Kan Nupa(Short Story) By CVL.Awmpuii

[CVL Awmpuii]

KAN NUPA (Short Story)

By CVL.Awmpuii



Pathianin mihring a siam khan mipa amah chauha awm kha ṭha a ti lova, mipa nakruh hmangin a kawppui âwm mi hmeichhia a siam tel anih kha. Chi tam tak thlah a, leilung luah khat tura tih kan ni bawk a. Chi thlah malsawmna te hi Pathian lak aṭanga chhuak a ni tih a chiang hle.



Chhungkaw din turin mipa leh hmeichhia nupa ah kan insiam a. A inṭanna chu inhmel duhna leh hmangaihna te a ni. Mahse chu thil chu pasal neiin, nau hial pai mêk mah ila ka la pawh pha ve lova, ka la hrethiam pha ve chiah lo.



Rochanmawii ka ni a, thla leh lawk hi ka pianchamphaphak vawi sawmthumna tur a ni. Nikum kum tir lam khan Biakin hawng in pasal ka nei ve rawih a, induhna leh inhmangaihna tel miah lovin ka pasal nen hian kan innei a. Ṭhiante leh chhungte thurâwn avanga innei ve ṭhuai kan ni ti ila ka sawi sual tam lovang.



Hmeichhe zei hawi lo leh awm ve tawp ang chî hi ka ni a, ka vanglai hun zawng zawng lehkha zir nan leh sum thawh chhuah nan ka hmang ti tawp mai ang. Kohhran erawh ka bel ve tlat thung a. Mipa ka ngaihsak ngai lova, a ruka hmelṭha tih leh fel tih deuh deuh hi chu ka nei ve ṭhin. Mahse ka vei zui ngai lova, ka rilruah pawh an thawk na hran lo bawk. Ka piantirh aṭanga tun thleng hian bialpa ti a sawi tur ka la nei miah lo! Ka pasal ngei pawh hi kan inneih hma khan ka bialpa a ni chuanglo.



Mi te'n an ngaihzawngte nena hun hlimawm an hman ṭhin an sawi angte hi sawi tur ka nei ve lova. Romantic taka khawlaia inkaih te, romantic taka restaurant-a thil ei dun te, romantic taka movies en dun te, inngaizawng te'n an thiltih ang hrim hrim, thil romantic reng reng hian ka nunah hmun a chang ve pha lo. Chuti chung chuan midang ngaihzawng nei em em te hi ka awt ngai hran lo bawk. Heng avangte hian mi pangngai ka ni lo emaw tih châng ka ngah a, mahse ka pangngai fú in ka hre tho bawk si.




Ngaihzawng lamah ka hawiharh lo viau na in ṭhenrual kawm ka harsat lova, keima tawkah ṭhian pawh ka ngah ve viau chuan ka hria. Mi Nu leh Pa te hian min duhsak thei em em bawk a, nihlawh ka inti viau ṭhin. Ngaihzawng nei theilo tur khawpa luck lo chu ka ni bik lovin ka hria. Hmelchhia ti a sawi tur ka ni lova, hmelṭha min ti tute pawh an awm ve nuk mai.




Kum 29 thlenga ngaihzawng ka neih loh chhan chu "Pawl 12 ka Pass hma chu bialpa ka nei lovang" ka lo tih ṭhin vang kha ni ta berin ka hria. Mipain min lo biak te khan a âwm tâwk bakin ka chhang ngai lova, pawl 12 ka thlîr rân ṭhin a. Mahse pawl 12 chu ka Pass ta chêng a, ka lo lung fing ve tawh bawk nen ngaihzawng neih kha ka ngam ta tlat lova. Rilru nat ka hlau a, ka ṭhiante lah khan "I ngaihsak ngai si lova, i neih ve hunah chuan i la na viau ang" tiin min sawi ṭhaih ṭhin a. Min lo betu te zingah khan min han hîp ngawih ngawih tu an awm loh vang pawh a ni pakhat. Ka indaidanna bang su chhe thei khawpa min dek zartu kha an awm tlat lo. Ka upa telh telh a, ka duh uluk telh telh mai bawk si a. Tuman ngaihzawng enah min en ta lo ni ber in ka hria.




Ka tleirawl chhuah tirh phat aṭanga ka nulât tawp ṭhak thlenga min hre tute chuan pasal ka nei ve ta mai hi mak an ti a, inhmeh lo min ti hlawm hle bawk. Mahse pasal chu ka nei ve ta mai si a, nau hial ka la pai mêk zui a ni a. Kei ngei pawh hian in awih loh châng ka la ngah mai.



Ka pasal, Zonunkima nen hian in anna tam tak kan nei. Keimah ang chiaha hmeichhe ngaihsak thiam lo, mipa zei hawi lo ngang hi a ni a. Ngaihzawng a neih âwm hi ka la hre miah lo, mahse kan inneih hnu hian a ṭhiante'n an fiam zuk zuk zel a. Ṭhiante kaltlang in a tlangval tak tak lai khan pahnih khat vêl chu a lo nei ve zeuh tawh ani âwm e. Kum 36 lai a ni tawh a, mipa hmelchhe lo leh hna mumal tak nei a ni a, ngaihzawng a lo nei ve tawh pawh chu thil âwm lo a ni hran lo.



Vêng khat kan nih avangin a chanchin hi ka hre ve zul a. Mi sawi aṭang kher lo pawhin hmuh dân tâwk ka lo nei ve ṭhin. Mipa ṭawng tam lo, a mawhphurhna a tla tawh chu ngawi reng a ti mawp mawp mai ṭhin hi a ni a. Ṭawng tlem viau e ti lo chuan a ngaihdan a sawi hreh ngai lova. KṬP Leader a ni ṭhin a, KṬP thiltih velah pawh duhkhawp loh a neih chuan ṭha takin a sawi mai zel. Tuman an ning ngai lova, an chung en ṭhup ni ber hian ka hre ṭhin. Chuti chung chuan midangte ngaihdan hnualsuat a, mahni thu duh ang deuh kha a ni chuang miah lo. Ṭawng tam lo mah se leadership a nei ṭha a, midang kaihhruai a thiam tlat. A mipatpuite hlei hlei hian an ngaina in an zah thiam ṭhin.



Kan inneih hma hian Tual Upa ah an thlang tling a, kei ngei pawhin ka thlang ve. Tlangvâl laia Tual Upa ni thei ngat kha a ni ve a, ka pasal ni tawh mah se ngaihsanna tam tak ka nei. KṬP-ah inhmang dûn mah ila kan veng hi a zau ve thawkhat a, inhriat kilh kelh a har a. Hruaitu an nihna angin ka hria a nimai a, amah tak phei chuan mimal taka min hriatna hi kan inneih hma lawk chauh kha a ni.




Thil engkim inṭanna chu KṬP in hla kan zir aṭangin ania. Kan hla zir zo chu haw mai lovin Biakin bula dawr tê ah ka peng kawi a. Ka mamawh ang ka lei zawh hnu chuan Biakin lam bawk ka pan leh a, ka scooty ka la chhuak tur chu a nuar ta tlat pek a. Midang motor-a beh mai turin an haw fai duak tawh bawk si. Rilru hah fe a tih nun tuma ka lo buaipui lai chuan min rawn hmu a. A han bei ve ngial a, a nung ṭha duh der bawk silo. "Scooty chu tihian awm rih se, pawi i tih loh chuan ka thlah haw mai ang che chu" a ti ta tawp a.Kê a kal ralah chuan zan a rei tawh bakah kan in a hla tham ve bawk si a. Duhthlan tur dang awm ta lo chu ka lo 'aw' ve ta tawp a.




A bike a rawn lâk chhuah lai chuan "Zanin chu car ka lo keng lova, bike chuan i hreh lovang tiraw?" a ti dam thlup a. "Hreh love a pawilo" ka lo ti vat a. Hreh thei dinhmunah ka ding miau lo a ni. Kan han inphur ta chu ka tîm em em mai khawp a, a hrethiam ve deuh nge "Min vuan hreh suh aw" te chu a ti ve a. Kei ai mahin a inthlahrun hmel zawkin ka hria. Kan tlân chhuah hnu rei vak lovah kan veng Coffee dawr lûn zet kan han thleng chu ka beisei loh lutukin KṬP member ṭhenkhat te coffee in in an lo châwl ṭhup mai a. An khat hmur maiin ka hria, kan lam an lo hawi ve tho avangin en pawh ka en rei ngam lo, lehlam ka hawi ta daih a. Ka hlauh ang ngeiin an lo "Ehh" ta dual mai. An ṭhahnem si, an nui zui hawk hawk a, an thâwm chu ring tak a ni. Ka zah luatah U Zonuna kawngah chuan ka ṭham vak a. Heti em em a zah hi ka la nei ngailo. Kan tlân pelh hnu fe ah pawh ka la pangngai thei mai lo.




U Zonuna'n "Khawi lai velah hian maw in awm?" a rawn tih takah chuan zâm âw zetin ka chhang ve thei ta hram a. Kan inkawta ka chhuk chiah chu ka thaw huai mai. Lâwmthu ka hrilh a, "I scooty kha i ngaihven zui vat dâwn ania" a tih chuan "Awle" ka lo ti ṭha ve mai a. Nichin lawka thil thleng khan a nghawng ve vak lo anih hmel, a landan a pangngai reng mai.



