By Psyche Zy
#Christianlovestory #shortstory
MALSAWMSANGA & LALRINSANGI
Short story
Ka phone ka bih mual mual lai chuan, ka ṭhiannu chuan min rawn nghawk zauh a, ka hawi chhuak ve nghal thuai. A mit hmang chuan enna lam tur min hmuh a, ka va en chuan ka nui nghal var var mai.
U Sawmsanga chu thingpui in chung hian, a ṭhiante karah a lo nui ve suk suk a, kan awmna a inhlat deuh avangin ka hmu ṭha hlei thei lo, "I tla ang e, ti khan awn vak vak suh", Zopuii chuan a lo ti leh.
Ka lo en nasa leh lutuk tih ka hriat chhuah chuan ka insiam ṭha nghal thuai, "Be ngam hlei lo hi, i en leh vak zel tho bawk sia", Duhawmi chuan a lo ti ve leh a, "Aw... , biak leh en a inang hleinem", ka lo ti vat.
"En hlum theih chu ni se i en hlum tawh ang", kan ṭhianpa Benjamin-a'n a tih chuan, "I ṭawng malsawm lo", ka lo ti nghal hlar. Chutah ka ṭhiante chu a rual ṭhap hian, "Malsawm.....", tiin an nui nghal tuarh tuarh a, an nui uar ve bawk a, min en ṭhup mai.
U Sawmsanga hmingpum hi Malsawmsanga a ni a, a hming kaihhnawih tawh phawt, ka kâ aṭanga a chhuah tawh chuan an lo la fuh hmanhmawh zel. Chhaihna tur awm zawng zawngah, min chhaih chikim vek tawh hian ka hria.
Ka ṭhiante khap pah chuan U Sawmsanga chu ka va en a, min lo en ve kur, ka hawi sawn ranzia mai chu! Ka sa nghal pup pup mai. Zah mah nak a laiin, "Sangsang, in va hlim bik ve a", U Sawmsanga ṭhianpa U Hmuaka'n a la rawn ti zui, a hawi chhuah pawh ka hawi chhuak ngam lo.
Ka ṭhiante lah an han nghal chak tlat pek a, "Lo nui ve ru", Duhawmi chuan a ti lauh a, a nakah ka sik hrep a, "A na!", a la ti zui. A va hahthlak hlawm tak!
Ka tho tharh a, ka ṭhiante chuan min en chho ha, "Ka zung dawn", tih leh kal ka rual a, U Sawmsangate pawh an lo phei ve chiah a, ka let leh mai dawn em mawni. Mahse, ka kal laklawh tawh, kan in tawk chiah chiah lehnghal. Kan inpelh chiah chuan a perfume rim ka hip lut nghal vang vang mai, 'Pure Black' ngat mawle, hmannia Duhawmi lei luihtir kha a ni ngei ang.
Ka zahna leh laihna avanga ka biang tai leh ka beng sen chu, miin an hmuh loh nan ka kut chuan ka hup vat a, ka tlan phei nghal chawn chawn.
Kum 5 zet ka ngaizawng tawh a, mahse bialnu nghet a nei a, ka ṭhiante pawh ka duh tirh chuan ka hrilh mai lo. A bialnu nen chuan inhmeh pawh an inhmeh, tuman thik enah pawh kan en lo, a tuate pawn innei turah kan ruat vek tawh kha an ni bawk a.
Mahse, vanduaina hian mi fel leh mi sual a thliar ve si lo a, U Sawmsangate ang KṬP hruaitu, khawtlang leh chhungte tan pawha ṭangkai em em leh Pathian ṭih pawh ni mah se, vanduaina chu a lo mikhual ve tho a ngai si a le.
Nikum hmasa kumtir lam khan a bialnu U Ahmangaihi chuan cancer vangin a boralsan a, U Ahmangaihi pawh mi fel tak a nia, uitu pawh a ngah khawp mai. U Sawmsanga phei chuan a tuar khawp a, zan thum lai chu U Ahmangaihi thlan chungah a lo muhil lai hi an hmu tawh nghe nghe a, ka lainat lutuk chu ka ṭahpui ve tawp.
Mahse, amah U Sawmsanga ka ngaihsan em emna leh ka duh zual em emna chhan pakhat chu, mi tamtak chu an vanduainaah hian Pathian demin, sual phah nan an hmang ṭhin a. U Sawmsanga erawh chu a hma aiin kohhran lamah a inhmang uar sauh a, zan tin Biak inah a ṭawngṭai ṭhin bawk.
Kei hi ka pa khan ka naupan lai aṭang tawhin, zan tin Biak inah min hruaiin kan ṭawngṭai dun ṭhin a. Chuta ṭang chuan zana Biak ina kal hi tih ṭhanah ka nei a, chham tur ka hriat loh lai pawhin ka kal ngei ngei tho.
Kei chauh ni lo, zana ṭawngṭai hi an tam ve a, mahse zan tin erawh an ṭawngṭai lo, U Ahmangaihi boral hnu deuh aṭang khan U Sawmsanga nen kan ṭawngṭai dun ta ṭhin a, a hriat pawh min hre ve ta deuh.
Zan khat chu ka pa thih ngamin a na a, a hmaa Biak in ṭhuthlenga ṭawngṭai ringawt ṭhin kha, maicham hmaah ṭhingṭhiin mittui tla zawih zawihin ka pa a dam theih nan Pathian chu ka ngen a. A tih dam phawt chuan missionary ni turin ka dil ang, tih thute ka intiam a, ka mangang tawh em a tin ni.
Chutia, ka ṭawngṭai zawh tawh lam deuhah chuan mipa ṭap ri ka hria a, U Sawmsanga a ni. Chuta a thu chham ka hriat aṭang chuan a lawm, ka ngaihsana ka duh zual em em ni.
"Lalpa, mi chuan chân tur takngial pawh an nei lo a, kei chuan chan tur ka nei tal a, ka vannei a ni tiraw. Ka hmangaih ka chan a, ka hna ka chan bawk. Mahse nang ka nei che a, ka lungngai lo e. Ka duhlai ngawih ngawih min laksak a nih chuan, a aia ṭha min pe dâwn tih ka hria a, ka lawm e. Ka hmahruaitu lo ni zel la, i duh loh zawng ka duh loh zâwng ni se, i duh zawng ka duhzawng lo ni mawlh rawh se. Amen".
Khatiang zozai a tawk chung pawha Pathian hnena lawmthu a la sawi thei kha ka ngaisang. Ka pa pawhin mual min liamsan tawh a, ka tuar lo chu ka ti lo. Mahse, U Sawmsanga ṭawngṭaina hla khan min hnem ka ti mai. Hun harsa ka tawh chang pawhin min hnemtu ber a ni tawh.
Kum khat lai a liam leh tawh a, hmanni deuh khan hna thar a hmu ve hlauh a, sawrkar hna a ni nghe nghe. Mahse, zan inkhawm leh ṭawngṭai a ṭhulh ngai lo.
Kan ṭhutna lai vel chu an lo bawr luai luai a, U Sawmsanga pawh a lo ṭhu ve kur mai. Hreh tak chung chuan ka va pan hnai a, min lo ngaihsak hlawm lo hlauh. U Zorina titi chu an lo ngaithla ṭhap a, ka va ngaihthlak zawm ve hmiah. A chet chhiatna chanchin a sawi a, kan nui leh huk ṭhin a, amah leh amah a insawisa hmiah hmiah mai a, kan hlimpui khawp mai.
Naktuk khi kohhran hmeichhe inkhawmpui a ni a, kan thlen dawn avangin Biak in leh a vêl KṬP hoin kan ti fai a, chhun thingpui inlai vel a ni a. Kan in zawh hnu chuan, kan che leh suau suau a.
U Sawmsanga chu ka bulah a lo tawlh ve hrut hrut a, a chung sang lama dárthlalang ho nawh ka tum lahin a phal tlat lo lehnghal. Washroom-a ka luh lai khan ka ṭhianten min lo puang em mawni dâwn le? Min lo puang tak tak a nih chuan ka zak ngawt ang.
A sang ṭha bawk a, dak vaha ka nawh kha ani chuan a hmachhawn ran a, a chung a nawh chhungin, a hnuai ka lo nawt a. Nula ṭhenkhatte chuan min en duh khawp a, nuam lo ka ti deuh chu kal sawn ka tum a, U Sawmsanga chuan, "He lai hi ila nawt lo", a lo ti zel a, hrehawm tiru tak chuan ka nawt chhunzawm ve ta zel a.
Haw lamah chuan ka ṭhiante chu an hrilh leh hrilh loh ka zawt a, "Hrilh e", an lo ti heu mai, ka zak lutuk, thinrim bawk si chu awm dan pawh ka hre lo, ka ding tawp a. Ka ṭhiannu Zopuii chuan min khawngaih deuh a ni ang, nui ṭhaw chung hian, "Kan hrilh lo, Lal Jamin-ate khan an tihder mai mai che a nih kha", tiin ka darah min rawn kuah a.
"I hmel hmuhnawmzia kha", tiin Lal Jamin-a chu a lo nui hawk hawk a, an kawt thleng kan inum thleng rak. A mipa ber hi an in a hnai ber a, a nau John-tea te nen pawh kan inkawm tho. Mahse, ani chu phai ramah a awm nasa zawk a, a lo haw chang chuan kan thianho zingah a lo tel ve ṭhin, ṭhian dang pawh a nei mang lo.
