The Feared Crimson King 7

[B.laltlanhlui]

Alice POV

Ka mittui a rawn tling kuang a, hnuai lam ka melh lai takin a rawn far thla kak. He hmunah hian ṭhatna pakhat tal hmuh ka inring kha ania, mahse tumah an awm lo. Pi Jane-i pawh a chetdan ah hian a rinawm famkim bik lo tih a lang reng

Hriatthiamna leh rinna chhete mi pakhat hnen aṭang tal hmuh ka lo inbeisei a, tu lak aṭang mah beisei chi an lo nih loh hi

Ka kawr bân in ka mittui rawn tla chu ka hru thuak a, tumah hmuh ka duh lo a ni. Ṭap hawk hawk hman ka la ni lo tlat, a hmaah ber kher chuan ni love a

Mahse insum harsa ka ti hle mai. Ka lo inhnit feih feih a, a ri ring telh telh bawk. Ṭap thei ka la ni lo asin le

________________________________________

Lal Theodore POV(Crimson Lal)

Ka hrem chhung zawng khan tukṭhuan leh zanriah ka ei apiangin ka inthiamloh na a nasa thei hle. Nuam ka ti bik chiah lo. Ka rilṭamna pawh a reh duak mai.
Lyrian mi kan man ho hi tan inah rilṭama an ṭawih ral pawhin engah mah ka ngai ngai lo.

Engvanga he hmeichhe thuthawih lo tak hian ka rilru tibuai tlat nge anih ka hrethiam thei lo. Min ti â zo vek dawn

A aia ṭha lo zawk chu khaihlum tumin ruahmanna ka lo siam anih kha. Ka kawppui tur hi anih pawh ka ring lo, chhinchhiahna te kha a lem anih ka ring a, mahse Pi Jane-i khan a taksa hmun dangah pakhat mah a hmu lo tih kha min hrilh si a

Min hrilh tirh khan dawhkan ka ti chhe ṭep lo chauh

Lyrian mi hi chu ka kawppui ah ka pawm thei lovang

Tunah hetah ni thum chhung chaw a ei loh avangin cher takin ka hmaah a rawn ding a, a mittui tla chu lantir loh hram a tum a, a va han â tak, zaidam taka be tu han rin nghal tawp mai chuh!

A insum theih hun ka nghak a, mahse a la tawp mai thei lo. Harsa a ti awm hle mai. Nin hmel zetin ka lo thaw chhuak hawk a

Pawngsual ka tum angah a ngai ania, a aia rapthlak chu ka ti ngei alawm mahse hetiang lam kher kher hi chu ka ngaihtuah loh lam tak a ni

Min lo ring chhe hle a ni mahna le. Zawi te a inhnit feih feih thawm chu ka bengah chuan ring tak a ni. A ninawm tawh hle mai

Ka va pan a, ṭap tawh lo se ka duh ber, a inher nghal vut a, inbengdaih a tum ve hle mai. A khur hlawk hlawk a, min hlau a ni chiang mai. Ka tuar thei tawh lo, ka â mai dawn

Heti chuan a ṭha dawn lo tlat, a bânah kaiin kawngka lam ka pan pui a, a rawn thaw hak a, a inhnit ring telh telh bawk a, ka vawnna chu thlah a tum a, ka chelh nghet sauh

Kawngka ka hawng a, hallway lamah kalin kailawn ah ka chhukpui a

Ka hawi let a, a mittui a rawn hnâm leh ṭiam mai. Chhanna zawngin min lo en a, ka hawisawn vat, kailawn chu kan zawh chhuk a, ka thei tawh lo. A kut lehlam in min lo nam ṭang ṭang a

Ka pawt zel a, kawngka tawp ber kan thlen chuan ni eng kan hmu ta. Huana Rose awmna ah ka hruai a, ka thlah riai riai a, ni chhuahna lam hawiin, thlifim in min rawn chhem a, ka hahdam nghal sawng sawng. Ni lum tak maiin min han chhun hi chuan ka naupan lai ka hrechhuak ṭhin

Minute reilote hnuah ka hahdam tawh lutuk tih chuan ka harh chhuak thut. Alice pawh a ṭap tawh lo. Ka kiang ah a lo awm lova, thinur zetin ka zawng kual a, chu nu mai mai chu aw!

Ka va hmu ta chiah mai

Feet ruk vela hla phulah hian a lo ṭhu a, a mit chhing siar siar in ni lam chu a lo hawi ve a, kan awmdan a inang chiah

Ka hahdam nghal huai mai

Tlanchhiat a tum lo maw? Mak ka ti hle mai. Tlanchhe duh pawh nise a tlan thui thei chuang lovang

Thli rawn tleh heuh heuh in a mittui a chhem ro a

A vawikhatna atan ka khuanu ruat chu chiang deuhin ka han en a, a hmelṭha khawp mai. A mithmul sei tak mai chu a chhin hnan a, a sam sei tak mai thliin a rawn len siau siau te, a heh mawi tak leh a biang sen suah chuan a ti lang duhawm lehzual

A awmna aṭanga hla vak lo ṭhutna lam ka pan a, hmun dang ka melh eih lo. Ni chu a ai tui ve hle mai. Keimah ang bawkin a lungngaihna a tleng fai ve a ni ngei ang

*"Lo ngaithla rawh naupang chimawm. Lyria hi an chak reng ang. Walzenor ai hian kan chak zel dawn a ni!" Kha pa sual tak kha a khi suk a*

*ka mittui a rawn luang a "Ka thungrul ve ngei ang che. I thlahte zawng zawng hi ka that vek dawn!" Ka theihtawpin ka au a, ka hrawk ah min rawn man bet a*

*"Chuti maw ni a?" Min thlah pahin a ṭhen leh suk a

*"Hremhmunah kal rawh...." khami thu kha ka sawi tawp ber a ni ta in ka hria, thim in min rawn khuh vek anih kha*

Ka lu ka thing a, ka thin a rim leh thut, Alice chu ka va pan a, ka melh rum khawp mai. A bulah ka ding tih pawh a hre lo aniang

"Tunah tho nghal rawh" ka ti vin ṭhak a

A rawn zuang tho zawt a, min rawn melh a, an inang tlang vek. Thupek an zawm ngai lo hrim hrim. Tun ṭum chu ka sawi nawn tawh dawn lo. A sam ah kek in ka pawt tho a, a na ti chu a rum nghat

Reh hlum nghal pawh ka duh viau nan ka insum hram hram a ngai

Ka inbengdai thei hram e

A rawn khur dat dat a, a mittui a rawn tling leh ṭan a

"Zahpui awm lutuk" ka ti sup a, Lal in lamah ka hruai phei nghal

Sipaite ka au a, an rawn tlan thleng nghal, la sawn vat turin ka hrilh hlawm a

An awmna lamah ka nam phei a, kawngka thlen dawnah a tlu rup mai

"Ka hmuh theih lohna turah hruai rawh u!" Sipai te chu thu ka pe a, a insiam fel hma chuan kailawn ah an hnuk chho a

A duh chu a hmu ta alawm. Ka lo khawngaih hman kha ania, ka awih thei lo hial zawk

Ka hua a ni, engemaw tum chu a nei chiang alawm

Lung bang chu ka hmachhawn a, ka hnek nawn char char, ka kut châng a rawn thi a

Bumin ka awm dawn lo hrim hrim

"Ahhhhhhh!" An rawn ti a

*****

Chhunzawm tur