Khami zan aṭang khan ṭhiante dem rawn kan hlawh a, a hming maia min hre tute paw'n min chîk ṭan a. U Zonuna nen kan inkarah lah engmah a awm der silo. Ka ṭhiante bulah chuan ka insawi thiam thei hram a, mahse inngaizawng turin min duhsak ta tlat pek a. "Lo ngaihtuah chhuak daih tawh tur kan nia, kan lo ngaihtuah chhuak har mah mah a ni. In mizia pawh a inmil a, in inhmeh dawn lutuk ringawt. Ni lo mah ula kan chhaih ni dâwn che u" an ti ṭung a. An ti âwm ang lo ka tih bakah U Zonuna lakah pawh ka inthiamlo ngang mai.



Hun a kal leh deuh a, U Zonuna ṭhiante leh KṬP hruaitu ṭhenkhat te pawhin min chhaih ta fo mai. Engah mah ngaih loh tum paw'n a harsa. Min sawipui titih ta hial a. "Ka duhlo" tiin ṭang tlat mah ila "In pahnih chuan engtikah mah in insawi kaw lovang" min ti zek zel a. Kei min sawipui chu sawi loh U Zonuna pawh an lo sawipui nasa tih ka hre lehzel a, ka zahna a thuah hnih thuah thum chho mawlh mawlh a ni ber e. Kan chhungte ve ve phei chuan kan inngaizawng tak tak emaw an ti a. U Zonuna ṭhiante sawi danin U Zonuna chhungte chu keimahah an lo hmin viau a ni âwm a. Ka chhungte lah hian fel an tiin mi chhungkaw makpa awh rawn a nihna an lo hre ve si a. "Chhuah reng reng suh" min ti fo a. Kan pahnih inkarah lah engmah a awm der silo. Insawi thiam ka tum nasat pauh leh min awihlo ting in ka hre ṭhin. Kan inhmuh fuh palh te hian ka lâi huih zel a,ani pawh a lâi ve ṭhin thovin ka hria. Mahse mipa tih takah kei ai chuan a la awm thiam zawk.



Inngaizawng thana kan than hnu thlà thumna velah amah zawk hian thâwm a rawn nei ta a. WhatsApp-ah min rawn bia in "Mi te min sawi dân avang hian hrehawm i ti em?" tih tê mai hi a rawn thawn a. Number takngial pawh kan innei tawn lova, heti chung hian inngaizawng thanin kan thang chu a ni sia tih ringawt ka rilru ah a lo awm daih thung.



A message ka chhiar hnu rei fe ah "A nuam zawk zawk miah lo, nang pawh hrehawm i ti ve tho em?" ka va ti lêt ve a. "Keima lamah chuan ka insiamrem thei" a rawn ti daih a. A thusawi awmzia ka hriat loh em avangin ka chhang zui tawhlo.



Ṭum khat chu ka ṭhiante leh a ṭhiante'n kan inhmuh theih nan ruahmanna an lo siam pek a. An thil tum hrelo lutukin Folkland-a lên an rawtna chu ka lo pawmpui ve mai a. An ṭhianho leh kan ṭhianho kan inhmu khawm ta mai. U Zonuna ṭhiante chu Kohhranah pawh nihna chanvo chelh neuh neuh an ni nuk a, an zahawm khup hlawm a. Mahse kan ṭhianho ze mil tawkin an insiamrem ve thiam tlat a. An rawt chhante ve ve chu kan hamhaih a, a hlim lo ber kan ni âwm e.



Ṭhut chawlhna a kan ṭhut lai chuan min ṭhut dun tir leh ta tlat pek a. A hmeichhia zawk tih takah an lakah chuan ka titau deuh titih a, U Zonuna pawh chuan a ning ve ta deuhin ka hria. "In ti mah mah lo maw" a ti ve ta sup a, a âw a dam thlup na in a khauh viau thung.



U Siama chuan "Hetia kan nawr kal loh che u chuan engah mah in chhuak dâwn lo. Inngaihtuah harh ve zawk teh u, heti tak hian kan duhsak dûn che u a. A tum tal te chu tum ve ula, lên tar in duh em ni?" a lo ti dam ve thlup a. U Siama hi kan KṬP hruaitute zing ami tho ani a, U Zonuna nen hian an inzui chawt ṭhin.



Ka ṭhiante zinga ka bêl deuh bîk Ziri pawh chuan "Nangni tluka duhsak hi ka la nei ngai miah lo ania aw, in kaw lo dûn mai bawk si. Inhmangaih chawp te chu a theih lutuk ringawt, in belchiang ve ula, in inhrechiang ang a, in induh tawn mai ang" a lo ti ve vat a.


Kan ṭhiante min tih dân em em hi hmù zo lo dûn lutuk te pawh kan ang lek lek tawhin ka hria. Min beidawn hnawn deuh tlat alawm. Ka rilru an ti kawi sawi zo dâwn tlat.



"Kawppui turte chu keimahni'n kan zawng ve bawk ang chu. In ti âwm ang lo emai, phû tâwk te chu kan nei ve bawk alawm. Hetianga hmù zo lo lutuk anga min hmehbel in tum tlat hi a thanat thlak ve tho a nia aw. Thil nuam tak a ni miahlo" ka ti ve ta hlak hlak a. Ka beisei loh zetin an nui ta huk hlawm a, U Zonuna pawh a lo khi ve suk mai.



Chutah U Siama chuan "In hmel leh pian, in nungchang en hian in hmu zo lutuk ang tih kan hria alawm. Mahse inngaihzawnna kawngah hi chuan in zeihawi lo ve ve a, keini kan inrawlh mai loh chuan in kaw zo dâwn lo" a lo ti veleh a. Midang pawhin an lo tuihnih tliar tliar hlawm a. An duh ang anga min awm tir an tum ni berin ka hria. Kan folkland lêng pawh chu khaw thim dawnah kan haw ta chiah a. Min tihah ngawih ngawih, thla te min lâk dun tir thul. U Zonuna lah khan a hnial thiam vak lova, kei lah in a ṭhiante ka lo zah ve bawk si. An tih ang angin kan awm ve ta tawp kha ania.





U Zonuna Tual Upa a kan thlang tling ta chiah chu "Tual Upa nupui tur" tiin min chhaih zui leh a. Kohhran Nu leh Pa te lah chuan ṭhiante min hmehbel zarah kan inngaizawng emaw an la ti zawm zel a. "In kum a naupang tawhlo ve ve a, innei vat teh u. Zonuna hi Upa ah an nem nghet hman hlauh ange" tiin fiamthu ti tak deuh hian min ti ṭhin a. Ka insawi thiam seng tawhlo, ka nuih liam tawp zel.




U Zonuna chhungte lah hian eng ka nih loh nen min be ṭha em em mai a. An fapa tán min duh zia an tilang hreh ngai lova, chhungkaw fel tak chu an niin ka hria. Mahse lâwm tur nge lâwm loh tur pawh ka hrethiam tawhlo. U Zonuna nen ber engmah kan ni bawk silo. Min chhaih ṭhin avang hian ka va duh tâk phei chu ka hrelo na in ka hmuh châng hian a hma ang ngawt kha chuan awm mai mai a har tawh. Ka lâi em em zel.




Ṭum khat chu ka Nu leh Pa te'n U Zonuna chungchangah khunkhan zetin min titi pui a. Zep nei hauh lovin ka hrilh fai ta kelh a, ka Nu chuan pawi a ti khawp mai, kan lo inngaizawng der si lova. Mahse mipa rintlak a nih zia leh innghahna tlâk a nih zia a hriat avangin "Tu paw'n an duhsak vek che u a, keichu makpa atân ka duh asin" a la ti hram a. Ka pa pawh chuan "Tunlaiah Zonuna te ang mipa hi an vâng tawh asin mawle" a ti ve vawng vawng a. U Zonuna chhungten min duh ang chiahin ka chhungte pawh hian an duh ve tih ka hai lo.




Midang min sawi dân leh ngaihdan te chu haider tumin hna ka thawk nasa zual sauh a. Master ka zawh hnu lawk khan sawrkar Department pakhat hnuaiah hna ka dil ve a, ka hmù ve hlauh mai a. Hlawh pawh a chhe zawk zawk lova, ka tum ni chiah lo mah se ka tui tâk phian avangin ka thawk zui ve ta zel chu ania.



Ka hna bâng haw mai ka tum chu ka beisei loh lutukin U Zonuna'n kan office kawtah min lo nghak reng a. Min hmuh rual chuan min lo pan vat a, "Vawiin tlaiah tih tur pawimawh i nei em le" a tih chuan "Tinge?" ka lo ti ve thung a. Kan awmdan aṭang chuan kan lâi ve ve in ka hria. "Ka chhungten zanriah lo ei turin an duh che a" a tih chuan ka ang pam mai. Ka mak ti hmel chu hrethiam in "Aaa...insawifiah vek sên pawh a nilo. Eng lo ania, ka ngaihzawng ah an ngai nghet hmiah tawh che" a ti nawi nuaih a. A landan aṭang chuan a chhungte lakah a insawi fihlim zo thlawt lo anih hmel e. Mipa puitling tak ni mah se nawi rukna a lo neih ve zia ka hre ta mai.