Rawngbawl a ngaih avang chuan, tawi khawmuang tawh loin kan inlam kan pan ta ṭhap a. Vawiina kan awm dan vel mitthlain, eirawng ka bawl surh surh a, Woofer-ah chuan Synod Choir zai ka play rat rat bawk a.
Ka nu lo haw pawhin, "In hnatlannaah eng rau nge i va dawn a, i va hlim ve", a ti tawp a, ka ṭhiante leh Pathian chauh lo chuan ka hlimna hi min hriatpui lo ang. Ka thil tih engkim chu ka phur surh reng a, over ka inti.
A tukah chuan, kohhran hmeichhe inkhawmpui avangin ṭhalaite chu kan buai nak nak hlawm a. U Sawmsanga hoin kan usher a, kan ṭhianhoah kei leh Jamin-a chiah kan usher a, midang chu ei leh in an buaipui a. Inkhawm lai chuan reception office-ah kan ṭhu ṭhap, ka hmaah U Sawmsanga a ṭhu a, ka lai leh vek tawh.
"Sangsang, i nuam lo em ni, i va ngawi chawi ve", U Awmpuii chuan a ti a, U Sawmsangan min lo en ve reng bawk sia, ka nui ringawt. Ka bula ṭhu Jamin-a chuan, "A zia ve reng a nih hi, kan ṭhianho bulah chiah a pawr", a lo ti a, "E... titi ve bawrh bawrh rawh", U Awmpuii bawk chuan a lo ti leh.
Midang chu an titi a, an nui hawk hawk hlawm a, nuih rin an hlau ve tho bawk sia, an duh ang pawhin an nui thei lo. An karah chuan, kei leh U Sawmsanga chu kan ṭhu ngawi dun reng a, an nuih leh kan nui ve a, an titi lahin kan ngaithla ngawi reng a, kan inmelh fuh leh zauh ṭhin.
U Sawmsanga chu a ṭawng duh vak lo a, mahse ṭawng mawh chu a ni em em loin ka hria, a ṭhiante bulah chuan a ṭawng ve suam suam ṭhin a, mi dang bulah a awm hian a ṭawng ve vak ngai lo a ni mai. Zawhna an zawhin ṭha takin a chhang a, thil nuihzatthlak an sawiin a kiai ve suk ringawt.
Ka en apiangin min lo en ve zel a, kan mit a intawng chiang thei lutuk a, a intawn apiangin ka ṭim uaih uaih zel.
Ban hla an lo sak takah chuan, kan chhuak nghal sang sang. Rin aiin inkhawm an tam zek a, a inkhawmho chuan eitur an chang chiah chiah a. Refreshment semtute pawn an chang a, ushers-ah pawh chang an awm nual a, chang lo pawlah ka tel leh tawh.
A chang loho chu Biak in kawtah chuan kan ding ṭham a, thlate kan la ta vel mai mai a, mahse ka ṭhiante chu, an u te emaw an bialpaten an ei ai an rawn pe sap sap a, ka dâwng leh ta. "Lo ei ve rawh", chu an ti ve tak nain ka ṭang ve tlat a, ṭhuthleng te lo awmah chuan ka ṭhu ta daih, ka inbun sang ve khanglang bawk si a, ka ke a kham ṭhum tawh mai.
"Kha ei rawh", U Sawmsanga chuan a rawn ti tawp a, "A ngai hleinem", ka lo ti ve tlat. A kal mai dawn emaw ka ti a, a ding reng a, a tukhum chu tuai vut vut chungin min melh chhuk run a, ka lo en chho ve ha.
A thil ken lai chu ka mal chungah rawn dah tawpin a kal nghal vut a, ka inthlahrung ang reng. Mahse, ka ril a lo ṭam ve deuh bawk nen, ka ei zo vek.
Zan inkhawmnaa kim hun tur an sawi zawh hnu chuan kan haw ta sang sang a, mi an haw duak tawh hnuah ka bag-a chapal ka dah chu ka phawrh chhuak a, ka ṭhianten min lo nghak ve reng tawh nen, ka pheikhawk sang chu dah lut sawk sawkin ka tlan phei ve nghal a.
Mahse, haw kawng tluanin ka zak ti ila ka sawi sual lo ang. U Sawmsangate nen kan haw rual a, pheikhawk thlak ni ber kherin, ni dangah ka thlak ngai tawp si lo. Ka thlak veleh kan han haw rual a ni a, kan vei hnem bawk sia, hah nen, hmel a chawhnu ruih tawh bawk a, ka ṭhing tawh ngawih ngawih, khuk ral theih chu ni se ka khu ral tawh ang.
Zanahte pawh kan han inkhawm leh lawp lawp a, inkhawm banah an sulhnu tifel lehin kan haw ve meuh chuan, dar 10 a pel tawh. Kan in hi a va fal dawrh bik a, Jamin-a bulah, "Min thlah rawh", ka ti a, "A ti leh ringawt, nula ka rim dawn asin", a lo ti bul bul a. Nui hakin, "Nula rim tur pawh i hmuh zawk loh kha", tiin a darah ka beng thak a, "Ka hmu", a lo ti ve hlur.
"Khawi ami?", tia ka zawh chuan, "Ka hre chuang nang", a lo ti ṭhaw, kha maw... Hepa hian khawia nula mah a hmu zo lo ang. "Min thlah ang a, min rim nghal mai dawn nia", ka ti chu a ner nasa mai, eng nge maw zanin min thlah pawh chu a hreh em em le?
"Sangsang, kan lo rim ang che?", hnung lam aṭang chuan an lo ti a, ka phu zuk mai, kan hnungah U Sawmsanga leh U Hmuaka an lo awm reng chu niin, ka zak leh ta. Zahna tur hian min zui reng emaw tih tur a ni, nikhatah hian vawi khat tal chu ka zak ngei ngei.
Ka tih ang chiah mi dangin an tih ve pawn, an zak ngai lo, kei chu ka zak tlat zel. Ka ṭhiante chuan, "I zakzum lutuk a nih kha", min ti mai a, mi zakzum tak chu ka ni vein ka hria. Ka nau Zamzami zawk pawhin, "Zahzum lutuk chuan khawvel a nuam thei lo", tiin min zilh ve ngei, hei hi chu ka pianpui a nia, ka sim thei lo.
"Nia, lo thlah ru, vengthlangah nula kan rim dawn", Jamin-a ṭhianpa Muana chuan a lo ti a, "Ka'rawh", tiin U Hmuaka chuan min hui a, kal mai nachang pawh ka la hre lo, Jamin-a chuan a nawrin min nawr phei.
Kan han haw rual ta chu a ni a, U Hmuaka leh U Sawmsanga chu an ti ti a, an hnungah ngawi rengin ka zui ve det det. An pen zau dun bawk si a, kawng chanve kan thlen chuan ka hah tawh hle. U Sawmsanga chu a ding thut a, a rawn leh hawi nghal a, "Kan kal chak i ti em?", a ti thum chhal a, "Ti lo e", ka lo ti thuai.
U Hmuaka chu mei nei deuh hian a lo nui hawk a, "Kan hmaah lo kal rawh", tiin kawng min kian a, ka lai leh vek tawh. Kan kawt kan thlen chuan, "Thingpui lo in ula", tiin ka'n sawm mawi hnai ve a.
"Kan in lohin le, 'kan rim dawn che' kan tih kha", U Hmuaka chuan a lo ti thuai a, kan in kawngkhar chu hawngin a lut nghal hmiah a. U Sawmsanga nen chuan kan en tawp, zaizira kal hmasa tura ka tih chuan, "Kal hmasa rawh", a lo ti ve tlat.
In chhunga kan luh chuan ka chhungten min lo en ṭhap a, U Hmuaka chu a neitu ni awm hrimin, bawp khawkherh at hian a lo ṭhu than tawh, ka rin aiin a tlangnel.
Ka inthlak sawk sawk a, dárthlalangah ka lang ṭha em tih ka en leh phawt a, ka nau chuan a lo hrethiam a ni ang, min nuih tet tet a. Ka lan ṭhat leh ṭhat loh ka zawh chuan, "Ka chapal hi va bun zawk rawh, i chapal kha chu a uih hmel", a lo ti a, vawiin chhun ka ngaihtuah chhuak a, ka zak ṭha leh.
Ka va chhuah phei chuan, ka nuih a za ang reng hle. Kan inlengte chu boruak an inngam san hleih ngang mai, U Hmuaka chu a lo titi leh nasa tawh a, zaizir pah hian ka nu eng eng emaw a lo hrilh a, ka nu pawh a lo bu ve nghut ngut mai.
U Sawmsanga erawh, a ṭhu ngawi reng a, a kut chu suihin a kutzungpuite chu a insual tir vel mai mai a, U Hmuakan, "Tiraw Sawmsang?", a tih changin a lo "Aw", ve thuai a, chu bak chu a ṭawng lo tluk a ni.
Han biak lum lam dan ka hre chiah bik bawk si lo a, U Sawmsanga bulah chuan ngawi rengin ka ṭhu ve tawp. Ka bula a ṭhu ringawt pawh hi ka lawm a kim em em tawh, ka mit sir ru reng a, min en ve zuk zuk reng a, ka lungphute chu a su dup dup nimai hian ka hria.
