The Feared Crimson King 24

[B.laltlanhlui]

Alice POV

Heng zawhna te hian ka ngaihtuahna an tibuai takzet. Mahse ka nihna thup a ngaih avangin Lal chu ka zawt ngam ngang lo

"Hria la ka duh chu..." ka sawi chhuah dan tur ka ngaihtuah zui a

"Eng maw ka hriat ang?" Min rawn melh kar a, a chauh hmel in kha hun kha a ngaihtuah chhuah leh avangin a rilru a na a ni mah zawk. A hrereng tawh dawn a ni. A mumang thleng pawhin a hmu zel tawh ngei ang

"I pa chu ka ngaihtuah alawm" ka ti a

A hriatthiam loh hmel em avangin ka sawifiah a "I sawi dan khan tumah an buai pha lo i ti a, mahse kei ka awm alawm. I mi chân tak te kha ka tawrhpui lutuk che" ka sawi zawh chuan a lamah ka kut ka phar chhuak a, ka beisei loh lutuk in min rawn vuan a, in melh dunin kan invuan pah reng

Reilote hnuah kawngka an rawn kik a, vengtu sipai ten engkim a ṭha vek em tih hriat tumin Lal an rawn thlithlai a, kan inthlah nghal vat. Kan pahnih chauh in kan awm leh ta

Zawhna tam tak ka nei a, bul ṭanna tur mai ka hre si lo. "I pa a boral hnu khan indona i ṭan em ni?" Ka ti a

A hmui a ti sawi a, a ding nghal hluai mai "Lal Artus alawm indona ṭan tu chu kei ni lovin" a tih zawh ah pindan a chhuahsan nghal daih. Kawngka a ri nghal bur mai

Ka ṭawng chhuah dan kha ka thlang uluk lo deuh a ni maithei mahse indona chu ama ṭan tho a ni. Anih loh pawhin a pa thah saktu ṭan a ni

A rilru tur hi ka hriatthiampui tho a, a lehlam zawng erawh chuan min hrechhuak anih chuan min that dawn hrim hrim. Ka pa hnen thlen nan min hman loh pawhin min that duh mai ang, a enga pawh chu nise ka hlau ve ve

Kan inhriat tirh aṭang khan kan in ngeih lo in kan in haw/hua ve ve a, a thu ka awih lo in ka ti thinrim fo a, a chhan chu mi ṭha lo taka ka ngaih vang a ni. A ni pawhin chutiang tho chuan min ngai. Ka sam sei tak rawn tla hnuang chu ka bengah ka zep a, inhmu rem thei lo in hun kan hmang char char a, tunah erawh ka hrethiam ta. Mihring mai chauh kan nih tih hi a hriat a ngai. A rilru na hi ka hriatthiampui tih ka lantir hnuah a thil tum te thlak tir ka tum ang. Chu chu ka ti ngei bawk ang

Chhun ah pawh chuan ka hmu miah lo, kan pahnih pindanah chuan ka vei tawn chhen a, ka thil tum te ka ngaihtuah pah neuh neuh bawk. He indona hi ka tihtawp tir thei maithei asin mahse a pa thattu chu ka zawng chhuak ngei ang, tu nge tih hre lo mah ila

Pindana ka vah kual lai te chuan Theodore a lehkhathawn chu ka en ngam tawh lo. A mimal zalenna va su buai ah ka inngai deuh tlat. A nuna thil thleng lian tak min hrilh a ni si a, chu pawh chu nise ka hrechak zek zek mai

A thim thet thet tawh a, Lal Theodore erawh pindanah a la rawn let lo. Tukverh bulah chuan ṭhu in ni tlak thleng chuan ka lo nghak a, zanriah a hun mai dawn!

