Thlasik boruak thiang kak mai chu ka hip vang vang a, thlasik rim mawlh mai chu, ka hahdam sawng sawng mai, ka phurrit lak kian sak ang hawk ka ni, hei vang tak hian a lawm ani kha ka hriatchhuah leh thin ni. Ni e, a kiangah kha chuan ka hahdam em em thin a nih kha chuvang a lawm thlasik rim, thlasik boruak hian amah min hriatchhuah tir fo ni.
Kum tin mai hian December thla a lo thlen hi chuan ka room-ah ka in khung phui chawt thin a, boruak dang rêng lo luh loh nan zu ka birh tlut tlut mai thin, rilru fîm a awm ka hlau a. Khang nunhlui thlum leh kha fek mai si te kha tem nawn leh ka duh lo a ni ber mahse, kumin erawh hi chu ka ngai zual a, kan pahnih atana tawpna tak meuh a nih tawh avang te pawh a ni ang, chawhnu dar khat pelh dawn ruaiah Aizawl atang an khaw lam panin ka in khalh chhuak a rei kal a ni lo bawk a khaw thim chhiat hma in thleng a, a tawp nan tiin kan sulhnu ka chhuikir leh a.
A hmun ngainat ber ah khan ka awm a a ngainat zia min hrilh lai te kha ka la hrechiang viau mai, tlang ve deuh hi a ni a, a han pawng ve deuh chauh thung, thenawm te pawh chil chak phak lawhka an awm a, a zawl nuam a School lian lo te a ding vâng bawk, P.E.S school niin Nursery atanga class 6 thleng chauh a awm nghe nghe, tual zawl zau tak a awm a, naupangte tana infiamna tur rem tak a ni. Hetlai hmunah ngei hian a ding a a ngainat zia a sawi lai khan ," Ka naupan deuh laiin hetlai hmunah hian kan awm thin a sawtlai School awm naah sawn kan in a awm thin a lian lo a kohhran in kan luah a nia, zanah hian a boruak a nuam thei lutuk, keimahtein ka tlan kual a, hla ngaihtla pahin thil ka suangtuah pah thin zan tin in", a thil sawi chu atthlak tih hmel zet in a nui hak hak a, a thil sawi chu a chhunzawm leh a," Van ka thlir chang te hian thla leh arsi te hi hliahtu nei maih lo in ka thlir a ka hnaih bik ngawih ngawih in ka hre thin, hla tak a tangin khawpui eng ka rawn thlir thin, School an sak tak hnu pawh khan kan la inhnaih tho nen ka la han kal ziah a thlasik khawvawh lai pawhin ka kal loh phah meuh lo a thlasik bik ngawih ngawih thin", tiin a ngainatzia ngawt kha a sawi a, ngaihnawm ti tak in ka ngaihtlak sak a, a hmel ngawt ka en a a thil sawi a tih tak zia leh a mitmeng nung sarh mai te kha ka mitah chuan thla eng mawi tak pawh khian a iang zo kher lovang le.
Ni e, hetlai hmunah ngei hian "Mangtha" tiin kan kar thu a ti tawp a nih kha.
Khua pawh a thim tawh hle a, inkhawm dar a ri der tawh. Chutlai hmun atang chuan ka chhuk a an in lam ka pan nghal bawk, a chhungten min hmuh chuan mak an lo ti deuh a, tha tak chuan min lo chhawn a, Anu leh Api leh a unau te an lo awm a, a nau te chuan ka thil hawnsak chu an lo lawm thiam ve khawp a, tum lawk loh a kal thut ka nih avangin nepnawi tih angreng bak ka ken sak lo.
Tapah a pi ho in meilum kan ai a, Kapi chuan" Hmuh che pawh kan lo in beisei tawh hleinem, i lo la hre ve reng a", a ti a ,"Ni e", tih ngawt in ka chhang a, hriat reng loh zawng a har a ni e. Eng nge ka tih tak zel te min zawt luam a kan company ka enkawl tak thu te ka hrilh chuan a lo bu ve nghut nghut a. Anu chuan," Bawiha, Mamtei duhthlanna siam te kha hrethiam rawh aw, kan that tlanna tur ni a a hriat a nia, a duhthlanna kha a hlimpui bik miah lo a nia", tiin a mittui a hru pah zeuh a.
Rei pawh awm lo in haw ka tum a Kapite nufa chuan min chelh tum viau mahse han cham erawh ka tan tih chi a ni lo," Apa inkhawm bang tal chu nghak la tha tur," Nu lawmi chuan a ti a,"Zualtei chu naktukah zu tlawh kan tum a sin kan rualin lo kal ve la a hmu chak ngawt ang che",Kapi chuan a ti a, cham erawh ka tum chuang lo tun mai a zuk hmuh pawh chu ka la inpeih meuh lo a ni. Nidangah ka tlawh ngei tur thu sawiin kan inthlah liam ta hram a.
Khawkar kawng a ka tlan lai te chuan a chhungte hmu tura kan kal lai te kha ka hrechhuak leh a min in hmelhriat tir a tum a ni ber, khawi hmun pawh hi a sulhnu vek a ni.
Kan sulhnu, Kan nun hlui.
In ka thlen ka inbualfai nghal sawk sawk a, ka vai ruai mai lehnghal, kum tam tak a liam hnu pawh in ka la hmangaih reng chu a nih hi ti nge khuanu pawh hian hetiang em em a min hmangaih tir mai le ka tan a ruat a nih si loh chuan.
Ka lengchhuak dawn nge ka mu hmak ang tia ka in ngaihtuah rauh rauh laiin Huhlui'n min rawn call a.
"Ti nge phone i lak theih lo a" min ngaihtuahna aw chu ka hai lo, ka en chu missed call a lo awm nual a
"Sorry, ka hre lo a"
"I chhungten i chhuak an tia, ka hria i ngai a ni ti raw?"a ti sap a,
"Chutiang pawh a ni lo" ka ti ve ngial a a awih ngût ang emaw,
"Rei tak kan inzui ve chhung hian ka hre chiang lutuk che a sin, ka hmangaih che a ka bel chiang che a", a aw chu a zuai raih a, a in hnit leh faih thin,"Ka lo leng ang", tih leh phone dah ka rual a. Ka jacket chu la chhuak in ka inthawlh nghal sawk sawk a.
In hnuaia ka chhuk chu Ka nu alo awm a," I lo haw tawh maw? Kha i chhuak lehnghal dawn em ni? Hluhlui'n a ngaihtuah em che kha",a ti zung zung a," Aw, ka va leng dawn", thildang a sawi chhunzawm leh hma in ka chhuak nghal thuai a, Hlui te in a kal tur ka nih avangin min ngaihtuah chhunzawm hauh lo vang.
"Kawngka lo hawng la"
"A tlai tawh em hi ti nge maw i lo kal kher ni a vawt si"
Kawngka a rawn in hawng ri rak a, Hluhlui pawn hmel hlim pu sarh in min lo lawm a, nichina kan inbiakna kha a lang leh tawh lo. Sitting room lamah kan in zui phei a," I chhungte an mu tawh a", a mawiah ka han ti a ,"Umm",a bu nghut nghut a, Anu leh Anau mipa nen an khawsa a an mu hma thin viau.
"In i thleng har em?"
"Har vak lo" ka chhuak tih chu ka chhungte hnen atang a hria a ni ngei ang.
"Kawnge i kal a?"
"Ka chhuak harh e ka tia boruak thiang ka va hip lawk a lawm",ka ti tha ve mai bawk a
"Ti teh zep lo in, zanin chu inngaizawng ang ni lo in, thian ang in inkawm teh ang, hmiang zanin chu i thiannu ka ni ang aw",a ti pek a, a nui pah sen sen lehnghal.
"Eng nge hriat i duh, min hrechiang viau a lawm, nupa nih dawn hnaihah thian nih leh daih te chu", nuihza deuh tak chuan ka ti a.
"Thla thar mai ah kan innei tawh dawn a inhawng taka kan in kawm a tul a lawm", Khang kum chhung zawng khan inhawng takin kan inkawm tawk lo a maw ni.
"Tha a lawm ", a lo nui nghal sen sen a,"Zualtei i va hmu em ni?"