"Awi U Zonun..." ka ti hluai a, tihngaihna pawh ka hre tawhlo. "Chutiang ngawt te chu a, mi hi an ti âwm ang lo e" ka ti ve ringawt a. Sawi tur a vâng duh ngei mai. Chutah U Zonuna chuan "Vawiin tlai chu min zui haw hram la, kan insawi fihlim theihna tur a ni mahna" a ti zawi sup a. A zâm ve hmêl khawp mai. Ka inngaihtuah ren rawn hnuah a rawtna chu ka pawm ta a. Tunah hian kan insawi fihlim thei anih ngat chuan kan zalen ve ve tawh ang a, a ṭha ngawt tak ang.



Kan in lamah inthlak ve phawt a, ka chhungte hrilh hriat ve phawt ka duh avangin min zui haw leh tê tê a. Ka Nu leh Pa te chuan kan inzui haw thut chu mak an ti tih ka hria, mahse insiamrem vat in an lo be nghal bawrh bawrh a. Ka inbual sawk sawk a, awm hmun kawr nena zui tura min tih avangin ka awm hmun kawr zahpuiawm loh tâwk vêl chu ka ha a. Kan inzui chhuak leh ta a. Car a ken tho avangin motor keng lo turin min ti a, "Ka thlah leh mai ang che" a ti bawk a. Motor chu ka keng ta lo.




An in kan va thlen chuan min lo lâwm thiam khawp mai. Kan lo inhre sa ve tho bawk a, pangngai takin ka awm a. Mahse an fapa bialnu anga min treat bakah U Zonuna farnu te chuan min fiam hlut zel a, ka zâm lek lek zel.



Zanriah ei hma in chhung inkhawm kan hmang a, pâ ber chuan a ṭawngṭaina ah U Zonuna nen min la chhan tel zui, Thianghlim taka inzui a, Biakin hawng ngeia nupaa kan insiam theih nan min ṭawngṭai sak a. Ka îp chawih chawih mai.



Zanriah kan han ei ta chu kan insawi fihlim thei dâwn emaw ka tih laiin kan phat mawi tumna te chu kan zah vang emaw tii. fiamthu ah min lâk sak zel a. U Zonuna a lo insawi kaw thei miah lo kha ka hriatthiam pui ta ruak mai. Ṭawngkam kan thiamlo dun si, kan insawi awk nawk nawk zawk ani ber a.



U Zonuna te ina zanriah ka ei aṭangin kar khat a liam leh tawh a. Khata ṭang ngat phei kha chuan dem rawn kan hlawh zual a, kan inngaihzawn miah loh laiin innei mai tur thanin kan thang der tawh. Kan ṭhiante ve ve aṭangin min la nawr ngat ngat reng a. "In inneih loh chuan a zahthlak tawh viau ang" min ti nghe nghe. Mahse kan inneih ngawt chhan tur ka hre silo.




Ṭum khat chu U Zonun a'n min hmuh a duh thû a rawn sawi a, ka lo hnial vat thung a. "Miin min hmehbel nasa tawh si, an thusawi ti tam turin awm lovang" ka ti a. Mahse ka beisei loh lutukin zanah a lo lêng hlawl mai a. Ka chhungte lah chu inti hrethiam fahran in an han mu hma em em hlawm khawp a.



Zan dár 9 velah chuan U Zonuna nen chauh kan ṭhu ta ran mai. Rei fe chu a tu amah kan ṭawng lova, zahzelah phone ka tuai ka tuai a, ani chuan TV a en thung. A hnu deuhah chuan "Rote" a rawn ti dam thlup a. Kan mit leh mit a intawng ta siah mai.



"Eng angin nge min ngaih?" a rawn ti teh tawp a, "Engti zawngin?" ka tih chuan " Engti zawng pawhin" a lo ti leh mai a. Ngawi rengin amah ka ngaihdan chu ka ngaihtuah ta rauh rauh a. Han chhan mai dân tur ka hrelo, han chhang lo ngawt dâwn ila chhanna beisei in min melh rûn tawh mai si. "I fel a, hna ṭha tak i nei a, kohhran tan i ṭangkai bawk a, aaa...mipa ṭha i nia lawm " ka ti nawi niai a. Chutiang bâk chuan sawi thui vak ngaihna ka hrelo.



"Mi hian kan pahnih inkar hi an ngaihven reng tih i hria em?" a rawn ti leh tawl a, chu zawng a sawi ngai lo paw'n ka hrechiang viau asin mawle. "Kan inneih loh chuan a zahthlak viau ang" a rawn ti lehpek a. A ṭhiante khan a thluak burah eng eng emawni an tuh ni ngei tur a ni.



"Aaa...inneih chhan tur kan nei hlei nem, inngaihzawn pawh kan inngaihzawn loh hi" melh pawh melh ṭha ngam lo hian ka lo ti veleh a. Min melh rûn bawk si a, nuam pawh ka tilo. Chutah U Zonuna chuan "Ka Nu leh Pa te pawh hi inngaizawng miah lova chhungte vanga innei an nia, ka ṭhiante ah pawh hian chutiang chu ka hre nual a. Rin ai takin an innei rei thei asin" a ti duah a. Ka melh haw tawh mai.



"Eng chiah nge sawi i tum a?" ka ti ta tawp a, a thusawi tum tak hi ka man lo. A mitmeng chu chhiar ngial ka tum a, ka chhiar thiam bawk silo.



U Zonuna chuan "Pasal neih hi i ngaihtuah chhin ve tawh ngai em? Nupui nei rual ka ni tawh a, pasal nei rual i ni tawh bawk a. A bâk chu lo ngaihtuah zui ve chhin teh" tiin a tho thurh a, a mitmenga zâm hmêl chu ka hmù hman zuai. Mahse kan in aṭanga a chhuah zui tâk daihah chuan bangbo deuhin a chhuahna kawngkhar lam chu ka en reng ringawt a.



Zan mut hmunah ka ngaihtuah zui a, mi mãwl ka ni lova, min iai vak lo tih ka hrethiam mai. Mahse min duhin ka hre chuang bawk silo. A ṭhiante min hmehbel nasat lutuk avangin a rilru buai hian min neih a duh thut te hi a ni mai ang em? Ka ngaihtuahna chu a tibuai hneh vet vet khawp mai.



Chumi zan aṭang chuan U Zonuna chu a lo lêng ve ta zeuh zeuh a. Kei nen tak chuan kan inkawm tam lo, ka chhungte nen hian an inkawm ṭhin a. Ka chhungte mut hnu lawkah a haw zui daih zel a. Ka tân pawh a awmdan hi hriatthiam har tak a ni.



Ṭum khat chu U Siama'n a rawn lên pui a, kan ri ve laih laih a. Ka chhungte mut hnu chuan U Zonuna chu a tho leh nghal tharh a, "Ka lo va haw ange" tiin a kal zui nghal daih a. U Siama nen chauh kan bâng ta lel mai. A kal liam ta maw tihah chuan U Siama chu a nui ruh ruh a. "Ka ṭhiana hi chu aw...mahni pawh insawi kaw zo lo" tiin a phun sup a, a nuih a la zat hmêl ngang mai.



Chutah U Siama chuan khunkhan zetin min titi pui ta a, U Zonuna chuan nupui a min neih a duh hi a lo ni a. "Engtin nge a thluak hi in suk sak a, chutiang ringawt te chu a" ka ti hlak hlak a. Hetiang rilru a put chhan hi a ṭhiante vang a ni tih ka hrechiang ve tâwk.



U Siama chuan "Kan lâwm naklaia, a duh thû che sawi miah lo mah se a duh loh thû che pawh a sawi chuang lova. Inneih a pawi tih loh thû chiah a sawi. Nupui pasal neih hi chu risk a ngaihna chen hi a awm ve a. Risk ve tawp mai rawh, i risk sual lovang. Ka ṭhianpa a ni na vang vangin Zonuna hi chu ka chhuang ve ania. I tân pasal tlak a ni dâwn tih ka chiang lutuk tlat. Nang paw'n tunah hian a ṭhat lohna lai sawi tur i hre tawp nang" a ti duah a. Han chhan lêt ve mai dân tur pawh ka hrelo.




Sawi zawm leh in "Hmeichhe rilru kawi sawi deuh nupui ah a nei ang tih hi kan hlau ber a, a ṭhian kawm ve ber ka nih avang hian a chhungte paw'n min chah uluk ṭhin. Fing deuh kan duhpui vak lova..." a tih lai chuan "Ka mãwl in ti tihna em ni?" ka lo ti hlak a. U Siama chu a nui kur kur a "Aaa...i mãwl pawh a ni chuang lo...mahse...i fing phakar lova. Chu tak chu kan duhna che ania, nihlawh inti hle ta che" a lo ti zaih a. A lawmawm viau lo, a huat hleih theih bawk silo ka melh rum vak ringawt a.



