The Feared Crimson King 13

[B.laltlanhlui]

Alice POV

Thlan tla hluam in ka harh a, khawvel tak tak a ni tih ka hriat chhuah rualin engkim hi a vir muai muai in ka hria. Minute reilote hnuah ka room ah ngei ka awm tih ka hre leh ta. Ceiling chu ka melh reng a, bed sheet par an phah chu ka lo delh a, thawh chhuah ka tum laiin hmeichhe aw hian hahdam turin min ti a. Ṭawng an tam viau na in an zinga pakhat chiah chu ka thliar hrang thei

Pi Jane-i aw dam tak chuan min thlamuan a, chumi hnu chuan ka khaw hmuh a thim leh vek
________________________________________

Lal Theodore POV

Maris khawpui, Lyria ramria awm hnen aṭang dilna a rawn lut a, Indo laia vengtute invenna tur an rawn phut a ni. Office chhungah chuan hawi kualin paper chu ka en tawh lova. Lal chenna chhak lam bedroom hlatah, Alice-i awmna aṭanga hla takah ka ding a

Ka sam chu ka hui pawp a, a damlo anih ngei hi. A chak loh sa tehreng nen ka nawr belhchhah khan a ti na zual anih hmel. Mi awmthei fa a ni a, mitthi leh tanin a tang te a hmu ngai lo a ni ang. Khang ho ka hmuhtir chhan chu an ram mi leh sa, ka ngaihdan leh enkawl dan hriattir turin a ni. Ka ngaihdan ah chuan ṭha ve tak chu a ni

Ka pa eng nge ka tih tak ang? Ka tum ve nasa viau asin. Mahse nangmah thattu an ni tih hi ka theihnghilh dawn lo re re. Indona ṭan tu pawh anmahni tho an ni

Dawhkan chu nghengin ka tho a, tukverh lian deuh, khawpui in a hual vel chu ka thlir a

Ni a liam a, Dr Daniel leh Nurse te chu Pi Jane-i ho in a kiangah an awm reng a, a ṭha chak sawt viau a, mahse a khawsik erawh a la sang viau mai. Nikhaw hre lo in a awm zeuh zeuh a, chu pawh min hrilh dan a ni

Lal pindan ah ka lut khat khawp mai. Tanin aṭanga ka chawi chhoh hnu khan min pui tu tur ka ko a, damdawi thiam ho kutah ka hlan ta anih kha

Pindana luh ka tum apiangin min dang tu a awm tlat zel. Ni thum a liam leh hnu chuan engmah ka ei chak tawh lo. Ka mu tlem bawk si, hriat chain ka thi lo chauh a ni
________________________________________

Alice POV

Engtia rei nge ka mut tawh ka hre lo, darkar nge thla liam tawh ang le? Eng thil nge thleng hi ka hre lo re re. Lal pindanah a rawn lut a, ngaihdam min dil lai chu ka hre viai vuai. Doctor hnenah chuan ani mah zawk

A vawi nuai sawmna atan ka theihtawp chhuah in ka han ṭhu chhuak a, ka kiangah tu emaw an ṭhu in ka hria, tu nge tih ka hre leh nghal mai

"Puih i ngai em duhtak?" Pi Jane-i chuan min lo nuih seih a

Ka ring thei tawh lovang tih chu ka hria mahse lal nunrawng tak ai chuan ka la thlang zawk fe

"Ngai love ka lawm e, engtia rei nge ka mut tawh?" Nuih luih hram ka tum a, ka aw a lawi vek

"Ni nga chhung a ni tawh ang. Nimin thleng khan i khua a sik hluah hluah a" a ti a

Ni khaw hre lova ka awm zeuh zeuh tih loh chu engmah ka hrechhuak thei lo

"I ril a ṭam viau ang a! Engemaw eitur kan siam nghal ang e, lo nghak lawk rawh" Pi Jane-i chu tho in kawngka lam a pan a

"Pi Jane diktak chuan ka ei theih ka ring rih lo" ka ti a, ka luak chhuak lutuk hi engemaw ka ei chuan ka bun chhuak vek mai ang

A kal lai chu a ding chawt a, rawn hawi let in "Awle duhtak" a tih lai chuan a mitah inthiamlohna ka hmu thei. Ka lo ring ve em em a, ka rinna a tihchhiat vangin nuam a ti lo tih a lang reng. Hreh deuh chung chuan duh ka neih leh neih loh min zawt a

"Aw, inbual ka mamawh khawp mai" tiin ka lo nuih seih a

Ani pawh chu a rawn khi ve sak a, tui ka in leh hnuah Pi Jane-i chuan min rawn pui a, room kan chhuahsan lai te chuan ka chau lutuk hi bang nghenga ka chawlh zeuh zeuh a ngai

Kawngka kan pelh lai te chuan ngaihdan ṭha tak a ni ang em tih ka ngaihtuah pah, Lal Theodore chu room kil lamah a lo ding a, awi a ni thei lo

