The Feared Crimson King 29

[B.laltlanhlui]

Alice POV

Darkar a liam a, zanriah ei kham a hmawm sawm leh wine no kan dawm zawh chuan Lal pawh ka kaltir thei ta. Lehkha zawng zawng te kha dawhthei takin min en pui thlap a, kan inhnial ka rin tehreng nen thawk dun kan ang zawk mah

Dan kan siam a, hrem an nih theih tur zawng zawng nena kan en chhuah vek hnuah ṭha kan ti dun khawp mai. Hetiang hunah hi chuan Lal hi sual ka ti miah lo, thil sual tih lama ka thawhpui a ang mah zawk. Thil sual chu kan ti lova, a reltu zawk kan ni

Lal hian kei ang bawk hian nuam a tih ve ka ring, ka ngaihtuahna chu duh leh lovin ka lu ka thing a, tun hi chutiang ngaihtuah hun chu a ni rih lo. Zanriah kil zawh ah dan room ka pansan leh a
_______________________________________

Theodore POV

Ni dang ang bawk a ni. Indona hmatawng a awmte chu rawva tak tak niin inbeih dan tur tactic chi hrang hrang an sawi na chuan ka nun an hneh ngawih ngawih. A hmatawng a beih ve ka duh hle mai mahse Alice-i vang chauhin ka bei ve lo

Helai hmun ka cham chhan pawh a ni. A phur ṭhin lutuk avangin ka inhnial nasa a, mahse kan inhnaih phah sawtin ka hria. Ka in pawm duh lo chung hian a bula hun hman hi nuam ka ti. Zanriah kan kil dun te hi ka thlahlel takzet

Ka ngaihdan hi chu min sawh sawn sak thei lovang, amaherawhchu a bulah hian ka hahdam sawng sawng. A rilru hah lai hmel hmuh pawh hi a nuam. Duh a neih apiangin a kutzungpui seh in a sam sei tak hi a khawih ṭhin bawk

Ka ngaihven vak lo chungin min tihlim thei khawp mai. A bula awm reng mai hi ka chak. A mawina hian min zem chiai chiai mai. A rawn thlen girh nena ngaihtuah phei chuan danglam tak a ni tawh

A mitmeng ah hian hlauhna ni lovin tumruhna a lang tawh zawk. A hrisel ṭha in ka hriat tirh nen phei chuan hmuh theih in a danglam tawh

"Aw Lalber?" Tia min lo koh chuan ka harh zawk mai. Thurawn min pe tu mi pasarih te chuan indona map chu an din hual a

"Aw, a ṭha e" lawm lo deuhin an vai chuan ka chhuahtir a, nidangah chuan ka rilru a fim kar zel kha ania, mahse vawiin chu a dang deuh tlat. Alice-i hun nei tlem lutuk rilru hah hmel kha ka mitthla ah a cham reng a, min kiansan thei miah lo

Chhiahhlawhte chu wine la tura tirh ka tum deuh uk a, mahse dan zirna hmuna Alice-i tlawh ka rilruk leh ta zawk

Ka kal chhan tur ka ngaihtuah pah neuh neuh a, mahse Lal ka ni a, chhan a ngai kher lo tiin ka inhneh chawp leh hnuhnawh. Insawifiah kher ngaiin ka hre leh lo, mi min ngaihdan tur ka ngaihtuah ngai vak lo anih kha

Amah tawp hian min thlak danglam hret hret anih hi, ka in dang hman thlawt lo a ni

A kil lamah ka inher a, nu lian lo tak maiin min rawn su chawrh chu ka phu ngei mai "uff" ka ti a

Ka din ngheh hnua hnuai lam ka han en chuan Alice tereuhte-i chuan min rawn melh chho a

"Aw Lalber!" Tia min ko in a nui sen sen a, zak leh hnuhnawh deuhin a tawlh hnung a

"Zei lo lutuk mai" tih pahin ka nui hawk hawk a, mahse thutak deuhin lehkha phek a rawn phar chhuak a "Ka zo ta!" Tih pahin min rawn nuih leh seih a

A zo hman dawn em ni? Nimin maiah khan Dan vel chungchang kha kan sawi dun ania, tunah a zawh chuan zankhuain hna a thawk tihna a ni maw?