"Hmu lo e",zanin kan thil khel tur chu a lang nghal ruak mai mak ve deuh chu Hluhlui hian danglam ve na deuh a nei a, ka tan thian ang mai nih a thiam a, a thinrim rei ngai meuh lo, thinrima in hauh buai ang kha kan nei ngai lo a ni ber, ka lak ah a dawhthei viau thin.
Zualtei chungchang ngawt kan sawi a, zanin hi harh fîm tak leh nuam ti taka a chanchin ka sawi lehna hmasa ber ani ngei ang chupawh ka nupui hual kiangah lehnghal he hmeichhia hian hmangaih let a phu a min hmangaih em avangin engtik hunah emaw chuan a rilru put ang hi ka la tawmpui ve ngei ka beisei.
Ka zan mu te chu ka zâng vah mai a a chang chuan rilru a thil awm te sawi chhuah a in bun ruah hi damdawi ai pawh in a thawk tha zawk fo rêng a ni.
Hun pawh a liam ve zel a, inneihna tura in puahchah nan kan hmang ral a ni ber, eng eng emaw lei in kan chhuak awl lo a, ka chhungte an phur a an hlim hmel hmuh chu nuam ve tak a ni, chutih rualin Zualtei va hmuh chu ka la tum fan a hun ka neih loh chu thuhran kan thawnthu titawp tak tak tur hian ka la inpeih meuh lo a ni , a tawpna a ni tawh ngei dawn si a.
Nikhat chu Hluhluin lo len a tum thu min rawn hrilh a, lam a ngai dawn em tia ka zawh chuan a lo thlen tep tawh thu a sawi a, ka chhungte Unumami fanu Birthday lawmnaah an kal vek a zinga tang an chhuak vek hlawm a, tunu duat piancham an ni bawk a an phur ngang mai keipawh zan lamah kal ka tum nghe nghe.
" Zawh duh che ka nei a", a nui pah sâng a," Sawi la", tunlai chu a dil chhut ve riau a," Zualtei nen in thawnthu hi hriat ve ngei ka duh",a hmel chu chiang zetin ka en a lungawi lo hmel a pu lo,"Engvang in maw? Nunhlui thil in tihbuai tir reng teh suh", ka ti chang fak a," I hmangaih zia ka hria a lawm amah ang a ka in hmangaih tir ve nan che",a ti leh mai a hahthlak tak a ni," Chu chu thil tha berah i ngai a maw?", ka aw chu nelawm loh tak a ni, nunhlui thil intihbuai tir lo turin ti mah ila kei ngei pawh hi ka buai ru fo mai.
"Ti teh tanpui che ka tum a nih hi eng ti kawng zawng pawh in tanpui che ka duh"
"Hehh! Ka dam lo emaw i ti em ni ?"
"Khawi hmunah emaw i tang a, chutlai hmunah chuan i cham reng a lawm, ka hmangaih che, ka ta ni tur in ka duh che, mahse inchhir turin ka duh lo che a ni, ka hmangaihna che avangin min phalsak rawh, thawnthu chu min hrilh la chhuahna kawng kan zawng dun dawn a nia",a ti charh charh a, " A tha a lawm, i rilru i tih pachan hle erawh a ngai ang",ka ti ve ta ngawt a, ka cigarette chu ka tan leh hmasa te te a,ka room sofa -ah insi chet in kan thu dun a, a nin a thut dan a lo siam tha sauh sauh a.
Kum tam tak a liam ve ta sixth semester kan nih lai kha a nia fifth semester zirlai ah hmechhei duh deuh mai ka nei a, lehkha thiam thei a lar pawl a ni ve a, hmeltha leh smart a nih ber mai chu.
Library-ah hun a hmang tan thin hle a, a library kal tur hi ka lo chang ve thin a.
Zualtei chu hmeichhe tawng tam lo tak a ni a , thian a kawm vak lo a, a thiannu nen Azotei an tih nen chuan an in kawm chawt thin. Canteen-ah ka hmu fo a a chetzia nu zêm mai te chuan min hneh em em tlat pek a.
Tum dang ang bawk in canteen-ah hmuh ngei inbeisei chungin kan thian ho chuan kan inzui phei leh a, beisei ang ngei in kava hmu ta ngei a, vawiin chu amah chauh in a nih hmel a, a che rang khawp mai a lo in ei fel diam tawh a, counter ah Nu Khumi nen an lo inbia a, Lallawmawma chuan ka dara min rawn kuah thawk pahin ," Bro, vawiin chu i Dite chu a che rang hle mai, amah te chauh in a ni lehnghal", ti hui a. Kan thutna a lo thu te chu engmah sawi ngai lo in an lo in sawn nghal sawk sawk a. Kan thut fel hnu pawh chuan Zualtei chu a la ding ve reng a, a buai hmel riau lehnghal, a bag chu a zen leh rak rak thin a, buaina a nei ngei a nih hmel, ka thutna atang chuan ka ding hluai a an lam pan in ka phei nghal hmiah, ka thiante lo "Eeee ", dual pawh chu ka ngaihven lem lo.
" Thiannu, eng nge ni a?" , ka tih chuan, phawk zet hian min rawn en a, in siam tha thuai in , " Engmah a ni lo e", a ti mai a, a bag a la zen rak rak reng, " Mami ba mai ta che", Nu Khumi chuan a lo ti a, "Aih, a chi lo", a beidawn hmel viau mai, "Eng nhe sawi la", tiin ka zawt nawn leh kher a," Ka pawisa", ti hluk in, a in thiam lo deuh nge ni ," A bo ",a ti zuai raih a tawp lam zuih ral ta lutuk chu ka lo nuih suk pek a, min melh no lo khawp mai.
" Engzat nge ? " , Nu Khawmi ka zawh chuan , " A tam lo ", tiin min hrilh ve mai bawk a, ka wallet ka phawrh chhuah chuan ," Aih a ngai lo", ti chul in ka kut a rawn ban nghal thuak a, in thiam lo leh in a kut a la sawn za za, nuih a ti za ang reng," A ngai lo tak tak", a kut hma suih et hian a ti leh a , "I puk dawn nia min pe leh dawn a lawm", ka tih takah chuan a tang tung kmta bik lo a.
Kan inpek fel zawh chuan kan in zui chhuak ve nghal a, " Naktukah ka pe leh nghal ang che", thil dang sawi lo in a ti nghal a, " I number min pe la tiin ka phone ka lek kang a, mak tih hmel deuh in min en leh tawh, " Ngaihtuah la ka pawisa i puk a tu nge i nih takngial pawh ka hre si lo che a", ka ti ta ngawt a, bu nghut nghut in ka phone ken lai chu a lo la a, min rawn pek leh chuan ," Lawmzuali, Zualtei", a ti bah nuai a.
Ka let phei leh chuan ka thiante an lo an lo then thaw hlawm a, " Mak hei hui reuh lutuk, a number min pe", ka tih chuan an ri nghal chul a, Atea pek chuan kan piaha thu engmah hre ve lo chu , A Dite'n a number a pe a nih chu", a va ti pek a pakhat lah chu a hrilhhai hmel khawp a za lo deuh chuan a nuih ve a.
Tlaiah chuan gate-ah Zualtei chu ka lo nghak a, a rei reuh phian lehnghal a a haw tawh a nih ring a kal mai ka tum laiin lehkhabu inpawm bawr tun in a rawn phei ve hnek hnek a, min hmuh rual chuan a ding deuh dat a," Naktukah aw", a ti leh zat a a vei hle a nih hmel e, ka nuih suk ringawt.
" Lo chuang rawh",ti in ka bike hnung ka beng thak thak a, mak a ti leh tawh, " Aih"
"Lo kal mai rawh " , ka tih leh chuan, a lu a thing ner ner a," Taxi ka la mai ang" a ti chu sawi sual in tih hmel zet in a ner nûng a pawisa a nei lo tih kan hrechiang dûn viau," Chuang la", ka tih leh chuan ke a kal a duh thu min a sawi leh a, " Lo kal rawh" , ti a a kut va ban mai ka tum chu a lo hnungtawlh hrut a, hmeichhe dang ang lo tak in tih loh chi a ni lo a duhna ah chuan a luhlul viau pawh ka ring," Heipawh a man ka pe leh ang che " , ti bul bul pahin a rawn lawn ve ta hram a, a zei lo viau lehnghal lehlamah zei deuh ai chuan a ngaihthat thlak lehling.