Thingpui ka lum pah chuan thla ka lak ruk a, min hnungchhawn zawngin a ṭhu a, mahse a tukhum ringawt pawh ka hlimpui thei. "I lum tui lutuk", te chu an han ti ve a, U Sawmsangan ka thingpui lum a in ve ta chu a ni a, a mak hle mai.
Inkhel chungchang an sawi leh a, U Sawmsanga pawhin a rawn sawi ve zauh a, biak loh aiah, "Tute nge i ṭan?", tiin ka lo zawt ve a, "Manchester United ngat", a lo ti ve hluai a, kan ṭan a inang leh hlauh. "Inkhel i en ve ṭhin maw?", tiin min zawt let a, kan in ṭhut hnaih ve deuh bawk nen a hmel pawh ka hmu chiang khawp mai.
Hetiang anga chiang hian ka la en ngai lo, "A va hmelṭha e aw", han tih vawng vawng tur chi a ni vak lo a, mahse a pa thlawt. A hnar ngul a sang a, a mit khur a thuk deuh hlek a, a mitmu rawng a uk bawk. A hmui pan hling hlengte chu a sen dang hlar a, zuk leh hmuam eng mah a ti lo a, amah chu a thianghlim sar a, a hrisel hmel ngawih ngawih.
Inkhel ka en vete chu mak a ti a, a nui suk suk reng, ka ngainat zawng ṭhenkhatte min zawt nghal luam a, interview te pawh ka ang. Ka ngainat zawng ho ka sawi chuan, "I va fel ve", a ti daih a, ka thil ngainat zawng leh fel a inzawmna pawh ka hre lo e a. U Hmuaka leh ka nu pawh an inmil phian a, ka naute pahnih pindanah lehkha an zir thung.
Dar 10 a rik dawn ṭep chuan haw zai an rel ta a, "A la hma a lawm", tiin ka nu chuan ka sawi ai min sawisak. "Kan officer pa hi a thawhhma a ngai a, ni dangah kan la rawn leng leh zeuh zeuh ang", U Hmuaka chuan a ti a, mit min rawn siai zeuh bawk, a ngaihna ka hre lo hle.
Kawt thleng chuan ka va thlah a, U Hmuaka chu inti fel ni awm tâk hian, "In inmangṭha chhung meizial ka va ṭan ang e", tiin kawng sir lam a pan a. Engmah sawi lo chuan, kan ding ngawi reng a, "Muttui aw", ka ti ta ringawt a, "Muttui le", a tih ve ka rin nen, bu nghutin a ṭhianpa awmna lam a pan nghal a.
A ṭhianpa zawn a thlen hma hret chuan a rawn let leh, a phone min pek pahin, "I number min lo pe", a ti leh tawp a, lo la vatin a phone chu ka hmet hawng a, U Ahmangaihi thlalak a lo lang kiau mai.
"Pattern?", ka tih chuan ka ken lai rengin a rawn thai kawi a, ka number ka chhut luh hnuah chuan a phone chu ka pe a, "Ka lawm e", ti lehin a pen phei lehnghal a. Mahse, rawn inher leh vutin, "Muttui le", a ti ve ta nge nge.
Ka chhungte chuan min lo chhaih nghal ringawt pek a, kan la nih loh thu ka sawi pawn, an awih lo khawp mai. Keimah hian ka hre chiang a lawm, U Sawmsangate ang duh chi ka ni lo hrim hrim.
Chu mi zan aṭang chuan, KṬP thil tih kawng hrang hrang, zaipawl hla zir tih leh kohhran thil lamah kan inhmu ta zut a, zantin kan ṭawngṭai dun ṭhin bawk nen, kan innelin kan inhnaih sawt viau. Karkhatah vawikhat tal zanah a lo leng bawk a, ka chhungte leh ka ṭhiante chuan ka ni tawhah an ngai nghet hmiah tawh.
Mahse, aman chutiang lam engmah a sawi ngai lo a, beiseina lo neih ve ringawt kha ka duh lo, ka beisei ang a nih leh loh chuan ka na dawn emai, ka zak dawn bawk.
Ni khat chu kan ṭhianhoa kan bazaar laiin U Ahmangaihi nau Azuali nen kan inhmu hlawl a, a fala inbiak lawk a duh avangin ka ṭhiante chuan min kalsan a.
"U Sawmsanga nen hian in ni ve deuh em ni?", tih min zawt tawl a, "Ni nang", ka lo ti thuai, "A nih chu", a ti leh tawp a, a awih loh hmel kher mai. "Ti nge min zawh?", ka lo ti let a, "Ti vak mah, tunlai chu U Sawmsanga nen in chungchang sawi sep a tam a, ka zawt chiang duh mai mai che", a ti duah a, ka inthlahrungin hrehawm ka ti nghal ngawih ngawih.
Mi chuan engtin tak min lo sawi ang maw? Hetiang hi ka duh zawng a ni lo a, hmeichhe zakthei lo takah min ngaihte ka hlau ṭhin. Bakah U Sawmsanga rawngbawltu a ni a, mi sawi sep kan kai tawh a ni si chuan a tan pawh a ṭhat ka ring lo. Azuali lakah pawh ka inthlahrung hle, U Ahmangaihi boralna pawh kum hnih chauh a la liam a, chuta kara a u bialpa leh hmeichhe dang chanchin chu hriat a hrehawm ka ring.
Ka ṭhiante chuan, "Inthlahrunna tur a awm lo, amah U Sawmsanga zawkin a pan hmasa zawk zel che a lawm, in nih leh nih loh te chu in thu thu, an lo sawi ve ngai lo emai. Eng atan mah ngai suh, 'Ho sih sah', ti la, a ṭha vek mai ang", an ti duah a, mahse ka awm a la nuam chuang lo.
"U Ahmangaihi chu, huat thu suah, a boralna kum hnih lai a liam tawh a. U Sawmsanga pawh mihring ve tho a nia, a lungte pawh a leng ve thei tho a, nupui nei loa awm reng tur a ni bîk lo. Adama pawh Pathianin a khawhar hlauin Evi a siamsak leh a ni a, nupui nei loa awm rengte chu a Pathian thu lo zawk daih", ka naute chuan an lo ti ve bawk a.
U Sawmsanga a lo len pawhin engmah ka sawi ngai lo, kan nih leh nih loh ka hre bawk si lo a, lo sawi ve vak kha a chi loh.
U Hmuakate hoin inkhel kan en a, thingpui hmeh an rawn inken thlap bawk a. Ṭan zawng inang ta na na na chu, keini leh ni lo angin kan au pawr ve hle a, U Sawmsanga pawh a pawr ve tawh khawp mai. U Hmuakan boruak a vaw hot bawk a, kan thawm chu a ṭha ve khawp mai.
Dar 12 rik dawnah an haw ve thei chauh a, "Muttui aw", ka tih chuan, "Mangṭha le", a lo ti daih. Ka ngaih a ṭha lo nghal ringawt lehnghal, mahse ka ngaihtuah thui ve mah mahin ka hria a, ka lu ka thing nawk nawk.
Presbytery inkhawmpui a nih dawn vangin kawr ṭhui tur ka ngah ve hle a, ka indaih lo ve ang reng a. U Sawmsanga pawh hman zan a lo lêng kha thawm a la rawn nei leh miah lo a, phone lamah pawh kan inbe ngai ta lo, a buai ve a nih ka ring a.
Mahse, zan ṭawngṭainaah pawh ka hmu ta ngai mang lo a, a chungah thil ṭha lo a thleng hial em mawni ka ti rilru a. Mahse, khawlaiah emaw inkhawmnaa ka hmuh hian, a ṭhat hmel hle si a, rilru a tibuai ve khawp mai.
Pathian zarah Presbytery inkhawmpui pawh dam takin kan zo ve a, kan kohhran zaipawl pawh, kan huphurh ang aiin kan zai ṭha ve hle a ni. Zaithiam tih aiin zai nung tih kan hlawh a, kan lawm hlei hlei, Pathian vang liau liau a ni.
U Hmuaka motor khalha kan ṭhian thumin kan chuang haw ṭham a, U Sawmsanga a hmaah a ṭhu a, biak chu sawi loh, a melh pawh min melh eih lo. Ka ṭhiante leh U Hmuakate chu an titi a, an nui ho leh dar dar ṭhin.
U Sawmsanga ngawt chu ka melh a, a muhil niin ka hria. Motor aṭanga kan chhuah hnuah pawh, U Hmuaka chuan ṭawngkam ṭhain min thlah thlap a, U Sawmsanga erawh a la maimitchhing.
"In inhau em ni?", tiin ka ṭhiante chuan min zawt ta nge nge, kan inhauh loh thu leh tunlai a mizia a danglam thu vel ka sawi ve luam a, ka rilru a hah ve tak zet tawh.
"Awi, beiseina a siam te te che a, kan van ngei reuh e", Duhawmi chuan a ti hluai a, Zopuii ve thung chuan, "Duh khawp lohna che a neite pawh a nimai thei asin", a ti a, Zopuii hi chuan thil a sawi ve mai mai ngai lo a, a sawi ve tawh hi chuan a ngaih dan a nih loh pawhin thil ni thei awm ang hi a sawi pawp zel a. Thil han zep leh pehhel kual vel hi, a peih vel lo, a frank a, a bula awm pawh a nuam, ka ṭhianṭha ber a ni bawk.