A haw dâwn chuan inngaihtuah zui turin min chah a, ngaihtuah zui vak ngaihna pawh ka hrelo. Ka rilru buai lutuk chu Ziri ka call ta ringawt a, keimah chauh chuan ka pai dai theilo. Ziri lah chu a lo phûr nasa mai si, naktuka a lo kal nghal tur thû leh hmaichhana sawi a duh thû sawi in a dah hmak a. A tukah chuan a lo kal ta ngei a. U Zonuna a rawn sawi vuk chûk a, nei ngei ngei turin min ti bawk. U Siama sawi ang chiahin "Nupui pasal neih hi risk a ngai ve alawm, U Zonuna hi chu i risk sual miah lovang " a ti a. Hnial kalh phet tumin "Chu pawh nise neih ringawt chu a" ka lo ti hram a.




Ka hnial peih lutuk chu a lungawi lo ngang aniang min zilh nek a. "In ngaihtuah chiang rawh, a tir phat aṭangin kan duhpui che a. Chhan a awm a nimai, a fel êm hi U Zonuna te chu, tlemin a zei hawi lo tih mai ania. Mahse hetiang hi an rinawm tûk duh zawk ania aw. Induh khum turin engmah i nih loh kha, amah lo chu hetianga nei duhtu che an awm dâwn lo. Nula senior phunchiar nih chiah i hmabak mai ang. I nau ten nupui an nei duh ang a, an ngaihzawng ten nangmah vangin an neih duh loh phah mai tur asin. 'An û, Nula senior deuh a awm' tiin an nuih mai ang che. Chance ṭha i neih hi bawhpelh suh" min ti zek a. A sawi dik lutuk vang nge ka haw reuh tak tak ani.



"Min tih dân hi hmu zo lo thlawt te pawh ka ang alawm, a rilru nat thlak ve tho ania" ka tih chuan "I hmù zo chuang em ni?" a lo ti zat a. Ka melh rum vak ringawt. Dik tak chuan tunah tak hian mipa ka thi bul ṭhak. Kan luck loh vanglai tak a ni a, Ziri tluka hrechiang tur hi an awm lo. Ka tleirawl chhuah tirha ka lo lerh thak tâk lo te kha pawi ka ti hnuhnawh viau.



Ziri chuan ka chhungte a lo hrilh hria aniang, min zawt veleh a. Tlang takin ka sawi a, U Zonuna ah chuan an hmin em em mai bawk si a. Ka Nu phei chuan hnar lo turin min ti nasa. "Kan inngaizawng bawk silo" ka tih lahin "Zonuna hi chu hmangaih chawp a har dâwnlo" a ti teh ngawt a. Amah zawk hi U Zonuna zunin a buak â tawh ni berin ka hria.




U Zonuna lah chu ngawrh zet hian a lo lêng tlut tlut mai si a, ka duh pawh ka hre lo na chutia lo lêng ta tlut tlut chu rilru ka lo pe ve lo theilo a. A ṭhiante leh ka ṭhiante chuan ka inpeih hun chiah min nghak tawh ani ber. Dik tak chuan neih risk ṭhuai chu ka ngaihtuah veleh zeuh ṭhin a. Mahse amah ber hian engmah a sawi leh tawh bawk silo.



Kan kohhranin Upa kan thlang leh a, upa pathum kan dil zingah a tling awmchhun a ni leh ta nawlh a. Ṭhiante fiam ka hlawh leh nasa, "An nem ngheh hmaa i neih ngei ngei a ngai tawh" min ti chhen a. Amah U Zonuna tak pawh a mangang ve ta deuh nge ka hrelo, tlangval laia nem ngheh nih êm chu a hreh ve aniang inneih chungchang chu tlang takin min sawipui leh ta a. Ka hnar lova, âw ka pawh chuang lo bawk a. Inngaihtuahna hun tlem tal min pe leh turin ka ti a. Kar khat chhung inngaihtuahna hun chu min pe in lên pawh a rawn lêng rih lova. Ka chhungte leh ṭhiante ka râwn leh ta tawp a, an chhanna tur hre sa tho mah ila keimahin thû ka ti tlu ngam thlawt lo. Ka ṭawngṭaina ah te chuan ka hlan ve a, mahse ka nuih a za tlat, ka zak chem chem zel.




Kar khat ṭha zet ka inngaihtuah hnu chuan chhanna ka nei ta, U Zonuna pawh a rawn lang nghal nalh a. Inneih mai ka pawi tih loh thû chu ka hrilh ve ta nge nge a. Lâwm hmel pawh a pu chuang lo "I ti ṭha lutuk" min ti daih a. Ka inchhir leh nghal ṭep a ni, mahse "Ka ti beidawng miah lovang che. Min nei phawt la, pasal ṭha tak nih ka tum ang" a tih takah chuan thlà a muang ve ta deuh.




Biakin hawng ngeiin kan innei ta a. Tupaw'n min lawmpui, mahse ka pasal nei hi awih harsa ti an awm tho. Ka inhmeh ve lote pawh a ni mahna.



Nupaa insiam ve ta chu kan mu mai mai bîk lova, chuvang ania tunah pawh hian a fa ka pai. Kan inneih zan chu sawi thui chî pawh a ni lo. Kan ṭhiante chuan hria se an awih miah lovang. Mipa ni ta chu a awm mãwl tawp bîk lova. Dik tak chuan nupa pawh ni ila a tirah chuan nupa nun hman pui kher ka tum lo kha ania, mahse ka indaidanna bang te chu tha rum hmang miah si lovin mipa a nihna angin kan inneih zanah ngei chuan a vaw ṭhiat vek a. Mite ngaih ang ngawta zeihawi lo lutuk chu a lo ni bîk miah lo. Mipa a nih zia min hriattir a, min hmuh tir a, ka lâi lek lek hial anih kha!



"Rote...Rote..." min sawi dat dat tu an awm avang chuan ka meng chhuak riai riai a, ka pasal mitmeng dam thlup ka hmu nghal zat a. Ka ngaihtuahna ka lo kawm nasa lutuk a, sofa ah ṭhu âwn diai in ka lo muhil chu niin. Ka nau pai avang hian muthilh ka awlsam em em a, ka ṭhu hle hle te hi ka lo chhing hmanhmawh zel.



"I mut a chhuah chuan khumah i lo mu mai lova..." a ti sup a. Ham bai bai chungin ka tho chhuak a "In bâng chiah em ni?" tiin sana chu ka melh zeuh a, dâr 10 a lo ri ṭep tawh. Kohhran Committee an nei a, ṭum dangah an rei ngai loh nen zanin chu thurel tur a tam viau anih hmel. Nikum kum tâwp lam khan upa atân nem ngheh a ni a, kan inneih hnu lawk khan a hnaah kaisang in Agriculture Department lamah director a ni mêk a. Hna thil leh kohhran thil a kawp bawk nen a buai thei vut vut hle.



"Damlo kan tlawh kawi zuai mawle, lo hrilh che ka tum a, phone i la theilo a, khumah i lo mu fel diam tawh anih ka ring zawk a" a ti zung zung a. Room-ah chuan kan inzui lût nghal a, ngaihven pawh ngaihven zui peih lovin khumah chuan ka mu fel nghal thên a. Ka mut chhuak a kal tluang rih em a ni. Ka muhil leh ṭan dâwn chiah tihah chuan ka bula rawn inthawlhin dîm zet hian min rawn kuah a, ka dul chu a chûl nghal hauh hauh bawk a. Ka dul a len hnu hian hetia khawih vêl hi nuam a ti thar a, zan mut hmunah hian a chûl hauh hauh zel. Nichin khan ka lo chhing sek bawk nen min rawn tawk harh laklawh zo vek a, ka harh tulh tulh mai.



A lo hria aniang "Muhil leh tawh rawh" a ti zawi sup a, ngawi rengin amah thlahlel zet hian ka lo nêk salh salh thung a. Dik tak chuan tun hnai tê hian ka ngai thar em em a, ka nau pai vang te pawh hi ani mahna. A hna kal chhung lek pawh hian ka khúa a har hman ṭhin viau. Kan chhungte lo lêng ṭhin lo phei sela chu awm ngaihna ka hre miah lovang.



"Ka mut a chhuak leh tawh lo" ka tih chuan "Mut i duh hle sia" a lo ti vat a, min fiam tih ka hria. "I chau em?" ka ti leh hnuhnawh a, a lo haw tirh khan tho phang lutukin ka lo hmachhawn a, ka ngaihven zui vak ta lo kha ania. "Chau lo e" a lo ti ṭha ve mai a.



Engtik laiin nge ka lo muthilh leh hman ka hrelo, ka harh leh chuan khúa a lo vâr tawh a. Ka pasal chu min si chêt a mu in a thaw ri suk suk a, a hmêl en tur chuan dîm tê in ka inher rem a. A la muttui hmêl ngang mai.



Kan inneih dawna min tih beidawn loh tur thû a sawi kha a la vawng nung reng a, min la ti beidawng ngai lo. Ka rilru natna tur leh ka rilru hahna turin a la awm ngai miah lo bawk a. Pasal ṭha tak a nihna chiah ka la hmu rih a ni ber.



