The Feared Crimson King 19

[B.laltlanhlui]

Alice POV

A nui ring telh telh a, a hnu ah phei chuan a dul dawm in a khup a beng thek thek tawh mai

Ka melh rum ngang mai, ka kut ka hum ruh a "I tan chuan a nuihzatthlak maithei, ka tan chuan thil special tak hriatreng tur a ni asin! I tan chuan engmah a ni lo alawm" ti in ka pindan lam ka pan a, ka per at at bawk

A chet dan hian min tina hle mai. Zawhna kha lo zawt lo tawp tur ka nia mahse hriat ngei kha ka duh si a, min ngai thutak vak lo tih chu a lang reng, a nuih dan aṭang khan kan hmang lo a ni ngei ang

Lal chuan inbengdaih tumin a dul a dawm leh a "Ngawi lawk teh....ding rawh" tih pahin a la khi suk a

A mood ah ka cheng tawh lo tlat, ka kal lui a "Ding rawh!" room chhungah chuan a aw a khawk rum rum a, thu a nei tih a hriat lutuk. Ka ding chawt a, ka hawi let leh tawh lo. Inhnial zo phawt ila a ṭha ang. Ka lam panin a rawn pan tih ka hre thei mai

Ka bân a rawn man nghet a, min kuai her lawp a "Ka thu i zawm lo anih chuan ka kalh khum ang che" thinrim deuhin a rawn meng sen ram a, min nuih lai kha ka ngai zawk daih

"I hrechiang em?" A rawn ti leh a

"Aw" tih leh min chelh na ata ka tal chhuak a, ka tawlh hnung vat

Misual tak chu anih hi

"I hre duh anih chuan kan hmang lo...lungngai suh" a ti hmak a

Ka lo bu nghat, sawi a har viau em ni le? ka ti rum rum mai

"I în nasa lutuk a, zanriah eina ah khan i chatthla daih a, ka hruai let che alawm" a inher vut a, a sawi zawm leh nghal "I pindan ah i mu duh lova, Lal i hlau tlat a" tih pahin a in kawk a

"A atthlak hle mai" zak deuh chuih chuih in ka sawi a, awi leh zanriah eina ah ka muhil maw?....

"Ngawi teh, ngawi teh, zanriah eina ah ka muhil i ti em ni?" Ka ti a

"Aw" a ti ve mai bawk

"Thil ei laiin em ni?" Ka ti leh kher a

"Ni love" a ti a

"I sawi chiang deuh thei ang em?" Ka ti leh a

"Awle i duh phawt chuan a ni mai lawm. Însiak ah min cho a" tih pahin a rawn khi suk a, a bekbawr a rawn pawng ṭawl ṭawl mai

"Ka la hria alawm" lai deuhin ka hawisawn a

"I plate kha i nawr sawn a, dawhkan ah i chatthla der alawm" ka lai lutuk hmel chu hmuhnawm ti deuhin min lo thlir dauh dauh

"Awi leh" ka hmui ka hup a, ka beng leh biang a sen vek, a lum pup pup bawk

"Chumi hnu chuan ka hruai let che a, kailawn ah i tluk a, kawng i hmuh theih loh ka hlau alawm" a ti a

Ka lo kuangkuah than a, amah pawh ka en ṭha ngam lo. A thusawi ah hian in deuhsawh lam pawh a lang chuang lo, mahse dawt sawi loh chuan nimin kha chu a nuam alawm

"A bak chu ka hrilh che ang kha a ni mai..." ham bui bui in khumah min mutsan a

Zawhna ka la nei chungin room a let leh turin min ti a

Khumah chuan ṭhu chungin hriatchhuah ka tum a, tlem azawng chu ka la hre thei. Ka nuam sam vak lo nen blanket chu ka sin hlun a

Ka rilru a kal kual vel laiin ka lo muhil leh daih
________________________________________

Kawngka kik ri ah ka inlet vut a, an rawn kik nawn leh chuan ka mumang a ni lo tih ka hre chiah

Lalber a lo ni, a pangngai hmel hle bawk. Court vawi hnihna tur atan inring turin min hrilh a

Khum aṭang chuan tho in bathroom ah ka hak tur nen ka inthlak a

Ka pum a rawn let but but, ka nuam chiah lo a ni. Puan chuan ka inhru a, ka sam ka khuih leh dap