Chutia ka ṭhianten an sawi takah chuan ka rilru a buai zual a, ka chhungte pawhin, "An va lo leng khat ve", an ti bawk a, ka naute pahnih pawhin "U Hmuaka" an ti deuh reng a, ka va be tawp dawn em mawni? Mahse, ka zak ve deuh bawk si.
Ṭhalai inkhawm zanah thu a sawi dawn a, zah pawh dawn loin, "Ṭha deuhin aw, ka lo ṭawngṭaipui che a nia", ka va ti ṭhuai, ka ngai ve tawh bawk em a ni. "Ka lawm e", tih a rawn thawn a, ka nui leh var var tawh, "Message pakhat lekin mi a ti hlim thei", an ti hi ka hrethiam ve ta chiah.
Thu pawh a sawi ṭha khawp mai, a thusawia ṭha ka tih leh ka ngaihtuahna ti thui deuh pakhat chu, "Nangmah avang khan Pathian biak an chak lo thei", a tih kha.
Kan nun, kan thil ei, kan thawmhnaw hak engkim hi, a sawiseltu kan haw hlur a, a dik lo ka ti. Min sawi peihtu hi chu an awm ve tho, mahse an sawi reng chuan inenfiah kan ngai ka ti ṭhin. Rawngbawltu inti, ṭawngkam duh tui lo te, zuk leh hmuam emaw ruihtheih thil tih te, kan thawmhnaw hak duh zawngahte leh kan nungchang aṭangte hian, mite hian kan Pathian hi biak tlak a ni em? tih-ah ngaih dan an nei ṭhin. Kan nun a chawhpawlh avang hian, mi tamtak chu an hel ṭhin niin ka hria. Ringtute hi kan fimkhur a lo va ngai em, tihte ka ngaihtuahnaah a lo lut nghal zut zut a.
Inkhawm banah chuan an chibai sup sup a, "Va chibai ve ang u", an tih chuan, "Va chibai rawh u", ka lo tihsan a, ka ṭhiante chuan a pawhin min pawt phei. Ka lo inngaihbel nge, kan inchibai lai chuan min en pawh ka hre lo, "I sawi ṭha....", ka sawi zo hman lo, midang min biaksan daih a, ka zak chem chem mai.
A tukah chuan ka kawr ṭhuina ami tur, khawl la leh eng i lo vel zawng turin, ka bazaar a. Shanghai bazaar lama ka tei kual vel mai mai lai chuan, U Sawmsanga ka va hmu a, pan phei ka tum zet a, a banah chuan hmeichhe pakhatin a rawn vuan a.
Ka nghilh nghal dup mai. Chu nu chu a sang ṭhain a chhe lo em em a, a ngoin a hmelṭha bawk. U Sawmsanga nen chuan an hlim dun hmel hle a, U Ahmangaihi bula a awm dan ang chiah khan a ni a awm ni. Mi dang bulah chuan a inhmuam up em em a, mahse U Ahmangaihi bulah leh henu bulah chiah hian a hlim ṭhin a lo nih hi.
Huh.... Mi mawl nu, beiseina nei lo turin ka tih che kha, ti nge beiseina i lo neih? Tunah chuan engtin nge i tih tak ang? Hlim taka a awm lai hi hmuh a nuam ka ti, mahse a na.
Ka awmna lam an rawn pan thla zel a, ka ding tlawn reng ringawt. U Sawmsanga pawhin min rawn hmu ta ngei a, harsa ti tak chungin ka lo nuih lui sak a, mahse, min nuih let ve chuang lo. "Eng nge i la tih? Kal sawn ta che", ka ti rilru mawlh mawlh a, pen nga vel chauhin kan inhlat tawh.
"Sang...", a tih lai chuan ka inhersan ve ta hmak a, khawi emaw hmun reh laiah chuan step a lo awm a, tah chuan ṭhu thlain, ka ṭap tawp. Ka zep lo, a na a ni. Miin min hmuh ka hlau a, mahse ka insum thei lo.
"Lalpa, chakna min pe rawh", tiin ka ṭawngṭai nghal mawlh mawlh a, la inla khawm kim lo viau mah ila, ka haw ta tawp. Ina ka thlen hnu pawhin ka mu zawi hnuang reng a, a vawt ka la ti em em zui.
Ka nu lo haw pawh ka chhawn peih lo a, ka pang a rawn dep a, ka khua a lo sik reng chu niin. Pathian zarah ka hrisel a, han damloh em em hi ka nei ngai lo, ka khua a sik ve ringawt pawh chu ka nu ngaih a ṭha lo a, hri ṭha lo ka vei te a ring a. Kan cousin-teah doctor an awm a, chute chu a rawn nghal chuk chuk a.
"A chau tawng khawng emaw, a rilru a na nih ka ring", a lo ti daih a, khawsik leh rilru na a inzawmna pawh ka hre lo e a, ka rilru na tho mah se, khawsik tur em em khawpa rilru na a ni lo. Bakah, rilru nat vanga khawsik te chu a, a lutuk mah mah.
Ka nau chuan, "U, a ni ve thei lutuk. Hrisel deuh an khua a sik thut chuan, mi thiam lamin, rilru nat vang emaw hah tawngkhawng a nih thu an sawi tlat", a ti ve a, ka awih chuang lo. A tuk aṭang pawhin a sik chhunzawm lem lo bawk a, ka hah vang a nih ka ring nghet hmiah.
Group hnatlang te, zaipawl hla zir te leh thil dang dangahte pawh, U Sawmsanga chuan min hmu lo der ta ngat ngat a, awm ve angah pawh min ngai lo tih tur a ni. Ka bul hnaih ami, ka lak mai theih pawh, mi dang a tir tlat a, min biakna tur ngei ngeiah pawh min be duh lo a, a ṭhiante a rawn zawhtir ṭhin. Chuti na na na chu, ka ti a, ka pehhel ve ta ngat ngat a, ka thiam ve tho emai.
Zan ṭawngṭainaah pawh Biak in chhung ka pan ding nghal a, kei aia a ṭawngṭai zawh hmasaka pawna a lo awm tawh chuan, tumah be kawi loin, in lam ka pan lehnghal nal nal. Ka ṭawngṭaipuinaah pawh, amah ka theihnghilh nan ni loin, a laka ka rilru puthmangte a bo nan emaw chakna ka neih theih nan ka dil ṭhin.
Ka theihnghilh theih chu ka ring lo, kan lawina kohhran a inang a, kan Branch OB a ni bawk a, kan inhmu reng dawn a, theihnghilh chu thil harsa lutuk tur a ni.
U Ahmangaihin a boralsan aṭang khan, zantin a tan ka ṭawngṭai ṭhin a, thil ṭha zawng zawng nei se, mi ṭha tak tawng leh se, ka duh a. Mahse, chung thil ṭha zingah chuan ka tel ve lo tihna a nimai, Pathianin ka thinlung duhzawngte a hria a, U Sawmsanga tan ka ṭha tawk lo tihna a ni mai.
Nain harsa viau mah se, thil pakhat ka zir chhuak a, "Eng pawh kan chunga lo thlengte hi a dam zawnga lo pawm mai hi, a hahdamthlak ber mai", tih hi. Harsatnate pawh hi ringtu tan chuan, hneh theih loh a lo awm reng reng lo, kan dawnsawn thiam a, kan pawm thiam a ṭha ber.
Hun leh nite pawh a vei ve zel a, Pathian zarah kawr ṭhui tur ka nei ve reng a, mahni tawkah ka buai ve thei hle. December thla a ni tawh a, Christmas a ni dawn tawh, kan phur tawh hlawm hle a, ṭhalaite pawh biak in lamah kan phe leh suau suau tawh.
Biak in kan chei a, kan ṭhianho phur zawng tâk a ni, U Sawmsanga chuan min rawn en leh ṭhin a, hria angin ka awm duh tawh bik ṭhak lo. U Hmuakan, inti zei deuh hian U Sawmsanga bul hnaih velah min tir ṭhin a, keiin ka ṭhiante ka tir leh chhawng ṭhin. Ni dang chu ni se, min nawr kal dawt dawt tawh ang, mahse tun ṭum chu an hrethiam a, min natpui ve deuh bawk.
Zun in aṭanga ka chhuak chu, Rema nen kan intawk hlawl a, "Rini, inhnuaiah min lo pui teh", tiin min hui a, ka zui thla vat. U Hmuaka leh U Sawmsanga chu, pangpar kual dahna tur hi an lo siam rem chawt chawt a.
"Hei, Rini ka hmu hmasa ber a, ka rawn hruai", Rema chuan a ti a, "Sangsangi a nih kha, duh duh hi phuah chawp ṭhin suh", U Hmuaka chuan tiin min lo nuih a, "Ka phuah chawp lo, ka unaunu a nia, a hming ka hre ve bawk aw", Reman a lo ti ve hlur.
Ka pa nau fapa a ni a, kum zawnin kan piang a, upa zawk mah ila, "Min u suh", ka tih vangin min u lo a, ka pa lama ka chhungte hian, "Rini", tih vekin min ko a, mahse, 'Sangsangi' tih mawi ka tih zawk avangin ka pu hlen ta a ni.
"Rinsangi maw?", tiin U Hmuaka chuan min zawt a, lo bu nghatin, "Lalrinsangi", ka lo ti ve thuai. U Sawmsanga chuan min lo en ve reng a, mahse ka en duh tawh bik ṭhak lo, beiseina ka nei leh ang tih ka hlau.