Ka thawh san thleng pawh chuan tui takin a la mu a, eirawng ka bawl san ta daih a. A rawn thawh chhuah ve hnu rei vak lovah châw kan ei nghal a. A hna kal tur kawtlai thleng ka zui chhuak leh thlap bawk a. Pasal ṭha ngang a ni a, a tana nupui ṭha tak nih ve hi ka tih makmawh a ni.



Chhunah ka Nu (ka pasal Nu) a lo lang leh nawlh a, ei tur chi hrang hrang min rawn ken lehpek a. Eng thil mah lo keng tawhlo turin ka ti fo a, mahse a sim thei der lo. A mo ang ni lovin a fanu tak tak angin min en ni hian ka hre ṭhin. Kan inneih hnu rei vak lovah kan indang nghal a, U Zonuna hi fapa upa ber a ni hrim hrim a. In hrang chan chu kan la tih tur tho anih avangin U Zonuna pa, ka Pa khan puitlin inzirna tur ni pah fawmin ruahmanna min siam pui nghal kha ania. Engmah innghirnghona kan nei lêm lo.



Ka Nu nen chuan titi pahin eitur eng eng emaw kan siam a, kan ei ṭeuh mai. A lo kal fo avang hian kan inpawh tawh em em a, U Zonuna hi rêl na tur awm ngat sela chu a bulah pawh hian ka rêl ngam tawh ang. Mahse sawiselna tur hi a la awm rih lo emai a, kan la inneih rei loh vangte pawh aniang ka la fak rih viau mai.



Thawhṭanni tûk a ni a, ka in check up nî anih avangin zingkar aṭangin ka inhmakhua lâwk a. U Zonuna'n min kalpui duh viau mah se hna hmanhmawh thlâk a neih avangin Tukṭhuan eikham veleh office a kal nghal a. Ka chhungte dang pun buai ngai lovin Ziri'n min kalpui thei dâwn hlauh a. Ka inthlahrung deuh na in amah zawkin "Kan chhuak dûn khât sia, chhuah dunna chance a nimai" a lo ti sam êt a. A tihzia phian mai.



U Zonuna chhuah hnu lawkah chuan a lo thleng chawpchilh nghal a. Ka lo insiam peih ve chiah bawk nen Taxi la in kan inzui chhuak nghal a. Civil Hospital kan thlen chuan mi an lo zi nuaih nuaih tawh a. Kan nghah rei ve deuh hlek a ngaih hmêl. Private Hospital leh Private Clinic tam tak awm tawh mah se sawrkar damdawiin pan kher hi ka duh ṭhin a. Kan tân a hautak loh bakah sawrkar tâna kan tih tur ah ka ngai ve tlat a. Chuvangin ka nulât lai aṭang tawh khan dam mawh hritlan nikhua hi chuan ka pan ve hram hram ṭhin.



Darkar khat vêl zet kan nghah hnu chuan ka hun a thleng ve ta hram a. Doctor chuan min en nghal zung zung in ka ṭhat thû leh naute pawh a ṭhat thû a sawi a. Damdawi ei ṭha tur in enkawl uluk turin min chah zui luam bawk a. Rilru a hahdam viau mai.



Ka in check up zawh hnu chuan Ziri'n thil ei a rawt a, ka lo thlawp khawp mai. Tukṭhuan ka eina a rei veleh deuh tawh a, ka ril a ṭam veleh lek lek tawh. Hmun dang pan buai lovin inhnawh puar tur chuan Millenium Centre-ah kan phei tlang nghal daih a. Ziri'n sneakers lei a duh tho bawk a, bazar puia luh thlak ai chuan a hahdam thlak zawk ang.



Thil kan ei lai chuan ka beisei loh lutukin U Zonuna ka hmu hlawl mai a. Amah mai ni lovin hmeichhe pakhat hmelṭha zet nen hian an lo inzui a. An la in kal hnaih em em mai lehnghal a. Dawr pakhat zawnah chuan ding in chunu chuan mipa kamisz chu a en a, U Zonuna chu a teh chhin vêl a. An la innuih sâng lehnghal a, ka thil ei lai pawh chu ei zui thei lovin ka en reng a, ka lo inhumruh ṭeuh mai.



Chunu chuan a kamisz ken lai chu pack tirin U Zonuna a pe lai nen lam chuan ka va hmu a. U Zonuna chuan fiam tih hriat zet hian a sam a la tuai thur sak zui zat bawk a, an inchhaih kual vêl niin ka hria. Kan awmna lama rawn phei zui ta lo chuan an lêt leh daih a. An kal liam thleng chuan ka thlîr zui ta reng a. Hnaah buai hle tur angin a insawi a, hmeichhia a chhuahpui lêk chu a ni sia. Amahah ngaih ṭhat lohna tur pakhat mah ka la hre ngai lova, mahse tun ṭum zet chu a mi den dân a dang zar mai.



Ziri lah chuan min ngaihsak lêm lo tih hriat zet hian phone hmang pahin a thil ei lai chu a ei zui mawlh mawlh a, kei erawh ka rilṭam leh thil ei châkna zawng zawngte chu a bo duak mai.



"Tinge khatia i awm reng a?" a phone hmang zo Ziri chuan a rawn ti a. Nui lui sakin "Thil ka ngaihtuah mai mai mawle" ka lo ti vat a. Ka plate chu rawn en in "Awi eng tham mah i lo la ei nange, ei vat rawh, kan haw vat dâwn ania. Pâwn boruak hîp tam lutuk chu i tân a ṭha lovang" a ti leh zung zung a. "Aaa...ka puar tawh, kal vat zawk ang" ka tih chuan "Awi i ei tlem e" a ti nang nang a. Mahse nui lui var var a haw vat ka rawt takah chuan kan inzui chhuak thei ta hram a.



In kan thlen hnu thleng chuan U Zonuna leh hmeichhe pakhat lo inzui ringawt chuan ka ngaihtuahna a luah khat a. Ziri chuan ka mood inthlak danglam hneh lutuk chu a lo hrethiam aniang "Enga tinge i ngawi chawi thut, i hlim lo riauin ka hria. 'Naute a ṭha vek' i ti bawk sia, zep ṭhen i nei em ni?" min ti ta nge nge a. Hun a la neih tho avangin haw tlang lovin min zui haw ta kha ania.



"Aaa...chutiang pawh a nilo, ka chhuak khat sia ka nau pai a lo rit ve tawh bawk nen ka zo lo deuh a nimai thei" ka ti ta ringawt a. A awih zui ve mai aniang engmah min zawt zui tawh lo. Mahse a haw dâwn thleng chuan a ngaih a la ṭha zân lo tih min melh dân aṭangin ka hrethiam mai.



Kawngkhar bulah chuan ding in "I ṭha tak tak maw? Thil diklo chu a awm chiang alawm" a la ti hram a, hrilh mai ka rilruk ut ut lai chuan U Zonuna car lo tlân lai chu ka va hmu a. Ka sawi leh ta lo law law mai. "Ka ṭha tak tak, ka hahdam deuh ang a ka zia mai ang" ka ti liam puat a.



U Zonuna car dah ṭha lai en pah chuan "In pa chu ka rin ai daihin a lo haw hma" a rawn ti a. Kei erawh chuan inhum ruh ṭeuh chungin U Zonuna, in lam pan a lo kal chu ka lo thlîr reng a. Kan bul a rawn thlen rual chuan Ziri'n "In Nu hi a chau ania, duat rawh aw" a lo ti var a. "I fel e, i lo in entir pui hlauh a" U Zonuna chuan a lo ti ve vat a. Pa ṭawng tam lo tih takah ka ṭhiante ngei ngei pawh hi a la titi pui thiam tlat lo.



"Châw ei ve nghal ta che" a ti leh zat a, Ziri chuan a lo hnial vat a. Nidang a châw ei ngei turin kan inthlah liam ta a. U Zonuna nen chauh kan awm ta chu ka insangmar ṭeuh mai, ka luak te hi a chhuak hlûi thei nia mawle. Kan in entirna chanchin min zawh chuan ṭha takin ka chhang ve mai bawk a. A Paper bag khai chuan ka mit a la ngang mai a, khanu kamisz lei sak bâk kha a nih ka ring lo.



Room-ah kan inzui lût a, a Paper bag khai lai chu wardrobe chhungah a dah nghal daih bawk a. "Vawiin chu i lo va haw hma ve" ka tih chuan "Hna ka zo hma hlauh a" a lo ti vat a. Towel la a Bathroom luh mai a tum chu "Hna in ngah hle emaw ka tia" ka lo ti hram pek a. Hna ngah a inti a, damdawi inah pawh min hruai hman lo khan hmeichhia a bazar pui hman tho sia. Ka rilru a kal sual laklawh tlat.



U Zonuna chuan "Nia, ka kal hma avang khan ka zo hma alawm" tiin ṭha deuh chuan min chhang veleh mai a. Bathroom a lût chiah chu thâwm dîm zetin wardrobe ka hawng nghal a, Paper bag-ah chuan ka rin ang ngeiin khanu Kamisz pek kha a lo awm a. Ka hnual nghal rawih mai. A dahna ngaiah chuan dah leh in room chu ka chhuahsan ta daih a. Ka ngaihtuahna erawh a luahkhat hneh ngang mai.