A awm a nuam lo riau in ka hria a bike hnung chu a kut leh lamin a vusn a lehlamin a lehkha bu a pawn run bawk a, a bawr tak tak a ni, " I thiannu kha khaw nge ?", a awm nawm deuh nan biak tlangnel deuh tum in ka zawt a.
"A nuam sam lo a a inentir", a ti ve mai a, sawi leh tur ka hre tawh der lo.
An in bul kan thleng ta a ni ang , "Tah hian aw" ,a ti zawi sap a, ka din rualin a chhuk nfhsl thuai a, " Ka lawm e vawiin chu min pui nasa khawp mai", inthlahrun hmel zet in a ti a, " Zanah ka lo bis ang che", tih leh tlan chhuah ka rual a.
Zan dar sawm pakhat vel ah chuan, ka va call a, vawi khat naah chuan a la lo chiang ngei mai vawi eng emaw zat ka tih nawn tak tluk tluk ah chuan a la ve ta hram a," Tu nge aw?", a aw nalh leh tham chhel chuan a rawn ti a, ka thinlung zet chu hetiang reng reng hian ka la luang liam ngai lo, " Keimah i hmangaihna phuttu thinlung nei tu", ka rilru a thu awm ngei chuan ka chhang a, " Enteh thianpa tun ang zan rei ah i zu ruih vang ngawt chuan min lo be tawh suh ", thupe aw zet zawm loh har em em si hian a ti chang fak a, a dah nghal daih bawk. Thianho in kan chhuak a ka ruih vak loh nen aw .
A tukah chuan Canteen kawtah a lo ding a amah chauh in a la ni.
A thiannu awm na te chu ka zawt ve leh thuai a an inentir an lo admit thu te chu tha tak chuan min lo hrilh a, thian dang kawm ngai lo tih takah a mal viau ang.
A haw tur chu ka chang leh a an veng lama kal kawi ka ngaih thu chhuan lam in, a ni pawh chuan remchan em avang chuan a lo duh ve a.
A tawi zawng in sawi ila kan in ngaina chho ve zel a, thian ang chuan min en ve ta ni in ka hria. A thiannu kha a hrisel lo viau a damdawiin an lut chhuak reng a ni ber ka tan erawh hun remchang min siam reng a hun tam zawk a kiangah ka hman tam theih phah thung a, ka duhna ka thup ngai lo a mi pangngai tan chuan hriatthiam loh theih a ni lo.
Ka chik a, thil kan sawi dun ve fo a, a rilru a puitling em em a, fa u ber niin amah ah a chhungte'n an beisei sang hle a. Ka duhna ka tih lan hnu ah pawh min hnar bik lo chu a ni a.
Tlai khat chu a a thiannu Azotei damdawi ina awm kan tur in kan kal dun a damdawiin kan thlen chuan thawk a la hawk a," Damdawiin rim hi ka ngaina lo takzet, thih ka hlau viau ni tur a ni" , a ti hak a, " I hlau viau amaw?", tia ka zawh leh chuan heti hian min chhang a, " Ka hmalam kawng ka thlir a kawng bumboh leh hahthlak takin min lo hmuak a, Kanu leh Pa te innghah na ka ni a, ka unaute hmala hun tur keimah ah a in nghat a , ka thil chak zawngte aiin ka tih ngei ngei tur te ka dah hmasak an ngai a, an suangtuahna meichher keng tu ka ni a, ka tlansan a nih chuan thimah ka hnutchhiah ngawt dawn si a. Ka kawng bumboh tak leh khawvel harsa tak hi liamsan daih ka duh a, ka kalsan tur te lungnai leh beidawng a an awm tur chu ka ngaihtuah a thih chu ka hlau a ni", tiin," Lehlam ah ka chhungte hian ka hmakhua atan, ka hlimna a tan theihtawp an chhuah a chauh leh na pawh sawi lo in, kei chuan thil dang, khawvel thil te engmah buaipui thei ka ni lo", a tih leh a, a thil sawi chu a ti tak hle a, thil vei tak nei hmel a pu.
Beisei ai daih in Azotei pawh chu a lo harh tha a, kan haw meuh chuan khua a thim duaih tawh kawng tluan chuan kan in be lo a, mahni chenna ram ram ah kan cheng a ni ber.
An in kawt kan thlen chuan kal mai a tum chu ka pawt ding leh rih a.
"Zualte ka duh che tih i hria ti raw?", ka ti thawl a, thian ang a awm reng hi ka peih zawng a ni ve lo, ka ta ni tur in ka duh a, chuti chuan ka venghim tlat thei ang. Min chhang lo in min melh kar ringawt a, " Sawi la", ka tih leh takah chuan ," Aw ", a ti zawi sap a, " Tunah min chhan nghal kher a ngai lo , lo in ngaihtuah la" , ka tih pawh chuan min chhan tum hmel a pu lo hrim hrim.
A vawikhat na ah chuan heti hian min chhang a, " Ka thei lo, i lo suangtuah ang hmeichhia kha ka ni lo, i tan ka hun pum ka hlan ve thei lo che, hmeichhe duhawm tak emaw min tih laiin mawhphurhna tam tak nei hmeichhia chuah i hmu em min hlimpui lo ang", ka lo beisei loh dan deuh in min chhang a, sawi chhunzawm leh in," I hria em Damdawi in a ka thil hrilh che kha ka sawi chhan awm lo a mai mai lo a, hetiang thil vel a buai thei ka nih loh zia hre tur a ka duh vang che a sawi ka ni",a ti leh zel a
" Kan tum chhin thei a lawm, hmangaihna chu kan kawng hruaitu ah kan hmang ang a", tiin a thinlung hmin ngei tum in ka chhang a, min hnawl ta tho a.
Ni e, ka hmeichhe lo suangtuah ang chu a ni lo meuh mai mahse ka lo suangtuah thin te ai daih a tha a ni. Beidawn san erawh ka tum chuang lo.
Vawihnihna ah chuan kan dinhmun in thlauh zia te, kan boruak hip hran zia te, mahni insit taka awm a duh loh thu te, ka duh leh chak zawng min tihpui thei ve ngai loh tur thu te sawiin, a ni leh kei chu lei leh van nen hial a in tehkin a ni kha, a ngai te in heti hian ka chhang leh a, " Kan tum chhin thei a lawm hmangaihna chu kan kawng hruaitu ah kan hmang ang a", tiin, ka sawi liam mai mai lo a ka rilru put hmang dik tak a ni. Hetiang em em hian ka thil duh ah ka la chiang ngai lo, tu hmeichhia mah ka suangtuahna ram thleng pha ka tawng ngai lo, nupui tur ngat phei chuan tum hmeichhe dang mah ka la ngaihtuah ngai lo.
Thian ang a awm reng kha a duh a, ka rilru put hmang a hai der ta ngawt a.
Ni hnih chhung zet class a kal lo a, a biak theih der loh lehnghal, chutiang chuan a awm ngai miah lo, Azotei a chanchin ka zawh chuan a ni pawh chuan engmah a lo hre bik lo a, a ngaih a lo tha lo ve tawh hle zawk a lo ni.
An in lam pan in azotei nen chuan kan in zui phei a, Apitei chuan Apu dam lo a zual thu te, Apu chuan a hun tawp tak meuh a hman tawh thu te, Zualtei chuan Apu chu a ngaina em em a, a rang lama a haw chhoh thu te min lo hrilh a Zualtei chu a buai ruk zia te leh a ngaihtuah thu chen in min hrilh leh zel a, a awm na kan hre ta chu thawk huai a hnek in ngaihtuah a ti zual ngang mai.
Azotei nen chuan a tuk a kal tur in thu kan ti tlu ta nghal a.
Darkar tin chuan ka call awl lo a chhanna ka dawng thei reng reng lo mai a, Azotei nen chanchin kan in zawt reng a tu a mah chuan kan be thei lo a.
Dar sawmpahnih vawr velah chuan beidawng tak chung chuan ka call leh a, beisei loh deuh in a lo la a, a lo la rang angreng khawp mai.
"I tha maw?", tih chu ka zawh hmasak ber a ni, " Kapi a chau lutuk a Kapu a zual zel a", a ti zawi sap a, a aw chhuak te chu a chauh hmel ngawih ngawih,"Naktukah kan lo kal ang", dam dup hian ka ti a, min chhang let lova, a thawk la ri chu ka hre thei," Nangmah kha in enkawl uluk la , i hrisel na kha a pawimawh lutuk a nia , eng thil pawh lo thleng se a chak ber i nih kher a ngai lo , a chang chuan tap la mahse tunah chuan chhel takin lo awm rawh a," ka ti leh a. ," Min lo ko a", tih leh dah a rual a.