Tun hunah hian zanriah peih a ni ṭhin sia, ka nghak rei ta viau in ka hria, tumah in min rawn ko bawk si lo. Hmuh ka duh a ni. Helai hmuna chen hi ngaiah ka la nei chiah lo

Kalkawng pakhat mah ka hre lo chungin a vawikhatna atan ka duh ah ka chiang ta, chu chu amah hmuh a ni. Otis a thihna kha ka theihnghilh dawn lo. Lal ka be thei hlauh anih chuan a ngaihdan a sawn phah maithei asin

Thaw la hawk in kawngka lam ka pan a, chhuak zal zalin pawn lam ka pan a, min vengtu sipai te kha tlaiah chuan pawnah an ding tawh lo va, Crimson Lal Theodore hian ka intihhlum ve a hlauh avangin min vengtu tur a lo dah a ni

Bathlar chhuahna pawh an kalh daih. Engemaw ti takin ka thinlung a hlim hle, a chhan pawh min ngaihtuah ang deuha a lan vang a ni, ka ring sual ve thei tho bawk

Hall lam ka pan a, zanriah eina kawng kha ka la hre em ang chu maw, Pi Jane-i ka hmu chiah, tray a chawi a, min lo nuih sen sen mai

"Hello, Ms Alice!" Aw zangkhai vahin min lo chhawn a "Tlai Chibai Pi Jane, Alice tia koh min tiam kha" tiin ka lo nuih let a

"Aw ni tak e, tihpalh lutuk Alice" a ti a

A mize nelawm lutuk hian a ti ngainat awm riau a ni

"I zanriah tur rawn ken che ka tum a" tih pahin tray a sa leh thlai chu min hmuh a "I ril a ṭam tawh hle a ni ang maw, helam i rawn pan danah" min fiam leh zeuh a, ka lo nui ker ker "Zanin chu lal kiangah zanriah kil ka duh a" ka ti a

Pi Jane-i chuan a mitko a san ak a, a ṭhen deuh sak bawk "Tehreng mai, i tray chu ka rawn ken mai dawn che nia" tih pahin min siai zeuh a

"A ngai hleinem keiman ka lo chawi mai ang" min hnial buai hma chuan tray chu ka chawi daih a "Ka lawm e, Pi Jane" hawihhawm deuhin ka bu zeuh a, hallway lam ka pan leh vat

"Awle awle, mahse uh...Pi Alice ka sawi awmzia chu Alice?" A rawn nui hawk hawk a, "Zanriah kilna chu saw lam zawk saw ania" kan awmna piah lam kawng chu nui chungin a kawk a

Ka zak lutuk chu ka biang a sen vek, ka nui tawp ringawt. Han nuih bâwk bâwk chu a nuam hle mai. Mahse infiam hman ka ni rih lo, minute reilote ah Pi Jane-i'n zanriah kilna hall thleng chuan min zui a, kawngka min lo hawnsak a, kan in mangṭha ta

Kawngka hi hawng ve mai ṭhin se ṭha tur, hawn a khar leh kher ngai ṭhin hi a buaithlak, mahse tun hunah chuan a pawimawh ber kher lo

Lal chu dawhkan sei deuh tawp retah chuan a lo ṭhu a, ka va pan lai pawh chu hre awm pawhin a lang lo. Wine no chu vuanin hnuai lam a melh tlat a, eitur chu pakhat mah a khawih lo tih ka hria, ka tray chu zawimuangin ka dah thla a, a piah deuh ah chuan ka va innghat a

"Zanriah hi Wine nen ka lo hmeh pawlh dawn em ni" ka lo fiam deuh zuk a, min melh reng ringawt. Min hre lo der tih lantir nan a in khawlh a, hna a thawk lo ani phawt. Chi dang deuha chet lak ka ngai "Vawiina ka puh che ah khan i tan phur rit ka siam em?" Ka ti a

Lal kianga ka ṭhu chu chhiahhlawh in wine bottle a rawn keng a, ka lu ka lo thing tawp "Aih" ka ti a, Lal chhanna ka nghak reng. Ka lu chhung hi a hmu tlang vek emaw tih tur in min lo en reng a, ngaiah ka nei tawh

"Zanriah min kilpui turin ka duh che chuan mi ka rawn tir ngei ang" a ti sup a, wine a in hnem tawh hle tih ka hre mai

Ka duh angin thil a kal dawn lo tlat mai a

"I kiangah zanriah kil ka duh avangin ka lo kal alawm" tiin ka nuih leh seih a, a thaw leh huk a, a lem leh sek bawk

Tray a sa chhawp chu ka ei tur tawkin ka zai lep a, ka ei lai mekin Lal chu ka lam a rawn hawi a "Min han hrilh teh Alice" a no chu chawi in wine chu a han thing a, ka pa min ti hrechhuak uai uai mai "Engtin nge Lehkha chhiar i thiam a?" A ti a

A pawi zo leh ta

*****

Chhunzawm tur