Zanriah chu zan dang zawng aiin ka ei tlêm a, U Zonuna chu a awmdan ngai rengin a awm thung a. Min ngaihsak lo riau hian ka hre bawk a, vawiina a mi hmuh nu kha ka mawhpuh lo theilo. Zan kan han mu chu a phone a rawn rîk avangin a tho leh a, balcony ah rei zet a va biak hnu in a rawn mu leh a. Zan danga ka dul chûl hauh hauh ṭhin khan min kuah ringawt a. A awmdan engkim chuan rinhlelhna lian tak min neih tir tawh.



Reilotê ah ani chu a muhil mai a, ka muhil ve thei der lo. Ka rinhlelhna lah chu a lian tulh tulh mai si a, lukhum bula a phone dah ka hmuh rual chuan tum lâwk na em em pawh awm lovin ka va ban da da a. Tih harh hlau zetin ka tho chhuak ṭhem ṭhem a, Bathroom ka luh rual chuan ka thaw chhuak suai suai mai. A phone ka hmet êng turte chu ka kut zu han khur a mawle! Ka pasal privacy hi ka zah sak a, phone inkhawih sak, in check sak tih vêl hi ka duhlo bur a. Mahse zanin chu ka hun tawn in a zir bawk nen ka hun remchang hmuh hi ka bawhpelh theilo a ni.



Notification-ah chuan "Anungi" tih hnen aṭangin message a lo awm vâng mai a. "Khatiang eng thil mah anih loh kha, hun rei tak hnuah kan inhmu leh ania. A hma anga kan awm leh theih ngei beisei in..." tih thleng chiah chu ka chhiar thei. Anungi chu vawiin ami kha a nih ngei ka ring. U Zonuna phone chu hawn tumin ka thai chho a, password a lo dah thlap chu niin. Ṭum dangah password a dah ngai âwm ka hre silo a, tun ataka a dah te chuan ka ngaih a ti ṭha lo zual.



Beidawng zetin khumah chuan ka va inthawlh leh a, U Zonuna phone pawh chu a awmna ngaiah ka dah lehnghal a. Zan a rei telh telh a, ka ngaih a ṭha lo telh telh mai. A muhil hmêl chu ka thlîr ṭhin a, min phatsan theih chu ka ring chiah silo, mahse a zawng zawngin ka ring tâwk thei tlat lo a ni.



Tlaiah eirawng ka bawl laiin Ziri a lo lêng a, a titi bawrh bawrh a, ka rilru tawt lutuk tur rawn ti ziaawm in min tihlim ngang mai. U Zonuna leh Anungi te inzui ka hmuh aṭang khan kar khat a liam leh tawh a. U Zonuna chu a awmdan pangngai rengin a awm a, keimah zawk hian ngai ka la awh theilo. Ka ringhlel ru tlat a, a hna a lo bân tlai châng te hian rinhlelhna a khatin ka lo nghak ṭhin a. Ka hah hluah hluah ṭhin a ni ber.



Ziri'n "Tunlai hi i zawi awi riau, thil diklo a awm tiraw?" a rawn tih tâk ah chuan zep reng chi niin ka hre tawhlo. Ka ṭhiannu a ni a, engkim hrilh fai ta kelh ila tih dân kawng te pawh a hre mahna. Kan in check up nî a thil thleng zawng zawng te chu hrilh fai vekin U Zonuna ka rinhlelh deuh thû te chu ka sawi a. Ka sawi zawngte chuan ka hnuk a ulh ṭep, ka inkhawngaih thar tlat pek a. Uluk zetin ka thusawi te chu a lo ngaithla a. Thurawn ṭha deuh min pe dâwn emaw ka tih lai chuan "U Zonuna chu sawipui la" a rawn ti daih a. "Ngaihzawng a neihte chuan engtin nge min hrilh nghal mai duh ang, a nupui ka nih hi" ka lo ti nghat a. "Aww...chutiang..." a tih lai mêk chuan "Eng finfiahna mah ka nei si lova, a pha kual vêl dâwn asin. Min bum kual nasa dâwn lutuk" ka lo tih khalh leh a.



Chutah Ziri chuan "I mak, U Zonuna chu i puh chhe nghal ringawt anih chu. I ringhlel pawh a ni tawh lo, ngaihzawng a neih san che i ring nghet nghal hmiah tihna ania. I mãwl emai, U Zonuna mizia nen pawh a inrem lo" a lo ti ve nghat nghat a. "Khami nî khan hna thil a a buai tur thû a sawi a, hmeichhe dang a bazar pui tho a" ka lo ti leh hram a, ka lung a awi lo thar viau bawk.



Ziri chuan min han melh deuh vang vang a "Rote..." ti dam thlap in ka kut lehlam chu a rawn vuan a, "U Zonuna zûnah hian i uai hnawp tawhin ka hria" a ti leh a, ka rilru hriat tlang tum ni âwm taka chiangin min melh reng bawk a. Ka meng buai nghal nak mai. U Zonuna laka ka rilru put hmang danglam ta hi chu ka pha thei hauh lovang. Mahse Ziri bulah chuan "Ka pasal ania, phatsan nih te chu ka duh bîk hlei nem " tiin ka pha ve ṭang ṭang a. A awih hmel fahran lo khawp mai.



U Zonuna bulah engkim sawi a, zawt chiang turin min ti a, min fuih nasa hle bawk. "Zawt ngei ngei rawh, awmze nei lovin i rilru i lo tihah chiam pawh a ni thei a. Keichu U Zonuna hi ka ring tâwk " confi zet hian a ti a. Min hmin titih der mai, U Zonuna chu ka zawt ngei ngei ang tiin rilru ka siam fel ta a. Ziri haw hnu chuan ka zawh ṭan dân tur ka ngaihtuah nghal char char a. Bulṭan dân tur la hre rih lo mah ila a hunah chuan a lo lang ve maiin ka ring.




U Zonuna a lo haw chiah chu ṭha takin ka lo dawngsawng a. Zanriah ei lai te chuan chîk zet hian ka melh a, zawh mai ka tum ṭhin, mahse muthmuna sawifel ah ka ti leh ta zawk a. Hna pawimawh khawih tur tlem a neih avangin zanriah eikham hnu rei vak lovah computer a ṭhut chilh nghal chawt a. Thingpui ka va pêk lai te chuan a hnaah a rilru a pe hle ni tur a ni, min ngaihsak hmêl pawh a pu lo. A sira sofa ah chuan ṭhu in ka lo nghak ran a, ka zah zelah phone ka tuai kual ka tuai kual a. Ka rilru chu amahah chiah a awm thung. Min ngaihsak ve miah lo emaw ka tih lai chuan a lo hawi vut a, "Rilru kaptu i nei em ni?" a rawn ti ta a, chiang zetin min melh bawk a.



"Aaa...nakinah ka hrilh ang che, i hna kha thawk zo phawt rawh" ka lo ti nawi niai a, mit ti zîm sun hian min melh deuh vang vang a. Chutah a computer khawih lai chu off in a rawn tho chhuak vut a "Ka zo, sawi rawh le" tiin ka lam hawi chuan a rawn ṭhu rem sauh sauh a. Min melh dân chuan min ti zâm er er mai.



"Ihh...eng lo..." tiin ka chawl dat a, zawh ṭan mai dân tur hre lo in ka ngawi ta vang vang a. U Zonuna chu a rawn tho chhuak deuh vut a, "Hahdam deuhin sawi teh ang, i awm a nawm loh hmel emai" tiin min rawn kai tho a. Room-ah chuan kan inzui lût a, khumah min mut fel tirin a thawmhnaw a phelh a, ka bulah a rawn inthawlh ve nghal zat bawk a. Min rawn kuah te chuan a mi dîp a nâ ka ti thar riau lehnghal a.



"Le...sawi tawh rawh le" a tih leh takah chuan "Ka in check up ni khan dawt min hrilh" ka ti deuh tawl a. A mitmeng chhiar tum a ka han melh chuan a ngai reng maiin ka hria. "Sawi chiang la" a lo ti sup a. Millenium Centre-a ka hmuh dân zawng zawngte chu ka sawi fai ta kelh a. A kamisz lo hawn chungchang min hrilh loh avang pawh khan ka chhuahchhal zui nghal zat bawk a. Ṭha takin a insawifiah ang chu ka tih laiin "I sawi nu chu Anungi kha a nih ngei dâwn chu, a fel ve ania" a rawn ti daih a. Min tih thinrim zual a tum emaw ka ti hman hial. "Anih chu" ka lo ti nghat a, a chut fâl nalh bîk lo bawk a ka lungawi tâwk lo tih a hrethiam ve aniang a insawifiah nghal zung zung a.




