Third Person POV
Lal fanu naupang tak chu a thaw halh a, a kutah thisen a kai hnuang bawk. Jaxon a'n a lo auh chiah chuan a harh chhuak leh thei hram a ni
"Alice!" A rawn tih nawn leh chuan dawhkan aṭang a rawn chhuk a, nitin in indona ah hetiang thil hi a thleng ṭhin tih ngaihtuah loh hram a tum bawk
"Alice!!" Jaxon chu rawn tho ve in a rawn vuan a, Alice-i kawrfual thisen kai hnuang a han hmuh chuan a hlau thar leh hnuhnawh viau
"Aw" Alice-i aw chu a ri chang chang a ni
"Kan bihruk a ngai ania" Jaxon chuan ngen ngawl takin a ti leh a
Alice-i chu lo inbeng harh thuai in a lu a bu nghat a, Parcival chu chhuatah che miah lo in a lo la thaw ṭawk ṭawk a, a chau ve tawh em bawk a ni.
An unau chuan an in melh leh zeuh ṭhin. A nau in mi nunna a lak vawi khatna anih vangin a rilru put dan tur a hriatthiampui vek
Jaxon chu a awmna aṭang inher in dan zirna room kawngka chu a kalh ṭha sauh a, tu emaw in ruang an hmuh chuan an rawn luh mai a hlau a ni
"Khawilai nge chhuah rukna kawng chu?" Alice chuan a zawt deuh tawp a
Lal fapa Jaxon chu a lu bu zeuh in lehkhabu chhuar a lehkhabu chu pahnih thum vel a la chhuak a, bang ah chuan awng a lo awm ta
Thingphek hlai tak chu a kuai a, lehkhabu te chu a lo ruak hiau a, kawngka tereuhte awm lehin chhuah rukna hmun ṭha tak a ni
Alice leh Jaxon chuan Parcival a hliam tuar chu an hnuk a, kawng lo awm hnungah chuan eng nge awm a hriat loh? Alice chuan Jaxon chu lut turin a hrilh leh a
Thingphek chu chawi kangin a awmna ngaiah a dah leh a
"Eng thil nge tih i tum?" Parcival chuan thei leh thei lovin a lo zawt a
"Lal Theodore ka va chhan dawn...." Alice chuan a ti zawi sap a
"I â ta em ni? Chutiang thleng lul suh se!" Parcival chu a khuh kharh kharh a, a unaunu chu kal lo tura hmin a tum ruh hle a ni
"Duhtawk teh" Parcival chuan Alice-i lehkhabu rem ṭha mawlh mawlh chu dan a tum leh a, mahse engtin mah a awm phah lo
"Emily chhan ngai ve ta se, engtin nge i tih ang?" Alice chuan a unaupa nupui chu a han tehkhin a
"Mahse kan sawi lai hi chu kha pa kha alawm! A bula i kal rualin a lo that ang che Alice! Chu lo ah nangma indona a ni lo ania" Parcival chuan a ti a
"Ka hria alawm, mahse Theodore chuan a hre ve lo" Alice i'n a tih chuan Parcival chuan a hrethiam lo hle mahse a unaunu hian thil tum a neih tawh chuan a ti hlawhtling ngei ṭhin tih a hrechiang tawh lutuk tlat
Parcival chuan kal lo tura dan chu a duh lutuk, mahse bei ve phawt se a ti a ni. A kawppui Emily kha a tan a khawvel a ni ang bawkin hlauhthawn awm deuh ah a awm anga a suangtuah phei chuan a ngaingam lo hial zawk
Lehkhabu chhuar chu a chelh a, engmah sawi lovin an unau chuan an in melh reng a, Parcival chuan a remti tih lantir nan a bu nghut a, a kut a thlah riai riai a, a inkhar fel ṭep
"Jaxon?" Alice chuan a rawn ti sap a, lehkhabu tawp ber a rem fel chiah "Aw?" A rawn ti a