"Engtin nge mawi ang? Ka ti kikawi dawn em?", U Sawmsanga chuan tiin min rawn melh a, "Ti kual tawp rawh", ka ti ringawt a, ka duh ang pawhin ka ṭawng thei lo.
U Hmuakan kan dam leh dam loh min zawt a, "Pathian zarah kan dam tlâng e", tiin ṭha deuhin ka lo chhang a. Pangpar dahna tur kan siam mek lai chuan Mapuii a lo lut a.
"In laklawh em?, khitah kan buai deuh a, mipa kan mamawh hnem deuh a", a rawn ti nghal sawk sawk a, "Laklawh ve reuh", U Hmuakan a tih laiin, U Sawmsangan, "Laklawh lo", a lo ti hmak a, a tho nghal vat a. Mapuii nen an inzui chho a, kan pathum chuan kan en ṭhap ringawt.
Kan thil siamtupa ber a chho ta daih si a, kan tihhnawk zual lai vel kan tih fel hnuah kan chho ve ta daih a, U Rema hi chu a phawk chi hi a ni ve hrim hrim a, amah leh amah a infiam ka ti dawn nge, tlan chhoin a invawrh vel a, a va han over tâk. A hnungah muangchangin U Hmuaka nen kan chho dun a.
"Eng nge in intih thiam lohna ber hi?", tiin U Hmuaka chuan min zawt a, "Intih thiam lohna kan nei lo", ka ti tawp a, "In zep ve ve tlat bawk sia, ka pui thiam tawh lo che u", beidawn hmel zet hian a ti a.
"Zep tur a awm lo, kan inkarah engmah a awm hleinem", ka ti chu mak ti deuh hian min en a, "A duh hmel hle che sia", a ti hluai, "Min duh leh lo aniang", tiin ka nui ṭhaw a, ka rilru tak chu a buai ru hle.
Biak in tlang velah light eng thei an lo dah kual a, U Hmuaka pawhin a va pui ve nghal thuai. Hmeichhe ho chu light bawm vel chawi phei turin min ti a, pahnih te tein an chawi a, hmeichhe kal kan tlem deuh avangin keimah chiahin chawi puitu ka nei lo a.
Mahse, ka chawi theih ka ring tlat pek a, inham sekin ka'n chawi ta a lawm, rit deuha chawi ka tum vang nge ka hre lo, zang ka ti deuh tlat a. Ka bula lo awmte chuan min lo en ṭhap mai. "I va chak ve", mipa pakhat chuan a lo ti a, ka khi ṭhaw ringawt.
Mahse, ka pen thui tulh tulh a, a rit tulh tulhin ka hria, ka ban a rawl thla tual tual. "Ehe, kan pasalṭha a che leh tawh a ni maw?", tiin Jamin-a chuan min lo fiam a, ka chhiah khum vak ringawt. U Sawmsanga pawn min melh zeuh tih ka va hmu hman, mahse min ngaihsak chhunzawm chuang lo.
Ka ban kham tawh sa nen, ka kalna turah lung tê a lo awm a ni ang, ka rap pial deuh a, ka thil pawm a lo rit nen ka tlu sawp nghal thlawrh a, ka au ṭhawt nghe nghe.
Min rawn bawr nghal luai luai a, ka ṭhianten min rawn pan hnai vat bawk.
A nat leh nat loh min zawt sup sup hlawm a, a nat loh thu ka sawi ve tak nain, ka mawng ka sawhna chu a na ve det. U Sawmsanga chu a rawn tlan phei a, ka ṭhiante chu nem sawn deuhin, min ngaihtuah ber awm zia zangin a rawn che a, min ti hrilhhai khawp mai.
"Ka ṭha", ka ti bung nghut a, a laka ka lawm lohna ka tilang ve ringawt chu, ka inngei nghal hlur. "I tho thei ang em?", a tih chuan ka bu nghat nghat a, min kaitho tur chu ka ke ka rap leh ngam tlat lo, a na deuh ṭelh a, a mu nghal churh churh bawkin ka hria.
"I ulh a nih ka ring", ti supin, min pawm kang nghal a, ka tal deuh fat a, "Awm ṭha rawh", a ti nghet charh a, min pawm nghet salh bawk. Mi dang ho chuan min lo zui ve zel a, U Sawmsanga chuan reception office-ah min hruai lut a, U Hmuaka leh U Awmpuiin min lo zui lut bawk a. Ka ṭhiante, Zopuii leh Duhawmi an lo lut ve nghal bawk a, mi dang chu pawnah an lo ding ṭhap bawk.
Dawhkan teah chuan dim zet hian min ṭhut a, ka chapal bun lai chu min phelhsak thlap a, tui chuan a leih nghal thawr a. In chhunga awmho chuan, U Sawmsanga chet dan vel chu ngawi rengin kan en ṭhap. Tuia a leih hnuah ka ke chu a hmet deuh a, a kut a dam phian mai, tuia a leih takah chuan, a mu churh churhte chu a zia ta deuhin ka hria.
"A na em?", a tih chuan lu ka lo thing thuai a, "Ti khan?", ti lehin min melh ralh a, ka rilru a tihnatzia ka hre chhuak nghal. "Na ve", ka ti teh tawp a, ka ke na hi chu nep tê a ni ringawt, "A ulh a nih chu", a ti leh nghut. U Hmuaka chuan, "A duh che ka tih reng kha maw", tih melh hian min lo melh a, ka ṭhiante lah mak ti deuhin min entawn zak zak.
Haw mai turin min ti a, bai uih uih chungin ka ṭhianten min thlah haw a, mahse thui pawh kan kal hman lo. Kan piahah chuan scooty a lo ding a, U Sawmsanga a ni. "Lo chuang rawh", a ti teh tawp a, "Ka kal thei", ka lo ti ve hmak. "Luhlul suh", a ti leh a, ve ringawt chuan a.
"Chuang mai rawh, i inti hah mai mai, a rei lo zawk ang", Zopuii chuan a lo ti a, hreh tak tein ka hreh. "Chuantir kher i duh em ni?", dawhthei lo zet hian U Sawmsanga chuan a lo ti sek a, hreh ru tak chuan ka chuang ta hram. Amah kuah lo thei loin min tlan chak pui a, mahse, kuah loin a kawrah ka pawt hram, hnaih loh thei dan ka zawng ve hram hram a ni.
Muang changin ka chhuk thlà a, ka ke ka la rap ṭha ngam lo bawk nen, U Sawmsanga chu rin tak tein ka rin leh ang lawi a. "Ka lo kai lut ang che", a tih chuan ka duh lo nasa. Kan in piah deuha mau an dah khawm chu ka kawk a, "Min lo lak", ka ti a, a va la ve mai bawk.
Mau chu ka rinchhan a, thei leh thei loin ka pen phei a, "A vungah khan vur dep ula, a zia mai ang, i theih hram chuan karkhat vel chu duat rawh aw", a ti leh bul bul a. Hetia min ngaihsak leh ta hluak hi ka hrethiam lo hle, ti hian beiseina min siam leh ang a, min kalsan leh ang a, misual tak a ni.
"Chaw eitui aw", a ti leh sup a, chhang loa kalsan mai ka tum chu ka ṭhulh leh, chiang lo deuha awm hi ka ning tawh, zawt chiang law law ila a ṭha ang.
"U Sawmsang", ka ti hap a, a kekawr ipte zen chung hian min lo en a, ka ṭah a chhuak ringawt. "Thil tih sual ka nei em ni? Nge ka duh che tih i hria a, min fiam mai mai zawk? Min duh awm ang takin i awm a, zanah lo lengin beiseina min siam a. A hnuah i reh leh hmak a, biak suh sawi loh, a melh pawh min melh duh lo a nia. Tunah lem, min ngaihtuah ber awm zia zangin i awm leh a, engati nge ka chungah hetiang hi i tih? ", ka ti ta duah a, ka zawh chakna a rei tawh bawk a, ka thawl hawkin ka hria.
A kun ngul a, a ngawi reng bawk. Ka ke a kham tawh em avanga luhsan mai ka tum a, "Ka tih palh Sang", a lo ti sup a, ka duh khawp lo hle. Tihpalh tih hian kawng ro a su lo, "Ka ngaina che", a ti leh tawl a, amah chu ka en haw tawh. A rawn dak chhuak a, pawi tih hmel fe hian min en ralh bawk.
"Ka ngaina che, mahse ka ngaina zual ang che tih ka hlau a, chuvang a nia ka lo len tawh ngai loh", tiin min rawn pan hnai a, ka mitah tak min en a, "Ka tihnat che angin ka tihpalh", a ti thum leh chhal a, eng nge a sawi awmzia ka lo zawt vat. "Ka lo len tawp ber zan kha i la hria em?", a tih chuan ka bu nghat a,
"Kan haw lamah khan Ahmangaihi nu ka hmu a, hmanni aṭang khan Ahmangaihi ka ngaihtuah vak tawh lo a, ka kiangah i awm a, a hlim pawh ka hlim. Mahse, Nu Mahruaii ka hmuh khan keimahah inthiam lohna a lo awm nghal a, Ahmangaihi leh a chhungte lakah ka inthlahrung bawk a, chuvang a nia ka hlat tak che ni. Nang chu i fel em em a, i hmelṭha bawk a, khawhar hnemtu atan mai maia hmang tur che chuan i hluin i ṭha lutuk tlat. I hun khawhral ka duh lo a, hlim takin awm la, pasal ṭha tak nei la ka duh vang zawk a nia", a ti a.