"Anungi kha Bangalore-a ka Master zir pui ṭhin ania, khami ni khan kan office-ah hna a lo zawm ve a. Tum loh deuhin kan inhmu a, ka hna khawih laiah khan min pui nghal bawk a. Chuvangin ka zo hma ta hlauh a, Millenium Centre-a min hmuh dun chhan kha chu kan Master zirlai khan hna ṭha tak a hmuh veleh thil lei min tiam a. A hunlai khan fiamthu nan kan hmang na in mi chîm lîm leh thil hre rei thei ngang hi ania, a lo la hre reng a. Ama rawtna in kan inzui ta anih kha. Ka hnial nasa viau na in 'Ka thutiam min bawhpelh tir suh' a ti tlat a. I chungchang pawh ka hrilh nual a, hmuh ve che a châk thû pawh a sawi a. I piancham a hnai tawh tho bawk nen chumi nî ah chuan inhmelhriat tir che u ka tum alawm" a ti ta duah a. "Eng nge ka piancham ah kher?" ka lo ti hmanhmawh a. Ka piancham ah kher min inhmelhriat tir a tum chu ka hrethiam lo.




Chutah U Zonuna chu pawi tih hmel lutuk hian a chek hluk a, "Aw...ṭhawn thut che ka tum a, ka lo sawi hman vek tawh sia. I piancham lawm nan chhungkhat laina leh ka hnathawh pui ṭhenkhat te nen zanriah ei ho ka lo rilruk a. Naute kan nei ṭep tawh bawk a, a lawmna ni pah fawmin ka tia" a ti luam a. "Enga tinge a kamisz pêk che kha ṭha deuha min hrilh mai loh?" ka lo ti daih a. Ka piancham lawm chungchang a sawi aiin Anungi ber chuan ka rilru a la luahkhat tlat. "A ṭul ber lo e, min pe a nimai a" ngaihsam zet hian a lo ti liam puat a. Ka rilru buaina tur a ngaihtuah miah lo tih ka hrethiam mai. Mipa fel, innghahna tlâk, puitling tak ani tih chu ka hria a. Mahse a châng hi chuan ka rilru tur a ngaihtuah lo mah mah ṭhin. Min ngaihsakna te hi a tilang vul chûk thiam lova, mi duat heuh heuh hi a thiam lo. Mipa tih takah hmeichhe rilru tur a hrethiam vak lo ni berin ka hria. Ngaih tih ṭhat loh viau na chî ah pawh ka ngai tawhlo. Ka lungawi mai lo anih chuan ka intihah thlawn mai mai dawnin ka hre tlat tawh.




Ka pianchamphaphak lawm chungchang ringawt chu min sawipui ta daih a. Min ngaihsakna leh duatna a tih lan thiam ve danah ka ngai ta tawp mai. A sawi lawk ang ngeiin ka piancham chu min läwm sak a, Anungi nen pawh chuan min inhmelhriat tir ta ngei a. "Zonuna chu a hmeichhe mî lo viau emaw tih laiin nupui a nei hmelṭha hle mai che" tiin min fak ve luam a. Ka lâwm ru ve tho mai. A ṭawngkam leh hawi her, a che zia ah pawh misual tak chu a niin ka ringlo ve nghal tawp. Mahse ka hriat ṭan tirh danin a zir tawh lova, ka thîk ru tlat thung.



Thla thar kan chuangkai a, Pathianin fapa duhawm zet min pe ta. U Zonuna lah chuan a thiam ang tawkin a duat ve a, min ngaihsak zual em em bawk. Kan fapa Edwin-a chu hmelṭha in duhawm viau mah se a ṭah belh em em mai a. U Zonuna a zei hawi lo chî a lo ni bawk nen ka hah thei hle. Kan chhungten min buaipui hle lo phei sela chu kan in vîn nasa thei ngawt in ka ring. Zanah hian a sual zual em em mai a, zing dár thum velah kan mu ve hman chauh zel. U Zonuna ka fak ve na em em chu naute buaipui thiam lo mah se ka men chen chen a lo meng ve ṭhin a. Hna leh kohhranah a buai zia hria in min mut san turin ka ti fo a, mahse min lo men pui ve ṭang ṭang zel tho. Min pui thei viau lo mah se kan nufa tân a inpe em em a, chu tluka hlu chu a awmin ka hre bîk lo.



Edwin-a kum khat tlin nî chuan chhungkhat laina leh ṭhenrual ṭha te sâwm in zanriah kan buatsaih ve a. Kan ri ve laih laih a, U Zonuna pawh mikhual chhawn in a buai vut vut khawp mai. Edwin-a chu rin ai takin a tlei phian mai a, ka buaipui ngai lutuk lovin chhungten min lâk chhawk thei hlauh a, a tihzia tak tak ani.



Tlai dâr thumah hunserh hmangin chawhlui kan kil ho nghal a. Kan eikham fel a kan intihfel zawh meuh chuan khúa a lo thim der tawh mai. Kan mi sâwm te pawh an haw diak tawh hlawm a, a la awm te chu kan laina hnai tak tak te chauh an ni tawh. Edwin-a a tlei vak tawh lova, puak mut tumin room-ah chuan ka awi darh darh a. Kawngkhar rawn inhawng ri rakah chuan ka hawi vat a, U Zonuna ka hmù zui nghal zat bawk a. "A muhil tawh em?" a tih chuan "A la che sek mai" ka lo ti vat a. "Imm, Anungi ka va thlah lawk ang chu ka tia, tihfel ngai ang ang chu kan tifel zo thawkhat tawhin ka hria" a rawn ti a. Wardrobe aṭang chuan kawrlum pan tê hi a la chhuak nghal zat bawk a.




Dik tak chuan U Anungi hi ka ngai thei vak lo, ka hmù mawh ru riau a. Mahse U Zonuna bulah tak hi chuan a tir tê a ka sawi bâk kha ka sawi tawh lêm lo. Kan inhmuh tirh tê kha chuan ka hmù pangngai viau a. Mahse Edwin-a pianghlim a rawn en ṭum a a awmdan leh mitmeng te kha ka ngaina lo. U Zonuna nen hian an rawn inzui haw fo mai a, chhuanlam ah Edwin-a hmangin a rawn lâwm ṭhin a. Thil te pawh a rawn leisak nasa lutuk. Mahse min titi pui duh dân hi ka ngaina theilo.



U Zonuna veng fimkhur tur leh nupui pasal inṭhen awlsam zia ringawt min dah ṭhin a. "Zonuna te ang hi chu vawi 10 chuang pawh thlawi mah se tuman an iai lovang. Inṭhen ta ula a tuar zawk tur i ni tih a chiang reng a. Chuvangin a thû awih viau rawh" min ti ziah a, nui har har pahin sawi ṭhin mah se hriat nuam ka ti viau lo. Ka thîk thû vawikhat mah ka la sawi lova, ka mitmeng takngial paw'n ka ngai theilo tih hi ka lan tir ngailo. Mahse a thusawi ṭhin a ka huat ber chu "Zonuna hi chu rawngbawltu ani bawk sia, i rilru i tih zauh ve zel a ngai dâwn ania. Thîk thû te hi pe chhe vak thei pawh i nilo" te min ti ṭhin a. Min fuihna thû ah ka ngai thei der lo. Ziri sawi chu nise ka haw kher lo mai thei, mahse U Anungi hi chuan min duhsak vanga sawi a ni ngailo tih ka hrethiam ve vek. A mitmeng ah hian ka pasal a duh hle ani tih ka hmuh hmaih bîk miah lo.




U Zonuna'n "Ka va thlah lawk ange aw" a rawn tih leh takah chuan ngaihtuah zui duh lovin ka lo 'aw' ve mai a. U Anungi ka rin loh aia nasa hian ka pasal ka ring tâwk tlat a ni. A chhuah dâwn chuan Edwin-a ka puak reng lai chu a rawn bih du du a, min rawn melh leh in "A meng kuau mai" a ti a, a nui zui hawk bawk bawk a. "Va kal vat rawh, a lo nghak tawh ang che" ka lo ti daih thung a. Engmah sawi zui tawhlo chuan a kal ve nghal mai bawk a.




Edwin-a chu tih mut tumin ka awi zui leh darh darh a, mu vat se ka ti kher mai. Nau lian chî a lo ni ve bawk nen fate mah nise ka paw rei lutuk theilo, ka dár a kham hman vek zel. A muthilh mai duh loh avang chuan ka hma thlak ta ringawt a, reilote ah a muhil zui ve ta hram a. Khumah mut fel in kan chhungte la awm ang ang thlah tur chuan ka chhuak zui nghal a. Ka chêt hah zui ngai miah lo turin in an lo tifel diam tawh a, ka thaw huai mai.



Ka Nu in U Zonuna awmna min zawh chuan ka sawi vat a. A ngaihdan a ni vak lo nge "An thawhpui nu chuan Taxi lak mai tur ania. Zonuna pawh tun ang huna lo chhuah reng reng" a ti nghat a. Min hringtu ka Nu zawk chuan "A lo lêt leh vat mai dâwn alawm" a lo ti vat a. Thingpui sen hâng te kan in leh hnuhnawh a. U Zonuna lo lêt leh hnu rei vak lovah chuan min ṭin san hlawm ta a, a reh nghal ruih mai.



Khumah chuan naute tihharh hlau zetin ka inthawlh a, U Zonuna a inbual mêk a, a phone message rawn ri reng chu ka ban vat a. U Anungi hnen aṭangin a lo nia "Zo, zanin ka thusawite kha lo ngaihtuah..." tih thleng chu notification ah ka hmu thei a. A password chu hawn tumin ka bei a, hriat belh châkna in ka khat nghal vek ani ber. Zaninah chuan eng thil tak lo sawi dûn ang maw.