Dar khat velah chuan ka call leh a ka thawm hriat hmasak ber chu tap thawm a ni ," Apu chu vanramah a kal tak tak tawh dawn a," mipa naupang hian a rawn ti a a rik rak rak hnu ah a in off a, Azotei'n Zualtei Pu boral thu min rawn hrilh nghal zat a.
Khua kan thlen chuan an lo vui zo tawh a, beisei loh deuh in kawng kan bo nek a, chawhnu lamah kan thleng ve ta hram a, an in chu kawng ân a awm a ni bawk a hmuh a har lo.
Pitei chu kan hmu fuh hlol a Zualtei chuan Apu boral chu a tuar na viau a mahse a tah ve miah loh thu te Api ngawt a buaipui thu te min lo hrilh a, tlang a a han hawi harh thu a sawi chuan ka han chho ve nghal a.
Tlang han tih tak tak tur chu a ni em em lo a, thenawmte nen a in auh phak na lek a ni.
Amah te in a lo ding a, a lam ka pan phei thuai a, a bul ka thlen chuan ti hian a sawi a," Ka pu dam loh thu ka hre ve miah lo a,ka lehkha zir that an duh luat ah Kapu ka enkawl ve hman lo a," a nui deuh hak a," Ka pu chungah hetiang thil hi a thlen ve theih ka ring ngai miah lo," a chau leh lungngai hmel chu hmuh hreawm tak a ni, hnem ngaihna ka hre lo a thihna hi chu in hnem a dam mai chi a ni lo. A thusawi ngaihthlak sak chu ka tih theih awm chhun a ni a, tunah chuan chu chu a mamawh ber a nih ka ring.
A sawi chhunzawm leh a," I hria em ka tet te atang Ka pu thawhrim zia ka hmu a, rim takin a thawk a a chau ve thin khawp mai, vawiin zet chu hahdam tak a ang a , a kal hmasa te hi an vannei an ti thin a keipawn chu chu ka ring, mahse an liamsan tak te thinlung nat zia ka hmuh hian thih ve daih ka chak na kha a bo chiang khawp mai, a na lutuk tlat," a mittui a luang thla ngiai ngiai a. Ka kuah nghal thuai a a mal loh zia hi hria se ka duh a ni, ka awmah a hmai phumin a in hnit faih faih a,duat takin a sam chu ka chul sak a.
Rei lo te ah a rawn hawi chho a a mit a sen rûm a , a hnar a tai hlar bawk.
"A hun lo viau tih ka hria mahse i lungngaih chang a i kianga awm reng ka duh a, i na te chhawktu nih ka duh, mahse chu chu ka tih vek a rem meuh lo a ni, ka ta ni la , i kut min pe la chu ti chuan i tan pasaltha huaisen tak ka ni thei ang ka venghim tlat ang che a nga, khawvel hi kan hma chhawn dun dawn nia engpawh lo thleng se hmangaihna chu kan kawng hruaitu ah kan hmang a nga",tiin ka hmangaihna chu ka hlan leh a thinphu dêp dêp chungin a ni a chhanna chu ka nghah ni.
A lu a bu nghut nghut a, Aw a tihna ah ka ngai.
A mit takah chuan chiang takin ka en a min chhang ngei e, a hmuiah chuan dimte in ka fawp a min chhang let lova min hnar hek lo.
Kar khat hnuah Aizawl a rawn chhuk leh a, hmuh hreawm in a awm lo a ngai a awh leh tawh ang mai a ni.
Kan in ngaizawng chu a ni ve der mai a , hmeichhe rilru nghet tak a ni tih ka hriat avangin ka ringhlel ngai lova, ka hmangaih em avang in a that loh na sawi tur ka hre lo.
December thla kan chuang kai der a, chawlh hmanga haw lo a inhlawh a tum thu a sawi a phal lo viau thin mah ila a duh thlanna ka zahsak a ngai si a.
Christmas hma a a chhungte lâng a han tlawh zawk a duh thu a sawi chuan ka kal pui theih tur thu ka hrilh a alo rem ti ve mai dawk.
A chhungte a hawn tur thil eng eng emaw lei in kan bazar dun a, ka kal ve dawn si chuan tiin keipawh in ka lei ve nual a, nuam lo a ti leh viau mai, mahse chu erawh ka tih ve tur reng ah ka ngai.Engtik hunah emaw chuan kan fate nen kan la bazar ve ngei ang tih chen in ka rilru ah a lo lang a ka hlimpui ve khawp mai
Zan lamah chuan rei fe kan inbe leh a inneih chungchang ka sawi chuan aw min pawh tha duh hauh lo mai a, keichuan ka graduate ve leh a inneih a , kan in atang thlamuang taka kal chhun zawm turin ka duh a, lehkha zir paha inhlawh reng a ngaih tawh loh nan a ti ka ni, ka duh dan te ka sawi chuan heti hian min chhang a," Thil hi sawi ang ngawt a ni lo,chu chu ka chhungten ka laka an beisei pawh a ni hauh lo ang," tiin
" An fanu i nih na a bo dawn chuang hleinem, an chung a i hlen tur i hlen thei ang a, an tan pawh a hahdam thlak daih zawk dawn a lawm", dam hlup chuan ka ti a
"Ni lo e chu chu thil nih dan tur a ni lo,"a ti chang fak
Ka ngaihtuah fe hnu a sawi ka ni a buaina tur awm thei pawh in ka hre hek lo, a suangtuahna te a hlawhtlin theih nan vek tho a sawi ka ni, atan a kawng awlsam ka zawn sak a, inneih chungchangah chuan rei fe kan in hnial buai a
" Min neih hi i duh lo hrim hrim em ni?", tiin ka zawt ta ngawt a," I hrethiam lo a ni, ka dinhmun a dingin han ngaihtuah teh"
"Eng ang harsatna nge awm chuang"
"Chhungkaw reithei tak atang a sei len hi eng tiang a mawhphurhna sang nge tih i hre lo a ni, i duh na ngawt i dah lian a nih hi",a ti a, boruak chu a aup churh mai a, ka hum ruh tûn ringawt.
Ni e a duh dan a pawimawh ber a lawm, kan in hauh thui loh nan a duh dan thlap in thu kan ti tawp a, ka nawr mah mah a ni mah na, inneih chungchang pawh kan sawi lang ta ngai lo, eng tik hunah emaw chuan a la rem ve thei ngei ang nghah a ngai a nih pawh in hmangaihna avang in ka nghak a ni mai a niang chu.
An khaw lam pan in kan inkhalh chhuak a, a zam hmel te chu duhawm tak a ni.
A chhungte chuan min lo lawm thiam ve khawp mai a nau pali naupang tê tê a nei a, a chhang chiah hi hmeichhia niin kum sawm pakhat a ni a, a dawt leh hi mipa kum kua mi, a tê te pa hnih phei chu kum ruk leh kum li mi lek an la ni. Chaw te kan ei a kan hlim tlang dar dar khawp mai.
Kan haw dawn chuan tlang a han kal leh a rawt a, a hma a mi a bawkah khan a ni, ka in zui chho leh ta rih a, kha mi ni kha min ti hre chhuak a ka nui suk suk ringawt.
Kan awmna hmun a ngainat zia thu a sawi a, ngaihnawm ti tak in ka ngaithla a, van a thla leh arsi te kan thlir a, boruak te chu kan hip vang vang a, hahdamna hlir a ni hetiang em em hian ka nun hi ka la hlimpui ngai lo. Van lam a thlir lai chuan amah ngawt chu ka thlir reng a a rawn hawi phei rual in kan mit a in tawng fu nghal chat, a hmui no nem takah chuan ka mit a fu nghal chat a, muangchang a hnaih in a hmui ah chuan ka fawp ta vawng vawng a dim leh ngunthluk tak in, a ni pawh chuan min lo chhang let ve a.
Kan thawnthu ziaktu chu mahni hmasial takin min chelh din sak turin ka ngen a thawnthu ngaihnawm tak ni turin a liam tir ta zawk a.
Christmas leh Kumthar chhung zawng chuan Zualte chu a dam lo a , a khua a sik ser ser reng bawk, an in ah ka leng phei reng a a pitei te nen pawh kan in nel phah khawp mai.
