The Feared Crimson King 39

[B.laltlanhlui]

Third Person POV

Lal chu a thinrim hle a, a hmeichhe hmangaih chhun in a phatsan anga a ngaih vang chuan a alh lo chauh a ni. Alice leh a ram mite chuan an duh hmu in hnehna an chang ta ah a ngai a!

Darkar rei pawh la liam hma kha chuan Theodore chuan a lama ṭang niin a ring a, Alice chu a engkim a ni. Mahse a lo phatsan reng ah a ngai in mi mawl tak ang mai a ni. A thinlung chu a lo fiam reng anga a ngaihtuah phei chuan a tuar dam thei ta meuh lo

"Theodore!" Alice chuan thaw hlawp hlawp in a ko a, a mitmeng thim tak chu rawn de sawr sawr in a danglam tawh lutuk ringawt. Alice tho chu la ni mahse thisen a kai hnuang a, a hma aiin a cher deuh bawk. Theo chuan a mite zinga mi a that ah a ngai a, rulh let dan tur a ngaihtuah nghal bawk. Chem chu lekin Alice-i awmna lamah a tlan a

Phuba lak a tum ruh khawp mai. Alice pawhin rawn beih tuma Lal rawn tlan a hmuh chuan a rilru a na in a thinrim ve hle bawk. An inzawmna zawng zawng theihnghilh vek a duh hial a ni

Alice chuan chem in a lo indang a, an chem ken chu a intawk sawk sawk mai. An thinlung chu a inhlat leh thung si a ni! Tinge Theodore hian a patea rinhlelh nachang a hriat loh? Tih te chu a ngaihtuahna ah a awm reng a

Theodore lahin lal fanu chu vai fuh tumin a han bei uar sauh a, a lo indang hman chiah chiah zel bawk. Alice-i kut aṭang chuan thisen a rawn chhuak a, Theodore lahin a thapui a chhuah tlat avangin a hneh lo deuh chu a ni

A chak dawn lo tih chu a hria, mahse pawisawi lo tam takin an nunna an chan tawh avangin beih let ngei chu a duh a ni

Chutia an lo buai dun lai reng chuan Sermon chuan a ruahmanna chu fuh ti takin a lo khi vun vun a, a tirah khan Theodore a'n a kawppui kha tunge a ni tih leh an intih thiam lo tih thleng khan a lo hrilh tawh a, lal fanu a hmu chiah, a tattoo aṭang a hre nghal

Mahse a nih tur ang a ni vek tawh. Inthah tuma an inbei lai chu a lo thlir dauh dauh mai a ni. A ngaihah pawh chu aia fuh chu a awm chuang lo

Theodore leh Alice chu an blade a ṭek chhuai rualin an mit a intawng chat a, mahse Lal chu meng rum lehin infiam hman a ni tawh lo tih a tichiang nghal. A blade chuan a nawr leh sawk a

Alice chu chhuatah a tlu hnawk mai. A bân na lutuk chu a dawm leh vawng vawng a, Theodore a'n a rawn pan leh mek bawk

A harh chhuak chiah. Theodore a'n blade a a rawn vai leh chuan a lo indang a, chhuat a khawng ri tlang tlang, a taksa na tawh lutuk chu tuar hram hram in a rawn au a

"Hmelma ka ni lo ania!" Alice chuan a han insawifiah ṭan dawn a, engmah sawi lova a awm reng chuan a tuar phah thei dawn tlat a ni. A in chemvai pui pawh â a inti tawh hle. A tir aṭanga lo hrilh tawh zawk tur a ni a

Theodore chuan ngaithla duh lovin a thinrim lutuk chuan a bual â zo vek. A thusawi engmah a ring duh lo. Dawt bak a sawi a ring lo a ni

Chem chhuata tla chu chhar in beih a tum leh a, Alice-i hlau lutuk chu bang ngheng in a khur dar dar. Hlauhna chuan a tuam hlup hlup a ni ber mai. Thi ngei tawh dawnin a inhria a, engmah tih theih a nei bawk si lo

A nun lo hman tawh te a chhui kir a, chhungkaw kima an awm lai te, a nu nen sakawr chunga an chuan lai te, engkim chu a mitthla ah an rawn lang zut zut. Theodore lah chuan a hrawk zawnah a lo tin reng bawk si

Khawng at in a ding a, a mit a chhing tawp. A nghawng a tai thler hun a nghak tawp mahse engmah a thleng lo. Theodore chuan engtin mah a ti lo anih chu! Hreh zetin a han meng diar diar a, a lo kalsawn daih. Lal chuan a lo that thei bik lo a ni

Theo chuan a ti thei lo reng alawm. Engtiang pawhin lo che mahse na a tawrh tir thei tlat lo. Mi nunna hi lak a hreh ngai lo, mahse tun ṭum chu a thei tlat lo, a dan a dang daih mai