Nizana kan awm dan ka hrechhuak leh zuai zuai

Ka nuih ver ver lai te leh min rawn nuih suk lai te, lu hai deuha ka kal buk buk lai leh thlamuang ta riau a ka inhriat lai te, rei tak hnua in a haw ang mai ka ni. Chu lo pawh min fak hnua ti ṭha riau a ka inhriat te kha a hahdam thlak hliah hliah

Ka thla hlim ka en laiin Lal sual tak hian muanna min pe tihna em ni ang? Tunah tak hi chuan sual tih hi hla tawh tak a ni. A lan ang em em hi chu a lo ni bik lo aniang

Brush chu dah thla in kawngka chu ka nam hawng rawk a, Lal chu a lo ding reng tawh. Dawhtheihna hi chu a la nei chiah lo deuh a ni

"Kan kal vat a ngai" a ti a, a inthuamna ṭha ber chi chu a tla hnuang a, mahse dik lo a awm tlat. Ka hmuh tirh aṭanga min tibuai reng tu a ni bawk

"Nui ziah rawh" ka ti sap a, ring lutuk lo in ka sawi a, mahse a lo hre hman tho

A rawn khi suk a, ka lu hi a vir muai muai "Min ṭhawng reng mai dawn anih hi" tih pahin ka vawn theih turin a bân a rawn dah hnai a, min rawn en chiah kan mit a intawng chat a, ka hawisawn nghal, Lal pawh chu a zak ve deuhin ka hria

Ka rin aiin nuam ka ti daih mai. Rorelna room kan pan lai chuan engmah kan sawi tawh lem lo

Kan thlen chuan ka dinna ngaiah bawk ka ding leh a, Theodore erawh chu thu hmel deuhin a ṭhu hmak mai

Vawiin chu hun a kal muang tlat in ka hria, thupuangtu chuan rorel tawpna ni ah a puang a, an tuar rei tawh dawn lo e, Lyrian sipai te chungthu an rel dawn a, mahse Lal Theodore chu fing tak a ni

Ka rin dik hram ka beisei, a tana rinawm turah a tih hnuah a dam tur maithei asin. A tana bei tur pawhin a ti maithei a ni

Taninah sipai te chu hmanna an awm dawn lo em mai

Nizan lam ka lo ngaihtuah leh daih, tinge zan khat ringawt khan min tihbuai em em le, hrechhuak thei hlauh ila aw....

An ram mipui ro a rel zawh ah Lal hmaah chain a thlun ho chu an rawn hruai a, nimin nen chuan boruak danglam tak a ni. He ta awm ho hi mipa vek an ni a, an awm dan chen chuan dang tak an ni

Nimina mi te kha chu nep te an ni, tiduhdahna an tawk vak lo zawk. Vawiina mi te hi chu rapthlak tak an ni. An cher lutuk hi ruh hlang an ni ringawt. An la dam chhuak ringawt pawh hi thilmak a tling hial mai

Hnuai lam melhin an tan rilru ṭawngṭaina ka lo nei a

"Lyrian sipaite u, ṭhu in Lalber hi chibai buk rawh u!" Thu puangtu bawk chuan a rawn ti a "Nimina mi te ang khan heng ho hi chuan i zahngaihna an mamawh lo, an sual hi ngaihdam theih an ni lo" ten hmel zetin Lyrian ho lam a hawi a, Lal erawh chuan uluk zetin a lo ngaithla thung a

Thupuangtu bawk chuan a aw a thian a, Lal in engmah a la sawi bawk si lo "An thubuai chu hei hi a ni: Walzenorian Sipai te chunga tharum thawhna!" A ti a

Thupuangtu in a puhna chu a ngaithla ngam tawh lo, mipui lam ka hawi chiah, an zinga pakhat chuan min lo en reng a, a khabe hmul chu ṭuak tawh tak a ni, min lo melh kar a, ka meng zau nghal kawk. General Otis a a lo ni, ka pa nen an in hnaih zia ka hria, ka pa in ruai a ṭheh apiangin a tel ve ziah bawk. Tereuhte ka nih aṭangin ka hre tawh a ni

A zaidam in ka unaupa Parcival nen thilpek min pe ziah ṭhin

Tunah erawh ka hriat ṭhin hmel pawh a pu tawh lo, amah a ni tih ka chianna pawh a mitmeng leh hnar aṭang chuan a ni

"Ka hre hnem tawk tawh e" Lal chuan thupuangtu chu a tawp tir a

****

Chhunzawm tur