The Feared Crimson King 12

[B.laltlanhlui]

Lal Theodore POV

Eng thil nge thleng le? Ka sam hui pawp in ka mutthilh hma a ka thiltih ka ngaihtuah a, mi awm ṭha peih lo tak ang mai ka ni

Ka lungawi lo lutuk ka ruih hnu khan Alice va biak ka tum kha ania. Ka mutthilh lai leh thu ka sawi lai ka hre tawh miah lo. Chhuah tumin ka ding a, a bân hmer na duk chu ka hmu thei tlat

Ka thaw chhuak halh a, ka thiltih a ni chiang ang

Kawngka lam chu ka pan leh a, ka chhuah fel hma in ka va inher leh a, ka rin ang ngeiin a lo muhil e, a rihna a tlahniam deuh in ka hria, chu pawh ka thiam loh vang vek. Kun hniam in ka va en chiang a, chhuat a vawt si a, ama khum ngeiah a mut a ngai a ni. A hnungzang chu ka dawm a, lehlam in a ke ka dawm leh a, ka chawi kang chiah

A rawn meng zau kawk a, a thaw chhuak halh bawk. A kut chuan a lo inveng nasa "Hahdam rawh" ka ti a

A hahdam chuangin ka hre lo, mahse zawimuangin ka kal pui leh a, min beih let pawh a tum tawh chuang lo. Khum lam ka pan pui lai chuan a khawng at mai. Khum ko tlangah ka ṭhuttir a, ka thlah rual chiah in mattress lamah a tawlh hrut hrut a, a thaw ring telh telh, a hmelma chuan hlauhna a khat

Ka pa khan tuna Alice i'n min hlauh zia hi rawn hmu se chu min chhuang miah lovang. Ka thaw leh huk a, room ka chhuahsan daih. Kawngka ka khar a, ka ipte ka dap vat. Chabi ka khawih fuh chuan ka dahsawn leh vat a, tlan chhuahna tur a nei chuang lovang. Chu chu ani pawhin a hrechiang ang

Ka lu hi a na ut ut mai. Dawhkan ah chuan engemaw ziah tumin ka ṭhu a, ka pum a inlet but but mai

Thil ka ziah hian ka thawveng sawt ṭhin. Ka nu leh pa lehkhathawn tur ka ziak ṭhin a, chhanna ka dawng ngai lo chungin min hriatthiam ka ring ṭhin

Reilote hnuah kawngka lehlam room chu a rawn inhawng riai riai a, ka thil ziah ka laklawh em avangin ka hawi let lova

"Aw Lalber?" Ka lam hawiin a rawn ti zawi sap a

"Aw, Lo lut rawh" ka kutin ka vai a, ka thu ziah lai bawk chu ka chhunzawm leh a, Hla deuh aṭang chuan ka thiltih a rawn en a, tun hi vawikhat min rawn pawh ve na a ni, duh chu a nei chiang ang

Hnuai lam chu a melh tlat a "Sawi duh i neih chuan min rawn pan rawh" ka ti a

La kun hniam reng chungin min rawn en a

"Eng nge tihsak theih che ka nei em?" Dam deuha ka zawh leh chuan mak a tih hmel hle mai. Min rawn chhang vat a "Bathroom ah kal ka ngai a" a ti zum rut a

Ka nuih za lutuk chu ka insum hman tawh lo. Ka nui chhuak hawk hawk a, thu pawimawh deuh sawi a tum emaw ka lo tia, a insum nasa lutuk chuan a ti nuihzatthlak lehzual
________________________________________

Alice POV

A rawn nui chhuak chuan min ti phu chiang lutuk ringawt. Ka zak hle mai, mahse ka zun ngei ngei a ngai, a hmanhmawh thlak tawh

Hnuai lam ka melh leh tlat a, min tih zah a tum anih ka ring rum rum mai

"Vengtute u!" A auh lawng lawng lai chuan ka phu deuh zawk

A nuih a la za tih chu a hmui aṭang ka hre thei mai mahse a thiltih tum hi ka hrethei lo re re. A koh zawh veleh an rawn intlar nghal ṭhap a

Bathroom ah min hruai turin thu a pe a, ka van zak tak e aw, kawngka lam kan pan a, tun hi min hnuh chhuah loh ṭum tak a ni ang "Chuan Alice, nidangah chuan min dil a ngai lovang aw, kal tawp tawh mai rawh" a ti a

Lal Theodore ka va en leh chuan a lo ziah chhunzawm leh mawlh mawlh a

Vengtute chuan min hruai let leh a, Lal pindan ka pan lai chuan ka ding chawt a

Lal chu a thil ziahna hmunah bawk a lo la ṭhu reng a, ka luh leh lai pawh a hre lo. A mood a fuh hmel hle mai, a ruih a reh tawh bawk a, min haw tir turin ka dil mai dawn em maw ni? Min mamawh hmel bawk si lova, a tan phurrit mai ka ni ang