A chem chu lek kang lehin a hrawk ah bawk a va tin leh a, Alice chuan a heh chu a pet fan fan a, a rawn thi sawk a, thinrim tak, lungngai tak bawk siin a mittui a rawn luang ngiai ngiai a, Theo lah in bul a ṭan tawh chu zawh ngei a tum bawk si

Thah chu a duh ngei alawm. Meng zau kawk a, a lo en lai chu blade in a hrawk zawnah a han tin leh a, nem chiah a ngai tawh. Mahse a thei leh tlat lo

"I hreh ani tih sawi lo hram teh!" Sermon chuan a lo auh el a, lal naupang tak hnungah chuan a rawn ding hnai a

"I patea zawk hi alawm hmelma chu, Lyria ni lovin!" Alice chuan hmai dâng lapin a ti ṭawk ṭawk a, Lal in a la rinhlelh tlat chuan a thi dawn tih pawh a chiang lutuk ringawt

Sermon chu a rawn khi leh suk a
"Fiamthu i duh hle mai a, naupangte!" A ti a, a rilru tak chuan engtin nge a hriat tih chu a ngaihtuah daih

"Eng thil nge i sawi?" Lal chuan thu pe takin a han zawt a

"Ser-" Alice i'n a ti chiah Sermon chu a lo inrawlh vat a "A chiang tawh viau lo em ni. Dawt a phuahchawp mai mai anih hi, a tih fo ṭhin ang khan! Bum che a tum anih hi, ti chung hian thah i la hreh dawn em ni?" Deuhsawh zetin a han ti a

Theodore chuan a ha chang ṭhial rap rap in Alice khabe zawn ah a tin leh a, a tih tur chu a sam lutuk ringawt, vih thawih a ni mai

Alice chu a thaw hak a, a mit a chhing tlat a, Theodore chuan hun khawhral leh in a han zawt leh a "Engtin nge i mite hi Lal inah an rawn luh theih?" A ti a

Alice chu a che sawn ngam lo, a chet vaih chuan blade in a hrawk a zai dawn tlat. A rawn phun sep a "Ka mite an ni lo, i patea hnuaia thawk te an ni" A han ti a

"NGAWI HMAK RAWH! DAWT MIN HRILH TAWH SUH ALICE!" Theodore chuan a ankhum leh piap piap a, a biangah mittui rawn far kak chu a kawr tlang in a han hru zeuh a

Chutih lai tak chuan Lyrian sipai lema chang sipai te chu kawngka ah chuan an rawn lut a, an tam vak lo, pathum vel chauh an ni tawh

Alice chuan ngaihdan thar ṭha deuh a nei thut

"Sipai te u, kei hi Lyria lal fanu ka nih angin thu ka pe a che u-" a ti ṭan chiah, Theodore chuan meng zau kawkin a lo en a "Saw pa saw that rawh u!" Tih leh Lord Sermon a kawh a rual a, Lal chuan a kawr nghawng ah ṭham in a lamah a pawt hnai a, a hlau lutuk chu a mit a chhing leh tawp

Mipa ho chuan Lyrian sipai lema chang an ni ang ngeiin Lal fanu thupek chu zawm tur an ni ngei a, mahse tumah an che sawn lo. Sermon chu an han melh zawk zawk a, anmahni ruai tu a ni bawk si a, an thah daih chuan lawmman hmuh tur an nei dawn si lo a ni

Theodore chuan a hrethiam ta chiah mai. Hmuhnawm ti takin an chet dan tur chu a lo ngaichang reng a, Sermon a mi rawih te chuan thupek an nghak ṭhap

"Alice?" Theodore aw chu a fiak ṭhak a, mahse zawi deuh tho siin a kawppui chu a han melh a "Min en rawh" a ti a

Alice chu rawn meng diar diar in a kawr nghawng a vawnna chu a han thlah a

"Eng thil nge thleng?" Sermon chuan hriatthiam loh hmel deuhin lem a han chang leh vel a "Phatsantu kha that la, min rawn beih tum tute hi kan bei dun dawn nia!" A ti bah nuai a

"I sawi dik alawm Pate" Theodore chuan a patea hnungchhawn zawnga ding in Alice chu a thawk khum ham ham a "Phatsantu chu that ang aw" tih pahin a meng thim khup a, Alice-i a tinna chem chu la thla in a inher kual a, a patea awm ding lamah a vit tlum thawih mai

"Hremhmunah kal rawh Sermon" a ti leh hmak a, chumi hnuah muangchangin a chem chu a phawi leh a, a patea chu chhuatah a ṭhingṭhi rawp, thisen a phuh chhuak zuai zuai a, Alice leh Theo chu anchhia lawh in a thi fel der

Alice chu a thaw hawk a, boruak ṭha chu a hip kawk kawk a

Sipai ho chu an ip chawih chawih a, an lal ni mai tura an lo ngaih tawh chhuata thal reng an han hmuh chuan an chiai vek, tlanchhuahna an zawng ruai a, hla thei ang berah an tlan a, zing ni chhuak chuan room chu serthlum rawng in an chei ṭha vek

****

Chhunzawm tur