zui te kha tun hunah hian ka awt ve takzet. Parcival hian Lal fapa anih angin ram venhim hi a tihtur ah a ngai vak ngai lo a, mahse a kawppui a tawn hnu khan ral do chhan tur kha a nei ve tawh tlat. An in hmangaih in an hlim dun hle a ni. Tinge kei hi lawmna nei lova ka awm reng bik? Walzenor ah hian inneihna a awm dawn lo anih hmel. Engati nge Lal sual tak ber kher a lo nih le? Ka mit a thip a, ka chau zo vek

A hma zanah ka lo mu ṭha tawh lo nen ka ding hluai a, pen hnih khat ka kal leh hnuah khumah chuan ka bawk thlawp. Ka in let kual vel a, Samuela ruang ka mitthla ah a rawn lang leh a, Crimson lal min vauna kha ka ngaihtuah chhuak a, reilote hnuah ka muhil nghal bawrh bawrh

____________________________________

Kawngka inhawng thawm ah chuan ka harh a, khumah chuan ka ṭhu vat, ka lu a na ut ut mai

Vengtu Sipai chuan kawngka a rawn hawng a, min rawn pan a,kawrfual sen ban nei lo chu min pe a "Lalber chuan chaw chhun kilpui turin a beisei che, ka rawn hruai leh dawn che nia" a ti a

Nuih seih chungin lawmthu ka hrilh a, min rawn melh zeuh a, lu bu nghut in a kal liam a, zaidamna leh nungchang mawi hi hetah chuan a awm vak lo aniang a, tiin ka ngaihtuah phah neuh neuh

Lal kha hmuh leh ka ngam lo asin. Tualthattu hi engtin nge engmah thlenv lo ang maia ka hmachhawn theih ang? Thaw chhuak halh in kawr fual sen chu ka zut del del a

Muangchangin ka kawrfual chu ka phelh zal zal a, an thawmhnaw min pek chu ka ha a, ka tawk chiah. Darthlalang a awm loh avangin ka inhmeh em tih ka hre lo, pawi ka ti lem lo bawk

Darkar chanve hnuah chuan Lal chenna hall chu kan thleng a, a chhuat chu sailungvar niin carpet sen an phah a, a piah pawh sailungvar a siam vek a ni

Sasaw/sasua thinga siam kawngka lian tak lehlam lehlam ah vengtute an lo ding a, a ngaihna hre lo takin ka en reng a, mahse engmah an sawi loh avang chuan dim te in kawngka ka kik a

"Lo lut rawh!"

Min chhawn tu chu Lal a ni....

Kawngka rit tak chu ka han nam hawng a, kawngka a rawn inkhar leh nghal. Helai hmun kan thlen aṭanga a vawi khat nan ni zung chuan min rawn kap a, mahse a nuam ka ti viau mai

Room chhung ah chuan ka hawi kual a, a mawi takzet. Ban sang tak chhawhchhi rawng chu hmun hrang hrang ah a ding luah a, thinga siam dawhkan lian tak, ruai ropui an ṭheh na hmun ni awm tak a awm bawk a

A eng nuam in a ropui takzet. Room chhunga thim awmchhun chu Lalber a ni mai. Second reilote kan mit a intawng zeuh a, hnuai lam ka melh nghal daih

Ṭhu tura zaizir a min hrilh chu ka mit sir in ka hmu a, kal hma deuhin a piah chiah chair ah chuan ka ṭhu a

Dawhkan ah chuan engmah a lo awm lova, chaw chhun ei turin min ko khan ka hre sia

Ka malpui chu ka en tawp ringawt. Rei tawk fang kan ngawih hnuah chuan a rawn ṭawng chhuak a

"In Lal hian eng dawi thil nge a hman ka hre lo, mahse second khat lek paah ka kawppui i nih hi ka ring lo bur" a ti a

Ka thaw chhuak ngam tawh lo

Eng thil nge a sawi hi?

"Aw Lalber, awih a harsa ang tih ka hria alawm" ka ti tham ṭiak a

"Ṭawng turin ka ti che em ni?" Ram hmakin a rawn ti a, a meng rum si hlauhawm tak a ni

"Ti love" ka ti a

"Eng maw i sawi a?" A ti a

"Ti love, Aw Lalber" ka ti a

Chair aṭang chuan a ding hluai a, ka lam a rawn pan a

Hnuai lam melh reng chungin ka meng zau kawk a. Eng thil nge thleng dawn le? Ti nge min rinhlelh tlat le? Kei pawhin ka duh bik lo mahse kan chhinchhiahna a inang tlat bawk si

Ngaihtuah chian chuan ka tattoo chiah a hmu a, ani erawh ka hmu ve miah lo. Ka kawppui tur a ni lo aniang a, mahse General Owen khan s mit ngeia a hmuh thu kha a sawi si a

Tattoo inang kan neih loh chuan hei hi phiarrukna ah a ngai thei mai ang em tih ka ngaihtuah rum rum. Lehkhathawn ah khan mi hausa fa ang chauhin min ziak a, ka nihna tak tak hi a hre lem lo ang chu maw

Ka piah chiah a rawn thlen chuan a ding chat a, ka ban ah hmer vakin min pawt a, kawngka lehlam ah chuan min hruai a, ka ban a hmer na bawk si...

"Min tina ania...." ka ti a

Kawngka chu hawngin min la pawt reng, ka thusawi chu hre awm pawhin a lang lo

Min nam a, leiah chuan ka tlu bawk thlawp a, eng thil nge ka tih a? Tinge a thinur viau le? A ṭawng lai ka tihbuai vangin maw? Eng nge a tih ang? Engmah a sawi loh chuan engtin nge a lung ka tih awi theih ang?

Kawngka chu khar in min rawn chhuk en a, kan mit a intawng leh zuai a, ka mittui a rawn tling kuang a, ka khaw hmuh a fiah lo vek

"Tho rawh" a ti a

Ka mittui a rawn luang ngiai ngiai a

"Tho rawh ka tih chu" a rum nghut a

Ka khur char char, ka mit ka chhing a, engmah ngaihtuah loh ka duh ber. Helaia awm hi ka duh lo asin. He pa hi a hlauhawm in hriatthiam a har si. In fuih ka tum viau chungin ka che ngam eih lo

Rawn kal hnaiin ka awm ah a ṭham a, min kuai her in kan in melh kar mai, ka biang pawh a sa deuh hat hat. Min rawn thawk khum ham ham a, ka chil ka hak nghal bawrh bawrh, ka inbengdai hram hram a ni

"Ka sawi chiang leh ang. LAL KA NIH HI, eng anga mi hausa fanu pawh ni la, he ram hi ka ta a ni. Ka awpna hnuaiah i awm a, thu i awih loh chuan ka sawi lawk sa vek kha" a tih lai chuan chil ka lem khawlh a, thawk harsa ka va ti tak

"I hun ṭha neih tawp ber anih hi, ka sawi anga i tih loh chuan i tuar ang, i hrethiam em?" A ti a

****

Chhunzawm tur