Bathroom kawngkhar rawn ri rakah chuan phone chu ka theh thlà nghal vat a. U Zonuna chu a zai deuh rut rut a "I chau em?" inhruhul mawlh mawlh pah chuan a rawn ti a. "Chau lo e" ka lo ti ṭha ve mai a. A message tone bawk a rawn ri leh tawh. Ngaihsak lo zet hian wardrobe a hawng a, kei chuan a phone ringawt chu ka lo melh thung a. Ka bula a rawn mut lai te chuan ka ṭang ṭeuh mai. A phone lah chu en lêm lo hian side table ah a dah nghal daih lehnghal a.



"Edwin-a chu a muthilhna a rei tawh em?" tiin min rawn kuah thuk a "Aw i kal hnu lawk khan" ka lo ti ṭha veleh mai a. A message bawk a rawn ri leh a, "Vawiin chu nuam i ti em?" tiin vawiin chungchang zawhna ho deuh deuh min zawt a. A message tone a rawn rîk leh tâk rengah chuan ka dawhtheihna in a tlin ta lova. "I phone chu a va ri peih ve" ka ti nghat a, ka thusawi chu hrelo der hmiah in thudang min sawi pui leh daih a. Ka ngaihdan a ni tawh silo "A pawimawh viau aniang message chu va en teh" ka ti hlak a. Ngawi rengin a inlahrang a, a phone chu a ban nghal vut bawk. Ka mitsirin ka lo melh reng a. Message chu a hawng dâwn emaw ka tih laiin a silent daih a, a awmna ngaiah a dah leh nghal daih bawk. A che zia chu ka lo en reng tih a hriat rualin min nuih suk a, min rawn kuah leh nghal hlun a.



"Enteh..." ti hluai in ka inlahrang hlek a, tun hun hi sawi chhuah hun tak niin ka hria. "U Anungi hi..." ka tih lai mêk chuan "Nia..." a lo ti nghal ngawt a. Inthiamlo hmel a pu zui zat bawk a "Eng nge nia chu?" bak zet hian ka lo ti a. Ka thin a tirim hlur mai. Tun hnai tê hi ka thinchhe thar a, ho tê ah pawh hian bak deuha biak châng ka ngah ṭhin. Mahse ngawi reng hian min dawh ve hle hle mai zel bawk a.





"Aaa...zaninah khan a sawi a, kan master zirlai khan min lo ngaizâwng ṭhin a. Tun thlengin min lo la ngaizâwng reng a. A zialo tak tak ani. Mahse kei chuan ka duhlo ania, ka ngaizâwng ngai lo hrim hrim. Tumah ngaihzawng tak tak pawh ka nei lo" a ti nghal zung zung a. Insawifiah a tum lutuk chu thinrim viau e tilo chuan ka nui huk a. Ka pasal hi rinhlelh chî pawh a ni lo, hetiang lamah hian a hawiharh hlawl lo tih ka hriat kha mawle.



Ka nui hmêl a hmuh takah chuan min nuih tlawn nghal titih a, ka tum zui leh hmak mai. Awlsam taka lungawi mai chu ka duh tawh bîk lo, min thlem ve reng reng teh se.



"A hma daih aṭang tawh khan a mitmeng aṭangin ka hrethiam vek. Engmah ka sawi lo mai mai alawm, in lo inzui haw ṭhin lai te khan ṭawngkam mak sak pui pui min fah ṭhin a" ka ti hmarh hmarh a. Min han hnêm ve ang chu tih laiin "Min hrilh vat ta che" a lo ti ringawt a. "Engtin nge i tih chuan ang a?" bak zeta ka tih chuan "Ka hre chuang nang" a lo ti leh mai a. Zonunkima neih zet zawng, a hahthlak ngat ngat teh e. Ngaih ṭhat lohna chî pawh a ni tawh zozai lo. Hetiang hian min phatsan teuhlo mai.




"Kohhran upa chu i ni ve sia maw, i kawlo si" ka ti ta ringawt a. "Nang pawh" min lo ti khanglang a, rum zeta ka melh chuan "I kaw bîk lova min neih phut mai hi. Min nei duh tur khawpin i mãwl ve tlat. Ka ṭhiante pawh khan i fin vak loh vang ania nang kher hi min thlan sak" a la ti deuh deuh a, a nui suk suk lehnghal a. Ka va han haw mai mai tak e aw.



Tihngaihna hre lo lutukin "Ka ṭhen daih mai tur che ania" ka ti ta ringawt a. "Khaih khaih, khatiang an sawi ngai lo. Pathian hmaa kan intiamna kha vawng nung reng zawk ang" tiin "Min ṭhen te chuan tuman min nei duh tawh nang. Tunlai hmeichhia an fing tawh si, min nei duh tur khawpa mãwl an awm tawh lovang " a rawn ti leh kher a. Zanin chu a nghal vet vet khawp mai.



Mahse a hnu deuhah chuan thutak zet hian Anungi chungchang bawk chu kan sawi dûn leh a. Khatia an va inthlah khan kherh thluk a lo tum ngang ngang a ni âwm e. "Engtin nge i hnar?" ka tih chuan "Nupui fanau nei tawh ka ni a, chu chu lo dah ṭha ta pawh ni ila i lakah hian khatiang rilru kha ka pu lova ka pu ngai lo bawk ang. Ka nupui fanaute hi ka hmangaih bawk' ka ti" a tih chuan ka melh chho ha a. "Hmangaih a..." ka tih chuan "Umm, ka hmangaih che alawm, kan fapa pawh. Engtik aṭangin nge ka hrelo, mahse ka hmangaih che tih ka hria" a ti nghet charh a. Ka hlim veng veng mai.




A thusawi in a zir bawk a, min rawn khan nghal chial a, "Ka hmangaih che bawk sia beisei ka nei ve deuh a" nui suk chung hian a rawn ti leh a. Mipa zei hawi lo leh hawi harh lo lutuk ni mah se hetiang kawngah hi chuan mipa dik tak hi a ni ve tlat. Chêt a lâk zawm nghal zat a, min hmangaih tih ka hre tawh bawk nen phur zetin ka lo pui ve vat bawk a. Zanin hi ral theilo se ka ti ngei mai.




Tunlai ka awmdan danglam lutuk leh ka thinchhe hlur ṭhin te kha eng dang vang ni lovin nau ka lo pai vâng lek a lo nia. U Zonuna ka hrilh chuan a lâwm tih ka hria, han phul hluai a ri hluai turin ka beisei lo hrim hrim, a nuih vur vur chuan ka lungawi tâwk em em mai a ni.



Edwin-a kum a tling chiah bawk nen ṭhiante'n min fiam reng mai a. U Zonuna ṭhiante phei chu mipa tih takah an fiamthu a sâng a, "Eng eng emaw hawi zawng chuan a lo zei ve hurh a nih dâwn hi" an ti a. An ṭhianpa chu an tiduhdah ve khawp mai.



U Anungi a rawn lang ngai tawh lova, U Zonuna phone aṭangin a number ka Block a, ka Delete hmiah bawk a. "I lungawina tur angin che rawh" U Zonuna'n min ti miau a. Ka chêt dân chu a naupangchhia viau na in ka duh dân a ni miau sia. Ka pasal rilru ṭha lutuk leh hetiang lam hrethiam lo lutuk hi a inveng thiam dâwn silo, kei a nupui in ka ven mai loh chuan kawng dang a awm miau lo a ni.



Pathian hmaa thû tiamin nupa ah kan insiam tawh a. Kan thutiam lai khan kan hmalam hun tur kan hrelo a, kan inkarah induhna leh inhmangaihna a awm miah lo bawk. Mahse kan inneihna vawng him tlat turin kan thiam ang tawkin hma kan la ve a. Khangte khan tun hun hi min hruai thleng niin ka hria.



Ka naupan têt ata pasal ṭha tak Pathian hnenah ka dil ṭhin a. Chutiang chiah chuan ka pasal pawhin nupui ṭha tak a lo dil ṭhin bawk a. Ka pasal hi ka tan a ṭha ber tih ka pawm thlap a, a tan ka ṭha ve ber em tih chu ka hrelo, mahse nupui ṭha nih tumin ka bei ve reng a. Khang hunlai, a awmzia pawh hre em em lova kan kawppui tur kan lo dil ve ṭhinna te kha Pathianin min lo hriat sak reng a. Kan tana hmalak em em ngai lovin nupa ni âwm tak nupa ah min siam ni ta berin ka hria.



Kan kawppui turte hi Pathian hnenah hlan thlap thlap zel ila, ngaihzawng kan lo nei anih pawhin Pathian râwn chung zelin nei ila. Chutiang thlap thlap a kan ti anih chuan kan kawppui te nen kan inlaichinnaah hian harsatna a awmin ka ring lo. A lo awm anih pawhin Pathian kan belh tlat chuan, chinfel dân kawng min dap sak ang a, chakna min pêk ngei ka ring tlat a ni.




A TAWP TA.