An inhmu thei tawh lova, an la inhre thei tho. Lehkhabu chu a inrem fel em avangin bang chhanah chuan an in au tawn a
"I unaupa ka chhan ang tih ka tiam a, chutih rualin ka unaupa kha lo venghim rawh aw?" Alice chuan a han ngen a
"Ka tiam a che" Jaxon aw ah chuan a tumruh hle tih a hriat theih
Alice chuan chem chu a hum nghet sauh a, ruang let reng chu kal pelin hall a pan a
Hall a a tlan lai te chuan a chem ken chu rit a ti hle mai a, khawiah nge Theodore chu a zawn hmuh ang tih pawh a hrethiam lo. A lo la dam ang nge a thi ang tih thleng chuan a zeldin nasa
Hall ah chuan ruang a let phung hlawm a, hmuh a duh lo viau chungin Lal a tel ve ang em tih a hriat duh avangin a zuk bih leh ṭhin
Walzenor sipai te leh chhiahhlawhte chuan Sermon a phiarrukna an tawrh avangin an thal phung mai a ni
Alice chuan hremhmun a awm ang hialin a inchan a, a tan chuan mangchhia a ni ringawt
An zinga ruang pakhat nunna nei tawh lo tih hriat deuha chhuata lo let reng chu a hmuh hmaih lo nasa, a sam pial tak chu a tawm a, a form hak pawh thisen in a lo bual huh zui mai
Alice-i mittui chu a hnâm sawk a, a ṭhingṭhi nghal rawk mai. Chem chu a kiangah nghat in a zangthal tir ta, a mumang mai ni zawk se a ti hial mai. Pi Jane-i mit aṭanga hlimna de ser ser kha hmuh tur a awm tawh lo, a hmai chu a dâng var pup mai a ni
Alice-i chuan Pi Jane-i khan a phatsan ah ngai mahse a la ngaina em em tho a, a chungah a zaidam em avang leh mi tu pawh, lal thleng pawh in hlim taka a dawnsawn ṭhin vang a ni
Ruang chu kuahin an nunhlui chu a chhui kir a, a ṭap chhuak hawm hawm mai
"Ka pasal nena kan intawn khan ka hlim em em a, chuvang ania engtik niah emaw chuan Lalnu Alice ka la tih che ka ring tlat"
A thusawi chu Alice-i bengah chuan a ri nawn tluk tluk. Thih a phu in a hre lova, mi nunnem leh zaidam, nelawm tak a ni si a
Alice chuan a mittui a tlak theih tawh loh thlengin Pi Jane-i chu a sun a, chumi hnuah chuan room kil khat aṭang thawm a rawn chhuak a
Thinrim tak leh lungchhe tak chung chuan chem chu a hum nghet a, tlan leh in Pi Jane-i ruang chu a kalsan a, a bul vel thil engmah a ngaihtuah tawh lo. A â vek tawh
He indona vang hian mi engzat in nge tuar tawh a, la tuar zel dawn? Tih te a ngaihtuah a, Lal pindan pawna sipai lo inbei chu a hmu a, an hmuh loh laiin kawngka ah chuan a lut ru a
Chhuatah a tluk laiin an lo hmu hman leh si a, an rawn en ṭhap
A dar na nen chuan a thaw hlawp hlawp a, chu veleh Lal chu a hmu ta
An pahnih chuan thinrimna leh natna hran ve ve an tuar a ni
Inthurual ang maiin "Nang maw?" An ti rual ṭhawt a
Theodore chu thinrim in a alh lo chauh, Alice erawh chuan Theodore a lo la dam a hmuh chuan a thawveng huai a, a hahdam sawng sawng
Chhunzawm tur
The Feared Crimson King 38
-
- Posts: 148
- Joined: August 30th, 2023, 7:41 pm
ADVERTISEMENT (A hnuai a milem hi a nia hmeh zeuh tur chu)