The Feared Crimson King 11

[B.laltlanhlui]

Alice POV

A ṭha dawn lo hle mai. Ka meng zau nghal kawk a "Eng thil nge tih i tum?" A kut zungṭang chuan min rawn kawk a, hnuai lam ka melh ngat ngat. Eng thil nge a duh le? Mahni te a awm mai mai ka duh asin le

"Min chhang rawh!" Dawhkan chu a chum ri bur a, fork chu ka la thukru reng. Eng thil nge tih ka tum pawh ka hre lo. Tihnat lo tum pawh ni ila tlanchhiat ka tum rualin min man hman tho ang. A lehlam zawng erawh chuan hmanrua ka ken chuan ka lo inveng ve thei dawn a

"Eng thil mah tih tum ka nei lo, ka ti tak tak" zawi sapin ka ti a

Ka bân a rawn hmer a, ka ṭim sawk mai. Ka chet sawn hma in dawhkan hnuaia fork ka thuhruk chu a rawn la chhuak a. Engtin nge a hmuh theih le? Indo mi anih vangin hlauhawm thleng tur hi a hre lawk a ni ang a, a rui chung pawh hian thil a la chik hle anih hi

"Thlah rawh" ka beng bulah a rawn rum nghut a, a zu rim rawn nam nen min thawk khum hum hum mai

Ka kut chu nghet deuhin a hmer nghet sauh a, fork chu dawhkanah ka thlah thla riai riai a

Ṭap lo turin ka infuih nasa ngei mai. Insum ka tum viau chung pawhin ka che sawn thei tawh lo. Ka mittui a rawn far thla kak a

Min hmu awm pawhin a lang lo, ka bân rek a chhinchhiahna, kan pahnih suihzawmtu chu a en chiang leh a

Rum leh nghut in ka kut a thlah a, ka na ti lutuk chu a ziaawm beisei in ka tuai vet vet a

Pen khat a hma lam a pan lai chuan min chhuahsan tawh ngei dawnin ka hria a, mahse ka khum thar ah chuan a mu zangthal der a, a bân phar duaiin a ke chhuat ah a hlang thla a

"He room hi ka tan chuan a pawimawh lutuk" min rawn en lem lova min bia nge pawh ka hre chuang lo, amahin a phun bul bul a

"Doctor in ka nu a ṭha em tih hriat nan he room ah hian a kân ṭhin a, a nau pai vang in" a ti a

A lam ka hawi bik lova, hmun dangah awm ni ila chuan kan nuihzatthlak dun ngawt ang

"Chuan helai hmunah ngei hian nau hrin a duh ta a" a rawn ti leh a, a ṭawngkam hman duh dan te hi ngaihthlak a hrehawm zawk hial alawm le

"Chuan ka rawn pian chiah khan chhungkua kan inpawh lehzual theih nan he room ah hian chen ho a rawt a" a ti a

Ka mittui pawh a hul tawh, Lal chuan ceiling chu melh in a nui ver ver a, a mitthla ah a hmu a ni ngei ang

"He room hi ka tan chuan a pawimawh hle a ni. He hmunah ngei hian ka nu kha a boral bawk a" a hlim hmel chu lungngaihna in a rawn thlak a "A dam chhuak zo ta lo a ni...." a ti a

"Jaxon a rawn pian chiah khan a dam chhuak zo ta lo a ni. I ngaihtuah chu ka hria alawm. Mahse ka nau hnenah hian a thiamloh a nih loh thu ka hrilh nawn fo ṭhin" a ti a

Lyria ah khan thuthang a leng vel ṭhin a, Lal fapa Theodore hian thuneihna a duh lutuk avangin a nu leh pa a that tih te, a dang leh chu Lal fapa leh a unaupa hi hringei an ni a, Lal in a thawk zawng zawng leh an chhungte thlengin an that vek tih te a ni

Thil thleng diktak hre miah lova thuthang ka lo awih tawp avang khan mawl ka inti hle mai

Ngaihtuahna rama ka lo chen lai takin hnâr ri suk suk chuan min tiharh thut, ka va en chuan a lo thaw ri burh burh a, a hnâr ring hle bawk

Ni zung chuan room a kah eng a, chhun la ni lo ang mai a ni. Ka plate ruak leh fork dawhkana chhawp chu ka en tawn leh zak zak a, ka va ban leh ṭep a, mahse ka insum thei hram

A muttui lai tak hian ka that mai dawn em maw ni? Nunrawng taka ro a rel na hi ka tih tawp theih chuan mi zawng zawng phuba ka la tihna a ni ang. Fork chu ban in ka ding hluai a

Ka in ngaihtuah chian hma chuan a mutna khum bulah ka ding leh reng tawh, ka chhuk en vang a, a muttui hmel khawp mai. Mahse a nunrawng in mi thah a hmang em a ni

Fork chu ka khai kang a, a hrawk ah ka tin hmak, a nghawng chu ka en leh reng. Vawi khat chiah a chaw dâwt ah ka chhun chuan tumah a tina tawh ngai lovang

Ka harh chhuak thut, fork chu dah thla in ka ṭap ringawt

Eng thil nge tih ka tum tak le? Ka sam chu hui pawp in ka lu ka thing a, tu emaw nunna hlu tak ka la teuh hle mai. Eng nge dik lohna ka neih le? Mi rapthlak tak chu a ni teh meuh mai mahse a tih ang bawk ka tih ve chuan amah ang reng ka ni dawn asin

Ka in ten leh in haw lutuk bawk si chu room kil khatah ka tawm chet a, ka inkuah chial ringawt. Chutih rualin ka inhnit hlawp hlawp a

Reilote hnuah chhiahhlawh in kawngka a rawn hawng a, a lo inkalh lo chu mak a tih hmel khawp mai. Chu aia mak a tih zawk chu khum sen dânga Lal lo hnâr kuk kuk chu a ni

Hrethiam lo deuha min lo en hnuah hmanhmawh deuhin tray leh fork chhuata tla chu a chhar a, min rawn melh leh zeuh in a chhuak a. Kawngka kalh ri ka hre lova mahse chhuah pawh ka tum lem lo. Tlanchhuahna tur hmun dang a awm chuang lo

Fim taka ngaihtuahna hun ka mamawh, hre chiang mang lova thil ka tih chuan mi nunna in a tuar phah dawn si a, thil dang tih ka tum leh laiin nizan lam ka lo mu ṭha lo nen ka chhing riai riai a
________________________________________

*Lal Theodore POV*

Ka rum chhuak a, ka chal chu ka dawm vang vang, ka mit hi a na hle mai. Engkim hi a vir muai muai in ka hria, ka lu a na hle bawk

Ka ṭhu chhuak a, chhuat chu a dang deuh tlat a ni. Aw ni tak e, Lal ber pindan ah ka insawn tak kha mawle, mahse hei hi Lal pindan chhuat pawh a ni lo. Ka hawi kual vut a, eng an chhit dan vang nge room lehlam ah ka awm tlat in ka hria. A thim deuh danah hian tlai lam a ni tawh aniang

Ngawi teh khawiah nge hmeichhia kha? Ka hawi vual vual a, room kil khatah a lo ṭhu a, ka awmna aṭang hi chuan a hla hle mai. A hmel ka hmu chiang thei lo nan a muhil ngeiin ka hria

****

Chhunzawm tur