The Feared Crimson King 25

[B.laltlanhlui]

Alice POV

Ka chhan dan tur ka ngaihtuah pah neuh neuh laiin rawmawl chuan ka hmui ka hru a, mi awmthei fanu tan pawh ziak leh chhiar thiam hi thil thleng zen zen lo a ni.

Amaherawhchu Lal fanu tan erawh awlsam tak a ni thung. Pangngai taka lan ka tum a "Naupangte ka nih lai aṭang khan ziak leh chhiar ka ngaina em em a, chuvangin ka pa in min zirtir alawm" ka ti a

"I pa chuan ziak leh chhiar a thiam chuan mi pawimawh tak a ni ngei dawn anih chu" Lal chuan ka chhan dan hun nghakin a ti a

"Mi pawimawh tak chu a ni lova mahse ram zau tak a nei a, sum lam khawih ngai anih avangin ziak leh chhiar hi chu thiam ngei ngei a ngai" tiin dawt ka han phuahchawp a, a awih ang em chu ka hre kher lo

"Eng pawh nise ka phalna la lova i lo chhiar ruk leh chuan ka hrem ang che" a ti a, zak deuhin ka bu nghat a, engmah ka sawi tawh lo

Lal in a in tur a tlak leh pap hnu chuan kan inbe chhunzawm ta lo "I hriselna ka ngaihtuahpui hle mai che" kan thusawi lai thlak ka duh avangin thil dang ka sawi daih a

"Engvang chuan maw?" Min deuhsawh hmel zetin a han ti a, a rui tawh a ni chiang mai

"I in nasa lutuk hi a hlauhthawnawm, Lal Theodore" ka ti a

"Tsk" tiin min vai a

'Tsk' min ti maw?

"Ka chetdan ah hian i lo buaina tur a awm lo" a mood hi ser thur tak ang mai a ni leh tawh. Khua a chhia a, thli na takin a lo tleh bawk nen glass chu a rawn sawi dar dar a, a ri a ring hle a ni

"I kawppui ka nih avangin ka buaina a ni tlat alawm" ngaihtuah chiang hman lovin ka phun sup a

"Ka hrilh tawh che kha, hetiang hi ka ring ve lo..." ram hmakin Lal chuan min chhang a

A thusawi chu engah mah ngai lo luiin ka awm a "I tattoo ka hmu thei ang em? Aw Lalber" Hawihhawm takin ka han zawt a

"Engvangin? Lawm loh hmel takin Lal chuan min zawt a, engpawh sawi ila a lungawi theih tawh ka ring lo "Ka la hmu ve lova" ka lo ti sam et a

"Min ring lo a ni tiraw, a dik em? A vawi khatna pawh a ni tawh lo" a ti a, zanriah kil na hall ah chuan ṭek a rawn tla a, ka phu chiang lutuk ringawt

Ka sawi chhunzawm zel a "Ka ring che alawm, ka tattoo i hmu tawh a, keiin ka la hmu ve lova, a fair lo ve deuh lo maw?" Ka ti a

"Awle, engpawh ni teh se a" tih pahin uain no chu dawhkan ah a nghat a, a kawr bân a hlim chho a, ka lo thlir dauh dauh mai. Tattoo inang lo ni lo hram se tih ka duh viau rualin inang se ka duhna chu a inzat vel. Ruah rawn sur chuan tukverh a rawn theh ṭhat ṭhat a, chumi ri chauh chu hall ah chuan hriat tur a awm

A kawr bân a thleh zawh chuan bandage a intuam chu a han phelh leh a, tichuan le, a rawn lang ta. Ka ta ang chiah triquetra tereuhte a ni. Rinhlelh rual a ni ta lo

Ka bân rek chu a bân bulah ka han sik tir chet a, mak deuh mai chu kan kut dinglam ah ve ve a awm. Hmun inang ah chiah nei hi chu an vang ve viau ang. A bân chu ka han zut del del a, mawi ti deuha ka en vang vang laiin ka hawi chho chiah Lal nen kan mit a intawng chat mai

Hnung lam ka ngheng leh vat a, ka zak nghal chem chem mai

"Eng vang nge?" Ka aw ka han thian leh phawt a "Tinge i chhinchhiahna hi bandage a i tuam tlat le?" Ka ti a

"A chhan chu ka hmu duh lo alawm" Lal chu a meng kual ralh a, a no chu a tlak leh pap a, a ding hluai mai

"Tinge min hnawl dan tur ringawt i zawn a? Biak che ka duh anih hi" tho ve leh in Lal kawngka lam pana a phei chu ka va um a, min hre lo der lehin dawhkan sei tak chu a kal pel a

"Hey!" Ka hnung zelah tlanin ka pheikhawk bun chu a ri thlek thlek a, ṭek a rawn tla leh chiah chu room chhung a eng vek a, lal chu rawn inher thut in ka khabe a kuai dak a

Khawpui a rawn ri leh rum rum a, min ti phu chiang lutuk chu ka hnung tawlh ringawt. Zanriah kilna dawhkan chu ka su ri rawk a, no a ni maithei e, chhuatah a tla ri bawl a, kan inhnaih tawh bawk si nen dawhkan chu ka ngheng ar ar a, eng thil nge tih a tum le? Hei bak chu ka tawlh thei tawh lo

Kan in hmachhawn lai chuan room a rawn eng leh pup a, a rawn thaw lum ham ham tih pawh ka hria, ka biang a rawn dawm a, min vuan nghet khawp mai

"Min ti lawm lo hle a ni, Alice tereuhte" Lal chuan a rawn ti sup a, a mitmeng vawt raih, pawl ram mai chuan min rawn en tlang thei hialin ka hre mai. Min rawn fawp thut a, zu rim leh rim dang a inchawhpawlh riai riai a, ka thin a phu dut dut a, engmah ka ngaihtuah chiang hleithei lo

Zawi te in min thlah riai riai a, min vawnna a thlah leh lai chuan ka lu te hi a hai muai muai in ka hria, tun lawka thil thleng kha ka ngaihtuah chiang hman lo re re, a hmelah engmah a lang bawk si lo. Amah pawhin zawn nei ang deuhin min en ve reng bawk a

Ka thawk a sak vek, a hmunah ka khawng reng mai. Lal chu a inher vut a, zawi te in a pen a, kawngka lian tak lam panin min chhuahsan daih

Eng thil chiah nge thleng tih ka ngaihtuah zui leh a, kha thil kha chu ka beisei loh ber thil a ni. Min fawp ania, MIN FAWP CHIANG A NI!

Ka hmai chu ka han hup leh a, ka la ngaihtuah zui char char. Ka biang leh beng te hi an sa hut hut mai. Eng thil nge a tih tak hi? Min kalsan daih lehnghal. Min va ti hrilhhai tak em. A thil tih chhan ka hrethiam tih hrilh ka tumna pawh a bo chawpchilh nghal duak mai

Ka hnung lamah Arthur leh chhiahhlawh hmeichhia hian hmuhnawm ti takin min lo thlir reng a, an lo awm ve reng tih ka hrechhuak chiah

"Mangṭha muttui u" lai deuhin ka lo bu nghat a, hmanhmawh lutuk in hall lam ka pan ve a, Lal kalna lam ka chhui pah neuh neuh bawk

*****

Chhunzawm tur