A mitah tak pawh ka en ngam lo, din ngil ka tum hle bawk

Pi Jane-i chuan chibai a buk a "Engmah ni love aw Lalber, Lady Alice hian inbual a duh a, mahse rin aiin kal kan harsat deuh a" a ti a

"Rei tawk fang i mu tawh a, i kal theih nghal i ring em ni?" Lal chuan nin hmel deuhin a hmui a ti sawi a

Chakna pawh ka nei tawh lo. Hmuh ka duh tawh lo asin. Ka ngaihtuah lai mek in min pawm kang a, innei hlim pasal in nupui a nei ang chiah kan ni mai. Ka lai ve deuh mahse mi nunrawng tak a ni tih ka hrechhuak leh hnuhnawh a

Ka theihtawp in a awm ah ka chum a, mahse ka lo chauh tawh viau avangin engtin mah a awm phah eih lo. Nin hmel deuhin min en a, duhtawk vat turin min hrilh a

Ka rin loh lutuk in khum lamah min hruai lovin inbualna pindan lamah min pawm phei a, fimkhur deuhin chair ah min ṭhuttir a

Pi Jane-i chuan kan hnungah nui chungin min la zui ve reng. Lal chuan inbual zawh ah amah hrilh leh turin a ti a, a chhuak daih. Ka thaw huai mai

Ka hua alawm. Ka hnaih deuha a awm hian nuam ka ti thei lo

Inthlak sawk sawk in ka inbual a, ka zia deuh sawt mai. Pi Jane-i'n min bual laiin ka kut leh ke te chu a zang hawk mai. He ram ah hian mi bual hi ngaiah an nei nge pawh ka hre lo, mahse tun ṭum chu puih ka ngai tak tak a, pawi ka ti lem lo

Minute sawmhnih hnuah chuan bual in aṭang min kai tho a, chair ah min ṭhuttir in ka hsk tur a va la a

Mut kawr a rawn la a, eng hun nge tih pawh ka ngaihtuah lo. Zan chu a ni tawh hmel hle mai

Ka inthlak fel hnuah Pi Jane-i chu lal sual deuh ko turin a chhuak a, chu hun chu remchang ah hmang in tu puihna mah tel lova pindan lam pan ka tum a, muangchanga bang ka pan lai mekin kawngka aṭang Crimson lal leh Pi Jane-i chu an rawn lut a

"Tawp rawh ka lo pui ang che" Lal chuan min rawn pan a

"Min khawih suh!" Ka lo ti ram hmak

Mak a ti hle aniang, a kut a la sawn a "Nangmah a kal tur chuan i chau lutuk, luhlul chhuah lo mai teh" a ti a

"Ka ti thei, min khawih suh, tu puihna mah ka mamawh lo" ka ti a

"Thil awihawm loh lutuk anih chu. I room ah ka hruai mai dawn che alawm. Ka chhuak leh nghal ang" a mitko a rawn san a

Keimah a kal luih chu ka la tum tlat a, zawi te in ka pen a

"Duhtak ka lo pui ang che" Pi Jane-i chuan ka rilru hneh a lo tum ve bawk a

Ka ke chuan a tlin ta ngang lo, chhuatah ka tlu tur tak chu kut tha chak tak hian min rawn dawm bet a

Nam sawn ka tum chu ka thlan a rawn chhuak a

"A tawk tawh" Lal chu a rum nghut a

"Aih, min kaltir rawh. Mi puih i duh chuan tan ina mi khawngaihthlak tak tak te khu zuk pui zawk rawh!" Ka ti a

A rawn meng zau kawk a "Eng a?" A ti a, hetiang em em hian mak a ti ang tih ka ring lo

"Hetiang hi an phu lo asin. Tu mah in an phu lo!" Ka ankhum nawn leh a, min rawn pawm kang lawp a 'kan pindan' ah min hruai a

"Engtin nge i sual em em theih le?" A tha zawng chuan ka hneh dawn lo tih ka hria, mahse ka kâ ka la ang thei tal alawm

A inhum ruh a, Pi Jane-i chu chhuak turin a zaizir a, kan pahnih chauh in kan awm leh ta

"Khang ho kha Mi Pasal, nupui, fate leh Patea te an ni asin! Engtin nge ṭawih ral tura i hnutchhiah theih le?" Ka mittui a rawn tla a, he mi nunrawng kianga awm hi ka duh tawh lo, min dai lo se ka duh bawk

Ka inhnit leh hlawp hlawp a, ka room kan luh chuan khumah dim te in min mut a, blanket a min khuh chung pawh chuan ka la bang thei lo. Puih ngaihna ka hre bawk si lo, theih se chu ei tur tui tak leh inbualna ka chhawp sak ang mahse ka thei si lo

Lal chuan min rawn melh reng a, engmah sawi lovin a chhuak daih

****

Chhunzawm tur