Hun pawh chelh din rual loh in a liam ve ta zel a. College pawh ka graduate ve ta reng mai. Graduation day ah chuan ka chhungte leh ka hmeichhe hmangaih ber ka kiangah an awm a, ka famkim ngawih ngawih bik mai hian ka hria.
Vanduaithlak takin kan company-in buaina kan tawk a. Kapa tanpuiin ka buai ve thei hle a, zir chhunzawm leh lam chu a lang lo, ka hun pum chu company-in ngai a awh leh theih nan ka hmang a, chauh pawh ka chau ve thei thin khawp mai. Zualtei pawhin a zir chhunzawm ve zel a kan in be khat angreng khawp mai, a ni pawhin lehkha zir a beingawrh hle a.
Tlai khat chu a class bang hmuh tum in ka kal a. Ka thil hmuh zet chu, mipa pakhat bike ah hian a lo chuang a an tlan chhuah hma in ka nang hman hram a.
Min hmuh rualin an ding dat a, ka thinrim chu insum a har lam mah a ni," I bialpa chu maw ", mipa chuan a ti hak a, a nui pah deuh kher," Aw, ni e", tha tak chuan a ti ve mai a," Sport-naah a ke a ti na a, ka phur haw dawn a nih hi ," a ti a, ka melh rum ngang mai, a bula hmeichhia chuan min rawn pan phei thuai a , a ke chu rah har a tih hmel ngang mai. Mipa pawh chu a rawn phei ve a," Bro, bialnu i neih hmelthat em hi ngaihven ve deuh tawh la, keini pawn kan duh ve tho a nia," ka dar ben thek thek pah hian a rawn ti a. A ri nghal fua a ka insum hman meuh lo a ni a thal nghal thuai a, Zualtei chuan min kuah nghal chawt chawt , a hlauthawng hmel chuan ka thinlung a ti nem nghal thuai a, a lakah erawh ka lungawi lo khawp mai.
Kan thian a chu a rawn tho leh tiam tiam a," Hmela thikthu i pe chhe hle mai maw i ngaihven theih loh chuan nei lo law law ta che," min elhsen zet hian a ti a ka sa leh nghal phat tawh," A tawk Kima kal tawh rawh," Zualtei chuan a ti vin hlar a,"Hmeichhe mawl tak i nih hi, nangmah ngaihsak thei tu che thlang ta che," a ti leh hram a.
Ka thinrim ka insum zo lo leh mai dawn avangin Zualtei banah chuan ka vuan a ka kal pui nghal dawr dawr . Car bul kan thlen chuan ,"Ana,"ti deuh hrak in ka vawnna chu a tal phelh a a sen nghal tûn tûn mai, ka inthiam lo viau a chu erawh tih lan ka tum lo.
" Eng ang fa ko in nge in in hnim hnaih a khatiang a che ngam tur khan", ka ti hluk a, " I ngaih ang kha a ni lo, min ring rawh," a ti reuh a," I hria em ka hah lutuk tih hi, rilru leh taksa a chau a, ka ngai bawk che a," ka awiki chu nel awm leh dam deuh zawk in ka thlak a, ka hma a hmeichhe ding chu ka kuah nghal thlup, buaina neih ka duh lo, ka ring a ni, ka hmangaih bawk a, a thaw dep dep a, ka thinphu te chu a ngaithla niin ka hria.
" Zan ka mut dawn in ka ngai che a, ka kiangah awm la ka ti a, hna ka thawh laiin ka ngai che a, ka kiang a awm tur in ka duh che a," dam deuh zawk hian ka ti a, lo hawi chho in min nuih san san a
"Keipawn ka ngai che ", a ti var a
" Zualte ka hmangaih che " ,thu tak zet hian ka ti a, ka mitmeng a chhiar niin ka hria, min en ngun khawp mai ,"Keipawh in," a ti ve leh a," Min hmangaih em ?", tiin ka zawt leh kher
"Aw, ka hmangaih che a lawm ," a ti zawi sap a.
"Innei mai ang," ngen ngawl zet hian ka ti a, a in la hrang dat a.
Kan company pawn ngai kawn awh chho ve mek a chuvang a sawi ka ni.
"Ka la thei lo a ni",a ti leh sap a ,"Engvangin maw, ka chhungten an duh che a , i chhungten min haw bik lo a, ka chawm thei che a, i zir chhunzawm thei bawk a, i duhthusam zawng zawng engmah thlak danglam a ngai lo ang", ka lam a pawh hnaih pah chuan ka ti a.
" Min hrethiam rawh", a la ti fan
He hmeichhia hian a nun a tel ve tur in min duh lo ni ber in ka hre tawh, hah tak a in ka thlen a lo awm tura ka duh thin zia te, zing ka harh rual a ka zawng ruai mai thin te, mumangah lah ka hmu awl lo a chung thil te chu ka hmangaihna vang a lo awm a ni a, ka awm ang hian a awm ve ngai miah lo em ni zawk le?
Tunlai chu kan in hlat ngawih ngawih mai hian ka hria chan mai hlauh na ka nei a ni.
"Min hmangaih si hian min ngai ngai miah lo em ni? Min hmangaih si hian i kianga awm reng tur in min duh ngai lo em ni?", ka vîn lo a dâm tak in a ni ka zawh ni.
Min chhan tak si lo ah chuan car-ah chuan kan lut a.
Tu mah mah chu inbiak kan tum lo , chau tak chung in a kiangah hahdamna ka zawng a, kan hun tawn hrep chu, a lakah hian ka beidawng ve takzet a ni.
Zan lamah pawh chuan kan inbe ta chuang lo a, rei tak chhung ka chawlh san tawh thian kawm a zan chhuah chu ka tan leh a, in a awm a amah ringawt ngaihtuah chu tunah rih chuan a chauh thlak lam mah a ni.
Thiante nen a hlimhlawp thil ûm a ka chhuak leh ta fo chu ka chhungte pawn an hre leh thuai a, Zualtei te in a ka len chang hi chuan ka rui haw ngai miau lo a ni.
Ka chhungte chuan Zualte i nen a kan chanchin min zawt ta rêng a, kan inthen loh thu ngawt in ka chhang , ka chhungte hian innei mai tur in min duh thu an sawi ve fo a, a chanchin an hre ve vek a an inhuam ve viau mai.
Kar khat dâwn chu kan inbe ta lo a, a kar khatna ah chiah ka be leh chauh ang tiin ka rilru ka siam fel a, ni a rei duh ngang mai.
A chanchin ka ngaihven ru reng tho a Azotei hnen atang a nawm sam loh thu ka hre leh zel a. Inrinni a an inentir haw chu ka hmu a a na viau nge ni hmeichhe tuar chhel tak a nih vei nen damdawiin a thlen ve tak mai ni.
Zanah ka be ta ngei ngei a.
" Eng nge i tih?"
Rei lo ah min rawn reply nghal thuai a, "Zan in chu ka mu hma e ka tia, khumah ka mu der tawh"
" Vawiinah ka hmu che a hospital atang in rawn chhuak lai kha, i dam lo em ni?"
" Ka tha tawh lutuk, ngaihtuah awm ka ni lo"
"Ka lo call ang che", tih leh call ka rual a
Phone a lak rual a, a aw dam diai leh mawi em em ka hre leh ta chu ka dam huai mai hian ka hria.
"Ka ngai che", amah zawk chuan a rawn ti a, luhlul lutuk mai min ngai chung pawn min rawn be miah lo a nia.
"Chuan, i dam lo a maw?", tiin ka zawt leh a
" Ka dam tawh lutuk, khawsik satliah a nia, ka chhungten in entir turin min ti tlat sia", ngaihsam zet hian a ti a, a aw pawh a zangkhai viau mai.
" In enkawl tha la aw, ka ngaihsak reng hman thin loh che avangin ka tihpalh aw ", ka in thiam lo ve takzet a ni, ka hun tam zawk chu hna ngawt ka buaipui a, atan hun ka hman tlem zia ka hre chhuak miau a ni.
"Naktuk chu leng ang hmiang", a ti ve teh mial a, ka nui hak nghe nghe, min ngai ve tak tak nge ni, lenpui a min sawm vawi khat na a ni ngei ang.