Sawi tur pawh ka hre lo, amah leh a chet dan vela ka lo ngaih dan zawng zawng te, ka rilru ka lo tihnat ve-na zawng zawng kha, engmah lo mai a lo ni. Engmah lo maiah ka rilru ka lo tina ve vak a, ka â hle mai.
"Ka tihpalh", ka ti zawi sep a, amah pawh ka en ngam lo. "I thiam loh a ni lo, keimah vek hi a lawm", tiin a thaw hak a. Ka ngawi reng, kan in hi a fal a, mi vei vak an awm vak lo a, sava chiap ri leh ka lungphu ri chu chiang takin ka hria.
"Bazaara hmeichhia nena min hmuh dun khan maw, i na hmel ka hmuh khan hrehawm ka ti tak zet, chuan ka ngai hle che tih ka hre chhuak bawk",a tih leh chuan ka hawi chhuak ve ta chauh a.
"Kha hmeichhia kha, ka cousin a nih kha, ka ṭhianṭha ber a ni bawk. Ka nu nau fanu a ni a, kum khat chhuak kan ni a, ka ṭhianṭha ber a ni bawk, i ngaih ang kha a ni lo a nia", tiin a insawifiah a, ka ke a na deuh ngut ngut a, ka ṭhu hah chawl chak tawh nen chutiang lam pawh ka ngaihtuah thei rih lo.
"Ka hrethiam a läwm", ka ti ta tawp a, mahse, a ruk tak chuan ka hrethiam chiah lo, engvanga insawifiah ve ngawt nge a nih le? "Haw tawh rawh, kan lut tawh ang e", tia kal sawn ka tum chuan min lo dang a. "Ka la sawi zo lo", a ti tlat a.
Chutih lai tak chuan ka nu a rawn chhuak a, "Zopuiin min lo call a", min hmuh rual chuan a rawn ti nghal a, U Sawmsanga a hmuh chuan, "I lo thlah a, kan lawm lutuk aw, i dam ṭha em? I va reh ve? ", a ti nghal zung zung a, rei lo tê an inbiak leh hnu chuan kan inthlah fel ta a.
Nachhawkna eiin ka mu ta hmak a, mahse ka meng kawr mai, min mawlhtu lian tak a awm miau a ni. Eng nge a sawi zawh loh kha niang le? Tih ringawt ka rilruah a awm a, inthinnawk ka tum a, ka ke a na bawk si.
Zanah a message ka dawng nawlh a, "I ke chu eng nge a an?", tih hi a lo thawn a, ka chhang rang ngang mai. "Eng nge i sawi zawh loh kha?", tiin ka zawt ta nge nge, "I dam hunah", a ti leh tlat tawh, "Ka damloh zual phah zawk ang", tiin sawi turin ka nawr a, mahse, a sawi duh bau lo.
Chuta ṭang chuan, ka ke chungchangah kan inbe ta zauh zauh a, ka hlim leh hle tawh. Mahse, beisei loh tur ka beisei leh ang tih ka hlau tawh.
Krismas dâwn dawnah ka ke ka tina a, a hun lo khawp mai, ka ṭhiante chuan ka chhuah theih loh avangin min rawn kawm hlim ṭhin a, ṭhian neih hlutzia ka hriat chian phah bawk.
U Sawmsanga chungchangte kan sawi a, a hmaa an ngei tehreng nen an fak leh hluak tawh. "In rilru a nghet lo e", ka tih lahin, "Nang pawh i rilru a na em em a, tunah i hlimpui leh em em a", an lo ti ve zat a, ka dang lel zel.
Krismas hma kar khat la awmah chuan ka phe buai leh tawh khawp a, ka indaih lo lek lek a ni. Ka ke pawh a dam ta deuh a, mahse ka la ring nasa ngam lo. Ka hrisel avang hian na ka neih hlek tawh chuan ka tuar a zuau em em a, ka na lai bak ka rilruah awm thei ṭhin lo.
Urlawk zan chuan Biak In tualah ṭhalai ho kan zaikhawm a, intihhlimnate kan nei a, thuchah ṭha tak kan ngaithla bawk. Kan tana Lal lo piang Isua kan lawm dan hi a dik em aw? Tih min ngaihtuahtir a, U Sawmsanga thusawi a nih vang hrim hrim ni loin, ngaihtuah zui tur thu sawi hi a thiam ka ti.
Thilpek inthlengna hunte kan hmang a, Branch OB ho chuan an duh ber ta an laksak theih bakah, an thil ken chu an duh ber an pe thei a. Chu thu host-in a sawi zawh rual rual chuan, U Sawmsanga chu dawhsan aṭanga chhuk thlain kan ṭhutna lam a rawn pan nghal a, ka lung chu a phu dawt dawt mai.
Ka hma takah rawn dingin, a rawn kun hniam a, ka malchunga present awm chu a present nen a rawn thlak thleng a, a kiai suk bawk. Mi dang chu an lo, "E.....",rual ṭhawt a, a ṭhenin kut an beng a, an lo au vel a, ka zak ngang mai.
Duhawmite inah len khawm kan tum ve a, mahse, U Sawmsangan, "Ka lo thlah ang che", a ti ta tlat a, han hnial ka tum zet a, ka ṭhiante chuan inthlah tir turin min ti a. Min bem a tum a nih chuan nem nghal mai lo tur leh innghahtir ve phawt turin min fuih nghal mawlh mawlh bawk
Kan kawt kan thlen chuan leng lut turin ka sawm a, "Ahmangaihi chhungten thingpui in turin min sawm a", a ti a, "A nih chu, muttui aw", tia kawngkhar lam pan ka tum chu, ka banah a lo vuan a.
"Hman zana ka sawi zawh loh kha i hre duh lo em ni?", a ti a, ka hre chak lutuk, mahse, U Ahmangaihi ka ngaihtuah chhuak a. Ka va zak lo tak, U Ahmangaihi te chu ka thik phak a ni hleinem, mahse ka thik tlat chu ka hrethiam lo hle.
"Azuali ten an nghak tawh ang che", ka ti a, bazaara kan inhmuh laia a thu min zawh kha ka hre chhuak bawk a, U Sawmsanga hi duh viauin ani pawhin min lo duh der ve mah se, a rem ka ring lo. "Chu chu a lawm sawi ka tum chu", a ti leh a, ka ngaihthlaksak leh ta nge nge. Pawna ṭhutna tur ṭhuthleng hniam kan la chhuak a, arsi a lang pe un bawk nen khúa vawt mahse, a nuam ka ti.
"An lakah ka inthiam loh thu ka sawi kha, nikhat chu Ahmangaihi thlanah ka kal a, a nu nen kan inhmu a. A nu chuan, 'Sawma, ka makpa a tan it viau che mah ila, Pathianin rem a ti si lo a. Mahse, ka fapa angin ka la ngai tho che tih theihnghilh suh, Ahmangaihi chu keini min ngaihtuah tawh lek loin vanah hlim takin a leng tawh a, keini pawh hlim taka kan awm hi a ṭha. Chu chu a duh ber pawh a nih ka ring, chuvang chuan nang pawhin hma lam pan tum tawh rawh, nupui nei rual i nih tawh kha', min ti a", a ti a, a thaw khu hlat a.
"An mahni avangin ka hlat che a, mahse anni chuan malsawmna min hlan daih a. Ka tan mi ṭha tak i nih thute leh i felziate pawh an sawi asin. Pathian hi ka tan a ṭha tiraw, 'Inpekna kimah lawm a kim ṭhin', an tih zawng zawng hi ka nei zoin ka hria", a ti leh a, a hlim hmel hle bawk. Amah lo ang takin zanin chu a ṭawng hnem ve hlein ka hria, ka ṭawng ve meuh lo, mipa ṭawng mawh tak chu a ni bik lo e.
Chutah ril zet hian min en a, "Sang, i hlata awm ka tum poh leh, ka ngaihtuah nasa che a, ka ngaihsak lo che anga i hriat pawh khan a rukin ka ngaihsak zual sauh che asin. I titi ngaihthlak leh ka chak a, nangmah nena Pathian thu sawi dunte ka chak ṭhin. Theihnghilh che ka tum apiangin, ka vei zual che", tiin ka kun a rawn vuan a.
Han awm dan tûr mai pawh ka hre lo e a, ka lai vek a, ka zak bawk a, ka lawm bawk. Ka nuih vur vur ringawt, "Nui vur vur lo khan, ṭawng ve bawrh bawrh rawh", a lo ti a, sawi tur pawh ka hre lo e a. "Inthlahrung suh", a lo ti leh, "A....", ka han ti a, ka sawi tur hre lo chu, "I..... E...... O..... U....", ka ti tlang ta ringawt, min lo en kur bawk sia, sawi tur ka tlachham.
"U, arsa a hmin tawh, lo ei ru", Matei chuan a rawn ti lang lang a, "Azuali te inah kal i tum kha", ka tih chuan, "Ka bialnu bulah awm ka duh zawk thu ka hrilh mai ang", a lo ti liam puat a.
