The Feared Crimson King 40 last chapter

[B.laltlanhlui]

Third Person POV

"Alice" Lal Theodore chuan a la hnungchhawn reng a, mahse a dar chu a la khur der der

Theo chuan inthiamlo hrehawm ti bawk siin a sam a hui pawp a, nuam lo a ti hmel chu hmuh tir loh hram a tum a "Ka tihpalh lutuk, ka tihpalh lutuk ringawt!" A ti ṭha leh a

Alice chuan engemaw sawi tumin a ka a ang zuau a, mahse Theodore bawk chuan a rawn sawi chhunzawm leh a "I chungah leh i ram chunga ka thiltih zawng zawng ah khan min ngaidam dawn nia. Natna leh hlauhna ka thlen tak zawng zawng te nen khan. I unaupa ka tihduhdah dan zawng zawng leh rilṭama ka dah che a, tan ina ka khung vang che pawhin" a inthiamlo lutuk chu a mittui a rawn dir zung zung a, ngaihdam a ngaihna lai zawng zawng chu a sawi kim vek ang

Alice chuan a melh ran ran a, natna leh hlauhna nasa tak pe tu ani tih chu a hai lo, chumi rual chiah chuan a hmangaih ber a la ni bawk si a

"Engtiang pawhin ka rul let ang che, ka tiam a che" Theo chuan a kawr hmawr chuan a hmai a hru leh thuak a "Kan ram pawh hi ka pe ang che, engtikah mah ka rul seng tawh dawn lo che a ni" tiin hnuai lam a melh a, a hmeichhe tihnat ngun em em hmel chu a hmu ngam tawh ngang lo a ni