Ka nui ri a hria ni ngei ang ,"Eng nge",a ti hlar a, duhawm reuh lutuk
"Engmah ni lo e, kan leng dawn nia", nuih za ru tak chung chuan ka ti a.
Zan in chu ka hlim leh ta khawp mai ka muttui phah viau leh nghal.
Inkhawm ban awm velah chuan ka inkhalh chhuak a, an in ka thlen chuan a lo insiam peih diam tawh , kawrfual levender colour hi a ha a a vun no nalh tak te chu a kah en belh a, a sam a thlah chiat a inhmeh tak a ni.
"Khawnge kan kal ang ", a hmetha tak ngun tak a en pah chuan ka ti a, "I duh duh na ah a ni mai ", a ti sam et a, a lai deuh em maw ni.
A hmun nuam tih tur tak chu ka hria a ni, khawpui kan chu chhuah san a, phul hring dup hmun kan thlen chuan naupang ang mai in a au chel chul a, duhawm ka tih dan deuh khan a nui a.
" Vawiin ah chuan naktuk awm tawh lo tur ang mai in min hmangaih la, nimin a thil thleng te hmalam pansan in, naktuk chuan eng thil nge a lo her chhuahpui ang tih reng ngaihtuah lo in, âm tak leh hlut tak chung in hmang ang aw", tih pah in min nuih sen sen a.
A kawnga chelh in ka lamah ka pawt hnai a a hmui a fawh zeuh pahin ," Teh reng mai", ka ti sap a, fawh leh ka tum lai takin a kutin ka hmui a rawn hup a, " I duh a nih chuan min man phawt a ngai ang" , tih leh tlan chhiat a rual a, chimawm lutuk.
A duh ang ngei chuan hlim tak in hun kan hmang a, tlai ni tla tur chu inkuah rialin kan thlir dun a, a kiangah hi chuan ka kim bik ngawih ngawih thin a,nitin mai hian ka hmangaih zia ka hre chhuak thar leh thin.
"Hmangaih tak te chan hi eng tiang a na nge a nih i rin?", tiin min zawt a
"Ka hre lo, ka hmangaihte hi tumah chan ka duh lo a, chan tur ang takngial pawhin ka la in suangtuah ngai lo", tiin ka chhang a
" Tumah hian hmalam hun kan hre si lo a ti raw eng tik hunah nge lungngaihna hian min rawn luhchilh ang tih thleng in, " hma lam a ni tla sen riau mai chu a mit khap lek lo in a thlir pah reng a
" Chutiang sawi teh suh thih na in min then hma lo chu then che ka duh miah lo, thihna pawh hian ka hmangaihna che hi a ti dai thei chuang lo ang", chiang leh fiah kak mai hian ka ti a
Lehhawi meuh hian min rawn thlek a," Tak tak maw? I chiang maw thihna in min then hma loh chu ka kiangah awm reng rawh aw"
Ka lu ka lo bu nghut a a thla a muan hmel hliah hliah chu keipawhin ka lo hlimpui ve a
"A nih bo ta thut in thamral ta riai riai in i kiangah awm thei tawh lo ta i la"
"Thihna maw?"
A lu a lo bu nghut a, " Ka hre lo tu emaw chu ka dem viau maithei a ni, chuan nun hi ka tan a ho a nga, i tel lo a khawvel a awm ve reng chu ka peih ka ring lo ", tiin ka chhang a
"Ni lo e, thil eng pawh lo thleng se Pathian in kan tan a tha tur zawk a a ruat a ni tih hre reng tur in ka duh che, i beidawng ta viau a nih pawh in hmalam a êng chu thlir tlat la, ka hria a ni ka hmangaih tluk zet che a hmangaih tu che hi Pathian hian a tawn tir leh ngei ang che," dam diai hian a ti a, a ni lo hmeichhe dang maw, teuh lo lutuk.
" I tan ka thinlung hi ka kalh bet tlat tawh a lawm, midang an leng tawh lo"
" Nang nen a chhungkua din a fa neih hi ka duh leh chak ber a ni ve tho a sin, ka lo awm ta lo a nih pawh in nang tal chuan i ti hlawhtling tur a ni, kei chuan duhsakna sang ber ka hlan fo ang che" , a ti leh zel a, thi tur ang hialin a lawm le tawng ni.
Rei pawh awm tawh lo in kan haw a. Kha mi ni kha kan hlim ni tawp na a ni, biak ka tum chang in a biak theih loh a, an in a ka kal lah in a awm loh thu ngawt in min chhang a, Azotei a chanchin ka zawh lah in a dam tha tih ngawt lo chu chhanna dang ka dawng ngai meuh lo.
Tlai khat chu Azotei hnen atang min then thu ka hre hlawl a, a hrilhhai thlak duh khawp mai, ka then ve loh thu te , a ka ngei atanga hriat ka duh thu chen in ka sawi a Azotei chuan heti hian min chhang a," Hmuh che a la in peih chiah lo a ni, amah theihnghilh a hma lam pan tur in a duh che a, engkim tawp vek tawh tur in a duh a ni," tiin
Chutiang mai a tawp ngawt chu ka tum hauh lo ,chutih rualin thil tih sual ka neih leh neih loh ka ngaihtuah reng a ngaihdam dil tur takngial pawh in ka thil tih sual ka hre bo bawk si lo a ni, ka famkim lo viau chung hian ka hmangaih a a rilru tihnat ka duh ngai lo. Ni e, kan hmangaihna in par a chhuang lai tak a thliah a a awm chu ka hrethiam lo a ni.
An college kawtah chuan zing atang ka nghak a, eng ang pawhin awm mahse class a thulh zen zen ngai lo miau a ni, tlai a ni tawh a mi pawh an haw sup sup tawh, a hmel reng reng hmuh tur a awm lo a, vei vak tam zawk chuan min en duh khawp mai.
Vanneih thlak takin hman ni a amah lo phur tu ngei mai kha ka hmu a, min hmuh chuan min nuih vei suk mai, ngaina lo teh mah ila kei ai ngawt chuan Zualtei chanchin a hriat ka ring bawk si, hmangaihna chuan min in phah hniam tir duaih duaih mai zawng a nih hi.
" Karkhat dawn chu class a rawn kal tawh hlei nem, a thiannu lah kha sawtlai ah sawn a pil zuk zuk reng a, thiana haw tawh zawk mai rawh, hmeichhia hi chu ka sawi kha mipa tha tak a tawng te pawh a ni mahna", ka dar a ben thek thek pah hian a ti teh luam a, a thil sawi chu han thinrim pui viau ngaihna pawh ka hre tawh lo.
"Mipa dang maw? Ni lo e min hmangaih lutuk a lawm" tiin ka rilru chuan ka in be mawlh mawlh a.
Class a kal tawh ngai loh thu chuan ngaihtuah a ti thui khawp mai.
Kan in lama haw ta lo chuan an in lamah ka tlang a, ka phi ruai mai hian ka hria, an in ka thlen chuan engmah ngaihtuah sik sek lo in ka lut tawp a," Khaw nge Zualtei"
"An khaw lamah a haw chho ta nih kha", Apitei chuan dam diai hian a lo ti a, a meng hnual riau a ka hriat ni
" Engvangin nge hetiang a a awm tak thut ?" dawhthei lo zet hian ka ti leh a. Ka chhanna dawn chu ka duh khawp lo hle a ni
" Bawiha, a hun a tih hun ah a la hrilh em em ang che, nang chu tlangval fel tak i ni a nula tha tak i tawng leh mai ang, kan fanu hi chu hre reng tawh lo la, chu chu a ni pawhin a duh dan a ni," tiin min chhang a, sawi leh chuan tur pawh ka hre lo, ka na a ka chau tak zet a ni.
Rei tak chhung chaw ka ei mumal tawh lo a, thil dang engmah rilru ah an awm thei lo, ka na takzet tih hi ka thil hriat theih awm chhun a ni a, hetiang em em a hmangaihna vang a ka na hi mak ka ti , ka hlimpui ber thil a nih thin nen , an sawi thin a hmangaihna leh natna chu intluk tlang tak a nih thu hi keipawhin chu thu chu ka pawmpui viau tawh.