"Aw Lalber" inringtawk tak chuan ka va bia a

A ṭhutna aṭanga rawn inher in min rawn en a

Ka huaisenna zawng zawng sawm khawm in ka han sawi ṭan a

"Haw ka duh a ni" ka ti a

A ngawih reng avang chuan ka sawi zawm leh a "Inzawmna hi a lo dik anih pawhin ka chhungte ka ngai em a, hai hmunah hi chuan phurrit mai ka nih hmel si a" ka ti a

"Aih" chair aṭang chuan a rawn ding a, a mitah chuan lungawi lohna a hmuh theih nghal

Tun hi ka hun neihchhun chu a ni "Mahse haw ka duh alawm hetah chuan lawm ka hlawh si lo" ka han ti ṭha leh a

"Aih ka tih chu! Khawiah mah i kal lovang! Tunge i ngaih tih lam ah ka buai lo. Tinge min hnial ngam zawk a?" Ka hmaah chuan a rawn ti hmak a, amah a lian si a, a lakah chuan ka te chem chem mai

"Tih lungawi loh che emaw i thu hnial ka tum lo. Heta ka awm chhan hi ka hrethiam lo alawm. I sawi ang apiang ka zawm a, engpawh ti ila min huat hmel hle si a!" Ka ti a

"Ka thu i zawm lo, hei hi ka tuar thei lo. Ka sawi tawh a, i haw lovang" a in hum ruh ṭun a

Amah ka hlauhna chu huatna ah a rawn inthlak chawpchilh nghal vek "Ka hua che" ka ti ve hmak a

"Eng maw?" A awki chu a dam vek, mahse a thawk dan aṭang chuan a thin a rim hle tih ka hre mai. "Ṭawng ring rawh, mang mi zaktheilo nu!" Min ti ve leh a

Ka lazai chu ka pawtthler a "Ka sawi chu ka haw lutuk che!" Ka ankhum leh piap piap a, ka au ṭial ruai ruai bawk. Ka mittui a rawn hnâm sawk a, ka thil hmuh chu a phe vek, ka biang ah mittui a rawn luang ngiai ngiai a, a hmuh laiin ṭah ka duh lo asin le

Ka bân ah vuanin kawngka lam min pan pui a, hall a kan chhuk lai chuan tluk ka hlau takzet. Lal chenna lam chu kan hlat tial tial

Min vawnna chu thlah tumin ka tal nasa mai mahse lungpui ang mai a ni. "Min tina ania!" Ka tih pawh in a kal hmawk hmawk a. Ka bân a vawnna chu a thlah eih lo, ka ruh te hi a tliak dawn hialin ka hria

Kailawn thim laiah chuan min hnuk thla a, kawngka lian deuh chu mipa pali in an lo veng a. Kan lam an hawi lova mahse kawngka an lo hawng a

Thir rim chuan ka hnâr a rawn zem a, boruak chu a rit in kailawn lamah chuan kan chhuk leh a, chhuat ah chuan min nam tlu chawrh mai

Ka kut leh ka khup hi ka tlukna lamah ka sawh pilh ve deuh a, a na khawp mai. Mahse ka bân hi a na ber zawk

"I hmu em? Hei hi nang leh tang ho awmna tur anih hi! Hetah hian mipa, hmeichhia, naupang pawh hremna ang khat vek an tuar ṭhin! Rilru dang put tum suh ang che. Thu i awih loh chuan hetah hian i awm ve ang. Ka hrilhlawk che anih chu" a ti a

A thim deuh hleka mahse ka hmu chiang thei ta. Corridor zau takah ka awm a, tanin a tang te chu an lo kalh khum vek

An rim a chhe si, ka hnâr ah a rawn leng lut a, thisen rim diktak a ni

A hmaa ka lo huaisen ve na zawng zawng pawh hlauhna ah a rawn chang vek. Ka thaw a chham dawnin ka hria, ka thlan fim a rawn chhuak a, ka khur ru der der

A tirah khan tanin hi a ruak in ka hria a, mahse chiang deuha han en takah chuan kil khatah an lo awm a, thawm pawh an chhuah ngam lo. Lyrian mi an niin ka hria

An thawmhnaw ah chuan ka pa flag sen a hmuh theih a, ṭhenkhat chu thisen in an khat a, na an tih hmel hle bawk. An hmel chu a lang thei lo, an mitah hlauhna nasa tak a hmuh theih a, min rawn en tawp mai a ni

Thawk lak ka tum chu ka luak a chhuak hle mai. Ka bân na pawh ka hre tawh lo, hmanhmawh deuhin room kil khat ka pan a, ka pum inlet but but chu ka bun chhuak vek

Thil theih a ni lo. Heng mi zawng zawng te hi, ka va han khawngaih tak, ka lu a rawn hai muai muai a, ka thaw thei tawh lo, tanin chu ka hmu phir ruai a, ka thil hmuh engkim chu a chiang lo vek, chhuatah chuan ka tlu tawp a

****

Chhunzawm tur