The Feared Crimson King 9

[B.laltlanhlui]

Alice POV

"Thudik a ni alawm. Eng thil mah ruahmanna kan nei lo, ka tiam a che. Kan lal hian khuanu ruat hi a ring nghet bur a" ka tih lai chuan ka nghawng te hi a rawn mur thla chuai chuai mai

A meng kual leh rulh a, khawvela mi ṭha lo ber melh in melh a, ṭha lo tak a ni

A ṭawng ring in thu a nei hliah hliah "Ka sawi tawh ang khan hun ka pe leh ang che, in thil ruahman chu min hrilh mai rawh, ka hrechhuak leh si anih chuan ka hrem ngei dawn che ania" a ti a

Chil ka lem nghal dawk a, tih nat ka tum emaw a ti a ni maw? A hmelma lama ṭang ah min ngai a, thil dik lo chu a ni lo mahse tihnat ka tum lo hrim hrim

Ka hawisawn a, ka mit ka chhing daih "Thup tur engmah ka nei lo. Eng ber nge sawi tura min duh hi ka hre lo Aw Lalber" ka ti a

Min chhan hun nghakin ka thaw dep dep a "Ni rawh se" a aw ah chuan thinrimna a lang thei

Thawnthu phuahchawp ka han hrilh a, ka hmanhmawh bawk nen, a hmaa mi belhchhah tur vekin ka sawi a, kawngka inhawng ri chuan min tiharh zawk a

A hmaa ka hmuh tawh naupang bawk kha a lo ni
________________________________________

Lal Theodore POV

A va hun lo tak.....Jaxon chu rawn lut in min nuih sak a, dawhkan lam a pan a

"Lady Alice i ni tiro? Ka ti dik em?" A ti a, a hlim hmel khawp mai

"Jaxon....tun hi hun ṭha ber a ni lo" rum zetin ka lo melh a

Alice chuan Jaxon chu mak ti zetin a en a. Lal chuan Alice hi engemaw chu a hrilh chiang alawm. A thuruk ka hriatchhuah theih chuan a ṭha ngawt ang. Hei hian min pui lo ve khawp mai

"Ka hria alawm unaupa, hun ṭha a awm ngai dawn lo a ni lawm ni? Min hmel hriattir i tum hmel si lova, ka rawn lang ta mai" a ti a

Dawhkan lian deuh kal hualin Alice-i bulah a ṭhu chat a

Alice chu a hawi kual vel a, hnuai lam a melh leh daih

"I ṭawng tam vak lo a ni maw?" Tia zawtin a khi ver ver a

Alice chu a che sawn eih lo

"I chhinchhiahna ka hmu thei ang em?" Jaxon chuan phur deuhin a zawt a, ka lo inrawlh hma in a bân chu hlimin a rawn phar chhuak a, Jaxon a'n en chian sak a tum chuan a phu deuh zawk a

Jaxon chuan rum lutuk in min rawn melh a, a la naupang viau na in Alice lakah chuan lian tak a ni ringawt

"Lungngai suh, ka tina dawn lo che" Jaxon chuan dam deuhin a hrilh a

Muangchangin a mitah tak a han en a

"Ka tihpalh lutuk, ka lo la inhmelhriattir lo che a ni maw Prince Jaxon, Walzenor chhungkua a mi ka ni a, saw laia nelawm lo deuh saw ka unaupa a ni" a mit a siai zeuh a, a hmaa ka la hriat ngai loh thil thar ka hre tlay, Alice-i nui ri ker ker ri a ni

Mak ka ti lutuk a, tihtur ber pawh ka hre tawh lo, a rawn ṭawng zawm leh a

"Pawi i tih loh chuan vawi khat chiah ka lo en leh thei ang em?" A ti a, Alice chu a lo bu nghat. A bân a rawn phar chhuak leh a

"A inang chiah a ni..." Jaxon chuan a ti sup a

Chair aṭang chuan ka ding hluai a, ka ning tawh viau a ni "Vengtute u!" Room chhungah chuan ka au khawk rum rum a

Vengtu pahnih chu kawngka ah an rawn lut nghal a "Kan lo kal e, Aw Lalber" tiin an rawn lut a

"Ms Alice hi a room ah hruai chho rawh u, ka unaupa hi a fala biak lawk ka duh" ka ti a

Hmanhmawh deuhin an hruai chhuak a, ka unaupa nen chiah kan awm leh ta

Ka thaw chhuak huk a, Jaxon a sawi tur ka hre lawk sa vek

"Eng thil nge i tih a?! Engvanga hlau em em che nge a nih?" A ti a

Ka ha chang ka ṭhial ruh a "Jaxon min fiah tum suh! Lyrian mi anih kha. Eng thil nge tih a tum pawh kan hriat loh hi" ka ti a

"Ka hria alawm mahse hei hi chu thil dang daih a ni! I mi tang pawh a nih loh hi, i khuanu ruat a ni a, ngaihtuah chiang deuh teh" a kawng a dawm a

Ding hluaiin dawhkan chu ka chum bur a "I hrethiam lo anih hi. I la naupang em a, thil hlauhawm thleng tur hi i hre lo a ni. Lo tina ta che sela, ka inngaidam thei lovang. Ka pa ruang kan hmuh kha! Engmah i hre lo, chuvang chuan ka huat tur zawng rawn sawi tawh suh!" Ka ankhum vak a

Jaxon a mittui chu a rawn tling pam a, kawngka lam panin a tlan chhuak nghal

A va pawi tak em

"Jaxon, min lo nghak teh..." ka tih chuan a tlan zel a, keimah chauhin ka awm leh ta

Ka va umzui hma lawk chuan dawhkan ah ka kut ka nghat a

Ka hmu chhuak rang khawp mai. Kan intih thiam loh apianga a lo bihruk ṭhin na ah a lo awm a

Ka pa te pindan kawngka chu ka hawng a, puan in an lo khuh vek a, bawlhhlawh a tam hle bawk. Bati pakhat mah an chhi lova, a tlai tawh bawk si, ni zung tlem rawn lang chuan ka kalna tur a rawn chhun a

Jaxon chu room lai tak puan a an khuh chair ah chuan ṭhu in chhungkaw thlalak a lo en a, Lal chhuanawm tak leh a fate pahnih thlalak a ni. A hlimna leh lawmna kan ni chiang alawm

Jaxon a awmna lam ka pan a, chair lu lamah chuan ka kut ka nghat a

"Ka tihpalh lutuk Jaxon, ka lo insum hman lo a ni. Ankhum tur che ka ni lo asin" ka ti zawi sup a

Jzxon chuan a kawrbân in a hmai a hru a "Ka nu leh pa te khan kan thil tih ah hian min chhuang se ka duh mai ania" a ti a

Min chhuang ang em le? He Lalram chhungah hian khauh takin ro ka rel a, kan nihna hi tumahin zah lo taka min nam nul mai mai ka phal lo hrim hrim

"Ka pa khan i khuanu ruat hi i hmuh tih rawn hre ta se, a chhuan che i ring em?" A tih laiin chair chu thlah in ka in humruh a "ka ring chiah lo" ka ti lawi rut a

"Hun pe hram rawh Theo, engkim hian chhan a neih vek ka ring....." a ti a

*****

Chhunzawm tur