Tlai khat chu Azotei hnen atang phone call ka dawng hlawl a
" I chhungte hnen atang i chanchin ka lo hria a"
" Sawi tur i nei em ni", ka lo ti chang fak a
" Eng lo a nia, Zualtei chu an khaw middle school ah mi ai kalin a thawk rih dawn a, amah pawh a lawm khawp mai," a rawn ti a
" Engvanga min then ngawt nge a nih?", tiin ka lo zawt let thung a
" In pahnih tana tha tur a a rin vang chauh a ti a nih hi, hetiang a i awm reng chuan atan pawh a nuam lo ang," a ti zawi sap a.
Ni e, a tawp khar a duh a nih chuan eng nge tih theih ka neih chuan le, ka hmangaihna meuh pawhin a chelh ding zo lo a ni e.
Mahse, a tawp nan a ka a tang ngei a hriat ka duh a ni beidawn nan tal pawh.
Inrinni a ni a Zualtei te khaw lam pan in ka in khalh chhuak a, kan kal hnuhnung ber tum kha chuan kan hlim in kan phur hle a nih kha, tunah chuan zinkawng thui tak an chang zo tawh, engkim mai hian amah min ti hre chhuak a natna bawk a ni min thlen ni.
An in ka thlen chuan zam ru tak chungin kawngka ka hawng a, Api leh Anu hi an lo awm a min hmu chu mak tih hmel zet hian min lo en a, puitling na na na chu insiam rem thuai in tha tak chuan min lo chhawn a, Zualtei awm na ka zawh chuan Api chuan tlangah a awm thu min hrilh a, Anu erawh chu a tawng lo a ka laka tang a mit a la san meuh lo, kan kal hmasak ai daih khan a cher riau in ka hria a , a mit khurte chu a khuar dûk mai, a mitmeng chu na tak tuar a ang.
Rei awm lo in tlang lam pan ka rual a ka thin phu zet chu.
Nula duhawm deuh, hmeltha nalh leh pian fu zet mai lo ding chu ka han hmu a, thli chuan a chhem deuh deuh reng a, tu nge a nih hrilh hran ka ngai lo, amah ka hmangaih ka nun leh rilru chawk buai vek tu kha a ni.
Ka kal phei ri chu hria in a lo in her a,
"Bawiha", a ti tham tiak a, a lam pan chuan ka kal phei zel a.
A bul ka thlen chuan " Duati, ka ngai lutuk che", tih leh kuah ka rual a, rei lo te chu che miah lo in a dawh a rei lo te takzet a ni, tal thut in a in la hrang a, hrilhhai hmel zet chuan ka en a.
" He lai hmun a awm tur hi i ni lo, eng vang in nge i lo kal, nang leh kei chu kan tawp tawh engmah a awm tawh lo", thawk lak hrawk pah hian a ti a.
Hoddie dum haiin a lumkhum a khum et a, a hmel zet chu a hmui sen chek thin te kha a dang bel a, a chauh hmel in a thawhrim hmel takzet.
" Chaw i ei tha lo em ni ?", tih pah a ka pan hnaih chuan a che san hrut a.
" Haw tawh rawh", chiang zawk hian a ti leh a.
"Ti nge? Ti nge kan inthen, i duh loh zawng tih ka nei em ni tihsual ka nei a nih chuan sawi la ka insiam tha vek ang, sum leh rohlu thil vang em ni? Tlanbo daih ang hmiang khawvel thil te hi tlanbo san daih ang aw", duat leh thlahlel zet chuan ka han ti a
" Ka tlanbo san thei lo a, ka biruk san thei hek lo, eng ang pawh in biru teh mah ila awmzia a awm lo, chuan lo kir leh thei ka ni lo", a ti ve sap a.
" Midang an awm em ni?", beidawng ru zet a ka tih chuan a lu a lo bu nghut a.
" Aw, pasal ka nei dawn mi tu emaw min hrethiam em em tu, min hmangaih a min dawm thiam tu, a kiangah chuan ka him a ka thla a muang bawk, tu emaw ka thinlung hmu tlang a venghim tlat tu", ka mit a chiang tak a melh kar chung chuan a ti a.
Thawk ka la hawk a ka awm zawn tawt up up mai chu engtia tih chi nge pawh ka hre lo, beiseina chhete ka la neih ve teh pawh an thamral ta, tih theih lah ka nei der si lo, hetiang a tlangval a pumpa han awm chu a tlawm thlak a, hmangaihna chuan ti lo thei lo in min siam lawi si.
" I hlim ang maw? I duh thlanah chuan i inchhir lo ang tih i chiang meuh a maw?"
"Umm", a bu nghut nghut a
" Aw a tha a lawm, i hria em kei ni lo in nangmah a ni chan tu chu, mahse hei hi hria la i inchhir a lo kir leh i duh a nih chuan i tan he thinlungah hian hmun zau tak ka lo dah reng ang, i hlim nan ka thlah liam ang che a, i duhthlanna chu i natpui ta viau a nih tak leh hmangaihtu i nei tih hre reng la, beisei tak chung in ka lo thlir reng ang che mahse, i hlim ta viau a nih chuan min han hriat tir la keipawn hmalam ka pan ve tawh ang ", dam diai hian ka ti a, ka nuih pah var var a.
A mitah chuan mittui a tling ve pam a, a tah chhuah mai loh nan a inpet ruh fan fan, kuah vawng vawng mai ka duh a chu thil ti tur chuan ka tling zo si lo a ni, ka hmangaih mittui tla chu na tak chung chuan ka kalsan ta a.
Tu emaw ka hmangaihna te hawisan a a thlan chu hmuh ve ka chak a, eng tiang fa ko a tha leh famkim nge a nih ang, a vanneih zia a hriat loh ka hlau a hmu in tawng ngat ila chu mi vannei tak a nih zia ka hrilh nawn fo ngei ang.
"A thinlung kha venhim sak la i tih thin fo ang khan, hmeichhe chak tak phen a hmangaihtu leh duattu thlahlel em em si kha ti na lo la, hmeichhe tumruh tak kha ti beidawng hauh suh ang che, min pek theih loh rinawmna kha nang chuan pe la, ka pek ve theih tak loh hlimna kha pe in hmeichhe hlim tak ah siam ang che" , tiin ka rilru chuan ka chah mawlh mawlh a.
Thla thum lai a liam ve ta a, keipawh intuai fai in, pangai takin ka nung chho ve ta zel a, theihnghilh ni ka nei lo a chutih rualin a hlim ang tih ka ring a ni, a hlimna chu ka duh ber a ni ka tel emaw tello pawh in.
Zing dar ruk a ni a ka phone ri tluk tluk reng chuan min ti harh a, peih loh zetin " Tu nge", ka ti phak chiap a, men pawh ka meng mumal lo.
" Zualtei a boral ", tih thu hi ka hriat hmasak ber a ni, ka harh nghal kawk a, tu nge lo call ka en chuan Azotei a ni, " In fiam na chi pawh a nih loh hi", awih lo zet chuan ka ti a, mahse tap thawm ka hre zawm zat a.
"Mumang em ni?" He thil hi mumang a nih chuan harh chhuahsan ka duh takzet.
Zingkar a chhuah ka tum ut ut chu ka chhungte chuan a chhan min lo zawt thuai a, chhang lo a chhuah mai ka tum chu u Muana leh Kanu in min lo pawt ding a, " Bawiha, khaw nge kal i tum, eng nge awmzia thil thleng a awm em ni? I mitmeng pawh a dik miah lo a nia, chhuak lo mai rawh", an lo ti sawk sawk a, an thil sawi te chu vai ruai hian ka hria a, ka tal leh hrawk thin a min vuan tu te lah chuan tan an khawh ve sauh sauh a, Kapa pawh in kan bul a lo fel der tawh.
"Bawiha, eng thil nge ni a?", Kapa chuan dam zawk hian a ti a.
"Zualtei", tiin " A ni lo awih awm lo lutuk dawt vek a ni ", bah nuai hian ka ti a
U Muana chuan ka hmai a min sawi nawk nawk pah in," Bawiha, eng nge awmzia?", a ti ve leh a.
"Zualtei a boral an ti a nih chu" , ka ti ve thei ta hram a ka sawi chhuak ta chu ka chau hnawk mai hian ka hria.
" Awi ka duh lo ava mak em em ve ! ", Kanu chuan a hmui hup meuh hian a ti a.
