The Feared Crimson King 36

[B.laltlanhlui]

Lal Fapa Jaxon POV

"Sermon a'n chutiang in a sawi loh kha! Kha lamah kal la, keini saw lamah, i hriatreng tur chu, lo hmu fuh che an awm chuan thah zel tur! Lal in a awm te hian min hrechhuak tur a ni lo" a ti a

Ka sa hal pup pup a, ka tihrawl te hi a chawmawl vek. Inher sawk in ka tlan char char. Pan lam tur ber pawh ka hre mai lo. Pate Sermon a'n min lo bei reng anih chu! Bihrukna tur hmun ka zawn vat a, Theo hnen thlen dan ka ngaihtuah a ngai. 'Ka nu, ka pa! Min lo ngaithla hlauh anih chuan khawngaihin min rawn pui hram rawh u'

Room kil tawp ka thlen hnu chuan chhuah rukna kawng dan zirna room a awm kha ka hrechhuak chiah. Chu tih lai tak chuan ka lam pana pen thawm ka hria. Tawlh hnung in bang phenah ka biru a

"Lal fapa pindan chu a ruak! Tu emaw khan va zawng hmu teh u!" An ti a

Dan zirna room ah an rawn tlan chho a, ka hnung lamah an tlan khup khup mai. Eng nge ka tih tak ang? Tanin lamah ka chhuk vat a, kawngka ka khar phui hmak!

Thawk ka la hrawk a, mi an lo kal em tih ka ngaithla vang vang. Ka zia leh ṭan viau tawh. Tan in vang erawh chuan ka hmulthi a ding sung sung mai

Hahdam taka awm ka tum laiin a thim bawk si chu ka hlau lutuk. Thil thang rim leh ṭawih rim in min hual vel a ni ber mai. Ka la bihruk rih deuh a ngai ang

Ka hnung lamah ṭawng thawm ka hre leh a, ka biru leh vat, ngawi rengin ka lo nghak tawp a, kawngka an rawn tlawh hawng leh pawp a "Hei hi tanin a nih hi, mawla" tu emaw hian a rawn au leh a, an rawn khar leh hmak

Min hmuh loh avang chuan ka thaw chhuak hawk a, zawi te a ṭawng ri ka hria a, ka hawi kual a, tumah ka hmu chuang lo "Jaxon?" Min rawn ko leh a

Alice-i a lo ni "Khawiah nge i awm?" Ka lo ti sup a "Hetah hian" tanin aṭang a bân a rawn vai chhuak a "Lalpa ka lawm e" tih pahin ka va pan hnai a

"Eng nge hetah hian i tih?" Tiin ka zawt ṭha leh a

"Lal Theodore nen kan inhmu thiam lo deuh a..." a ti phun nuah nuah a, a lu ah bandage a intuam a, a thawmhnaw pawh a bal hle a ni "Theo a'n a khung che maw?" Mak ti deuhin ka zawt a

A hawisawn daih, min chhang miah lo
"Alice?" Ka han ko nawn leh a

"Aw" a ti a

"Theo hi i hmangaih em?" Ka ti a

A meng zau kawk a, lungngaihna leh rilru natna nasa tak chu a hmelah a lang thei

"Ka hmangaih alawm" a rawn ti ve ta

"I chungah hetiang thil a ti chungin maw?" Ka ti leh a

A thaw chhuak halh a "Dawt ka hrilh a, min biak duh tawh pawh ka ring lo....mahse chumi avang ringawt chuan ka rilru a inthlak phah thei lo" a ti a

"Lo nghak lawk rawh aw" tih pahin ka inher a, tanin kawngka chabi chu ka va la a, a lo inkhai ṭha thlap mai. Alice-i awmna lam ka pan leh a

"Min chhuahtir dawn maw?" A rawn ti zawi sap a

Chhuahtir hi ka tum sa hrim hrim. Mahse rinhlelhna ka la nei tlat. Sermon nen khan an lo thawk dun reng thei. A ni leh lovang. Alice ka hriat ṭhin chu chutiang mi a ni lo. Chabi chuan kawngka chu ka hawng a

"I unaupa nen buaina in neih ka duh lo ania" a tih hnu pawhin tan inah chuan a la ṭhu tlat

"Theo nunna a derthawng!" Ka mittui a rawn luang ngiai ngiai a, Alice i'n min lo kuah chawt a, ka sa hal a reh ve ta, kan dinhmun derthawn zia ka hrechhuak uai uai

"Engtin?" A ti a

Ka inhnit leh hlawp hlawp a, ka chhungkaw neihchhun chan tur anga ka mitthla hian ka ngai ngam hlawl lo. Theo chu thi lo hram se aw

"Shh" Alice chuan ka sam a rawn chul a "A ṭha e, Jaxon! Thil awmdan chu chiang zawkin min han hrilh teh!" A ti a

"Pate Sermon hian Theo nen min thah a tum in ka hria, eng thil nge thleng ka hre tawh lo a, ka tlanchhe tawp mai a ni" ka ti a

"Chuvang chuan em ni helai hmun i rawn thlen?" Alice-i chuan phawk hru in min zawt a

"Aw, ka hre lo" ka mittui chuan ka thawmhnaw a far huh a

"A ṭha e-" tanin kawngka chu an rawn hawng leh a, Alice-i chuan min rawn pawt leh vat a, a awmna ah min pawt lut a, kailawnah pen thawm a rawn hnai telh telh a, min hmu ngei ang!

Alice chuan kawnngka chu zawi te in kalh ang deuhin a khar ṭha a, chabi min pek hnuah bihrukna tur hmun min kawhhmuh a, engmah ka hrechiang tawh lo. Chhuata hnah an phah chuan min khuh hnan a

"Lal fapa chu hetah hian a awm ka ring lo" pakhat chuan nin hmel zetin a ti a

"Ngawi hmak rawh, kan hmuh vat loh chuan, Sermon a'n Lal a that thei dawn lo, kan chungah a ṭuan mai ang" a ti a

Ka mit ka chhing sawk a, ka thak sup sup pawh pawi ka ti tawh lo. Tanin hall chu a rawn eng phei zeuh zeuh a, ka thaw sek sek. Ka thinphu pawh a rang lutuk, min hriatchhuah ka hlau lutuk. Meichher chu tanin zawnah an rawn keng pawh ka hmu thei
_______________________________________

Third Person POV

Alice chuan Jaxon awmna chu an hmuh theih loh nan a khuh ṭha sauh sauh a, mutthilh der a tum lai takin a awmna zawn chu meichher in an rawn ti eng a, a lu a han kan chuan mipa, ralthuam inbel, meichher lo keng hi a hmu a, eng a hmu lo rei tawh hle a ni

Chu pa chu a ding chawt a, a rawn bih nawn leh ngat a, chutih lai chuan Alice leh Jaxon chu an thaw ngam tawh lo. Chu pa chu a inher a, tanin dang a en leh zel a "Tanin hi a ruak deuh vek!" Dawhthei lo zetin a thawhpui chu a va au a

Alice-i'n tun hnai maia a hriat chu tanin aṭanga an lak chhuah te hi an rawn let tawh ngai lo tih hi a ni. Lal nen inhmu thiam lo mahse an chungthu dik taka rel anih a beisei a, an vaiin khaihlum an ni thei tho tih a hre bawk. A dan siam kha an zawm a ring chiah lo bawk

*****

Chhunzawm tur