"I zo vek tawh maw?" Ka han ti nawn leh a

"Ni e, naktukah chuan mi tangte chungthu kan rel thei tawh ang. Tu pawhin awmna tur an nei vek tawh ang" thawven tawh hmel lutuk in a nui a, hna a thawh rim dan leh a mut tlem dan aṭang hian a tan a pawimawh hle a ni ang

A biang nem tak chu ka va piai a "I ti ṭha lutuk e, Alice" tiin ka fak a, ka chul heuh heuh bawk. Zah hmel deuh in a hawisawn a, a laih hmel takzet

"Zianriah hun hma in ka chawl hahdam thei ang em?" A ti a, a mit hnuaiah dark circle a lang kawk mai

"Tehreng mai, va chawl hahdam rawh" ka ti a, a kal liam hnuah chuan lehkha phek a zawh tawh chu ka la a, nakinah ka ennawn leh ang. Tihsual a neih chuan midang ka ziah ṭhat tir mai ang

Darkar a liam leh fe hnu ah zanriah kil a hun tih hrilh turin Alice-i kawngka chu ka va kik a, chauh hmel zetin khumah chuan a lo hnar sek sek a, a khum bulah ka va ṭhu a, a mithmul sei tak kar aṭang chuan a rawn meng diar diar a

"Aw Lalber"

"Mhmm"

"Dan chu i chhiar chhuak thlap em?"

"Chhiar e"

"Ka hnathawh chu i duhzawng a ni em?" A ti a

"Tehreng mai, i ti ṭha lutuk" ka tawp chat a "Zanriah i ei dawn em?" Ka ti a

"Uh-uh" tih leh blanket a inkhuh ṭhat a rual a, mumang ram ah min chen san daih

Keimah chauha zanriah kil a ngaih hmel....
_______________________________________

Alice POV

Indona chu a zual telh telh a, nitin in ka mite an man ka hmu a, hrehawm ka va han ti tak. Mahse dan dik tak hmanga an chungthu ka rel ve thei zel e, Lal phalna ngeiin a tirah chuan ka dan siam te chu hman an nih ngei theih nan ṭan ka la ang

Lal hnenah engkim a kal tluan thu ka hrilh laiin Dan hming tur a vuah thu min hrilh a 'Alice-i Dan' tih a ni. A tirah chuan mak ka ti ve hle mai. Mahse heng dante hi ka mite hun ṭha petu anih avang leh min fak ve tih a lantir avangin an thawk ṭha khawp mai

Lal chuan Lyrian tang te zinga hliam tuar na tak te chu ka tlawh min phalsak a, hei pawh hi vengtu sipai te venna hnuaiah vek a ni pawi ka ti bik lem lo

Tui leh chhangthawp te ka ken sak ṭhin a, ka bân leh ke hi a kham ve thei ṭhin lutuk. Ṭhenkhat chu an hliam ka tuam sak a, rorelna kal pui dan te ka hrilhfiah in tih hlim ka tum hram hram ṭhin

Min lo hretu an awm ve thei tho na in, ka ring chiah lo bawk. Nula pangngai kawr ka ha a, tanin enkawltu ah min ngai thei tho bawk. Tumahin lal fanu hi hmelma tan ina thawk turin an beisei lovang

Ka thil tih lai hi a dik em tih ka inzawt fo mai. Kar hnih hma lama thing thleng ka hrechhuak....

Mi pali tanna ah khan pakhat chu hliam tuar na bik deuh a awm a, kawngka kan hawng chiah tih ah an zinga pakhat chuan lung hriam tak kengin min lo zuan a

"Thi rawh, Walzenorian uicho!" Tih pahin anchhia min lawh a, ka thi ta ngei dawnin ka hria a ni

****

Chhunzawm tur