Kapa chuan " A pawi hle mai", a ti ve vawng vawng a. Kapa bawk chuan," Bawiha, mipa i nih kha chhel takin i hmachhawn tur a ni", tih pahin ka dar a beng thek thek a
Ka chhungte chuan ka chhuak tur chu min dang ta bik lo a mahse U Muana'n ka bike chuan min kalpui thung a
Kanu leh pa te chan," Lo han kal hmasa ula, keini pawh kan lo kal ve ang" , an ti a
An in bul kan thlen chuan an in leh kawtah chuan mi an lo tam khawp mai a zai ri te tap thawm te a ri nawk a, zam leh huphurh zet chuan ke ka pen ve charh charh a, dawt ni se tiin ka la beisei ru fan a, an inchhung ka luh a ka thil hmuh chuan chung beiseina te chu a ti boral chiang ngei mai.
Ka hmeichhe hmangaih ber mitthi te an dahna thin kuangah an lo zalh a, nunna a nei tawh lo tih hriat tak in a dang bel bawk
Ka dinna ngaiah chuan mu leh mal nei lo zet hian ka ding khawng reng a, Anu in min rawn pan hnai in, min sawi nawk nawk pah hian," Mamte hei Bawiha a lo theng tawh a nia, i ngaih thin em kha, lo en ta che,a chanchin sawi nuam i tih ber a nih thin kha vawikhat tal lo meng leh rawh", tiin a tap hawm hawm a, midang ni lo in keimah chauh a ni min lo hmangaih ni.
Ka hmangaih kut vawt thler chu ka chelh a, " Duati ", tiin ka au a chhawn tu reng ka tawng si lo, a hmui ah chuan ka fawp leh vawng vawng a midang awm ve te pawh chu ka ngaihtuah thei lo, chhang let tu chu sawi loh lumna chhete pawh a nei tawh lo.
"I hlim tur thu i sawi a ni lawm ni? Hlim takin i awm emaw tih laiin hetiang na hi i lo tuar reng si a", tiin nunna nei tawh lo tih hriat taka mu bam chu ka chhuahchhal leh ngawt thin a, ani erawh tui tak a muhil ang mai in a chhing reng mai si.
Lei thuk vawt, thim leh ril raih mai ah chuan an phum ve ta a, ka hmeichhe hmangaih em em hmeltha leh duhawm tak mai kha rannung ten duh tawkin an sua sam tawh ang nga, a vawt a ti dawn lutuk, hmeichhe tumruh tak hlawhtling tur a theihtawp chhuah thin tu kha amah leh a suangtuahna te chu lei chhah tak chuan a khuh phui mup tawh mai si a.
A nun pum kha atan a hmang ngai lo a, " Ni e, he lei natna leh lungngaihna, tuarna leh thawhrimna a khat khawvel tlanbo san in hahdam takin a chawl ta ", tiin mahni leh mahni ka in hnem chawp a mahse amah thlahlel em em tu thinlung erawh a dam phah chuang hauh lo thung.
Tunah chuan hmangaihte chan nat zia ka hre ve ta thinlung a rum vawng vawng a, khawvel hi a ho bik ngawih ngawih mai thin, hma lam kawng a thim mup a nun thlakhlelhna a bo zo a, a nat zia sawi fiah a har a eng tawng mah hian min daih zo lo, a tawng tawh te bawk lo chuan min hrethiam kher in ka ring lo a ni.
Hmangaihna min hriatfiah tir a, hmangaih dan min zirtir a, hmangaihte tel lo a nun erawh keimah a zir a ngai ta si."
Chu chu Zualtei nen a kan thawnthu chu a ni, ka bul thu ka en chuan a mit a lo sen rûm a a hnar a sen hlar ka hmuh chuan ka nuih suk a a nih lah a thu tak em em thung.
" A na viau ang ti raw? Ka hrethiam che Kapa boral khan ka na lutuk Kanu ngat phei chu", min lainat hmel zetin a ti zuai raih a.
" Tunah chuan nunhlui an chang tawh a lawm, thawnthu mai a ni ta"
"Mahse, zawhna ka nei", min rawn thlek pah ha a
" Um, min zawt la"
" Ti nge Zualtei khan a then kher che le, a hmangaih tho si che a"
Aw, ka sawi theihnghilh a ni," Zualtei kha Cancer vang a boral a nia, a hriat chhuah meuh chuan a tlai tawh lutuk a, hmeichhe tuar chhel tak a nih ang in, a nat chang te khan a tuar mai thin a lo nia, in entir a hun leh sum khawhral a duh lo a ni ber, a boral thuai dawn a ni tih a hriat khan a thil tih thin engkim a chawlhsan ta kha a nia, kei ngei pawh kha amah theihnghilh a hma lam pan tur in min duh a, ka hmeichhe hmangaih tak boral lai ka hmuh a ka nat ai chuan ka hmeichhe huat tak nih a thlang zawk a, min hmangaih viau siin misual leh bumhmang ang mai in lem a chan phah ta a ni", ka tih chuan
" Hmeichhe ropui leh danglam tak a ni", a ti a, a thu sawi chu tih mai mai loh zia a mitmengah a lang bawk.
" Tlawh ve ngei ka duh a ni, kan inneih hma ngeiin va kal ang hmiang", phur sarh mai hian a ti a.
Keipawn va tlawh leh ngei ka tum bawk a, a pawi ka ti lem lo,a tuk lama kal kan rawt nghal chuk chuk a.
Zualtei te khaw lam pan chuan kan inkhalh chhuak a ka hnungah Hluhlui'n pangpar a pawm bawr tun a, ama lo lei a ni a nachang a hre khawp mai, hmeichhe hawihhawm tak a ni reuh a.
Thlanmual lam chu kan pan nghal a ka kalna rei deuh tawh mahse ka la hrechiang khawp mai.
Kan kal thla zel a, thlan pakhat a bula pangpar mawi tak tak an par vul chhing chheng na zawn ah chuan kan ding ta chat a Zualtei nu khan pangpar a phun a a mawi thin khawp mai, a rei ve tawh viau chung hian a bansan lo a nih hmel.
Hluhlui chuan a pangpar ken chu a dah nghal sut sut a, ka bula rawn ding leh in," Zualte, min la hre ve lo mai thei Hluhlui ka nia kei chuan i chanchin ka hre fo thin", tiin kan hma a thlan lung chu a be mawlh mawlh a ka lo nuih ve suk, sawi chhun zawm leh in,
" Ka tiam a che Bawiha hi tha takin ka lo enkawl ang, lo lungngai miah suh min ring tawp la i hmangaih ang chiah khan ka lo hmangaih ve ang, hmeichhe rilru tha tak i ni tih ka hria a duhsakna min hlan rawh aw", nelawm zet a nui pah var var hian a ti a
" Ka lo han chho ang aw", tih leh min chhoh san a rual a, a che vel ka thlir chuan nidang a ka lo hmuh ngai miah loh amah a duhawmna chu ka hmu ve ta a.
A kal tak hnu chuan ka hma a thlan chu en in ka tih thin fo ang in ka ngaih zia ka hrilh leh a.
" Ka ngai thei lutuk che tih hi i hre ve em? Tunah chuan hlim tak leh hahdam takin i awm tawh ang ti raw ? I duh ang ngeiin hmalam ka pan tawh ang a, nang erawh theihnghilh ni ka nei ngai lo ang che, he thinlung peng khat hi i ni a i cham reng thin ang" , tiin min chhang let ngai dawn lo mahse zawhna ka zawt leh a.
"Mangtha,nunhlui duhawm", tiin khang nunhlui ka cham reng thin na kha ka thlah liam ve ta a, ni e mihring ka nih a khawvel a ka la cham ve a nih chuan hmalam ka pan ve zel a ngai tawh a ni, chu chu khawvel kalphung a ni.
Khang hun kha ka tan chuan an duhawm a, an hlimawm in, nat chang te pawh awm ve thin mahse thil tam tak ka zir chhuak a tunah nunhlui changin thawnthu an chang zo ta a ngai em em chung si in ' Mangtha' tiin ka thlah liam ve ta a.
( A tawp thleng a min chhiar sak a vang in lawm thu ka hrilh a che, he thawnthu hi thawnthu dang kan chhiar thin te ang a tha a ni lo chung in ka tan chuan a hmasa ber a ni a ka hlut ve hle a ni, sawi tawh ang in a hmasa ber a nih ang in famkim lo leh dik lo lai tam tak a awm a, duhsak tak a a dik lo lai te min hrilh zel turin ka ngen che u a ni, hma ka sawn chhoh ve zel theih nan
KA LAWM E ♡♥)