Alice chuan sawi mai tur pawh a hre tawh lo mahse a mittui rawn tla ve tho chuan ngaihdam mai chu a tihtur tih a hrethiam. Engmah sawi lovin, thil thleng tawh chu koh kir theih a ni lo tih hria in Theodore chu a kuah thlawp a, ani pawh a rawn meng kawk mai. A awmah chuan a hmai phumin a ṭap chiam a, chutiang chuan darkar khat dawn vel an awm ang. An ṭap dun ta chiam a
~~~~~~~~~~~~~~~~~~~~~~~~~~

Kar khat hnuah chuan

Alice chu Parcival a khum puan than var a an khuh ah chuan a ṭhu a, darkar tam fe an inbiak hnu ah Doctor chuan Parcival chu damdawi ei tur a hrilh hnuah a ei duh ta hram a, tunah chuan a muhil tawh a, Alice erawh chuan a ngaihtuahna a lo kawm leh char char

Theodore chuan ni rei la liam lo ah khan chinfel tur a ngah khawp mai. Beih tum tute an tlanchhiat hnu khan sipaite enkawl an ngai a, ruahmanna fel tak siam a ngai bawk

Parcival leh Jackson kha engkim a fel vek tih an chian hma loh chuan biru turin an hrilh a, Theo pawhin Parcival chu enkawlna ṭha tak pek a tiam a, Alice nen an inhmuh pawhin pangngai takin an inbia a, thil tih dan tur an sawi dun bawk

An inkar chungchang chu an la sawi dun ngei dawn tih an hria, an nun zel dan tur thlengin! Lal Theodore chuan thu a sawi tam vak ngai lova, a inkiltawih deuh tlat tawh. Alice-i lah chuan hnawl angah a inngai a, a thil lo tih tawh tak vang a ni tih reng a hre lo

An inkar hlat chhan phena thuruk chu Alice-i'n a kalsan a hlauh em vang a ni. Chu chu a chiang em a ni. A unaupa dam ṭhat hunah Lyria ah a hawsan anih chuan a tuar thei lo hial ang. A thiltih tawh te a ngaihtuah phei chuan a kianga a cham duh a ring lo a ni

Mahse a tello chuan a nun a ruak em em a, engtin nge a dar lehlam tel lova nun a hman theih ang? Damlo a enkawl a hmu a, a unaupa tihlim pah in chhiahhlawh boral ta te a sun lai pawh a hmu reng. A be ngam si lova, a bulah awm se chu kuah vawng vawng a chak a ni

Alice chuan Parcival chu puan a sin ṭhat tir sauh sauh a, inher in a kalsawn a, Lal Theodore nen an inkar hla ta lutuk chu tuar thei tawh lovin biak ngei a tum ta a

Theodore a thil tum erawh a dang daih. Lal a nihna aṭanga chhuk a, Alice chu Walzenor Lalnu nihna pek a duh a, rem a tih phei chuan a sipai rinawm taka ṭan a duh a ni

Alice chuan Rose huanah a va hmu a, chutah chuan thlan pathum a lo awm a, pakhat chu Lalnu thlan a ni a, pakhat chu Lal hmasa zawk niin thlan thar awm belh a awm bawk a, chu chu Pi Jane-i thlan a ni

"Aw Lalber?" Alice chuan hnung lam aṭang a va bia a, Theo chuan ni lum a lo ai leh veng veng a, a sam a chhem phe hlep hlep bawk. A rawn inher a, chhuanlam siama kal leh daih chu a tum a

"Kan inbe lawk thei ang em?" Alice chuan Pi Jane-i thlan en reng chungin Theo chu a be thawp sat a, a tana ruat a ni tlat a, hma lam hun tur an sawi dun ngei a ngai tlat a ni

Theo chu a thaw huk a "Awle" a ti a

"Parcival hi a rawn ṭha chho zel a" tiin Alice chuan a han ti ṭan a

Theo chuan a chhan mai loh avangin a han sawi chhunzawm leh a "Indona pawh a tawp tawh a, Lyria ah i let tir thei ang em?" A ti a

"Tehreng mai" tiin Theo chuan a tiam a

"Kei pawh Lyria ah let ve ka duh a" Alice chuan a ti a

Chu thu a sawi lai chuan Theo chu a thin hnun a chemte vih thawih ang maiin a na ngut ngut a, hnuai lam melh in "Khawngaihin i hnuaia thawh min phalsak rawh, i sipai ang pawhin" tiin a han dil a

"Engtin maw?" Alice chuan a hriatthiamloh hmel khawp mai

Inher in Theo a mitah tak a han en a, a remtihna a lo dil anih chu mawle. Inphahhniam hi thil har tak a ni a, mahse a thei tlang thung si a ni

"I tello in ka awm thei lo, chuvang chuan i hnuaia thawh min phalsak rawh. I chhiahhlawh rinawm tak nih pawh ka duh" Theo chuan a han ti a

Alice chuan meng zau kawkin a han melh chho a, a thusawi mek chuan a ṭhawng hle a ni. A lalram pawh a tan a hlan phal ang tih a lo ring lo a ni

"Thu awmze nei lo anih chu" ti chungin a nui hawk hawk a, Theodore erawh chu a hnual rawih mai

Mahse a dawt chiah a a thiltih hian ṭhingṭhit tir rawih in a ṭap zawih zawih mai a ni

"He kan khawvel hian kan inkar rawn ṭhen hrang mahse ka lo kir leh ngei ang. Chutih hunah chuan i nupui niin Lalnu ah min siam ngei la, kumkhuaa nang nen thlamuang taka rorel dun ka duh a ni" tiin Alice chu a nui seih a, an thinlung pum khat a ni ang bawkin khuanu ruat an nih zia a lang a ni

Alice chu pindanah let in Lal naupang tak nen chuan an inṭhen a ngai ta. An ram ngeiah haw leh ngai mahsela a kawppui chu a ngai dawn hle a ni. Parcival lo dam chiang tawh nen, haw zai an rel ta a

Lal pindan kawngka a va hawn chuan Theo chu tukverh bulah a lo ding reng a, a lo nghak reng a ni. He hun lo thleng tur hi a hreh hle bawk

"Aw Lalber?" Alice chuan a rawn nuih seih a

"Ka hrilh tawh che kha, khawngaihin Theodore tiin min ko rawh, kan intluk reng a ni" tih pahin a inher a, a mitmeng ah chuan lungngaihna a lang chhuak thei hial mai

"Theodore kan kal a hun tawh a" Alice chuan a han ti a

Hreh deuh chungin a han ngaihtuah a, Alice chuan a chhang dawn lova a ngaih avangin a lam pan in a va kuah a "Mangṭha Lal Theodore" a ti sup a, lal chuan kuah let a chak ngawih ngawih mahse a insum hram hram a, chumi ti tur pawhin thiam lohna nei tlatin a inhria a, Alice erawh chuan a chetdan maksak tak chu ngaihven vak lovin an mit a intawng chat a

"Inenkawl ṭha rawh aw Alice" Theo chuan a ti ve sup a, a thinlung chu a na in a lu te chu a vir muai muai a, duh se chuan a kalh khum in a chhuahtir miah lo thei. Mahse amah chu rawn duh se a ti a, a kalhkhum anih chuan engtikah mah a hmangaih let ve thei lovang

Alice chu a nui leh seih a, room a chhuahsan laiin a kawrfual chu a hnuk delh delh a

Minute a liam a, Lal chuan a tihtur chu a chiang ngei mai. A lallukhum chu a hlip a, a kut pahnih chuan lallukhum chu a han chawi thla a, an chhungkaw inrochun chu a kalsan ta a ni

A dawhkanah chuan ṭhu in ṭawngṭaina a chham a, room chhung chu en kual lehin pindan chu a chhuahsan a

Lal chenna aṭang chhuk thla in a thawmhnaw a thlak a, chhiahhlawh te puihna in ralthuam a inbel a, helmet chuan a hmai a khuh phui tlat. A kawppui chu amah chauha haw tir a remti thei lo a ni. A rualin a kal ang a, sipai anga inchei danglamin a veng tlat dawn a ni. A nunna leh an inkar thap ngai pawh nise a tum tlat tawh a ni

A TAWP TA
~~~~~~~~~~~~~~~~~~~~~~~~~~

Ziaktu hian bu hnihna tur a ziak mek a, a zawh fel hunah ka rawn let leh dawn nia, in lo chhiar avangin ka lawm e