The Feared Crimson King 4

[B.laltlanhlui]

Alice POV

Min thlah a, chhuata ka tlu ka thaw leh hma chuan rang lutuk in ka lo bu nghat

"A ṭha e, tunah tho rawh" a ti a

Ka chakna zawng zawng sawm khawm in ka tho thei hram. Khur deuh dar dar in ka ding a. Ka lak aṭang hian eng nge a duh le? A kawppui ka nih a rin loh chuan ti nge hetah min awm tir le? Inzawmna hi a ring lo tihna em ni?

"Inphelh rawh" a ti a, a aw ah chuan ngaihno beina pakhat mah a awm lo

Eng a? Ka hriatsual aniang a, khawngaihin ka hriatsual tih min hrilh hram rawh

"INPHELH RAWH!" min rawn vin leh ṭhak a

Engkim hi a vir muai muai a ni ber mai "Ngawi teh, eng maw i sawi?" Ka ti a

"Ka sawi chiang viau lo em ni?" A ti a

Ka kut kuangkuah in ka inveng ran a, ka thaw chhuak ngam tawh lo, hei hi thleng tur a ni lo asin

Min rawn pan a, a thinur leh tawh viau mai, hnung lamah ka tawlh a

"Nilo, Aw Lalber khawngaihin-" ka kawrfual rawn phelh a tum chu ka lo dang a

Hlauhna chuan min bual chhuak vek, ka tlan thut a, awih harsa ka va ti em. Thing kawngka lian tak chu theihtawp in ka chum a, ka tlan chak hle bawk. Ka tlanna lamah naupang lo ding chu ka su tlu ṭep

Ban lo ding chu ka pehhel thei hram. Hawi let tawh lovin hall ah chuan ka tlan zel a, boruak ka tlachham teuh hle bawk

Ka kalna tur ber pawh hre lovin ka tlan zel a

Tinge le? Tu tan mah ka la inlhelh ngai lo asin! Hun lo kal zel tur hi ka sawi thei miah lova mahse ka hlau a ni. Ka ruh chuktuah thleng hian ka khur der der mai

Ka tlan chhung khan chhiahhlawh emaw sipai pawh ka tawk miah lo. Min rawn zui thawm pawh ka hre lo. Lal nunrawng tak leh a chhiahhlawh te'n min umzui lo a ni ngei ang. A pawi ka ti chuang lo. Kalna tur dang ka hre bawk si lo. Ka thaw a chham a, ka ke a kham vek bawk. Ka pindan kawngka ka va hmu fuh thei hram

Ka zuang lut nghal, kawngka ka khar a, thawmhnaw dahna ah ka biru a, ka khup kuahin ka ṭap nasa mai

Reilote chhung ka him thei deuhin ka hria, min hrem turin a rawn kal ang tih ka hre mai

______________________________________

*Jaxon POV* Lal unaupa naupang te

Engemaw diklo chu a awm chiang a ni, ka hre thei tlat. Ka ṭhutna aṭang tho in ka unaupa room ah thil thleng a awm em tih hriat tumin ka lut a

Ruaiṭhehna hall lam ka pan a, kawngka ka hawn lai chuan tu emaw hlauh hmel deuh mittui tla chungin a rawn tlan chhuak a, min su ṭep a ni mahse insiam ṭha in a tlan leh a

Ka hrethiam lo takzet. Tu nge anih le? Theo hian hmeichhia a ngaihven ngai si lova, an thinlung tihnat phei chu a ti ngai lo hrim hrim. Ti nge hmeichhia an awm a, a mittui a tlak le?

