The Feared Crimson King 35

[B.laltlanhlui]

Third Person POV

Lal Fanu Alice-i a ṭah mutthilh laiin Lal Theodore chu training pindan ah a thinrimna tih zia awm tumin midang nen an lo inchem vai a, vengtu dang te chu an theihtawp chhuah tura a hrilh hnuah a tha zawng zawng a chhuah avangin tu mahin an cho ngam tawh lo

Huatna leh phatsan ni a a inhriatna chuan a rilru a hneh lutuk a, a hrethiam lo in thudik chuan a tina takzet. A kawppui ni ngei turah a lo ngai tawh a, a tir ah kha chuan a rilru a luah lutuk lo, an ngaihdan a inang ṭhin anih kha!

Doctor a rawn tlan a, sipai bân tliak au riai ruai chu a rawn enkawl a. Theodore chu a la ding reng a, lemziak chu huatna leh thinrimna in a melh ngar ngar. A ngaihtuah zui duh vak lova mahse lungawi lo takin a inher vut a, a kal daih

Thil zawng zawng chuan awmzia an nei ta vek e, Alice-i kha ring lo ang deuha a lan lai pawh khan a lo ring lutuk ringawt. Zanlaia a thawh ṭhin dan leh hmelma lal fapa a hmu ru tih an hrilh aṭang in phatsan ah a inngai a, a rilru a na in mi â ang maiin a lang ta a ni

Lyria lal tan a thawk ah a ngai chiang ta a, mahse lal fapa a lo kuah a hmuh khan an inhrechiang hle tih a hrethiam ta a ni

Lalram tihchhiat a tum mek fanu a lo ni reng anih chu. Unau pahnih te a man avangin hlim tur chu a ni tawh alawm. Lal Artus chu a tlawm tawh ngei bawk ang. Amaherawhchu, Theodore chu a hlim phah chuang miah lo, a thinlung cju na tak a ni

Hall a pan a, a pindana a luh lai te chuan a thinrim lutuk chuan dawhkan tereuhte a vase an khawi chu bangah a vawm keh ṭhuai a

Tih tur ber a hre tawh lo, pindan hi a in pakhat ve mai ah a ngai ṭhin a, mahse tunah chuan a ruak hiau mai. A pindan piah chiah room phei chu a melh ngam tawh lo zawk

Zana a mumang ah te a lo hmu a, ṭap chungin Alice-i chuan a lo ngen ngawih ngawih a, an lo inkuah bawk a, a harh chhuak leh ṭhin. A zan thumna ah chuan Theodore a mit aṭang chuan mittui a rawn hnâm sak a, a ṭah tawp ber chin pawh a hre tawh lo

Tanin thim taka a awm leh hliam a tuar tur lai chu a mitthla ah a rawn lang a, va lak chhuah a, a hliam enkawl a, kuah leh te a chak. Thudik a hriat hma ah khan let leh a duh rum rum. Mahse a thinlung in a khap tlat tawh si a, he indona hi an inkar ti ṭhen tu mai a ni si

A hriat loh laiin a pate Sermon-a chuan ruahmanna a lo nei reng a, Lyrian miten Theodore a pa kha an that miah lo, amah lo tih kual vek zawk a ni. Sipai te hnenah lal chu thah a nih thu leh Lyria ho indona ṭan angin a lo hrilh kual a, a tum angin thil a kal chho zel

Tunah Lal chenna ah a awm ve ta a, a tum ber chu Walzenor Lal nih a ni. Theodore leh Jaxon a that ang a, chumi zawh ah Lyrian mi te a bei leh ang a, rsm pahnih a awp tawh mai dawn a ni. Mahse tibuai tu an awm tlat, chu chu Theodore a kawppui chu a ni

Lord Sermon chuan tihhlum ve hial mai chu a duh a, a chhan pawh chhinchhiahna inang an neih vangin ro a rel ve thei tlat. Theodore a'n a patea hnenah a la hmelhriat tir chiah lova, chhiahhlawh te tih loh ah hmeichhe dang a la hmu chiah lo. Lord Sermon-a chuan Theodore a kawppui chu lal fanu a ni tih leh tan inah a tang tih a la hre lo bawk

A hriat zawng chu zawn chhuah vat a, Jaxon leh Theodore ruala thah ve nghal chu a ni. A hmaah hian an thisen a baw hawk hawk tur a ni
________________________________________

Lal fapa Jaxon POV

Zanriah kan kil laiin Pate Sermon-a leh Theo chu an inhmu thiam vak lova, theo chuan engmah ei lovin a in ringawt a, Pate Sermon-a lahin biak a tum ruh khawp mai

"Min han hrilh teh, ka vahpa duhtak, engtik ah nge i kawppui duhawm tak chu min hmuhtir dawn?" A ti a

Theo chuan hre lo der in a tlak leh pawp a, Pate Sermon hi a ngaina ngai lova, a belhchhah turin a mood a fuh lo hle a ni. Alice-i awmna ka hre miah lo, tumahin a chungchang min hrilh bawk si lova, Lyria ah a chhungte a tlawh anih ka ring leh deuh. Mahse indo laia a haw chu ka ring leh chiah bawk si lo

"Min biak i tum lo em ni?" Patea chuan a ti a

"A mood ah ka cheng lo" Theo chu a meng thip ram a

"I kawppui nen in inti thiamlo tih min hrilh lo hram rawh" Pate Sermon-a chuan a ṭawng a fimkhur hle mai

"Chutiang deuh chu a ni mai" Theo a'n a tih chuan a hawihhawm vang chauhin a chhang tih ka hre mai

"Chu chu a chhan anih chuan tinge chhiahhlawh hnuaihnung zawk te i intih hlim tir mai loh? Ka khum luahlum turin ka iai miah lovang" tiin Pate Sermon-a chuan chhiahhlawh hmeichhia no tung beng nei keng chu a va melh a, chu nu chu a hawisawn hmak

Patea mizia hi a mak ka ti riau mai

Theo chu a tho thurh a, chhuanlam siam in a chhuak daih

Nidanga min rawn tlawh in hetiang hian a awm ngai si lova, ni ṭha lo tak chu a ni ang....

Darkar a liam leh hnu chuan ka muhil ka harh a, ka thaw a chham mai dawnin ka hria. Ka awm ka dawm vang vang a, a na ut ut mai. Thawk ka tum mek laiin thil ṭha lo thleng leh tur awm tlatin ka hria. Ka blanket chu ka paih thla hmak a, kawngka lam ka pan vat. Thil dik lo chu a awm chiang a ni!

Theo ka hmuh vat a, ka hriattir a ngai. Ka awm ka dawm leh vang vang a, na tak a ni ringawt

A kil tawp ka thlen a, ka inher lai mekin thu dengkhawng deuh ka hre ta
"Lord Sermon a'n lal a be buai mek, a nau kan zawn hmuh a ngai! Sermon a'n a nung chungin a duh!" Chu aw chu ka hriat zawng a ni lo

"Khawiah nge kan zawn hmuh ang?" Mipa aw dang chuan a lo zawt ve leh a

*****

Chhunzawm tur