'Ka bialnu', a ti chu ka lai nghal ringawt, "I bialnu chu tu nge?" ka lo ti fiam a, "Lalrinsangi", a lo ti thuai. Hmannia ka sawi zauh kha a lo la hre reng a nih dawn hi. "Ka la chhang hleinem che", ka ti ve tlat a, "Chhan chhan a ngai lo, a rei mai mai, kan thinlung a inhmu tawn a, a tawk", a lo ti then a, ka nui leh hawk hawk tawh. Ka ṭhiante thu min rawn pawh, ka ti ta lo mai, ka hun ṭha neih hi ka bawh pelh phal lo.
Arsa kan ei zawh chuan, dar 12 a ri chiah chiah a, "Krismas chibai", tih hmasak ber loh hlau ni awm tak hian U Sawmsanga chuan a ti vat a, ka chhungte chu an lawm lo nasa. An sawi tur a sawi khalh vang emaw, anmahni zawk chibai a buk loh avanga lawm lo an ni emaw a ti a.
"I tla nghal, mahni bialnu birthday-te han hriat loh", Zamzami chuan a lo ti kha kha a, "I birthday maw?", U Sawmsanga chuan phawk deuh hian a lo ti a, ka lo bu nghat. Ka naute chuan an fiam nghal a, U Hmuaka a lo hruai ve loh avangin an hau zui nghal bawk a.
Ngaihdam dil bak chu sawi tur a hre ve vak lo a, ka ṭan duh der bawl si lo chu, a lu a tuai a tuai ta ringawt a. Ka nuin Pathian hnena lawmthu sawinate a hman zawh hnuah, U Sawmsanga pawh a haw ve ta chauh a. Tunah rih chuan, khawvela hmeichhe hlim ber ka niin ka hria.
Krismas pawh hlim leh nuam takin kan hmang a, khua a vawt ver tawh a, mahse kum khata hun bi hrang hrang inher chhuakah chuan, thlasik hun hi nuam ka ti ber. U Sawmsanga nena bul kan ṭan hunlai a ni bawk a, vawt mah se, a nuam ka ti ka hlim.
Tlangah kumhlui kan thlah ve a, U Sawmsanga nena kan infawh hmasak ber ni a ni bawk. Kumin chu bul ka ṭan ṭhat vang nimaw, a tawp pawh ka khar ṭha vein ka hria a, hun harsa laiah pawh Pathianin chakna min pe zel a. Mi fel famkim ka ni bik lo a, ṭawngṭai peih loh changte, Bible chhiar peih loh changte ka nei. Mahse, ka pa chuan, "Kan tih fan fan a, kan tih ṭalh ṭalh a, kan tih hram hram hian Pathian a läwm ṭhin", a ti a. A dikzia a takin ka tem chho ve ta mawlh mawlh mai.
Kumthar pawh Pathian zarah dam takin kan chuangkai thei ta a, ruaiṭheh velahte pawh chaw semtuah ka ṭang leh a. U Ahmangaihi nau Azuali nen counter khatah kan awm ho a, a tir kha chuan ka inthlahrung lutuk a. Mahse, amah zawkin U Sawmsanga nen kan ni tih a hriat aṭangin min be ṭha em em a, kan ṭhianhoah a tel ve chak thute min hrilh a. Ka hmuh dan chuan, U Ahmangaihite chhungkua hi, mi fel leh rilru zau tak an niin ka hria.
U Sawmsanga nen kan inngaihzawnna pawh thla nga lai a liam leh tawh a, kan inngaiin kan inthlahlel dun em em a. Mahse, kohhran leh a kaihhnawih velah inzui vak ka duh lo a, mi mit ti kham zawnga awm loh ka duh a, ka nu min fuihna a ni bawk. U Sawmsanga pawhin ka duhthlanna chu min zah sak em em a, hriatthiamna a ngah em em a, a dawhtheihna a pan hret tih loh chu, sawisel tur ka hre lo.
Zan khat chu ka chhungte an chhuak diak a, innghen chialin kan ṭhu dun a. Mi inngaizawng chu, biathute infah tawnin hmangaihnaah an luang liam delh delh a. Keini chu kan ṭhat bik vang ni loin, Pathian hmangaihnaah kan luang liam delh delh ṭhin. U Sawmsanga sawi tur hriat ve awm chhun kha a ni miau a, Pathian thu sawi tawh hi chuan ṭawngna hun ka chang ve ngai lo, amah tawp hi sermon hlang ka ti mai.
Thingpui ka pek lai chuan, "Sang", a ti hluai a, "Awi-ah", a awki ang chiahin ka lo ti let a, a nui suk a, a bulah min pawt ṭhu a, ka kut vuan chung hian, "Innei tawh mai ang", a ti tawl a. Ka hamhaih khawp mai, phawk fe hian ka en a, inneih chungchang hi ka la ngaihtuah ngai miah lo.
"Kan la inngaizawng rei lo e", ka ti hap a, thla nga vêl chauh kan la in ni a, innei tur chuan a la hma mah mah ka ti ve deuh, "Ka hria a lawm, mahse tlangval senior ka nih tawh hi", tiin a nui suk a. "A pawi em ni?", ka lo ti fiamthu a, "KṬP over nan kum 2 chiah ka ngai tawh a, min ngaihtuah lo ve mi, mawh", a ti vel a, intikhawngaihthlak hmel deuh hian a hmel a siam kual vek bawk a, min thlem niin ka hria.
"Kan la inhre chiang vak bawk si lo a, kum khatte chu inngaizawng tling tawh ila chu thuhran a nia, hmanhmawh khu chuk lo ila, a ṭha zawk lo maw", ka ti niah niah a, amah neih hi chu ka hreh hran lo. Kum 5 zet a ruka ka lo ngaihzawn ve tawh kha a ni a, ka duh ang tak mipa a ni bawk.
Mahse ka pain a boral hmaa a thu mi rawn kha ka hre chhuak lo thei lo, "Pasal i nei dawn a nih chuan, Kristian chhungkua i dinpui theih tur nei la. A lo berah kum hnih khat tal inngaihzawn a ṭha, mi fel tak a ni emaw ni lo emaw, inhriat chian a ṭha. Rei lotea inhmangaih hi thil awl tak leh thil ni thei tak a ni. Tleirawl lai, ṭhalai nih laia kan hmangaih te kha tarkun khup bih thlengin kan hmangaih thei dawn em tih te, damchhung atan kan chenpui thei dawn em tih te ngaihtuah chian a ṭha", a ti a.
"Ka hmangaih che a lawm, min...hmangaih ve chuan ka hria a, chu chu a tawk mai lo em ni? Mahse, ka tilui lo ang che, i inpeih hun ka nghak thei che a nia", a ti a, min hmangaih thu a vawi khat sawina a nih vang nge ka melh deuh hu a.
"Ka hmangaih che", a lo ti ṭha leh a, ka mittui a tla ringawt, ka mittui chu a kutzungpui chuan a tuai zeuh a, "I mittui tla hian min hmangaih thu a hril", a ti leh sup a, ka kuah nghal thlawp. Chutah inla hrang datin ka chalah a fawp vawng vawng a.
Ka nute lo haw hnuah pawh, rei lote ṭhu lehin a haw ta chauh a, a haw hnu chuan ka nute chu, U Sawmsanga'n inneih a duh thu vel chu ka hrilh a, ka nu pawhin hma a lo ti ve tho a, mahse kan duh phawt chuan a hnial loh tur thu a sawi bawk a.
Mahnia thutlukna siam ngaihna pawh ka hre lo, ka naupan lai chuan, pasal ka neih hun turte ka suangtuah lawk ve ṭhin a, mokawr fual tawk, pul tawk ka ha ang a, ka pasal tur pawh lalfapa ang maia hmelṭha a ni tur a ni, ti tein ka suangtuah ve nasa ṭhin.
Ka kum pawh a naupang chhe zawk zawk tawh bik lo a, ka naute pawh an puitling ve ṭhuau tawh a, ngaihtuah an ngai tawh lo. Ka nu pawh Pathian zarah a sumdawnna lamah a tluang ve hle a, keimah ber hi pasal nei turin ka inpeih em?
Ka ṭhiante pathum chuan, U Sawmsanga'n inneipuia min sawmna chu pawm vat turin min ti a, "I pawm vat loh chuan a kalsan daih mai ang che", Jamin-a'n a tih chuan, "I ṭawng malsawm lo", ka lo ti vat.
"A nia lawm, mipa chuan nupui neih thuai thuai kan duh a, chuvang a läwm nula kan rim kan rim kual ṭhin, 'Ka nghak thei che', ti mah se, a rilru a hmanhmawh tawh ang. A kum a over ṭep tawh lehnghal, a hmangaih thu che a sawi tawh bawk a, nang pawh i naupang zawk zawk tawh lo bawk a. Ngaihtuah buai vel lo khan, 'Aw', ti la, innei rawh u", a ti leh bul bul a.
An sawi chu a dik ka ti ve tho, mahse, a sawi chhuah loh chuan, lo sawi hmasak leh vel kha, ka zak leh tlat. Hman zana a sawi bak kha a la sawi leh lo a, mahse ka ngaihbel nge, a zia a dang deuhin ka hre tlat pek, Lal Jamin-a vang vek, ngaihtuah loh tur pui pui min ngaihtuah tir.