Ka ngaihtuah thui hma chuan kawngka lam panin thinur zetin a rawn chhuak a,kha nu kha umzui a tum a, a kut a hum ruh hle bawk. Min rawn hmu chiah a

"Theo eng thil nge thleng?" Ka ti a

"Engmah a ni lo, i lo buai ve a ngai lo" nin hmel deuhin a thaw hulh a, inbengdaih a tum tih ka hre mai

"Tu nge anih?" Ka ti a

"Tumah a ni lo. Jaxon tih tur ṭha zawk i nei lovem ni? Eng nge i rawn tih re re?" A ti a

"Thil dik lo tak thleng dawn tlatin ka hria a, ka ti dik leh ta anih hmel. Tu nge anih a? Engvanga lungawi lo viau nge i nih le?" Ka ti a

Theo chu dawhkan lian deuh sir tawp chair ah chuan a ṭhu hnawk a, ka pa thih hnu khan ruai kan siam leh tawh ngai lo

"I thilpek dawn kha a dik leh ta anih hi" lunghnur deuhin a ti a

Ka thilpek hi maw? Chutiang zawng chuan ka lo ngaihtuah ngai miah lo. Thil Thleng tur hi hriat lawkna ka lo nei ṭhin a, ka hmulthi a ding sung sung a, ka âwm leh pum te hi a na vak zel. Ka nu vase kan tih chhiat dawn zanah leh ka pa thah a nih zanah hian hetiang hian ka lo awm a ni

"Theo kan pahnih chauh kan nih hi? Ka ring thei ang che tih leh engkim ka hrilh thei ang che tih i sawi kha. Tunah hian nang pawhin min ring thei ania. Khami zan khan thu kan tiam dun kha, i la hria tiro?" Ka ti a

"Awle awle, engpawh nise sawi tawh lovang. Kha hmeichhia kha ka kawppui tura ruat a ni" a ti a

Ka lo lawm hle mai "A va lawmawm ve, kan lawm ngei tur a ni. Kan ram chhung a mite hian Lal Theodore a kawppui hi an hre ve ngei tur a ni" ka ti a

"Ngawi hmak rawh Jaxon, chutianga awlsam a ni lo" a rawn rum chhuak nghut a

Ka nui tawp hmak "Eng nge a awmzia?" Tih pahin dawhkan ah chuan ka ṭhu a

"Lyrian mi ania" a meng thip ram a

"A ni thei lo" ka ti a, mi fel tak chu an ni lo alawm. Theo kha ka pa thih hnuah a thinlung a keh chhe vek. Kar khat chhungin engmah a sawi lo, kum thum hma lam khan a ni a, Theo chu kum sawmparuk a ni a, kei erawh kum sawm mi chauh ka ni

A hma ang kha a ni tawh miah lo, kum thum a liam hnu khan invenhim tawn kan tiam anih kha

A aw thian in a sawi zawm a "Lyrian lal hnen aṭang lehkha ka dawng a, ka kawppui tur an hmuh thu a lo inziak a, Walzenor ah an rawn hruai tur thu nen, mi awmthei fanu a ni awm e" Lyrian Lal a sawi zawng chuan a mitmeng a thip ram mai

Min ṭhawng ve hle mai. Tinge hmeichhia an tam nen Lyrian mi ber kher anih le?

"Ka kawppui a ni thei lovang, Jaxon. Lal Artus hian tum a nei chiang a ni. A tattoo dik tak hi a taksa hmun dangah a awm ka ring tlat" a ti a

Ka kut ka khal niap niap a, a hnu chuan ka ṭawng chhuak thei hram "I kawppui diktak lo ni ta se" ka ti leh hram a

"Lal chu dik takin a khawsa dawn lo tih kan hriat ve ve kha, ka kawppui diktak hi a thukru anga, ka rinna a hlawh chhuah phawt hnuah min that lo ang tih tu in nge hria" amah in a phun bul bul a

Ka chhan hma chuan a tho thurh a
"Sawi tawh lovang" a ti a

Sawi chhunzawm a duh tawh loh avangin ka hnial lem lo

_______________________________________

Alice POV

Rei tawk fang chu ka biru a, kawngka rawn hawng ri ṭhuai thawm ka hria a

Ka va che chhe dawn tak em aw.....

****

Chhunzawm tur