Kan nih aṭanga thlarukna cham a lo nih ve takah chuan, len chhuah a rawt ve tlat a, len chhuah tih vel, sap ṭawng taka an sawi, in-date an tih ang chi hi a ho ka tih zawng tâk a ni a, ka sawi ngai lo bawk a.
"Hei hi lawm, ka duh chhan che", a ti ṭhin, chu chu ka hlimpui ve em em bawk. Kohhran leh khawtlangah pawh inzui vak ka duh lo a, mahse a inthup theih tâk tak loh, kan inngaihsak tawn reng a ngai ve tho si a.
Mahse, eng thil emaw neuh neuh vangin kan leng leh hman ta lo a, zan ṭawngṭai zawhin kan leng kawi ta ringawt a. Tun ṭum chu len a rilruah a lang tlat a, ka lo chak ve deuh bawk a, tlang pakhatah min hruai a, zan dar 9 vel a ri tawh a, tumah an awm tawh lo. Thla a eng bawk a, a romantic riau.
Tv-a kan hmuh ṭhin ang chiah khan, a changtupain a chhangtunu khawiah emaw a hruai a, a thawnthu ziaktuin a duh ang taka a duan lawk ang maiin, thla eng hnuaiah an han ṭhu dun a, "Hmangaihna awmna hmunah chuan dumde a awm ṭhin", an tih ang maiin dumde an thlawk tle suau suau bawk a.
Hetiang hi chu tv-ah chauh hmu turin ka inngai a, mahse, tunah hian ka hmuh ṭhin ang chiahin kan awm. He hmangaihnaah hian, ka luangliam ngawih ngawih.
"Ahmangaihi nen khan hetah hian kan kal ṭhin a", a ti zawi sup a, van lam thlir vang vangin a thaw hawk a, a ngai tih ka hria. A kutah chuan ka vuan vat a, engmah sawi chuang lo chuan kan inen dun vawng vawng.
"Min kalsan hnu khan, hmeichhe dang hi ka nunah an luh theih ka ring tawh lo. Ka hmangaih hmasa ber a ni a, min kalsante khan ka tuar em em a, Pathian pawh ka dem hial. Zante ka mu thei lo a, keimahah khan nghawng nasa tâk a nei a", a ti leh a, a maimitchhing vang vang a.
"Mahse, i pa a dam nana i ṭawngṭai khan Ahmangaihi dam nana ka ngen lai min ti hre chhuak a, Ahmangaihin, 'Kan duh lai ngei ngei min laksak chuan a aia ṭha min pe dawn tihna a nimai', a tih ṭhin kha ka hre chhuak a, ka harh zawk a ni ber. I pa boral i dawnsawn dante khan min hneh em em bawk a, engtik lai aṭang khan nge ka hre chiah bik lo. Ka ngaihsak ru em em che a, ka hriat loh hlanin a hmaa ka harsatna, mut theih loh tihte leh a dang dangte pawh ka nei ngai tawh lo a.
Ka ṭhianpa Hmuakan kum hnih hnua hlim taka ka awm leh thei a hmuh khan, mak a tiin a lawm em em a, ka en ṭhin dan che leh i bula ka awm dante a lo chik em em a. Bialnu neih leh kha ka inpeih em ka hre lo a, mahse, i bula awm kha a nuam ka ti. Pathian hian nang ang mi ṭha lutuk hi min pe a, inneih ka tih khuk chukna chhan pawh, chan che ka hlau em a ni", tiin min rawn en a.
Ka biangah dawmin, "Ahmangaihi ka chan tawh a, nang leh zel chu chan che ka duh tawh lo", a ti leh a, a mit aṭang chuan a hlauhna ka hmu thei, ṭawng tuma ka amg zuau tawh chu ka hmui a rawn chilh hnan hmak a, a thusawi ril zet zet chu ka ngaihtuah kual a, min fawhna chu chhan nachang pawh ka hre lo.
A inla hrang a, "Engati nge?", ngaihṭhat loh hmel deuh hian min en a, a awm chu ka kut chuan ka va tuai a, a lung zawnah chuan ka kut ka nghat a, hei hi U Ahmangaihi awmna hmun a ni a, keia lo luah lan theih a ni lo.
Min lo en ve kur a, chutah nuih sakin, "U Ahmangaihi i chan reng reng lo, hetah hian a awm", ka ti hap a, ka kut ka nghahna chu a en hnuah min rawn en leh a. "U Ahmangaihi dinhmun hi keia luah lan theih a ni lo a, luah lan ka tum hek lo. Mahse, i lung a phut ruala ka lung a phut ve i phal phawt chuan kei chu i ta ka ni. Chu chu kum nga chhunga ka suangtuahna a ni a, i phal phawt chuan, ka suangtuahna chu tihhlawhtlin a ni dawn a", tiin ka chawl dat a.
Min lo en uluk leh lutuk chuan min tilai vek, "Chuan?", tiin a mitko a san ak a, "Eng nge?", ka lo ti let ha. Chutah nui sukin, "I sawi zo tawh em ni?", a tih chuan ka lo bu nghut, inlak ril ka tum ve pawh hian a tawp han khar leh dan hi ka thiam tawh ṭhin lo. Ka thawnthu chhiar laia a changtunute an han ril theih nen, kei chu a zuih ral tulh tulh ka hria.
Ka thil sawi avang chuan ka zak leh deuh si a, ka beng a sa hat hat mai. Ṭhut ṭhat tuma ka inla hrang deuh chu, min lo pawt let leh a, "Pathianin rem a tih chuan, arualin kan pen zel ang a, a rualin kan lung pawh a phu zel tawh ang", ti lehin min fawp leh a.
Ka lo chhang let ve vat a, a uar zual sauh. Kan inngaihzawn chhunga kan vawi nga infawhna chiah a ni. Pathian duh loh zawng tih kan hläu ve ve a, "Infawh loh pawn a inhmangaih theih", tih thupuiah kan nei a. Hmangaihna chu, thinlung aṭanga chhuak a ni a, chetzia leh thil tih hi chu a behbawm mai chauh a ni tawh.
A duh thawh telh telh a, ka thaw ṭha thei meuh lo, kan kal thui dawn nia ka hriat hnuah ka nem sawn deuh a, "A tawk tawh", ka ti zawi sep. Kan ṭhut dan kan siam ṭha dun sawk sawk a, a aw a thian kharh a, a ṭawng dawn emaw ka ti a, a ngawi leh daih bawk sia. A kut chu suihin, a kutzungpui a insualtir leh a, a zah deuh emaw a laih ve deuh chuan heti hian a ti ziah.
Kan boruak lum lutuk tih daih nan, "Thla khi a mawi tiraw?", tiin ka nghawk zeuh a, hawi chhoin a en ve vang vang a. "Zakzum deuha dawhsana ding a ang", a lo ti teh daih a, thil hi a sawi thiam thei si. Ka nui nghawr dat a.
"Inneih hunah chuan khitiang ang chiah khian mawi deuhin zakzum deuhin ka kiangah i ding ve ang a", a ti leh a, ninawm a ril thei si, ka lai thei si."Inneih zanah phei chuan", tiin min rawn en a, " 'A tawk tăwh' tih tawh awih loh", a ti leh a, "I thu lo e", ka lo ti ve hmak.
A tuk zanah chuan, palai a rawn tir nghal a, "Chhungkua kan lo inrawn ve phawt ang e", tiin ka nu chuan a lo thlah a. Ka pa lama ka chhungte lah chuan i he loin an lo pawm hmak a, ka nu lama ka chhungte pawhin pasal ka neih hun mawlh an lo nghakhlel tawh a. Chhungkaw lamah harsatna kan nei lo ve ve a, kan vannei khawp mai.
An lo len nawn lehnaah chuan, inneih ni tur nen lam an sawifel nghal vek a. Pathian zara kan dam chuan, thlaleh July ni 12-ah kan innei dawn. Zopuii ka bulah a ding ang a, U Sawmsanga bulah U Hmuaka a ding bawk ang. Engkim mai chu remruat sa ni awm takin a tluang purh a, inneihna tur thil vel a hautak tih mai loh chu, buaina tur em em a awm lo.
U Sawmsangan a lung phut rualin ka lung a phuttir ve a phal a, a kianga awm a, a pen rual zela pen turin, kei eng mahni lo hi min thlang a. Kawng engkima ka rinchhan tur leh min humhimtu tur a tan, ka phu loh U Sawmsanga ka thlang ve a.
Tichuan, Pathianin, a duh ang tak Kristian chhungkua din thei turin U Sawmsanga leh kei min thlangin min suihzawm ta a. Thihnain min ṭhen hma loh zawng tiin, "Tiam tlat e", kan ti ve thei ta a. Kan tan, Lalpa a ṭha a ni.
A TAWP TA...
*Ka phur deuh thut a, ka hla ngaihthlak aṭangin ka rilruah lo lang tawp a, ziak leh deuh tawp, ka ṭhiannu tana ka ziah a nih pah bawk a
Thawnthu tluang tlam a ni a, a ngaihnawm em em ka ring hran lo, mahse, min chhiar chhuahsak avangin ka lawm lutuk e.**Story puitling, Chapter awm ang kha ka buaipui ve mek a, phur thut chuan ka lo dah ṭhut maithei a ni
ka phur leh phur loh kar hi a hla a, Pathian zara dam chuan, kan inhmuh leh thuai beisei ang aw. Kan inhmuh leh hma loh zawng, dam takin le*